အားကစား ထူးချွန်သူများ၏ ဘဝဖူလုံရေးအတွက် ဝန်ကြီးဌာနများက ဦးစားပေး အဆင့်အနေဖြင့် အလုပ်ခန့်ထားပေး ရန် ဆောင်ရွက်သွားမည်ဟု အားကစားနှင့် ကျန်းမာရေး ဝန်ကြီး ဌာနမှ ပြည်ထောင်စု ဝန်ကြီး ဒေါက်တာ မြင့်ထွေးက ပြောသည်။

“ဝန်ကြီးဌာန အကုန်ပါ ရမယ်။ ပညာရေး ဝန်ကြီးဌာနသာ မကဘူး။ ကာကွယ်ရေးလည်း ပါရမယ်။ စီးပွားရေးကလည်း ပါရ မယ်။ သူတို့ကလည်း သူတို့အလိုက် သူတို့လုပ်ရမယ်။ ဘာလုပ်ရမလဲဆိုတော့ အခု ဒီမှာဆုရတဲ့ အားကစားသမား တွေရှိ တယ်။ အလားအလာရှိတဲ့ အားကစားသမားတွေကို သူတို့က ခန့်ရမယ်။ အားကစားလုပ်ပြီးတော့ ထမင်းစားဖို့၊ ညကျတော့ သူတို့က ဘာသွားစားမလဲ။ အဲဒီလိုမရဘူး။ သူတို့ရဲ့ ဘဝဖူလုံရေးပေါ့။ အဲ့ဒီ အတွက်ကို ကျနော်တို့ အလုပ် တွေ ခန့်ရမယ်”ဟု ဝန်ကြီးက ပြောပြသည်။

စက်တင်ဘာလ ၂၅ ရက်နေ့တွင် နေပြည်တော်ရှိ ဝဏ္ဏသိဒ္ဒိ အားကစားကွင်းတွင် ကျင်းပသည့် ၂၉ ကြိမ်မြောက် SEA Gme 2017 ဆုရ မြန်မာ အားကစားသမားများ အတွက် ဂုဏ်ပြုဆု ချီးမြှင့်ပွဲ အခမ်းအနား အပြီးတွင် ဝန်ကြီးက ပြောကြားခြင်း ဖြစ်သည်။

ပညာရေးတွင် ထူးချွန်ခြင်း မရှိသော်လည်း အားကစားတွင် အလွန်ထူးချွန်နေသူများ ရှိရာ ၎င်းတို့ကို အားကစားနှင့် ကျန်းမာရေး ဝန်ကြီးဌာန လက်အောက်တွင်ရှိသော သားဖွားသူနာပြု ကျောင်းများတွင် ဦးစားပေးအနေဖြင့် အလုပ်ခန့် ထားပေးသွားမည်ဟု သိရသည်။

“တချို့က ရှင်းရှင်းပြောရင် ပညာရည်မှာ သိပ်မသာနိုင်ဘူး။ အားကစားမှာ အရမ်းကောင်းတဲ့လူတွေ ရှိတယ်။ ဒီလူတွေ ကို ဥပမာ ဒီရာထူးကို ရဖို့အတွက်ကို ဒါကြီးအောင်မှဆိုတော့ ဘယ်လိုမှ မရတော့ဘူး။ အဲ့ဒီတော့ ဒါကို ကျနော်တို့ လျှော့ပေးမယ်။ အလားတူစွာပဲ ကျနော်တို့ သားဖွားသူနာပြု ကျောင်းတွေ ရှိတယ်။ ဒီမှာလည်း အားကစား ထူးချွန်တဲ့ သူတွေဆိုရင် ကျနော့်အနေနဲ့ ဦးစားပေးဖို့။ ကျနော်ကတော့ ကိုယ့်ဝန်ကြီးဌာနမို့ ကိုယ်လုပ်လို့ရတာပေါ့။ အခြား ဝန်ကြီး ဌာနကို လုပ်အောင် ကျနော်တို့က အကြံဉာဏ်ပြုမှာပေါ့”ဟုလည်း ၎င်းက ပြောသည်။

ဆက်လက်၍ ဝန်ကြီး ဒေါက်တာ မြင့်ထွေးက အားကစာကဏ္ဍ တိုးတက်ဖွံ့ဖြိုးရေး အတွက် လာမည့်နှစ်တွင် ဘတ်ဂျက် ငွေ တိုးတက် ရရှိရေးကို ဆောင်ရွက်သွားမည့်အပြင် နိုင်ငံတွင်းရှိ ပျက်စီးနေသော အားကစားကွင်းများကိုလည်း ပြုပြင် သွားမည်ဖြစ်ကြောင်း၊ အားကစားကွင်းများ ပြုပြင်ပေးခြင်း အပြင် သက်ဆိုင်ရာ အားကစားကွင်းအလိုက် လိုအပ်သော အားကစား ပစ္စည်းများကိုလည်း ထောက်ပံ့ထားရှိပေးသွားမည် ဖြစ်ကြောင်း၊ လက်ရှိ အားကစားနှင့် ကျန်းမာရေး ဝန်ကြီး ဌာနအနေဖြင့် ဘတ်ဂျက်ငွေ ဘီလီယံ တစ်ထောင် ရရှိထားပြီး ယင်းအနက်မှ အားကစားကဏ္ဍအတွက် ဘီလီယံ နှစ်ဆယ် ခန့်သာ အသုံးပြုနေရသည်ဟု ဝန်ကြီးက ပြောဆိုသည်။

“အားကစား တော်တဲ့လူတွေကို အလုပ်တွေခန့်တဲ့ နေရာမှာ ဦးစားပေးစနစ် ကျနော်တို့လုပ်မယ်။ ဒါက ကျနော်တို့ တပြည်လုံး အတိုင်းအတာနဲ့ လုပ်မယ်။ ကျန်တဲ့ ဝန်ကြီးတွေကိုလည်း ကျနော် မဲဆွယ်မယ်ပေါ့ဗျာ။ မဲဆွယ်ပြီး အဲ့ဒီလို လုပ်ဖို့ ကျနော် ပြောမယ်။ ဒါမှသာလျှင် အားကစားကို လုပ်ချင်တဲ့လူ စိတ်ပါတဲ့လူ ရှိမယ်”ဟု ပြည်ထောင်စု ဝန်ကြီးက ပြောကြား သွားသည်။

The post အားကစားထူးချွန်သူများ ဘဝဖူလုံရေး ဝန်ကြီးဌာနများတွင် အလုပ်ခန့်ပေးရန် ဆောင်ရွက်မည်ဟု အားကစား ဝန်ကြီး ပြော appeared first on ဧရာဝတီ.

