နာမည်ကျော် အင်္ဂလန် ဘောလုံးသမား ဒေဗစ် ဘက်ခမ်းတို့ ဇနီးမောင်းနှံကတော့ လက်ရှိ ကမ္ဘာမှာ အချမ်းသာဆုံး အားကစားသမား စုံတွဲလို့ ဆိုရမှာပါ။ သိရသလောက်တော့ ဘက်ခမ်းက ဘောလုံးသမားဘဝကနေ အနားယူပြီး နောက်ပိုင်း Beckham Brand Holdings ကို လုပ်ကိုင်နေပြီး အဆိုပါ လုပ်ငန်းကနေလည်း အောင်မြင်မှုတွေ ရနေသလို ပြီးခဲ့တဲ့ ၂နှစ် အတွင်းမှာတင် သူ့ရဲ့ လုပ်ငန်းက အမြတ်ငွေ စတာလင်ပေါင် ၂၈ ဒသမ ၉၅ သန်းလောက်ထိ ရှိခဲ့တယ်လို့ သိရပါတယ်။

အဆိုပါ လုပ်ငန်းကို အဓိက ဦးစီး လုပ်ကိုင်နေသူတွေနဲ့ ပိုင်ဆိုင်သူတွေကတော့ ဘက်ခမ်းရယ်၊ သူ့ ဇနီးသည် ဗစ်တိုးရီးယားနဲ့ ယခင် ဗစ်တိုးရီးယားရဲ့ မန်နေဂျာ တာဝန်ယူခဲ့သူ Simon Fuller တို့ ဖြစ်တယ် လို့ ဆိုပါတယ်။ Beckham Brand လုပ်ငန်းထဲမှာ Victoria အမည်နဲ့ ဖက်ရှင်လုပ်ငန်းတွေရော ဘက်ခမ်းရဲ့ ပုံရိပ် အသုံးပြုပြီး ကြော်ငြာ ထုတ်လုပ်နေတဲ့ မော်တော်ယာဉ် လုပ်ငန်းတွေပါ အားလုံး ပါရှိတယ် လို့ သိရပါတယ်။

ဘက်ခမ်းရဲ့ လုပ်ငန်းက ၂၀၁၆ ခုနှစ် အတွင်းမှာ စတာလင်ပေါင် ၁၀ ဒသမ ၂ သန်းနဲ့ အခု ၂၀၁၇ အတွင်းမှာ ၁၈ ဒသမ ၇၅ သန်းထိ အမြတ်ငွေ ကျန်ရှိခဲ့တာလည်း ဖြစ်ပါတယ်။ ဘက်ခမ်းရဲ့ ပြောရေးဆိုခွင့် ရှိသူကတော့ အခု အမြတ်ငွေတွေကို ၃ ချိုး၊ အညီအမျှ ခွဲဝေပေးခဲ့တာ ဖြစ်တယ်လို့ ဆိုပြောပါတယ်။

စုစုပေါင်း အမြတ်ငွေက ၂၈ ဒသမ ၉၅ သန်းထဲကနေ ဇနီးမောင်နှံ ၂ ယောက်စာ၊ အမြတ်ငွေ ပေါင် ၁၉ ဒသမ ၃ သန်းကို ပြီးခဲ့တဲ့ ၂ နှစ် အတွင်း ဝင်ငွေ အသားတင် ရရှိခဲ့ကြတာပါ။ ဒါဟာ တလကို ပေါင် ၄ သိန်းလောက်ထိ တဦးချင်း ဝင်ငွေ ရှိနေစေတဲ့ သဘောပါ။

Beckham Brand လုပ်ငန်းဟာ အရင်နှစ်က စုစုပေါင်း ဝင်ငွေ ၄၇ ဒသမ ၅၂ သန်းထိအောင် ရှိခဲ့ပြီး အသားတင် အမြတ် ကျန်ငွေ ၁၆ ဒသမ ၁၉ သန်းလောက်ထိ ရှိတယ်လို့လည်း စာရင်းတွေ အရ သိရပါတယ်။ အသုံးစရိတ်နဲ့ လုပ်ငန်းတွင်း ပြန်လည် ထည့်ဝင်မှုတွေကြောင့်သာ အမြတ်ကျန်နှုန်း လျော့နည်းမှု အနည်းငယ် ရှိခဲ့တာပါ။

ဒါဟာ ဘက်ခမ်းတို့ ပိုင်ဆိုင်တဲ့ လုပ်ငန်းတခုတည်းရဲ့ ဝင်ငွေ ဖြစ်ပြီး ဘက်ခမ်းရဲ့ ပုံရိပ်တွေကို အသုံးပြု ကြော်ငြာထုတ်လုပ်နေတဲ့ မိတ်ဖက် ကုမ္ပဏီတွေ ဖြစ်တဲ့ Diageo, LVS Group, AIA Vitality နဲ့ အခြား မိတ်ဆက်ကုမ္ပဏီတွေမှာလည်း အမြတ်ငွေ ၁ သန်းကနေ ၁၁ ဒသမ ၁၂ သန်းလောက်ထိ အသီးသီး အမြတ်အစွန်း ပိုခဲ့တယ် လို့ ဆိုပါတယ်။ ဒါဟာ ဘက်ခမ်းရဲ့ ပုံရိပ်ကို နိုင်ငံတကာမှာ အောင်မြင် လူကြိုက်များနေဆဲ ဆိုတာကို ပေါ်လွင်စေသလို Beckham Brand အနေနဲ့လည်း နောက်ထပ် နှစ်တွေ အထိအောင် ဘက်ခမ်းရဲ့ ပုံရိပ်ရောင်းချနိုင်မှု အားကောင်နေစေဖို့ ဖြစ်လာစေပါတယ်။

ဟောင်ကောင် အခြေစိုက် Global Brand Group ကဆိုရင် ဘက်ခမ်းရဲ့ ပုံရိပ်တွေကို ရယူအသုံးပြုမှုနဲ့ အမြတ်ကျန်နှုန်း ၂၄ ဒသမ ၉ သန်းလောက်ထိ ရှိတယ်လို့ ဆိုပါတယ်။

ဒီလိုပဲ ဗစ်တိုးရီးယားရဲ့ ဖက်ရှင်လုပ်ငန်း ကလည်း အရင်နှစ်က ဝင်ငွေ ၃၆ ဒသမ ၃ သန်း ရှိတယ် လို့ သိရပြီး၊ တကယ်ဆိုရင် အဆိုပါ ဝင်ငွေထဲကနေ အမြတ် အများအပြား ကျန်နိုင်ပေမယ့် နောက်ထပ် လုပ်ငန်း တိုးချဲ့မှု တခုကို ဗစ်တိုးရီးယား ဖက်ရှင် အနေနဲ့ လုပ်ကိုင်နေတယ် လို့ သိရပြီး အဆိုပါ ဝင်ငွေ အပြင် နောက်ထက် ပေါင် ၈ ဒသမ ၄ သန်းလောက်ပါ ရောနှော ထည့်ဝင် ရင်းနှီးထားတယ် လို့ သိရပါတယ်။ ဘယ်အပိုင်းမှာ ထည့်ဝင် တိုးချဲ့နေသလဲ ဆိုတာတော့ မသိရပါဘူး။

၁၉၉၉ ခုနှစ်ကတည်းက လက်ထပ်ခဲ့ကြပြီး ကစားသမားဘ၀ မှာလည်း အောင်မြင်တယ်၊ ဇနီးသည် ဗစ်တိုးရီးယားကလည်း မော်ဒယ်ဘ၀ ကတည်းက ဝင်ငွေ ကောင်းခဲ့တယ်။

စီးပွားရေးနဲ့ ဖက်ရှင် လုပ်ငန်းတွေကို အတွဲညီညီ လုပ်ကိုင်နေပြီ ဖြစ်တဲ့ ဘက်ခမ်းတို့ နှစ်ယောက်ဟာ စာရင်းတွေ အရ ပြီးခဲ့တဲ့ ၂၀၁၆ နဲ့ ၂၀၁၇ အတွင်း အမြတ်ငွေ စတာလင်ပေါင် ၁၉ ဒသမ ၃ သန်း ရှိခဲ့ပါတယ်။ The Richest ရဲ့ ဖော်ပြချက် အရ ဆိုရင် သူတို့ နှစ်ယောက်ရဲ့ ချမ်းသာ ကြွယ်ဝမှုဟာ အမေရိကန် ဒေါ်လာ သန်း ၄၅၀ (စတာလင်ပေါင် ၃၃၆ ဒသမ ၇သန်း) လောက်ထိ ရှိပြီး မကြာခင်မှာ ဘီလီယံနာ စာရင်းဝင် လင်မယား အဖြစ် တွေ့လာရဖို့ ရှိနေပါတယ်။

Ref: www.businessinsider.com

The post ဘီလီယံနာစာရင်း ဝင်လာတော့မယ့် ဘက်ခမ်းတို့ ဇနီးမောင်နှံ appeared first on ဧရာဝတီ.

အခု ပြောမှာက ဘိလိယက်နဲ့ စနုကာ ကစားသမားတွေထဲက အချောဆုံး၊ အလှဆုံး ဘိလိယက်မယ်တွေ အကြောင်းပဲ ဖြစ်ပါတယ်။ ရုပ်ရည်ချောမောသလို အားကစားလည်း ထူးချွန်တဲ့ နိုင်ငံတကာက အားကစားမယ်တွေပါ။

(၁၀) Emily Duddy ။ ။ အမေရိကန်မှာတော့ အတော်ဆုံး ဘိလိယက်မယ်လို့ ဆိုရင် ရနိုင်ပါတယ်။ TruTV မှာလည်း The Hustlers ဆိုတဲ့ သူမရဲ့ ဘိလိယက် ကစားကွက်တွေကို ပြသနေပါတယ်။ ၂၀၁၀ ခုနှစ် သူမ အသက် ၂၆ နှစ် ကတည်းက ကြေးစား ဘိလိယက်မယ် ဖြစ်နေခဲ့တာပါ။ အဆိုပါ နှစ်မှာပဲ Rookie of the Year ဆုကို ရပါတယ်။ အမေရိကန် အတွက် ၇ ကြိမ်မြောက် ကမ္ဘာ့ချန်ပီယံဆု ရယူပေးထားပြီး အမေရိကန်ကို တရုတ်၊ ထိုင်ဝမ်၊ ဖိလစ်ပိုင်တွေနဲ့ အတူ ရပ်တည်နေစေသူပါ။

(၉) Mary Avina ။ ။ အနီရောင်နတ်သမီးလို့ ချစ်စနိုးခေါ်ခံရသူပါ။ ကယ်လီဖိုးနီးယားမှာ မွေးခဲ့ပါတယ်။ စပိန်-အမေရိကန် ကပြားပါ။ အသက် ၁၄ နှစ် ကတည်းက ဘိလိယက်ကစားလာသူ ပါ။ ပန်းချီလည်း ဆွဲတယ်၊ မော်ဒယ်လည်း လုပ်ပါသေးတယ်။ ဘိလိယက်မယ် ကစားကွက်တွေကို အင်တာနက်မှာ တင်ပြထားတာနဲ့ အတူ လူကြိုက်များပါတယ်။ အားကစား လောကရဲ့ အထင်ကရ ကစားသမားတဦးလို့ သတ်မှတ်နိုင်ပါတယ်။

(၈) Angelina Paglia ။ ။ နတ်သမီးလို့ ချစ်စနိုး ခေါ်ကြပါတယ်။ အမေရိကန်က မစ်ချီကန်ပြည်နယ်မှာ မွေးတယ်၊ အခုတော့ အရီဇိုးနားမှာ နေပါတယ်။ ၂၀၀၄ ခုနှစ်ကတည်းက ကြေးစား ဘိလိယက်မယ် ဖြစ်နေခဲ့သူပါ။ တယောလည်း ထိုးတယ်၊ ရေကူးလည်း ကျွမ်းကျင်တယ်၊ ဘိလိယက် အပါအဝင် ဒီနယ်ပယ် ၃ ခုလုံးမှာ နာမည်ကြီးပါတယ်။ အသက် ၁၀ နှစ် အရွယ်ကတည်းက ဘိလိယက် ကစားတယ် လို့ သိရပါတယ်။ နာမည်ကြီး ပြိုင်ပွဲ ၅ ခုမှာ ဆုတံဆိပ်တွေ အများအပြား ရထားပါတယ်။

(၇) Ewa Mataya Laurance ။ ။ ဘိလိယက်လောကရဲ့ ဘုရင်မလို့ အခေါ်ခံရသူပါ။ အမေရိကန်-ဆွီဒင် ကပြား ဖြစ်ပြီး ၂၀၀၄ ခုနှစ် အမေရိကန် Hall of Fame မှာ ပါဝင်ခဲ့ပါတယ်။ ESPN မှာလည်း စာရေးသူ အဖြစ်ရော သုံးသပ်သူ အဖြစ်ပါ လုပ်ပါသေးတယ်။ ၁၇ နှစ်ကတည်းက ကမ္ဘာ့ဘိလိယက်မယ် ပြိုင်ပွဲဝင်ခဲ့သူလည်း ဖြစ်ပါတယ်။ မူလက ဥရောပမှာ နေပြီး ဥရောပ ကိုယ်စားပြု ပြိုင်ခဲ့ပေမယ့် အခုတော့ အမေရိကန်မှာ နေပြီး ဘိလိယက်ကစားနေပါတယ်။

(၆) Neslihan Gurl ။ ။ Nesလို့ သူ့ကို လူသိများပါတယ်။ တူရကီကပါ၊ ၁၉၉၅ ခုနှစ်က အန်ကာရာအမျိုးသမီး ရေကူးပြိုင်ပွဲမှာ အနိုင်ရပြီး လူသိများလာပါတယ်။ နောက်တော့ ဘောလုံးလည်း ကစားတယ်၊ ဘောလီဘောလည်း ပုတ်သေးတယ်။ အားကစားနည်းစုံကနေ ဆုဖလားစု ၃၀ လောက် ရထားပါတယ်။ ဖိနပ်တွေကို ဒီဇိုင်းေ ရးဆွဲ ဖန်တီးသူ အဖြစ်လည်း နာမည်ရပါတယ်။ ၂၀၁၀ ခုနှစ် နောက်ပိုင်းမှာမှ ဘိလိယက်မယ် ဖြစ်လာပြီး Tri-State ချန်ပီယံ ဖြစ်လာပါတယ်။

(၅) Borana Andoni ။ ။ ပျားဘုရင်မလို့ ချစ်စနိုးခေါ်ကြပါတယ်။ အခုတော့ နယူးယောက်မှာ နေပေမယ့် အာမေးနီးယား ဘိလိယက်မယ်ပါ။ သူမက တနေ့တာ အချိန် အများစုမှာ ဘိလိယက် ကစားနေလေ့ ရှိသူပါ။ ၁၀ နှစ် ကတည်းက အမေရိကန်ရောက်လာတယ်၊ ၁၂ နှစ်မှာ ဂီတကျောင်း တက်တယ်၊ စန္ဒရားတီးတယ်၊ တယောထိုးတယ်၊ ၄ နှစ်လောက် ကြာပါတယ်။ နောက်တော့ ငွေကြေးစီမန့်ခန့်ခွဲမှု ပညာနဲ့ ဘွဲ့ရတယ်၊ တက္ကသိုလ်တက်နေရင်းက ဘိလိယက်မယ် ဖြစ်လာပြီး ၂၀၁၀ မှာ Amsterdam Straight Pool ချန်ပီယံ ဖြစ်ခဲ့သလို တနှစ်တာ အကောင်းဆုံး ဘိလိယက်မယ် ဖြစ်လာပါတယ်။ Tri-State Tour ပြိုင်ပွဲမှာလည်း ဆုပေါင်းများစွာ ရရှိထားပါတယ်။

(၄) Jeanette Lee ။ ။ Billiards Digest က ရွေးချယ်ခံရတဲ့ အကောင်းဆုံး ဘိလိယက်မယ် ဖြစ်ထားသူပါ။ နိုင်ငံ ကိုယ်စားပြု အနေနဲ့ ဆုပေါင်း ၃၀ ကျော် ရထားပါတယ်။ အရင်က ကမ္ဘာ့ အကောင်းဆုံး အဆင့် ၁ ဖြစ်ဖူးတယ်၊ အခုတော့ အဆင့် ၃ ပါ။ ၂၀၁၂ ခုနှစ် ဘိလိယက် Hall of fame မှာလည်း ပါတယ်၊ ၂၀၁၃ ခုနှစ် BCA Hall of fame မှာလည်း ပါတယ်၊ ၁၉၉၈ ခုနှစ်အတွက် WPBA ကနေ ရွေးချယ်တဲ့ တနှစ်တာ အကောင်းဆုံး အားကစားမယ်လည်း ဖြစ်ခဲ့ပါတယ်။ အခုတော့ အမေရိကန်က အင်ဒီယားနားပြည်နယ်၊ အင်ဒီယာနာပိုလစ်မှာ နေထိုင်လျက်ရှိပါတယ်။

(၃) Jennifer Barretta ။ ။ 9MMလို့ သူ့ကို လူသိများပါတယ်။ ပင်ဆယ်ဗေးနီးယား ပြည်နယ်သူ ဖြစ်ပြီး 9-ball ကစားနည်း တခုတည်း ကစားသူလည်း ဖြစ်ပါတယ်။ သဘာဝအတိုင်း ဓာတ်ပုံရိုက်ကူးမှုတွေမှာလည်း မော်ဒယ် အဖြစ် ပါရှိတတ်ပြီး Play Boy မဂ္ဂဇင်းမှာ ၄ မျက်နှာအပြည့် ဖော်ပြခံရဖူးပါတယ်။ ESPN ကနေ ပေးအပ်တဲ့ ဆွဲဆောင်မှု အရှိဆုံး အားကစားမယ် ၂၅ ဦးစာရင်း အတွက် ဆန်ကာတင် စာရင်းဝင်ခဲ့ပါတယ်။ InGameNow.com ရဲ့ ဆွဲဆောင်မှု အရှိဆုံး အားကစားမယ် ၁၆ ဦးစာရင်းမှာလည်း ပါခဲ့ဖူးပါတယ်။

(၂) Anastasia Luppova ။ ။ ရုရှမှာတော့ လူကြိုက် အများဆုံးနဲ့ အကောင်းဆုံး ဘိလိယက်မယ် ဖြစ်ပါတယ်။ လူကြိုက် အများဆုံး ဘိလိယက်မယ် စာရင်းမှာလည်း ထိပ်ဆုံက ရပ်တည်နေသူပါ။ ဥရောပ ဘိလိယက် ချန်ပီယံ ၂ ကြိမ် ဖြစ်ထား ပါတယ်။ မော်စကို ဘိလိယက်ပြိုင်ပွဲမှာရော Russian Master of Sport ပွဲစဉ်တွေမှာပါ အနိုင်ရဖူးပါတယ်။ ၂၀၀၉ ခုနှစ် Miss Billiards မှာလည်း ဗိုလ်စွဲခဲ့ပါတယ်။

(၁) Shanelle Loraine ။ ။ သူမကို ဂျပန်မှာ မွေးပါတယ်။ ဂူအမ်မှာ ကြီးပြင်းတယ်၊ ဒါကြောင့် တချို့ကလည်း ဂူအမ်ရဲ့ အကောင်းဆုံး ဘိလိယက်မယ်လို့ ဆိုကြပါတယ်။ လူကြိုက် အများဆုံး ဘိလိယက်မယ် တွေထဲက တဦးပါ။ ၂၀၀၀ ခုနှစ်ကတည်းက ဘိလိယက် ကစားနေခဲ့တာပါ။ ဖလော်ရီဒါ တက္ကသိုလ်မှာ ကျောင်းတက်ရင်း ၄ နှစ်ကြာ ကျောင်းကိုယ်စားပြု ကစားပါတယ်။ တခြား ဘိလိယက်မယ်တွေ လို ပြိုင်ပွဲကြီးတွေမှာ ဗိုလ်စွဲထားတာ မတွေ့ရပေမယ့် ဆွဲဆောင်မှု ကောင်းခြင်းတွေက ကမ္ဘာကျော်ပြီး လူသိများနေစေတာပါ။

Ref: www.wonderlist.com

The post ဆွဲဆောင်မှု အရှိဆုံး ဘိလိယက်မယ်များ appeared first on ဧရာဝတီ.

အလီရှာ အူစမာနော့ဗ် က ရုရှား နိုင်ငံသား၊ အင်္ဂလန် ပရီးမီးယားလိဂ်ရဲ့ နာမည်ကြီး အာဆင်နယ် ဘောလုံး အသင်းပိုင်ရှင် နှစ်ဦး အနက် တဦးလို့လည်း ဆိုနိုင်ပါတယ်။ အာဆင်နယ် အသင်းရဲ့ ရှယ်ယာ အများဆုံးကို အမေရိကန် နိုင်ငံသား အီးစတန်လေ ကရိုးကီး (E. Stanley Kroenke) က ၆၇ ဒသမ ၀၅ ရာခိုင်နှုန်း ပိုင်ဆိုင်ထားပြီး အခု ရုရှားသူဌေးကြီး အလီရှာ အူစမာနော့ဗ် (Alisher Usmanov) ကတော့ ရှယ်ယာ ၃၀ ဒသမ ၀၅ ရာခိုင်နှုန်းကို ပိုင်ဆိုင်ထားပါတယ်။

၂၀၁၇ အတွင်းက Forbes ရဲ့ ဖော်ပြချက် အရ အလီရှာရဲ့ ချမ်းသာမှုက အမေရိကန်ဒေါ်လာ ၁၅ ဒသမ ၁ ဘီလီယံ ရှိတယ် လို့ ဆိုပါတယ်။ ဒါဟာ ကမ္ဘာပေါ်က အချမ်းသာဆုံး စာရင်းမှာ ထိပ်ဆုံး လူ ၁၀၀ စာရင်း ဝင်နေစေပါတယ်။ ဒါတောင် အခုနှစ်ထဲမှာ ပိုင်ဆိုင်မှု လျော့ကျသွားတာလို့ ပြောရမှာပါ။

အကြောင်းက ၂၀၁၃ ခုနှစ် ဒီဇင်ဘာလအတွင်းက Bloomberg ကနေ ဖော်ပြတဲ့ ဘီလီယံနာ စာရင်းမှာ အလီရှာက ပိုင်ဆိုင်မှု ၁၉ ဒသမ ၆ ဘီလီယံထိ ရှိပြီး ကမ္ဘာမှာ အချမ်းသာဆုံး အဆင့် ၃၇ ချိတ်ခဲ့ဖူးတာလည်း တွေ့ရပါတယ်။ ဒီလိုပဲ ၂၀၁၄ ခုနှစ် မေလအတွင်းကလည်း The Sunday Times ကနေ ဖော်ပြတဲ့ လူချမ်းသာ စာရင်းမှာ အလီရှာက အင်္ဂလန်ရဲ့ ဒုတိယမြောက် အချမ်းသာဆုံး ပုဂ္ဂိုလ်ဖြစ်ခဲ့ပြီး ပိုင်ဆိုင်မှု စတာလင်ပေါင် ၁၀ ဒသမ ၆၅ ဘီလီယံ ရှိတယ်လို့ တွေ့ခဲ့ရပါတယ်။

အလီရှာကို ၁၉၅၃ ခုနှစ် စက်တင်ဘာ ၉ ရက်နေ့က မွေးပါတယ်၊ အခု အသက် ၆၄ နှစ်ထဲမှာပါ။ လက်ရှိ ဆွစ်ဇာလန်မှာ နေထိုင်ပါတယ်၊ မော်စကို နိုင်ငံတကာ ဆက်ဆံရေးသိပ္ပံကနေ ကျောင်းပြီးပါတယ်၊ ရုရှရဲ့ ဒုတိယမြောက် အကြီးဆုံး ဆက်သွယ်ရေး အော်ပရေတာ MegaFon ရဲ့ ပိုင်ရှင်၊ USM Holdings ရဲ့ ပိုင်ရှင်၊ ရုရှရဲ့ အကြီးဆုံး အင်တာနက် ဝန်ဆောင်သူ Mail.Ru Group မှာ ရှယ်ယာဝင်၊ အာဆင်နယ်မှာလည်း ရှယ်ယာတွေ ပိုင်တယ်၊ Finch Farm ကို ထောက်ပံ့ကြေး ပေးထားသူ ဖြစ်တယ် လို့ လူသိများပါတယ်။

ချမ်းသာတယ်၊ အလှူအတန်းလည်း ရက်ရောတယ်၊ ဆက်ဆံရေးကောင်းတယ်၊ ဒီကြောင့်လည်း Order For Merit to the Fatherland အဆင့် ၄ ကို ပေးအပ်ခြင်း ခံထားရတယ်၊ Order of Alexander Nevsky, Order of Honour, Order of Friendship စတဲ့ ဆုတံဆိပ်တွေကို ပေးအပ်ခြင်း ခံထားရသူပါ။

သတ္တုဖူးဖော်ရေး လုပ်ငန်းတွေနဲ့ အတူ အောင်မြင်ချမ်းသာလာတဲ့ အလီရှာက အခု နောက်ပိုင်း ရင်းနှီးမြှပ်နှံမှုနဲ့ အတူ ပိုပြီး ချမ်းသာလာပါတယ်။ ၂၀၀၈ ခုနှစ်မှာ ရုရှား ကလပ် ဒိုင်နမိုမော်စကိုကို စပွန်ဆာပေးတယ်၊ အသင်းရဲ့ အကျႌ စပွန်ဆာ နေရာမှာ သူ့ရဲ့ လုပ်ငန်း အမည် Metalloinvest ဖြစ်သွားခဲ့ပြီး အဆိုပါ ဂျာစီ စပွန်ဆာ အတွက် အသင်းကို ဒေါ်လာ ၇ သန်းပေးခဲ့သူလည်း ဖြစ်ပါတယ်။

အခုလို ကမ္ဘာ့အချမ်းသာဆုံး လူ ၁၀၀ စာရင်းဝင် အလီရှာက ချမ်းသာမှု တခုတည်းနဲ့တော့ လူသိများ နာမည်ကြီးဖို့ သိပ် မရှိပါဘူး။ ဒါပေမယ့် အလီရှာဟာ ကမ္ဘာပေါ်မှာ လူသိ အများဆုံး ဘီလီယံနာတွေထဲက တဦးပါ။ ဘာကြောင့်ပါလဲ။ အဓိက သူ့ကို လူသိများစေတဲ့ အချက်ကတော့ ပရဟိတ လုပ်ငန်းတွေ လုပ်လို့ အလှူအတန်း ရက်ရောလို့ပဲ ဖြစ်ပါတယ်။ အင်္ဂလန် နိုင်ငံ၊ လန်ဒန်မှာ သူထည်ထောင်ထားတဲ့ Art, Science and Sport ဆိုတဲ့ လူမှု ထောက်ပံ့ရေး အဖွဲ့ ရှိပါတယ်၊ အနုပညာ၊ သိပ္ပံနဲ့ အားကစား ကဏ္ဍတွေမှာ လိုအပ်နေသူတွေကို ထောက်ပံ့မှုတွေ လုပ်ဆောင်နေတာပါ။

အနုပညာမြတ်နိုးသူ တဦးလည်း ဖြစ်တဲ့ အလီရှာက ၂၀၀၇ ခုနှစ် စက်တင်ဘာ ၁၇ တစ်ရက်တည်းမှာတင် ပေါင် သန်း ၂၀ ဖိုးလောက် ပန်းချီကားတွေ ဝယ်ယူခဲ့ပါတယ်၊ Mstislav Rostropovich ပန်းချီပြခန်း တခန်းလုံးကို ဝယ်လိုက်တာပါ၊ ဒီပန်းချီ ပြခန်းက ဘဏ္ဍာရေး အခက်အခဲကြောင့် လန်ဒန်မှာ လေလံတင်နေတဲ့ ပြခန်းပါ၊ ဒီပြခန်းကို ဝယ်လိုက်ပြီး အဆိုပါ ပန်းချီ ကားတွေ အားလုံးကို ရုရှ၊ စိန့်ပီတာ စဘတ်က သူ့အိမ်အနီးမှာ ပြောင်းရွှေ့ပြီး ပြခန်း ပြန်ဖွင့်ပေးခဲ့ပါတယ်။

အဆိုပါ လအတွင်းမှာပဲ ရုရှားသရုပ်ဆောင်မင်းသား၊ ၁၉၈၅ မှာ အမေရိကန်ကို ပြောင်းရွှေ့နေထိုင်ခဲ့သူ Oleg Vidov စုဆောင်း ထားတဲ့ ရုရှ ကာတွန်းလက်ရာပေါင်း များစွာကို ထပ်မံ ဝယ်ယူခဲ့တာလည်း တွေ့ရပါတယ်။ အဆိုပါ ဝယ်ယူ စရိတ်ကို ဒေါ်လာ ၅ သန်းကနေ ၁၀ သန်း အတွင်း သုံးခဲ့တယ် လို့လည်း သိရပါတယ်။ အလီရှာက အဆိုပါ ကာတွန်းတွေ ဝယ်ယူပြီး ရုရှား ရုပ်မြင်သံကြားက ကလေးကဏ္ဍ အတွက် ပြသဖို့ ပြန်လည် လှူဒါန်းခဲ့တာလည်း တွေ့ရပါတယ်။

ရုရှား စက်မှု လုပ်ငန်းဆိုင်ရာ အဖွဲ့အစည်းပေါင်း များစွာမှာ ဘုတ်အဖွဲ့ဝင်၊ ဥက္ကဌ ရာထူးတွေကို ရယူ ထမ်းဆောင်နေသူ လည်း ဖြစ်သလို ရုရှား အခြေစိုက် အနုပညာနဲ့ အားကစားဆိုင်ရာ ပရဟိတ အဖွဲ့ကိုလည်း ထူထောင်ထားပြီး ရုရှားမှာ ရှိတဲ့ မြို့ပေါင်း ၁၀၀၀ မှာ ထောက်ပံ့ရေးတွေ လုပ်ဆောင်နေတာလည်း တွေ့ရပါသေးတယ်။ ၂၀၁၃ ခုနှစ် အတွင်း The Sunday Times ရဲ့ ဖော်ပြချက်မှာကိုပဲ အလီရှာဟာ ကမ္ဘာပေါ်က အလှူအတန်း အများဆုံး စာရင်းဝင်သူ တဦး ဖြစ်နေခဲ့ပြီး ဖော်ပြချက် မတိုင်ခင် ၁၂ လ အတွင်း လှူဒါန်းမှု အားလုံးပေါင်း စတာလင်ပေါင် ၁၁၂ ဒသမ ၆ သန်းဖိုးလောက် ရှိတယ်လို့ ဆိုပါတယ်။

၂၀၁၄ ခုနှစ် ဒီဇင်ဘာ ၄ ရက်မှာ အလီရှာက ဆေးပညာနဲ့ ရူပဗေဒဆိုင်ရာ နိုဗယ်ဆုရှင် ဒေါက်တာ James Waston ရဲ့ နိုဗယ်ဆုတံဆိပ်ကို ဒေါ်လာ ၄ ဒသမ ၉ သန်းနဲ့ ဝယ်ခဲ့ပါတယ်။ ဂျိမ်းက လေ့လာရေး လုပ်ငန်းတွေ အတွက် လှူဖို့ အဆိုပါ ဆုတံဆိပ်ကို ရောင်းချခဲ့တာ ဖြစ်ပြီး အလီရှာကလည်း အလှူငွေ ထည့်ဝင်တဲ့ သဘောနဲ့ ဆုတံဆိပ်ကို ဝယ်ခဲ့တာပါ။ ဒါပေမယ့် ဝယ်ယူပြီးချင်းပဲ အလီရှာက ဆုတံဆိပ်ကို ဂျိမ်းဆီ ပြန်ပေးခဲ့ပါတယ်။ သူက အခု ဆုတံဆိပ်ကို ဂျိမ်း ရောင်းရတဲ့ အဓိက အကြောင်းက ကင်ဆာဆိုင်ရာ လေ့လာရေးတွေမှာ အသုံးစရိတ် ပိုရဖို့ ဖြစ်ပါတယ်။

“ကျနော့် ဖခင်က ကင်ဆာနဲ့ သေဆုံးခဲ့သူပါ၊ ဒီလိုပဲ အခြား ကင်ဆာ ဝေဒနာရှင်တွေကို ကုသနိုင်ဖို့ လုပ်ဆောင်မယ့် အခု လေ့လာချက် အတွက် ကျနော် လှူဒါန်းခွင့် ရလို့ ကျေနပ်ပါတယ်၊ ဆုတံဆိပ်ကလည်း မူလ ဆုရရှိသူ လက်ထဲမှာပဲ ရှိသင့်ပါတယ်” လို့ ပြောပြီး တံဆိပ်ကိုလည်း ပြန်ပေးခဲ့တာကြောင့် အားလုံးက အံ့သြစေလောက်အောင် လှူဒါန်းတတ်သူလည်း ဖြစ်ခဲ့ပါတယ်။

အခု နောက်ဆုံး သူ့ရဲ့ အကြီးမားဆုံး လှူဒါန်းမှုကတော့ ရောမမြို့က Basilica Ulpia အဖွဲ့ကို ပြန်လည် ကယ်ဆယ်ရေး လုပ်ငန်းတွေ လုပ်ဆောင်ဖို့ ယူရို ၁ ဒသမ ၅ သန်း လှူထားတာပဲ ဖြစ်ပါတယ်။

အာဆင်နယ် အသင်းနဲ့ ပတ်သတ်ရင်တော့ ရင်းနှီးမြှပ်နှံမှု တခု အနေနဲ့ပဲ ရှယ်ယာ ၃၀ ရာခိုင်နှုန်းကျော်ကို ဝယ်ယူထားတဲ့ သဘော ဖြစ်ပါတယ်။ လက်ရှိမှာလည်း အာဆင်နယ်က အင်္ဂလန်အသင်းတွေထဲမှာ ပွဲကြည့်လက်မှတ် ဈေးကြီးတဲ့ အသင်းတွေ ထဲက တသင်း ဖြစ်နေသလို စီးပွားရေး အရ အောင်မြင်မှု ရရှိနေတဲ့ အသင်းလည်း ဖြစ်ပါတယ်။

Ref: www.en.m.wikipedia.org

The post အာဆင်နယ် အသင်းရဲ့ ရှယ်ယာကို ဒုတိယ အများဆုံးပိုင်ဆိုင်သူ အလီရှာ အူစမာနော့ဗ် appeared first on ဧရာဝတီ.

