မြန်မာ့ လက်ဝှေ့ ချန်ပီယံဆု အပါအဝင် ချန်ပီယံ ခါးပတ် ၃ ခု ဒေ့ဗ်လက်ဒပ် စွန့်လွှတ်

မြန်မာ့ရိုးရာ လက်ဝှေ့ ကမ္ဘာ့ ချန်ပီယံဆု အပါအဝင် လက်ဝှေ့ ချန်ပီယံ ခါးပတ် ၃ ခုကို စွန့်လွှတ်လိုက် ကြောင်း ကနေဒါ နိုင်ငံသား ဒေ့ဗ် လက်ဒပ် က ယမန်နေ့တွင် ရန်ကုန်မြို့၊ ကရဝိတ် ဟိုတယ် သတင်း စာ ရှင်းလင်းပွဲ၌ ကြေညာခဲ့သည်။

World Lethwei Championship (WLC) နှင့် စာချုပ် ချုပ်ဆိုခဲ့သည့် အတွက် ၎င်း ရရှိထားသည့် မြန်မာ့ ရိုးရာလက်ဝှေ့ ကမ္ဘာ့ ချန်ပီယံ (MWLC)၊ နိုင်ငံတကာ လက်ဝှေ့ အဖွဲ့ချုပ် (ဂျပန်)ILFJ ချန်ပီယံ နှင့် Air KBZ အောင်လံ ချန်ပီယံဘွဲ့ ၃ ခုကို စွန့်လွှတ်ခဲ့ခြင်း ဖြစ်ကြောင်း ချန်ပီယံဟောင်း ဒေ့ဗ် က ပြောသည်။

ဒေ့ဗ်လက်ဒပ်က “၂၀၁၉ မတ် ၉ ရက်မှာ WLC နဲ့ ကျနော် စာချုပ်ချုပ်ခဲ့တယ်။ အရည်အသွေးမြင့်၊ စိတ်လှုပ်ရှားစရာ ပွဲစဉ် တွေ သူတို့ တင်ဆက်တာနဲ့ Canal + ၊ UFC Fight Pass တို့နဲ့ ပူးပေါင်းပြီး လက်ဝှေ့ကို ကမ္ဘာက သိအောင် ကြိုးစားနေ တာတွေ ကျနော် သဘောကျတယ်။ ဒီတော့ ကျနော်က လက်ဝှေ့ရဲ့ တခြား ချန်ပီယံဘွဲ့တွေကို ကာကွယ်နိုင်တော့မှာ မဟုတ်ဘူး။ အဲဒီဘွဲ့တွေ ဖြုတ်လိုက်ဖို့ ခက်ခက်ခဲခဲ ဆုံးဖြတ်ခဲ့ရပါတယ်။ MWLC ချန်ပီယံ၊ ILFJ ချန်ပီယံနဲ့ Air KBZ အောင်လံ ချန်ပီယံနေရာတွေက အခုဆိုရင် လစ်လပ်သွားပြီ ဖြစ်တယ်” ဟု ပြောဆိုသွားသည်။

မြန်မာမှုကို ချစ်မြတ်နိုးသည့် အတွက် မြန်မာ အမည် ဒေဝ အဖြစ် ခံယူထားသူ ကနေဒါ နိုင်ငံသား ဒေ့ဗ်လက်ဒပ်မှာ ၂၀၁၆ ခုနှစ် ဒီဇင်ဘာလက ကျင်းပခဲ့သည့် Air KBZ အောင်လံ ပြိုင်ပွဲတွင် မြန်မာ့ရိုးရာ လက်ဝှေ့ အလွတ်တန်း ချန်ပီယံ ထွန်းထွန်း မင်းကို အနိုင်ရကာ Air KBZ အောင်လံ ခါးပတ်ကို ရရှိခဲ့ သလို မြန်မာ့ ရိုးရာ လက်ဝှေ့ အလွတ်တန်း ချန်ပီယံဆု ရယူနိုင်ခဲ့ သည့် ပထမဆုံးသော နိုင်ငံခြားသား ဖိုက်တာ အဖြစ် မှတ်တမ်း ဝင်ခဲ့သည်။