ပြင်သစ်အသင်းအတွက်ရော ဂျာမနီအခြေစိုက် နာမည်ကြီးကလပ်အသင်း ဘိုင်ယန်မြူးနစ်အတွက်ပါ သစ္စာတော်ခံ အ ချိန်အကြာကြီး ကစားနေသူ ဖြစ်ပါတယ်။ ဒါပေမယ့် အခုတော့ အသက်အရွယ်အရ ပြင်သစ်လက်ရွေးစင်အသင်းအတွက် ကစားပေးတာ မတွေ့ရတော့ပါဘူး။

အဓိကအနေနဲ့တော့ တောင်ပံကစားသမားအဖြစ် ကစားတာ ဖြစ်ပြီး ဘယ်တောင်ပံမှာ ညာခြေနဲ့ အဓိက ဆွဲယူကစား တတ်လို့ လူကြိုက်များသလို သူက ကစားဟန် သန့်ရှင်းတယ်၊ အင်တိုက်အားတိုက် သွက်သွက်လက်လက် ကစား တယ်၊ ဘောလုံးကို ကျွမ်းကျင်ပိုင်နိုင်မှု ရှိတယ်၊ ဖြတ်တင်ဘောတွေ မှန်ကန်တိကျမှုတွေက အကောင်းဆုံးကစားသမား တဦး ဖြစ်လာစေပါတယ်။

ကစားသမား အချင်းချင်း ပေးတဲ့ မှတ်ချက်တွေမှာဆိုရင်လည်း ရီဘာရီကို မြန်ဆန်တယ်၊ တချက်ထိ ပေးပို့မှု အ ထူး ကောင်းတယ်၊ ဆွဲပြေးနှုန်း ကောင်းတယ်၊ ခြေထောက်အတွင်းမှာ ဘောလုံးကို အကောင်းဆုံး တည်ငြိမ်အောင် ထိန်း သိမ်းကစားနိုင်သူအဖြစ် မှတ်ချက်ပေးခံရသူပါ။

ဘိုင်ယန်မှာ ကစားခွင့်ရလာမှုနဲ့အတူ သူက ခြေစွမ်းအကောင်းဆုံး ပြသလာနိုင်ပြီး ပြင်သစ်အတွက်ရော ရွယ်တူကစား သမား မျိုးဆက်ထဲမှာပါ အကောင်းဆုံး တန်းဝင် ဖြစ်လာပါတယ်။

ပြင်သစ်ရဲ့အတောက်ပဆုံး ကြယ်ပွင့်လို့ ဆိုနိုင်မယ့် ဇီဒန်းကတောင်မှ ရီဘာရီကို jewel of the French football၊ ပြင်သစ် အသင်းအတွက် ရတနာတပါးလို့ တင်စားပြောဆိုခဲ့တာ တွေ့ရပါတယ်။

အသက် ၅ပေ ၇လက်မရှိတဲ့ ပြင်သစ်နိုင်ငံသားတဦးလည်းဖြစ် သူ့ရဲ့နာမည်အပြည့်အစုံက Franck Henry Pierre Ribery ဖြစ်ပါတယ်။ ၁၉၈၃ခုနှစ် ဧပြီလ ၇ရက်နေ့မှာ မွေးဖွားခဲ့ပြီး အခုဆိုရင် အသက် ၃၄နှစ် ရှိပြီ ဖြစ်လို့ မကြာခင်နှစ်တွေမှာ ကစားသမား ဘဝကနေ အပြီးသတ် အနားယူဖို့ဖြစ်လာတော့မှာပါ။

အဓိကအနေနဲ့တော့ တောင်ပံမှာ ကစားပေမယ့် တခါတလေတော့လည်း ကစားကွက်အပေါ် မူတည်ပြီး ကွင်းလယ် တိုက်စစ် ဦးစားပေးပုံစံ ကစားတာ တွေ့ရပါတယ်။

လက်ရှိမှာ ဂျာမနီ ထိပ်တန်း ဘိုင်ယန်မြူးနစ်မှာ ကျောနံပါတ် ၇ကို ဝတ်ဆင်ကစားနေတာလည်း ဖြစ်ပါတယ်။

သက်ငယ်ပိုင်း ကစားသမား ဘဝကိုတော့ ၁၉၈၉ ခုနှစ်မှာ စတင် ဝင်ရောက်ခဲ့ပြီး Conti Boulogneမှာ ၁၉၉၆ ခုနှစ်ထိ အောင် ကစားခဲ့တာ တွေ့ရပါတယ်။ နောက်တော့ ၁၉၉၆ကနေ ၁၉၉၉ ခုနှစ်အတွင်း အသင်းကြီး တသင်းဖြစ်တဲ့ Lilleရဲ့ အကယ်ဒမီမှာ ရောက်နေခဲ့တယ်၊။

၁၉၉၉ ကနေ ၂၀၀၀ ထိအောင်တော့ Boulogne မှာ ကစားခဲ့ပြီး လူငယ်ကစားသမားဘဝကို ဖြတ်သန်းခဲ့တာပါ။ ကြေးစား ကျွမ်းကျင် ပရို ကစားသမားဘဝကိုတော့ ၂၀၀၀ခုနှစ်မှာ သူ့ရဲ့ ငယ်ဘ၀ ဖြတ်သန်းမှု အသင်း Boulogneနဲ့ အတူ ၂နှစ် ကစား ခဲ့ပြီး ၂၀၀၂ ခုနှစ်ထိအောင် အသင်းအတွက် ၂၈ ပွဲ ကစားပေးခဲ့ပြီး ၆ဂိုး သွင်းခဲ့ပါတယ်။

၂၀၀၂-၀၃ ဘောလုံးရာသီမှာတော့ Ales အသင်းကို ရောက်လာပြီး ၁၉ပွဲ ကစားခွင့် ရခဲ့သလို ၁ဂိုး သွင်းနိုင်ခဲ့ပါတယ်။ ၂၀၀၃-၀၄ဘောလုံး ရာသီမှာ Brestလို အလယ်အလတ်တန်း အသင်းကို ပြောင်းခွင့် ရလာပြီး ၃၅ပွဲမှာ ၃ဂိုး သွင်းပေးခဲ့ ပါတယ်။

၂၀၀၄-၀၅ခုနှစ်မှာတော့ Metz အသင်းကို ရောက်လာပြီး ပွဲ ၂၀ ကစားတယ်၊ တဂိုး သွင်းပါတယ်။ အသင်းတသင်းမှာ တရာ သီလောက်ပဲ ကစားပြီး အသင်းနဲ့ အသားမကျဖြစ်နေတဲ့ ရီဘာရီအဖို့တော့ ၂၀၀၅ ခုနှစ်မှာ Galatasaryကို ရောက်သွားပါ တယ်၊ အသင်းမှာ ၁၄ပွဲပဲ ကစားတယ်။

ဂိုးမသွင်းနိုင်ခဲ့ပါဘူး။ ဂါလာတာစရေးမှာဆိုရင် တရာသီပြည့်အောင်တောင် မကစားဘဲ အဆိုပါ ၂၀၀၅ခုနှစ်အတွင်းမှာပဲ ပြင်သစ်နာမည်ကြီး Marseille ကို ပြန်ရောက်လာပါတယ်။ မာဆေးမှာတော့ ရီဘာရီက ၂၀၀၇ခုနှစ်ထိအောင် ကစားခဲ့တာ တွေ့ရပြီး ပွဲပေါင်း ၆၀ အတွင်း ၁၁ ဂိုး ထိအောင် သွင်းခဲ့ပါတယ်။

