အင်္ဂလိပ်ပရီးမီးယားလိဂ်ကလပ်မှ ခရစ္စတယ် ပဲလေ့စ် အသင်းကို ထိုင်းဝန်ကြီးချုပ်ဟောင်း သက်ဆင်ရှင်နာဝပ်ထရာက လွှဲပြောင်းရယူရန် ညှိနှိုင်းနေကြောင်း Bangkok Post သတင်းကဆိုသည်။
ထိုင်းလိဂ်မှ Chiangrai United ဥက္ကဋ္ဌဟောင်း မီတီတီယာ ပိုင်ရက်က ONE 31 ချန်နယ်သို့ ပြောကြားရာတွင် “အခု လတ်တလောကတော့ ဈေးနှုန်းရယ်၊ စီမံခန့်ခွဲမှုရယ်၊ တခြားအသေးစိတ်ကိစ္စတွေ ညှိနေတုန်းပါ။ မကြာခင် ခိုင်ခိုင်မာမာ အတိအကျသိရပါတယ်။ စလင်ပေါင်သန်း ၁၅၀ ဝန်းကျင်နဲ့ သဘောတူထားပါတယ်” ဟု ရှင်းပြသည်။
အကယ်၍ ယင်းအသင်းကို လွှဲပြောင်းယူဖြစ်ခဲ့လျှင် မီတီက လန်ဒန်ကလပ်တွင် အမှုဆောင်တဦးဖြစ်လာမည်ဟု အစောပိုင်းသတင်းများက ဆိုသည်။
“ ကျနော် တာဝန်ယူပေးရမယ့်သဘောပါ” ဟု ရုပ်သံချန်နယ်သို့ မီတီ၏ပြောကြားချက်ကို ကိုးကားလျက် goal.com က သတင်းဖော်ပြသည်။
“သိသိသာသာ စိန်ခေါ်မှုရှိတဲ့အခန်းကဏ္ဍဆိုပေမယ့်လည်း Chiangrai United ကို စီမံခန့်ခွဲရတုန်းကတည်းက ကျနော် ကျွမ်းကျင်ပြီးသားအလုပ်ဖြစ်ပါတယ်။ သူတို့ဟာ နောက်ထပ် အဆင့်အတန်းမှာ ရှိနေပါပြီ။ ဒါပေမယ့် ကမ္ဘာ့အဆင့်မီ ဘောလုံးကလပ်အသင်း ပိုင်ဆိုင်ရဖို့ ကျနော့်အတွက်ရော၊ ထိုင်းပြည်သူတွေအတွက်ရော ကျေနပ်စရာဖြစ်နေတုန်းပါ”ဟု Chiangrai United ဥက္ကဋ္ဌဟောင်း မီတီတီယာ ပိုင်ရက် က ဆိုသည်။
၂၀၀၆ ခုနှစ်တွင် အာဏာသိမ်းခံရသော အစိုးရအဖွဲ့ခေါင်းဆောင် သက်ဆင်သည် ၂၀၀၇ ခုနှစ်ကလည်း ယခု ချန်ပီယံဖြစ်ခဲ့သည့် မန်ချက်စတာစီတီးအသင်းကို ဝယ်ယူခဲ့ပေမယ့် ၂၀၀၈ ခုနှစ်တွင် ရှိတ်မန်ဆွာထံသို့ ပြန်လည်ရောင်းချခဲ့သည်။
ရှိတ်မန်ဆွာ၏လက်ဝယ်ရှိ မန်ချက်စတာ စီးတီးအသင်းသည် ပြီးခဲ့သည့် တနင်္ဂနွေနေ့က ဘရိုက်တန်ကို ၄ဂိုး ၁ဂိုးဖြင့် နိုင်ကာ ပရီးမီးယားလိဂ် ချန်ပီယံဖြစ်ခဲ့သည်။ ဤသည်မှာ နှစ် နှစ်ဆက်တိုက် ချန်ပီယံရရှိခြင်းဖြစ်သည်။
မန်ချက်စတာစီးတီးကို လွှဲပြောင်းမယူမီက သက်ဆင်သည် ဖူလ်ဟမ်နှင့်လီဗာပူးအသင်းတို့ကို ဝယ်ရန် ကြိုးစားခဲ့သေး သည်ဟု ဆိုသည်။
ယခုလည်း ပဲလေ့စ်အသင်း လက်ဝယ်ရောက်ရှိပါက အလားတူ အောင်မြင်မှုအခြေခံများ ရလိမ့်မည်ဟု သက်ဆင်က မျှော်လင့်ထားကြောင့် goal.com က သတင်းရေးသားသည်။
The post ပရီးမီးယားလိဂ်မှ ခရစ္စတယ် ပဲလေ့စ် ကို လွှဲယူရန် သက်ဆင် ညှိနှိုင်းနေ appeared first on ဧရာဝတီ.