ရခိုင် ယူနိုက်တက် အသင်းအား တိုက်ရိုက် ထုတ်လွှင့်စဉ် အစီအစဉ် ကြေညာသူမှ ဆဲဆိုခဲ့မှု အပေါ် မြဝတီ ရုပ်မြင်သံကြား မှ အနူးအညွတ် တောင်းပန်ကြောင်းနှင့် အရေးယူသွားမည် ဖြစ်ကြောင်း ယနေ့ ညနေပိုင်းတွင် သတင်း ထုတ်ပြန်ထား သည်။
မေလ ၂၅ ရက်က ယှဉ်ပြိုင် ကစားခဲ့သည့် ဗိုလ်ချုပ် အောင်ဆန်းဒိုင်း ပြိုင်ပွဲ ဆီမီးဖိုင်နယ် ပွဲစဉ်၌ ရှမ်းယူနိုက်တက် အသင်း နှင့် ရခိုင် ယူနိုက်တက် အသင်းတို့၏ ပွဲစဉ် ၁၀ မိနစ် ၃၅ စက္ကန့်တွင် ရှမ်းယူနိုက်တက် အသင်းက အဖွင့်ဂိုး သွင်းယူပြီးနောက် အစီအစဉ် ကြေညာသူ တဦးက ဆဲဆိုခဲ့ခြင်း ဖြစ်သည်။
ရခိုင်ယူနိုက်တက် အသင်း အထွေထွေ မန်နေဂျာ ကိုထွန်းထွန်းဝင်း က “ ဒီနေ့ ကျနော်တို့ကို မြဝတီက တာဝန်ရှိသူတွေ ရော တွေ့ဆုံ ဆွေးနွေးကြပါတယ်။ အရေးယူဖို့ အတွက် အဆင့်ဆင့် စာတင်ထားပြီးလို့လည်း သူတို့က ပြောပါတယ်။ ဘယ်လို အရေးယူမလဲ ဆိုတာတော့ စောင့်ကြည့်ရမှာပါ” ဟု ဧရာဝတီသို့ ပြောသည်။
အဆိုပါ ဆဲဆိုမှုနှင့် ပတ်သက်ပြီး အစီအစဉ် ကြေညာသူ Win Htike ဆိုသူ က “ကျနော့် အနေဖြင့် Slow Motion ပြနေတုန်း အခြား အသံဝင်သွားတာ ဖြစ်ပြီး Live လွှင့်သည့် အခန်းထဲမှ ကျနော့် အနားတွင် ရှိသော မိုက်ခလုတ်ကို အဲဒီအချိန်၌ အပြင် အသံများ မဝင်အောင် မိုက် ခဏ ပိတ်ဖို့ မေ့သွားသော ကျနော့် တဦးတည်းမှာပင် လုံးဝ တာဝန် ရှိပါကြောင်း အားလုံးကို အနူးအညွတ် တောင်းပန်ပါကြောင်း” ကို သူ၏ လူမှုကွန်ရက် စာမျက်နှာတွင် ရေးသားထားသည်။
ဘောလုံး လောက အတွင်းမှ မည်သို့သော လူမျိုးရေး/အသားအရောင် ခွဲခြားမှုကို မဆို အမြစ်ဖြတ် တိုက်ထုတ်ရမည့် အရာ အဖြစ် မြန်မာနေရှင်နယ်လိဂ် (MNL) မှ ရှုမြင်ပြီး ယင်းဖြစ်ရပ်ကိုလည်း ပြင်းထန်စွာ ကန့်ကွက်ကြောင်း MNL က ထုတ် ဖော် ကြေညာခဲ့သည်။
ဆီမီးဖိုင်နယ် ပထမ အကျော့ အဖြစ် ယှဉ်ပြိုင် ကစားခဲ့သည့် ယင်းပွဲစဉ်တွင် ရှမ်းယူနိုက်တက် အသင်းက ရခိုင်ယူနိုက် တက် အသင်းအား ၄ ဂိုး- ဂိုးမရှိဖြင့် အနိုင်ရရှိခဲ့သည်။
You may also like these stories:
ပရီးမီးယားလိဂ်မှ ခရစ္စတယ် ပဲလေ့စ် ကို လွှဲယူရန် သက်ဆင် ညှိနှိုင်းနေ
မြန်မာတို့၏ ဖိုက်တာ အောင်လအန်ဆန်း
ဘိလိယက်မှာ ကျနော်တို့ကို ဘယ်နိုင်ငံကမှ အထင်မသေးပါဘူး
The post ရခိုင်ယူနိုက်တက် အသင်းအား ဆဲဆိုမှု မြဝတီရုပ်/သံမှ တောင်းပန် appeared first on ဧရာဝတီ.