မာဆေးမှာ ခြေစွမ်းပြမှုက ရီဘာရီကို ဥရောပထိပ်တန်း ကလပ်လည်း ဖြစ်၊ ဂျာမနီရဲ့သြဇာအကြီးဆုံး ဘိုင်ယန်ရဲ့ခေါ်ယူ ခြင်း ခံရပြီး ၂၀၀၇ခုနှစ်မှာ ဘိုင်ယန်ကို ရောက်သွားပါတယ်။ မာဆေးကနေ ဘိုင်ယန်ကို ပြောင်းရွှေ့မှုမှာ ကလပ်အသင်း စံချိန်တင် ပြောင်းရွှေ့ကြေး ယူရို ၂၅သန်းနဲ့ ရောက်သွာခဲ့တာလည်း ဖြစ်ပါတယ်။

အခုနှစ်နဲ့ဆိုရင် ရီဘာရီအနေနဲ့ ဘိုင်ယန်ရောက်တာ ၁၀နှစ်ရှိပြီ ဆိုရမှာပါ။ အခုထိအောင် ဘိုင်ယန်အတွက် ပွဲပေါင်း ၂၃၃ ပွဲ ထိအောင် ကစားပေးထားပြီး ၇၅ ဂိုးထိအောင် သွင်းပေးထားတာ တွေ့ရပါတယ်။

ပြင်သစ်အသင်း အတွက်တော့ U21အသင်း အတွက်ကတည်းက ဝင်ရောက် ကစားပေးခဲ့တာ တွေ့ရပြီး ၂၀၀၄ခုနှစ်ကနေ ၂၀၀၆အတွင်း U21မှာ ကစားတယ်၊ ၁၃ပွဲမှာ ၂ဂိုး သွင်းပေးနိုင်ခဲ့ပြီး ၂၀၀၆ခုနှစ် ကနေ စတင်ပြီး လက်ရွေးစင်အသင်းမှာ ပါ ရွေးချယ်ခံရပြီး ဝင်ရောက်ကစားခွင့် ရလာခဲ့ပါတယ်။

ပြင်သစ် လက်ရွေးစင်အသင်းအတွက်ကိုတော့ ၂၀၀၆ ခုနှစ်ကနေ ၂၀၁၄ခုနှစ်ထိအောင် ကစားပေးခဲ့ပြီး ၈၁ပွဲမှာ ၁၆ ဂိုး ထိ အောင် သွင်းပေးနိုင်ခဲ့တာ တွေ့ရပါတယ်။

ကလပ်အသင်းနဲ့ အတူ အောင်မြင်မှုအပိုင်းမှာတော့ လက်ရှိ ဘိုင်ယန်နဲ့မှာ အအောင်မြင်ဆုံးလို့ ဆိုနိုင်ပြီး ဘွန်ဒက်လီဂါ ချန်ပီယံ ၆ကြိမ် ဖြစ်တယ်၊ DFB-Pokal ဖလားကို ၅ကြိမ် ရတယ်၊ UEFA ချန်ပီယံလိဂ်လည်း ၁ကြိမ် ရတယ်၊ FIFA Club World Cupကိုလည်း တကြိမ် ရပါတယ်။

၂၀၁၃ ခုနှစ်အတွင်းက ရီဘာရီရဲ့ အတောက်ပဆုံးအချိန်တွေလို့ ဆိုနိုင်ပြီး မက်ဆီနဲ့ ဒိုလေးတို့လို ကစားသမားတွေနဲ့အတူ FIFA Ballon d’Orဆု အတွက် ဆန်ကာတင် ၃ယောက် အဆင့်ထိအောင် ရောက်ခဲ့တာ တွေ့ရပါတယ်။

အောင်မြင်မှု ရရှိမှုတွေကို ကြည့်မယ်ဆိုရင် ဂါလာတာစရေးမှာ ကစားနေချိန် Turkish Cupကို ရဖူးတယ်၊ မာဆေးမှာ ကစားချိန် UEFA Interto Cupကို ၂၀၀၅ ခုနှစ်မှာ ရဖူးတယ်၊ ဘိုင်ယန်နဲ့ အတူ ဘွန်ဒက်လီဂါကို ၆ကြိမ် ရထားပြီး ပြီး ခဲ့တဲ့ ဘောလုံး ရာသီ ၂၀၁၆-၁၇ မှာပါ ရယူထားနိုင်ခဲ့တယ်။

DFB-Ligapokal ကို ၂၀၀၇ ခုနှစ်က ရတယ်၊ DFL-Supercup ကို ၄ ကြိမ်ရတယ်၊ UEFA ချန်ပီယံလိဂ် တကြိမ်၊ UEFA Super Cup ကို ၂၀၁၃မှာ တကြိမ်၊ FIFA Club World Cupကို ၂၀၁၃မှာ ရဖူးတာ တွေ့ရပါတယ်။ နိုင်ငံအသင်းနဲ့ အတူတော့ အောင်မြင်မှု များများစားစား မရဖူးဘဲ ၂၀၀၆ခုနှစ် FIFA World Cupမှာ Runner-up ဖြစ်ဖူးခဲ့တာပဲ ရှိပါတယ်။

တဦးချင်း အောင်မြင်မှုအနေနဲ့တော့ UNFPကနေ ပေးတဲ့ တလတာ အကောင်းဆုံး ကစားသမားဆုကို ၂၀၀၆ ဧပြီၤလ က နောက်ဆုံး ရထားပြီး စုစုပေါင်း ၄ ကြိမ် ရဖူးတယ်၊ Ligue 1ရဲ့အကောင်းဆုံးလူငယ် ကစားသမားဆုကို ၂၀၀၆ မှာ ရတယ်။

အဆိုပါ နှစ်မှာပဲ တနှစ်တာ အကောင်းဆုံး သွင်းဂိုးဆုနဲ့ တနှစ်တာ အကောင်းဆုံးအသင်းဆု လူစာရင်းမှာလည်း ပါခဲ့ပါ တယ်။ ၂၀၀၆ ခုနှစ် Etoile d’Or ကို ရတယ်၊ ၂၀၀၆နဲ့ ၂၀၀၈ တွေမှာ Onze de Bronze ကို ရတယ်၊ ပြင်သစ် တနှစ်တာ အကောင်းဆုံး ကစားသမားဆုကိုလည်း ၃ကြိမ်ရဖူးတယ်။

ဂျာမနီတနှစ်တာ အကောင်းဆုံး ကစားသမားဆုကိုလည်း ဘိုင်ယန်မှာ ကစားနေချိန် ၂၀၀၈မှာ ရတယ်၊ UEFA ကနေ ထုတ်ပြန်တဲ့ တနှစ်တာ အကောင်းဆုံး ကစားသမား စာရင်းမှာလည်း ၂၀၀၈နဲ့ ၂၀၁၃တွေမှာ ပါဖူးတယ်။

