မန္တလေးတိုင်းဒေသကြီး ကျွမ်းဘားဆပ်ကော်မတီမှ ကြီးမှူး၍ ကျွမ်းဘားအားကစားနည်းများကို မျိုးဆက်သစ် ကလေးငယ် များအား လေ့ကျင့်သင်ကြားပေးရာတွင် သင်ထောက်ကူပစ္စည်းများ၊ လေ့ကျင့်သင်ကြားပေးချိန်နှင့် နည်းပြအခက်အခဲများ ရှိနေကြောင်း သိရသည်။
မန္တလေးတိုင်း ဒေသကြီး ကျွမ်းဘားဆပ်ကော်မတီ ဒုဥက္ကဋ္ဌ ဦးမျိုးသန့် က “အခက်အခဲတွေကတော့ သင်ထောက်ကူ ပစ္စည်းနဲ့ နေရာအခက် အခဲရှိတယ်၊ ပစ္စည်းကလည်း နိုင်ငံတကာအဆင့်ကို မီအောင်လုပ်မယ်ဆိုရင် ဗမာဖြစ်နဲ့ ကစားနေလို့ မရဘူး၊ လက်ရှိ မန်းတိုင်းမှာတော့ ပစ္စည်းအခက်အခဲ တော်တော်ရှိတဲ့အတွက် ပစ္စည်းတွေက ဗမာဖြစ်တွေနဲ့ပဲ သုံးနေရတယ်” ဟု ပြောသည်။
ကျွမ်းဘားအားကစားနည်းသည် အားကစားနည်းများ အားလုံး၏ အခြေခံဖြစ်ပြီး အခြားနိုင်ငံများ၌ စာသင်ကျောင်းများတွင် မဖြစ်မနေသင်ကြားရသည့် အားကစားနည်း တရပ်ဖြစ်သော်လည်း မြန်မာနိုင်ငံတွင် သိရှိသူ အလွန်နည်းပါကြောင်း သိရသည်။
အားကစားနှင့် ကာယပညာသိပ္ပံ (မန္တလေး)မှ ပဏာမလက်ရွေးစင် ကိုသာအောင်ထက် က “ကျနော်တို့ကျွမ်းဘားက လိုအပ်ချက်တွေကတော့ အများကြီးပါပဲ၊ အခြားအားကစားနည်းတွေမှာ ကစားသမားတွေက ဘ၀ ရပ်တည်နိုင်အောင် ထောက်ပံ့မှုတွေ အများအပြားရှိတယ်၊ ကျွမ်ဘားက ထောက်ပံ့မှု တော်တော်လေး အားနည်းနေပါ သေးတယ်၊ အဖွဲ့ချုပ်ဆိုပြီးရှိပေမယ့်လည်း ဘတ်ဂျတ်ပြည့်ပြည့် ၀၀ ရှိတဲ့အဖွဲ့အစည်းမဟုတ်တော့ ထောက်ပံ့မှုက လိုအပ်သလို မပေးနိုင်သေးဘူး” ဟု ပြောသည်။
လက်ရှိအခြေအနေအရ ကျွမ်းဘားအားကစားနည်းသည် မဖြစ်မနေ ထားရှိပေးနေရသည့် အားကစားနည်း တရပ်လိုသာ ဖြစ်နေပြီး မြန်မာနိုင်ငံ ကျွမ်းဘားအားကစားအဖွဲ့ချုပ်ဟု ရှိသော်လည်း အားကစားသမား အလွန်နည်းပါး နေသေးကြောင်း သိရသည်။
ဦးမျိုးသန့် က “အခြားအခက် အခဲကတော့ နိုင်ငံတော် အထောက်အပံ့လည်း မရှိဘူး၊ ကျွမ်းဘား အားကစားနည်းဟာ အခြား နိုင်ငံများမှာ ရှိနေတာကြောင့် မဖြစ်မနေထားနေရတဲ့ သဘောဖြစ်နေတယ်၊ ကျွမ်းဘားအားကစားနည်းအတွက် နည်းပြရယ်လို့ အစိုးရက ကူညီပေးထားတာမျိုးမရှိဘူး” ဟု ဆက်လက်ပြောသည်။
ယခုအခါ ကျွမ်းဘား အားကစားနည်းအတွက် မန္တလေးတိုင်း၌ နည်းပြသီးသန့်မရှိသေးဘဲ ယခင် လက်ရွေးစင်ဟောင်းများနှင့် လက်ရှိလက်ရွေးစင်များက ကိုယ်ပိုင်အချိန်များအတွင်းမှ နေ၍ မျိုးဆက်သစ်များ ထွက်ပေါ်လာစေရန် သင်တန်းများ ပေးနေ ရကြောင်း သိရသည်။