ဒေ့ဗ်လက်ဒပ်မှာ ၂၀၁၇ ခုနှစ် ဇွန်လတွင် ဂျပန်နိုင်ငံ တိုကျိုမြို့၌ ကျင်းပသည့် Lethwei in Japan – 4 ; FRONTIER ပြိုင် ပွဲတွင် မြန်မာနိုင်ငံကို ကိုယ်စားပြု၍ ထိုင်းနိုင်ငံသား မွေ့ထိုင်း လက်ဝှေ့ ဖိုက်တာကို ထိုးသတ်ခဲ့ရာ ဒုတိယ အချီမှာပင် အလဲ ထိုး၍ အနိုင်ရရှိခဲ့သည့် အတွက် ၎င်း၏ တတိယမြောက် ချန်ပီယံ ခါးပတ် ဖြစ်သည့် ILFJ ချန်ပီယံဘွဲ့ကို ရရှိခဲ့သည်။

မြန်မာရိုးရာ လက်ဝှေ့ ချန်ပီယံဘွဲ့ကို မြန်မာနိုင်ငံသားများသာ ရရှိစေလို သဖြင့် ဒေ့ဗ်ကို WLC က စာချုပ်ချုပ် ဆိုကာ ၎င်း ရရှိထားသည့် မြန်မာ့ရိုးရာ လက်ဝှေ့ အလွတ်တန်း ချန်ပီယံဘွဲ့ကို စွန့်လွှတ်စေခဲ့ခြင်း ဖြစ်ကြောင်း WLC ဥက္ကဋ္ဌ ဦးဇေသီ ဟက ပြောသည်။

ဦးဇေသီဟက “ကျနော်တို့ရဲ့ခံယူချက်ကတော့ မြန်မာပြည် ချန်ပီယံသည် မြန်မာနိုင်ငံသား ဖြစ်ရမယ် ဆိုတဲ့ ခံယူချက် အပြည့် ရှိပါတယ်။ အဲဒါကြောင့် ၂၀၁၆ နှစ်ကုန်ပိုင်း ကစပြီးတော့ အမျိုးမျိုးပြောင်းလဲ ဖို့၊ ပြုပြင်ဖို့ ကြိုးစားပါတယ်။ မရတဲ့ အဆုံးမှာ နောက်ဆုံး နည်းဖြစ်တဲ့ ဒီနည်းက အောင်မြင်သွား တယ်လို့ ပြောလို့ရပါတယ်” ဟု ပြောဆိုသည်။

၎င်းက ဆက်လက်၍ “ဒေ့ဗ်ကို စာချုပ်ချုပ်တယ်။ ချုပ်ပြီးတော့ မြန်မာပြည် အလွတ်တန်း ချန်ပီယံ ဆိုတဲ့ အနေအထားကို စွန့်လွှတ်လိုက် ပြီးတော့ ကျနော်တို့ မြန်မာနိုင်ငံသားချင်း ပြန်ပြိုင်မယ့် လမ်းကြောင်းပေါ်ကို ပြန်တင်ပေးလိုက်တဲ့ အနေ အထားမျိုးပါ။ ဒေ့ဗ်ကိုယ်တိုင်က လိုလိုလားလား လက်ခံပြီးတော့ ဒီပွဲကို စီစဉ်လိုက်တာပါ” ဟု ရှင်းပြ ပြောဆိုသွားသည်။