ရုရှား အမျိုးသမီးဟော်ကီ အဖွဲ့ချုပ် (WHL) က ရုရှားနိုင်ငံရှိ ဟော်ကီအသင်း ၇ သင်းမှ အမျိုးသမီး ကစားသမား ၁၂ ဦး၏ ရုပ်ပုံများဖြင့် “ရေခဲများကို အရည်ပျော်စေခြင်း” အမည်ရှိ ပြက္ခဒိန်သစ် တစောင် ထုတ်ဝေလိုက်သည်။

အမျိုးသမီး ဟော်ကီ အဖွဲ့ချုပ် ၏ အတက်ကြွဆုံးနှင့် အအောင်မြင်ဆုံး အမျိုးသမီး ကစားသမားများ ပါဝင်ကိုယ်ဟန်ပြပြီး L’uomo Vogue, Harper’s Bazaar, Elle Russia နှင့် အခြားသော ဖက်ရှင် မဂ္ဂဇင်းများ၏ ထင်ရှားသော ရုရှား ဓာတ်ပုံဆရာ ပျိုတာတစ်တာရန်ကို (Pyotr Titarenko) က ရိုက်ကူးပေးခြင်း ဖြစ်သည်။

အန်နာ ပရူဂိုဗာ (Anna Prugova)

အန်နာ ပရူဂိုဗာ က အဂျီဒယ် အိတ်ချ်စီ (Agidel HC) ရေခဲပြင်ဟော်ကီအသင်း၏ ဂိုးသမားတဦး ဖြစ်သည်။ သူသည် ၂၀၁၃ ခုနှစ်နှင့် ၂၀၁၆ ခုနှစ်များတွင် ကြေးတံဆိပ်ရ ကမ္ဘာ့ချန်ပီယံအသင်းတွင် ပါဝင်ခဲ့သည်။ ထိုအသင်းသည် နှစ်နှစ်လုံးတွင် တတိယ နေရာလုပွဲတွင် ဖင်လန်အသင်းကို အနိုင်ရခဲ့သည်။

သူသည် သူ၏ ကလပ်အသင်းဟောင်း တော်နေဒိုအသင်း (မော်စကိုဒေသ) နှင့်လည်း IIHF ဥရောပ အမျိုးသမီး ချန်ပီယံဖလား ၄ ကြိမ်နှင့် အမျိုးသားချန်ပီယံ ၄ ကြိမ်ရဖူးသည်။ ၂၀၁၀ ခုနှစ်က အသက် ၁၆ နှစ်သာ ရှိသေးသောကြောင့် ဗန်ကူးဗား အိုလံပစ်တွင် အသက်အငယ်ဆုံး ရေခဲပြင်ဟော်ကီ ကစားသမားဖြစ်ခဲ့သည်။

ပရူဂိုဗာသည် အသက် ၁၁ နှစ်တွင် ဟော်ကီဂိုးသမား ဝတ်စုံနှင့် ကိရိယာများ လက်ဆောင်ရရှိရာမှ ဟော်ကီလောကသို့ စတင် ဝင်ရောက်ခဲ့သည်။ သူမ၏ ဇာတိမြို့ဖြစ်သော ခါဘာရော့ဗ်တွင် အမ်မာ အိတ်ချ်စီ အသင်း၏ ပွဲတပွဲကို ကြည့်ရာမှ ရေခဲပြင် ဟော်ကီကစားခြင်းကို နှစ်သက်စွဲလမ်းလာသည်။ ထိုအချိန်မှ စတင်ပြီး ရေခဲပြင် ဟော်ကီကစားလိုသော စိတ် ဆက်လက်ကြီးထွားလာကာ ဟော်ကီ ဂိုးသမား ဖြစ်လိုသော အိပ်မက်သည် ပြည့်ဝသွားခဲ့ပြီး အဆင့်မြင့်ပွဲများတွင် ဂိုးပိုက်ကို ဆယ်စုနှစ် တခုမျှ လုံခြုံအောင် စောင့်ကြပ်နိုင်ခဲ့သည်။

မာရီယာ ပက်ချ်နီကိုဗာ (Maria Pechnikova)

စပိန်နှင့် ဆလိုဗက်ကီးယားတို့ ပူးပေါင်းအိမ်ရှင် အဖြစ်ကျင်းပသော ၂၀၁၅ ခုနှစ် Winter Universiade တွင် အနိုင်ရသူ တဦး ဖြစ်သည်။ ပက်ချ်နီကိုဗာသည် ဥရောပ အမျိုးသမီး ချန်ပီယံ ဖလားတွင်လည်း ငွေတံဆိပ်ဆုရှင် ဖြစ်သည်။

သူ၏ ယခင်ကလပ်အသင်းဖြစ်သော SKIF တွင် ကစားစဉ်က အမျိုးသားအဆင့် ဆုများ ရရှိခဲ့ပြီး ငွေတံဆိပ် ၄ ခုရယူ နိုင်ခဲ့ကာ ၂၀၀၅ ခုနှစ်နောက်ပိုင်းတွင် အမျိုးသားချန်ပီယံဆု ၉ ကြိမ်ရထားသော တော်နေဒို အိတ်ချ်စီအသင်း၏ နောက်တွင် ရပ်တည်နေသည်။

ပက်ချ်နီကိုဗာသည် ရေခဲပြင်ဟော်ကီ မကစားမီ အခြား အားကစားများစွာ ကစားခဲ့သည်။ လှပမှု၊ ခွန်အားနှင့် အဖွဲ့အစည်းစိတ်ဓာတ် စသည်တို့ ပြည့်စုံရသည့် ဟော်ကီကစားနည်းကို နှစ်သက်သူ ဖြစ်သည်။

ငယ်စဉ်က ဖခင်ဖြစ်သူက ဟော်ကီရိုက်တန် တခုပေးပြီး “ရေခဲပြင်ဟော်ကီကစား၊ ဒါပေမယ့် အိမ်မှာ တော့ မကစားနဲ့” ဟု ပြောခဲ့သည်။ သို့သော် မာရီယာသည် သူမ၏ ရေခဲပြင်ဟော်ကီ ကျွမ်းကျင်မှု ပိုမိုကောင်းမွန်စေရန် သူမ၏ အခန်းအတွင်းရှိ ကောဇောပေါ်တွင် လေ့ကျင့်ခဲ့ပြီးနောက်မှသာ ရေခဲပြင်တွင် ကစားသည်။ သူမသည် သူမ၏ အနှစ်သက်ဆုံး ကစားနည်း ဖြစ်သည့် ရေခဲပြင်ဟော်ကီ ကစားခြင်းကို ဆက်လက်မြတ်နိုးနေဆဲဖြစ်သည်။

အော့ဆာနာ အဖိုနီနာ (Oksana Afonina)

အော့ဆာ အဖိုနီနာသည် အသက် ၇ နှစ်အရွယ်တွင် ရေခဲပြင် ဟော်ကီ စတင်ကစားပြီး သူ၏ ဇာတိမြို့ဖြစ်သော ပါဘော်ရက်စ် ရှိ ယူရယ်လော့ချာ အိတ်စီ အသင်းတွင် ကစားခဲ့သည်။ ကစားသည့် သက်တမ်းအတွင်း အသင်းအမျိုးမျိုး ပြောင်းခဲ့ပြီး စပါတက်-မာကာရိုင်၊ ဖက်ကယ်၊ တော်ပီဒို အသင်းများတွင်လည်းကစားခဲ့ပြီး တော်ပီဒို အသင်းတွင် သူမ၏ တခုတည်းသော အမျိုးသားအဆင့် ဆုတံဆိပ်ကို ရရှိခဲ့သည်။

သူမသည် ရေခဲပြင်ဟော်ကီ ကစားခြင်းအပြင် ကမ္ဘာတွင် လူသိနည်းသော်လည်း ရုရှားနိုင်ငံ ယူရယ်လ် ဒေသတွင် လူကြိုက်များသည့် အားကစားနည်း တမျိုးဖြစ်သည့် ဘန်ဒီကစားနည်းကိုလည်းကစားသည်။

အိဗ်ဂျန်နီယာ ဒိုယူပီနာ (Evgeniya Dyupina)

လက်ရှိ ဒီနာမို အက်စ်ပီဘီ အိတ်ချ်စီ (Dinamo-Spb HC) တွင် ကစားနေသူ ဖြစ်သည်။ ရုရှား အမျိုး သမီး အသင်း၏ အဖွဲ့ဝင်တဦး အနေဖြင့် ဂျူပီနာသည် Winter Universiades တွင် ၃ ကြိမ်ပြိုင်ခဲ့ပြီး ၂၀၁၃ ခုနှစ်တွင် ငွေတံဆိပ်နှင့် ၂၀၁၅ ခုနှစ်နှင့် ၂၀၁၇ ခုနှစ်များတွင် ရွှေတံဆိပ်များရခဲ့သည်။

၂၀၁၂ ခုနှစ်တွင် ရုရှား အငယ်တန်း အသင်း၏ ကစားသမား အနေဖြင့် အုပ်စု ၁ တွင် ယူ ၁၈ ကမ္ဘာ့ချန်ပီယံ ဖြစ်ခဲ့သည်။

အိဗ်ဂျန်နီယာသည် ဟော်ကီမိသားစုတွင် မွေဖွားခဲ့သောကြောင့် ထိုကစားနည်းကို နှစ်သက်ခြင်း ဖြစ် သည်။ ဖခင်သည် ရေခဲပြင်ဟော်ကီ နည်းပြ ဖြစ်သည်။ ဖခင်ဖြစ်သူ၏ လေ့ကျင့်ကွင်းသို့ လိုက်သွား ရင်း အသက် ၇ နှစ် အရွယ်တွင် ရေခဲပြင် ဟော်ကီ စတင်ကစားခဲ့သည်။

ဒိုင်ယာနာ ကာနေဗာ (Diana Kanaeva)

သူမသည် ဒီနာမို အက်စ်ပီဘီ အိတ်ချ်စီ (Dinamo-Spb HC) တွင် ကစားနေသူ ဖြစ်သည်။၂၀၁၅ ခုနှစ် လူငယ် ကမ္ဘာ့ချန်ပီယံလုပွဲတွင် ကြေးတံဆိပ်ရထားသူဖြစ်သည်။ ကာနေဗာသည် လွန်ခဲ့သော ရာသီက ဒီနာမို အက်စ်ပီဘီ အိတ်ချ်စီ အသင်းအတွက် ကစားရင်း အမျိုးသား ချန်ပီယံလုပွဲတွင်လည်း ကြေးတံဆိပ်ရခဲ့သည်။

ငယ်စဉ်က စည်းချက်ညီ ဂျွမ်းဘားကစားခဲ့သော်လည်း နောက်ပိုင်းတွင် ရေခဲပြင်ဟော်ကီသို့ပြောင်း လဲကစားခဲ့သည်။

နာဒက်ဇာ မိုရိုဇိုဗာ (Nadezda Morozova )

သူမသည် လက်ရှိ ဘာရုဆာ အိတ်ချ်စီ (Biryusa HC) အသင်းမှ ဖြစ်ပြီး၊ ၁၉၉၈ မှ ၂၀၀၄ အထိ ပစ်စ်ဘာ့ဂ် ပင်ဂွင်း အသင်းတွင် ကစားခဲ့သော အမျိုးသားအဆင့် ဟော်ကီသမားဟောင်း အလက်ဇီ မိုရိုဇော့ဗ် နှင့် ဝမ်းကွဲတော်စပ်သည်။ ရေခဲပြင် ဟော်ကီကစားခြင်းကို မိသားစုက သဘောမတူသဖြင့် ခွင့်ပြုချက်ရရန် ၃ နှစ်ခန့်မိသားစုကို ဖျောင်းဖျ ပြောဆိုခဲ့ရသည်။

မိုရိုဇိုဗာ၏ အားထုတ်မှုများသည် နောက်ဆုံံးတွင် ဆုလာဘ်များ ဖြစ်လာခဲ့သည်။ သူမသည် ရေခဲပြင် ကစားကွင်းတွင် အောင်မြင်မှု အချို့ရရှိခဲ့ပြီး ၂၀၁၆ ခုနှစ် ကမ္ဘာ့ အငယ်တန်း ချန်ပီယံလုပွဲတွင် ကြေး တံဆိပ် ရခဲ့ပြီး ၂၀၁၅ နှင့် ၂၀၁၇ ခုနှစ်များက Winter Univesiades ပွဲများတွင်လည်း အနိုင်ရခဲ့ သည်။

တာတီယာနာ ရှာတာလိုဗာ(Tatiana Shatalova)

သူမသည် လက်ရှိ ဘိုင်ရုဆာ အိတ်ချ်စီ (Biryusa HC) အသင်းမှ ဖြစ်သည်။ ၂၀၁၇ ခုနှစ် ကမ္ဘာ့ အငယ်တန်း ရေခဲပြင် ဟော်ကီ ချန်ပီယံလုပွဲတွင် ကြေးတံဆိပ်ဆုရခဲ့သည်။ သူမသည် မိသားစုနှင့် အတူနေထိုင်ရာ ဘယ်လာရပ်စ်နိုင်ငံ မင့်စ်ခ် မြို့ရှိ ရေခဲပြင် ဟော်ကီကစားကွင်းတွင် စတင်ကစားခဲ့ သည်။ ထိုစဉ်က အသက် ၅ နှစ်သာ ရှိသေးသောကြောင့် ကစားခွင့် ရရန် မိသားစုကို ပူဆာခဲ့ရ သော်လည်း သမီးဖြစ်သူကဲ့သို့ စိတ်အားထက်သန်မှုမရှိသော မိဘများက အပြင်းအထန် ငြင်းဆန် ကြသည်။

နောက်ပိုင်းတွင် ရှာတာလိုဗာသည် လက်ဝှေ့ကစားခဲ့သောကြောင့် မိဘများက ရေခဲပြင်ဟော်ကီသည် သမီးဖြစ်သူ အတွက် ပိုမို ကောင်းမွန်သည်ဟု ဆုံးဖြတ်ခဲ့သည်။

အနက်စ်တာဆီယာ ဆမာနိုဗာ (Anastasia Smirnova)

သူမက လက်ရှိ SKIF အသင်းမှ ဖြစ်သည်။ ယူရိုဖလားပွဲတွင် ရွှေနှင့်ငွေ တံဆိပ်များ ရခဲ့သူ မော်ဒယ်လ် ဟောင်း ဆမာနိုဗာ သည်ရေခဲပြင်ဟော်ကီ လောကသို့ အသက် ၁၉ နှစ်မှ ရောက်ရှိလာသဖြင့် အတန် ငယ် နောက်ကျသည်ဟု ဆိုရမည် ဖြစ်သည်။ ရေခဲပြင်ဟော်ကီ ကစားသမားဖြစ်လိုသော ညီမငယ် အတွက် သင့်တော်ခြင်း ရှိ/မရှိလေ့လာရန် ကစားကွင်းသို့ လာရောက်ခဲ့ခြင်း ဖြစ်သည်။ ရေခဲပြင် ဟော်ကီသည် အမျိုးသားများ အတွက် ကစားနည်းဖြစ်သည် ဟုသာ ဆမာနိုဗာ မူလက ထင်ခဲ့သည်။ သို့သော် ရေခဲပြင်ဟော်ကီ ကစားခြင်းကို လွန်စွာနှစ်ခြိုက်သွားပြီး ကျွမ်းကျင်သူဖြစ်လာသည်အထိ ကစားမည် ဟု ဆုံးဖြတ်လိုက်သည်။

ရေခဲပြင်ဟော်ကီလောကသို့ မရောက်မီ အလှမယ်ရွေးပွဲများနှင့် ဖက်ရှင်ပြပွဲများစွာတွင် ပါဝင်ခဲ့သူ ဆမာနိုဗာသည် အသက် ၂၀ အရွယ်တွင် ရေခဲပြင်ဟော်ကီအသင်းများနှင့် စတင် စာချုပ်ချုပ်နိုင်ခဲ့ပြီး ငွေအကြွေစေ့စုဆောင်းခြင်းနှင့် ဓာတ်ပုံရိုက်ခြင်း တို့ကိုလည်း ဝါသနာပါသည်။

တာတီယာနာ ရှချူးကီးနား (Tatiana Shchukina)

ဆဗာ့ဒ်လိုဗက် ဒေသ အသင်း (Sverdlovsk Region Team) တွင် ကစားနေသူ၊ အမျိုးသားအဆင့် ချန်ပီယံအဆင့် ၃ ကြိမ် ရသူဖြစ်ပြီး ဇာတိ ပိုဒိုလက်ခ်တွင် အသက် ၁၃ နှစ်မှ စတင်ပြီး ရေခဲပြင် ဟော်ကီကစားသည်။ တနှစ်ခန့် ကစားပြီးနောက် ဂိုးသမား အဖြစ် ကစားခွင့်ပြုရန် နည်းပြထံ ခွင့်တောင်းပြီး ထိုမှစတင်ပြီး ထိုနေရာမှသာ ကစားခဲ့သည်။

သူမသည် ဥရောပ အလယ်ပိုင်း တောင်ပေါ်ဒေသများတွင် စကီးစီးလေ့ရှိပြီး စကီးစီးခြင်းကြောင့် စိတ်လှုပ်ရှားရခြင်းသည် ဟော်ကီဂိုးသမားများ ကစားကွင်းတွင် မရနိုင်သည့် ခံစားမှုကိုပေးသည်ဟု သူပြောသည်။ သူမသည် ရုရှား ဂန္ဓဝင်စာပေနှင့် နိုင်ငံတကာ ခေတ်ပြိုင်စာပေများ ဖတ်ရှုခြင်းကိုလည်း ဝါသနာပါသည်။

နီနာပီရိုဂိုဗာ (Nina Pirogova)

တော်နေးဒိုး အိတ်ချ်စီ (Tornado HC) တွင် ကစားနေသူ ပီရိုဂိုဗာသည် ၂၀၁၆ ခုနှစ် ကမ္ဘာ့ချန်ပီယံ လုပွဲတွင် ကြေးတံဆိပ် ရသူဖြစ်ပြီး ကမ္ဘာ့ အငယ်တန်းပြိုင်ပွဲများတွင်လည်း ကြေးတံဆိပ် ၂ ကြိမ်နှင့် အမျိုးသားအဆင့် ပွဲများတွင်လည်း ၂ ကြိမ် ဆုရဖူးသည်။

နီနာပီရိုဂိုဗာသည် ၂၀၁၇ ခုနှစ် ကမ္ဘာ့ အငယ်တန်းချန်ပီယံလုပွဲတွင် ရုရှားအသင်း၏ ခေါင်းဆောင် တာဝန်ယူခဲ့ပြီး ကွာတားဖိုင်နယ် ပွဲတွင် ချက်အသင်းနှင့် ရုန်းရင်းဆန်ခတ် ဖြစ်ရာတွင် ပါဝင်ခဲ့သည်ကို လူသိများသည်။ ထိုပွဲအပြီးတွင် MMA ပွဲများကို ကြိုက်လာသည် ဟု ဆိုသော်လည်း သူမသည် ချက် အသင်းမှ ပြိုင်ဘက်များကို ထိုးကြိတ်ရန် မရည်ရွယ်ခဲ့ဘဲ သူမ၏ အသင်းမှ ဂိုးသမားကို ကာကွယ် ရန်သာ ရည်ရွယ်သည်ဟု ဆိုသည်။

အလဗ်တီနာ ရှာတာရိုဗာ (Alevtina Shtaryova)

တော်နေးဒိုး အိတ်ချ်စီ (Tornado HC) တွင် ကစားနေသူ ဖြစ်ပြီး ၂၀၁၅ ခုနှစ် ကမ္ဘာ့ အငယ်တန်း ချန်ပီယံလုပွဲတွင် ကြေးတံဆိပ်တခု၊ ၂၀၁၆ ခုနှစ် ကမ္ဘာ့ချန်ပီယံလုပွဲတွင် ကြေးတံဆိပ်တခုနှင့် Winter Universiade တွင်လည်း အနိုင်ရထားသည်။

ရှတာယိုဗာသည် အကိုဖြစ်သူ ဟော်ကီ ဘောလုံးနှင့် နှင်းလျှောစီးသည်ကို အသက် ၇ နှစ်အရွယ်တွင် တွေ့ခဲ့ပြီး ရေခဲပြင် ဟော်ကီကစားခြင်းကို စတင် စိတ်ဝင်စားခဲ့သည်။ ရေကူးခြင်းနှင့် အလှပြ နှင်းလျှောစီးခြင်း အပါအဝင် အားကစားနည်း အများအပြားကို ကစားခဲ့ပြီးနောက် ရေခဲပြင် ဟော်ကီ ကိုသာ အာရုံစိုက်ခဲ့သည်။ ရေခဲပြင်ဟော်ကီ ကစားခွင့်ရရန် အချိန်နှင့် အားထုတ်မှု အများအပြား ပြုလုပ်ခဲ့ရသည်။ ၆ လ ကြာမှ ငြင်းခုန်ဆွေးနွေးပြီးနောက် နောက်ဆုံးတွင် ခွင့်ပြုချက်ရခဲ့သည်။

အန်နာ ရှိုခီနာ (Anna Shokhina)

သူမသည် တော်နေးဒိုး အိတ်ချ်စီ (Tornado HC) မှပင် ဖြစ်ပြီး ၂၀၁၅ ခုနှစ် ကမ္ဘာ့အငယ်တန်း ချန်ပီယံလုပွဲတွင် ကြေးတံဆိပ်ရပြီး Winter Univesiade တွင် ဆု ၂ ကြိမ်ရထားသည်။

၂၀၁၄ ခုနှစ် ဆိုချီ အိုလံပစ် ပွဲတွင် ပါဝင်ခဲ့သော်လည်း ရုရှားအမျိုးသမီး အသင်းသည် မည်သည့်ဆုမျှ မရခဲ့ဘဲ အဆင့် ၆ သာ ရခဲ့သည်။ သူမသည် WHL တွင် စိုးမိုးထားသော တော်နေးဒိုး အိတ်ချ်စီ အသင်း၏ အသင်းခေါင်းဆောင်ဖြစ်သည်ပြီး ၂၀၁၆/၂၀၁၇ တွင် အသင်းအတွက် ဂိုးအများဆုံး သွင်းခဲ့သည်။

The post ရေခဲတောင် အရည်ပျော်သွားမယ့် ရုရှားဟော်ကီမယ်များ appeared first on ဧရာဝတီ.

မကြာခင် ကျင်းပတော့မယ့် ကမ္ဘာ့ဖလားပွဲမှာတော့ အာရှနယ်ကနေ ခြေစစ်ပွဲအောင် အသင်း တသင်း ဖြစ်တဲ့ ဆော်ဒီအတွက် အုပ်စု အဆင့်က တက်ဖို့ ပွဲကျပ်တွေကို ရင်ဆိုင် ရုန်းကန်ရမယ့် အနေအထားပါ။ ဘာကြောင့်လဲ ဆိုတော့ အုပ်စုကျပ်ထဲမှာ ရောက်နေတာကြောင့်ပါ။ သို့ပေမယ့် ကမ္ဘာ့ဖလား ခြေစစ်ပွဲအောင်တယ် ဆိုကတည်းက အာရှ အတွက်ကတော့ အသင်းကြီးပါပဲ။

ဆော်ဒီအာရေဗျနိုင်ငံ ကိုယ်စားပြု လက်ရွေးစင်ဘောလုံးအသင်း ဖြစ်ပြီး သူတို့ကို ချစ်စနိုးနဲ့ The Green လို့လည်း ခေါ်ကြသလို The Falcons (သိမ်းငှက်များ) လို့လည်း ခေါ်ကြပါတယ်။ ဆော်ဒီ ဘောလုံး အဖွဲ့ချုပ်ရဲ့ လက်အောက်ခံ အသင်း တသင်းပါ။ အာရှ ဘောလုံး အဖွဲ့ချုပ် AFC ကလည်း အသိအမှတ်ပြုထားပြီး AFC ရဲ့ နယ်ပယ်ဝင် အသင်း တသင်း အဖြစ် သတ်မှတ်ထားပါတယ်။

ဒါပေမယ့် AFC မှာ နယ်ပယ်ပေါင်း များစွာ ရှိတယ်၊ အထူးသဖြင့် အာရှ အရှေ့ပိုင်းမှာ ဘောလုံး အင်အားကြီး နိုင်ငံ အသင်းတွေ ဖြစ်တဲ့ ဂျပန်၊ တောင်ကိုရီးယားနဲ့ အခြား အသင်းတွေ များစွာ ရှိပြီး AFC ကနေ ထပ်မံ ခွဲခြားထားပုံ အရ ဆော်ဒီက WAFF လို့ ခေါ်တဲ့ အနောက်အာရှ ဘောလုံးနယ်တွင်းမှာ ပါရှိတဲ့ အသင်း ဖြစ်ပါတယ်။

လက်ရှိ အသင်းကို တာဝန်ယူ နည်းပြနေသူက Juan Antonio Pizzi ဖြစ်ပါတယ်။ အသင်းခေါင်းဆောင်ကတော့ Osama Hawsawi ဖြစ်ပါတယ်။ ကြေးစားအဆင့် ဘောလုံး သမား ဖြစ်ပေမယ့် နာမည်ကြီး ကလပ်တွေမှာ ကစားနေသူ မဟုတ်လို့ ပြည်တွင်းက လူတွေနဲ့ နည်းနည်း စိမ်းပါတယ်။

အသင်းက လက်ရှိ ဖီဖာရဲ့ အဆင့် သတ်မှတ်ချက် ၆၃ မှာ ရှိနေပါတယ်။ ဒါဟာ ၂၀၁၇ အကုန်၊ နိုဝင်ဘာ၊ ဒီဇင်ဘာ ၂ လလုံး အဆိုပါ အဆင့်မှာ တည်မြဲနေတာပါ။ သမိုင်းတလျှောက် အဆင့် အမြင့်ဆုံး သတ်မှတ်ခံရမှု အဖြစ် ၂၀၀၄ ခုနှစ် ဇူလိုင်လက ရောက်ရှိခဲ့ပြီး အဆင့် ၂၁ ထိ ရောက်ခဲ့ပါတယ်။ ဒီလိုပဲ သမိုင်းတလျှောက် အဆင့် အနိမ့်ဆုံး ကျဆင်းမှု အဖြစ် ၂၀၁၂ ခုနှစ် ဒီဇင်ဘာလ အတွင်းက ခြေကျသွားခဲ့ပြီး အဆင့် ၁၂၆ ထိ ရောက်သွားတာပါ။

အာရှ အင်အားကြီး ဂျပန်၊ တောင်ကိုရီးယားတို့က နိုင်ငံတကာ ပွဲစဉ်တွေကို ၁၉၂၀ ပြည့်နှစ် ဝန်းကျင်တွေကတည်းက ကစားနေခဲ့ ပေမယ့် ဆော်ဒီကတော့ နည်းနည်း နောက်ကျပါတယ်။ အသင်း အတွက် ပထမဆုံး နိုင်ငံတကာ ပွဲစဉ်ကို ၁၉၅၇ ခုနှစ် ဇန်နဝါရီလ ၁၈ ရက်ကမှ လက်ဘီနွန်နိုင်ငံ၊ ဘေရုမှာ သွားကစားခဲ့ပြီး အဆိုပါ ပွဲစဉ်မှာ တဖက် ၁ ဂိုးစီ သရေ ကျခဲ့ပါတယ်။

အသင်းက သမိုင်းတလျှောက် အကြီးမားဆုံး ဂိုးပြတ်နိုင်ပွဲ အဖြစ် ၂၀၁၅ ခုနှစ် နိုဝင်ဘာ ၁၇ရက်နေ့က အရှေ့တီမော နိုင်ငံ၊ ဒီလီမှာ ကစားတဲ့ ပွဲမှာ အရှေ့တီမောကို ၁၀ ဂိုး ဂိုးမရှိနဲ့ နိုင်ခဲ့တာ ဖြစ်ပါတယ်။ ဒီလိုပဲ သမိုင်း တလျှောက် အကြီးမားဆုံး ဂိုးပြတ် ရှုံးပွဲကို ၁၉၆၁ ခုနှစ် စက်တင်ဘာ ၃ ရက်နေ့က မော်ရိုကိုနိုင်ငံ၊ ကာဆာဘလန်ကာမှာ ကစားတဲ့ UAE နဲ့ပွဲမှာ ၁၃ ဂိုး ဂိုးမရှိနဲ့ ရှုံးခဲ့တာ ဖြစ်ပါတယ်။

ကမ္ဘာ့ဖလားပွဲစဉ်ကိုတော့ ၁၉၉၄ ခုနှစ်မှာ စတင် ဝင်ရောက်ခွင့်ရပြီး အခု ၂၀၁၈ ကမ္ဘာ့ဖလား ဝင်ခွင့်ရမှုနဲ့ အတူ ၅ ကြိမ် ဝင်ပြိုင်ခဲ့ ပေမယ့် အမြင့်ဆုံး အောင်မြင်မှု အနေနဲ့တော့ ၁၉၉၄ ခုနှစ် ကမ္ဘာ့ဖလားမှာ ၁၆ သင်း အဆင့်ထိအောင် ၁ ကြိမ် ရောက်ခဲ့ဖူးတာပဲ ဖြစ်ပါတယ်။

အာရှမှာတော့ အင်အားကြီး အသင်း တသင်း အဖြစ် သတ်မှတ်နိုင်တဲ့ ဆော်ဒီက အာရှဖလား ပွဲစဉ်ကို ပထမဆုံး အနေနဲ့ ၁၉၈၄ မှာ ဝင်ပြိုင်ပြီး အခုထိအောင် ၉ ကြိမ် ပြိုင်ထားပြီး ၁၉၈၄၊ ၁၉၈၈ နဲ့ ၁၉၉၆ တွေမှာ ချန်ပီယံ ၃ ကြိမ် ဖြစ်ထားပါတယ်။ ကွန်ဖက်ဒရေးရှင်း ဖလား မှာတော့ ၁၉၉၂ ခုနှစ်က စပြီး အခုထိ ၄ ကြိမ် ဝင်ခွင့်ရခဲ့ပြီး ၁၉၉၂ခုနှစ်က ဒုတိယဆုရသည်ထိ အောင်မြင်ခဲ့ဖူးတာ တွေ့ရပါတယ်။

ကမ္ဘာ့ဖလားပွဲစဉ် ဝင်ခွင့်ရမှု အနေအထားကို ကြည့်မယ် ဆိုရင် ၁၉၉၄၊ ၁၉၉၈၊ ၂၀၀၂ နဲ့ ၂၀၀၆ ခုနှစ် ကမ္ဘာ့ဖလားတွေ ကို ၄ ကြိမ် ဆက်တိုက် ဝင်ခွင့်ရတယ်၊ ၂၀၁၀ နဲ့ ၂၀၁၄ တွေမှာတော့ ခြေစစ်ပွဲ မအောင်ခဲ့ဘဲ အခု ၂၀၁၈ ကမ္ဘာ့ဖလား မှာ ခြေစစ်ပွဲ ပြန် အောင်လာတာပါ။

ဆော်ဒီရဲ့ ခြေစွမ်းပိုင်း အနေအထားက လာမယ့် ကမ္ဘာ့ဖလား အုပ်စုပွဲမှာ အုပ်စုလည်း ကျပ်နေသလိ ခြေစွမ်းပိုင်းလည်း အကောင်းဆုံး ပုံစံ ရှိ မနေလို့ အုပ်စု အဆင့်ကနေ ၁၆ သင်း အဆင့် တက်နိုင်ဖို့ မျှော်လင့်ချက် အလွန်နည်းပါးတယ် လို့ ခန့်မှန်းခံထားရပါတယ်။

နောက်ဆုံး ကစားခဲ့တဲ့ ရလဒ်တွေကို ကြည့်မယ် ဆိုရင်လည်း ၂၀၁၇ ခုနှစ် ဒီဇင်ဘာ ၂၂ ရက်က ကူဝိတ်ကို ၂ ဂိုး ၁ ဂိုးနဲ့ နိုင်တယ်၊ ၂၅ ရက်နေ့က UAEကို သရေကျထားသလို ၂၈ ရက်နေ့မှာ အိုမန်နဲ့ ကစားတဲ့ ပွဲမှာလည်း ခြေစွမ်းကောင်း မပြနိုင်တာ တွေ့ရပါတယ်။ လာမယ့် ကမ္ဘာ့ဖလားပွဲစဉ်က ဇွန်လ အတွင်းမှာ ကစားမှာ ဖြစ်ပေမယ့် ဒီကြားထဲ ၆ လလောက်ကို ခြေစမ်းပွဲ လုံး၀ ကန်ဖို့ ရှိမနေတာလည်း ဖြစ်ပါတယ်။

ကမ္ဘာ့ဖလား အုပ်စု အနေအထားမှာလည်း ပထမဆုံး ပွဲစဉ်ကို ဇွန်လ ၁၄ ရက်မှာ အိမ်ရှင် ရုရှနဲ့ ကစားရမယ်၊ ၂၀ ရက်နေ့မှာ အင်အားကြီး ဥရုဂွေးနဲ့ ကစားရမယ်၊ ၂၅ ရက်နေ့မှာ ဒေသတွင်း ပြိုင်ဘက် အီဂျစ်နဲ့ ကစားရဖု့ိ ရှိနေပြီး ခြေစွမ်းပိုင်းနဲ့ အိမ်ရှင် အားသာချက်တွေ အရ ရုရှနဲ့ ဥရုဂွေးကို ကျော်ဖြတ်နိုင်ဖို့ ဆိုတာ တော်တော်ကို ခက်ခဲမှာလည်း ဖြစ်ပါတယ်။

ဆော်ဒီအသင်း အတွက် ပွဲအများဆုံး ကစားထားသူက Mohamed Al-Deayea ဖြစ်ပြီး သူက ၁၉၉၃ ခုနှစ်ကနေ ၂၀၀၆ ခုနှစ် အတွင်း အသင်း အတွက် ၁၇၈ ပွဲထိအောင် ကစားပေးထားတယ်၊ လက်ရှိ အသင်းခေါင်းဆောင် Hawsawi က ၁၂၇ ပွဲ ကစားထားပြီး ၇ ဂိုး သွင်းပေးထားသူပါ။ အသင်း အတွက် ဂိုး အများဆုံး သွင်းထားသူက ၁၉၇၈ ခုနှစ်ကနေ ၁၉၉၄ ခုနှစ်ထိ ကစားပေးခဲ့တဲ့ Majed Abdullah ဖြစ်ပြီး သူက ၇၁ ပွဲပဲ ကစားခဲ့ပေမယ့် ဂိုးပေါင်း ၁၁၆ ဂိုးတောင် သွင်းခဲ့တာပါ။

လက်ရှိ ဆော်ဒီအတွက် အားထားရတဲ့ တိုက်စစ်မှူးကတော့ ၂၀၀၉ ခုနှစ်ကတည်းက အသင်းအတွက် ပါဝင် ကစားပေးနေတဲ့ Mohammad Al-Sahlawi ဖြစ်ပြီး သူက ၂၈ ပွဲ ကစားပေးထားသလို ၃၃ ဂိုး သွင်းယူပေးထားပေမယ့် ကမ္ဘာ့ ဖလားပွဲမှာ အားထားရလောက်တဲ့ ခြေစွမ်းမျိုး မရှိသလို နောက်ဆုံး ကစားတဲ့ ပွဲတွေမှာလည်း ဆော်ဒီရဲ့ သွင်းဂိုးတွေက နည်းနေလို့ အားရစရာ မရှိပါဘူး။

အသင်းရဲ့ ကစားဟန်ကလည်း ပေးဂိုးနည်း၊ သွင်းဂိုးနည်းပုံစံ ဖြစ်လို့ ၅ ကြိမ်မြောက် ကမ္ဘာ့ဖလားဝင်ခွင့်ရတဲ့ ဆော်ဒီအသင်းဟာ လာမယ့် ပြိုင်ပွဲမှာ ပရိတ်သတ်ကို အကျပ်အတည်းကြားကနေ ဘယ်လောက်ထိ အကောင်းဆုံး ခြေစွမ်းပြနိုင်မှာလား ဆိုတာ စောင့်ကြည့်ရမယ့် အနေအထားပါ။ ။

Ref: www.en.m.wikipedia.org

The post အစိမ်းရောင် သိမ်းငှက်တွေ ကမ္ဘာ့ဖလား ဘောလုံးပြိုင်ပွဲမှာ အမြင့်ပျံနိုင်မှာလား appeared first on ဧရာဝတီ.