UEFAရဲ့ ဥရောပ အကောင်းဆုံး ဆုကိုလည်း ၂၀၁-၁၃မှာ ရဖူးပါတယ်။ ဘွန်ဒက်လီဂါရဲ့ တနှစ်တာအတွင်း ထောက်ပံ့မှု အ များဆုံး ကစားသမား အဖြစ် ၂၀၁၂နဲ့ ၂၀၁၃တွေမှာ ထိပ်ဆုံးကနေ ရပ်တည်နိုင်ခဲ့တယ်။ ဘွန်ဒက်လီဂါ တနှစ်တာ အကောင်းဆုံး ကစားသမားအဖြစ် ၂၀၁၃မှာ ရွေးခံခဲ့ရသလို အဆိုပါ နှစ်မှာပဲ အကောင်းဆုံး ကစားသမားအဖြစ် The Kicker ကနေ ရွေးချယ်ခံရတယ်။

Globe Soccer ကနေ ပေးတဲ့ တနှစ်တာ အကောင်းဆုံးကစားသမားဆု ရတယ်၊ FIFA Club World Cup ရဲ့ရွှေဘော လုံးဆုကို ရတယ်၊ အဆိုပါ ပြိုင်ပွဲရဲ့တန်ဖိုးအရှိဆုံး ကစားသမားအဖြစ်လည်း ရွေးချယ်ခံခဲ့ရပါသေးတယ်။

၂၀၁၃မှာ မက်ဆီ၊ ဒိုလေးတို့နဲ့အတူ နောက်ဆုံး ဆန်ခါတင် ၃ယောက်အဆင့်ထိအောင် Ballon d-Or ဆုအတွက် ရွေး ချယ်ခံ ရပြီး တတိယဆု ရခဲ့တာ တွေ့ရပါတယ်။

http://en.m.wikipedia.org/wiki/Franck_Ribery

The post ပြင်သစ်နဲ့ ဘိုင်ယန်ရဲ့ အားအထားရဆုံး ကွင်းလယ်တောင်ပံကစားသမား Franck Ribery appeared first on ဧရာဝတီ.

အားကစားနည်းတိုင်းက ကျန်းမာမှုကို ပေးတယ်၊ သွက်လက် သန်မာစေတယ်ဆိုတာ မှန်ပေမယ့် အခု အားကစားနည်းက တော့ အသက် ၁၂ အရွယ်ပြည့်ပြီးမှပဲ ကလေးတွေကို ဆော့ကစားဖို့ ခွင့်ပေးသင့်ပါတယ်။

အဓိကအကြောင်းကတော့ အမြင်အာရုံပိုင်းဖွံ့ဖြိုးမှုကိုလည်း အားနည်းစေသလို အသက်ကြီးလာချိန်တွေမှာ ပိုမိုတဲ့ အမြင် အာရုံပိုင်းအားနည်းမှု ဖြစ်စေနိုင်တာကြောင့်ပါ။ ဘယ် ကစားနည်းပါလဲ။

အမေရိကန်Football လို့ လူသိများတဲ့ အမေရိကန်မှာ လူကြိုက်အများဆုံး ဘောလုံးကစားနည်းပါ။ အာရုံစိုက်မှုအပိုင်းတွေ ထဲက အမြင်အာရုံစိုက်မှု အပိုင်းမှာ အားစိုက်ရလို့ ကလေးတွေအတွက် အခု ကစားနည်းက အဆင်မပြေစေပါဘူး။

မျက်လုံးက မြင်တယ်၊ ဦးနှောက်ကို အာရုံပေးဖို့တယ်၊ ဦးနှောက်က အခြားကိုယ်လက်အပိုင်းတွေကို ဘာဆက်လုပ်ရမယ်ဆို တာ စီစဉ်ခိုင်းစေတယ်၊ ဒီနေရာမှာ ကစားမှုအတွင်း အနိုင်ရလိုမှုဇောနဲ့အတူ အမြင်အာရုံနဲ့ ဦးနှောက်အကြားလုပ်ဆောင်မှု မြန်ဆန်ချင်လာပြီး အသက် ၁၂နှစ် အရွယ်ထိအောင် အမြင်ပိုင်းဖွံ့ဖြိုးမှုကအကောင်းဆုံးမဖြစ်သေးတာကြောင့် ဖွံ့ဖြိုးဆဲအနေ အထားမှာ ဖိအားပေးသလို ဖြစ်သွားရင် ဖွံ့ဖြိုးမှုလည်း နောက်ကျ အားနည်းသွားစေနိုင်သလို ပုံမှန်အတိုင်း အကောင်းဆုံး အ မြင်အာရုံပိုင်းဖွံ့ဖြိုးမှု မရှိနိုင်တာကြောင့် အခုကစားနည်းကို အမြင်အာရုံကောင်းမွန်ပြီ ဖြစ်တဲ့ အသက် ၁၂ နှစ်နဲ့ နောက်ပိုင်း မှာမှ ကစားဖို့ ပြောနေတာ ဖြစ်ပါတယ်။

အခြား ကြံ့ခိုင်မှု ဦးစားပေး အားကစားနည်းတချို့မှာလည်း ထိခိုက်မှုနဲ့ နောက်ဆက်တွဲရလဒ်တွေ ရှိပေမယ့် အခု အမေရိကန် နဲ့ အနောက်နိုင်ငံတွေမှာ ခေတ်စားနေတဲ့ National Football League အဖြစ် လူသိများတဲ့ အမေရိကန်ဘောလုံးကစား နည်းက ကလေးတွေကို အမြင်ပိုင်းဖွံ့ဖြိုးမှု အားနည်းစေနိုင်တယ်လို့ The New York Times မှာ ဖော်ပြမှုနဲ့အတူ သိလာရ တာ ဖြစ်ပါတယ်။
အခုလေ့လာချက်ကို ဘော်စတွန်တက္ကသိုလ်လေ့လာရေးအဖွဲ့တွေကနေ လုပ်ဆောင်ခဲ့တာ ဖြစ်ပြီး သူတို့က နှစ်ပေါင်းများစွာ ကြာအောင် NFLလို ကြေးစားအဆင့်ကစားသမား ၆၈ ယောက်၊ တက္ကသိုလ်ကောလိပ်ကျောင်းအသင်းတွေမှာ ကစားနေသူ ၁၀၃ ဦးနဲ့ အထက်တန်းကျောင်းတွေမှာ ကစားနေသူ ၄၃ ဦး၊ စုစုပေါင်း ဘောလုံးကစားသမား ၂၁၄ ယောက်ကို လေ့လာမှု တွေ လုပ်ခဲ့တာပါ။

အဆိုပါ ကစားသမားတွေထဲက အသက်၁၂ နှစ်အရွယ်မတိုင်ခင်ကတည်းက အမေရိကန်ဘောလုံး ကစားလာသူတွေဟာ ပုံမှန် အာရုံကြောလှုံ့ဆော်မှုစနစ် မဟုတ်ဘဲ အားနည်းတာတွေ၊ အာရုံစူးစိုက်နိုင်မှု အားနည်းခြင်းတွေနဲ့ ကိုယ်လက်ထိန်းချုပ်မှု အပိုင်းတွေမှာ အကောင်းဆုံးအနေအထားထိ မရတာတွေကို တွေ့လာရတာပဲ ဖြစ်ပါတယ်။

