ကမ္ဘောဒီးယားနိုင်ငံက အိမ်ရှင်အဖြစ်လက်ခံကျင်းပနေတဲ့ အာဆီယံ အသက် ၂၂ နှစ်အောက် ဘောလုံး ပြိုင်ပွဲဝင်ရောက် ယှဉ်ပြိုင်နေတဲ့ မြန်မာ ယူ ၂၂ အသင်းအနေနဲ့ ဆီမီးဖိုင်နယ်အဆင့် တက်လှမ်းဖို့ဆိုရင် နောက်ဆုံးပွဲစဉ်ဖြစ်တဲ့ မလေးရှားနဲ့ပွဲစဉ်မှာ အနိုင်ကစားဖို့ လိုအပ်နေပြီ ဖြစ်ပါတယ်။
မြန်မာအသင်းဟာ ၂၀၁၉ အာဆီယံ ယူ ၂၂ ဘောလုံးပြိုင်ပွဲရဲ့ အုပ်စု (ခ) မှာ အိမ်ရှင် ကမ္ဘောဒီးယား၊ အင်ဒိုနီးရှား၊ မလေးရှား အသင်းတို့နဲ့ အတူ တစ်အုပ်စုတည်း ကျရောက်ခဲ့ပါတယ်။
အာဆီယံ ထိပ်သီးအသင်းတွေ ဖြစ်တဲ့ ထိုင်းနဲ့ ဗီယက်နမ်တို့ မပါဝင်ဘဲ မြန်မာနဲ့ ခြေရည်တူအသင်းတွေဖြစ်တဲ့ အင်ဒိုနီးရှား၊
မလေးရှားတို့ အပြင် ထိပ်တိုက်ဆုံတွေ့ချိန်တိုင်း အနိုင်ယူလေ့ရှိတဲ့ ကမ္ဘောဒီယားအသင်းတို့သာ ပါဝင်တဲ့ အုပ်စုဖြစ်လို့ မြန်မာအသင်း အနေနဲ့ အုပ်စုအဆင့်ကနေ ကျော်ဖြတ်ဖို့အခွင့်အရေး အများကြီး ရှိနေခဲ့ပါတယ်။
ဒါပေမယ့် ဖေဖော်ဝါရီ ၁၈ ရက်နေ့က ကန်တဲ့အဖွင့်ပွဲစဉ်မှာ မြန်မာအသင်းဟာ အင်ဒိုနီးရှားနဲ့ တဖက် တဂိုးစီ သရေကျခဲ့ပြီး ရမှတ်တမှတ်သာ ရယူနိုင်ခဲ့ပါတယ်။ ဆက်လက်ပြီး ဒုတိယမြောက်ပွဲစဉ်အဖြစ် အိမ်ရှင် ကမ္ဘောဒီးယားနဲ့ ယှဉ်ပြိုင်ကစားချိန်မှာတော့ ဒီပြိုင်ပွဲအတွက် ကြိုတင်ပြင်ဆင်မှုများစွာ ပြုလုပ် ထားခဲ့တဲ့ ကမ္ဘောဒီးယားက မြန်မာအသင်းကို ၂ ဂိုးပြတ်နဲ့ အနိုင်ယူခဲ့ပါတယ်။
အိမ်ရှင် ကမ္ဘောဒီးယား အသင်းအနေနဲ့ အဖွင့်ပွဲစဉ်မှာ မလေးရှားကို အနိုင်ယူခဲ့သလို ဒုတိယမြောက် ပွဲစဉ်မှာလည်း မြန်မာအသင်းကို ထပ်မံအနိုင်ယူကာ ထင်မှတ်မထားတဲ့ စွမ်းဆောင်ရည်တွေ ပြသပြီး ၂ ပွဲကန် ၂ ပွဲနိုင်ရလဒ်နဲ့ ဆီမီးဖိုင်နယ်အဆင့်ကို တက်လှမ်းသွားခဲ့ပါတယ်။
မြန်မာယူ ၂၂ အသင်း အတွက်တော့ ဆီမီးဖိုင်နယ်တက်လှမ်းဖို့ မျှော်လင့်ချက်ငွေ့ငွေ့သာ ကျန်တဲ့အဆင့်အထိ ရောက်သွားခဲ့
ပါတယ်။
