ယူ ၂၀ ကမ္ဘာ့ဖလားပြိုင်ပွဲဝင် မြန်မာအသင်းရှုံးနိမ့်မှုအပေါ် အမြင်များ
နယူးဇီလန်နိုင်ငံက အိမ်ရှင်အဖြစ် လက်ခံကျင်းပလျက်ရှိသော ၂၀၁၅ ယူ ၂၀ ကမ္ဘာ့ဖလားပြိုင်ပွဲသို့ ပထမဦးဆုံး အကြိမ် ၀င်ရောက် ယှဉ်ပြိုင်ခွင့်ရရှိခဲ့တဲ့ မြန်မာလူငယ်ဘောလုံးအသင်းသည် ပွဲဦးထွက်ပွဲစဉ်အဖြစ် အမေရိကန် အသင်းနှင့် ကစား ခဲ့ရာ ၂ ဂိုး ၁ ဂိုးဖြင့် ရှုံးနိမ့်ခဲ့ပြီး ဒုတိယပွဲစဉ်အဖြစ် ယူကရိန်းအသင်းနှင့် ယှဉ်ပြိုင်ကစားရာတွင် လည်း ၆ ဂိုး ၊ ဂိုးမရှိဖြင့် ရှုံး နိမ့် ခဲ့ရသည်။ မြန်မာလူငယ်ဘောလုံးအသင်း ရှုံးပွဲများ ဆက်တိုက်ကြုံတွေ့ရမှုနှင့် ပတ်သက်ပြီး ပြည်တွင်းမှ ဘောလုံး အားကစား ကျွမ်းကျင်သူများကို ဧရာဝတီသတင်းထောက် ထွန်းထွန်းက တွေ့ဆုံမေးမြန်းထားပါသည်။
ဦးခင်မောင်လတ်
ဥက္ကဋ္ဌ၊ KBZ FC
ကျနော်အသင်းကယှဉ်ကစားနိုင်တယ်ဆိုပေမယ့် ရေရှည်မှာတော့ ကွာလာမှာပဲ၊ ခနာကိုယ် အရပ် အမောင်း ချင်း က ကွာခြားပါတယ်။ နောက်သူတို့က ကမ္ဘာ့အဆင့်တွေအသင်းတွေဖြစ်တယ်။ သူတို့နဲ့ယှဉ်ပြိုင်ရတာ ဖြစ် တဲ့ အတွက် ဒီလိုရလဒ်တွေကို မျှော်လင့်ထားပါတယ်။ ကျနော်တို့အနေနဲ့ သူတို့ဆီက နည်းစနစ်တွေကို အတု ယူရ မယ်။ နည်းပြကြီးရဲ့ နည်းစနစ်တွေနဲ့ပတ်သက်လို့တော့ ပြောစရာမရှိပါဘူး။ အတော်လေး ယှဉ် ကစား သွားနိုင်တာလည်း တွေ့ရပါတယ်။ ပထမဆုံးဝင်ပြိုင်ရတာဖြစ်တဲ့အတွက် နဂိုကတည်းကလည်း ကျနော် တို့ အများကြီး မျှော်လင့် မထားပါဘူး။ မျက်ကန်းမျိုးချစ်တွေလို ငါ့အသင်းပဲနိုင်ရ မယ်ဆိုတာမျိုးဆိုရင် နဂိုထဲက သွားမပြိုင်နဲ့ပေါ့၊ ဒါပဲရှိပါတယ်။
ဦးကျော်လင်းထွေး
အထွေထွေမန်နေဂျာ၊ ရန်ကုန်ယူနိုက်တက်ဘောလုံးအသင်း