မာရက်ဟမ်ဆစ် (Marek Hamsik) က လက်ရှိ အီတလီ စီးရီးအေမှာ နာမည်ကြီး အသင်း နာပိုလီက တိုက်စစ်မှူး၊ ပြည်တွင်းမှာတော့ စီးရီးအေ ပွဲစဉ်တွေ သိပ်မကြည့်ကြပေမယ့် နာပိုလီကိုတော့ မသိသူ မရှိ၊ လက်ရှိ UEFA ရဲ့ အဆင့် သတ်မှတ်ချက်တွေထဲမှာ နာပိုလီဆိုတာ ဥရောပရဲ့ အကောင်းဆုံး ထိပ်တန်း ၁၀ သင်းဝင် အသင်း တသင်း။ ဒီလို နာပိုလီကို ဂျူဗင်၊ အေစီ၊ ရိုးမား၊ အင်တာလို အသင်းတွေကို ကျော်ဖြတ်ပြီး အကောင်းဆုံး အသင်း စာရင်းဝင်အောင် စွမ်းဆောင်ပေး ထားတာက မာရက်ဟမ်ဆစ်ကြောင့် ဆိုရင် မမှားပါ။

မာရက်ဟမ်ဆစ်က ဆလိုဗက်ကီးယား နိုင်ငံသား၊ တကယ်တော့ တိုက်စစ်မှူးစစ်စစ် မဟုတ်ဘူး၊ နောက်ချန်တိုက်စစ်မှူးလို့ ဆိုရင်လည်း ရတယ်၊ ကွင်းလယ်တိုက်စစ်မှူးလို့ ဆိုရင်လည်း ရမယ်၊ ဒါပေမယ့် သူက အခုတော့ အသင်း အတွက် ဂိုးသွင်းစက် ဖြစ်နေပြီ။ နာပိုလီမှာ အသင်းခေါင်းဆောင်၊ ဆလိုဗက်ကီးယားနိုင်ငံ လက်ရွေးစင်အသင်းမှာ ဒုတိယ အသင်းခေါင်းဆောင်။

၁၉၈၇ ခုနှစ် ဇူလိုင် ၂၇ ရက်က ချက်ကိုဆလိုဗက်ကီးယားနိုင်ငံမှာ မွေးတယ်၊ အခု သူက အသက် ၃၀၊ အရပ်က ၆ ပေတိတိ၊ အစပိုင်းမှာ သူက ကွင်းလယ်ကစားသမား အဖြစ် ကစားနေတာ၊ အခုတော့ ကွင်းလယ် တိုက်စစ်မှူး ဖြစ်လာတယ်။ ကျောနံပါတ်က တခြား တိုက်စစ်မှူးတွေထက် ထူးခြားတယ်၊ နံပါတ် ၁၇ တဲ့။

ငယ်ဘဝက ဘောလုံးပညာကို ၂၀၀၁ မှာ စတယ်၊ Jupie Podlaivce မှာ ၁ နှစ်ကြာတယ်၊ ၂၀၀၂ ခုနှစ် ရောက်တော့ Slovan Bratislava အသင်းကို ရောက်သွားတယ်။ ဆလိုဗန်က နာမည်ကြီး အသင်း တသင်းပီပီ ဟမ်ဆစ်ကို ဘောလုံး ပညာ အကောင်းဆုံး သင်ပေးလိုက်တယ်။ ၂၀၀၄ ခုနှစ်ထိအောင် အသင်းက သူ့ကို ဂျူနီယာ ကစားသမား အဖြစ် ဘောလုံး ပညာလည်း သင်ပေးတယ်၊ အသင်းကြီး လူစာရင်းမှာလည်း ထည့်သွင်းပြီး ကစားစေတယ်။ တကယ်ဆိုရင်သူက ကြေးစား အဆင့် မဟုတ်သေးတဲ့ အရွယ်မှာတင် ဆလိုဗန် အသင်းကြီးမှာ ၆ ပွဲ ကစားဖူးပြီး ၁ ဂိုး သွင်းနိုင်နေပြီ။

၂၀၀၄ မှာတော့ ကြေးစားကစားသမား စစ်စစ် ဖြစ်လာပြီး ဆလိုဗန်ကနေ ဘရက်စီယာ (Brescia) အသင်းကို ရောက်လာတယ်။ ဘရက်စီယာမှာ ၃ နှစ်ကြာ ၂၀၀၇ ခုနှစ် အထိ ကစားတယ်၊ ၆၅ ပွဲ ကစားခွင့်ရပြီး ၁၀ ဂိုးသွင်းတယ်၊ လူငယ် ကွင်းလယ်ကစားသမား တယောက်ရဲ့ အဆိုပါ စွမ်းဆောင်ရည်က ကောင်းတယ် လို့ သတ်မှတ်ရမယ့် ခြေစွမ်းကို ပြသနိုင်ခဲ့တာပါ။

၂၀၀၇ ခုနှစ်မှာတော့ နာပိုလီကလပ်ကို ရောက်လာပါတယ်။ အဆိုပါ အချိန်က စီးရီးအေမှာ နာပိုလီက အကောင်းဆုံး စာရင်းဝင် အသင်းတော့ မဟုတ်သေးပါဘူး။ အဆိုပါ နှစ်မှာမှ စီးရီး ဘီကနေ တန်းပြန်တက်လာတဲ့ အသင်းဖြစ်ပါတယ်။

အခု ၂၀၁၇ ကုန်ပြီးပြီ၊ နာပိုလီမှာ ၁၁ နှစ်ကြာ ကစားလာတဲ့ ဟမ်ဆစ်က ပွဲပေါင်း ၃၇၅ ပွဲ ကစားပေးထားပြီ၊ ဂိုးပေါင်း ၁၁၅ ဂိုး သွင်းပြီးပြီ။ ၂၀၁၆ ခုနှစ် ဘောလုံးရာသီ အစမှာ သူနဲ့ အသင်းရဲ့ ကြားက စာချုပ် သက်တမ်း ပြည့်ချိန်မှာ ဟမ်ဆစ်ကို ခေါ်ယူချင်တဲ့ နာမည်ကြီး အသင်းပေါင်း များစွာ ကြိုးစားခဲ့ပေမယ့် သူ့ကို မရှိမဖြစ် လိုအပ်နေတဲ့ နာပိုလီက လစာတိုးပေးပြီး ဆက်ထိန်းထားနိုင်ခဲ့တာ တွေ့ရပါတယ်။

၂၀၁၆ သြဂုတ် ၆ ရက်မှာ နာပိုလီက ဟမ်ဆစ်နဲ့ နောက်ထပ် ၄ နှစ် သက်တမ်း စာချုပ် ချုပ်ဆိုပြီး ဖြစ်ကြောင်း ထုတ်ပြန်ခဲ့ပြီး လာမယ့် ၂၀၂၀ ထိအောင် အသင်းနဲ့ အတူ ရှိနေတော့မှာ ဖြစ်တယ် လို့ ဆိုပါတယ်။ ၂၀၁၇ ခုနှစ် ဒီဇင်ဘာ ၁၆ ရက်က တိုရီနိုကွင်းမှာ ကစားတဲ့ပွဲမှာ နာပိုလီက အိမ်ရှင် တိုရီနိုကို ၃ ဂိုး ၁ ဂိုးနဲ့ နိုင်ပါတယ်၊ ဒီပွဲမှာ ဟမ်ဆစ်လည်း ဂိုးသွင်း ပါတယ်။ နာပိုလီအတွက် ပြိုင်ပွဲစုံ သွင်းဂိုး ၁၁၅ ဂိုးမြောက် ဖြစ်ပါတယ်။

ဒါက အရင် အသင်းရဲ့ သမိုင်းမှာ ဂိုးအများဆုံး သွင်းထားပေးတဲ့ နာမည်ကျော် ဂန္ထဝင် ဘောလုံးသမား ဒီယေဂို မာရာဒိုနာ (Diego Maradona) ရဲ့ သွင်းဂိုုးစံချိန်ကို အမီ တန်းတူလိုက်နိုင်ခဲ့တာ ဖြစ်ပါတယ်။ အခုတော့ ဟမ်ဆစ်ရဲ့ စံချိန်က မာရာဒိုနာရဲ့ စံချိန်ကို ချိုးဖျက် လိုက်နိုင်ပါပြီ၊ အကြောင်းက အဆိုပါ တိုရီနိုကို နိုင်ပြီး ၁ ပတ် အကြာ ဆမ်ဒိုးရီးယားနဲ့ ပွဲစဉ်မှာ ၃ ဂိုး ၂ ဂိုးနဲ့ နိုင်သလို၊ ၁၁၆ ဂိုးမြောက် သွင်းဂိုးကို ဟမ်ဆစ်ထပ်သွင်းလိုက်လို့ ဖြစ်ပါတယ်။

နိုင်ငံအသင်းနဲ့ ပတ်သတ်ရင်တော့ ဆလိုဗက်ကီးယား U17 အသင်း အတွက် ၂၀၀၄ ခုနှစ်မှာ ခေါ်ယူခြင်း ခံရတယ်၊ အသင်း အတွက် ၆ ပွဲ ကစားတယ်၊ ၃ ဂိုးသွင်းတယ်၊ ၂၀၀၆ ရောက်တော့ U19အသင်းမှာ ပါလာတယ်၊ ၆ ပွဲ ကစားတယ်၊ ၁ ဂိုးသွင်းတယ်၊ ၂၀၀၇ ခုနှစ်မှာ U21 အသင်းထဲ ရောက်လာတယ်၊ ၂ ပွဲကစားပေးဖူးတယ်၊ နောက်တော့ လက်ရွေးစင် အသင်း အတွက် ရွေးချယ်ခံရပြီး အခုထိအောင် အသင်း အတွက် ၁၀၃ ပွဲ ကစားပြီး ၂၁ ဂိုး သွင်းပေးထားတာ တွေ့ရပါတယ်။

နိုင်ငံ အသင်းနဲ့ ပတ်သက်ပြီး ထူးခြားချက်ကတော့ ၂၀၁၀ ခုနှစ် ကမ္ဘာ့ဖလားမှာ ဟမ်ဆစ်ရဲ့ အဓိက အကူအညီနဲ့ အတူ နိုင်ငံ အသင်းက ပထမဆုံး ကမ္ဘာ့ဖလား ဝင်ခွင့်ရခဲ့ပါတယ်။ ၂၀၁၆ ခုနှစ် ယူရိုဖလားပွဲမှာလည်း အသင်းကို ဒုတိယ အဆင့် ရောက်အောင် အဓိက ကူညီပေးသူ ဖြစ်ပါတယ်။

ဒါကြောင့်လည်း သူ့မှာ တဦးချင်း ဘောလုံး စွမ်းရည် ဆုပေါင်းများစွာ ရရှိထားပါတယ်။ ဆလိုဗက်ကီးယားရဲ့ တနှစ်တာ အကောင်းဆုံး ဘောလုံးသမားဆုကို ၆ ကြိမ် ရထားပါတယ်၊ ၂၀၀၈ ခုနှစ်ကတည်းက စီးရီးအေရဲ့ အကောင်းဆုံး လူငယ် ကစားသမား ဖြစ်ပါတယ်။ ၂၀၁၁ ခုနှစ်နဲ့ ၂၀၁၆ တွေမှာ စီးရီးအေရဲ့ တနှစ်တာ အကောင်းဆုံး အသင်း လူစာရင်းမှာ ပါခဲ့ပါတယ်။ ၂၀၁၅ ခုနှစ်မှာလည်း UEFA ကနေ ထုတ်ပြန်တဲ့ ယူရိုပါလိဂ် အကောင်းဆုံး လူစာရင်းမှာလည်း ပါခဲ့ပါတယ်။ ၂၀၁၃ ခုနှစ်က Bloomberg ကနေ ဖော်ပြတဲ့ ဥရောပ အကောင်းဆုံး ကစားသမား စာရင်းမှာ သူက အဆင့် ၈ ချိတ်ခဲ့တာပါ။

အသင်းနဲ့ အတူ အောင်မြင်မှုတွေ ကတော့ နာပိုလီနဲ အတူ Coppa Italia ဖလားကို ၂၀၁၂ နဲ့ ၂၀၁၄ တွေမှာ ၂ ကြိမ် ရဖူးတယ်။ Supercoppa Italiana ကို ၂၀၁၄ ခုနှစ်က ၁ ကြိမ် ရထားတာ တွေ့ရပါတယ်။ ၂၀၁၃ နဲ့ ၂၀၁၄ တွေရဲ့ စီးရီးအေမှာ ဂိုးဖန်တီးမှု အများဆုံး လူအဖြစ်လည်း စာရင်းဝင်နေပါတယ်။ နောက်ပြီး ဆလိုဗက်ရဲ့ အထင်ရှားဆုံး ဘောလုံးဆု ဖြစ်တဲ့ Peter Dubovsky Trophy ဆုကိုလည်း ၂၀၀၇ နဲ့ ၂၀၀၈ မှာ ၂ နှစ် ဆက်တိုက် ရထားပါသေးတယ်။

Ref: www.en.m.wikipedia.org

The post မာရာဒိုနာရဲ့ ဂိုးသွင်းစံချိန်ကို ကျော်ဖြတ်လိုက်တဲ့ မာရက်ဟမ်ဆစ် appeared first on ဧရာဝတီ.

အင်္ဂလန်ရဲ့ အမှတ်ပေး ပြိုင်ပွဲတွေက ကမ္ဘာမှာ လူကြိုက် အများဆုံးနဲ့ အအောင်မြင်ဆုံးပါ။ အီတလီက စီးရီးဘီ ပြိုင်ပွဲတွေကို စိတ်စားသူ နည်းပါတယ်။ ဒီလိုပဲ အခြား ဒုတိယတန်းလို့ ဆိုနိုင်မယ့် ပြိုင်ပွဲတွေကို လူကြိုက် မများလှပပေမယ့် အင်္ဂလန်ရဲ့ ဒုတိယတန်း အမှတ်ပေး ဘောလုံးပြိုင်ပွဲ Football League Championship ရဲ့ အသင်းတွေနဲ့ ပြိုင်ပွဲတွေကတော့ လူတိုင်း သိကြ၊ စိတ်ဝင်စားကြပါတယ်။

အထူးသဖြင့်တော့ နာမည်ကြီး ပရီးမီးယားလိဂ်ကနေ လူသိများ ကျော်ကြားတဲ့ အသင်းတွေ တန်းဆင်းပြီး သွားကစားနေရ တတ်လို့ပါ၊ အရင်နှစ်က ဆိုရင် နယူးကာဆယ်လို အသင်း တန်းဆင်ပြီး ချန်ပီယံရှစ်ကို ရောက်သွားတယ်၊ ဒီလိုပဲ ၂၀၀၀ ပြည့်နှစ် ဝန်းကျင်က အောင်မြင်တဲ့ အက်စတွန်ဗီလာလို အသင်းတွေ၊ ဖူဟမ်လ်၊ လိဒ် စတဲ့ အသင်းကြီး ဖြစ်ခဲ့ဖူးတဲ့ အသင်းတွေ ကျင်လည် နေတဲ့ ပြိုင်ပွဲ ဖြစ်လို့ပါ။

ဒီချန်ပီယံရှစ်က အသင်းတွေက စိတ်ဝင်စားစရာ ကောင်းသလို အသင်းကို ပိုင်ဆိုင်တဲ့ ပုဂ္ဂိုလ်တွေထဲမှာ အရှေ့တိုင်းနိုင်ငံတွေက စီးပွားရေး လုပ်ငန်းရှင်တွေ၊ သူတွေး ပါဝင်နေတာကလည်း စိတ်ဝင်စားစရာပါ။ အင်္ဂလန် ချန်ပီယံရှစ် အသင်းတွေကို ဘယ်သူတွေ ပိုင်ဆိုင်ထားပါသလဲ ဆိုတာ တင်ပြပေးပါမယ်။

(၁) Aston Villa ။ ။ အေဗီလာလို့လည်း လူသိများတဲ့ အက်စတန်ဗီလာ အသင်းကို တရုတ်နိုင်ငံသား ဒေါက်တာ Tony Xia က ပိုင်ဆိုင်ပါတယ်။ သူက ၁ ဒသမ ၂ ဘီလီယံတောင် ချမ်းသာတဲ့ သူဌေးတဦး ဖြစ်ပြီး Recon Group အမည်ရှိ စီးပွားရေး လုပ်ငန်းကို တည်ထောင် လုပ်ကိုင်နေသူ ဖြစ်ပါတယ်။

(၂) Barnsley ။ ။ ဘန်စလေ အသင်းကို အမေရိကန်သား Chien Lee, Billy Beane, Paul Conway, တရုတ်နိုင်ငံသား Grace Hung, Neerav Parekh နဲ့ အင်္ဂလန်သား The Cryne မိသားစုတို့က ပိုင်ဆိုင်ထားကြပါတယ်။ သူတို့ တဦးချင်းစီရဲ့ ပိုင်ဆိုင်မှုကို သေချာမသိရပေမယ့် အားလုံးပေါင်းရဲ့ ပိုင်ဆိုင်မှုကတော့ ဒေါ်လာ ၉ ဒသမ ၁ ဘီလီယံလောက် ပိုင်ဆိုင်တဲ့ သူဌေးတွေ ဖြစ်ပါတယ်။

(၃) Birmingham City ။ ။ ဘာမင်ဂမ်အသင်းကို တရုတ်က Paul Suen က ၆၀ ဒသမ ၇၈ ရာခိုင်နှုန်း၊ Wang Leiက ၅ ဒသမ ၂၈ ရခိုင်နှုန်းနဲ့ Carson Yeung က ၆ ဒသမ ၅၁ ရာခိုင်နှုန်းစီ ပိုင်ဆိုင်ထားပါတယ်။ သူတို့ ၃ ဦးပေါင်းရဲ့ ကြွယ်ဝမှုက ဒေါ်လာ သန်း ၅၇၀လောက် ရှိပါတယ်။ အဓိက အနေနဲ့တော့ Birmingham International Holdings ကို လုပ်ကိုင်နေတာ ဖြစ်ပါတယ်။

(၄) Bolton Wanderers ။ ။ ဘော်တန် အသင်းကို အင်္ဂလန်သား Eddie Davies က ပိုင်ဆိုင်ထားပါတယ်။ သူက ဒေါ်လာ ၅၂ သန်းလောက် ချမ်းသာသူ ဖြစ်ပြီး Strix လုပ်ငန်းကို တဦးတည်း ပိုင်ဆိုင်ထားသူလည်း ဖြစ်ပါတယ်။

(၅) Brentford ။ ။ ဘရန့်ဖို့အသင်းကို အင်္ဂလန်သား Matthew Benham က ရှယ်ယာ ၉၆ ရာခိုင်နှုန်းအထိ အများဆုံး ပိုင်ဆိုင်ထားပါတယ်။ သူက ဘောလုံး အသင်း ပိုင်ရှင် စစ်စစ် ဖြစ်ပြီး အခြား စီးပွားရေး လုပ်ငန်း လုပ်ကိုင် ပိုင်ဆိုင်တာမျိုး မရှိပါဘူး။

(၆) Bristol City ။ ။ ဘရစ်စတိုးစီးတီး အသင်းကို အင်္ဂလန်သား Stephen Lansdwon က ပိုင်ဆိုင်ပါတယ်။ သူက အမေရိကန် ဒေါ်လာ ၁ ဒသမ ၉ ဘီလီယံလောက် ချမ်းသာသူ ဖြစ်ပြီး Hargreaves Lansdwon လုပ်ငန်းကို အဓိက လုပ်ကိုင် နေသူ ဖြစ်ပါတယ်။

(၇) Burton Albion ။ ။ ဘာတန်အသင်းကို အင်္ဂလန်သား Ben Robinsonက ပိုင်ဆိုင်ထားပါတယ်။ သူကလည်း ဘောလုံး အသင်းပိုင်ရှင် အဖြစ်ပဲ နာမည်ကြီးပြီး အခြား လုပ်ငန်း လုပ်ကိုင်မှု မတွေ့ရပါ။

(၈) Cardiff City ။ ။ ကာဒစ်ဖ် အသင်းကို အမေရိကန်သား Vincent Tan ရှယ်ယာ ၅၁ ရာခိုင်နှုန်း ဝယ်ထားပြီး အများဆုံး ပိုင်ဆိုင်ထားပါတယ်။ သူက Berjaya Group ကို ဦးဆောင်နေတဲ့ လုပ်ငန်းရှင် တဦး ဖြစ်ပြီး ပိုင်ဆိုင်မှု ဒေါ်လာ သန်း ၈၂၀ လောက် ကြွယ်ဝသူပါ။

(၉) Derby County ။ ။ ဒါဘီကောင်တီ အသင်းကို အင်္ဂလန်သား Mel Morris က ပိုင်ဆိုင်ပါတယ်။ သူက King အမည်ရှိ စီးပွားရေး လုပ်ငန်းကို လုပ်ကိုင်နေသူ ဖြစ်ပြီး ပိုင်ဆိုင်မှု ဒေါ်လာ ၂ ဒသမ ၈ ဘီလီယံထိ ကြွယ်ဝသူပါ။

(၁၀) Fulham ။ ။ ဖူဟမ်လ်အသင်းကို အမေရိကန်က နာမည်ကျော် သူဌေးကြီး Shahid Khan က ပိုင်ဆိုင်ပါတယ်။ သူက Flex-N-Gate ဆိုတဲ့ ကားအပိုပစ္စည်း ထုတ်လုပ်တဲ့ လုပ်ငန်း လုပ်ကိုင်နေတာ ဖြစ်ပြီး ပိုင်ဆိုင်မှု ဒေါ်လာ ၈ ဒသမ ၉ ဘီလီယံလောက် ရှိသူပါ။

(၁၁) Hull City ။ ။ ဟူးလ်စီးတီး အသင်းကို အင်္ဂလန်သား The Allam မိသားစုက ပိုင်ဆိုင်ပါတယ်။ ဒီမိသားစုက Allam Marine ဆိုတဲ့ သင်္ဘောလုပ်ငန်းကို အဓိက လုပ်ကိုင်နေတာ ဖြစ်ပြီး ပိုင်ဆိုင်မှု ဒေါ်လာ ၃၂၅ သန်းလောက် ရှိပါတယ်။

(၁၂) Ipswich Town ။ ။ အစ်ပ်ဝှစ်ချ် တောင်းန် အသင်းကို အင်္ဂလန်သား Marcus Evans က ပိုင်ဆိုင်ပါတယ်။ သူက Marcus Evans Group ကို တည်ထောင် လုပ်ကိုင်နေသူ ဖြစ်ပြီး ပိုင်ဆိုင်မှု ဒေါ်လာ ၈၂၅သန်းလေက် ချမ်းသာပါတယ်။

(၁၃) Leeds United ။ ။ ယခင်နာမည်ကြီး လိဒ်ယူနိုက်တက် အသင်းက အီတလီသား Andrea Radrizzani ရဲ့ လက်ထဲမှာပါ။သူက Eleonora Sports Ltd နဲ့ Aser Group စီးပွားရေး လုပ်ငန်းစု နှစ်ခုကို ပိုင်ဆိုင်ထားသူလည်း ဖြစ်ပါတယ်။

(၁၄) Middlesbrough ။ ။ မစ်ဒယ်ဘရော့ အသင်းက အင်္ဂလန်သား Steven Gibson ရဲ့ ပိုင်ဆိုင်မှုဖြစ်ပြီး သူက Bulkhaul Limited ကို လုပ်ကိုင်နေသူ ဖြစ်ပြီး ဒေါ်လာ သန်း ၂၆၀ လေက် ချမ်းသာပါတယ်။

(၁၅) Millwall ။ ။ မီဝေါလ် အသင်းကို အမေရိကန်သား John Berylson Richard Smith က ပိုင်ဆိုင်ထားပါတယ်။ သူက Chestnut Hill Ventures အမည်ရှိ ရင်းနှီးမြှပ်နှံမှု ကုမ္ပဏီကို တည်ထောင် လုပ်ကိုင်နေတာ ဖြစ်ပြီး ၁၇၅ သန်းလောက် ချမ်းသာသူပါ။

(၁၆) Norwich City ။ ။ နော့ဝှစ်ချ်အသင်းကို အင်္ဂလန်သား Delia Smith, Michael Wynn-Jones နဲ့ Michael Fougler တို့က ပိုင်ဆိုင်ပါတယ်။ သူတို့ထဲမှာ Jones က ရှယ်ယာ ပိုင်ဆိုင်မှု အများဆုံး ဖြစ်ပြီး ၅၃ ရာခိုင်နှုန်း အထိအောင် ပိုင်ဆိုင်ထားပါတယ်။ အစားအစာထုတ်လုပ်မှု လုပ်ငန်း၊ စာပေထုတ်ဝေရေးနဲ့ မွေးမြူရေး လုပ်ငန်းတွေ လုပ်ကိုင်ကြသူတွေ ဖြစ်ပါတယ်။

(၁၇) Nottingham Forest ။ ။ နော်တင်ဟမ် အသင်းက ဂရိနိုင်ငံသား Evangelos Marinakis ရဲ့ ပိုင်ဆိုင်မှု အဖြစ် ရှိနေပါတယ်။ သူက အခြား နာမည်ကြီး ဘောလုံး အသင်း Olympiacos F.C ကိုလည်း ပိုင်ဆိုင်ထားသူ ဖြစ်ပြီး ဒေါ်လာ သန်း ၆၅၀ လောက် ချမ်းသာပါတယ်။

(၁၈) Preston North End ။ ။ ပရက်စတန်အသင်းကို အင်္ဂလန်အခြေစိုက် Trevor Hemmings CVO က ရှယ်ယာ အများဆုံး ပိုင်ဆိုင်ထားပြီး သူ့လက်ထဲမှာ ၅၁ ဒသမ ၄ ရာခိုင်နှုန်း ရှိနေပါတယ်။ ဒီကုမ္ပဏီက ဇိမ်ခံမျှော်စင် လုပ်ငန်းတွေ၊ မြင်းပြိုင်ပွဲတွေ၊ ရင်းနှီးမြှပ်နှံမှု လုပ်ငန်းတွေနဲ့ အာမခံ လုပ်ငန်းတွေ လုပ်ကိုင်နေတာ ဖြစ်ပြီး တန်ဖိုး သန်း ၇၂၀ လောက်ရှိတဲ့ ကုမ္ပဏီ ဖြစ်ပါတယ်။

(၁၉) Queens Park Rangers ။ ။ ပြည်တွင်းမှာ QPR အဖြစ် လူသိများတဲ့ ကွင်းစ်ပါ့ခ်ရိန်းဂျား အသင်းကို မလေးရှားက ဒေါ်လာ ၃၄၅ သန်း ချမ်းသာတဲ့ Tony Fernandes က ရှယ်ယာ ၆၆ ရာခိုင်နှုန်း ပိုင်ဆိုင်ထားပြီး ဒေါ်လာ ၁၆ ဒသမ ၄ ဘီလီယံ ချမ်းသာတဲ့ အိန္ဒိယ သူဌေး Lakshmi Mittal က ၃၃ ရာခိုင်နှုန်း ပိုင်ဆိုင်ထားပါတယ်။ သူတို့ နှစ်ဦးဟာ Air Asia အပါအဝင် Tune Group နဲ့ ArcelorMittal လုပ်ငန်းတွေကို လုပ်ကိုင်နေသူပါ။

(၂၀) Reading ။ ။ ရီဒင်း အသင်းကို ထိုင်းနိုင်ငံသား Narin Niruttinanon က ရှယ်ယာ ၅၀ ရာခိုင်နှုန်း၊ Sasima Srivikorn က ၂၅ ရာခိုင်နှုန်း၊ Sumrith Thanakarnjanas က ၂၅ ရာခိုင်နှုန်းစီ ပိုင်ဆိုင်ထားပါတယ်။

(၂၁) Sheffield United ။ ။ ရှက်ဖီးလ် အသင်းကို ဆော်ဒီအာရေဗျက မင်းသားတပါးလည်းဖြစ်၊ စီးပွားရေး လုပ်ငန်းရှင် တဦးလည်း ဖြစ်တဲ့ Abdullah bin Musa’ed က ၅၀ ရာခိုင်နှုန်း ပိုင်ဆိုင်ထားပါတယ်။ သူက စက်သုံးဆီ ထုတ်လုပ်မှု လုပ်ငန်း လုပ်ကိုင်နေသူ ဖြစ်ပြီး ဒေါ်လာ ၁၅၅ သန်းလောက် ချမ်းသာသူပါ။

(၂၂) Sheffield Wednesday ။ ။ ရှက်ဖီးဝမ်းနက်စ်ဒေး အသင်းကိုတော့ ထိုင်းနိုင်ငံက Thai Union Group လုပ်ငန်းကို တည်ထောင် လုပ်ကိုင်နေတဲ့ Dejphon Chansiri က ပိုင်ဆိုင်ထားပါတယ်။

(၂၃) Sunderland ။ ။ ဆန်းဒါးလန်း အသင်းက အမေရိကန်သား Ellis Short ရဲ့ ပိုင်ဆိုင်မှု အဖြစ် ရှိနေပြီး သူက Lone Star Funds ကိုရော Skibo Castle တွေကိုပါ ပိုင်ဆိုင်သူ ဖြစ်ပြီး ဒေါ်လာ ၂ ဒသမ ၉ ဘီလီယံလောက် ချမ်းသာသူ ဖြစ်ပါတယ်။

(၂၄) Wolverhampton Wanderers ။ ။ ဝုဖ်ဗာဟက်တန် အသင်းကိုတော့ တရုတ် အခြေစိုက် Fosun International ရဲ့ လက်ခွဲ ကုမ္ပဏီ Guo Guangchang လုပ်ငန်းက ပိုင်ဆိုင်ထားပါတယ်။ ဒီကုမ္ပဏီက ရင်းနှီးမြှပ်နှံမှု လုပ်ငန်းတွေ လုပ်ကိုင်နေတာ ဖြစ်ပြီး တန်ဖိုး ဒေါ်လာ ၉၈ ဒသမ ၂ ဘီလီယံလောက် တန်တဲ့ ကုမ္ပဏီ ဖြစ်ပါတယ်။

Ref: www.en.m.wikipedia.org

The post အင်္ဂလန် ချန်ပီယံရှစ် အသင်းတွေကို ဘယ်သူတွေ ပိုင်ဆိုင်သလဲ appeared first on ဧရာဝတီ.