တဖက်မှာလည်း မလေးရှားနဲ့ အင်ဒိုပွဲစဉ်မှာ အပြန်အလှန်သွင်းဂိုးတွေနဲ့ တဖက် ၂ ဂိုးစီသရေကျခဲ့လို့ အုပ်စုတွင်း ရပ်တည်မှုအရ ကမ္ဘောဒီးယားက ရမှတ် ၆ မှတ်နဲ့ ပထမ၊ ၂ ပွဲဆက် သရေကျထားတဲ့ အင်ဒိုက ရမှတ် ၂ မှတ်နဲ့ ဒုတိယ၊ မလေးရှားအသင်းက မြန်မာအသင်းနဲ့ ရမှတ်တူ ဂိုးကွာခြားချက်အရ အုပ်စု တတိယနေရာမှာ ရပ်တည်နေပြီး မြန်မာ ယူ ၂၂ အသင်းကတော့ အုပ်စုအောက်ဆုံးအဆင့်မှာ ရပ်တည်နေပါတယ်။
နိုင်ငံတစ်ခုရဲ့ ယူ ၂၂ အသင်းဆိုတာ နောင်တချိန်မှာ နိုင်ငံ့လက်ရွေးစင်အဖြစ်နဲ့ ပခုံးပြောင်း တာဝန်ထမ်းကြမယ့် လက်ရွေးစင် ဘောလုံးသမားလောင်းလျာတွေကို စုဖွဲ့ထားတဲ့အသင်းဖြစ်ပါတယ်။ မြန်မာ ယူ ၂၂ အသင်းမှာ ဆိုရင်လည်း လက်ရှိ မြန်မာ့ လက်ရွေးစင်အသင်းကြီးမှာ ပါဝင်ကစားနေတဲ့ တိုက်စစ်မှူး ထက်ဖြိုးဝေ၊ ကွင်းလယ်လူ မြတ်ကောင်းခန့်၊ လွင်မိုးအောင်နဲ့ နောက်တန်းဗဟို ခံစစ်ကစားသမား စိုးမိုးကျော်တို့ ပါဝင်ကစားနေတဲ့အသင်း ဖြစ်ပါတယ်။
ဒါပေမယ့် လက်ရှိအနေအထားအရ မြန်မာအသင်းဟာ အသင်းရလာဒ်ပိုင်း ဆိုးဝါးနေတဲ့အပြင် တိုက်စစ်ကလည်း ၂ ပွဲကို ၁ ဂိုးပဲ သွင်းယူနိုင်ပါတယ်။ ဒါဟာ မြန်မာယူ ၂၂ အသင်းကို အချိန်ကာလ တခုအထိ ကိုင်တွယ်လေ့ကျင့်ပေးခဲ့တဲ့ နည်းပြချုပ် ဦးကြည်လွင်နဲ့ လမ်းခွဲခဲ့ခြင်းရဲ့ အကျိုးဆက်တွေလား ဆိုတာတော့ စဉ်းစားစရာ ဖြစ်ပါတယ်။
မြန်မာနိုင်ငံဘောလုံး အဖွဲ့ချုပ်ဟာ ၂၀၁၅ ခုနှစ် ဆီးဂိမ်းမှာ မြန်မာအသင်း ငွေတံဆိပ်ဆုရအောင် စွမ်းဆောင်ခဲ့တဲ့ ဦးကြည်လွင် ကို မြန်မာယူ ၂၂ အသင်း နည်းပြချုပ်အဖြစ် စာချုပ်နဲ့ခန့်အပ်ပြီး လေ့ကျင့်စေခဲ့ရာကနေ အာဆီယံ ချန်ပီယံရှစ်ပြိုင်ပွဲ ကျင်းပခါနီး ၁ လလောက်အလိုမှာ ဦးကြည်လွင်နဲ့ ရုတ်တရက် လမ်းခွဲခဲ့ပြီး ဘူဂေးလ်ရီးယားလူမျိုး ဗာလီဇာ ပိုပေါ့ကို နည်းပြချုပ်အဖြစ် ပြောင်းလဲခန့်အပ်ကာ ပြိုင်ပွဲကို ယှဉ်ပြိုင်စေခဲ့တာ ဖြစ်ပါတယ်။
