နိုင်ငံတကာ စစ်တုရင်ဖိတ်ခေါ် ပြိုင်ပွဲ နေပြည်တော်တွင် ကျင်းပမည်

နိုင်ငံတကာ စစ်တုရင်ဖိတ်ခေါ်ပြိုင်ပွဲ (Soe International Open 2019) ကို မြန်မာနိုင်ငံ စစ်တုရင်အဖွဲ့ချုပ်နှင့် စိုးလျှပ်စစ် ဖောင်ဒေးရှင်းတို့ ပူးပေါင်းစီစဉ်မှုဖြင့် နေပြည်တော်၊ ပျဉ်းမနားမြို့ရှိ သုခစိုးဟိုတယ်တွင် မေလ ၉ ရက် မှ ၁၆ ရက်အထိ ကျင်းပသွားမည်ဖြစ်သည်။

ယခုပြိုင်ပွဲကို အိမ်ရှင်အဖြစ် ကျင်းပခြင်းဖြင့် မြန်မာစစ်တုရင ်ကစားသမားများ နိုင်ငံတကာအဆင့် ပွဲကစားသည့် အတွေ့အကြုံရရှိပြီး လက်ရည်အဆင့်အတန်း တိုးတက်လာစေရန်နှင့် အခြေအနေပေးပါက ကမ္ဘာ့စစ်တုရင်အဖွဲ့ချုပ် အသိအမှတ်ပြု အင်တာနေရှင်နယ် မာစတာ၊ ဂရင်းမာစတာစသည့် ဆုများရရှိနိုင်ရန် ရည်ရွယ်ကျင်းပခြင်းဖြစ်ကြောင်း မြန်မာနိုင်ငံ စစ်တုရင်အဖွဲ့ချုပ် ဥက္ကဋ္ဌ ဦးမောင်မောင်လွင် က ပြောသည်။

စိုးလျှပ်စစ် ဖောင်ဒေးရှင်း အနေဖြင့် ၂၀၁၇ ခုနှစ်ကလည်း ယခုကဲ့သို့ နိုင်ငံတကာ စစ်တုရင် ဖိတ်ခေါ်ပြိုင်ပွဲကို ကျင်းပပေးခဲ့ပြီး နိုင်ငံကိုယ်စားပြုမှ နိုင်ငံဂုဏ်ဆောင် ကစားသမားများ ပေါ်ထွက်လာရေး အတွက် ရည်ရွယ်ကျင်းပပေးခြင်း ဖြစ်ကြောင်း ယင်းဖောင်ဒေးရှင်းမှ အတွင်းရေးမှူး ဦးအောင်မြင့်ထွန်းက ပြောသည်။

ယခုပြိုင်ပွဲသို့ ဝင်ရောက် ယှဉ်ပြိုင်ရန် အိန္ဒိယ၊ ဖိလစ်ပိုင်၊ ဥဇဘက်ကစ္စတန်၊ ဆာဘီးယား၊  အင်ဒိုနီးရှား၊ မလေးရှား၊ ပိုလန်၊ သြစတေးလျတို့မှ ကစားသမားများက စာရင်းပေးထားပြီး ဂရင်းမာစတာနှင့် အင်တာနေရှင်နယ် မာစတာ ၁၄ ဦးခန့် အနည်းဆုံး ပါဝင်ယှဉ်ပြိုင်မည်ဖြစ်ကြောင်း သိရသည်။

ပြည်တွင်းကစားသမားအနေဖြင့်  ထိပ်သီးကစားသမားများဖြစ်သော ဝင်းဇော်ထွန်း၊ နေဦးကျော်ထွန်း၊ မျိုးနိုင် တို့အပါအဝင် အင်တာနေရှင်နယ် မာစတာကစားသမား ၅ ဦး၊ ကမ္ဘာ့စစ်တုရင် အဖွဲ့ချုပ်မာစတာ အဆင့် ကစားသမားများနှင့် ပြည်နယ်နှင့်တိုင်းများမှ ပဒုတအဆင့် ကစားသမားများ စသည့်ဖြင့် စုစုပေါင်း ကစားသမား ၁၀၀ ခန့် ပါဝင်ကစားမည်ဖြစ်သည်။

ယခုပြိုင်ပွဲသည် ယခင်ကျင်းပခဲ့သည့် ပြိုင်ပွဲများထက် နိုင်ငံံတကာ စိတ်ဝင်စားမှုပိုရပြီး ပြည်ပမှ လက်ရည်မြင့် ကစားသမားများ ပိုမိုလာရောက်ကစားခြင်းနှင့် ပြည်တွင်းကစားသမားများ ပိုမိုပါဝင် ယှဉ်ပြိုင်မည်ဖြစ်၍ အားရကျေနပ်စရာဖြစ်သည်ဟု စစ်တုရင်အဖွဲ့ချုပ် ဥက္ကဋ္ဌ ဦးမောင်မောင်လွင်က ပြောသည်။