ဦးနှောက်ဟာ အဓိကအနေနဲ့ အသက် ၁၀နှစ်ကနေ ၁၂နှစ် အတွင်းကာလတွေမှာ အကောင်းဆုံး ကြီးထွားမှု ရှိနေပြီး အဲဒီ လိုအချိန်တွေမှာ အာရုံစူးစိုက်မှု ပြင်းပြင်းထန်ထန် သွားပေးလိုက်ရင် ကြီးထားမှု အားနည်းသွားတတ်ပါတယ်လို့ လေ့လာ ရေး အဖွဲ့ဝင်တဦးဖြစ်သူ Robert Stern က ပြောပါတယ်။

အဖွဲ့ဟာ အသက်ကြီးပိုင်းဘောလုံးကစားသမားတွေထဲက အာရုံကြောနဲ့ ဦးနှောက်ပိုင်းဆိုင်ရာ အားနည်းနေသူတွေကိုပါ ခွင့်တောင်းပြီး လေ့လာမှုတွေ လုပ်ဆောင်ခဲ့ရာမှာလည်း အထက်မှာ ပြောသလို အသက်၁၂နှစ် မတိုင်ခင်နဲ့ အသက် ၁၀နှစ် ဝန်းကျင်တွေမှာ ဖိအားပေး ဘောလုံးကစားမှုတွေ လုပ်ဆောင်ခဲ့တာမို့ အသက်အရွယ်ကြီးရင့်လာမှုနဲ့အတူ အာရုံကြောနဲ့ ဦး နှောက်ပိုင်းအားနည်းမှုတွေ ရှိလာတာတွေ့လာရတယ်လို့လည်း ဆိုပါတယ်။

ကံကောင်းတာတခုကတော့ စာရင်းတွေအရ အသက် ၆ နှစ်ကနေ ၁၂ နှစ်အတွင်း ကလေးတွေရဲ့အမေရိကန်ဘောလုံးကစား မှုက ပြီးခဲ့တဲ့ ၈နှစ် အတွင်း ၂၀ရာခိုင်နှုန်းလောက်ထိအောင် လျော့ကျနေတာမို့ တော်ပါသေးတယ်။

၂၀၁၅ ခုနှစ်မှာတော့ ကစားနှုန်း ၁.၂ရာခိုင်နှုန်း ပြန်တက်လာပေမယ့် အခုတွေ့ရှိချက်နဲ့အတူ ကလေးတွေကို ဘောလုံးကစား စေမှု ထိန်းချုပ်မှု ရှိလာနိုင်ပြီး အာရုံကြောပိုင်းဖွံ့ဖြိုးမှုကို မှန်ကန်ကောင်းမွန်အောင် မိဘတွေက ဝင်ထိန်းပေးသင့်နေတာ လည်း ဖြစ်ပါတယ်။

လေ့လာသူတွေကတော့ ကလေးတွေကို အခု ဘောလုံးကစားနည်းအစား အေရိုးဘစ် (Aerobic) ကစားနည်းမျိုးပဲ အဆိုပါ အသက် ၁၀နှစ်နဲ့ ၁၂နှစ် အကြားအရွယ်တွေကို ကစားစေသင့်တယ်လို့ အကြံပေးတာလည်း တွေ့ရပါတယ်။

www.rd.com

The post အသက် ၁၂ နှစ်ပြည့်ပြီးမှ ကစားသင့်တဲ့ အားကစားနည်း appeared first on ဧရာဝတီ.

ပြင်သစ် ပြည်တွင်းအမှတ်ပေးဘောလုံး ပြိုင်ပွဲ Ligue 1ဆိုတာက ဥရောပအဆင့်မှာဆိုရင် အင်္ဂလန်၊ စပိန်၊ အီတလီ၊ ဂျာမ နီတွေပြီးရင် သတ်မှတ်ချက်အဆင့် အမြင့်ဆုံးနဲ့ လူစိတ်ဝင်စားမှု အများဆုံးဘောလုံး ပြိုင်ပွဲတပွဲပါ။

အထူးသဖြင့်တော့ ဘောလုံးလောကနဲ့ အလှမ်းဝေးသူတချို့တောင်မှ PSG ဆိုတဲ့အသင်းကို ကြားဖူးသလိုသူနဲ့အတူ ပြင်သစ် အမှတ်ပေးပွဲကိုလည်း သိကြပါတယ်။ အခုပြောမယ့်အသင်းကတော့ မာဆေးလို့ ပြည်တွင်းမှာ လူသိများတဲ့ Olympique de Marseille ဖြစ်ပါတယ်။

အသင်းကိုနာမည်ပြောင်အဖြစ် The Olypmians အဖြစ်ရော The Phocians အဖြစ်ရော ခေါ်ကြပါတယ်။ နာမည်အ တိုကောက်မှတ်ယူမှု အဖြစ် OM လို့ခေါ်ပါတယ်။
အသင်းကို ၁၈၉၉ခုနှစ် သြဂုတ်လ ၃၁ရက်နေ့ လွန်ခဲ့တဲ့ ၁၁၈နှစ်ကစတင် တည်ထောင်ဖွဲ့စည်းခဲ့ပါတယ်။ အိမ်ကွင်းအဖြစ် StadeVelodrome ကို အသုံးပြု လက်ခံကစားပါတယ်။

ဒီကွင်းက ပြင်သစ်မှာရှိတဲ့ ဘောလုံးကွင်းတွေထဲမှာအကြီးဆုံး စာရင်းဝင် ကွင်းတကွင်း ဖြစ်ပြီး ပရိတ်သတ် ၆၇၃၉၄ ဦး ထိအောင် ဆံ့ပါတယ်။

အသင်းကို Frank McCourt ကနေ ပိုင်ဆိုင်ထားပြီး အသင်းဥက္ကဌအဖြစ် Jaccques-Henri Eyraudက တာဝန်ယူနေသလို အသင်းနည်ပြအဖြစ်တော့ လက်ရှိမှာ Rudi Garciaက တာဝန်ယူ ကိုင်တွယ်နေတာ ဖြစ်ပါတယ်။

လက်ရှိ ပြင်သစ် အမှတ်ပေးပြိုင်ပွဲတွေထဲမှာအမြင့်ဆုံးအမှတ်ပေးပြိုင်ပွဲ ဖြစ်တဲ့ Ligue 1မှာ ကစားနေပြီး အရင်နှစ်ကအဆင့် ၅နဲ့ ရာသီသိမ်းနိုင်သည်ထိအောင် ဇယားထိပ်ပိုင်းမှာ ရပ်တည်နိုင်ထားတာလည်း ဖြစ်ပါတယ်။

အိမ်ကွင်းအဖြစ် အဖြူရောင်ပေါ်မှာအပြာရောင် လိုင်းစင်းပါ အကျီ ၤ၊ ဘောင်းဘီနဲ့ ခြေအိတ်တွေကို ဝတ်ဆင်ကစားပါတယ်။ အဝေးကွင်းမှာတော့ အကျီ ၤက အပြာနုရောင်၊ ဘောင်းဘီက အပြာ ရောင်နဲ့ ခြေအိတ်ကအပြာနုရောင် ခြေအိတ်မှာ အပြာရောင် လည်ပင်းအရစ်နဲ့ ဝတ်ဆင်ကစားတာဖြစ်ပါတယ်။ တတိယဝတ်စုံအဖြစ်နဲ့တော့ ခရမ်ရောင်ပေါ်မှာ အဖြူရောင် အစင်းလေးတွေ ပါရှိတဲ့အကျီ ၤ၊ ဘောင်ဘီးနဲ့ ခြေအိတ်တွေကို ဝတ်ဆင်ကစားမှာ ဖြစ်ပါတယ်။