နည်းပြသစ် ပိုပေါ့ ကိုင်တွယ်နေတဲ့ မြန်မာယူ ၂၂ အသင်းဟာ ဆီမီးဖိုင်နယ် တက်ဖို့ဆိုရင်တော့ နောက်ဆုံး ပွဲစဉ်ဖြစ်တဲ့ မလေးရှားနဲ့ပွဲမှာ အနိုင်ရလာဒ် ရယူနိုင်မှသာ နောက်တဆင့်တက်ဖို့ မျှော်လင့်နိုင်မှာ ဖြစ်ပါတယ်။
အကယ်၍ တဖက်ပွဲစဉ်ဖြစ်တဲ့ ကမ္ဘောဒီးယားနဲ့ အင်ဒိုနီးရှားပွဲစဉ်မှာ အင်ဒိုနီးရှား နိုင်ခဲ့ရင်တော့ မြန်မာအသင်းနဲ့
မလေးရှားအသင်း ပွဲစဉ်မှာ ဘယ်လိုရလာဒ်ထွက်ပေါ်သည်ဖြစ်စေ အရေးမပါတော့ဘူး ဖြစ်ပါတယ်။ ဘာကြောင့်လဲဆိုတော့ အင်ဒိုအသင်းက ရမှတ် ၂ မှတ် ရရှိထားလို့ ကမ္ဘောဒီးယားကိုနိုင်ရင် ရမှတ် ၅ မှတ်နဲ့ နောက်တဆင့်တက်သွားပါပြီ။
ဒါကြောင့် အင်ဒိုနဲ့ ကမ္ဘောဒီးယားပွဲစဉ်မှာ သရေရလာဒ် သို့မဟုတ် ကမ္ဘောဒီယားအနိုင်ရခဲ့ပြီး မြန်မာ အသင်းကလည်း မလေးရှားကို နိုင်မှသာလျှင် နည်းပြသစ် ပိုပေါ့ရဲ့ မြန်မာအသင်း ဆီမီးဖိုင်နယ်ကို တက်ရောက်မှာ ဖြစ်ပါတယ်။
အုပ်စုတက်ရေး အဆုံးအဖြတ်ပွဲစဉ်ဖြစ်တဲ့ မြန်မာ ယူ ၂၂ အသင်းနဲ့ မလေးရှား ယူ ၂၂ အသင်း ပွဲစဉ်ကို ဒီကနေ့ မြန်မာစံတော်ချိန် ည ၆ နာရီ (ကမ္ဘောဒီးယား စံတော်ချိန် ၆ နာရီ ၃၀ မိနစ်) မှာ ကမ္ဘောဒီးယားကလပ် ဖနွမ်းပင်ခရောင်း အသင်းပိုင် RSN ကွင်းမှာ ယှဉ်ပြိုင်သွားမှာ ဖြစ်ပါတယ်။ တချိန်တည်းမှာပဲ ကမ္ဘောဒီးယားနဲ့ အင်ဒိုပွဲစဉ်ကိုလည်း နေရှင်နယ် အိုလံပစ်ကွင်းမှာ ကျင်းပသွားမှာ ဖြစ်ပါတယ်။
မြန်မာ ယူ ၂၂ အသင်းအနေနဲ့ လက်ရှိမှာ တိုက်စစ်နဲ့ ကွင်းလယ်က စုဖွဲ့မှုနဲ့ အချိတ်အဆက် အားနည်းနေပြီး နောက်တန်း ခံစစ်မှာလည်း လိုအပ်ချက်တွေရှိနေတဲ့အတွက် အဆိုပါ အားနည်းချက်တွေကို အချိန်မီ ပြင်ဆင်ပြီး မလေးရှားကို အနိုင်ယူကာ ဆီမီးဖိုင်နယ် တက်သွားမလား၊ အုပ်စုအဆင့်ကနေပဲ မြန်မာနိုင်ငံ လှည့်ပြန် လာရမလားဆိုတာ ဆက်လက် စောင့်ကြည့်သွားရမှာ ဖြစ်ပါတယ်။
The post ဆီမီးဖိုင်နယ်တက်ဖို့ မလေးရှားကို အနိုင်ကန်ရမယ့် မြန်မာယူ ၂၂ အသင်း appeared first on ဧရာဝတီ.