ကျနော်တို့အသင်း ရည်မှန်းချက်နည်းနည်းကြီးသလိုဖြစ်သွားတယ်။ အနိုင်လိုချင်စိတ်နဲ့ဖွင့်ကစားလိုက်တဲ့အခါ မှာ ကျနော်တို့ခံလိုက်ရတာပဲ။ တဦးချင်းကျွမ်းကျင်မှုတွေ ကစားပုံတွေအားလုံးကောင်းပါတယ်။ အရပ်အမောင်း ကွာ ပေမယ့် သက်လုံပိုင်းမှာလဲ ကျနော်တို့အသင်းက ကလေးတွေ တပွဲလုံးကစားသွားနိုင်ပါတယ်။ ကျနော်တို့ တိုက်စစ်ဆင်ချိန်မှာ ကောင်းကောင်းလိုက်ကစားပေးမယ့်သူတွေ မရှိခဲ့ဘူး။ကစားကွက်အပြောင်းအလဲတွေ မလုပ်နိုင်ခဲ့ဘူး။ အရန်အင်အား လည်း အရမ်းနည်းပါတယ်။ အခုပါသွားတဲ့အထဲမှာ ကောင်းကောင်းကစားနိုင်တာ ၁၄ ယောက် လောက်ပဲရှိတယ်။ ကျန်တာတွေက အိမ်ဖြည့်သဘောလောက်ပဲ။ နောက်ပိုင်းဒီလိုပြိုင်ပွဲကြီးတွေ ၀င် ရောက်ယှဉ်ပြိုင်နိုင်ဖို့အတွက် လူငယ် အကယ်ဒမီတွေ အများကြီးလုပ်ဖို့လိုပါတယ်။ အခုကအောင်မြင်မှု ကို ဖြတ် လမ်းကလိုက်သလိုဖြစ်နေ တယ်။ သူတို့ အနေနဲ့တော့ မြန်မာဆိုတာကို နေရာလေးတခုဖန်တီး ပေးနိုင်ခဲ့ တဲ့ အတွက် သူတို့ရဲ့ကြိုးစားမှုတွေကို ဂုဏ်ပြုပါတယ်။
ဦးအေးမောင်ကြီး
မြန်မာ့ဘောလုံးအသင်းလက်ရွေးစင်ဟောင်း
ဒီနေ့ပွဲအရှုံးက ၆ဂိုးဆိုတာကြီးကတော့ များပါတယ်။ကစားတာချင်း သိပ်မကွာပေမယ့် ကျနော်တို့ရဲ့ အားနည်း ချက် တွေ ကို ယူကရိန်းအသင်းက အသုံးချသွားနိုင်တာပါပဲ။ သူတို့က လူရော၊အားရော တင်ကစားလာတဲ့ အချိန် မှာ ကျနော်တို့ ကလေး တွေမရတော့ဘူး။ ဒီကနည်းပြကြီးကလည်း အတွေ့အကြုံရှိတဲ့နည်းပြပဲလေ၊ ကိုယ့် အသင်း ရဲ့အားနည်းချက် တွေကို ကိုယ်ပြန်ပြီးဝေဖန်ဆန်းစစ်မှုတွေ လုပ်ရင်ပိုကောင်းပါတယ်။ ရှုံးပွဲတွေနဲ့ ပတ်သက် လို့ ပြန်စဉ်းစားကြဖို့လိုပါတယ်။ ကျနော်တို့အနေနဲ့ကတော့ အခုလိုပြိုင်ပွဲကြီးတွေ ၀င်ရောက်ယှဉ်ပြိုင် ခွင့် ရတဲ့အတွက် အတွေ့အကြုံ တွေ အများကြီး ရပါတယ်။ ဒီကပဲ ကျနော်တို့ရဲ့ အားနည်းချက်တွေကို ပြင်ဆင် သွား ရမယ်။ ဒါဆိုရင်တော့ ကျနော်မြန်မာ့ဘောလုံး အနာဂတ် မှာ အခုထက်ပိုကောင်းလာမှာပါ။
ဦးခင်မောင်ထွေး (ပျဉ်းမနား)
အားကစားကလောင်ရှင်