သူ့ရဲ့ နာမည် အပြည့်အစုံက ဂျရဲမီ ဂျွန် ဟိုစကင်း (Jeremy John Hosking) ဖြစ်ပါတယ်။ ၁၉၅၈ ခုနှစ် ဇူလိုင် ၂၀ ရက်မှာ မွေးဖွားခဲ့သူ ဖြစ်ပြီး အခုဆိုရင် အသက် ၆၀ ထဲမှာ ရောက်နေပါပြီ။ ဟော့စကင်းကို အင်္ဂလိပ်လူမျိုး စီးပွားရေး သမား တယောက် အဖြစ်ရော လူမှုရေး ကဏ္ဍတွေမှာ လှူဒါန်းတတ်သူ အဖြစ်ပါ လူသိများပါတယ်။ သူက စီးပွားရေး လုပ်ငန်း တွေမှာ ရင်းနှီးမြှပ်နှံမှု အများဆုံး လုပ်ကိုင်နေပြီး Marathon Asset Management ကို ပူးတွဲ တည်ထောင်သူလည်း ဖြစ်တယ်။

၂၀၁၆ ခုနှစ်အတွင်းက ဥရောပသမဂ္ဂမှ ဗြိတိန် ခွဲထွက်ရေး လှုပ်ရှားမှု ဖြစ်တဲ့ Vote Leave ကို ပေါင် ၁ ဒသမ ၇ သန်း လှူဒါန်းခဲ့တာ ကြောင့် နာမည်ကြီးပါတယ်၊ ၂၀၁၇ခုနှစ် အထွေထွေ ရွေးကောက်ပွဲမှာ pro-Brexit အရွေးခံရဖို့ အတွက် ထောက်ပံ့ပေးသူ အဖြစ်လည်း လုပ်ဆောင်ခဲ့ပါတယ်။ ပြီးတော့ အားကစား ကဏ္ဍမှာ အထက်မှာ ပြောခဲ့သလို ခရစ်စတယ်ပဲလေ့ အသင်းရဲ့ ရှယ်ယာ အများဆုံး ကိုင်ထားသူ တဦး အဖြစ်လည်း ရှိနေတာပါ။ ၂၀၁၅ ခုနှစ် အတွင်းက Sunday Times Rich List ရဲ့ ဖော်ပြချက်မှာ ကတည်းက သူဟာ အင်္ဂလန်မှာ အချမ်းသာဆုံး ပုဂ္ဂိုလ်စာရင်းမှာ အဆင့် ၃၀၉ ချိတ်ခဲ့ပြီး စုစုုပေါင်း ချမ်းသာမှု စတာလင်ပေါင် သန်း ၃၃၀ လောက် ရှိတယ် လို့ သိရပါတယ်။

ကိန်းဘရစ်ချ် တက္ကသိုလ်ကနေ ၁၉၇၉ ခုနှစ်က ကျောင်းပြီးတယ်၊ နိုင်ငံရေး ဘက်မှာဘည်း Conservative Party အတွက် လှူဒါန်း ထောက်ပံ့မှုကြောင့်လည်း နာမည်ကြီးသူပါ။ သူ့ရဲ့ ဇနီးသည်က Elizabeth Ann Karslake ဖြစ်ပြီး ၁၉၉၃ ခုနှစ်ကတည်းက လက်ထပ်ခဲ့ကြတာ ဖြစ်ပြီး အိမ်ထောင်မကျခင် ကတည်းက ဇနီးသည်နဲ့ Thomas Frederick ကို ၁၉၉၂ ခုနှစ် မွေးခဲ့သလို ၁၉၉၆ မှာ Luke Roger Howard ကို မွေးခဲ့လို့ ဟော့စကင်းမှာ သား ၂ ယောက်ရှိတယ်။

ဟော့စကင်းတယောက် ပထမဆုံး အလုပ်လုပ်တာက G.T Management PLC အတွက် ဖြစ်ပြီး အဆိုပါ ရုံးက အမေရိကန် မှာရော ဟောင်ကောင်မှာပါ ရှိလို့ အစပိုင်း ပြည်ပမှာ အလုပ်ထွက်လုပ်နေတယ် လို့ ဆိုရမှာပါ။ နောက်တော့ စီမံခန့်ခွဲမှု ပညာ ကောင်းကောင်း ရှိလာတဲ့ ဟော့စကင်းက အလုပ်က ထွက်လိုက်ပြီး ၁၉၈၆ ခုနှစ်မှာ လက်ရှိ လုပ်ကိုင်နေတဲ့ Marathon Asset Managemnet ကို လန်ဒန်မှာ တည်ထောင် လုပ်ကိုင်ခဲ့ပါတယ်။

အဆိုပါ လုပ်ငန်းကနေ စီးပွားရေး ရင်းနှီးမြှပ်နှံလိုသူတွေကို ဖိတ်ခေါ်ခဲ့ပြီး ပထဦးဆုံး အရှေ့တောင်အာရှ၊ အမေရိကနဲ့ တောင်အာဖရိကတွေမှာ လုပ်ငန်းတွေ ရင်းနှီးမှု လုပ်ခဲ့ပါတယ်။ လုပ်ငန်းတွေ လုပ်ကိုင်နေစဉ် အတွင်းမှာလည်း ရင်းနှီးမြှပ်နှံမှုနဲ့ ပတ်သတ်တဲ့ အကြောင်းအရာတွေ များစွာ ရေးသား တင်ပြတာတွေ လုပ်ခဲ့ပါတယ်။ ၁၉၉၅ ခုနှစ် သြဂုတ်က ပါရှိခဲ့တဲ့ South East Asia: Eighteen Reasons to be Bearish လို ဆောင်းပါးက နာမည်ကျော်ခဲ့ပါတယ်။

၂၀၁၂ ခုနှစ်မှာတော့ သူ တည်ထောင်ခဲ့တဲ့ Marathon ကို နှစ်ပိုင်းခွဲဖို့ ပြင်ဆင်ခဲ့ပါတယ်၊ သူ့ရဲ့ ပါဝင်မှုတွေကို ပြန်ခွဲထုတ်ဖို့ လုပ်ဆောင်ခဲ့ပြီး သီးခြား Hosking & Co ကို ပြန်လည် တည်ထောင်ခဲ့ပါတယ်။ ၂၀၁၆ ခုနှစ် အောက်တိုဘာမှာတော့ တရားရုံးက Marathon နဲ့ ပတ်သတ်တဲ့ အမိန့်ကို ချမှတ်ခဲ့ပါတယ်။

အဆိုပါ အမိန့်အရ Maraton ကို ခွဲဝေမှု ပြီးစီးအောင် မလုပ်ခင် သီးသန့် ကုမ္ပဏီသစ် တည်ထောင်သူ ဟော့စကင်းကို ဒဏ်ငွေ စတာလင်ပေါင် ၁ ဒသမ ၃၈ သန်း ပေးလျော်ဖို့ ပါရှိခဲ့သလို ၂၀၁၂-၁၅ ကာလအတွင်း Marathonရဲ့ အမြတ်ငွေ ရရှိမှုမှာ ဟော့စကင်းနဲ့ သက်ဆိုင်တဲ့ အတွက် အဆိုပါ ၃ နှစ် ကာလအတွင်း Marathon ရဲ့ အမြတ်ထဲက ဟော့စကင်း ရပိုင်ခွင့် ရှိတဲ့ အမြတ်ငွေ ပေါင် ၁၀ ဒသမ ၄ သန်းကို ဟော့စကင်းကို ပေးအပ်ဖို့ ဖြစ်ပါတယ်။

ဒီလိုနဲ့ Marathon ကနေ ခွဲထွက်ပြီး အလုပ်သစ် တည်ထောင် လုပ်ကိုင်နေသည့် တိုင်အောင် ဟော့စကင်းအတွက် အမြတ်ငွေတွေက ရရှိနေခဲ့သေးတာလည်း ဖြစ်ပါတယ်။ ဒါက သူ တည်ထောင်ခဲ့တဲ့ ကုမ္ပဏီနဲ့ ပတ်သတ်လို့ အကြောင်းအရာ တချို့ပါ။

တဖက်မှာတော့ သီးသန့် လုပ်ဆောင်ချက်တွေ အဖြစ် ၂၀၀၉ ခုနှစ်က ကွန်ဆာဗေးတစ်ပါတီက MP ဖြစ်သူ David Davis ကို ပါတီ အတွက် ပေါင် ၃ သောင်း လှူဖူးတယ်၊ ၂၀၁၀ ခုနှစ် မတ်လအတွင်း West Sussex ဟော်တယ်ကို ဝယ်ယူ လုပ်ကိုင်တာ ရှိသေးတယ်၊ ၂၀၁၀ သြဂုတ်လ အတွင်း ခရစ်စတယ်ပဲလေ့ ဘောလုံး အသင်းက အုပ်ချုပ်မှုပိုင်းဆိုင်ရာ အရေးပါတဲ့ ရှယ်ယာတွေကို စတင် ဝယ်ယူခဲ့တယ်။

သူက အသင်းရဲ့ ရှယ်ယာတွေကို သူ့ အနေနဲ့တင် ဝယ်ခဲ့တာ မဟုတ်ပဲ အမေရိကန် လုပ်ငန်းရှင်တွေ ဖြစ်တဲ့ Josh Harris နဲ့ David Blitzer တွေကိုပါ ခေါ်ယူပြီး ပူးပေါင်း ဝယ်ယူမှု လုပ်ခဲ့တာပါ၊ ဒီလိုနဲ့ ပဲလေ့ အသင်း ရှယ်ယာတွေက ဟော့စကင်း လက်ထဲရော အမေရိကန်နိုင်ငံသားတွေနဲ့ပါ သက်ဆိုင်မှု ရှိနေတော့တာလည်း ဖြစ်ပါတယ်။

ပြီးတော့ ဟော့စကင်းမှာ ထူးခြားတဲ့ ပိုင်ဆိုင်မှု ရှိပါသေးတယ်၊ အဲဒါကတော့ ရေနွေးငွေ့သုံး မီးရထားတွေနဲ့ ဒီဇယ်သုံး မီးရတား တစီး ပိုင်ဆိုင်ထားတာပဲ ဖြစ်ပါတယ်။ ဒီမီးရထားတွေနဲ့ ပတ်သတ်တဲ့ ဝန်ဆောင်မှုကိုတော့ Locomotive Services Ltd အဖြစ် သီးခြား လုပ်ငန်းတခု တည်ထောင် လုပ်ကိုင်နေတာပါ။

၂၀၁၆ ခုနှစ် အတွင်း ကလည်း Dartmouth Steam Railway ရဲ့ ရှယ်ယာ ၃ ချိုး ၁ ချိုးကို ဝယ်ပြီး လုပ်ငန်း ထပ်မံ တိုးချဲ့ထားတာ တွေ့ရပါတယ်။ အပျော်စီး ခရီးသွား ဝန်ဆောင်မှုရော ဒီဇယ်သုံး မီးရထား ခေါင်းတွေနဲ့ ခရီးသည်နဲ့ ကုန်စည် ပို့ဆောင်ရေး ဝန်ဆောင်မှု လုပ်ငန်းတွေကိုပါ လုပ်ကိုင်နေတာ ဖြစ်ပါတယ်။

စာရင်းတွေ အရတော့ ရင်းနှီးမြှပ်နှံမှု လုပ်ငန်းပြီးရင် ဘောလုံးအသင်းက ဝင်ငွေထက် အခု ရထား ဝန်ဆောင်မှု ပိုင်းဆိုင်ရာကနေ ရရှိတဲ့ အမြတ်တွေက ဟော့စကင်းကို အင်္ဂလန်ရဲ့ အချမ်းသာဆုံး စာရင်း ဝင်လာစေတယ်လို့ ဆိုပါတယ်။

ဒါပေမယ့် သူကတော့ အင်္ဂလန် မီဒီယာ တခုရဲ့ အင်တာဗျုးမှာ ဘောလုံး အသင်းနဲ့ ပတ်သတ်တဲ့ ရှယ်ယာတွေကလည်း ရင်းနှီးမြှပ်နှံမှု တခု ဖြစ်ပြီး နောက်ပိုင်းမှာ အလားအလာ ကောင်းတဲ့ စီးပွားရေး တခု ဖြစ်လာနိုင်တယ်လိ့ု ဖြေဖူးတာလည်း တွေ့ရပါတယ်။ ။

Ref: www.en.m.wikipedia.org

The post ခရစ်စတယ်ပဲလေ့ အသင်းရဲ့ ရှယ်ယာအများဆုံး ပိုင်ဆိုင်သူ ဂျရဲမီ ဟိုစကင်း appeared first on ဧရာဝတီ.

အသင်းကို Korea Republic National Football Team လို့ ခေါ်ပါတယ်၊ တောင်ကိုရီးယား ဘောလုံး အဖွဲ့ချုပ်ရဲ့ လက်အောက်မှာ ရှိပြီး နိုင်ငံ ကိုယ်စားပြု အသင်း အနေနဲ့ နိုင်ငံတကာ ဘောလုံး ပွဲစဉ်တွေမှာပါ ဝင်ရောက်ကစားနေတာပါ။ ၁၉၆၀ ပြည့်လွန်နှစ်တွေကနေ စတင်ပြီး အသင်းဟာ အာရှမှာ အင်အားအကြီးဆုံး အသင်း တသင်း အဖြစ် စတင် သတ်မှတ်ခံလာရ သလို အခု နောက်ပိုင်း သမိုင်းကြောင်း အောင်မြင်မှု အနေအထားအရ လက်ရှိမှာ အာရှရဲ့ အအောင်မြင်ဆုံး ဘောလုံး အသင်းလို့တောင် သတ်မှတ်နိုင်နေပါပြီ။

ဒါကလည်း ကမ္ဘာ့ဖလား ဘောလုံး ပြိုင်ပွဲကို ၉ ကြိမ်ဆက်တိုက် ဝင်ပြိုင်ခွင့်ရထားတယ်၊ လာမယ့် ၂၀၁၈ ကမ္ဘာ့ဖလားမှာ လည်း ပါတယ်၊ စုစုပေါင်း ကမ္ဘာ့ဖလား ဝင်ခွင့် ၁၀ ကြိမ်ရဖူးတယ်၊ ဒါတွေက အာရှအသင်းတွေထဲမှာ အကြိမ်ရေ အများဆုံး ဖြစ်လို့ပါ။

အသင်းကို အမည်ပြောင် အနေနဲ့ The Reds (အနီရောင်စစ်သည်များ) နဲ့ Red Devils (အနီရောင်နတ်ဆိုးများ) လို့လည်း ခေါ်ပါတယ်။ AFC ဆိုတဲ့ အာရှ ဘောလုံး အဖွဲ့ချုပ်ရဲ့ လက်အောက်ခံ အသင်း ဖြစ်ပါတယ်။ အာရှတွင်း နိုင်ငံ များပြားမှုနဲ့ ဘောလုံးနယ်ပယ် ခွဲေ၀ သတ်မှတ်မှု အရတော့ အရှေ့အာရှနယ်အတွင်းမှာ ပါရှိတာလည်း ဖြစ်ပါတယ်။ လက်ရှိမှာ အသင်း ကို နည်းပြ Shin Tae-yong က ကိုင်တွယ်နေပြီး အသင်းခေါင်းဆောင် အဖြစ် Ki Sung-yueng က တာဝန်ယူနေတာ တွေ့ရပါတယ်။ အိမ်ကွင်း အဖြစ် Seoul World Cup Stadium ကို လက်ခံကစားတာ ဖြစ်ပါတယ်။

အသင်းက အိမ်ကွင်းမှာ အနီရောင် အကျႌ၊ ဘောင်းဘီနဲ့ ခြေအိတ်တွေကို ဝတ်ဆင်ကစားပြီး အကျႌရဲ့ ရင်ဘတ်ခြမ်းမှာ ကြက်သွေးရောင် အရိပ်ထည့်ထားပါတယ်၊ အဝေးကွင်းမှာတော့ အဖြူရောင် အကျႌ၊ ဘောင်းဘီနဲ့ ခြေအိတ်တွေ ဝတ်ဆင်ပြီး အိမ်ကွင်း ဝတ်စုံလိုပဲ ရင်ဘက်ခြမ်းမှာ အပြာရောင် အရိပ် ထည့်သွင်းဖန်တီးထားတာလည်း တွေ့ရပါတယ်။

လက်ရှိ အာရှ အင်အားကြီး ဆိုပေမယ့် ကမ္ဘာ့အဆင့်မှာတော့ ပြီးခဲ့တဲ့ ဒီဇင်ဘာလ အဆင့် သတ်မှတ်ချက်မှာ အဆင့် ၆၀ အဖြစ် ရပ်တည်နေတာ တွေ့ရပါတယ်။ ဒါဟာ နိုဝင်ဘာလ အတွင်း သတ်မှတ်ချက် အဆင့် ၅၉ ထက် ၁ ဆင့် ကျသွားတာ ပါ။

အသင်းရဲ့ သမိုင်းတလျှောက် အဆင့် အမြင့်ဆုံး သတ်မှတ်ခံရမှု အဖြစ် ၁၉၉၈ ခုနှစ် ဒီဇင်ဘာ အတွင်းက အဆင့် ၁၇ ထိ ရောက်ဖူးတာလည်း တွေ့ရပါတယ်။ အသင်းကြီး တသင်း ဖြစ်တာနဲ့ အညီ အရမ်းတော့ ဆိုးရွားလောက်အောင် အဆင့် နိမ့်ကျခြင်း မရှိဖူးပဲ ၂၀၁၄ နိုဝင်ဘာနဲ့ ၂၀၁၅ ဇန်နဝါရီတွေ အတွင်း အနိမ့်ဆုံး အဖြစ် အဆင့် ၆၉ ထိအောင် ၂ ကြိမ် ရောက်ဖူးတာပဲ တွေ့ရပါတယ်။

အသင်းက ဂျပန်လို အသင်းနဲ့ စာရင် နိုင်ငံ တကာပွဲစဉ် ကစားမှု နောက်ကျတယ် လို့ ဆိုရမှာပါ။ ပထမဆုံး နိုင်ငံတကာ ပွဲစဉ်ကို ၁၉၄၈ ခုနှစ် ဇူလိုင် ၆ ရက်နေ့ကမှ စတင် ကစားခဲ့ပြီး အဆိုပါပွဲကို ဟောင်ကောင်မှာ သွားကစားခဲ့တာ ဖြစ်ပြီး ဖွင့်ပွဲမှာ တောင်ကိုရီးယားက ဟောင်ကောင်ကို ၅ ဂိုး ၁ ဂိုးနဲ့ နိုင်ခဲ့လို့ မျက်နှာပန်း လှခဲ့ပါတယ်။

အသင်းရဲ့ စံချိန်တင် အကြီးမားဆုံး ဂိုးပြတ်နိုင်ပွဲကိုတော့ ၂၀၀၃ ခုနှစ် စက်တင်ဘာ ၂၉ ရက်က တောင်ကိုရီးယားနိုင်ငံ၊ အင်ချွန်းမှာ လက်ခံကစားခဲ့တဲ့ နီပေါနဲ့ ပွဲမှာ ရရှိခဲ့ပြီး အဆိုပါ ပွဲမှာ နီပေါကို ၁၆ ဂိုး ဂိုး မရှိနဲ့ နိုင်ခဲ့တာပါ။ သမိုင်းတလျှောက် အဆိုးရွားဆုံး ရှုံးပွဲကိုတော့ ၁၉၄၈ ခုနှစ် သြဂုတ် ၅ ရက်နေ့က အင်္ဂလန်နိုင်ငံ၊ လန်ဒန်မှာ ဆွီဒင်နဲ့ ကစားတဲ့ပွဲမှာ ဆွီဒင်ကို ၁၂ ဂိုး ဂိုး မရှိနဲ့ ရှုံးခဲ့တာ ဖြစ်ပါတယ်။

အမြင့်ဆုံး အောင်မြင်မှု အနေနဲ့ ဆိုရင်လည်း ၂၀၀၂ ခုနှစ် ကမ္ဘာ့ဖလားမှာ စတုတ္ထရဖူးတာ တွေ့ရပါတယ်။ ဒါဟာ တခြား အာရှ အသင်းတွေထက် ပိုကောင်းတဲ့ ကမ္ဘာ့ဖလား အောင်မြင်မှု အဆင့်လည်း ဖြစ်ပါတယ်။ အာရှ ဖလားပြိုင်ပွဲကိုတော့ ၁၉၅၆ ခုနှစ်မှာ စတင် ဝင်ခွင့် ရခဲ့ပြီး အခုချိန်ထိအောင် ၁၃ ကြိမ် ခြေစစ်ပွဲ အောင်ခဲ့ပြီး ၁၉၅၆ နဲ့ ၁၉၆၀ တွေမှာ ၂ ကြိမ် ချန်ပီယံ ဖြစ်ထားပါတယ်။ ကွန်ဖက်ဒရေးရှင်း ဖလားမှာတော့ ၂၀၀၁ ခုနှစ်က ၁ ကြိမ် ဝင်ခဲ့ပေမယ့် အုပ်စု အဆင့်နဲ့ ထွက်ခဲ့ရ ပါတယ်။

၂၀၀၂ ခုနှစ်အတွင်းက ဂျပန်နဲ့ အတူ ကမ္ဘာ့ဖလားကို အိမ်ရှင် အဖြစ် လက်ခံ ကစားတဲ့ ပြိုင်ပွဲမှာ ဆီမီးဖိုင်နယ် အထိအောင် ရောက်ခဲ့တာ ဖြစ်ပြီး အဲဒီနောက်တော့ ၂၀၁၀ ကမ္ဘာ့ဖလားမှာ ၁၆ သင်း အဆင့် ရောက်ခဲ့သေးတယ်၊ အာရှ ဖလားဆိုရင် လည်း ချန်ပီယံ ၂ ကြိမ်ပဲ ဖြစ်ဖူးပေမယ့် ဒုတိယ ၄ ကြိမ်၊ တတိယ ၄ ကြိမ်စီ ရထားပြီး အောင်မြင်မှု အမြင့်ဆုံး အာရှ အသင်း တသင်း အဖြစ် ရှိနေတာပါ။ Asian Games မှာလည်း ၁၉၇၀၊ ၁၉၇၈ နဲ့ ၁၉၈၆ တွေမှာ ရွှေတံဆိပ် ရယူထားပါ သေးတယ်။

အသင်းရဲ့ အဓိက ပြိုင်ဘက်ကတော့ အိမ်နီးချင်း အင်အားကြီး ဂျပန်ဖြစ်ပါတယ်။ အခုချိန်ထိ ဂျပန်နဲ့ ၇၅ ပွဲ ကစားထားပြီး ၄၀ နိုင်တယ်၊ ၂၂ ပွဲ သရေနဲ့ ၁၃ ပွဲပဲ ရှုံးထားလို့ ရလဒ်ကောင်းနေပါတယ်။ ပြီးတော့ နိုင်ငံရေး အရပါ ပြိုင်ဘက် ဖြစ်နေတဲ့ မြောက်ကိုရီးယားနဲ့လည်း အဓိက ပြိုင်ဘက်တွေ အဖြစ် ရှိနေပါတယ်။ ဒါပေမယ့် မြောက်ကိုရီးယားက ပြိုင်ဖက်ကောင်း တော့ မဟုတ်ခဲ့ပါဘူး။ ပြီးတော့ တရုတ်၊ အီရန်တို့လည်း ရှိပါတယ်။ အထူးသဖြင့်တော့ အီရန်နဲ့ အာရှဖလား ကွာတားဖိုင်နယ်မှာ ၅ နှစ်ဆက် တွေ့ဆုံဖူးပြီး ၂ ပွဲနိုင်၊ ၂ ပွဲရှုံး၊ ၁ ပွဲသရေနဲ့ ခြေညီနေပါတယ်။ ဒါပေမယ့် ရှေ့ပိုင်းမှာ တောင်ကိုရီးယားရဲ့ ရလဒ်တွေ ဆိုးဝါးထားမှုက အခုချိန်ထိအောင် အီရန်နဲ့ ပွဲမှာ ၁၃ ပွဲ ရှုံးထားတယ်၊ ၇ ပွဲ သရေကျပြီး ၉ ပွဲပဲ နိုင်ထားတာပါ။

အသင်းရဲ့ နောက်ဆုံး ခြေစွမ်းပိုင်း အနေအထားကတော့ အားရစရာပါ၊ ပြီးခဲ့တဲ့ ၂၀၁၇ ခုနှစ် ဒီဇင်ဘာ ၁၂ ရက်က မြောက်ကိုရီးယားနဲ့ EAFF ချန်ပီယံပြိုင်ပွဲမှာ ၁ ဂိုး ဂိုးမရှိနဲ့ နိုင်ထားသလို၊ ဒီဇင်ဘာ ၁၆ ရက်နေ့က ဂျပန်နဲ့ ပွဲစဉ်မှာလည်း ၄ ဂိုး ၁ ဂိုးနဲ့ နိုင်ထားပါတယ်။

ကမ္ဘာ့ဖလား မတိုင်ခင် ဥရောပရဲ့ အင်အားကြီးပိုလန်နဲ့ လာမယ့် မတ်လ ၂၇ ရက်နေ့မှာ ခြေစမ်းပွဲ ကစားဖို့ ရှိနေတာပါ။ ကမ္ဘာ့ဖလား အုပ်စုပွဲစဉ် အနေနဲ့တော့ အုပ်စုနည်းနည်း ကျပ်နေတယ် လို့ ဆိုရမှာ ဖြစ်ပြီး ဇွန်လ ၁၈ ရက်နေ့မှာ ပထမဆုံး ပွဲ အနေနဲ့ ဆွီဒင်၊ ၂၃ ရက်နေ့မှာ ဒုတိယ ပွဲအဖြစ် မက္ကဆီကို၊ ၂၇ ရက်နေ့မှာ အုပ်စု နောက်ဆုံးပွဲ အဖြစ် ဂျာမနီတို့နဲ့ ကစားရမှာပါ။

ဆွီဒင်ရဲ့ ခြေစွမ်းကလည်း ကောင်းတယ်၊ မက္ကဆီကိုကလည်း ပြိုင်ဘက်အဆင့်ထက် သာတယ်လို့ ဆိုနိုင်မယ့် အသင်း ဖြစ်သလို ဂျာမနီကတော့ ၂ ကြိမ်အဖြစ်နဲ့ရော ဘရာဇီးရဲ့ စံချိန်ကိုပါ အမီလိုက်ဖို့ ဖလား ရယူချင်နေတာမို့ ကျော်ဖြတ်ဖို့ တောင်ကိုရီးယား ဘောလုံးအသင်း အနေနဲ့ တော်တော်ကို ခက်ခဲမယ့် အနေအထား ဖြစ်နေပါတယ်။

Ref: www.en.m.wikipedia.org

The post အနီရောင် တောင်ကိုးရီးယား နတ်ဆိုးများ ကမ္ဘာ့ဖလားကို ရယူနိုင်မှာလား appeared first on ဧရာဝတီ.

ယာယာတိုရေးကို ၁၉၈၃ ခုနှစ် မေလ ၁၃ ရက်နေ့က မွေးပါတယ်၊ ၃၄ နှစ် ရှိနေပြီ။ ဒါပေမယ့် ကွင်းလယ် ကစားသမား ဖြစ်လို့ အခုထိအောင် ကစားနိုင် နေသေးသလို ခြေစွမ်းလည်း ကောင်းနေဆဲပါ။ နာမည် အပြည့်အစုံက ဂနက်နရီ ယာယာ တိုရေး (Gnégnéri Yaya Touré) ဖြစ်ပါတယ်။ ကွင်းလယ်သမား စစ်စစ်ပါ၊ ဒါပေမယ့် ဂိုးသွင်းနိုင်မှုရော ဂိုးဖန်တီးနိုင်မှုပါ အားကောင်း ပါတယ်။ လက်ရှိ နာမည်ကျော် အင်္ဂလန် ကလပ် အသင်း မန်းစီးတီးမှာ ကစားနေ ပါတယ်။ မိခင် အသင်း အနေနဲ့ ကတော့ အိုက်ဗရီကို့သား ဖြစ်လို့ အိုင်ဗရီကို့စ်မှာ ကစားပါတယ်၊ အသင်းခေါင်းဆောင် တာဝန်ကိုပါ ရယူထားသူပါ။

အရပ် ၆ ပေနဲ့ ၂ လက်မတောင် ရှိပါတယ်။ မန်စီးတီး ကစားသမားတွေထဲမှာ အရပ် အမြင့်ဆုံးလို့ ဆိုရင်လည်း ရပါတယ်။ ဒီဘက်နှစ်တွေ အတွင်း မန်စီးတီးရဲ့ အောင်မြင်မှုတွေကို ရယူနိုင်မှုရဲ့ အဓိက အကူအညီ ပေးသူ တယောက် ဆိုရင်လည်း မမှားပါဘူး။ မန်စီးတီးမှာ ကျောနံပါတ် ၄၂ ကို ဝတ်ဆင် ကစားပါတယ်။

သူ့ရဲ့ ငယ်စဉ် ဘ၀ ဘောလုံး ပညာ သင်ယူမှုကို ၁၉၉၆ခုနှစ်ကမှ စတင်ခဲ့တာ ဖြစ်ပြီး ၂၀၀၁ ခုနှစ်ထိ ၅ နှစ်ကြာ ASEC Mimosas မှာ နေခဲ့ပါတယ်။

နောက်တော့ Beveren ကို ရောက်လာပါတယ်။ ကြေးစား ကစားသမား ဘဝကို ၂၀၀၁ ခုနှစ်မှာ ဘီဗီယန်နဲ့ စတင်ခဲ့ပြီး ၂ နှစ်ကြာခဲ့ပါတယ်။ ၂၀၀၃ ခုနှစ် အထိ အသင်း အတွက် ပွဲပေါင်း ၇၀ ကစားပြီး ၃ ဂိုး သွင်းခဲ့ပါတယ်။ ၂၀၀၃ ခုနှစ်မှာတော့ Metalurh Donetsk ကို ရောက်လာပါတယ်။ ဒိုးနက်မှာလည်း ၂ နှစ်ကြာပေမယ့် ပွဲထွက်ခွင့် ကောင်းကောင်း မရပဲ ၃၃ ပွဲပဲ ကစားရသလို ၃ ဂိုးပဲ သွင်းနိုင်ခဲ့ပါတယ်။

၂၀၀၅ ခုနှစ်မှာတော့ တိုရေးတယောက် အသင်းကြီးမှာ ခြေချခွင့် ရပါပြီ။ သူကတော့ Olympiacos ဖြစ်ပါတယ်။ ၂၀၀၆ ခုနှစ်ထိ ၁ ရာသီ ကစားတယ်၊ ၂၆ ပွဲ ကစားပြီး ၃ ဂိုး သွင်းပါတယ်။ အရင် အသင်းတွေနဲ့ စာရင် အိုလံပီယာမှာ ခြေစွမ်း ပြလာပြီး ၁ နှစ် အကြာ ၂၀၀၆ မှာတော့ ပြင်သစ် အခြေစိုက် Monaco ကို ရောက်သွားပါတယ်။ မိုနာကိုမှာလည်း ၁ ရာသီပဲ ကစားပြီး ၂၇ ပွဲမှာ ၅ ဂိုးသွင်းသလို ဂိုးဖန်တီးမှု ကောင်းကောင်း လုပ်ဆောင်နိုင်လာခဲ့ပါတယ်။

၂၀၀၇ ခုနှစ်မှာတော့ သူ့ အတွက် ဂုဏ်ယူစရာ အကောင်းဆုံးလို့ ဆိုနိုင်မယ့် ကမ္ဘာ့ထိပ်တန်းကလပ် Barcelona ကို ရောက်လာပါတယ်။ စပိန်ထိပ်တန်း ဘာစီလိုနာမှာ ၃ နှစ်တောင် ကြာပါတယ်။ ၂၀၁၀ ခုနှစ်ထိအောင် နေပြီး ၃ ရာသီ အတွင်းမှာ ၇၄ ပွဲ ကစားပြီး ၄ ဂိုး သွင်းပါတယ်။ ဒါပေမယ့် ကစားကွက် ဦးစားပေး ကစားတဲ့ ဘာစီလိုနာမှာ လူကောင်းကြီးကြီးနဲ့ တိုရေး အံမဝင်လှပါဘူး။ ပြီးတော့ နာမည်ကျော် ကစားသမား အများစု ရှိနေတာမို့ သူ့ အတွက် ပွဲထွက်ခွင့် သိပ်မရခဲ့ပါဘူး။

ဒီလိုနဲ့ ၂၀၁၀ ခုနှစ်မှာ အောင်မြင်မှုကို ငွေနဲ့ ရှာဖွေနေတဲ့ မန်စီးတီးရဲ့ ခေါ်ယူခြင်း ခံရပါတယ်။ အခုဆိုရင် မန်စီးတီးမှာ ၈ နှစ် သက်တမ်းထဲ ရောက်လာပြီ ဖြစ်သလို ၂၂၃ ပွဲ ကစားပေးခဲ့ပြီး သွက်လက်မှုနဲ့ တွန်းတွန်းတိုက်တိုက် ကစားတဲ့ အင်္ဂလန် ကစားကွက်နဲ့ အံဝင်သွားတဲ့ တိုရေး တယောက် ကွင်းလယ် ကစားသမား ဆိုပေမယ့် ပြိုင်ပွဲစုံ ၆၂ ဂိုး သွင်းယူပေးထားသလို မန်စီးတီးမှာပဲ ကစားသမား ဘ၀ အဆုံးသတ်ဖို့လည်း ရှိနေတာပါ။

နိုင်ငံအသင်း အတွက်ကတော့ အိုင်ဗရီကို့စ် လူငယ် အသင်းအတွက် ကစားပေးတာ မရှိခဲ့ပေမယ့် လက်ရွေးစင် အသင်း အတွက်ကတော့ အခုချိန်ထိ ပွဲပေါင်း ၁၀၀ ပါဝင်ထားပြီး ၁၉ ဂိုးထိအောင် သွင်းထားတာလည်း တွေ့ရပါတယ်။

သူက ငယ်ငယ်တုန်းက တိုက်စစ်မှူး ဖြစ်ချင်ခဲ့ပေမယ့် အရပ်ရှည်လွန်းသွားပြီး ပြေးနှုန်းနဲ့ သွက်လက်မှုတွေမှာ လိုအပ်ချက် ရှိလာပြီး ကစားကွက် အရ ကွင်းလယ်ကစားသမား ဖြစ်ခဲ့ပါတယ်။ တဦးတည်း ထိုးဖောက် ပုံဖော် ကစားတဲ့ ကွင်းလယ်ကစားဟန်နဲ့ ကစားပါတယ်။ လက်ရှိ သူ့လို ကွင်းလယ် ဖန်တီးရှင် စစ်စစ် ကစားသမားတွေကို စာရင်းထုတ်ရင် တိုရေးဟာ ကမ္ဘာ့ အကောင်းဆုံး ထိပ်ဆုံး ၁၀ ဦး စာရင်း ဝင်ပါလိမ့်မယ်။ ဒါကြောင့်လည်း အာဖရိက တနှစ်တာ အကောင်းဆုံး ဘောလုံး သမားဆုကို ၂၀၁၁ ကနေ ၂၀၁၄ ထိအောင် ၄ နှစ်ဆက်တိုက် ရယူနိုင်ခဲ့ပါတယ်။

ပြီးတော့ ထူးခြားချက် အနေနဲ့ ပြောစရာ ရှိတာက တိုရေးကို တယောက်တည်း အနေနဲ့တင် မဟုတ်ပဲ တိုရေး ညီနောင် အဖြစ် လူသိများပါတယ်။ အကြောင်းကတော့ တိုရေးမှာ Kolo Toureဆိုတဲ့ ညီ ရှိသေးလို့ပါ။ သူလည်း ဘီဗီယန်၊ မန်စီးတီးတွေ အတွက်ရော အိုင်ဗရီကို့စ် အတွက်ပါ ကစားပေးနေသူ ကစားသမားပါ။ ဒါပေမယ့် ညီတိုရေးက အစ်ကို တိုရေးလောက် အရပ်အမောင်းလည်း မကောင်းဘူး၊ ခြေစွမ်းလည်း မကောင်းဘူး၊ နာမည်လည်း အရမ်းမကြီးလှပါဘူး။

တကယ်ဆို သူတို့က ညီအစ်ကို ၃ ယောက်ပါ၊ အငယ်ဆုံး Ibrahim Toure ရှိပါသေးတယ်။ ဒါပေမယ့် အီဗရာဟင်က ၂၀၁၄ ခုနှစ် ဇွန် ၁၉ ရက်မှာ အသက်၂၈ နှစ်ပဲ ရှိသေးပေမယ့် ကင်ဆာနဲ့ သေဆုံးသွားခဲ့ပြီး သူလည်း ဘောလုံးသမား တယောက်ပါပဲ။

တိုရေး ရရှိဖူးတဲ့ အောင်မြင်မှုတွေကို ကြည့်မယ် ဆိုရင် ၂၀၀၁ခုနှစ်က ASEC Mimosas နဲ့ အတူ Cote d’Ivorie Premier Division ဖလားကို ရတယ်၊ အိုလံပီယာကော့နဲ့ အတူ ၂၀၀၆ ခုနှစ်မှာ Superleague Greece ဖလားရယ်၊ Greek Cup ရယ်ကို ရဖူးတယ်၊ ဘာစီလိုနာရောက်တော့ ၂၀၀၉ နဲ့ ၂၀၁၀ တွေမှာ ၂ နှစ်ဆက် La Liga ဖလားရတယ်၊ ၂၀၀၉ မှာ Copa del Rey လည်း ရတယ်၊ Supercopa de Espana လည်း ရဖူးတယ်၊ ၂၀၀၉ ခုနှစ်ရဲ့ UEFA ချန်ပီယံလိဂ် ဖလားလည်း ကိုင်မြှောက်ဖူးတယ်၊ ၂၀၀၉ ခုနှစ်မှာပဲ UEFA Super Cup ကိုပါ ထပ်ရတယ်၊ ပြီးတော့ တိုက်ကြီးများ ကလပ်ဖလားလို့ လူသိများတဲ့ FIFA Club World Cup ကိုပါ ရပါတယ်။ သူ့ အတွက်တော့ ၂၀၀၉ ခုနှစ်က အအောင်မြင်ဆုံး နှစ်ပါပဲ။

မန်စီးတီး အနေနဲ့ကတော့ အခုနှစ်တွေထဲမှာ အောင်မြင်မှုတွေ ရလာပေမယ့် ဥရောပ အဆင့်ထိတော့ တိုး မပေါက် သေးပါဘူး။ ၂၀၁၂ နဲ့ ၂၀၁၄ တွေမှာ ပရီးမီးယားလိဂ် ဖလား ၂ လုံးရတယ်၊ ၂၀၁၁ ခုနှစ်မှာ FA ဖလား ရတယ်၊ ၂၀၁၄ နဲ့ ၂၀၁၆ တွေမှာ League ဖလား ၂ လုံး ရတယ်၊ ၂၀၁၂ ခုနှစ် ကွန်မြူနတီဒိုင်း တခုလည်း ရခဲ့ပါတယ်။ သူ့ အနေနဲ့ မန်စီးတီးနဲ့ ဥရောပ အဆင့် ဆုဖလား ရဖို့ မလွယ်တော့ဘူး လို့လည်း ဆိုရမှာပါ။ နိုင်ငံအသင်းနဲ့တော့ ၂၀၁၅ ခုနှစ်က Afica Cup of Nations ဖလား တလုံးရဖူးထားတာ တွေ့ရပါတယ်။

တဦးချင်း ဆုတံဆိပ် ရရှိမှုမှာတော့ ၂၀၀၉ ခုနှစ်က တနှစ်တာ အကောင်းဆုံး အိုင်ဗရီကို့စ် ကစားသမား ဖြစ်ခဲ့တယ်။ အထက်မှာ ပြောခဲ့တဲ့ အာဖရိက အကောင်းဆုံး ဘောလုံးသမား အဖြစ် ၄ နှစ် ရွေးချယ်ခံရဖူး သလို CAF ကနေ ရွေးချယ်တဲ့ တနှစ်တာ အကောင်းဆုံး အသင်းလူစာရင်းမှာ ၂၀၀၈၊ ၂၀၀၉၊ ၂၀၁၁၊ ၂၀၁၂၊ ၂၀၁၃၊ ၂၀၁၄၊ ၂၀၁၅ တွေမှာ ၇ ကြိမ်ထိ ပါဝင်ခဲ့သူပါ။

ESM ကနေ ရွေးချယ်တဲ့ တနှစ်တာ အကောင်းဆုံး အသင်း လူစာရင်းမှာလည်း ၂၀၁၄ က ပါခဲ့ဖူးပါတယ်။ PFA ကနေ ရွေးချယ်တဲ့ တနှစ်တာ အကောင်းဆုံး အသင်း လူစာရင်းမှာလည်း ၂၀၁၂ နဲ့ ၂၀၁၄ တွေမှာ ပါခဲ့တယ်။

BBC ကနေ ရွေးချယ် ပေးအပ်တဲ့ တနှစ်တာ အကောင်းဆုံး အာဖရိက ကစားသမားဆုကို ၂၀၁၃ နဲ့ ၂၀၁၅ တွေမှာ ၂ ကြိမ်ရဖူးတယ်၊ FIFPro ကနေ ရွေးချယ်တဲ့ ကမ္ဘာ့ အကောင်းဆုံး ကစားသမား ၁၁ ဦး စာရင်းမှာ ၂၀၁၃၊ ၂၁၀၄၊ ၂၀၁၅ တွေမှာ ၃ နှစ် ဆက်တိုက် ပါဝင်ခဲ့သူလည်း ဖြစ်ပါတယ်။ မန်စီးတီးရဲ့ ၂၀၁၄ ခုနှစ် အတွက် အကောင်းဆုံး အသင်း ကစားသမား အဖြစ် ရွေးချယ်ခံဖူးသူလည်း ဖြစ်ပါတယ်။ ။

Ref: www.en.m.wikipedia.org

The post မန်းစီးတီးရဲ့ ကွင်းလယ် ကစားသမား ယာယာတိုရေး appeared first on ဧရာဝတီ.

