အာဖရိကတိုက် ယူဂန်ဒါ နိုင်ငံတကာ ကြက်တောင်ဖိတ်ခေါ်ပြိုင်ပွဲ (Uganda International 2019) အမျိုးသမီး တဦးချင်း ပွဲစဉ်၌ မြန်မာ့ ကြက်တောင် ရွှေတံဆိပ် ဆုရှင် သက်ထားသူဇာက ဂျော်ဒန်နိုင်ငံ သူ ဒိုမိုအမ်ရိုကို နှစ်ပွဲပြတ်ဖြင့် အနိုင်ယူကာ ရွှေတံဆိပ်ဆု ထပ်မံဆွတ်ခူးနိုင်ခဲ့သည်။
မြန်မာနိုင်ငံ ကြက်တောင်အဖွဲ့ချုပ် တွဲဖက်အတွင်းရေးမှူး တွဲဖက်နည်းပြ ဦးမိုးကျော်သူက “အခု ဖိုင်နယ်ကတော့ ဂျော်ဒန် နဲ့ပါ၊ မနေ့ည ၈နာရီမှာ ကစားတယ်၊ သက်ထားသူဇာက ၂ပွဲလုံး ၂၁မှတ်ပေါ့၊ ပြိုင်ဘက်က တပွဲက ၁၄မှတ်၊ နောက်တပွဲက ၁၂ မှတ်နဲ့ အနိုင်ရခဲ့တာပါ၊ အခုရွှေတံဆိပ် ရပါတယ်”ဟု ဧရာဝတီသို့ အတည်ပြုပြောကြားသည်။
အဆိုပါ Uganda International 2019 ပြိုင်ပွဲကို ဖေဖါ်ဝါရီ ၂၁ရက်မှ ၂၄ ရက်နေ့အထိ ကျင်းပခဲ့ပြီး သက်ထားသူဇာက အိမ်ရှင် ယူဂန်ဒါ ကစားသမား ဘရန်ဒါ မူဘာဂီ ကိုလည်း အမှတ်အသာစီးဖြင့် နှစ်ပွဲပြတ် အနိုင်ရခဲ့ပြီး၊ ကွာတားဖိုင်နယ်တွင် ဇမ်ဘီယာ ကစားသမား ဇမ်ဘီယာကစားသမား အိုဂါ ဆီရမ်မူ ပန်ဂီလာကို နှစ်ပွဲပြတ်နိုင်ပြီး ဆီမီးဖိုင်နယ်သို့ တက်ရောက် လာခဲ့သည်။
ထိုနောက် ဆီမီးဖိုင်နယ်တွင် ကမ္ဘာ့အဆင့်(၂၁၆)ရှိ အီရန်ကစားသမား ဆာမင်ကိုလည်း နှစ်ပွဲပြတ်နိုင် ကာ ဗိုလ်လုပွဲ တက်ရောက်နိုင်ခဲ့ပြီး၊ နောက်ဆုံး ဖိုင်နယ်ပွဲစဉ်တွင် ဂျော်ဒန်နိုင်ငံသူ ဒိုမိုအမ်ရိုနှင့် ယှဉ်ပြိုင် ကစားခဲ့ရာ ၂နှစ်ပွဲ ပြတ် အနိုင်ယူကာ ရွှေတံဆိပ်ဆုရရှိခဲ့ခြင်းသည်။
သက်ထားသူဇာသည် ယူဂန်ဒါ နိုင်ငံတကာ ကြက်တောင်ပြိုင်ပွဲသာမက ကင်ညာနှင့် ပေါ်တူဂီတွင် ပြုလုပ်မည့် ပြိုင်ပွဲများ တွင်လည်း ဝင်ရောက်ယှဉ်ပြိုင်ရန် ပြုလုပ်ထားသော်လည်း ပေါ်တူဂီနိုင်ငံမှ ပြည်ဝင်ခွင့် ဗီဇာမရ၍ ယခုအခါ ကင်ညာနိုင်ငံ သို့ သွားရောက်ကာ ယှဉ်ပြိုင်ရန် ပြင်ဆင်နေကြောင်း သိရသည်။
ကင်ညာနိုင်ငံတွင် ဖေဖော်ဝါရီ ၂၈ရက်နေ့မှ မတ်လ ၃ရက်နေ့အထိ ယှဉ်ပြိုင်ကစားမည် ဖြစ်ပြီး ပြိုင်ပွဲ ဝင် နိုင်ငံပေါင်း ၁၉နိုင်ငံပါဝင်မည်ဟု သိရသည်။
သက်ထားသူဇာသည် အသက် ၇နှစ်အရွယ်မှ စတင်ပြီး ကြက်တောင်ကစားလာသူဖြစ်သည်။
ထိုင်းနိုင်ငံတွင် ကျင်းပသည့် Club ပေါင်းစုံပြိုင်ပွဲ၌ Woman Doubleတွင် တတိယဆုရရှိထားသူဖြစ် သည်။
နီပေါ အပြည်ပြည် ဆိုင်ရာ ကြက်တောင်ပြိုင်ပွဲ( Nepal International Series 2018)တွင် ဒုတိယဆု၊ အီရန် နိုင်ငံတကာ ကြက်တောင်ပြိုင်(Iran International challenge (2018) တွင်လည်း တတိယ ဆုရရှိထားသည်။
ထို့အပြင် အီဂျစ်နိုင်ငံက အိမ်ရှင်အဖြစ်လက်ခံ ကျင်းခဲ့သည့် Egypt International Series 2018 ပြိုင်ပွဲတွင် အမျိုးသမီး တစ်ဦးချင်းဖိုင်နယ်ပွဲစဉ်တွင် ချန်ပီယံရွှေတံဆိပ်ဆု ဆွတ်ခူးရရှိထားသူဖြစ် သည်။
The post ယူဂန်ဒါ နိုင်ငံတကာ ကြက်တောင် ပြိုင်ပွဲ၌ “သက်ထားသူဇာ” ရွှေတံဆိပ်ဆု ဆွတ်ခူး appeared first on ဧရာဝတီ.