“လူငယ်အခြေပြုဆိုတော့ ဘယ်လိုလူမျိုးဖြစ်ဖြစ် လက်ခံပေးတယ်၊ အဲဒီအထဲကမှ လူကောင်းတွေကို မွေးထုတ် ပေးရတယ်၊ လက်ရွေးစင်ဖြစ်မယ့်ကလေးတွေကို မွေးထုတ်ပေးရတယ်၊ လေ့ကျင့်ကစားချိန်ကလည်း ၁ နာရီခွဲ လောက်ပဲ ရတယ်၊ တနေ့ကို လေ့ကျင့်ကစားချိန်က ၃ နာရီလောက်ကစားမှ အဆင်ပြေမယ့် အခြေအနေမျိုးမှာ မန်းတိုင်းကနေပြီးတော့ ကစားချိန် ၁ နာရီခွဲ လောက်အချိန်လေးနဲ့ လက်ရွေးစင်ဖြစ်အောင် လေ့ကျင့် သင်ကြားပေးနေရတယ်” ဟု ဦးမျိုးသန့်က ဆက်လက်ပြောသည်။
ထို့အပြင် နိုင်ငံတွင်း ပြိုင်ပွဲများ၌လည်း ကျွမ်းဘားအားကစားနည်း ထည့်သွင်းယှဉ်ပြိုင်မှုအလွန်အားနည်းနေပြီး တနှစ်လျှင် ၂ ပွဲခန့်သာရှိကြောင်း၊ နိုင်ငံတကာပြိုင်ပွဲများတွင် ကျွမ်းဘားအားကစားနည်း ပါဝင်နေခြင်းကြောင့် မဖြစ်မနေထားနေရှိနေရ သည့် အခြေအနေမျိုးတွင် ရှိနေသေးကြောင်း သိရသည်။
အားကစားနှင့် ကာယပညာသိပ္ပံ (မန္တလေး)မှ ကျွမ်းဘားနည်းပြ ကိုစည်သူဟိန်းက “ကျွမ်းဘား အားကစားနည်းက အဓိကအခြေခံကောင်းဖို့ လိုပါတယ်၊ ကျွမ်းဘားအားကစားနည်းကို နိုင်ငံတကာနဲ့ ယှဉ်ပြိုင်မှာ ဖြစ်တဲ့အတွက် အခြေခံ အားကစားနည်း ကျွမ်းဘားကို စိတ်ဝင်စားကြဖို့ လိုပါတယ်၊ သူများနိုင်ငံတွေမှာ ဆိုရင် ၅ နှစ်အရွယ် လောက်ကတည်းက ကျွမ်းဘားကို ကစားကြတယ်၊ အဲဒီလောက်ကနေ စခဲ့တာ ပရော်ဖက်ရှင်နယ် ဖြစ်တဲ့အထိကို ကစားနေ ကြပြီ၊ ကျနော်တို့နိုင်ငံမှာက အခုမှ ပြန်ပြီး အစပျိုးနေရဆဲဆိုတော့ နိုင်ငံတကာမှာ ရှေ့ရောက်ဖို့ အတော်ကြိုးစား ကြရဦးမှာပါ” ဟု ပြောသည်။
ကျွမ်းဘား အားကစားနည်းကို နိုင်ငံတကာအဆင့်မီ အားကစားနည်း တရပ်ဖြစ်လာစေရန်နှင့် ကျွမ်းဘား အားကစားနည်း တိုးတက်လာစေရန်အတွက် အားကစားနှင့် ကျန်းမားရေး ဝန်ကြီးဌာနမှ ထိထိရောက်ရောက် ပံ့ပိုးပေးမှုများနှင့် အတူ ပြင်ပတွင် ရောက်ရှိနေသည့် အမှန်တကယ်တတ်ကျွမ်းသည့် နည်းပြဆရာများ၊ ပညာရှင်များကို ခေါ်ယူနေရာပေးရန် လိုအပ်သည်ဟု သိရသည်။
ဦးမျိုးသန့် က “ကျွမ်းဘား အားကစားနည်း တိုးတက်ဖို့ဆိုရင် ဝန်ကြီးဌာနကနေ ထိထိရောက်ရောက် ပံ့ပိုးပြီးတော့ အပြင်မှာ ရောက်နေတဲ့ တကယ်တတ်ကျွမ်းတဲ့ နည်းပြဆရာတွေ ပညာရှင်တွေ ကိုခေါ်ယူနေရာပေးဖို့လည်း လိုအပ်ပါတယ်၊ အဲဒီလိုသာ လုပ်မယ်ဆို ရင် နိုင်ငံတကာ အဆင့်မီ အားကစားနည်း တရပ်ဖြစ်လာ မယ်လို့မြင်ပါတယ်” ဟု ဆက်လက်ပြောသည်။
You may also like these stories:
ဘိလိယက်မှာ ကျနော်တို့ကို ဘယ်နိုင်ငံကမှ အထင်မသေးပါဘူး
အမျိုးသမီးတွေ လက်ဝှေ့ထိုးသင့်တဲ့ အကြောင်းအရင်း ၅ ချက်
မြန်မာ့ အားကစားကို မြှင့်တင်ပေးရန် တပ်မတော် တိုက်တွန်း
The post ကျွမ်းဘားအားကစား မျိုးဆက်သစ်များအား လေ့ကျင့်သင်ကြားပေးရန် အခက်အခဲရှိ appeared first on ဧရာဝတီ.