ရုရှား အမျိုးသမီး အားကစားသမားများသည် ၎င်းတို့၏ လှပကျော့ရှင်းမှုနှင့် ကျက်သရေရှိမှု အတွက် သာမက အနိုင်မခံ အရှုံးမပေးသော စိတ်ဓာတ်နှင့် ပြတ်သားသော စရိုက်လက္ခဏာကြောင့်လည်း ကျော် ကြားကြသည်။ ထို ခိုင်ကျည် ပြတ် သားသော စိတ်ဓာတ်နှင့် ကြိုးစားမှုများကြောင့် မျှော်လင့်ချက် ကင်းမဲ့နေရသည့် ရှုံးနိမ့်မည့် အခြေအနေမှ ပြိုင်ပွဲကို ပြောင်းပြန်လှန်ကာ နိုင်ပွဲ အဖြစ်ပြောင်းကာ ဆုတံဆိပ်များ ရယူနိုင်ခဲ့သည်။

ကမ္ဘာ့နှင့် အိုလံပစ် အောင်ပွဲများကို လမ်းခင်းပေးလိုက်သော ခွန်အားနှင့် အလှ ပေါင်းစပ်ထားသည့် ရုရှားအမျိုးသမီး အားကစားသမား တချို့ကို မိတ်ဆက်ပေးလိုက်သည်။

၁။ ကာရိုလင်နာဆီဗက်စတီယာနိုဗာ (Karolina Sevastyanova)

ဆီဗက်စတီယာနိုဗာသည် ၂၀၁၂ ခုနှစ် လန်ဒန် အိုလံပစ်၏ အုပ်စုလိုက် ကစားပွဲတွင် ရွှေတံဆိပ် ရယူပြီးနောက် အားကစား လောကမှ အနားယူခဲ့သည့် ဂျွမ်းဘားအက အားကစားမယ် တဦးဖြစ်သည်။

၎င်းသည် ၂၀၁၂ ခုနှစ် အိုလံပစ် ပြိုင်ပွဲဝင် အမျိုးသမီးများ အနက် အလှပဆုံး အမျိုးသမီးဖြစ်သည် ဟု ထိုအားကစားပြိုင်ပွဲ အတွင်း ကောက်ယူသော စစ်တမ်းတွင် လွတ်လပ်သော နိုင်ငံများ ဓနသဟာယ အဖွဲ့ဝင် နိုင်ငံများမှ ပြည်သူများက မဲပေးခဲ့သည်။

ရုရှား ရေခဲပြင်ဟော်ကီ အကျော်အမော် အလက်ဇန္ဒာ အိုဗက်ရှ်ကင်နှင့် ဇနီးလောင်း တင်းနစ်မယ် မာရီယာ ကီရီလန်ကိုတို့ လမ်းခွဲလိုက်ရခြင်းမှာ ဆီဗက်စတီယာနိုဗာကြောင့် ဖြစ်သည် ဟု ဆိုကြသည်။ အိုဗက်ရှ်ကင် နှင့် ဆီဗက်စတီယာနိုဗာတို့ တွဲသည့် ဓာတ်ပုံများ လူမှုကွန်ယက်မီဒီယာတွင် ပေါ်လာသောကြောင့် ကီရီလန်က စေ့စပ်ကြောင်းလမ်းထားခြင်းကို ဖျက်သိမ်းခဲ့သည် ဟု ဆိုသည်။

ဆီဗက်စတီယာနိုဗာသည် Maxim အမည်ရှိ မဂ္ဂဇင်း မျက်နှာဖုံးရှင် အဖြစ်လည်း သရုပ်ဆောင်ခဲ့သည်။

၂။ အန်နာ ဆီဒိုရိုဗာ (Anna Sidorova)

အန်နာ ဆီဒိုရိုဗာ သည် ရုရှားရေခဲပြင် ထွေပစ်အသင်း (Russian national curling team) ၏ ခေါင်းဆောင်၊ နှစ်ကြိမ်မြောက် ဥရောပ ချန်ပီယံနှင့် ၂၀၁၇ ခုနှစ်ကမ္ဘာ့ ချန်ပီယံလုပွဲတွင် ဒုတိယ ဆုရှင်ဖြစ်သည်။

ဒဏ်ရာတခုကြောင့် အလှပြ ရေခဲပြင်လျှောစီး လောကမှ ထွက်ခဲ့ရပြီးနောက် ဆီဒိုရိုဗာသည် ရေခဲပြင် ထွေပစ်လောကတွင် အာရုံစိုက် ကစားခဲ့ပြီး ဥရောပနှင့် နိုင်ငံတကာ အကောင်းဆုံးဆုများ ရရှိခဲ့သည်။

၂၀၁၇ ခုနှစ် နိုင်ငံတကာ ရေခဲပြင် ထွေပစ်ပြိုင်ပွဲတွင် ဆီဒိုရိုဗာဦးဆောင်သော ရုရှား အသင်းသည် နိုင်ငံ၏ သမိုင်းတွင် ပထမဆုံး အကြိမ်အဖြစ် နောက်ဆုံးချန်ပီယံလုပွဲသို့ တက်နိုင်ခဲ့သော်လည်း ကနေဒါအသင်းကို ရှုံးနိမ့်ခဲ့ရသည်။

သူမ ပါဝင်ကစားသမျှ ပွဲတိုင်းကို နိုင်အောင် ကြိုးစားနေကြောင်းနှင့် သူ၏ နောက်ဆုံးရည်မှန်းချက်မှာ အိုလံပစ်ပွဲတွင် ဆုရရှိရေး ုဖြစ်သည်ဟု ဆီဒိုရိုဗာ မကြာခဏ ပြောတတ်သည်။

၃။ မာရီယာ ရှာရာပိုဗာ (Maria Sharapova)

မာရီယာ ရှာရာပိုဗာသည် ငါးကြိမ်မြောက်ဂရင်း ဆလမ်းဆုရှင်နှင့် ၂၀၁၂ ခုနှစ် အိုလံပစ် ငွေတံဆိပ်ဆုရှင် ဖြစ်ပြီး အမျိုးသမီး တင်းနစ်ပြိုင်ပွဲများတွင် အဖမ်းစားနိုင်ဆုံးသူ အဖြစ် မကြာခဏ ရည်ညွှန်းပြောဆိုခံရေလေ့ရှိသည်။

ရှာရာပိုဗာသည် ယခင်က စေ့စပ်ခဲ့ဖူးသော်လည်း တကိုယ်တည်း ဖြစ်နေသည်သာ များသည်။ ၂၀၁၀ ခုနှစ်တွင် NBA ဘတ်စကက်ဘော ကစားသမား ဆက်ရှာ ဗူဂျာစစ်က ၎င်းတို့ စတင်ဆုံဆည်းသည့် နှစ်ပတ်လည်နေ့တွင် ချစ်ရေးဆိုသော အခါ ရှာရာပိုဗာ လက်ခံခဲ့သည်။

သို့သော် ၂၀၁၂ ခုနှစ်သို့ ရောက်သောအခါ ဆလိုဗေးနီးယားနိုင်ငံသား ဆက်ရှာဗူဂျာစစ်သည် သူ၏ အသက်မွေးဝမ်းကျောင်း အားကစား အတွက် တူရကီနိုင်ငံ အစ္စတန်ဘူသို့ ပြောင်းသွားသော အခါ သူတို့စေ့စပ်ထားကို ရှာရာပိုဗာက ဖျက်သိမ်းလိုက်သည်။ ရှာရာပိုဗာသည် ဘူလ်ဂေးရီးယား တင်းနစ်သမား ဂရီဂေါ ဒီမီထရော့နှင့်လည်း ၂ နှစ်ခန့် တွဲခဲ့ပြီးနောက် ၂၀၁၅ ခုနှစ်တွင်လမ်းခွဲခဲ့သည်။
ရှာရာပိုဗာသည် တားမြစ်ဆေးဖြစ်သော မယ်လ်ဒိုနီယမ် သုံးစွဲသောကြောင့် ၁၅ လ ကစားခွင့် အပိတ်ခံရပြီး ၂၀၁၇ ခုနှစ် ဧပြီလကမှ ပြန်လည်ကစားခွင့်ရခဲ့သည်။

၄။ ဒါယာ ကလစ်ရှ်နာ (Darya Klishina)

တားမြစ်ဆေးသုံးသည် ဟူသော သံသယကြောင့် ရုရှား ပြေး၊ ခုန်၊ ပစ် အဖွဲ့တခုလုံးကို သိမ်းကြုံး ပိတ်ပင်ရန် နိုင်ငံတကာ အိုလံပစ် ကော်မတီက ဆုံး ဖြတ်လိုက်သည့် ရီရိုတွင် ကျင်းပသော ၂၀၁၆ ခုနှစ် နွေရာသီ အိုလံပစ်တွင် ရုရှား အလျားခုန် အားကစားမယ် ကလစ်ရှ်နာ တဦးတည်းသာ ပါဝင်ခွင့်ရသည်။

လန်ဒန်တွင် ကျင်းပသည့် ၂၀၁၇ ကမ္ဘာအားကစား ချန်ပီယံလုပွဲ၏ အလျားခုန် ကစားပွဲတွင် ကလစ်ရှ်နာ ဒုတိယဆု ရခဲ့သည်။ ထိုစဉ်က ရုရှား အားကစားအဖွဲ့ချုပ်ကို ဆိုင်းငံ့ထားဆဲ ဖြစ်သောကြောင့် ကလစ်ရှ်နာသည် တသီးပုဂ္ဂလ ကစားသမား အဖြစ် ပြိုင်ပွဲဝင်ခဲ့သည်။

လန်ဒန်ပွဲတွင် ငွေတံဆိပ်ရလာသော အခါ သူမကို ညံ့ဖျင်းသော ကစားသမားအဖြစ် ဝေဖန်သူများ အသံတိတ် သွားခဲ့သည်။

၅။ မာရီယာ ရှူရော့ချ်ကီနာ (Maria Shurochkina)

ရုရှား ရေကူးဂျွမ်းဘားမယ် ရှူရော့ချ်ကီနာ ၂၀၀၀ ပြည့်နှစ်မှ စတင်ပြီးပြိုင်ဘက်ကင်းနေသည့် ရုရှားနိုင်ငံအသင်းမှ ဖြစ်သည်။

၂၀၁၆ ခုနှစ် ရီရိုအိုလံပစ်တွင် ရရှိခဲ့သော ရွှေတံဆိပ်အပြင် ရှူရော့ချ်ကီနာသည် ကမ္ဘာ့အဆင့် ဆု ၈ ဆုနှင့် ဥရောပအဆင့် ဆု ၃ ဆု ရရှိခဲ့သည်။ အသက် ၂၂ နှစ်သာ ရှိသေးသော ရှူရော့ချ်ကီနာကို ရေသူမလေး ဟု ခေါ်ကြပြီး သူမသည် ထင်ရှားသော ရုရှားအဆိုတော် နျူရှာ၏ ညီမငယ်လည်း ဖြစ်သည်။

The post ခွန်အားနှင့် အလှပြည့်စုံသော ရုရှားအားကစားနတ်မိမယ်များ appeared first on ဧရာဝတီ.

ဘောလုံးအသင်းတွေရပ်တည်မှုနဲ့ အသင်းပိုင်ရှင်တွေ အကြောင်းကလည်း စိတ်ဝင်စားစရာကောင်းသလို ဘောလုံး အသင်း ဝတ်စုံတွေကို စပွန်ဆာကြေး အများဆုံး ပေးထားတဲ့ ကုမ္ပဏီအမှတ်တံဆိပ်တွေကလည်း စိတ်ဝင်စားစရာပါ။ သူတို့ဆီမှာ အသင်းကောင်းဖို့ပဲ လိုပြီး ကျန်တဲ့ အပိုင်းမှာ သူ့နေရာနဲ့ သူ ထောက်ပံ့ပေးကြတာ တွေ့ရပါတယ်။ ထောက်ပံ့ပေးတာနဲ့ အတူ တဖက်ကလည်း သူတို့ အတွက် ဈေးကွက်လည်းရရှိနေတာ ဖြစ်ပါတယ်။ သမိုင်း တလျှောက် တန်ဖိုးအကြီးဆုံး ဘောလုံးအသင်းဝတ်စုံ စပွန်ဆာကုမ္ပဏီတွေ အကြောင်း တင်ပြပါမယ်။

(၁၀) Liverpool – အသင်းက Warrior ကုမ္ပဏီနဲ့ တနှစ်ကို ပေါင် ၂၅သန်း တန်ဖိုးရှိ စာချုပ် ချုပ်ထားပါတယ်။ ၂၀၁၂ ခုနှစ်ကနေ စတင် ချုပ်ဆိုထားတာ ဖြစ်ပြီး အခု နှစ်ကုန်မှာ စာချုပ် သက်တမ်းပြည့်မှာ ပါ။ ဒါပေမယ့် လီဗာပူးလ်အတွက် အခု စာချုပ်ချုပ်တာ နည်းနည်းစောသွားတယ်လို့ ဆိုရမှာပါ။ အကြောင်းကတော့ သူ့နောက်မှာ ချုပ်တဲ့ စပါးနဲ့ ချယ်ဆီးလ်တွေက အခု စပွန်ဆာကြေးထက် ပိုမြင့်ပြီး ရရှိ ချုပ်ဆိုနိုင်ခဲ့လို့ပဲ ဖြစ်ပါတယ်။ အခု နှစ်ကုန်မှာ စာချုပ်သစ် ချုပ်ဆိုရင်တော့ အဆင့် ၁၀ ကနေ အထက်ကို တက်လာနိုင်မယ် ထင်ပါတယ်။

(၉) Tottenham Hotspur- အသင်းကို စပါး လို့ပဲ ပြည်တွင်းက အများဆုံး ခေါ်ပါတယ်။ Nike ကုမ္ပဏီနဲ့ သဘောတူ စာချုပ်ကို ၂၀၁၇ အတွင်းမှာ ပြင်ဆင်ပြီး စပွန်ဆာကြေး တင်ခဲ့ပြီး အခုနှစ်ထိ တနှစ်ကို စပွန်ဆာကြေး ပေါင် သန်း ၃၀ ရနေပါတယ်။ လန်ဒန် အခြေစိုက်ချင်း တူပေမယ့် ချယ်ဆီးလောက်တော့ အောင်မြင်မှု မရသေးလို့ စပွန်ဆာကြေးလည်း မမြင့်သေးပါဘူး။

(၈) Arsenal – အသင်းက Puma ကုမ္ပဏီနဲ့ သဘောတူ စာချုပ်ကို ၂၀၁၄ ခုနှစ်ကတည်းက ချုပ်ဆိုထားခဲ့ပြီး တနှစ်ကို ပေါင် သန်း ၃၀ ရနေပါတယ်။ စပါးထက် စာချုပ် သက်တမ်း ပိုများပါတယ်။ ၂၀၁၉ ခုနှစ်မှာ စာချုပ် သက်တမ်းပြည့်မှာပါ။ ဈေးကွက် ကျွမ်းကျင်သူတွေကတော့ အာဆင်နယ် အနေနဲ့ အသင်းကြီးစာရင်း ကလည်း ထွက်မသွားသလို ဆုဖလား ရယူနိုင်မှုလည်း အားနည်းတာကြောင့် ဝတ်စုံစပွန်ဆာ အပိုင်းမှာလည်း ဒီလိုပဲ အလယ်အလတ် အနေအထားမှာပဲ ဆက်ရှိ နိုင်တယ် လို့ ဆိုနေပါတယ်။

(၇) Chelsea – လန်ဒန် အခြေစိုက် အသင်းတွေ ထဲမှာတော့ အောင်မြင်မှု အများဆုံးနဲ့ ပြည်တွင်းမှာလည်း လူကြိုက် အများဆုံး အသင်း တသင်းပါ။ Adidas ကုမ္ပဏီနဲ့ တနှစ်ကို ပေါင် သန်း ၃၀ တန် စာချုပ်ကို ၂၀၁၃ ခုနှစ်ကနေ ၂၀၁၇ ခုနှစ် အထိ ချုပ်ဆိုနိုင်ခဲ့ပါတယ်။ အခုတော့ Nike ကုမ္ပဏီနဲ့ စာချုပ် အသစ် ချုပ်ဆိုထားတယ် လို့ ဆိုပါတယ်။ သက်တမ်းပြည့်ခဲ့ပြီ ဖြစ်ပေမယ့် တန်ဖိုး အမြင့်ဆုံး စပွန်ဆာ စာချုပ်အဖြစ် စာရင်းဝင်နေဆဲပါ။

(၆) Real Madrid – စပိန်ထိပ်သီး ရီးရဲမက်ဒရစ် အသင်းက Adidas ကုမ္ပဏီနဲ့ တနှစ်ကို ပေါင် ၃၄ သန်းတန် စာချုပ် ချုပ်ထား ပါတယ်။ ၂၀၁၂ ခုနှစ်ကနေ ၂၀၂၀ ခုနှစ် အထိ ဖြစ်ပြီး ရီးရဲ အသင်း အနေနဲ့ စာချုပ်သက်တမ်း ချုပ်ဆိုမှု များသွားတယ်တောင် ပြောနိုင်ပါတယ်။ တကယ်ဆို အခုချိန်မှာသာ ပြန်ပြင်ချုပ်မယ် ဆိုရင် ထိပ်ဆုံး ၃ ဆင့်ဝင် သဘောတူ စာချုပ်တောင် ချုပ်ဆိုနိုင်လောက်ပါတယ်။

(၅) Barcelona – အသင်းက ရီးရဲအသင်းရဲ့ အဓိက ပြိုင်ဘက်။ ဘာကာလို့ ဒေသတွင်း ခေါ်တဲ့ ဒီအသင်းက Nike ကုမ္ပဏီ နဲ့ သဘောတူ စာချုပ်ကို ၂၀၀၈ ခုနှစ်က ချုပ်ခဲ့ပြီး ၁၀ နှစ် သက်တမ်း ရှိလို့ အခုနှစ်ကုန်မှာ သက်တမ်းပြည့်မှာပါ။ ဒီစာချုပ် အရ ဘာကာ အနေနဲ့ တနှစ်ကို ပေါင် ၃၅ သန်း စပွန်ဆာ ရနေပါတယ်။ အသင်းကြီး ဖြစ်တာနဲ့ အညီ နောက်ထပ် စာချုပ်သစ် အတွက် သဘောတူညီမှုတောင် ရရှိထားပြီ ဖြစ်တယ် လို့လည်း သိရပါတယ်။ နှစ်ရှည်စာချုပ်တွေက စပွန်ဆာကြေး ပြန်လည် ပြင်ဆင်ဖို့ ခက်ပေမယ့် စာချုပ်သစ်ကိုလည်း နှစ်ရှည်ပဲ ချုပ်ဆိုဖို့ ရှိတယ် လိ့ု အသင်းက ပြောပါတယ်။

(၄) Bayern Munich – ဂျာမနီရဲ့ ထိပ်သီးအသင်း ဘိုင်ယန်မြူးနစ်က နိုင်ငံတွင်း အခြေစိုက် အားကစားဝတ်စုံ ထုတ်လုပ်သူ Adidas ကုမ္ပဏီနဲ့ပဲ စပွန်ဆာ ယူထားတာ တွေ့ရပါတယ်။ Adidas က အသင်းကို တနှစ်အတွက် စပွန်ဆာကြေး ၄၂ ဒသမ ၅ သန်း ပေးထားပါတယ်။ ၂၀၁၅ ခုနှစ်ကနေ စတင်ခဲ့တဲ့ အခု စာချုပ်က တန်ဖိုးကြီး ဝတ်စုံ စပွန်ဆာ စာချုပ်တွေထဲမှာ သက်တမ်း အကြာဆုံး စာရင်းဝင်သွားပြီး ၂၀၁၅ ခုနှစ်ကနေ ၂၀၃၀ ထိအောင် ၁၅ နှစ် သက်တမ်း အဖြစ် ချုပ်ဆိုထားတာ ဖြစ်ပါတယ်။

(၃) Chelsea – အသင်းက ၂၀၁၇ ခုနှစ် သဘောတူညီမှု စာချုပ်သစ် အရ ရီးရဲကိုတောင် ကျော်တက်ပြီး ချယ်ဆီးရဲ့ စပွန်ဆာကြေးက အဆင့် ၃ ရောက်လာပါတယ်။ Nike ကုမ္ပဏီကနေ တနှစ်ကို စပွန်ဆာကြေး သန်း ၆၀ ထိ ရထားပါတယ်။ ဒီစာချုပ်ကလည်း ဘိုင်ယန်နဲ့ Adidas အကြားက စာချုပ်လိုပဲ ၁၅ နှစ် စာချုပ်ဖြစ်ပြီး ၂၀၁၇ ကနေ ၂၀၃၂ ခုနှစ်ထိ ရှိနေမှာလည်း ဖြစ်ပါတယ်။ Nike အတွက်ကတော့ တန်ဖိုးကြီး စာချုပ်တခုကို နှစ်ရှည် ချုပ်ဆိုနိုင်တာကြောင့် ချယ်ဆီးအသင်းနဲ့ ပတ်သတ်တဲ့ ဈေးကွက် ခိုင်ခိုင်မာမာ ရသွားပါတယ်။

(၂) Man Utd – မန်ယူ အသင်းရဲ့ စာချုပ်က ပြီးခဲ့တဲ့ ၂၀၁၅ ခုနှစ် အတွင်းကမှ အသစ် ချုပ်ဆိုထားတာ ဖြစ်ပြီး Adidas ကုမ္ပဏီက အသင်းကို တနှစ် ပေါင် ၇၅ သန်းထိ စပွန်ဆာပေးနေပါတယ်။ အင်္ဂလန် ထိပ်တန်း ကလပ် အနေနဲ့ လာမယ့် ၂၀၂၅ ခုနှစ်ထိ ၁၀ နှစ် သက်တမ်းစာချုပ် ချုပ်ထားတာ ဖြစ်ပြီး ဝတ်စုံ စပွန်ဆာ အပြင် ရင်ဘတ်ကြော်ငြာကိုလည်း ကားကုမ္ပဏီ Chevrolet ကနေ ရရှိထားပြီး စပွန်ဆာခ အများအပြား ရနေသူ ဖြစ်ပါတယ်။

(၁) Barcelona – အခုနှစ်အတွင်းမှာ စာချုပ် သက်တမ်းပြည့်တော့မယ့် ဘာကာဟာ လာမယ့် ၁၀ နှစ်တာ ကာလအတွက် လည်း Nike နဲ့ပဲ စပွန်ဆာ ရယူသွားဖို့ ရှိနေပါတယ်။ သဘောတူညီမှု ရရှိထားပြီး ဖြစ်တဲ့ အနေအထားမှာ Nike က အသင်းကို ၂၀၁၈ ကနေ ၂၀၂၈ ခုနှစ် အထိအောင် တနှစ် အတွက် စပွန်ဆာကြေး ပေါင် သန်း ၁၀၀ ပေးပါလိမ့်မယ်။ ဒါဟာ ဘောလုံး ဝတ်စုံ စပွန်ဆာကြေးထဲမှာတော့ တန်ဖိုးအမြင့်ဆုံး စာချုပ် အဖြစ် မန်ယူရဲ့ စံချိန်ကို ကျော်ဖြတ် ချုပ်ဆိုလိုက်နိုင် တာလည်း ဖြစ်ပါတယ်။

Ref: www.dailystar.com

The post တန်ဖိုးအကြီးဆုံး ဘောလုံးအသင်းဝတ်စုံ စပွန်ဆာများ appeared first on ဧရာဝတီ.

သူ့ရဲ့ နာမည် အပြည့်အစုံက Michael James Wallac Mike Ashley ဖြစ်ပေမယ့် သူ့ကို မိုက်ခ်အက်ရှ်လေ (Mike Ashley) လို့ပဲ လူသိများပါတယ်။ ၁၉၆၄ ခုနှစ် စက်တင်ဘာ ၉ ရက်နေ့မှာ မွေးခဲ့တော့ အခု ဆိုရင် အသက် ၅၄ နှစ် ရှိပါပြီ၊ အင်္ဂလန်နိုင်ငံသား ဘီလီယံနာ တဦး ဖြစ်ပြီး အထူးသဖြင့်တော့ အားကစားနယ်ပယ်မှာ ဘယ်လို အကျိုးအမြတ် ကျန်အောင် စီးပွားရှာရမလဲ ဆိုတာ ကောင်းကောင်း နားလည် ကျွမ်းကျင်တဲ့ စီးပွားရေး သမား တဦးပါ။

ပြီးတော့ ငှက်ကျားတွေလို့ လူသိများတဲ့ အင်္ဂလန် အမှတ်ပေး ဘောလုံး ပြိုင်ပွဲ ပရီးမီးယားလိဂ်က အသင်းတသင်း ဖြစ်တဲ့ Newcastle United သို့မဟုတ် အလွယ်ခေါ် နယူးကာဆယ် အသင်းကို ပိုင်ဆိုင်ထားသူ ဖြစ်ပြီး စာရင်းတွေ အရတော့ အသင်းကို ပေါင် ၁၃၅ သန်းနဲ့ ဝယ်ယူထားတာလို့ သိရပါတယ်။

Sports Direct လုပ်ငန်းကို တည်ထောင် လုပ်ကိုင်သူ အဖြစ်လည်း လူသိများပါတယ်။ ၂၀၁၇ ခုနှစ်က စာရင်းတွေ အရ အက်ရှလေရဲ့ ပိုင်ဆိုင်မှု ဒေါ်လာ ၂ ဒသမ ၈ ဘီလီယံလောက်ထိအောင် ရှိပြီး အင်္ဂလန်ရဲ့ အချမ်းသာဆုံး စာရင်းဝင် သူကြွယ်တဦးပါ။ သားသမီး ၃ ယောက် ရှိပါတယ်။ ဇနီးသည် Linda Jerlmyr နဲ့ ၁၉၈၈ ခုနှစ်က လက်ထပ်ခဲ့ပေမယ့် ၂၀၀၃ ခုနှစ်က ကွာရှင်းပြတ်စဲခဲ့ကြလို့ အက်ရှလေက တခုလပ် ကလေးဖခင် တယောက်လို့ ဆိုရမှာပါ။

၂၀၁၂ ခုနှစ် တုန်းကတော့ သူ့ရဲ့ ပိုင်ဆိုင်မှုက စတာလင်ပေါင် ၁ ဒသမ ၅ ဘီလီယံလောက် ရှိပြီး အင်္ဂလန်မှာ အချမ်းသာဆုံး အဆင့် ၁၂ ထိအောင် ချိတ်ခဲ့သူလည်း ဖြစ်ပါတယ်။ သူက သီးသန့် နေထိုင်တတ်သူလို့ ဆိုရမှာပါ၊ အင်တာဗျူးတွေ ဖြေဆိုမှုတွေ သိပ်မရှိ သလို ဖွင့်ပွဲတွေ၊ လူစည်ကားရာ ပွဲတွေ လမ်းတွေ မတက်ဘူး။

Sunday Times မဂ္ဂဇင်းမှာ Philip Beresford ရဲ့ ရေးသားချက် အရ အက်ရှလေဟာ သူ့ရဲ့ အလုပ်တွေကိုလည်း ဝန်ထမ်းတွေကို ဖုန်းနဲ့ ပြောဆိုမှုက နေပဲ ခိုင်းစေ ညွှန်ကြားမှု လုပ်တယ်၊ မဖြစ်အနေ အင်တာဗျူး ဆိုရင်တောင် ဖုန်းနဲ့ပဲ ပြောဆိုမှု များတယ် လို့ ဆိုပါတယ်။ ဒါဆိုရင်တော့ တယောက်တည်း နေရတာ တော်တော်ကို သဘောကျပုံ ရတဲ့ အက်ရှလေပဲ လို့ ဆိုရမယ်။

Sport Direct International Plc ကို ထူထောင်တယ်၊ နယူးကာဆယ်ကို ဝယ်လိုက်ပြီးချိန်မှာ လူကြားထဲ နည်းနည်း ထွက်သေးတယ် လို့ ဆိုရမှာပါ။ ဒါတောင် အရင်နှစ်တွေထဲက နယူးကာဆယ် တန်းမဆင်းခင် အထိပဲ ပွဲကြည့်စင်မှာ တခါတရံ တွေ့ရပေမယ့် နယူးကာဆယ် တန်းဆင်းသွားလို့ နည်းပြ Kevin Keegan လည်း ထွက်သွားတယ်၊ အသင်း ကလည်း ချန်ပီယံရှစ်မှာ ကစားနေတော့ အသင်းရဲ့ ပွဲတွေတောင် သိပ်လာမကြည့်တော့ဘူးလို့ ဆိုပါတယ်။ ဒါပေမယ့် ကံကောင်းတာက နယူးကာဆယ်ဟာ ချန်ပီယံရှစ်ကို တန်းဆင်းခဲ့ရပေမယ့် ချန်ပီယံဆုကို ရယူပြီး တန်းပြန်တက် လာခဲ့တာပဲ ဖြစ်ပါတယ်။

အက်ရှလေရဲ့ လုပ်ငန်း လုပ်ကိုင်မှုကို ကြည့်မယ် ဆိုရင် ၁၆ နှစ်မှာ ကျောင်းထွက်တယ်၊ အဆိုပါ အချိန်က သူဟာ Squash ကစားသမား တဦးပါ။ နံရံပတ်လည်နဲ့ ကစားသမား နှစ်ဦး ဝင်ရောက် ကစားတဲ့ ပင်ပေါင် အားကစားနည်း တခုပါပဲ။ ဒါပေမယ့် သူ ဒဏ်ရာ ရတယ်၊ ကစားသမား ဘဝကနေ နည်းပြ ဖြစ်လာတယ်။ ၁၉၈၂ ရောက်တော့ သူ့ရဲ့ ပထမဆုံး Ski ကွင်း Maidenhead ကို ဖွင့်လှစ်တယ်၊ အဆိုပါ ကွင်းအတွက် ပေါင် ၁ သောင်းလောက် အကြွေးတင်ခဲ့ပါတယ်။

နောက်တော့ ၁၉၉၀ ပြည့်လွန်နှစ်တွေမှာ ကစားကွင်းကနေ အားကစားပစ္စည်း အရောင်းဆိုင်တွေ ပြောင်းလဲ ဖွင့်တယ်၊ ဆယ်စုနှစ် အတွင်း အရောင်းဆိုင်ခွဲ ၁၀၀ လောက် ဖြစ်လာပါတယ်။ ၁၉၉၉ မှာတော့ အရောင်းဆိုင်တွေ များလာပြီး ကုမ္ပဏီ သဘောမျိုး ဖြစ်လာပါပြီ။

အခုဆိုရင် Sport Direct အမည်နဲ့ ကုမ္ပဏီ ဖွင့်လှစ်ပြီး အားကစားပစ္စည်းတွေ ရောင်းချနေမှုမှာ အင်္ဂလန် တဝှမ်း ဆိုင်ခွဲပေါင်း ၄၀၀ ကျော် ရှိနေပြီလည်း ဖြစ်ပါတယ်။ ဝန်ထမ်းပေါင်း ၂သောင်းလောက် ရှိတယ်၊ အိုင်ယာလန်၊ ဘယ်လ်ဂျီယမ်နဲ့ ဆလိုဗေးနီးယားတွေမှာ ဆိုင်ခွဲတွေ ရှိနေပြီ။ ၂၀၀၆ ခုနှစ် အတွင်းက အင်္ဂလန်ရဲ့ အကြီးဆုံး အားကစားဝတ်စုံ အရောင်း ကိုယ်စားလှယ် JJB Sports ကိုတောင် ထပ်ဝယ်ထားပါသေးတယ်။

ပြီးတော့ သူက Brand (အမှတ်တံဆိပ်)တွေကို ဝယ်ယူထားသူ တဦးလည်း ဖြစ်ပါတယ်။ ပထမဆုံး သူ ဝယ်ခဲ့တဲ့ တံဆိပ်က Donnay ပါ၊ ၂၀၀၃ ခုနှစ် ဖေဖော်ဝါရီမှာ Dunlop Slazenger ကိုလည်း ပေါင် သန်း ၄၀ နဲ့ ဝယ်တယ်၊ မတ်လမှာ Karrimor ကို ထပ်ဝယ်တယ်၊ Kangol အတွက် ဆိုရင်လည်း ပေါင် ၁၀ သန်း ကုန်တယ်၊ လက်ဝှေ့ပစ္စည်းထုတ် တံဆိပ် Lonsdale ကိုလည်း ဝယ်ထားတယ်၊ Umbro နဲ့လည်း ပေါင် ၉ သန်းတန် နှစ်ရှည် သဘောတူ စာချုပ်ချုပ်ထားတယ်။

Millets နဲ့ Mambo လို တံဆိပ်တွေနဲ့ ထုတ်လုပ်နေတဲ့ Blacks Leisure Group မှာလည်း ပိုင်ဆိုင်မှု ရှယ်ယာ ၂၉ ဒသမ ၄ ရာခိုင်နှုန်း ပိုင်သေးတယ်။ JD Sports ရဲ့ ရှယ်ယာ ၁၉ ရာခိုင်နှုန်းရော သူ ကိုင်ထားတာတွေ့ရပါတယ်။ ၂၀၀၆ ခုနှစ် နိုဝင်ဘာ အတွင်းမှာလည်း သတင်းအများစုမှာ အက်ရှလေ အနေနဲ့ နိုင်ငံတကာ အားကစားပစ္စည်း ဖြန့်ချိသူ IPO ကို ဝယ်ဖို့ ပြင်ဆင်နေတယ် လို့ ဖော်ပြခံရပါသေးတယ်။ ဒါပေမယ့် နောက်ဆက်တွဲတော့ အတည်ပြု ဝယ်ယူတဲ့ သတင်း မထွက်လာခဲ့ပါဘူး။ ဒီလောက်ထိအောင် အားကစား ပစ္စည်း ရောင်းချမှု အပိုင်းမှာ အောင်မြင်သူ ဖြစ်ပါတယ်။

နယူကာဆယ်နဲ့ အပိုင်းမှာတော့ ၂၀၀၇ ခုနှစ် မေ ၂၃ ရက်မှာ ပထမအဆင့် ရှယ်ယာ ၄၁ ဒသမ ၆ ရာခိုင်နှုန်းကို Sir John Hall ဆီကနေ ဝယ်လိုက်ပါတယ်။ အဆိုပါ ရှယ်ယာတွေ အတွက် ပေါင် ၅၅ ဒသမ ၃ သန်းကျော် ပေးခဲ့ရပါတယ်။ အင်္ဂလန်ရဲ့ ဥပဒေအရ အသင်းရဲ့ ရှယ်ယာ ၃၀ ရာခိုင်နှုန်းကျော် ပိုင်ဆိုင်ရင် အသင်းရဲ့ ပိုင်ရှင် အမည်ပေါက်တာကြောင့် နောက်ထပ် ရှယ်ယာရှင်တွေ ပိုင်ရှင် အမည် မပေါက်ဖို့ အက်ရှလေတယောက် နောက်ထပ် ရှယ်ယာတွေကို ဈေးကြီးပေးပြီး လိုက်စုပါတယ်။

ဇွန် ၇ ရက်မှာ အသင်း ဥက္ကဋ္ဌ Freddy Shepherd က ရှယ်ယာ ၂၈ ရာခိုင်နှုန်းကို အက်ရှလေကို ရောင်းမယ် လို့ သဘောတူညီချက် ရပါတယ်။ ဇွန် ၁၅ ရက်မှာတော့ တခြားကနေ လိုက်စုထားတဲ့ ရှယ်ယာတွေပါ ပေါင်းလိုက်ရင် အက်ရှလေ လက်ထဲမှာ အသင်းရဲ့ ရှယ်ယာ ၇၇ ဒသမ ၀၆ ရာခိုင်နှုန်းထိ ပိုင်ဆိုင်လာပါတယ်။ ကျန်ရှိ ရှယ်ယာတွေကို စတော့ဈေးကွက်ကနေ ပြန်ဆွဲထုတ်ပြီး သူက အပြီးသတ် ဝယ်ပါတယ်၊ ဇူလိုင်လ အတွင်းမှာတော့ အသင်းအတွက် ကုန်ကျစရိတ် ပေါင် ၁၃၄ သန်း ပေးချေမှု အပြီး အသင်းကို သူ တဦးပိုင် အဖြစ် ဝယ်ယူလိုက်နိုင်ပါတော့တယ်။

နယူးကာဆယ် အပြင် နောက်ထပ် စကော့တလန် ဘောလုံးအသင်း Rangers ရဲ့ ရှယ်ယာ ၈ ဒသမ ၉၂ ရာခိုင်နှုန်း ကိုလည်း ပိုင်ဆိုင်ထားပါသေးတယ်။ သူက အသင်းရဲ့ ရှယ်ယာ ၂၉ ဒသမ ၉ ရာခိုင်နှုန်းထိ ဝယ်ယူချင်ပေမယ့် အင်္ဂလန် ပြည်ကြီးသား ဖြစ်နေလို့ စကော့တလန် ဘောလုံး အဖွဲ့ချုပ်က သူ့ရဲ့ ရှယ်ယာ ဝယ်ယူခွင့်ကို ထိန်းချုပ်ထားတယ် လို့လည်း ဆိုပါတယ်။

ဒီလိုနဲ့ ရင်းနှီးမြှပ်နှံခွင့် မရတဲ့ ရိန်းဂျားရဲ့ ရှယ်ယာတွေကို ၂၀၁၇ ခုနှစ် ဇွန် ၂၃ ရက်မှာ Club 1872 နဲ့ Julian Wolhardt တို့ကို ပြန်လည် ရောင်းချထားတာ တွေ့ရပါတယ်။ ဘယ်လိုပဲ ဖြစ်ဖြစ် ရိန်းဂျားက ကမ္ဘာကျော် အသင်း မဟုတ်ပေမယ့် နယူးကာဆယ်ကို ပိုင်ဆိုင်ထားတယ်၊ အင်္ဂလန်ရဲ့ အချမ်းသာဆုံးစာရင်းဝင် တဦးလည်းဖြစ်၊ ပေါင် ၁ သောင်း အကြွေးယူပြီး အားကစားကွင်း ဖွင့်လှစ်ရာကနေ အခုလို အင်္ဂလန်မှာ အကြီးဆုံး အားကစားပစ္စည်း အရောင်းကုမ္ပဏီ ပိုင်ရှင် ဖြစ်လာသူ အက်ရှလေက စံနမူနာထားစရာ လူတော်တဦး ဆိုတာတော့ အမှန်ပါပဲ။

Ref: en.m.wikipedia.org

The post ပေါင်တသောင်း အကြွေးတင်ခဲ့တဲ့ ငှက်ကျားတို့ရဲ့ သခင် မိုက်ခ်အက်ရှလေ appeared first on ဧရာဝတီ.