စစ်တုရင်အဖွဲ့ချုပ် ဥက္ကဋ္ဌ ဦးမောင်မောင်လွင် က “ဒီပွဲက ပိုကျပ်၊ ပိုပြင်းထန်ပါမယ်။ မြန်မာကစားသမားတွေ အနေနဲ့  အဆင့် ၁ ကနေ ၅ အတွင်း ဝင်တယ်ဆိုရင် တော်တော်ကြီးမားတဲ့ အောင်မြင်မှုဖြစ်နေပါပြီ။ ဒါပေမယ့် ဆုလည်း ရနိုင်ပါတယ်။ နောက်တခုက မြန်မာကစားသမားတွေ အနေနဲ့ အဖိုးတန်တဲ့ အခွင့်အရေးက ဆုကြေးတင် မဟုတ်ပါဘူး။ လက်ရည် အဆင့်မြင့်ဖို့ ဂရင်းမာစတာ အင်တာနေရှင်နယ်မာစတာစွမ်းဆောင်ရည်ရဖို့ အခွင့်အရေး တရပ်ပါ”ဟု ပြောသည်။

ပြိုင်ပွဲဝင်မည့် မြန်မာကစားသမားများအနေဖြင့်လည်း လိုအပ်သော ကြိုတင်ပြင်ဆင်မှုများ ပြုလုပ်ထားကြောင်းလည်း သိရသည်။

မြန်မာ့လက်ရွေးစင်၊ အင်တာနေရှင်နယ်မာစတာ ကိုနေဦးကျော်ထွန်း က “ပြင်ဆင်မှုအနေနဲ့ လောလောဆယ် စာရင်းပေးထားတဲ့ ဂရင်းမာစတာ၊ အင်တာနေရှင်နယ် မာစတာတို့ရဲ့ ကစားပွဲတွေကို ချက်ဒေတာဘေ့စ်ကနေ ကြည့်ပြီး အားနည်းချက် အားသာချက်တွေကို လေ့လာပြီး ယှဉ်ြ့ပိုင်ဖို့ ပြင်ဆင်နေပါတယ်။ နောက် ကျနော် အရင်ကစားခဲ့တဲ့ အင်တာနေရှင်နယ် ကစားပွဲမှာ ပြိုင်ခဲ့တဲ့ ပြိုင်ပွဲတွေရဲ့ အားသာချက် အားနည်းချက်တွေကို ကွန်ပျူတာရဲ့ အကူအညီနဲ့ ပြန်လေ့လာပြီး ကစားသွားမှာ ဖြစ်ပါတယ်”ဟု ပြောသည်။

ပြိုင်ပွဲသို့ နိုင်ငံတကာမှ အဆင့်မြင့်ကစားသမားလာရောက်ယှဉ်ပြိုင်ရန် ဖိတ်ကြားခဲ့ပြီး လာရောက် ကစားကြေးအဖြစ် ပေးနိုင်ခြင်းမရှိသော်လည်း ခရီးစရိတ်နှင့် တည်းခိုနေထိုင် စားသောက် စားရိတ်များကို ပံ့ပိုးပေးမည်ဟု ကမ်းလှမ်းခဲ့ကြောင်း သိရသည်။

နိုင်ငံတကာအဆင့်နှင့် လျော်ညီစွာ ကျင်းပနိုင်ရေးအတွက် ပြိုင်ပွဲဆုကြေးငွေအဖြစ် စုစုပေါင်း  ဒေါ်လာ ၁၅၀၀၀၊ ပြိုင်ပွဲကျင်းပစရိတ် ကျပ်သိန်း ၁၀၀ ခန့်ကို စိုးလျှပ်စစ်က ကူညီပံ့ပိုးပေးခြင်းဖြစ်သည်။

ဆုအနေဖြင့် ပထမဆု ဒေါ်လာ ၃ ထောင် ဒုတိယ ဒေါ်လာ ၁၆၀၀၊ တတိယ ဒေါ်လာ ၁၄၀၀ တို့အပြင် အကောင်းဆုံး မြန်မာကစားသမားဆုများ၊ စီနီယာကစားသမားဆုများ၊ လူငယ်ကစားသမားဆုများ ချီးမြင့်မည်ဖြစ်သည်။

ယခုကဲ့သို့ စစ်တုရင် နိုင်ငံတကာဖိတ်ခေါ်ပြိုင်ပွဲများကို မြန်မာနိုင်ငံက အိမ်ရှင်အဖြစ် ၂၀၁၁ ခုနှစ်၊ ၂၀၁၄ ခုနှစ်နှင့် ၂၀၁၅ ခုနှစ်တို့တွင် ကျင်းပခဲ့ဖူးသည်။

မြန်မာနိုင်ငံသည် စစ်တုရင်အားကစားတွင် အာဆီယံအဆင့်ဆိုပါက ထိုင်းနိုင်ငံထက် သာသည့် အခြေအနေတွင်ရှိသော်လည်း  စစ်တုရင်ထိပ်သီး ကစားသမားများရှိသည့်  ဗီယက်နမ် ၊ ဖိလစ်ပိုင်နှင့်  အင်ဒိုရှားနိုင်ငံများနောက်တွင် ရပ်တည်နေကြောင်း၊ အာရှအဆင့် ကမ္ဘာ့အဆင့်သို့ ထိုးဖောက်နိုင်ရန်အတွက် အလှမ်းဝေးသည့် အနေအထားတွင် ရှိနေကာ အချိန်ယူ ကြိုးပမ်းရမည့် အနေအထားဖြစ်ကြောင်း စစ်တုရင်အဖွဲ့ချုပ်ဥက္ကဋ္ဌ၏ ပြောကြားချက်အရ သိရသည်။

The post နိုင်ငံတကာ စစ်တုရင်ဖိတ်ခေါ် ပြိုင်ပွဲ နေပြည်တော်တွင် ကျင်းပမည် appeared first on ဧရာဝတီ.