အန္ဒိယနိုင်ငံက အိမ်ရှင်အဖြစ် လက်ခံကျင်းပသည့် အာရှ ဘိလိယက်ပြိုင်ပွဲတွင် မြန်မာနိုင်ငံမှ ကိုနေသွေးဦး က ထိုင်နိုင်ငံမှ ကမ္ဘာ့ချန်ပီယံဟောင်း တဦးဖြစ်သူ Praprut Chaithanasakun အား ၆-၂ ဖြင့်အနိုင်ရရှိကာ ချန်ပီယံဆုအား ရှိခဲ့သည်။
အာရှဘိလိယက်ချိန်ပီယံဆုအား ၂၀၀၆ ခုနှစ် ဦးအောင်ဆန်းဦးက ရရှိခဲ့ပြီးနောက် ၁၃ နှစ်အကြာတွင် ကိုနေသွေးဦးက ထပ်မံရယူနိုင်ခဲ့ခြင်းဖြစ်သည်။
မြန်မာနိုင်ငံ ဘိလိယက်နှင့် စနူကာအဖွဲ့ချုပ် အတွင်းရေးမှူး ဦးခင်မောင်ဦး က “ဒီပြိုင်ပွဲမှာ အင်္ဂလန်မပါတာကလွဲရင် ကမ္ဘာ့ချိန်ပီယံတွေ ပြိုင်တဲ့ပွဲပါ၊ ပြိုင်ပွဲတလျှောက် ရှုံးပွဲမရှိဘဲ ချန်ပီယံဆုကို ထိုက်ထိုက်တန်တန်ရခဲ့တာပါ” ဟု ပြောသည်။
ပြိုင်ပွဲသို့ အန္ဒိယ၊ တရုတ်၊ ဟောင်ကောင်၊စင်္ကာပူ၊ မြန်မာ၊ ဆီရီးယား၊ အီရန်၊ ထိုင်း၊ နီပေါနှင့် ကာတာ တို့မှ ကစားသမားများ ဝင်ရောက်ယှဉ်ပြိုင်ခဲ့ပြီး ဘိလိယက်နှင့်စနူကာ ကစားနည်းများတွင် မြန်မာနိုင်ငံမှ ကိုနေသွေးဦး အပါအဝင် ကစားသမား ၅ ဦးဝင်ပြိုင်ခဲ့သည်။
၂၀၁၈ ခုနှစ် နိုဝင်ဘာလတွင် ကျင်းပခဲ့သည့် ကမ္ဘာ့ ဘိလိယက်နှင့် စနူကာ ချန်ပီယံရှစ်ပြိုင်ပွဲတွင် ကိုနေသွေးဦးသည် အန္ဒိယနိုင်ငံမှ ကမ္ဘာ့ချန်ပီယံ Pankaj Advani အား ရှုံးနိမ့်ကာ ဒုတိယဆုဖြင့် ကျေနပ်ခဲ့ရသည်။
ယခုပြိုင်ပွဲတွင် Pankaj Advani သည် မြန်မာနိုင်ငံမှ လက်ရွေးစင်ကစားသမား ကိုချစ်ကိုကိုနှင့်အတူ ပူးတွဲတတိယဆုသာ ရရှိခဲ့သည်။
အာရှ ဘိလိယက်နှင့်စနူကာပြိုင်ပွဲအား ၂၀၁၈ ခုနှစ်တွင် မြန်မာနိုင်ငံက အိမ်ရှင်အဖြစ်လက်ခံကျင်းပခဲ့ရာ၌ ဘိလိယက်ကစားနည်းတွင် ဆုတံဆိပ်ရရှိခြင်းမရှိသော်လည်း စနူကာကစားနည်းတွင် ကိုအောင်ဖြိုးက ချိန်ပီယံဖြစ်ခဲ့ကြောင်း သိရသည်။
ဆီးဂိမ်းပြိုင်ပွဲတွင် ဆုတံဆိပ်များရရှိရေးအတွင် ကြိုးပမ်းပြင်ဆင်နေသည့် မြန်မာနိုင်ငံ ဘိလိယက်နှင့်စနူကာ အဖွဲ့ချုပ်အနေဖြင့် လာမည့် စက်တင်လာလတွင်လည်း ကမ္ဘာ့ ဘိလိယက်နှင့် စနူကာပြိုင်ပွဲကို မန္တလေးမြို့တွင် အိမ်ရှင်အဖြစ် လက်ခံကာ ကျင်းပမည်ဖြစ်ကြောင်းလည်း သိရသည်။
The post ၁၃ နှစ်ကြာ ဝေးကွာနေသည့် အာရှ ဘိလိယက်ချန်ပီယံဆု နေသွေးဦးရရှိ appeared first on ဧရာဝတီ.