အသင်း အမည်က Egypt National Football Team ဖြစ်ပြီး အီဂျစ်နိုင်ငံ လက်ရွေးစင် အသင်း အဖြစ် နိုင်ငံတကာ ပွဲတွေမှာ ကစားနေတာ ဖြစ်သလို လာမယ့် ၂၀၁၈ ရုရှား ကမ္ဘာ့ ဖလားမှာလည်း ခြေစစ်ပွဲအောင် ထားလို့ အုပ်စု အဆင့်ကနေ ပါဝင် ကစားခွင့်ရမှာ ဖြစ်ပါတယ်။

အသင်းကို The Pharaohs (ဖာရိုဘုရင်များ) လို့ နာမည်ပြောင် ခေါ်ပါတယ်။ ၁၉၂၁ ခုနှစ်ကတည်းက တည်ထောင် ဖွဲ့စည်းထားတဲ့ အီဂျစ်ဘောလုံး အဖွဲ့ချုပ်ရဲ့ လက်အောက်ခံ အသင်းပါ။ ရှေ့ပိုင်းမှာ အသင်းက အိမ်ကွင်း အဖြစ် Cairo International Stadium ကို လက်ခံ ကစားပေမယ့် ၂၀၁၂ ခုနှစ် နောက်ပိုင်းကနေ စတင်ပြီး Borg El Arab Stadium ကို ပြောင်းလဲ လက်ခံကစားနေတာ တွေ့ရပါတယ်။

အာဖရိက ဘောလုံးအဖွဲ့ချုပ် CAF ရဲ့ လက်အောက်ခံ အသင်းပါ၊ မြောက်အမေရိက UNAF နယ်တွင်း နိုင်ငံ အဖြစ် သတ်မှတ်ခံထားရပါတယ်။ လက်ရှိ အသင်း နည်းပြဖြစ်သူ Hector Cuper က ကိုင်တွယ်နေပြီး အသင်း ခေါင်းဆောင် တာဝန်ကို Essam El-Hadary က တာဝန်ယူထားတာ တွေ့ရပါတယ်။

အသင်းက အိမ်ကွင်း ဝတ်စုံ အနေနဲ့ အင်္ကျီအနီ၊ ရင်ဘက်မှာ အနက်ကွက်လေးတွေ ထည့်ထားပြီး ဘောင်းဘီ အဖြူမှာ ဘေးဘက် အနီစင်းနဲ့ ခြေအိတ်က အနက်ရောင်ဖြစ်ပြီး လည်ပင်းကို အဖြူရောင် အစင်းနဲ့ ကွပ်ထားပါတယ်။ အဝေးကွင်း မှာတော့ အင်္ကျီ အဖြူရောင်၊ လက်မောင်းသား အနက်ရောင် ဖြစ်ပါတယ်။ ဘောင်းဘီက အနက်ရောင်မှာ ဘေးဘက် အဖြူရောင် အစင်း ပါရှိပါတယ်။ ခြေအိတ်က အဖြူရောင် ဖြစ်ပြီး လည်ပင်းမှာတော့ အနက်ရောင် အစင်း ကွပ်ထားပါတယ်။

လက်ရှိ ကမ္ဘာ့ အဆင့် သတ်မှတ်ချက်ကတော့ ပြီးခဲ့တဲ့ နှစ် ဒီဇင်ဘာ အတွင်းမှာ ဖီဖာ သတ်မှတ်ချက် အဆင့် ၃၁ နေရာမှာ ရပ်တည်နေပြီး နိုဝင်ဘာလ အတွင်းကနဲ့ အဆင့် တည်မြဲနေတာပါ။ အသင်းဟာ အာဖရိက တိုက်တွင်း အသင်းတွေထဲမှာတော့ အင်အားကြီး အသင်း ဖြစ်ပြီး ကမ္ဘာ့ အဆင့် သတ်မှတ်ချက် အဆင့် ၉ထိအောင် အမြင့်ဆုံး အဖြစ် ၂ ကြိမ် သတ်မှတ်ခံရဖူးပါတယ်။ ၂၀၁၀ ခုနှစ် အတွင်း စက်တင်ဘာနဲ့ ဒီဇင်ဘာလတွေမှာ ဖြစ်ပါတယ်။ စံချိန်တင် အနိမ့်ဆုံး အဆင့် ကျဆင်းမှု အဖြစ်ကိုတော့ ၂၀၁၃ခုနှစ် မတ်လ အတွင်းက တွေ့ရပြီး အဆင့် ၇၅ထိအောင် ကျဆင့်ဖူးတာလည်း ဖြစ်ပါတယ်။

နိုင်ငံတကာ ပွဲစဉ် ကစားမှုမှာ ဥရောပ အသင်းတွေလောက် မစောပေမယ့် အာဖရိက အသင်းတွေထဲမှာတော့ စောပါတယ်။ ၁၉၂၀ သြဂုတ် ၂၈ရက်မှာ ပထမဆုံး နိုင်ငံတကာ ပွဲစဉ်ကို ဘယ်ဂျီယမ်နိုင်ငံ ဂျန့်မှာ ကစားခဲ့ပြီး အဆိုပါ ပွဲမှာ အသင်းက ပြိုင်ဘက် အီတလီကို ၂ ဂိုး ၁ ဂိုးနဲ့ ရှုံးခဲ့ပါတယ်။ ပထမဆုံးပွဲစဉ် ရလဒ် မကောင်းပေမယ့် အသင်းကြီး အီတလီကို ဂိုးသွင်းနိုင် သလို အကောင်းဆုံး လိုက်ကစားနိုင်ခဲ့တဲ့ အသသင်းပါပဲ။

အသင်းရဲ့ အကြီးမားဆုံး နိုင်ပွဲကိုတော့ ကျနော်တို့နဲ့ အိမ်နီးချင်း နိုင်ငံ လာအိုနဲ့ ရရှိထားပါတယ်။ ၁၉၆၃ ခုနှစ် နိုုဝင်ဘာ ၁၅ ရက်နေ့ အင်ဒိုနီးရှားနိုင်ငံ၊ ဂျကာတာမှာ ကစားတဲ့ အီဂျစ်နဲ့ လာအိုပွဲမှာ အီဂျစ်က ၁၅ ဂိုး ဂိုးမရှိနဲ့ နိုင်ထားပါတယ်။ အသင်းရဲ့ အကြီးမားဆုံး ရှုံးပွဲကတော့ ပွဲဦးထွက် ရှုံးပွဲ ပေးခဲ့တဲ့ အီတလီနဲ့ ဖြစ်ပြီး ၁၉၂၈ ခုနှစ် ဇွန်လ ၁၀ ရက်က နယ်သာလန်နိုင်ငံ၊ အမ်စတာဒန်မှာ ကစားတဲ့ ပွဲမှာ အီတလီကို ၁၁ ဂိုး ၃ဂိုးနဲ့ ရှုံးထားတာ ဖြစ်ပါတယ်။

ကမ္ဘာ့ဖလား အတွေ့အကြုံ အနေနဲ့တော့ အသင်းက ကမ္ဘာ့အဆင့်မှာ ထိပ်ပိုင်းက ရပ်တည်နေပေမယ့် ကမ္ဘာ့ဖလား ဝင်ခွင့်တော့ သိပ်မရလှပါဘူး။ ၁၉၃၄ ခုနှစ်က ပထမဆုံး အကြိမ် ဝင်ခွင့်ရပြီး အခုထိ ၃ ကြိမ်ပဲ ဝင်ခွင့်ရထားပါတယ်။ အဆိုပါ ၁၉၃၄ ကမ္ဘာ့ဖလားဟာ အီဂျစ်အတွက် မျက်နှာပန်း လှခဲ့ပြီး အမြင့်ဆုံး အဆင့် ၁၃ ထိအောင် ရောက်ခဲ့ဖူးပါတယ်။

အာဖရိကနိုင်ငံများ ဖလားပွဲကိုတော့ ၁၉၅၇ ခုနှစ်ကနေ အခုချိန်ထိအောင် ၂၃ ကြိမ် ဝင်ခွင့်ရခဲ့ပြီး ချန်ပီယံ ၇ ကြိမ် ဖြစ်ထား သလို နောက်ဆုံး ချန်ပီယံဖြစ်ထားတဲ့ နှစ်ကတော့ ၂၀၁၀ ခုနှစ်က ဖြစ်ပါတယ်။ ကွန်ဖက်ဒရေးရှင်း ဖလားမှာတော့ ၁၉၉၉ ခုနှစ်က ပထမဆုံး အကြိမ် ဝင်ခွင့်ရပြီး အခုထိ ၂ ကြိမ်ပဲ ဝင်ခွင့်ရထားပါတယ်။ အုပ်စုအဆင့်ကနေ တကြိမ်မှ မတက်ခဲ့ရတာ ကတော့ အသင်း အတွက် မျက်နှာငယ်စရာပါ။

ဒါပေမယ့် အာဖရိကလို အခြား တိုက်ကြီးတွေနဲ့ စာရင် ခေါင်တဲ့ ဒေသ အတွက်ကတော့ အီဂျစ်ဟာ ဘောလုံးမှာ အောင်မြင်မှု အမြင့်ဆုံး အသင်းတွေထဲက တခုပါ။ ဖီဖာရဲ့ အဆင့် သတ်မှတ်ချက်မှာလည်း အထက်မှာ ပြောသလို အဆင့် ၉ ထိအောင် အမြင့်ဆုံး ရောက်ရှိခဲ့ခြင်းက အာဖရိက ဒေသတွင်း နိုင်ငံ အသင်းတွေထဲမှာ ကမ္ဘာ့အဆင့် ထိပ်ဆုံး ၁၀ သင်း စာရင်း ဝင်ဖူးတဲ့ အသင်း ၃ သင်းပဲ ရှိတဲ့ထဲမှာ ၁ သင်း အပါအဝင် ဖြစ်ပါတယ်။

စံချိန်တင် စာရင်းဝင်မှု အပိုင်းမှာလည်း အာဖရိကနဲ့ အရှေ့အလယ်ပိုင်း ဒေသတွင်း ပထမဆုံး ကမ္ဘာ့ဖလား ဝင်ခွင့်ရသူ အသင်း အဖြစ်လည်း မှတ်တမ်းဝင်နေတာပါ။ အရင်နှစ် ၂၀၁၇ က အာဖရိက ဖလားမှာလည်း ၇ နှစ်ကြာ ဝေးကွာနေတဲ့ ချန်ပီယံ ဆုကို ပြန်လည် ရယူနိုင်ဖို့ နီးစပ်ခဲ့ပေမယ့် ဗိုလ်လုပွဲမှာ ကင်မရွန်းကို ရှုံးလို့ ဒုတိယနဲ့ ကျေနပ်ခဲ့ရတာပါ။ ၂၀၁၇ အောက်တိုဘာ ၈ ရက်မှာတော့ လာမယ့် ကမ္ဘာ့ဖလားအတွက် ခြေစစ်ပွဲ အောင်ခဲ့ပြီး ၂၈ နှစ်ကြာ ကမ္ဘာ့ဖလားဝင်ခွင့် ဝေးကွာမှုကို အဆုံးသတ်နိုင်ခဲ့တာပါ။

အသင်း အနေနဲ့ နိုင်ငံတကာပွဲ ကစားတဲ့ အပိုင်းမှာတော့ အခြား နိုင်ငံက အသင်းတွေနဲ့ ယှဉ်ကြည့်ရင် အားနည်းတယ် လို့ ဆိုရမှာပါ။ ပြီးခဲ့တဲ့ ၂၀၁၇ အောက်တိုဘာ ၈ရက်က ခြေစစ်ပွဲမှာ ကွန်ဂိုကို ၂ ဂိုး ၁ ဂိုးနဲ့ နိုင်တယ်၊ ကမ္ဘာ့ ဖလား ခြေစစ်ပွဲ အောင်တယ်၊ အဲဒီနောက် နိုဝင်ဘာ ၁၂ ရက်မှာ ဂါနာနဲ့ ကစားတယ်၊ တဖက် ၁ ဂိုးစီနဲ့ သရေကျတယ်၊ လာမယ့် ကမ္ဘာ့ဖလား မတိုင်ခင် ခြေစမ်းပွဲ ၂ ပွဲ ကစားဖို့ ရှိနေပြီး မတ်လ ၂၃ ရက်နေ့မှာ နာမည်ကြီး ပေါ်တူဂီ၊ ၂၇ ရက်နေ့မှာ ဘူလ်ဂေးရီးယား တို့နဲ့ ကစားဖို့ ရှိနေတာပါ။

ကမ္ဘာ့ဖလား ပွဲတွေမှာတော့ အုပ်စုပွဲစဉ်ကို လာမယ့် ဇွန်လ ၁၅ ရက်နေ့မှာ အဖွင့်ပွဲ အဖြစ် ဥရုဂွေးနဲ့ ကစားရမယ်၊ ၁၉ ရက်နေ့မှာ အိမ်ရှင် ရုရှား၊ ၂၅ ရက်နေ့မှာ ဆော်ဒီအာရေဗျတို့နဲ့ ကစားရမှာ ဖြစ်ပြီး အိမ်ရှင် ရုရှား၊ အင်အားကြီး ဥရုဂွေးတိုနဲ့ တအုပ်စုတည်း ကျနေခြင်းက အုပ်စု အဆင့်ကိုတောင် ဖြတ်ကျော်ဖို့ မလွယ်ဘူးလို့ ဆိုရမှာပါ။

ကမ္ဘာ့ဖလားပြီးရင်တော့ အသင်း အနေနဲ့ အာဖရိကနိုင်ငံများ ဖလားပွဲတွေ ဆက်ကစားရဖု့ိ ရှိနေပြီး စက်တင်ဘာ ၇ ရက်မှာ နိုင်ဂျာ၊ အောက်တိုဘာ ၁၀ ရက်နေ့မှာ ဆွာဇီလန်၊ ၁၃ရက်နေ့မှာ ဆွာဇီလန်အိမ်ကွင်းမှာ သွားကစားရပါလိမ့်မယ်။ နိုဝင်ဘာ ၁၆ ရက်မှာ တူနီးရှားနဲ့ ကစားရဖို့လည်း အခုနှစ်ကုန်အထိ ရှိနေတာပါ။

အသင်းအတွက် ပွဲအများဆုံး ကစားပေးထားသူတွေကို ကြည့်မယ် ဆိုရင် ၁၉၉၅ ခုနှစ်ကနေ စပြီး နိုင်ငံ အသင်းအတွက် ပါဝင်ကစားပေးခဲ့တဲ့ Ahmed Hassanက ၁၈၄ ပွဲ ကစားပေးထားပြီး ၃၃ ဂိုးထိအောင် သွင်းထားပေးခဲ့ပါတယ်။ ဂိုးအများဆုံး သွင်းယူပေးထားသူကတော့ ၁၉၈၅ ခုနှစ်မှာ လက်ရွေးစင် အသင်းတွက် စတင် ကစားခွင့်ရခဲ့တဲ့ Hossam Hassan က ပွဲပေါင်း ၁၆၉ ပွဲ ကစားပေးပြီး ဂိုးပေါင်း ၇၀ ထိအောင် အများဆုံး သွင်းယူပေးထားတာ ဖြစ်ပါတယ်။

Ref: en.m.wikipedia.org

The post ဘောလုံးစစ်ပွဲမှာ အီဂျစ်က ဖာရိုဘုရင်တွေ အောင်နိုင်မှာလား appeared first on ဧရာဝတီ.

အားကစားလောကရဲ့ တန်ဖိုးအကြီးဆုံး စာချုပ် ချုပ်ဆို သဘောတူညီခဲ့ကြတဲ့ စာချုပ်တွေနဲ့ တပွဲဝင်ငွေ ဘယ်လောက် ရတယ် ဆိုတဲ့ အကြောင်း ပြောပြပါမယ်။ ပြောင်းရွှေ့ကြေးတွေ၊ အပိုဆုကြေးတွေ၊ လစာတွေ၊ အာမခံကြေးတွေနဲ့ အတူ ရပိုင်ခွင့်တွေ အားလုံးကို ထည့်ပေါင်းပြီး ချုပ်ဆိုကြတဲ့ တန်ဖိုးတွေလည်း ဖြစ်ပါတယ်။ ဒီနေရာမှာ လစာ တခုတည်း အများဆုံး ရသူတွေ၊ ဆုကြေး အများဆုံး ရသူတွေ သီးသန့် ပြောထားတာ မဟုတ်ပဲ အားလုံးကို အခြေခံ စုပေါင်း တွက်ချက်ပြီး ပြောထားတာ ဖြစ်ပါတယ်။

(၁) လက်ရှိ အားကစားလောကမှာ တန်ဖိုးအကြီးဆုံး စာချုပ် ချုပ်ဆိုထားသူကတော့ ဘေ့စ်ဘော ကစားသမား ဂျီယာကာလို စတင်တန် (Giancarlo Stanton) ဖြစ်ပါတယ်။ လက်ရှိ မီယာမီ မာလင် (Miami Marlins) အသင်းမှာ ကစားနေတဲ့ ဂျီယန်ကာလို့ဟာ ၂၀၁၄ ခုနှစ်က အခု စာချုပ်ကို ချုပ်ဆိုခဲ့တာ ဖြစ်ပြီး သက်တမ်းက ၂၀၂၇ အထိ ကြာမြင့်ပါတယ်။ စာချုပ် တန်ဖိုး အမေရိကန် ဒေါ်လာ ၃၂၅ သန်း ဖြစ်ပြီး သူ့ အနေနဲ့ တနှစ်ကို ဒေါ်လာ ၂၅ သန်းလောက် ဝင်ငွေ ရနေမှာ ဖြစ်ပြီး တနှစ် အတွင်း ဘေ့စ်ဘော ကစားရမယ့် ပွဲတွေနဲ့ ပြန်တွက်ရင် ဂျီယန်ကာလို့ဟာ တပွဲ ကစားတိုင်း ဝင်ငွေ ဒေါ်လာ ၁ ဒသမ ၅၄ သိန်း ရရှိမှာ ဖြစ်ပါတယ်။

(၂) လက်ရှိ နယူးယော့ယန်းကီး (New York Yankees) အသင်းကနေ ခေါ်ယူခြင်း ခံထားတဲ့ အဲလက်ရိုဒရီဂုဇ် (Alex Rodriguez) ကတော့ ဒုတိယ တန်ဖိုး အကြီးဆုံး စာချုပ် ချုပ်ဆိုထားသူပါ။ သူလည်း ဘေ့စ်ဘော ကစားသမားပါ။ ၁၀ နှစ် သက်တမ်းရှိ စာချုပ်ကို ၂၀၀၈ ခုနှစ်ကနေ ချုပ်ဆိုခဲ့ပြီး ပြီးခဲ့တဲ့ ၂၀၁၇ ထိ ကြာခဲ့သလို အခုနှစ် အတွင်း စာချုပ် သက်တမ်း ပြည့်သွားပေမယ့် သက်တမ်းတိုးပြီး အသင်းမှာ ဆက်ရှိနေတယ် လို့ ဆိုပါတယ်။ သူရဲ့ ၁၀ နှစ် သက်တမ်း စာချုပ်က ဒေါ်လာ ၂၇၅ သန်း တန်ဖိုးရှိခဲ့ပြီး တနှစ်ကို ၂၇ ဒသမ ၅ သန်း ရမှာ ဖြစ်သလို တပွဲချင်း ပြန်တွက်ကြည့်ရင် ၁ ဒသမ ၆၇ သိန်း ရရှိမှာလည်း ဖြစ်ပါတယ်။

(၃) လူကြိုက်များလာတဲ့ ဘောလုံးအားကစားရဲ့ တန်ဖိုးကြီး စာချုပ်က အဆင့် ၃ မှာ ချိတ်လာပါတယ်။ ပြီးခဲ့တဲ့ အပြောင်းအရွှေ့ကာလ ဘာစီလိုနာကနေ ပြင်သစ်ကလပ် PSG ရောက်လာသူ နေမာ (Neymar) ရဲ့ စာချုပ် ဖြစ်ပါတယ်။ ၅ နှစ် သက်တမ်း ရှိစာချုပ်ကို ၂၀၁၇ ကနေ ၂၀၂၂ ခုနှစ် အတွက် ချုပ်ဆိုခဲ့တာပါ။ စာချုပ်ရဲ့ တန်ဖိုး ဒေါ်လာ သန်း ၂၇၀ ဖြစ်ပါတယ်။ နေမာ အနေနဲ့ တနှစ်ကို ဝင်ငွေ ဒေါ်လာ ၅၄ သန်း ရရှိမှာ ဖြစ်ပြီး ဘောလုံးတပွဲ ကစားတိုင်း ဒေါ်လာ ၁ ဒသမ ၀၈ သိန်း ဝင်ငွေရနေတာလည်း ဖြစ်ပါတယ်။

(၄) ဘေ့စ်ဘောက အာရှမှာ လူကြိုက်နည်းပေမယ့် ဥရောပမှာ အသင့်အတင့်နဲ့ မြောက်အမေရိကတိုက်မှာတော့ လူကြိုက် အများဆုံးပါပဲ။ အဆင့် ၄ နေမှာလည်း ဘေ့စ်ဘော ကစားသမား အဲလက်ရိုဒရီဂုဇ် (Alex Rodriguez) ရဲ့ စာချုပ်က စာရင်းဝင်နေပါတယ်။ Texas Rangers အသင်းကနေ အဲလက်ကို ၁၀ နှစ် သက်တမ်းရှိ စာချုပ်နဲ့ ၂၀၀၁ ခုနှစ်ကနေ ၂၀၁၀ ခုနှစ်အထိ ခေါ်ယူခဲ့ခြင်း ဖြစ်ပြီး စာချုပ်ရဲ့ တန်ဖိုးက ဒေါ်လာ ၂၅၂ သန်းထိအောင် တန်ပါတယ်။ အဲလက်အနေနဲ့ တနှစ်ကို ဝင်ငွေ ၂၅ ဒသမ ၂ သန်း ရခဲ့ပြီး ကစားပွဲ တပွဲပြီးတိုင်း ဝင်ငွေ ၁ ဒသမ ၅၅ သိန်းလောက် ရခဲ့တာပါ။

(၅) အဆင့် ၅ မှာလည်း ဘေ့စ်ဘော ကစားသမား မစ်ဂွဲကာဘရီယာ (Miguel Cabrera) ရဲ့ စာချုပ်ရှိနေပါတယ်။ ဒက်ထရော့ တိုက်ဂါး (Detroit Tigers) အသင်းကနေ သူ့ကို ၈ နှစ် သက်တမ်း စာချုပ်နဲ့ ၂၀၁၆ ခုနှစ်ကနေ စတင် ခေါ်ယူခဲ့တာ ဖြစ်ပြီး ၂၀၂၃ ခုနှစ်ထိ အသင်းမှာ ရှိနေမှာပါ။ စာချုပ် တန်ဖိုး ဒေါ်လာ ၂၄၈ သန်းဖြစ်ပြီး တနှစ်ကို ဝင်ငွေ ၃၁ သန်း ရမှာဖြစ်သလို တပွဲပြီးတိုင်း ဒေါ်လာ ၁ ဒသမ ၉၁ သိန်း ဝင်နေမှာလည်း ဖြစ်ပါတယ်။

(၆) အမေရိကန် ဘေ့စ်ဘော ကစားသမား ရောဘင်ဆင်ကာနို (Robinson Cano) ကို ဆီယက်တယ်မရီနာ (Seattle Mariners) အသင်းက ချုပ်ဆိုထားတဲ့ စာချုပ်က တန်ဖိုး ဒေါ်လာ သန်း ၂၄၀ ဖြစ်ပါတယ်။ ၁၀ နှစ် သက်တမ်းနဲ့ ဖြစ်ပြီး ၂၀၁၄ ခုနှစ်ကနေ စတင် ချုပ်ဆိုခဲ့တာ ဖြစ်လို့ လာမယ့် ၂၀၂၃ ခုနှစ်ထိ အသင်းမှာ ရှိနေမှာပါ။ ရောဘင်ဆင် အနေနဲ့ တနှစ်ကို ဝင်ငွေ ၂၄ သန်း ရရှိမှာ ဖြစ်ပြီး တပွဲပြီးတိုင်း ဒေါ်လာ ၁ ဒသမ ၄၈ သိန်း ဝင်ငွေရနေတာလည်း ဖြစ်ပါတယ်။

(၆-ခ) အထက်က ရောဘင်ဆင်နဲ့ စာချုပ်တန်ဖိုးတူ စာချုပ်ကို ဘေ့စ်ဘောကစားသမား အဲလ်ဘတ်ပူဂျိုး (Albert Pujols) က လော့စ်အင်ဂျလိစ် အိန်ဂျယ် (Los Angeles Angels) အသင်းနဲ့ ချုပ်ဆိုထားပါတယ်။ တန်ဖိုး သန်း ၂၄၀ ဖြစ်ပါတယ်။ သူလည်း ၁၀ နှစ် သက်တမ်းနဲ့ပဲ ဖြစ်ပြီး ၂၀၁၂ ကနေ ၂၀၂၁ ခုနှစ်အထိ အသင်းမှာ ကစားနေမှာပါ။ အဲဘတ် အနေနဲ့ တနှစ် ဝင်ငွေ ဒေါ်လာ ၂၄ သန်းရမှာ ဖြစ်သလို ကစားပွဲ တပွဲ အတွက် ဆိုရင် ၁ ဒသမ ၄၈ သိန်း ရမှာပါ။

(၇) ဘတ်စကတ်ဘော ကစားသမားထဲမှာ တန်ဖိုးအကြီးဆုံး စာချုပ် ချုပ်ဆိုထားနိုင်သူကတော့ ဟွန်စတန်ရော့ကက် (Houston Rockets) အသင်းနဲ့ စာချုပ်ထားတဲ့ ဂျိမ်းစ်ဟာဒင် (James Harden) ပဲ ဖြစ်ပါတယ်။ ၂၀၁၇ ကနေ ၂၀၂၃ ခုနှစ် အထိ ၆ နှစ် သက်တမ်းရှိ စာချုပ်ကို ချုပ်ဆိုထားတာပါ။ စာချုပ်က တန်ဖိုး ဒေါ်လာ ၂၂၈ သန်း တန်ပါတယ်။ ဂျိမ်းစ် အနေနဲ့ တနှစ်ကို အသင်းကနေ ဝင်ငွေ ၃၈ သန်း ရနေမှာ ဖြစ်ပြီး ဒါဟာ တပွဲ ကစားတိုင်း ဝင်ငွေ ၄ ဒသမ ၆၃ သိန်း ရနေတာ လည်း ဖြစ်ပါတယ်။

(၈) စင်စင်နတီ ရက်ဒ် (Cincinnati Reds) အသင်းနဲ့ စာချုပ် ချုပ်ဆို ကစားနေတဲ့ ဘေ့စ်ဘောကစားသမား ဂျိုယေးဗော့တို (Joey Votto) ရဲ့ စာချုပ်က ဒေါ်လာ ၂၂၅ သန်း တန်ဖိုး ရှိပါတယ်။ ၁၀ နှစ် သက်တမ်း ရှိတဲ့ အခု စာချုပ်ကို ၂၀၁၄ ခုနှစ်က ချုပ်ဆိုထားတာ ဖြစ်ပြီး ၂၀၂၄ ခုနှစ်ထိ အသင်းမှာ ရှိနေမှာပါ။ ဂျိုယေး အနေနဲ့ တနှစ်ကို ဝင်ငွေ ၂၂ ဒသမ ၅ သန်းလောက် ရှိနေမှာ ဖြစ်ပြီး တပွဲ ကစားတိုင်း ဝင်ငွေ ၁ ဒသမ ၃၈ သိန်း ဝင်နေတဲ့ သဘောပါ။

(၉) ဘော့စတန် ရက်ဆောက်စ် (Boston Red Sox) အသင်းနဲ့ စာချုပ်ချုပ်ဆိုထားတဲ့ ဘေ့စ်ဘောကစားသမား ဒေးဗစ်ပရိုက်စ် (David Price) ကလည်း ဒေါ်လာ ၂၁၇ သန်းတန် စာချုပ်ကို ၇ နှစ်စာ ချုပ်ဆိုထားပါတယ်။ ၂၀၁၆ ခုနှစ်ကနေ ၂၀၂၂ ခုနှစ် အထိ အသင်းမှာ ရှိနေမှာ ဖြစ်ပြီး ဒေးဗစ် အနေနဲ့လည်း တနှစ်ကို ဝင်ငွေ ၃၁ သန်းလောက် ရရှိမှာ ဖြစ်သလို တပွဲ ကစားတိုင်း ၁ ဒသမ ၉၁ သိန်း ထိ ဝင်ငွေ ရနေတာ ဖြစ်ပါတယ်။

(၁၀) လော့စ်အင်ဂျလိစ်ဒေါ့ဂျာ (Los Angeles Dodgers) အသင်းကနေ ခေါ်ယူထားတဲ့ ဘေ့စ်ဘောသမား ကလေတန် ကာရှော (Clayton Kershaw) ရဲ့ စာချုပ်ကငတော့ တန်ဖိုး ဒေါ်လာ ၂၁၅ သန်းထိအောင် ရှိပါတယ်။ ၇ နှစ် သက်တမ်း စာချုပ်ပဲ ဖြစ်ပြီး ၂၀၁၄ ခုနှစ်ကနေ ၂၀၂၀ ထိ အသင်းမှာ ကစားပေးရမှာ ဖြစ်ပါတယ်။ ကလေတန် အနေနဲ့ အသင်းကနေ တနှစ်ကို ၃၀ ဒသမ ၇ သန်းလောက်ထိ ဝင်ငွေရနေတာ ဖြစ်ပြီး ဒါဟာ တပွဲ ကစားတိုင်း ၁ ဒသမ ၈၆ သိန်း ရနေတဲ့ သဘောဖြစ်ပါတယ်။

သူတို့ နောက်မှာတော့ တန်ဖိုးအကြီးဆုံး စာချုပ် စာရင်းမှာ အဆင့် ၁၇ ထိ ဘေ့စ်ဘော ကစားသမားတွေပဲ ဦးဆောင်နေပြီး အဆင့် ၁၈ မှာမှ လက်ဝှေ့ကစားသမား ဖလွိုက်ဒ် မေဝဲသား (Floyd Mayweather) က သန်း ၁၈၀ တန် စာချုပ်နဲ့ ကြားဖြတ်ရပ်တည်နိုင်ခဲ့ပြီး ထိပ်ဆုံး အဆင့် ၂၅ ထိအောင် ဘေ့စ်ဘော ကစားသမားတွေပဲ အမြင့်ဆုံး စာချုပ်တန်ဖိုးတွေနဲ့ ရပ်တည်နေနိုင်ကြတာ တွေ့ရပါတယ်။ ။

Ref: www.en.m.wikipedia.org

The post ကမ္ဘာ့အကောင်းဆုံး ကစားသမားတဦးရဲ့ တပွဲကစားတိုင်းရတဲ့ ဝင်ငွေ ဘယ်လောက်လဲ appeared first on ဧရာဝတီ.

