ကလပ်အသင်းနှင့် ဆိုသော်လည်း ရရှိ ဆုတံဆိပ် နိုင်ငံကိုယ်စားပြု ဟု သွန်းမိုးမေ ပြော

မြန်မာနိုင်ငံ ရေကူးအဖွဲ့ချုပ်ထံမှ ထောက်ခံချက်မရခဲ့၍ ကလပ်အသင်း အနေဖြင့်သာ သွားရောက် ယှဉ် ပြိုင်ခဲ့ရ သော်လည်း ရရှိခဲ့သည့် ဆုတံဆိပ်မှာ နိုင်ငံတော်ကိုယ်စားပြုပင်ဖြစ်ကြောင်း ရေကူးလက်ရွေး စင် မသွန်းမိုးမေက ပြောသည်။

ရေကူးလက်ရွေးစင် မသွန်းမိုးမေသည် အကြိမ် ၅၀ မြောက် စင်ကာပူ တံခွန်စိုက် နိုင်ငံတကာ သက်တမ်းအလိုက် ရေကူး ပြိုင်ပွဲတွင် Aqua King Swimming Club ကို ကိုယ်စားပြုကာ အသက် ၁၂နှစ်အောက် မီတာ ၄၀၀ အလွတ်ကူး ပြိုင်ပွဲတွင်  ၅း၀၀း၈၀ စက္ကန့်ဖြင့် တတိယ ဆု ရရှိခဲ့ခြင်းဖြစ်သည်။

“ထိုင်းမှာပြိုင်ဖူးပေမယ့် စင်္ကာပူမှာက ပိုအဆင့်မြှင့်တော့ ပိုခက်ပါတယ်။ ကိုယ့်ထက်သာတဲ့သူတွေနဲ့ ကူးရတာဆိုတော့ အ တွေ့အကြုံလည်း အများကြီးရပါတယ်၊ ပြိုင်ပွဲသွားဖို့ နိုင်ငံတော်ကတော့ ဘာမှ တော့ ကူညီထောက်ပံ့တာ မျိုးမရှိပါဘူး ကိုယ့် စရိတ်နဲ့ ကိုယ် သွားရပေမယ့် ဆုကတော့ နိုင်ငံတော်ကိုယ်စားပြုပါပဲ”ဟု ၎င်းက ပြောသည်။

မသွန်းမိုးမေသည် ၂၀၁၈ ခုနှစ် ဒီဇင်ဘာလအတွင်းက ထိုင်းနိုင်ငံ၊ ဘန်ကောက်မြို့တွင် ကျင်းပခဲ့သည့် ထိုင်းဘုရင့် သမီးတော် ချူလာဟွန် ဖိတ်ခေါ် ရေကူးပြိုင်ပွဲတွင်လည်း တဦးတည်းအနေဖြင့် ရွှေတံဆိပ် ၂ ခု၊ ငွေတံဆိပ် ၃ ခုနှင့် ကြေးတံဆိပ် ၄ ခုတို့ကို ရယူနိုင်ခဲ့သူလည်းဖြစ်သည်။

ယခုစင်္ကာပူနိုင်ငံတွင် ကျင်းပခဲ့သည့် ပြိုင်ပွဲကို ရုရှား၊ ဂျပန်၊ ဟန်ဂေရီ၊ အိန္ဒိယ၊သြစတေးလျ၊ ဘင်္ဂလားဒေ့ရှ်၊ ထိုင်း၊ ဗီယက် နမ်၊ မလေးရှား၊ အင်ဒိုနီးရှား၊ဖိလစ်ပိုင်နှင့် စင်္ကာပူနိုင်ငံတို့ရှိမှ ရေကူးကစားသမား ၇၉၇ ဦးဝင်ရောက်ယှဉ်ပြိုင်ခဲ့ကြပြီး မြန်မာနိုင်ငံမှ ၅ ဦးပါဝင်ယှဉ်ပြိုင်ခဲ့ကြသည်။

