ONE Championship ပွဲဦး ထွက်တွင် ပြိုင်ဘက် ကမ္ဘောဒီးယား လက်ဝှေ့ ကစားသမား Rin Saroth အား ပထမ အချီတွင်ပင် အနိုင်ယူသွားရန် ယုံကြည်ချက် အပြည့် ရှိကြောင်း ချင်း တိုင်းရင်းသား တီရယ်လ်ထန်က ယနေ့ ပြောကြား လိုက်သည်။
တီရယ်လ်ထန်က“အနိုင်ယူဖို့ ယုံကြည်ချက် အပြည့် ရှိပါတယ်။ သူ (Rin Saroth) က ထိုးတာလည်း အရမ်း တော်ပါ တယ်။ ကျနော့် ဘက်ကတော့ သူ့ထက် ကောင်းအောင် ပိုကြိုးစားထားပါတယ်။ အမိမြေမှာ မြန်မာ ပရိသတ်တွေ အိမ်ပြန်တဲ့ အခါ ပျော်ရွှင်ရအောင် ကျနော် ကြိုးစားမှာပါ”ဟု ပြောသည်။
၎င်းတို့ နှစ်ဦးသည် မတ်လ ၈ ရက် ညတွင် ရန်ကုန်မြို့သုဝဏ္ဏ မိုးလုံ လေလုံ အားကစားကွင်း၌ ပြုလုပ်မည့် ONE Championship; Reign Of Valor ပြိုင်ပွဲကြီးတွင် ၆၈ ကီလိုတန်း ကတ်ချ် ဝိတ်တန်းတွင် ယှဉ်ပြိုင် ထိုးသတ်ကြမည် ဖြစ် သည်။
ပြိုင်ပွဲ၌ မြန်မာ ကစားသမားများ ဖြစ်သည့် ဖိုးသော်နှင့် အန်တိုနီယာ တို့လည်း ပါဝင် ယှဉ်ပြိုင် ထိုးသတ်ကြမည် ဖြစ်ပြီး အဓိက ပွဲစဉ် အဖြစ် ONE ဝယ်သာ ဝိတ်တန်း ကမ္ဘာ့ ချန်ပီယံ ဖြစ်သူ ဆွီဒင် နိုင်ငံသား Zabaztian Kadestam က စိန်ခေါ်သူ ကာဇက်စတန် နိုင်ငံသား Georgiy Kichigin နှင့် ချန်ပီယံ ခါးပတ် ကာကွယ်ပွဲ ယှဉ်ပြိုင် ထိုးသတ်ကြမည် ဖြစ်သည်။
ဖိုးသော်သည် အင်ဒိုနီးရှား ဝါရင့် ကိုယ်ခံ ပညာ ကစားသမား ဖြစ်သည့် legowo နှင့် ယှဉ်ပြိုင်ရမည် ဖြစ်ပြီး မြန်မာ ဘောင် ဆင် နှစ်ထပ်ကွမ်း ချန်ပီယံ ဖြစ်သူ အန်တိုနီယာသည် တိုက်ကွမ်ဒိုတွင် ခါးပတ်နက် ရရှိထားသည့် မလေးရှား သူ Audreylaura Boniface နှင့် ယှဉ်ပြိုင် ထိုးသတ်ရမည် ဖြစ်သည်။
ဖိုးသော်က “အနိုင် အရှုံးထက် မြန်မာတွေ ကမ္ဘာမှာ ဂုဏ်ယူရအောင် ဘယ်လောက်အထိ ယှဉ်ပြိုင်သွားတယ် ဆိုတာ ပြချင်တယ်။ ယှဉ်ပြိုင်သမျှ ပွဲတိုင်း အားလုံးကို အနိုင်ယူမယ် ဆိုတဲ့ စိတ်နဲ့ ကစားသွားမယ်။ အားနည်းတဲ့ အပိုင်းတွေကို အများကြီး ပြင်ဆင်ပြီး လေ့ကျင့် ကြိုးစား ထားပါတယ်” ဟု ပြောသည်။
မြန်မာ ကစားသမား ဖြစ်သူ အန်တိုနီယာ ကလည်း ယခု ပွဲအတွက် အချိန်ယူ လေ့ကျင့် ပြင်ဆင်ထားပြီး ပြိုင်ဘက်အား အနိုင် ရရှိမည်ဟု ယုံကြည်ကြောင်းနှင့် အမြန်ဆုံး ပွဲသိမ်းနိုင်အောင်လည်း ကြိုးပမ်းသွားမည် ဖြစ်ကြောင်း ဆိုသည်။