သူ့ နာမည် အပြည့်အစုံက Philippe Coutinho Correia ဖြစ်ပါတယ်။ ကော်တင်ဟိုဟာ အရင်က လီဗာပူးလ်အသင်းရဲ့ အားထားရသူလို့ လူသိများပါတယ်။ ဒါပေမယ့် ၂၀၀၀ ပြည့်နှစ် နောက်ပိုင်း အင်္ဂလန်ရဲ့ အအောင်မြင်ဆုံး အသင်း နေရာကနေ မန်ယူကို နေရာ ဖယ်ပေး လိုက်ရပြီး နောက်ပိုင်း အောင်မြင်မှု ဆုဖလား ကင်းကွာနေတဲ့ လီဗာပူးလ်နဲ့ စာရင်တော့ အခု စပိန်ရဲ့ ထိပ်တန်းလည်း ဖြစ်တယ်၊ ကမ္ဘာ့ အကောင်းဆုံးလို့ ဆိုရင်တောင် ရနိုင်မယ့် ဘာစီလိုနာကို ပြောင်းရွှေ့ကြေး မြင့်မြင့်နဲ့ ရောက်သွားတာ အားရစရာပါ။

ကော်တင်ဟိုကို ၁၉၉၂ ခုနှစ် ဇွန်လ ၁၂ ရက်နေ့က ဘရာဇီးမှာ မွေးပါတယ်။ အသက် ၂၅ နှစ်ပဲ ရှိသေးလို့ လာမယ့် ဆယ်စုနှစ်တိုင် တောက်ပနိုင်ဖို့ ရှိနေတဲ့ လူငယ် ကစားသမားပါ။ အရပ် ၅ ပေနဲ့ ၇ လက်မပဲ ရှိတယ်။ တိုက်စစ်မှူး နေရာမှာလည်း ကစားသလို လိုအပ်ရင် တောင်ပံတွေလည်း ထွက်ကစားပါတယ်။

၁၉၉၉ ခုနှစ်ကတည်းက Vasco da Gama အသင်းမှာ ဘောလုံးပညာ သင်ခဲ့ပါတယ်။ ၂၀၀၈ ခုနှစ်ထိ ၉ နှစ်ကြာပါတယ်။ နောက်တော့ ကြေးစား ဘောလုံးသမား ဘဝကို အီတလီ ကလပ် အင်တာမီလန်မှာ စတင်ခဲ့ပါတယ်။ ၂၀၀၈ ခုနှစ်ကနေ ၂၀၁၃ ခုနှစ်ထိ အင်တာမီလန်မှာ နေတယ်၊ ဒါပေမယ့် လူငယ်လေး ဖြစ်သေးလို့ အင်တာမှာ ပွဲထွက်ခွင့် ဆိုတာထက် အရံခုံမှာပဲ ထိုင်နေရပြီး အချိန်ကုန်ခဲ့ပါတယ်။ ၅ နှစ်ကြာအောင် အင်တာမှာ နေခဲ့ပေမယ့် စုစုပေါင်း ၂၈ ပွဲပဲ ကစားရသလို ၃ ဂိုးပဲ သွင်းနိုင်ခဲ့ပါတယ်။

ပြီးတော့ အင်တာမှာ ၅ နှစ် ခေါ်ထားတယ် ဆိုပေမယ့် တကယ်တော့ ၂၀၀၈ ကနေ ၂၀၁၀ ထိေ ၂ နှစ်က မူလ အသင်း ဗာစကိုဒဂါးမားကို အငှားပြန်ချထားတာ ဖြစ်ပြီး အဆိုပါ ကာလအတွင်း ၁၉ ပွဲ ကစားတယ်၊ ၁ ဂိုး သွင်းတယ်၊ ၂၀၁၂ ခုနှစ် ရောက်တော့ စပိန်ကလပ် Espanyol ကို အငှားထပ်ချခံရပြန်တယ်၊ တနှစ်အတွင်း ၁၆ ပွဲ ကစားရတယ်၊ ၅ ဂိုး သွင်းတယ်၊ ပြောရရင် ကော်တင်ဟို အတွက် ဘောလုံး စတင် ကစားရချိန်တွေက တော်တော်လေး ဘ၀ ခါးခဲ့တာပါ။ အင်တာလို အသင်းကြီး ရောက်ပေမယ့် ပွဲထွက်ခွင့် မရ၊ အငှားချခံရပြန်တော့လည်း ကစားကွက်နဲ့ အံမဝင်ပဲ ခြေစွမ်း မပြနိုင်ခဲ့သူပါ။

၂၀၁၃ ခုနှစ်မှာတော့ သူ့ကို အင်္ဂလန်ကလပ် လီဗာပူးလ်ကနေ ခေါ်ယူခြင်း ခံရပါတယ်။ ပြောင်းရွှေ့ကြေး မြင့်မြင့်မားမားနဲ့ စံချိန်တင်လေက်အောင် မဟုတ်ပေမယ့် လီဗာပူးလ်လို သွက်လက်မှု ဦးစားပေး ကစားတဲ့ အသင်းမှာတော့ ကော်တင်ဟို အတွက် အံဝင်မှု ရှိပါတယ်။ အထူးသဖြင့် အခု နောက်ပိုင်း နှစ်တွေမှာ သူ့ရဲ့ ခြေစွမ်းက သိသိသာသာ တိုးတက်လာတာပါ။ ၂၀၁၃ ကနေ အခုနှစ်ဆန်းပိုင်း အထိ လီဗာပူးလ်မှာ ၅ နှစ်လောက် ကြာခဲ့ပါတယ်။ ဒီကာလအတွင်း အသင်းအတွက် ၁၅၂ ပွဲ ကစားပြီး ၄၁ ဂိုး သွင်းယူပေးနိုင်ခဲ့ပါတယ်။

အခုတော့ အမြင့်ပျံ ကော်တင်ဟို တယောက် စပိန်ထိပ်တန်း ဘာစီလိုနာကို ရောက်သွားပါတယ်။ နေမာ မရှိတော့လို့ တိုက်စစ်ပိုင်းမှာ အားဖြည့်ဖို့ လုပ်ဆောင်နေတဲ့ ဘာစီလိုနာ အတွက် ကွက်လပ် ဖြည့်နိုင်ရင်တော့ အခုထက်ပိုပြီး နာမည်ကြီး ဖို့ ဖြစ်လာမှာပါ။

နိုင်ငံအသင်းနဲ့ ပတ်သတ်ရင်တော့ ဘရာဇီးသားက U17 အသင်း အတွက် ကတည်းက ပါဝင် ကစားပေးနေခဲ့တာပါ။ ၂၀၀၉ ခုနှစ်မှာ U17 အတွက် ၅ ပွဲကစား၊ ၃ ဂိုး သွင်းတယ်၊ ၂၀၁၁-၁၂ မှာ U20 အတွက် ထပ်မံ အရွေးချယ်ခံရတယ်၊ ၇ ပွဲ ကစား၊ ၃ ဂိုး သွင်းတယ်၊ ၂၀၁၀ ခုနှစ်ကနေ စပြီး လက်ရွေးစင် အသင်းမှာလည်း နေရာ တနေရာ ရခဲ့သလို အခုထိ ၃၁ ပွဲ ကစားပေးထားပြီး ၈ ဂိုးထိအောင် သွင်းထားသလို ကော်တင်ဟိုက ကလပ်အသင်းမှာထက် နိုင်ငံအသင်း ပွဲတွေမှာ ခြေစွမ်း ပိုကောင်းတာလည်း သတိထားမိနိုင်ပါတယ်။

ဗာစကိုဒဂါးမားကနေ အင်တာမီလန်ကို ရောက်တော့ ယူရို ၄ သန်းနဲ့ ပြောင်းတယ်၊ အင်တာကနေ လီဗာပူးလ်ကို ၂၀၁၃ ခုနှစ် ဇန်နဝါရီက ပေါင် ၈ ဒသမ ၅သန်းနဲ့ ရောက်တယ်။ ပြီးခဲ့တဲ့ သြဂုတ်လအတွင်း ဘာစီလိုနာက ပြောင်းရွှေ့ကြေး ပေါင် ၇၂ သန်းနဲ့ ကမ်းလှမ်းမှုကို လီဗာပူးလ်က ပယ်ချတယ်၊ တကယ်တော့ လီဗာပူးလ်က ပေါင် ၁၈၃ သန်းထိ လိုချင်ခဲ့တာပါ။

အခုတော့ ဇန်နဝါရီ ၆ ရက်နေ့က ကော်တင်ဟို ဘာစီလိုနာ ပြောင်းမယ် ဆိုတာ လီဗာပူးလ်က အတည်ပြု ပြောတယ်၊ ပြောင်းရွှေ့ကြေး ပေါင် ၁၀၆ သန်းနဲ့ ဖြစ်ပေမယ့် အလုံးစုံ လစာတွေ၊ ပြောင်းရွှေ့ကြေးနဲ့ စာချုပ်က ပေါင် ၁၄၂ သန်း ဖိုးတောင် တန်သွားခဲ့ပါတယ်။ ဒါဟာ ကမ္ဘာပေါ်က တန်ဖိုး အရှိဆုံး ဘောလုံးသမား အပြောင်းအရွှေ့စာချုပ် တခု အဖြစ် မှတ်တမ်း ဝင်သွားစေခဲ့တာပါ။

ကော်တင်ဟိုရဲ့ ဆုဖလား ရယူနိုင်မှုကို ကြည့်မယ် ဆိုရင်တော့ ဗာစကိုဒဂါးမားနဲ့ အတူ ၂၀၀၉ ခုနှစ်က Campeonato Brasilerio Serie B ဖလားရတယ်၊ ၂၀၁၁ ခုနှစ်မှာ အင်တာနဲ့ Coppa Italia နဲ့ Supercoppa Italiana တွေ ရတယ်။ လီဗာပူးမှာတော့ ၅ နှစ်ဝန်းကျင် ကြာပေမယ့် ဆုဖလားလက်မဲ့ ဖြစ်ခဲ့ပါတယ်။ ဘရာဇီး အသင်းနဲ့ မှာတော့ တောင်အမေရိကတိုက် U17 ဖလားကို ၂၀၀၉ ခုနှစ်က ရတယ်၊ ၂၀၁၁ ခုနှစ် ဖီဖာ U20 ကမ္ဘာ့လားကို ရတယ်၊ ၂၀၁၄ ခုနှစ်မှာ Superclasico de las Americas ဖလားကို ရဖူးတာ တွေ့ရပါတယ်။

တဦးချင်း ဆုရရှိမှု အနေနဲ့တော့ PFA ကနေ ပေးတဲ့ တလတာ အကောင်းဆုံး ကစားသမားဆုကို ၂၀၁၅ ခုနှစ် ဖေဖော်ဝါရီ က ရတယ်၊ ၂၀၁၄-၁၅ ဘောလုံး ရာသီ PFA ကနေ ရွေးချယ်တဲ့ တနှစ်တာ အကောင်းဆုံး အသင်း လူစာရင်းမှာ ပါတယ်၊ ၂၀၁၅-၁၆ ဘောလုံး ရာသီ UEFAကနေ ထုတ်ပြန်တဲ့ ယူရိုပါလိဂ် အကောင်းဆုံး အသင်း လူစာရင်းမှာပါတယ်၊ ၂၀၁၅ နဲ့ ၂၀၁၆ တွေမှာ လီဗာပူးအသင်း ပရိတ်သတ်တွေကနေ ရွေးချယ်တဲ့ တနှစ်တာ အကောင်းဆုံး ကစားသမား ဖြစ်ခဲ့တယ်။ အဲဒီ ၂ နှစ်မှာပဲ လီဗာပူးလ် ကစားသမားချင်း ပေးအပ်တဲ့ တနှစ်တာ အကောင်းဆုံး ကစားသမားဆုကို ၂ နှစ်ဆက်တိုက် ထပ်ရပါတယ်။

၂၀၁၆ ခုနှစ် Samba Gold Award လည်း ရဖူးတယ်။ ၂၀၁၆ ခုနှစ် ဘောလုံး ထောက်ပံ့ရေး အဖွဲ့ချုပ်ကနေ ပေးအပ်တဲ့ တနှစ်တာ အကောင်းဆုံး ကစားသမားဆုလည်း ရပါတယ်။ ၂၀၁၇ ခုနှစ် FIFPro ကနေ ထုတ်ပြန်တဲ့ ကမ္ဘာ့ အကောင်းဆုံး အသင်းမှာ အဆင့် ၄ စာရင်းဝင် ကစားသမားလည်း ဖြစ်ခဲ့သူပါ။

ဘာစီလိုနာလို အသင်းကြီးမှာ နာမည်ကြီး ဘောလုံး ဘုရင်တွေ များလွန်းလှပါတယ်၊ အသင်းကြီး ရောက်တိုင်း ခြေစွမ်းပြရင် နာမည်ရမှာ မှန်ပေမယ့် အမှား ရှိတာနဲ့ ဝေဖန်ခံရမယ့် အနေအထား ဖြစ်လို့ ကော်တင်ဟိုရဲ့ အနာဂတ် ဘယ်လို ဖြစ်လာမယ် ဆိုတာ စောင့်ကြည့်ရမှာပါ။ ။

www.en.m.wikipedia.org

The post ဘာကာဆီ တန်းမြင့်ကြေးနဲ့ ပြောင်းရွှေ့သွားတဲ့ ကော်တင်ဟိုရဲ့ အနာဂတ် ဘယ်လိုလဲ appeared first on ဧရာဝတီ.

အင်္ဂလန်ကလပ်တွေထဲမှာ အိမ်ကွင်းမာတယ်၊ ကောင်းတယ် ဆိုတဲ့ အသင်း ဆိုရင် စတုတ်စီးတီး (Stoke City) အသင်းက ရှေးဆုံးက ပါတယ်။ သူက အိမ်ကွင်းဆိုရင် ကစားရခက်တယ်၊ တဖက် အသင်းကို ဂိုး သိပ်မပေးရအောင် ကစားတယ်၊ ဒီလို အသင်း။ ပြည်တွင်းမှာ စတုတ်လို့ ခေါ်တဲ့ စတုတ်စီးတီး အသင်းက နာမည်ကြီးတဲ့ အသင်းကောင်းပါ။ ဒီအသင်းကို ပိုင်ဆိုင်ထားသူ က အင်္ဂလန်သားတွေပဲ၊ ကုတ်စ် (The Coates) မိသားစု ဖြစ်ပါတယ်။ ပိုင်ဆိုင်မှုက မိသားစုလိုက် ပိုင်ဆိုင်တာ၊ မြန်မာလိုဆို အမွေဆိုင် ပိုင်ဆိုင်မှုပေါ့။ သိရသလောက် ဒီမိသားစုဝင် အားလုံးရဲ့ ချမ်းသာကြွယ်ဝမှုက အမေရိကန် ဒေါ်လာ ၃ ဒသမ ၁ ဘီလီယံလောက် ရှိပါတယ်။ အဓိက လုပ်ငန်းက လောင်ကစား လုပ်ငန်းလို့ ဆိုရင်လည်း ရမှာပါ။

ကုတ်စ် (Coates) တို့ လုပ်ကိုင်နေတဲ့ လောင်ကစားက တရားဝင် အွန်လိုင်းကနေ ဘောလုံးပွဲ လောင်းကြေး ထပ်နိုင်တဲ့ Bet 365 ကစားရုံပါ။ သူတို့ မိသားစုထဲမှာ စီးပွားရေးကိုလည်း ဦးဆောင် လုပ်ကိုင်နေသူ၊ နာမည်ကျော်သူ၊ မိသားစု အတွင်းမှာ အချမ်းသာဆုံးသူ၊ ပြီးတော့ စတုတ် အသင်းရဲ့ လက်ရှိ ဥက္ကဌ တာဝန်ကို ရယူ ထားသူ၊ သူကတော့ ပီတာ ကုတ်စ် (Peter Coates) ပါ။ ဒီတော့ Coates မိသားစု အကြောင်းဆိုတာထက် ပီတာ ကုတ်စ်ကပဲ အသင်းနဲ့ ပတ်သတ်လို့ တာဝန် အရှိဆုံးလို့ ဆိုရမှာပါ။
ပီတာကို ၁၉၃၈ ခုနှစ်၊ ဇန်နဝါရီ ၁၃ ရက်နေ့မှာ မွေးပါတယ်။ အခုဆို အသက် ၇၉ နှစ် ရှိနေပါပြီ။ မြန်မာပြည်မှာတော့ ဒီအရွယ်က တရားစခန်း ပုံမှန် ဝင်နေရတော့မှာ ဖြစ်ပေမယ့် ပီတာကုတ်စ်က အသင်း ဥက္ကဌ တာဝန်ကို အခုထိအောင် ရယူ ထမ်းဆောင်နေဆဲပါ။ အင်္ဂလန် စီးပွားရေး သမား ဖြစ်ပြီးတော့ အင်္ဂလန်သား ဘောလုံး အသင်း ပိုင်ရှင်တွေထဲက အဆင့် ၂၅ ဦးမြောက် အချမ်းသာဆုံး စာရင်းဝင်ပါတယ်။

သူ့ကို အဓိက လူသိများရတဲ့ အကြောင်းကတော့ ၁၉၆၀ ပြည့်လွန် နှစ်တွေက Stadia Catering နဲ့ ၁၉၈၃ ခုနှစ်က Signal Radio လို လူသိများတဲ့ လုပ်ငန်းတွေ တည်ထောင် လုပ်ကိုင်ခဲ့သူမို့ ဖြစ်ပါတယ်။

၂၀၁၄ ခုနှစ်က စာရင်းတွေ အရတောင် ပီတာရဲ့ ချမ်းသာမှုက စတာလင်ပေါင် သန်း ၇၅၀ လောက် ရှိပါတယ်။ ဒါဟာ တမိသားစုလုံးရဲ့ ပိုင်ဆိုင်မှုရဲ့ သုံးချိုး တချိုးနီးပါးကို သူတယောက်တည်း ပိုင်ဆိုင်ပါတယ်။

မိသားစု လုပ်ငန်းနဲ့ ပတ်သတ်ရင်တော့ အဓိက လုပ်ငန်းက အထက်မှာ ပြောသလို ဘောလုံးပွဲ လောင်းကြေး လက်ခံတဲ့ လောင်းကစား လုပ်ငန်းပါ။ Bet365အမည်နဲ့ လုပ်ကိုင်နေတာပါ။ အင်္ဂလန် ဘောလုံးပွဲတွေနဲ့ နီးစပ်သူ၊ ကြည့်ဖြစ်သူတွေ အနေနဲ့ အခု Bet 365ကို သိကြပါတယ်။ လောင်းကြေး ဆိုတာထက် ဘောလုံး ဝတ်စုံမှာပါ စပွန်ဆာပေး ကြော်ငြာထားလို့ ဖြစ်ပါတယ်။ ဒီလုပ်ငန်းကို ၂၀၀၀ ခုနှစ်ကမှ Coates မိသားစုက တည်ထောင် လုပ်ကိုင်ခဲ့တာပါ။ လုပ်ငန်းကို ဦးဆောင်သူ ကတော့ မိသားစုထဲက သမီးဖြစ်သူ ဒင်းနစ်စ်ကုတ်စ် (Denise Coates) ဖြစ်ပါတယ်။

၂၀၀၁ ခုနှစ် မတ်လမှာတော့ Bet 365 ဟာ အွန်လိုင်းကနေ လောင်းကြေးထပ်၊ အလျော်၊ အစား လုပ်နိုင်တဲ့ လောင်းကစား လုပ်ငန်း ဖြစ်လာပါပြီ။ ဒီလိုနဲ့ တဖြည်းဖြည်း တွင်ကျယ်လာတဲ့ လောင်းကစား လုပ်ငန်းကြီးက ၂၀၁၀ ခုနှစ် မတ်လအတွင်းက ထုတ်ပြန်တဲ့ စာရင်းတွေ အရတော့ တနှစ်ကို လောင်းကြေး စတာလင်ပေါင် ၅ ဒသမ ၄ ဘီလီယံ ရှိတယ်၊ ဝင်ငွေ ပေါင် သန်း ၃၅၈ ရှိပြီး အသားတင် အမြတ် ပေါင် ၁၀၄ သန်းလောက် မြတ်နေတဲ့ ကမ္ဘာ့ အကြီးဆုံး လောင်းကစား လုပ်ငန်းတွေထဲက တခု အဖြစ် စာရင်း ဝင်လာပါတယ်။

Bet 365 ကို ဦးဆောင်ခဲ့သူက သမီး ဖြစ်သူ ဒင်းနစ်စ် ဖြစ်ပေမယ့် မိသားစုပိုင် အနေနဲ့ မိသားစုဝင်တွေက ရှယ်ယာတွေကို ခွဲေ၀ ပိုင်ဆိုင်ထားတယ်၊ ဒီထဲမှာ ပီတာကတော့ စီးပွားရေး သမားပီပီ လုပ်ငန်းရဲ့ ဥက္ကဌ နေရာကိုလည်း ရယူထားသလို အုပ်ချုပ်သူ အဖြစ် သူ့ရဲ့ အကိုကို ထားရှိ ခန့်အပ်ပြီး ရှယ်ယာ အများဆုံးလည်း ကိုင်ထားတဲ့ သဘော ရှိပါတယ်။

စတုတ် အသင်းနဲ့ ပတ်သတ်ရင်တော့ ၁၉၈၉ ခုနှစ်မှာ ပီတာဟာ အသင်းရဲ့ ရှယ်ယာ အများဆုံး ပိုင်ဆိုင်သူ ဖြစ်ခဲ့ပါတယ်။ ၁၉၉၇ မှာတော့ အသင်းက ပရီးမီးယားလိဂ်ကနေ တတိယတန်းထိအောင် တန်းဆင်းရချိန်မှာတော့ သူလည်း အသင်း ဥက္ကဌ နေရာကနေပါ ဖယ်ပေးလိုက်ရအောင် နေရာ ပျောက်သွားပါတယ်။

ဒါပေမယ့် ရှယ်ယာတွေ အများစုကတော့ သူ့လက်ထဲမှာ ရှိနေပါသေးတယ်။ အမှန်တကယ် ဆိုရင် အသင်း ဥက္ကဌလို ခေါင်းဆောင်နေရာ ရချင်တဲ့ ပီတာကုတ်စ်က အသင်း ဥက္ကဌ ရာထူးကနေ ဖယ်ရှားခံရမှုနဲ့ အတူ သူ့ရဲ့ ရှယ်ယာတွေကို ၁၉၉၉ ခုနှစ် နိုဝင်ဘာ ၁၅ မှာ အိုက်စလန် စီးပွားရေး လုပ်ငန်းစုထံကို စတာလင်ပေါင် ၃ ဒသမ ၅ သန်းနဲ့ ရောင်းထုတ် ပစ်ခဲ့တာပါ။ ဒီလိုနဲ့ ပီတာကုတ်စ်နဲ့ စတုတ်အသင်း ဇာတ်လမ်းပြတ်သွားပါတယ်။

ဒါပေမယ့် ရေစက်တော့ မကုန်သေး။ ၂၀၀၅ ခုနှစ်ရောက်တော့ သူ့ဆီက ရှယ်ယာတွေ ဝယ်သွားတဲ့ လုပ်ငန်းစုက အသင်းကို ပီတာကုတ်စ်ဆီ ပြန်ရောင်းချင်တယ်၊ ဆွေးနွေးမှုတွေ လုပ်တယ်၊ အသင်းက ပရီးမီးယားလိဂ်ကို တန်းတော့ ပြန်တက်ဖို့ ရှိနေပါပြီ။ ဒါပေမယ့် အသင်းမှာ ဘဏ္ဍာရေး အကျပ်အတည်း ဖြစ်နေတယ်။ စီးပွားရေး သမားဆိုတာကလည်း ခွင်ကောင်းကောင်း ထိုင်စောင့်ပြီး သေချာမှ လုပ်ကြတယ်ဗျ၊

၂၀၀၆ ခုနှစ်ထိအောင် ဆွေးနွေးမှုတွေ လုပ်ခဲ့ပြီးမှ အသင်းကို ပီတာကုတ်စ် တယောက်တည်း မဟုတ်ပဲ မိသားစု အမွေဆိုင် ပုံစံ ဝယ်လိုက်ပါတယ်။ ပီတာ ရောင်းထုတ်ချိန်က တတိယတန်း ရောက်နေတဲ့ စတုတ်အသင်းက ပေါင် ၃ ဒသမ ၅ သန်း ရပေမယ့် အခုတော့ ၂၀၀၆ ခုနှစ်မှာ ပရီးမီးယားလိဂ်ကို တန်းပြန်တက်ဖို့ ရှိနေပြီ ဖြစ်တဲ့ အသင်းကို ပေါင် ၁ ဒသမ ၇ သန်းနဲ့ ပြန်ရလိုက်ပါတယ်။ အားလုံးပေါင်းကတော့ ၁ ဒသမ ၇ သန်းနဲ့ အတူ ရောင်းချသူ စီးပွားရေး လုပ်ငန်းစုကို Coates က ရစရာ ရှိတဲ့ အကြွေး ပေါင် ၃ ဒသမ ၃ သန်း လျော့ပေးလိုက်လို့ အသင်းက ၅ သန်း တန်တယ် လို့ ဆိုရမှာပါ။

ကံကောင်းစွာနဲ့ ၂၀၀၇-၀၈ ဘောလုံး ရာသီမှာ စတုတ်က ချန်ပီယံရှစ်မှာ ဒုတိယ အဆင့်နဲ့ ရာသီသိမ်းနိုင်သလို ပရီးမီးယားလိဂ်ကို တန်းပြန်တက်လာ ပါတယ်။ စီးပွားရေး သမားကြီး ပီတာကုတ်စ် အတွက်ကတော့ ကံမျက်နှာသာ ပေးသွားပါတယ်။ အခုဆိုရင် စတုတ်ဟာ အင်္ဂလန်ကလပ်တွေထဲမှာ နာမည်တလုံးရှိတယ်၊ တန်ဖိုး ပေါင် သန်းရာဂဏန်း တန်ဖိုးရှိနေပြီ ဖြစ်တဲ့ အသင်း တသင်းလည်း ဖြစ်ပါတယ်။

Ref: www.en.m.wikipedia.rog

The post စတုတ်စီးတီးအသင်းပိုင်ရှင် ကုတ်စ် မိသားစု ဘယ်လိုချမ်းသာတာလဲ appeared first on ဧရာဝတီ.

သူတို့ အသင်းကို Lions of the Atlas လို့ ချစ်စနိုးခေါ်ကြပြီး အမည် အပြည့်အစုံက မော်ရိုကိုနိုင်ငံ ကိုယ်စားပြု လက်ရွေးစင် အသင်း (Morocco national football team) ပါ။ တကယ်ဆိုရင်တော့ သူတို့ အသင်းက ကမ္ဘာ့အဆင့်မှာ အရမ်းကြီး ခြေစွမ်းမြင့်မြင့်မားမား ရှိလှတာတော့ မဟုတ်ဘူး။ ပြောရရင် ကမ္ဘာ့ဖလား ဝင်ကန်ရလောက်အောင် မကောင်းဘူးလို့ ဆိုနိုင်ပေမယ့် ကံကောင်းသွားတာက ဒေသနယ်ပယ် သတ်မှတ်ချက်မှာ အာဖရိကနယ်ထဲ ပါနေတာကြောင့် လို့ ဆိုနိုင်ပါတယ်။

ဥပမာ – အခုနှစ်မှာ အီတလီလို နာမည်ကျော် အသင်းက ခြေစစ်ပွဲ မအောင်ဘူး၊ ဒါက အသင်းကောင်းတွေ အများကြီး ရှိနေတဲ့ ဥရောပနယ်တွင်း ရောက်နေလို့ဆိုတဲ့ အချက်နဲ့လည်း သက်ဆိုင်သွားပါတယ်။

မော်ရိုကို ဘောလုံးအဖွဲ့ချုပ် (Federation Royale Marocaine de Football) ရဲ့ လက်အောက်ခံ အသင်း အဖြစ် ရှိနေတာပါ။ ဘောလုံးနယ်ပယ် သတ်မှတ်ချက်မှာတော့ အာဖရိကနယ် အတွင်း ပါရှိပြီး နယ်ပယ်ကျယ်ဝန်းတဲ့ အာဖရိကကို ထပ်ခွဲမယ် ဆိုရင်တော့ မြောက်အာဖရိကနယ် ဘောလုံးအဖွဲ့ချုပ်ရဲ့ အသိအမှတ်ပြု အသင်းလည်း ဖြစ်ပါတယ်။

လက်ရှိ အသင်းကို နည်းပြ Herve Renard က ကိုင်တွယ်နေပါတယ်။ အသင်းခေါင်းဆောင်ကတော့ မက်ဒီဘင်နားရှား (Medhi Benatia) ဖြစ်ပါတယ်။ အသင်း အတွက် ဂိုး အများဆုံး သွင်းယူထားသူ အဖြစ် အာမက်ဒ်ဖာရပ်စ် (Ahmed Faras) က မှတ်တမ်းဝင်နေပြီး ပြိုင်ပွဲစုံ ၄၂ ဂိုး သွင်းပေးထားသလို ပွဲအများဆုံး ကစားထားသူ အဖြစ်နဲ့တော့ နောရက်ဒင်းနေဘက် (Noureddine Naybet) က ၁၁၅ ပွဲ ကစားပေးထားတာ တွေ့ရပါတယ်။

အသင်းက အိမ်ကွင်းမှာ ဆိုရင် အကျႌအနီရောင်၊ ပခုံးမှာ အနက်ရောင်စင်းပါမယ်၊ ဘောင်းဘီ အနက်၊ ဘေးလိုင်း အနီစင်းနဲ့ ခြေအိတ်က အနီရောင်ကို အနက်ရောင် လည်ပင်းကွပ်ထားပါတယ်။ အဝေးကွင်းမှာ ဆိုရင် အကျႌက အစိမ်းနက်ရောင် ဖြစ်လာပြီး ပုခုံးမှာ အနီရောင်အစင်းပါမယ်၊ ဘောင်းဘီ အနီမှာ ဘေးလိုင်း အနက်စင်းနဲ့ ခြေအိတ်က အစိမ်းနက်ရောင်ကို အနီနဲ့ အနက်စင်း လည်ပင်းကွပ်ထားပါတယ်။ ကြားကွင်းကစားမှုတွေ အတွက် အဖြူရောင် အကျႌကို ပုခုံးမှာ အနီနဲ့ အစိမ်းနက် အစင်းပါရှိမယ်၊ ဘောင်းဘီ အဖြူကို အနီနဲ့ အနက် ဘေးလိုင်းပါမယ်၊ ခြေအိတ်လည်း အဖြူဖြစ်ပြီး အနီရောင် လည်ပင်းကွပ်ထားပါတယ်။

လက်ရှိ ဖီဖာရဲ့ အဆင့် သတ်မှတ်ချက် အရ ပြီးခဲ့တဲ့ ၂၀၁၇ ခုနှစ် ဒီဇင်ဘာ အတွင်း အဆင့် ၄၀ သတ်မှတ်ခံထားရပြီး နောက်ဆုံး ၂ လ အတွင်း အဆင့်ပြောင်းလဲမှု မရှိပဲ ရပ်တည်နေတာ ဖြစ်ပါတယ်။ သမိုင်းတလျှောက် အမြင့်ဆုံး အဆင့် သတ်မှတ်ချက် အနေနဲ့တော့ ၁၉၉၈ ခုနှစ် ဧပြီလ အတွင်းက အဆင့် ၁၀ ထိအောင် အမြင့်ဆုံး ရောက်ခဲ့ဖူးတာ တွေ့ရပါတယ်။

အာဖရိက ဒေသတွင်းပွဲတွေပဲ အများဆုံး ကစားတတ်တဲ့ မော်ရိုကိုက ရလဒ် ဆိုးဝါးလောက်အောင် အဆင့်ကျဆင်းမှု မရှိဖူး တာကတော့ သဘောကျစရာပါ။ သမိုင်းတလျှောက် ၂၀၁၀ ခုနှစ် စက်တင်ဘာလ အတွင်းက အဆင့် ၉၅ ထိအောင်ပဲ တကြိမ် ကျဆင်းဖူးတာ တွေ့ရပါတယ်။

နိုင်ငံပွဲ ကစားမှု အနေနဲ့တော့ တခြား အင်အားကြီး နိုင်ငံတွေနဲ့ စာရင် ရာစုနှစ် တဝက်လောက်ထိ နောက်ကျတာ တွေ့ရပြီး ပထမဆုံး မော်ရိုကိုနိုင်ငံပွဲကို ၁၉၅၇ ခုနှစ် အောက်တိုဘာ ၁၉ ရက်မှာမှ စတင် ကစားနိုင်ခဲ့ပြီး အဆိုပါ ပွဲကို လက်ဘနွန်နိုင်ငံ၊ ဘေရွတ်မှာ အီရတ်နဲ့ ကစားခဲ့ပြီး တဖက် ၃ ဂိုးစီနဲ့ သရေကျခဲ့ပါတယ်။ သမိုင်းတလျှောက် အသင်းရဲ့ အကြီးမားဆုံး နိုင်ပွဲ အဖြစ်နဲ့တော့ ၁၉၆၁ ခုနှစ် စက်တင်ဘာ ၆ ရက်က မော်ရိုကိုနိုင်ငံ၊ ကာဆာဘလန်ကာမှာ ကစားတဲ့ ဆော်ဒီအာရေဗျနဲ့ ပွဲမှာ ၁၃ ဂိုး ဂိုးမရှိနဲ့ အနိုင်ရခဲ့တာ ဖြစ်ပါတယ်။ မှတ်တမ်းဝင် အကြီးမားဆုံး ရှုံးပွဲကိုတော့ ၁၉၆၄ ခုနှစ် အောက်တိုဘာ ၁၁ ရက်နေ့က ဂျပန်နိုင်ငံ၊ တိုကျိုမှာ ကစားတဲ့ ဟန်ဂေရီနဲ့ ပွဲမှာ ၆ ဂိုး ဂိုးမရှိနဲ့ ရှုံးခဲ့တာ ဖြစ်ပါတယ်။

အာဖရိက နိုင်ငံများဖလားကို ၁၉၇၆ ခုနှစ်က ပထမဆုံး ရတယ်၊ ကမ္ဘာ့ဖလားမှာ ပထမဆုံး အုပ်စု အဆင့်ကနေ နောက်တဆင့် တက်လှမ်းနိုင်တဲ့ အသင်း အဖြစ် မှတ်တမ်းဝင်နေတယ်၊ ၁၉၈၆ ခုနှစ် ကမ္ဘာ့ဖလားမှာ ပေါ်တူဂီ၊ ပိုလန်နဲ့ အင်္ဂလန်တို့လို အသင်းတွေနဲ့ အုပ်စုကျပ်မှာ ကျခဲ့ပေမယ့် နောက်တဆင့် တက်ခဲ့တာပါ။ ပြီးတော့ အဆိုပါ ကမ္ဘာ့ဖလားမှာပဲ ရှုံးထွက် ဒုတိယ အဆင့်ထိ ရောက်ခဲ့ပြီး အဆိုပါ အဆင့်မှာ အနောက်ဂျာမနီကို ၁ ဂိုး ဂိုးမရှိနဲ့ ရှုံးလို့ ထွက်ခဲ့ရတာပါ။ အခုနှစ် ကမ္ဘာ့ဖလားကတော့ နှစ် ၂၀ ကြာ ခြေစစ်ပွဲ မအောင်ဘဲ ဖြစ်နေတာကို အဆုံးသတ်လိုက်နိုင်ပြီး ကမ္ဘာ့ဖလားမှာ ပြန်လည် ခြေချလာတာပါ။