ဒေ့ဗ် အနေဖြင့် ၂၀၁၆ ခုနှစ်တွင် မြန်မာ့ရိုးရာ လက်ဝှေ့ အလွတ်တန်း ချန်ပီယံ ဖြစ်ပြီးနောက်၂၀၁၇ နှင့် ၂၀၁၈ ခုနှစ် အတွင်း ဆိုင်းရပ် (ဝါရှင်တန်) နှင့် ချန်ပီယံဟောင်း ထွန်းထွန်းမင်း တို့ ပွဲစဉ် အပါအဝင် ချန်ပီယံခါးပတ် ကာကွယ်ပွဲ ၇ ပွဲ ထိုးသတ်ကာ ချန်ပီယံဘွဲ့ကို ကာကွယ်နိုင်ခဲ့သူ ဖြစ်သည်။

ချန်ပီယံဟောင်း ဒေ့ဗ်က “ကျနော်က လက်ဝှေ့ ကမ္ဘာ့ချန်ပီယံ အဖြစ်နဲ့ ရှုံးပွဲ မရှိထားတော့ WLC က ကျနော့် အတွက် စီစဉ်ပေးမယ့် ဘယ်လို စိန်ခေါ်မှုမျိုး မဆို အမြဲ လက်ခံသွားမှာပါ။ ကျနော့်ကို စိန်ခေါ် ချင်တဲ့သူ ရှိရင် WLC နဲ့ ဆွေးနွေးလို့ ရပါတယ်။ ကျနော် ကြိုးစားသမျှတွေကို အားပေးတဲ့ ပရိတ်သတ် အားလုံးကို ကျေးဇူးတင်ပါတယ်။ ချန်ပီယံ အဖြစ်နဲ့ နွေးနွေး ထွေးထွေး ကြိုဆိုပေးတဲ့ မြန်မာနိုင်ငံကို ကျေးဇူးတင်ပါတယ်” ဟု ပြောသည်။

WLC အဖွဲ့ အနေနှင့် မြန်မာ့ရိုးရာ လက်ဝှေ့ ချန်ပီယံဟောင်း ဒေ့ဗ်ကို စာချုပ် ချုပ်ဆိုပြီးနောက် ပွဲဦးထွက် အနေဖြင့် UFC ဖိုက်တာဟောင်း တဦးနှင့် မြန်မာ့ရိုးရာ လက်ဝှေ့ စည်းကမ်းများ အတိုင်း ထိုးသတ်ရန် စီစဉ် ဆောင်ရွက်နေကြောင်း သိရ သည်။

မြန်မာမှုကို ချစ်မြတ်နိုး သဖြင့် မြန်မာ့ ရိုးရာ အတိုင်း ရန်ကုန်မြို့တွင် မင်္ဂလာဆောင်ပြီး ဇနီးဖြစ်သူနှင့် အခြေချ နေထိုင် လျက် ရှိသည့် ဒေ့ဗ်မှာ မြန်မာ့ရိုးရာ လက်ဝှေ့ အလွတ်တန်း ချန်ပီယံ ဖြစ်ပြီးနောက်၂ နှစ်ကျော် ကာလ အတွင်း ကနေဒါ၊ ဆိုက်ပရပ်စ်၊ ဒူဘိုင်း၊ တူရကီ၊ အီတလီ၊ စပိန်၊ အင်္ဂလန်၊ ပေါ်တူဂီ၊ ချက်၊ ဆလိုဗက်ကီးယား၊ နော်ဝေ၊ ဒိန်းမတ်နှင့် အိုက် စလန် နိုင်ငံများတွင် မြန်မာ့ရိုးရာ လက်ဝှေ့ ပညာ သင်ကြားမှုများ ဆောင်ရွက်ခဲ့သူ တဦးလည်း ဖြစ်သည်။

ဆက်စပ်ဖတ်ရှုရန်

ဒေဝရဲ့ချန်ပီယံခါးပတ် ထွန်းထွန်းမင်း လုယူနိုင်မလား

The post မြန်မာ့ လက်ဝှေ့ ချန်ပီယံဆု အပါအဝင် ချန်ပီယံ ခါးပတ် ၃ ခု ဒေ့ဗ်လက်ဒပ် စွန့်လွှတ် appeared first on ဧရာဝတီ.