အခုချိန်ထိအောင် စာရင်းတွေ အရ ကြည့်မယ် ဆိုရင် ပြင်သစ်ရဲ့ အမြင့်ဆုံးအမှတ်ပေးချန်ပီယံအဖြစ် ၁၀ ကြိမ်ထိ အောင် ဖြစ်ခဲ့ဖူးပြီး Ligue 1အမည်နဲ့ ပွဲစဉ်တွေ ကျင်းပနေချိန်အတွင်းမှာ ၉ ကြိမ်ထိအောင် ချန်ပီယံ ဖြစ်ခဲ့တာတွေ့ ရပါ တယ်။

ပြင်သစ် ပြည်တွင်းဖလားတခုဖြစ်တဲ့ Coupe de France ကိုလည်း ၁၀ကြိမ်ထိ ရယူပြီး စံချိန်တင်ထားတာတွေ့ရပါတယ်။ ပြီးတော့ ၁၉၉၃ခုနှစ် အတွင်းက နည်းပြ Raymond Goethals လက်ထက်မှာအသင်းက ပြင်သစ် အခြေစိုက်အ သင်းတွေထဲက ပထမဆုံးနဲ့ တကြိမ်တည်းသော ဥရောပချန်ပီယံလိဂ်ဖလားကို ရယူထားနိုင်တာတွေ့ရပါတယ်။

ဒါဟာPSG နဲ့ မိုနာကိုလို နာမည်ကျော် အသင်းတွေကို ကျော်ဖြတ်ပြီး ပြင်သစ်အသင်းတွေထဲက ဥရောပ အဆင့် အောင် မြင်ရယူထားနိုင်ခဲ့တာလည်း ဖြစ်ပါတယ်။

အသင်းနဲ့ ပတ်သက်တဲ့ နောက်ထပ်စံချိန်တခုကိုလည်း ပြောရမယ်ဆိုရင် မာဆေးက ပရိတ်သတ် အများဆုံးရှိတဲ့ ပြင်သစ် အသင်းအဖြစ် ရပ်တည်နေပြီး ပျမ်းမျှတပွဲအတွက် ပရိတ်သတ်အများဆုံးလာရောက် အားပေးတဲ့အသင်းအဖြစ်လည်း ရပ်တည်နေတာပါ။

ဒါကြောင့်လည်း အဆိုပါ ပရိတ်သတ်တွေဆီကနေ ဝင်ငွေရရှိမှုအရ ၂၀၁၂ ခုနှစ်ကထုတ်ပြန်တဲ့ စာရင်းတွေအရဆိုရင်ပဲ အသင်းကတစ်နှစ် ဝင်ငွေ ယူရို ၁၃၅.၇သန်းလောက် ရှိပြီး ဝင်ငွေ အကောင်းဆုံးအသင်းစာရင်းမှာ ကမ္ဘာ့အဆင့် ၁၆ ဆင့်မြောက် ဝင်ငွေအကောင်းဆုံးအသင်း ဖြစ်လာပါတယ်။

မာဆေးရဲ့ အိမ်ကွင်း အကြောင်းပြောရရင် ၁၉၀၄ခုနှစ်ကနေ ၁၉၃၇ခုနှစ်ထိအောင် Stade de I’Huveaune မှာ လက်ခံ ကစားခဲ့ပါတယ်၊ အဆိုပါ ကွင်းက ပရိတ်သတ် ၁၅၀၀၀လောက် ဆံ့ခဲ့ပါတယ်။

အဲဒီနောက်နှစ်မှာတော့ အခုအိမ်ကွင်း StadeVelodrome ကို ရောက်လာပါတယ်။ ဒီကွင်းက အစပိုင်းမှာ ပရိတ်သတ် ၄၀၀၀၀ ဆံ့ပေမယ့် ၂၀၁၁ခုနှစ်မှာတော့ တိုးချဲ့မှုတွေ လုပ်ဆောင်ခဲ့ပြီး ပရိတ်သတ် ၆၀၀၃၁ထိအောင် ဆံ့လာတယ်၊ အ ပြီးသတ် ပြင်ဆင်မှုတွေ ၂၀၁၄ခုနှစ်မှာ ပြီးမြောက်သွားခဲ့ပြီး နောက်ဆုံးပရိတ်သတ် ၆၇၀၀၀ကျော်ထိအောင် ဆံ့လာတာ ဖြစ်ပါတယ်။

အောင်မြင်မှု ရရှိမှုအပိုင်းမှာတော့ အထက်မှာပြောခဲ့တဲ့ အောင်မြင်မှုတွေအပြင် Ligue 2ကို တန်းဆင်းကစားရချိန် ၁၉၉၄-၉၅ခုနှစ်မှာဖလားရတယ်၊ Championnate de France Amatureကို ၁၉၂၉ခုနှစ်က ရဖူးတယ်၊ Coupe de la Ligueကို ၃ ကြိမ်ရဖူးတယ်၊ Trophee des championsကို ၃ ကြိမ်၊ Coupe Charles Dragoကို တကြိမ်ရဖူးတာ တွေ့ရပါတယ်။

နိုင်ငံတကာပြိုင်ပွဲမှာတော့ ချန်ပီယံလိဂ် ဖလားရဖူးသလို ၁၉၉၀-၉၁ခုနှစ် ရာသီမှာလည်း ချန်ပီယံလိဂ်မှာ ဒုတိယရ ဖူးသေးတာတွေ့ရပါတယ်။

ယူရိုပါလိဂ်မှာတော့ ဖလားမရဖူးပေမယ့် ဒုတိယ ၂ကြိမ်ရဖူးတယ်၊ IntertotoCup ကို ၂၀၀၅နဲ့ ၂၀၀၆ခုနှစ်တွေမှာလည်း ၂နှစ်ဆက် ရဖူးတာလည်းတွေ့ရပါတယ်။

အသင်းသားတွေထဲကအောင်မြင်မှုမှာဆိုရင်လည်း ဒီနေ့ခေတ် ဘောလုံးသမားတွေထဲမှာ သြဇာအကြီးဆုံးဆုဖြစ်တဲ့ Ballond’Orဆုကို ပြင်သစ် ကစားသမား Jean Pierre Papin က မာဆေးမှာ ကစားနေစဉ် ၁၉၉၁ ခုနှစ်က ရရှိဖူးတာ လည်းတွေ့ရပါတယ်။

http://en.m.wikipedia.org/wiki/Olympique_de_Marseille

The post ပြင်သစ်ထိပ်တန်းကလပ်အသင်းတခုဖြစ်တဲ့ Olympique de Marseille appeared first on ဧရာဝတီ.