ပြည်တွင်း ရေကူးပြိုင်ပွဲများအနေဖြင့် တနှစ် တကြိမ်ပြုလုပ်ရန်ပင် မသေချာသည့်အခြေအနေတွင် ရေကူးလက်ရွေးစင် ကစားသမား၏ စံချိန်အရည်အသွေး သိရှိရန်နှင့် နိုင်ငံတကာ အတွေ့အကြုံများ ရရှိရန် ပြိုင်ပွဲသို့သွား ရောက်ယှဉ်ပြိုင် ခဲ့ခြင်းဖြစ်ကြောင်း ရေကူးနည်းပြဖြစ်သူ ဦးမောင်မောင်စိန်က ပြောသည်။

“ဒီပြိုင်ပွဲမှာ ဆီးဂိမ်က လူတွေပါ ပါလာတော့ ဆီးဂိမ်းသက်တမ်း အလိုက် ပြိုင်ပွဲလို့ပဲ ယူဆတယ်။ နောက်ပြီး ဒီပြိုင်ပွဲက ရမှတ်တွေကို သတ်မှတ်ပြီး ကမ္ဘ့ာရေကူး အဖွဲ့ချုပ်က အဆင့် သတ်မှတ်ပေး တာတွေရှိတယ်။ အဲ့ဒါမှလည်း ကိုယ့်ကလေး တွေရဲ့ စံချိန် အဆင့်အတန်းကို သိရမှာပါ၊ ကစားပွဲထဲမှာ ကလေးတွေရခဲ့တဲ့ အတွေ့အကြုံကတော့ တန်းဖိုးမဖြတ်နိုင် အောင်ပါပဲ” ဟု ပြောသည်။

လက်ရွေးစင် ရေကူးကစားသမားများ၏ အရည်အသွေး တိုးတက်လာရေးအတွက် နိုင်ငံတကာ သက်တမ်း အလိုက် ပြိုင်ပွဲ များသို့ စေလွှတ် ယှဉ်ပြိုင် နိုင်ရေးအတွက် ရေကူးအဖွဲ့ချုပ် အနေဖြင့် ဆောင်ရွက်စေလိုကြောင်းနှင့် ကစားသမားများ၏ အခက်အခဲများကို ပစ်မထားဖို့ မျှော်လင့်ကြောင်း ၎င်းက ဆက်လက်ပြောကြားသည်။

Aqua King Swimming Club(ရေဘုရင် ရေကူးအသင်း)မှာ ၁၉၇၈ ခုနှစ်တွင် စတင်တည်ထောင် ခဲ့ သည့် အသင်းဖြစ်ပြီး ရေကူး အားကစား တိုးတက်ရေးနှင့် မျိုးဆက်သစ် ကစားသမားများ ပျိုးထောင် မွေးထုတ်နိုင်ရေးအတွက် ၂၀၁၈ ခုနှစ် ဇန်နဝါရီလတွင် အသင်းပြန်လည်စုဖွဲ့ကာ ဆောင်ရွက်လျှက် ရှိသည်။

မြန်မာနိုင်င ံရေကူး အဖွဲ့ချုပ်အတွင်း ရွေးကောက်ပွဲနှင့် ပတ်သက်၍ အငြင်းပွားမှုများ ရှိနေပြီး ကန့်ကွက်မှုများနှင့် လွှတ်တော်ရှိ ကျန်းမာရေးနှင့် အားကစားမြှင့်တင်ရေး ကော်မတီတို့ထံ တင်ပြတိုင်ကြားမှုများလည်း ရှိထားကြောင်း တိုင်ကြားထားသူများကပြောသည်။

ဆက်စပ်ဖတ်ရှု့ရန် – ရေကူးအားကစား ဘာကြောင့် ခေါင်းမထောင်နိုင်သလဲ

The post ကလပ်အသင်းနှင့် ဆိုသော်လည်း ရရှိ ဆုတံဆိပ် နိုင်ငံကိုယ်စားပြု ဟု သွန်းမိုးမေ ပြော appeared first on ဧရာဝတီ.