နောက်ဆုံး အနေနဲ့ကမ္ဘာ့ဖလား ဝင်ခွင့်ရထားတာကတော့ ၁၉၉၄ ခုနှစ်နဲ့ ၁၉၉၈ တွေမှာ ဖြစ်ပြီး အဆိုပါ ပြိုင်ပွဲ ၂ ခုလုံးမှာ အုပ်စု အဆင့်နဲ့ပဲ ပြန်လှည့် ခဲ့ရတာလည်း ဖြစ်ပါတယ်။ အာဖရိက ဖလားကို ၁ ကြိမ်၊ ဒုတိယနဲ့ တတိယ ၁ ကြိမ်စီ ရထားဖူးပါတယ်။ အာရပ်နိုင်ငံများ ဖလားကိုလည်း ၂၀၁၂ ခုနှစ်က ၁ ကြိမ် ရဖူးတာကလွဲရင် တခြား ကြီးမားတဲ့ အောင်မြင်မှုတော့ သိပ်မရထားပါဘူး။ အသင်းက ခံစစ်ဦးစားပေး ပုံစံနဲ့ ကစားတတ်ပြီး ပွဲအများစုမှာ ပေးဂိုးမရှိ၊ ပေးဂိုး နည်းနည်းနဲ့ ရလဒ်ထွက်အောင် ကစားတတ်တာ တွေ့ရပါတယ်။

နောက်ဆုံး ကစားထားတဲ့ ရလဒ်တွေကို ပြန်ကြည့်မယ် ဆိုရင် ၂၀၁၇ ခုနှစ် အောက်တိုဘာ ၁၀ ရက်နေ့က တောင်ကိုရီးယားနဲ့ ခြေစမ်းပွဲမှာ ၃ ဂိုး ၁ ဂိုးနဲ့ နိုင်ထားတယ်၊ နိုဝင်ဘာ ၁၁ ရက်နေ့က အိုင်ဗရီကို့စ်နဲ့ ပွဲမှာလည်း ၂ ဂိုး ဂိုးမရှိနဲ့ နိုင်တယ်၊ နောက်ဆုံးပွဲ ရလဒ်တွေကတော့ အင်အားကြီး အသင်းတွေကို အကောင်းဆုံး အသာစီးရအောင် ကစားထားနိုင်တာလည်း ဖြစ်ပါတယ်။

လာမယ့် ကမ္ဘာ့ဖလား မတိုင်ခင်မှာ မတ်လ ၂၃ ရက်နေ့ ဆာဘီးယားနဲ့ ခြေစမ်းပွဲ ကစားမယ်၊ ၂၇ ရက်နေ့ ဥဘက္ကစ္စတန်နဲ့ ကစားမယ်၊ ပြီးတော့ ကမ္ဘာ့ အုပ်စုပွဲစဉ် အဖြစ် အဖွင့်ပွဲကို ဇွန်လ ၁၅ ရက်နေ့မှာ အီရန်၊ ဇွန်လ ၂၀ ရက်နေ့မှာ ပေါ်တူဂီ၊ ဇွန် ၂၅ ရက်နေ့မှာ စပိန်တို့နဲ့ ကစားမှာပါ။ အုပ်စုကျပ် အတွင်းမှာ ရောက်နေတယ် လို့ ဆိုရမှာ ဖြစ်ပြီး စပိန်နဲ့ ပေါ်တူဂီတို့ကို ကျော်တက်ပြီး အုုပ်စုအဆင့်ကနေ တက်ဖု့ိတော့မလွယ်လှပါဘူး။

ခြေစွမ်း အနေအထားအရ အီရန်ဆိုတာကလည်း ကောင်းနေလို့ ဘဲဥကွဲဖို့တောင် ကြိုးစား ရမယ့် အနေအထားပါ။ ဒါပေမယ့် ဘောလုံးဆိုတာက အလုံးကြီး ဆိုသလိုပဲ မော်ရိုကိုအတွက် မျှော်လင့်ချက် နည်းပေမယ့် မျှော်လင့်နိုင်ပါတယ်။

အသင်းကို ဂျာစီ စပွန်ဆာ အနေနဲ့ Adidas, Lotto, Umbro, Puma, Nike တို့လို ကုမဏီကြီးတွေကပဲ ပေးထားတာ တွေ့ရပြီး အခု နောက်ဆုံး စပွန်ဆာအနေနဲ့ ၂၀၁၂ ခုနှစ်ကနေ စတင်ပြီး ဂျာမနီ အခြေစိုက် Adidas ကနေ ပေးထားပါတယ်။ အထူးသဖြင့်တော့ အဆိုပါ စပွန်ဆာ ကုမ္ပဏီတွေဟာ အာဖရိကမှာ မော်ရိုကိုအသင်း အကျႌ အများဆုံး ရောင်းချရလို့ စပွန်ဆာ အပြိုင်ပေးလေ့ရှိတယ် လို့ ဆိုပါတယ်။

Ref: www.en.m.wikipedia.org

The post မော်ရိုကိုရဲ့ ကမ္ဘာ့ဖလား မျှော်လင့်ချက် ဘယ်လိုလဲ appeared first on ဧရာဝတီ.

လက်စတာ လို တန်းတက် အသင်းလေးက ၂၂၀၁၅-၁၆ ဘောလုံးရာသီမှာ ပရီးမီးယားလိဂ် ဖလား ရယူသွားခဲ့တာကို မေ့ကြဦးမယ် မထင်ပါဘူး။ ဒီလိုပဲ အခုနှစ်မှာလည်း ဘန်လေ (Burnley F.C.) လို အသင်းကို အသင်းသေးဆိုပြီး လျှော့တွက်လို့ မရတဲ့ အနေအထားပါ။

အရင်နှစ် ဘောလုံး ရာသီက အဆင့်ဘယ်လောက်နဲ့ပဲ ရာသီသိမ်းခဲ့သည် ဖြစ်စေ ဒီနှစ်မှာတော့ ဘယ်နှစ်ယောက်မှ လူကောင်း မရှိတဲ့ အသင်းသားတွေနဲ့ ထိပ်တန်း အဆင့် ၁၀ အတွင်းမှာ ရပ်တည်နိုင်နေတယ်။ တခါတလေ အမှတ်ပေးဇယား ထိပ်ပိုင်းကို ရောက်လာတာတွေ၊ အသင်းကြီးတွေကို ကောင်းကောင်း တန်ပြန် ကစားနိုင်မှုတွေက ဘန်လေကို စိတ်ဝင်စားစရာ ဖြစ်လာစေပါတယ်။

ဒါပေမယ့် ဘန်လေကို အခုနှစ် ပရီးမီးယားလိဂ် ဖလားကို ရယူနိုင်တယ်လို့ ထင်မြင်ချက်ပေးနေတာ မဟုတ်ဘဲ ရာသီဝက် ကျော်လာချိန် ရပ်တည်မှု အရ ဖလားရနိုင်ဖို့ မရှိတော့ ပေမယ့် အသင်းသေး ဖြစ်ပေမယ့် အခုနှစ် ရလဒ်ကောင်းတဲ့ ဘန်လေအသင်းရဲ့ တခြား မျက်နှာစာ အကြောင်း ပြောပြမှာ ဖြစ်ပါမယ်။

အင်္ဂလန် အမှတ်ပေး ဘောလုံးပြိုင်ပွဲဝင်နေတဲ့ အသင်း တသင်း ဖြစ်ပြီး လန်ကာရှိုင်းယား (Lancashire) ဒေသက ဘန်လေမြို့မှာ အခြေစိုက်တဲ့ အသင်းပါ။ The Clarets (အနီရောင်စဉ်တန်းများ) လို့ ခေါ်ကြပါတယ်။ ဒါကလည်း သူတို့က အိမ်ကွင်းမှာ အနီရောင် (ဝိုင်နီရောင်) ဆန်ဆန်ကို ဝတ်ဆင်ကစားလို့ ခေါ်ကြတာပါ။

ဘန်လေ အသင်းဟာ အင်္ဂလန် အခြေစိုက် အသင်းတွေထဲမှာ သက်တမ်းရင့် အသင်း တသင်း ဖြစ်ပြီး ၁၈၈၂ ခုနှစ် မေလ ၁၈ ရက်ကတည်းက တည်ထောင်ခဲ့တာ ဖြစ်လို့ သက်တမ်း အရ ၁၃၅ နှစ်ထိ ရှိနေပြီ ဖြစ်ပါတယ်။ အသင်း နာမည် အပြည့်အစုံက Burnley Football Club ဖြစ်ပါတယ်။ နာမည် အတိုက်ကောက် BFC လို့ သုံးပါတယ်၊

အိမ်ကွင်း အနေနဲ့ လက်ရှိမှာ Turf Moor ကို အသုံးပြုနေပြီး ပရိတ်သတ် ၂၁၉၄၄ ဦး ဆံ့ပါတယ်။ လက်ရှိ အသင်းရဲ့ ဥက္ကဌက Mike Garlick ဖြစ်ပြီး နည်းပြ အဖြစ် Sean Dyche က တာဝန်ယူနေတာ တွေ့ရပါတယ်။ အရင်နှစ်ကတော့ အသင်းက ရလဒ် သိပ်မကောင်းခဲ့ပဲ အဆင့် ၁၆ နဲ့ ရာသီသိမ်းထားတာ တွေ့ရပါတယ်။

အသင်းက အိမ်ကွင်းမှာ အနီရောင် အင်္ကျီမှာ မိုးပြာရောင် လက်မောင်းသား၊ ဘောင်းဘီ မိုးပြာရောင်နဲ့ ခြေအိတ်လည်း မိုးပြာရောင်ပဲ ဖြစ်ပါတယ်။ အဝေးကွားမှာတော့ အင်္ကျီ၊ ဘောင်းဘီ၊ ခြေအိတ်တွေက အဖြူရောင် ဖြစ်သွားပြီး အင်္ကျီ လက်မောင်းသားမှာ အနီစင်းပါတယ်၊ ဘောင်းဘီ ဘေးသားမှာ အနီစင်း ပါရှိပါတယ်။ ကြားကွင်းတွေမှာတော့ အင်္ကျီက မိုးပြားရောင်ကို လက်မောင်းမှာ အနီရောင် လိုင်းထည့်ထားပြီး ဘောင်းဘီနဲ့ ခြေအိတ်ကတော့ အနက်ရောင် ဖြစ်ပြီး အနီရောင် ဘေးစင်းနဲ့ လည်ပင်းတွေ ကွပ်ထားတာ တွေ့ရပါတယ်။

ရှေ့ပိုင်းမှာ တည်ထောင် ကစားခဲ့တဲ့ အသင်း ဖြစ်ပေမယ့် နောက်ပိုင်း ပေါ်ပေါက်လာတဲ့ အသင်းကြီးတွေလောက်တော့ အောင်မြင်မှု မရခဲ့ပါဘူး။ ၁၈၈၈ ခုနှစ်က Football League ကို စတင် တည်ထောင် ကစားခဲ့တဲ့ အသင်း ၄ သင်းထဲက ၁ သင်း အဖြစ် ပါခဲ့တဲ့ ဘန်လေအသင်းဟာ Football League ဖလားကို ၁၉၂၁ နဲ့ ၁၉၆၀ တွေမှာ ၂ ကြိမ်ရဖူးတယ်၊ ၁၉၁၄ ခုနှစ်မှာ FA ဖလား ၁ လုံး ရဖူးပါတယ်။ ၁၉၆၀ နဲ့ ၁၉၇၃ ခုနှစ်တွေမှာ ကွန်မြူနတီဒိုင်းလည်း ၂ ကြိမ် ရဖူးတာ တွေ့ရပါတယ်။ ဒါပေမယ့် ၂၀၀၀ ပြည့့်နှစ် မတိုင်ခင် အသင်းရဲ့ အောင်မြင်မှုက ဥရောပ အဆင့်ထိအောင် ရောက်ခဲ့ပြီး ၁၉၆၁ ခုနှစ် ဥရောပဖလားပြိုင်ပွဲမှာ ဆီမီးဖိုင်နယ် အထိ ရောက်ရှိခဲ့တာ တွေ့ရပါတယ်။

အင်္ဂလန် အမှတ်ပေး ဘောလုံးပြိုင်ပွဲတွေကို အဆင့်ခွဲခြားလိုက်ရင် အဓိက အနေနဲ့ ပရီးမီးယားလိဂ် အပါအဝင် အဆင့် ၄ ဆင့် ရှိပြီး အဆိုပါ ပြိုင်ပွဲ ၄ ခုလုံးမှာ ဖလားရယူဖူးတဲ့ အသင်းဆိုလို့ အခုချိန်ထိ ၅ သင်းပဲ ရှိပြီး အဆိုပါ အသင်းတွေထဲမှာ ဘန်လေ ပါဝင်နေတာကတော့ တခြား အသင်းတွေထက် ထူးခြားနေပါတယ်။ ဒီအသင်း ၅ သင်းကတော့ ဘန်လေ၊ ပို့မောက်စ်၊ ဝုဗာဟက်တန်၊ ရှက်ဖီးယူနိုက်တက် နဲ့ ပရက်စတန်နော့အန်း အသင်းတွေ ဖြစ်ပါတယ်။

နောက်ပြီး လက်ရှိ အိမ်ကွင်း အဖြစ် ကစားနေတဲ့ Turf Moor ကွင်းကို အသင်းက ၁၈၈၃ ခုနှစ် ဖေဖော်ဝါရီ ၁၇ ရက် ကတည်းက အသုံးပြုကစားနေတာ ဖြစ်လို့ အိမ်ကွင်း တခုတည်းကိုပဲ အကြာဆုံး အသုံးပြုတဲ့ အသင်း စာရင်းမှာလည်း ပါရှိနေပါတယ်။ အသင်းရဲ့ လက်ရှိ ဝိုင်နီရောင် ဝတ်စုံကို ၁၉၁၀-၁၁ ခုနှစ်တွေက အင်္ဂလန်မှာ အောင်မြင်မှု ရနေတဲ့ အက်စတွန်ဗီလာ အသင်းရဲ့ အရောင်နဲ့ ဆင်တူ ပုံစံ ရယူ ဝတ်ဆင်လာခဲ့တာလည်း ဖြစ်ပါတယ်။

အသင်းရဲ့ လာဘ်ကောင် အဖြစ်တော့ Bertie ဆိုတဲ့ ပျားကောင်ပုံလေးကို သုံးတာ တွေ့ရပါတယ်။ ၁၈၈၂ ခုနှစ်က အသင်းရဲ့ ဝတ်စုံကို ဝတ်ဆင်ပြီး ပွဲထွက်လေ့ ရှိသလို အသင်းရဲ့ ပရိတ်သတ်တွေက အလှည့်ကျ ဝတ်ဆင် ပွဲထွက်တာ လည်း ဖြစ်ပါတယ်။ ဒီလာဘ်ကောင်ကို BBC ကနေ ထုတ်လွှင့်တဲ့ They Think It’s All Over အစီအစဉ်မှာ မကြာခဏ ပါဝင်မှုနဲ့ အတူ လူသိများ ပါတယ်။ ၂၀၀၆-၀၇ ဘောလုံး ရာသီ အတွင်းက Holland Pies မှာလည်း သွားရောက် ပါဝင် ဖျော်ဖြေမှု လုပ်ခဲ့တာ တွေ့ရပါတယ်။

စာရင်းတွေ အရ ဘန်လေဟာ အောင်မြင်မှု သိပ် မရတော့ပေမယ့် ပရိတ်သတ် အခိုင်အမာရှိနေတဲ့ အင်္ဂလန် အသင်း တသင်းပါ။ ၁၉၅၉-၆၀ ခုနှစ်တွေမှာ ချန်ပီယံ ဖြစ်ချိန်က အသင်းရဲ့ ပရိတ်သတ် အင်အားက အခြား ထိပ်တန်း အသင်းတွေရဲ့ ပရိတ်သတ်ထက် ၂ ဆလောက် ပိုများနေခဲ့တာလည်း ဖြစ်ပါတယ်။ အသင်းရဲ့ အဓိက ပြိုင်ဘက်ကတော့ ၂၀၀၀ ခုနှစ် ဝန်းကျင်က အသင်းကြီး စာရင်းဝင်ခဲ့တဲ့ ဘလက်ဘန်း ဖြစ်ပြီး သူတို့ နှစ်သင်းရဲ့ ပွဲစဉ်ကို East Lancashire Derby လို့တောင် တင်စားခေါ်ဝေါ်ကြပါတယ်။

လက်ရှိ ပရီးမီးယားလိဂ်၊ ယခင် First Division မှာ ချန်ပီယံ ၂ ကြိမ်၊ ယခု ချိန်ပီယံရှစ်၊ ယခင် Second Division မှာ ချန်ပီယံ ဖလား ၃ ကြိမ်၊ ယခု League One၊ ယခင် Third Division မှာ ချန်ပီယံ ဖလား ၁ ကြိမ်၊ ယခု League Two၊ ယခင် Fourth Division မှာ ချန်ပီယံ ၁ ကြိမ်စီ ဖြစ်ခဲ့တာလည်း တွေ့ရပါတယ်။

အသင်းရဲ့ အကြီးမားဆုံး အမှတ်ပေးပြိုင်ပွဲ နိုင်ပွဲက ၁၈၉၂ ခုနှစ် ဇန်နဝါရီ ၉ ရက်က ကစားတဲ့ ဒါဝန်နဲ့ ပွဲမှာ ၉ ဂိုး ဂိုးမရှိနဲ့ နိုင်တယ်၊ ဖလားပွဲ အကြီးမားဆုံး နိုင်ပွဲက ၁၉၈၄ ခုနှစ် နိုဝင်ဘာ ၁၇ ရက်က ကစားတဲ့ ပန်းရစ်နဲ့ ပွဲမှာ ၉ ဂိုး ဂိုးမရှိနဲ့ နိုင်ဖူးတယ်။

အကြီးမားဆုံး အမှတ်ပေးပြိုင်ပွဲ ရှုံးပွဲက ၁၉၂၅ ခုနှစ် သြဂုတ် ၂၉ ရက်မှာ ကစားတဲ့ အက်စတွန်ဗီလာနဲ့ပွဲမှာ ၁၀ ဂိုး ဂိုးမရှိနဲ့ ရှုံးဖူးတယ်၊ ဖလားပွဲ အကြီးမား ရှုံးပွဲက ၁၈၈၅ ခုနှစ် အောက်တိုဘာ ၁၇ ရက်က ကစားတဲ့ ဒါဝန်နဲ့ ပွဲမှာ ၁၁ ဂိုး ဂိုး မရှိနဲ့ ရှုံးခဲ့တာပါ။

အိမ်ကွင်း ပရိတ်သတ် အများဆုံး လာရောက်တဲ့ ပွဲ အဖြစ် ၁၉၂၄ ခုနှစ် ဖေဖော်ဝါရီ ၂၃ ရက်က ကစားတဲ့ ဟက်ဒါဖီးလ်နဲ့ ပွဲမှာ ပရိတ်သတ် ၅၄၇၇၅ ဦးထိ လာရောက် အားပေးခဲ့တာ တွေ့ရပါတယ်။ အမှတ်ပေးပြိုင်ပွဲ ရှုံးပွဲမရှိ တဆက်တည်း ကစားနိုင်မှု အဖြစ် ၁၉၂၀ စက်တင်ဘာ ၆ ရက်နေ့ကနေ ၁၉၂၁ ခုနှစ် မတ်လ ၂၅ ရက်ထိအောင် ပွဲပေါင်း ၃၀ ဆက်တိုက် မရှုံးအောင် ကစားနိုင်ခဲ့တာ တွေ့ရပါတယ်။

အသင်း အတွက် ပွဲအများဆုံး ကစားပေးထားသူက Jerry Dawson ဖြစ်ပြီး ၅၂၂ ပွဲ ကစားပေးထားပါတယ်။ အသင်း အတွက် George Beel က ၁၇၈ ဂိုးထိအောင် အများဆုံး သွင်းယူပေးထားတာလည်း တွေ့ရပါတယ်။ ဘောလုံး တရာသီ အတွင်း ရမှတ် အများဆုံး ရယူနိုင်မှု အဖြစ် ၂၀၁၃-၁၄ နဲ့ ၂၀၁၅-၁၆ ဘောလုံးရာသီတွေမှာ အမှတ်ပေးပြိုင်ပွဲမှာရမှတ် ၉၃ မှတ်ထိ ရယူနိုင်ခဲ့တာပါ။

အသင်းက ၂၀၁၇ ခုနှစ် အတွင်း လိဒ်ကနေ Chris Wood ကို ပေါင် ၁၅ သန်း ပေးပြီး စံချိန်တင် ခေါ်ယူဖူးသလို ဘန်လေကနေ ၂၀၁၇ ဇူလိုင် ၃ ရက်က အဲဗာတန်ကို ရောက်သွားတဲ့ Michael Keane အတွက် ပေါင် ၂၅ သန်း ရဖူးတာလည်း တွေ့ရပါတယ်။

Ref: en.m.wikipedia.org

The post အစဉ်အလာကြီးမားတဲ့ ဘန်လေအသင်းရဲ့ သမိုင်းမျက်နှာစာ appeared first on ဧရာဝတီ.

နာမည် အပြည့်အစုံက ချာလီစ် ဂျိုးဆက်ဖ် ဂျွန်ဟတ် (Charles Joseph John Hart) ပါ။ ဒါပေမယ့် သူ့ကို ဂျိုးဟတ် (Joe Hart) လို့ပဲ ခေါ်ကြပါတယ်။ လက်ရှိ အင်္ဂလန်လက်ရွေးစင် အသင်း အတွက် အားထားရတဲ့ ဂိုးသမား တယောက်ပါ။ အရင်က မန်းစီးတီး အသင်းမှာ လက်စွမ်းပြ ကစားနိုင်ငံခဲ့တာကြောင့် လူသိများပါတယ်။ ဒါပေမယ့် အခုနှစ်ပိုင်းတွေမှာ နေရာပျောက်နေလို့ အခြား အသင်းတွေကို အငှားချ ခံထားနေရပြီး လက်ရှိ ဘောလုံး ရာသီမှာလည်း ပွဲထွက်ခွင့် ပုံမှန် ရနိုင်မယ့် ဝက်စ်ဟမ်း အသင်းမှာ အငှားနဲ့ သွားရောက် ကစားနေတာ တွေ့ရပါတယ်။

ပရီးမီးယားလိဂ် အမှတ်ပေးပွဲတွေမှာ ပွဲပေါင်းများစွာ ပါဝင်ကစားထားပြီး ဂိုးမပေးရတဲ့ ပွဲပေါင်း ၁၀၀ ကျော်ထိ အကောင်းဆုံး လက်စွမ်းပြ ကစားထားနိုင်သူလည်း ဖြစ်ပါတယ်။ အင်္ဂလန် ကစားသမားထဲမှာရော ပရီးမီးယားလိဂ်မှာ ကစားဖူးတဲ့ ဂိုးသမားတွေ ထဲမှာပါ အကောင်းဆုံး စံချိန် တခုကို ပိုင်ဆိုင်ထားတဲ့ အချက်ကတော့ ပရီးမီးယားလိဂ် ရွှေလက်အိတ်ဆုကို ၄ ကြိမ်ထိ ရရှိထားတာပဲ ဖြစ်ပြီး ၂၀၀၈ ခုနှစ် ကနေ စတင်ပြီး နိုင်ငံတကာပွဲစဉ်တွေမှာလည်း အခုချိန်ထိအောင် ပွဲပေါင်း ၇၅ ပွဲ ကစားပေးထားနိုင်တာ တွေ့ရပါတယ်။

သူ့ကို ၁၉၈၇ ခုနှစ် ဧပြီ ၁၉ ရက်နေ့က အင်္ဂလန်နိုင်ငံ၊ ရှရီဘူရီမှာ မွေးပါတယ်။ အခု အသက် ၃၀ ပါ၊ တကယ်ဆိုရင်တော့ အကျပိုင်းကို ရောက်လာပြီလို့ ဆိုနိုင်ပေမယ့် ဂိုးသမား တယောက် ဖြစ်နေလို့ အခြား နာမည်ကျော် ဂိုးသမားတွေလို နောက်ထပ် ၃ နှစ်လောက်ထိ အကောင်းဆုံး လမ်းစွမ်းပြနိုင်လိမ့်ဦးမယ် လို့ ယူဆရပါတယ်။ အရပ် ၆ ပေနဲ့ ၅ လက်မ ရှိတဲ့ ဂိုးသမား တစဦးပါ။

ဝက်စ်ဟမ်း အသင်းမှာတော့ ကျောနံပါတ် ၂၅ ကို ဝတ်ဆင် ကစားတာကတော့ အများစု ဝတ်ဆင်တဲ့ ၁ ကို မယူလို့ နည်းနည်း ထူးခြားနေစေပါတယ်။ သက်ငယ် ကစားသမားဘဝကို အပျော်တမ်း ကျောင်းမှာ ဝင်ကစားရင်း စတင်ခဲ့ပြီး မြို့ခံ ရှရီဘူရီမြို့အသင်းမှာလည်း ၂၀၀၃ ခုနှစ်ထိ ဘောလုံး ပညာသင်ခဲ့တာ တွေ့ရပါတယ်။

ကြေးစား ဘောလုံးသမား အဖြစ် ၂၀၀၃ ခုနှစ်မှာ စတင် ဝင်ရောက်လာခဲ့ပါတယ်။ ရှရီဘူရီမြို့ အသင်းကြီးမှာ လခနဲ့ ဝင်ရောက် ကစားခဲ့တာပါ။ ၂၀၀၆ ခုနှစ်ထိ ၃ နှစ်ကြာခဲ့ပြီး ပွဲပေါင်း ၅၄ ပွဲ ကစားခွင့် ရခဲ့ပါတယ်။ သိရသလောက် ရှရီဘူရီလို အသင်းသေးလေး ကနေ မန်းစီးတီးလို အသင်းကြီးကို တိုက်ရိုက် ခေါ်ဆိုမှု ခံရလောက်အောင် အသင်းမှာ ဂျိုးဟတ်ရဲ့ လက်စွမ်း အထူး ကောင်းမွန်တာကြောင့် ၂၀၀၆ ခုနှစ်မှာတော့ မန်စီးတီးကို ရောက်လာပါတယ်။

မန်စီးတီးကို ငယ်ငယ်နဲ့ မြန်မြန် ရောက်လာပေမယ့် အသင်းက သူ့ကို ချက်ချင်းတော့ ပွဲထွက်ခွင့် မပေးခဲ့ပါဘူး။ ရောက်တဲ့ နှစ်မှာ အရန်ခုံမှာသာ အချိန်ကုန်နေတာ များပါတယ်၊ ၂၀၀၇ ရောက်တော့ ထရန်မီရီရိုဗာ အသင်းကို အငှားပြန်ချတယ်၊ ရာသီဝက် အငှားချရာမှာ အသင်း အတွက် ၆ ပွဲ ကစားတယ်။ ဒုတိယ ရာသီဝက်မှာ ဘလက်ပူးလ်ကို ရောက်တယ်၊ ၅ ပွဲပဲ ကစားခွင့်ရတယ်။

တကယ်က ဂျိုးဟတ် လိုချင်နေတာ ပွဲထွက်ခွင့်နဲ့ လက်စွမ်းပြခွင့် ဖြစ်ပေမယ့် အင်္ဂလန် အသင်းတွေမှာ သူ့ အတွက် နေရာ ပျောက်နေခဲ့တာလည်း ဖြစ်ပါတယ်။ ၂၀၀၈-၀၉ မှာတော့ မန်းစီးတီးမှာ ပွဲထွက်ခွင့်ရတယ်၊ ဒါပေမယ့် လက်စွမ်းပြတာ အားနည်းနေလို့ ၂၀၀၉-၁၀ မှာ ဘာမင်ဂမ်စီးတီးကို အငှားပြန်ချခံရပြန်ပါတယ်။ ဝါ့ရင့် ဂိုးသမားဘ၀ ရောက်လာတဲ့ ဂျိုးဟတ် အတွက် ဘာမင်ဂမ်မှာ ကောင်းကောင်း လက်စွမ်းပြနိုင်တာကြောင့် နောက်နှစ် ၂၀၁၁-၁၂ ရာသီက စပြီး မန်စီးတီးက ပြန်လည် ခေါ်ယူခဲ့သလို ၂၀၁၅-၁၆ ဘောလုံး ရာသီ အထိအောင် မန်စီးတီး အတွက် အကောင်းဆုံး လက်စွမ်းပြ ကစားနိုင်ခဲ့ပြီး အောင်မြင်မှုတွေ ရယူနိုင်ခဲ့တာလည်း တွေ့ရပါတယ်။

ဒါပေမယ့် သိတဲ့ အတိုင်း မန်းစီးတီး ဆိုတာ အောင်မြင်မှုကို ငွေနဲ့ ရှာဖွေနေတဲ့ အသင်း ဖြစ်သလို အသက် ၃၀ နား ကပ်လာလို့ လက်စွမ်း နည်းနည်း ကျချင်လာတဲ့ ဂျိုးဟတ်ကို ပွဲထွက် အနေနဲ့ မထားတော့ပဲ ၂၀၁၆-၁၇ မှာ တိုရီနိုကို အငှားချလိုက်တာ တွေ့ရပါတယ်။ တိုရီနို အတွက်ကတော့ ဂျိုးဟတ်ဟာ ကမ္ဘာ့ အဆင့် ဂိုးသမား တယောက်ကို ရလိုက်တာ ဖြစ်လို့ တရာသီ အတွင်း ၃၆ ပွဲလုံး ကစားခွင့်ပေးခဲ့တာလည်း တွေ့ရပါတယ်။ တိုရီနိုကနေ ၁ နှစ် အငှားစာချုပ်နဲ့ ပြန်ရောက် လာတဲ့ ဂျိုးဟတ် အတွက် အခုနှစ် ၂၀၁၇-၁၈ ဘောလုံး ရာသီမှာလည်း အငှားပဲ ထပ်ကျပါတယ်။ အခုတော့ ဝက်ဟမ်း ယူနိုက်တမ်မှာ ကစားနေပါတယ်။ ၁၄ ပွဲထိ ပွဲထွက်ခွင့် ရထားလို့ မဆိုးသေးပါဘူး။

နိုင်ငံ အသင်း အတွက်ကတော့ အင်္ဂလန် U19 အသင်း အတွက် ၂၀၀၅ ခုနှစ်ကတည်းက ကစားပေးနေခဲ့တာ ဖြစ်ပြီး ၆ ပွဲ၊ ၂၀၀၇ ကနေ ၂၀၀၉ အထိအောင် U21 အသင်း အတွက် ၂၁ ပွဲ၊ အင်္ဂလန် လက်ရွေးစင် အသင်း အတွက်ကတော့ ၇၅ ပွဲထိ ကစားပေးထားနိုင်တာ တွေ့ရပါတယ်။

သူ့ အတွက် ပထမဆုံး ပရီးမီးယားလိဂ် ရွှေလက်အိတ်ဆုကို ၂၀၁၀-၁၁ ရာသီမှာ ဂိုးမပေးရတဲ့ ပွဲအများဆုံး ဖမ်းပေးနိုင်ခဲ့လို့ မန်းစီးတီးအသင်းနဲ့ အတူ ရတယ်၊ ၂၀၁၁-၁၂ မှာ မန်းစီးတီး ချန်ပီယံ ဖြစ်ဖို့ အဓိက ကူညီ ဖမ်းပေးနိုင်ခဲ့သူ အဖြစ်လည်း သတ်မှတ်ခံရတယ်၊ ၂၀၁၅ ခုနှစ် အတွင်း ဆက်တိုက် ဆိုသလို ရွှေလက်အိတ်ဆု ၄ ကြိမ်ထိ ရခဲ့တာပါ။ သူ့ ဘ၀ အတွက် အတောက်ပဆုံး ကာလလို့လည်း ဆိုရမှာပါ။ ၅ နှစ် အတွင်း ဆု ၄ ကြိမ် ရခဲ့တာလည်း ဖြစ်ပါတယ်။

အသင်းနဲ့ အတူ ဆုဖလားရယူနိုင်မှုကတော့ အခု နောက်ပိုင်း အောင်မြင်မှု ရနေပြီ ဖြစ်တဲ့ မန်စီးတီးနဲ့ အတူပဲ ဖလားတွေ ရထားပြီး ၂၀၁၂ နဲ့ ၂၀၁၄ တွေမှာ ပရီးမီးယားလိဂ် ဖလား ၂ လုံး၊ ၂၀၁၁ ခုနှစ်မှာ FA ဖလား ၁ ကြိမ်၊ ၂၀၁၃ မှာတော့ FA ဖလားပွဲမှာ ဒုတိယနဲ့ ကျေနပ်ခဲ့ရတယ်၊ ၂၀၁၁ နဲ့ ၂၀၁၄ တွေမှာ ကွန်မြူနတီဒိုင်း ဖွင့်ပွဲ ကစားခွင့် ရခဲ့ပေမယ့် ၂ ကြိမ်လုံး ရှုံးခဲ့လို့ ဒုတိယ ၂ ကြိမ် ရဖူးတာ တွေ့ရပါတယ်။

တဦးချင်း အနေနဲ့တော့ အထက်မှာ ပြောခဲ့သလို ပရီးမီးယားလိဂ် ရွှေလက်အိတ်ဆုကို ၄ ကြိမ်၊ PFA ကနေ ရွေးချယ်တဲ့ တနှစ်တာ အကောင်းဆုံး အသင်းကစားသမား လူစာရင်းမှာ ၂၀၀၆၊ ၂၀၁၀၊ ၂၀၁၂ တွေမှာ ၃ ကြိမ်ထိ ပါဝင်ခဲ့ဖူးတာလည်း တွေ့ရပါတယ်။ ၂၀၀၉-၁၀ ဘာမင်ဂမ်မှာ ကစားနေချိန် ဘာမင်ဂမ်အသင်း တနှစ်တာ အကောင်းဆုံး ကစားသမားဆုကိုပါ ရရှိထားတာ ဖြစ်ပါတယ်။ မန်စီးတီးမှာတော့ ၂၀၁၀-၁၁ ရာသီ တနှစ်တာ စွမ်းဆောင်ရည် အကောင်းဆုံး ကစားသမားဆု ရတယ်၊ တလတာ အကောင်းဆုံး ပရီးမီးယားလိဂ် ကစားသမားဆုကိုလည်း ၂၀၁၀ သြဂုတ်နဲ့ ၂၀၁၅ ခုနှစ် မတ်လတွေမှာ ၂ ကြိမ် ရဖူးတာ တွေ့ရပါတယ်။

Ref: en.m.wikipedia.org

The post ရွှေလက်အိတ်ဆု ၄ ခု ရခဲ့တဲ့ တံခါးမှူး ဂျိုးဟတ် appeared first on ဧရာဝတီ.