အရင်က ဖူဟမ် အသင်းဆိုတာ အင်္ဂလန် အမှတ်ပေးပြိုင်ပွဲတွေထဲက အမြင့်ဆုံး ပရီးမီးယားလိဂ်မှာ ကိုပဲ ထင်ရှား အားကောင်းတဲ့ ဘောလုံးအသင်းတသင်း၊ အခုနှစ်တွေ ထဲမှာတော့ ဖူဟမ်က အားနည်း မှေးမှိန်သလို ဖြစ်နေတဲ့ အနေအထား၊ ဒါဟာ အသင်းပိုင်ရှင်ရဲ့ အသင်းအပေါ် ငွေသုံးစွဲ အားစိုုက်မှု နည်းလို့ ဒီလို ဖြစ်ရတာလား….၊

ရှာဟစ်ခမ်း (Shahid Khan) က ဖူဟမ်ရဲ့ ပိုင်ရှင်။ ၁၉၅၀ ခုနှစ်၊ ဇူလိုင် ၁၈ ရက်နေ့မှာ ပါကစ္စတန်မှာ မွေးခဲ့တဲ့ အမေရိကန် နိုင်ငံသား ဘီလီယံနာ သူဌေးကြီး တဦး၊ စီးပွားရေး လုပ်ငန်းတွေ အများကြီး ပိုင်ဆိုင်တယ်၊ ဒါပေမယ့် စီးပွားရေးမှာ အောင်မြင်ပြီး ဘောလုံး အသင်းကိုတော့ အောင်မြင်မှု ရအောင် မစွမ်းဆောင်နေတဲ့ အခြေအနေ….၊

တကယ်ဆို ရှာဟစ်ခမ်းရဲ့ လုပ်ငန်းလုပ်ကိုင်မှု အနေအထားတွေကို ကြည့်မယ် ဆိုရင် အားကစားပိုင်းမှာ ပိုပြီးများပါတယ်။ အမေရိကန် NFL အမှတ်ပေးပွဲတွေမှာ ပါဝင်ယှဉ်ပြိုင်နေတဲ့ Jacksonville Jaguars အသင်းကိုလည်း ပိုင်ထားသလို အင်္ဂလန် ကလပ် အသင်းဖူဟမ်ကိုလည်း ပိုင်ဆိုင်ထားတယ်။ အခြား လုပ်ငန်းဆိုလို့ အမေရိကန်နိုင်ငံ၊ အီလီနွိုက်မှာ ရှိတဲ့ ကားအပိုပစ္စည်း ထုတ်လုပ်တဲ့ လုပ်ငန်း Flex-N-Gate ကိုလုပ်ကိုင်နေတာ တခုပဲ တွေ့ရပါတယ်။

ရှာဟစ်ခမ်းကို မွေးတာက ပါကစ္စတန်မှာ၊ ဒါပေမယ့် အခုတော့ အမေရိကန်နိုင်ငံ၊ ဖလော်ရီဒါ ပြည်နယ်က နေပယ်မှာ နေထိုင်ပါတယ်။ အမေရိကန် နိုင်ငံသားခံယူထားသူပါ။ တချို့ကလည်းသူ့ကို ရှက်ဒ်ခမ်း (Shad Khan) လို့လည်း လူသိများ တယ်၊ စက်မှုထုတ်ကုန် အင်ဂျင်နီယာဘွဲ့နဲ့ ကျောင်းပြီးတယ်၊ အခုနှစ် မေလအတွင်းက စာရင်းတွေ အရဆိုရင် ခန်းက အမေရိကန်ဒေါ်လာ ၈ ဒသမ ၅ ဘီလီယံလောက် ပိုင်ဆိုင်ချမ်းသာနေတဲ့ သူဌေးကြီးတဦး၊ သူ့ရဲ့ ဇနီးက Ann Carlson Khan ၊ သားသမီး ၂ ယောက်ရှိတယ်။

၂၀၁၂ ခုနှစ်အတွင်းက Forbes မဂ္ဂဇင်းရဲ့ ခေါင်းကြီးပိုင်း ဆောင်းပါးမှာ သူ့ အကြောင်း ဖော်ပြခံရလောက်သည်ထိ စီးပွားရေး နယ်ပယ်မှာ အောင်မြင်ထင်ရှား လူသိများတယ်။ အခုလထဲမှာ နောက်ဆုံးစာရင်းတွေ အရ ဒေါ်လာ ၈ ဒသမ ၇ ဘီလီယံလောက်ထိ ချမ်းသာတယ်လို့လည်း ပြောကြပါတယ်။ အမေရိကန်မှာ အချမ်းသာဆုံးလူ ၄၀၀ စာရင်းမှာသူက အဆင့် ၇၀ ချိတ်တယ်၊ တကမ္ဘာလုံးမှာ ရှိတဲ့ အချမ်းသာဆုံး လူစာရင်းမှာလည်း သူက အဆင့် ၁၅၈ ချိတ်ပြန်ပါတယ်၊ ဒါက Frobes ကနေ ထုတ်ပြန်တဲ့ စာရင်းအရ ဖြစ်သလို ပါကစ္စတန် နွယ်ဖွားတွေထဲမှာတော့ လက်ရှိ ရှာဟစ်ခမ်းက အချမ်းသာဆုံးပါ။

ရှာဟစ်ခမ်း ရဲ့ မိခင်က သင်္ချာပါမောက္ခတဦး၊ သူမက ၁၉၆၇ ခုနှစ်၊ ရှာဟစ်ခမ်း ၁၆ နှစ်သားမှာ အမေရိကန်ကို ရောက်လာ တယ်၊ ခမ်းရဲ့ ပထမဆုံး အမေရိကန် ညချမ်းက ၂ ဒေါ်လာတန် Y-YMCA တက္ကသိုလ် တည်းခိုခန်းမှာ အိပ်ခဲ့ရတယ်၊ သူ့ရဲ့ ပထမဆုံး အလုပ်က တနာရီ ၁ ဒသမ ၂၀ ဒေါ်လာ ရတဲ့ ပန်းကန်ဆေး အလုပ်၊ အလုပ်တဖက်နဲ့ ခမ်းကျောင်းတက်ခဲ့တယ်၊ ၁၉၇၁ ခုနှစ်မှာ UIUC ကောလိပ်ကနေ စက်မှုထုတ်ကုန် အင်ဂျင်နီယာဘာသာနဲ့ B.Sc. ရတယ်၊ သူဟာ ဆွန်နီ (Sunni) မွတ်စလင် တဦး ဖြစ်ပြီး ၁၉၉၁ ခုနှစ်မှာ အမေရိကန် နိုင်ငံသားအဖြစ် ခံယူခဲ့တာတွေ့ရသလို ၁၉၉၉ ခုနှစ်မှာ Mechanical Science and Engineering Distinguished Alumni ဆု ချီးမြှင့်ခြင်း ခံထားရသူပါ။