ဒီနေ့ပွဲရလဒ်ကတော့ တော်တော်စိတ်ပျက်စရာပါပဲ၊ဘယ်သူမှလဲ လက်ခံချင်မှာမဟုတ်ပါဘူး၊ပထမပိုင်းနဲ့ပြီးခါ နီးတွေမှာ ခြေရည်တူယှဉ်ကစားနိုင်ပေမယ့် ဒုတိယပိုင်းအစမှာ ဘယ်လိုဖြစ်သွားလည်း မသိတော့ပါဘူးဗျာ။ ကစားသွားတာလည်း ကောင်းရဲ့သားနဲ့။ ပထမရှုံးပွဲကတော့ ရှုံးသင့်လို့ရှုံးတာပဲ၊ သွင်းဂိုးတွေကလည်း မျှမျှတတပဲ၊ ယူကရိန်းကိုတော့ ကစားရ ခက်မယ် ဆိုတာ သိပေမယ့် ၆ဂိုးဆိုတာကတော့ အရမ်းများပါတယ်။ ကျနော်အမြင်ကတော့ အလယ်ကစားသမားတွေ စုဖွဲ့မှု မကောင်းလို့ဗျ။
ဂိုးပေးလိုက်ရတာတွေမှာ ဂိုးသမားနဲ့နောက်တမ်းတွေပဲ ရင်ဆိုင်နေရတာတွေ့ရတယ်။ နောက်ပြီး လူကောင်ချင်းကွာခြား တဲ့အတွက် သူတို့ယှဉ်လုဖို့ ယှဉ်ပြေးဖို့ မရဘူး။ ကျနော်တို့ကလေးတွေက သေးသေး ညှပ်ညှပ် လေး တွေ။ ကြံ့ခိုင်ရေး ပိုင်းနဲ့ပတ်သက်လို့ တနိုင်ငံလုံးအတိုင်းအတာနဲ့ ပြောရမှာပဲ။ ဘယ်နိုင်ငံနဲ့ယှဉ်ယှဉ် အားနည်းတာပဲ။ ဘောလုံး သမား လေးတွေမှ မဟုတ်ဘူး အားကစားနည်းအားလုံးမှာ ကြုံတွေ့နေရတာပဲ။ ကြီးလာမှလုပ်လို့ကတော့ သိပ် မလွယ်ဘူး။ ငယ်ငယ် ကတည်းက အာဟာရပိုင်းကော နေထိုင်စားသောက်မှု စနစ်တကျနဲ့ လေ့ကျင့်လုပ်ဆောင်ကြရမှာ။ ကိုယ်ခန္ဓာ ကြံ့ခိုင်မှု အတွက်က ကစားတွေကိုယ်တိုင်လုပ်ကြရမှာ၊ နိုက်ကလပ်သွား ကပွဲသွားတဲ့ ပုံစံတွေနဲ့တော့ မရဘူးဗျ။
ကိုယ့်အကြောင်းကိုယ်သိကြပေါ့ဗျာ။ လူကြီးတွေကလည်း အခြေအနေတွေကို သိရမယ်၊ ကလေးတွေဘာဖြစ်နေလဲ ဘာတွေ လုပ်ပေးရမလဲဆိုတာပေါ့။ ပွဲနီးမှလူ ၁၁ယောက်ရွေးပြီးသွားပြိုင်တာမျိုးကတော့ ဘယ်တော့မှ အောင်မြင်မှုက ရနိုင်မှာ မဟုတ်ဘူး။ U-20ကလေးတွေနဲ့ ပတ်သက်လို့ ပြည်တွင်းက မြှောက်စားတာလည်း များသွားတာပါတာပေါ့၊ ကျနော်တို့လည်းအပါပဲပေါ့၊ ကျနော်တို့ကလေးတွေက အမြှောက်မခံဘူးဗျ။ ဖိတာလည်း မခံဘူး၊ တော်တော် ပေါင်းရ သင်းရ ခက်တာ၊ ဘယ်လိုပဲဖြစ်ဖြစ် နယူးဇီလန်နဲ့ပွဲကိုတော့ ကြည့်ရဦးမယ်။ အကောင်းဆုံး တတိယ နေရာလေးနဲ့များ နောက်တဆင့် တက်မလားပေါ့။
The post ယူ ၂၀ ကမ္ဘာ့ဖလားပြိုင်ပွဲဝင် မြန်မာအသင်းရှုံးနိမ့်မှုအပေါ် အမြင်များ appeared first on ဧရာဝတီ.