တီရယ်လ်ထန်နှင့် ယှဉ်ပြိုင်မည့် ကမ္ဘောဒီးယား ခမာ လက်ဝှေ့ ကစားသမား Rin Saroth သည် ခမာ လက်ဝှေ့ ပွဲစဉ် မှတ်တမ်း (၁၁၀-၂၂) ရရှိထားပြီး KWC 3 ဖယ်သာ ဝိတ်ပြိုင်ပွဲကြီး၏ ချန်ပီယံ ပြိုင်ပွဲဝင်ဟောင်း တဦး ဖြစ်သလို ONE Championship တွင် ၂၀၁၅ ခုနှစ်ကတည်းက စတင် ယှဉ်ပြိုင်ခဲ့ပြီး ပွဲစဉ် တချို့ကို အနိုင်ရရှိထားသူဖြစ်သည်။
ONE Championship တွင် ပထမဆုံး ပွဲစဉ် အဖြစ် ယှဉ်ပြိုင် ထိုးသတ်မည့် တီရယ်လ်ထန် အနေဖြင့် ကမ္ဘာ့ ချန်ပီယံ ခါးပတ် စိန်ခေါ်ပွဲကိုလည်း လာမည့်နှစ် အတွင်း ထိုးသတ် နိုင်ရန် ရည်ရွယ်ထားပြီး မြန်မာပြည်သူများ အတွက် ချန်ပီယံ ခါးပတ်ကို ရယူပေးနိုင်ရန် ကြိုးပမ်းမည် ဖြစ်ကြောင်းလည်း ပြောသည်။
ချင်းပြည်နယ် ဟားခါး မြို့နယ်အတွင်း မွေးဖွားခဲ့သူ တီရယ်လ်ထန်သည် အသက် ၁၀ နှစ် အရွယ်တွင် မလေးရှား နိုင်ငံသို့ မိသားစုနှင့် အတူ ထွက်လာခဲ့ရပြီးနောက် ၂၀၀၇ ခုနှစ်ခန့်တွင် အမေရိကန် နိုင်ငံသို့ ထပ်မံ ပြောင်းရွှေ့ခဲ့ကာ နယူးယောက် နှင့် မယ်ရီလန်း ပြည်နယ်တို့ တွင် နေထိုင်ခဲ့ဖူးသူ ဖြစ်သည်။
အမေရိကန်တွင် Freestyle နှင့် Greco-Roman နပန်း ပွဲစဉ်များတွင် ပွဲစဉ် ၅၀၀ ကျော် အနိုင်ယူ နိုင်ခဲ့ပြီး လေးထပ် ကွမ်း နပန်းချန်ပီယံ ဖြစ်ခဲ့သလို Brazilian ဂျူဂျစ်ဆု ပြိုင်ပွဲတွင်လည်း ပွဲ ၅၀ ခန့် အနိုင်ယူထားနိုင်သည့် တီရယ်လ်ထန် အနေ ဖြင့် ONE Championship တွင် ဝင်ရောက် ထိုးသတ်ရန် အတွက် ONE ၏ ဝိတ်တန်း နှစ်ခုတွင် ကမ္ဘာ့ ချန်ပီယံ ဘွဲ့ ရယူထားသူ အောင်လအန်ဆန်ထံတွင် အနီးကပ် လေ့ကျင့် သင်ကြားထားသူ ဖြစ်သည်။
မြန်မာနိုင်ငံသို့ ၁၅ နှစ်ခန့် အကြာမှ ပထမဆုံး ပြန်လာခဲ့သည့် တီရယ်လ်ထန် အနေဖြင့် ပြိုင်ပွဲပြီးပါကလည်း အဘွား ဖြစ် သူရှိရာ ချင်းပြည်နယ်သို့ သွားရောက် လည်ပတ်မည် ဖြစ်ကြောင်း သိရသည်။
The post ပြိုင်ဘက်ကို ပထမ အချီတွင် အနိုင်ယူမည်ဟု ချင်း တိုင်းရင်းသား ကစားသမား ကြုံးဝါး appeared first on ဧရာဝတီ.