ဖိလစ်ပိုင်နိုင်ငံ၊ မနီလာမြို့တွင် လာမည့် နိုဝင်ဘာ ၃၀ မှ ဒီဇင်ဘာ ၁၀ ရက်နေ့အထိ ကျင်းပမည့် အကြိမ် ၃၀ မြောက် အရှေ့တောင် အာရှ အားကစား ပြိုင်ပွဲ၌ ရွှေတံဆိပ်ရယူနိုင်သူ ပြေးခုန်ပစ်အားကစားသမားများကို တိုက်ခန်း တခန်းနှင့် ကားတစီး စီ ဆုချသွားမည်ဖြစ်ကြောင်း သိရသည်။
ရွှေတံဆိပ်ရရှိသူများသည် နိုင်ငံတော်က ပေးအပ်သည့် ဆုကြေးငွေအပြင် မြန်မာပြေးခုန်ပစ် အဖွဲ့ ချုပ်ဥက္ကဋ္ဌ ဦးရှိန်ဝင်းက တိုက်ခန်းတခန်းနှင့် ဒုဥက္ကဋ္ဌ ဦးကျော်ကျော်ဦးက ကားတစီး ထပ်မံပေးအပ် မည်ဖြစ်သည်။
ကျန်းမာရေးနှင့် အားကစား ဝန်ကြီးဌာနက ရွှေတံဆိပ်ရသူများအတွက် သိန်း ၃၀၀၊ ငွေတံဆိပ် အတွက် သိန်း ၂၀၀နှင့် ကြေးတံဆိပ်အတွက် သိန်း ၁၀၀ကျပ်စီ ချီးမြှင့်မည်ဖြစ်သည်။
“ဒီပွဲက အရေးကြီးတဲ့ပွဲဖြစ်နေတော့ ဥက္ကဋ္ဌ နဲ့ ဒုဥက္ကဋ္ဌက အားကစားသမားတွေ ဘဝအာမခံချက်ရှိဖို့ အတွက် သီးသန့် ပေးတာဖြစ်တယ်” ဟု မြန်မာနိုင်ငံ ပြေးခုန်ပစ်အဖွဲ့ချုပ်မှ အတွင်းရေးမှူး ဦးကျော်ထူး အောင်က ဧရာဝတီသို့ ပြောသည်။
အဆိုပါ အရှေ့တောင်အာရှဆီးဂိမ်းသည် ၂ နှစ်တကြိမ်ကျင်းပသည့် ပြိုင်ပွဲဖြစ်ပြီး နိုင်ငံပေါင်း ၁၁ နိုင်ငံက အားကစားသမား များ ဝင်ရောက်ယှဉ်ပြိုင်မည်ဖြစ်သည်။ ပြီးခဲ့သည့် ၂၉ ကြိမ်မြောက် ဆီးဂိမ်းပြိုင်ပွဲတွင် မြန်မာပြေးခုန်ပစ်မှ ကြေးတံဆိပ် တဆုသာ ရရှိခဲ့သည်။
လက်ရှိတွင် ပြေးခုန်ပစ်အဖွဲ့အနေဖြင့် ဆီးဂိမ်းတွင် ပါဝင်ယှဉ်ပြိုင်နိုင်ရန် လူရွေးပွဲပြုလုပ်နေပြီး ခန့်မှန်းခြေအားဖြင့် အားကစားသမား ၁၅ ဦးမှ ၂၀ ဦးအထိ သွားရောက်ယှဉ်ပြိုင်နိုင်ရန် စီစဉ်ထားကြောင်း သိရသည်။
ရွှေတံဆိပ်ဆုရ အားကစားသမားများအား ဆုထပ်မံချီးမြှင့်မှုနှင့် ပတ်သက်ပြီး “ဥက္ကဋ္ဌက တကယ် အပိုင်ပေးမှာပါ။ ကားဆိုလည်း စီးဖို့ ပေးမှာ။ ကစားသမားတွေရဲ့ဘဝပြောင်းလဲ သွားအောင်ပေးမှာပါ။ ကားပေးမယ် တိုက်ခန်းပေးမယ် ဆိုတော့ အသက်တောင် ပြန်ငယ်ချင်လာတယ်” ဟု မြန်မာ ပြေးခုန်ပစ်အဖွဲ့ချုပ်၊ တွဲဘက် အထွေထွေအတွင်းရေးမှူး (၁) ဒေါ်ခင်ခင်ထွေးက ပြောသည်။
ဧရာဝတီ ဘောလုံးအဖွဲ့ချုပ် ဥက္ကဋ္ဌ ဦးမျိုးလှိုင်ဝင်းကလည်း အားကစားတွင် အမြင့်ဆုံးဖြစ်သည့် ရွှေတံဆိပ်ဆုကို ပေးခြင်းဖြစ်သည့်အတွက် ပို၍ ကြိုးစားချင်စိတ်ကို ဖြစ်စေကြောင်း၊ ယခင်က တိုင်းပြည်ကိုယ်စားပြုသည့် စိတ်ဓာတ်ဖြင့် ကစားခဲ့ရာမှ ယခုကဲ့သို့ဆုချီးမြှင့်လိုက်ခြင်းသည် ကစားသမားများ၏ ဘဝနေထိုင်မှုအဆင်ပြေနိုင် မည်ဖြစ်ကြောင်း သုံးသပ်သည်။
အမျိုးသမီးလက်ရွေးစင်ဘောလုံးသမားဟောင်း ဒေါ်အေးအေးမော်က “ ဒီလိုချီးမြှင့်တဲ့အပေါ် ကျေးဇူးလည်း တင်တယ်။ အားရဝမ်းသာနဲ့ ဂုဏ်လည်းယူတယ်။ နောင်လာနောက်သားတွေအတွက်လည်း အာမခံချက် ရှိသွားတယ်။ ဒီလိုပေးတော့ နောက်လိုက်တွေလည်း ဘယ်လို ကြိုးစားသင့်တယ်ဆိုတာ သိသွားမယ်” ဟု ပြောသည်။
စင်ကာပူနိုင်ငံတွင် မတ်လ ၂၈ ရက်မှ ၂၉ ရက်နေ့အထိ ကျင်းပခဲ့သည့် ၈ဝ ကြိမ်မြောက် စင်ကာပူ အလွတ်တန်း ဖိတ်ခေါ်ပြေးခုန်ပစ်ပြိုင်ပွဲ (81st Singapore Open Track & Field Championships 2019) ပြိုင်ပွဲတွင် မြန်မာ ပြေးခုန်ပစ် အားကစားသမားများက ရွှေ ၆ ခု၊ ငွေ ၁ ခုနှင့် ကြေး ၂ ခု ရရှိခဲ့ကြောင်း သိရသည်။
You may also like these stories:
ပြေးခုန်ပစ်မှာ သူ့တပည့် ကိုယ့်တပည့် ခွဲခြားတာတွေ ရှိတယ်
ပြေးနေရလျှင် ပျော်နေ၍ အပြေးချန်ပီယံ ဖြစ်ခဲ့သူ
The post ဆီးဂိမ်း၌ ပြေးခုန်ပစ် ကစားသမားများ ရွှေတံဆိပ်ရပါက တိုက်ခန်းနှင့် ကား ဆုချမည် appeared first on ဧရာဝတီ.