ဖူဟမ်နဲ့ ပတ်သတ်လို့တော့ ၂၀၁၃ ခုနှစ် ဇူလိုင်မှာအရင် ပိုင်ရှင် Mohamed Al Fayed ဆီကနေ လန်ဒန်အခြေစိုက် ဖူဟမ်ကို ဝယ်လိုက်တာ ဖြစ်ပြီး၊ ပေါင် သန်း ၁၅၀ နဲ့ ၂၀၀ အတွင်း ဈေးနှုန်းနဲ့ ဝယ်ယူထားတာ လို့ သိရပါတယ်။ တရားဝင် ဈေးနှုန်း ထုတ်ပြန်ချက် မသိရပါဘူး။ ဖူဟမ် မတိုင်ခင် ၂၀၁၀ ခုနှစ် ဖေဖော်ဝါရီ ၁၁ ရက်မှာ NFL အသင်း ဖြစ်တဲ့ Jacksonville Jaguars အသင်းကို ဝယ်ဖို့ စတင် ကြိုးစားခဲ့တာတွေ့ရပြီး အသင်းရဲ့ ရှယ်ယာ ၆၀ ရာခိုင်နှုန်းလောက်ကို စုစည်း ရယူနိုင်လာတာတွေ့ရပါတယ်။

ဒီလို ရှယ်ယာအများအပြား ပိုင်သွားခဲ့လို့လည်း အသင်းရဲ့ ဆုံးဖြတ်ချက် အများစုကို လုပ်ဆောင်ခွင့် ရလာခဲ့ပါတယ်။ နောက်ဆုံး ၂၀၁၁ခုနှစ်၊ နိုဝင်ဘာ ၂၉ မှာတော့ အသင်းတခုလုံးကိုပါ ရယူနိုင်ဖို့ အခြားရှယ်ယာရှင်တွေဆီကနေ သဘောတူမှု ရပြီး ၂၀၁၂ ခုနှစ် ဇန်နဝါရီ ၄ ရက်မှာ အသင်းရဲ့ ၁၀၀ ရာခိုင်နှုန်းကို ခမ်းက ပိုင်ဆိုင်သွားပါတယ်။

ဒီ အရောင်းအဝယ်မှာလည်း ဈေးဘယ်လောက်နဲ့ ဝယ်လိုက်တယ် မဖော်ပြပေမယ့် ခန့်မှန်းခြေ ဒေါ်လာသန်း ၇၆၀ ဖိုးလောက် ပေးချေ ဝယ်ယူလိုက်ရတာ ဖြစ်ပါတယ်။ ဒါက အမေရိကန် Jacksonville Jaguars နဲ့ အင်္ဂလန် ကလပ် ဖူဟမ် အသင်း အပေါ်မှာ ခမ်းရဲ့ ပိုင်ဆိုင်လာမှုတွေ ဖြစ်ပြီး အခြားလုပ်ငန်းကြီး တခု ဖြစ်တဲ့ Flex-N-Gate ကတော့ ၂၀၁၁ ခုနှစ် အတွင်းကနေ စတင်ပြီး ဝန်ထမ်း တသောင်းခွဲ နီးပါးခန့်ထား လုပ်ကိုင်နေတဲ့ လုပ်ငန်းတခု ဖြစ်ကာ အမေရိကန်မှာ ၄၈ ခုမြောက် အကြီးဆုံး စက်မှုထုတ်ကုန် လုပ်ငန်းအဖြစ် ရှိနေတာလည်း ဖြစ်ပါတယ်။ စာရင်းတွေ အရ ဒီလုပ်ငန်းကနေ တနှစ်ကို ဝင်ငွေ ဒေါ်လာ ဘီလီယံ ၃ ဘီလီယံလောက် ရှိတယ် လို့ သိရပါတယ်။ ။

Ref: www.en.m.wikipedia.org

The post အင်္ဂလန်က ဖူဟမ်အသင်းကို ပိုင်ဆိုင်သူ ပါကစ္စတန်ဖွား အမေရိကန်နိုင်ငံသား ရှာဟစ်ခမ်း appeared first on ဧရာဝတီ.

The Rock ၊ Stone Cold တို့လို နပန်းသမားတွေ ၂၀၀၄ ခုနှစ် ဝန်းကျင်လောက်မှာ ကြိုးဝိုင်းတွေထဲကနေ ပျောက်သွားပြီး နောက်ပိုင်း လူငယ်ဆန်ဆန် သွက်သွက်လက်လက်၊ သန့်သန့်ရှင်းရှင်း ကစားမှု၊ ခံနိုင်ရည်ရှိရှိ ဇွဲကောင်းကောင်းနဲ့ ခါးပတ်တွေ ရယူနိုင်မှုကြောင့် အောင်မြင်မှု ရရှိလာတဲ့ နပန်းသမား ဂျွန်စီနား (John Cena) အကြောင်း ပြောပြချင်ပါတယ်။

သူ့ရဲ့ နာမည် အရင်းကတော့ ဂျွန်ဖီးလစ်အန်ထော်နီ စီနား (John Felix Anthony Cena) ဖြစ်ပါတယ်။ နပန်းသတ်တယ်၊ Rap သီချင်းတွေလည်း ဆိုတယ်၊ ရုပ်ရှင်သရုပ်ဆောင်လည်း လုပ်တယ်၊ ရုပ်မြင်သံကြား အစီအစဉ်တွေမှာလည်း တင်ဆက်သူ အဖြစ် ပါဝင်တာတွေ ရှိတယ်၊ လက်ရှိ ကမ္ဘာမှာ နာမည်အကြီးဆုံး နပန်းပွဲစဉ် WWE နဲ့ စာချုပ် ချုပ်ဆို ကစားနေတာပါ။

ဒါပေမယ့် သူက အလွတ်တန်းသဘောမျိုးလည်း Raw နဲ့ Smack Down လို ပွဲစဉ်တွေမှာလည်း ဝင်ကစားတာ တွေ့ရပါတယ်၊ ၁၉၉၉ ခုနှစ်မှာ နပန်းသမားဘဝကို စတင်ခဲ့ပြီး Ultimate Pro Wrestling (UPW) ရဲ့ ပွဲစဉ်တွေမှာ ပါဝင်ခဲ့သလို အဆိုပါ UPW World Heavyweight Champion ဖြစ်ခဲ့ပါတယ်။ အဲဒီလို အောင်မြင်မှုနဲ့ အတူ အခု WWE မဖြစ်သေးခင် WWF နဲ့ ၂၀၀၁ ခုနှစ်မှာ စာချုပ် ချုပ်ပြီး ၂၀၀၂ ခုနှစ်ကနေ စတင်ကာ WWE ရဲ့ ပွဲစဉ်တိုင်းမှာ ပါဝင်ခွင့် ရလာခဲ့ပါတယ်။

စီနားဟာ ၁၉၇၇ ခုနှစ် ဧပြီ ၂၃ ရက်နေ့က အမေရိကန်နိုင်ငံ၊ မက်ဆာချူးဆက် ပြည်နယ်၊ ဝက်နယူးဘာရီမှာ မွေးခဲ့ပြီး အခုဆို အသက် ၄၀ ရှိနေပြီ ဖြစ်ပါတယ်။ လက်ရှိနေတာက ဖလော်ရီဒါပြည်နယ်က တမ်ပါမှာ ဖြစ်ပါတယ်။ နပန်းသမား ဘဝကို ၁၉၉၉ ခုနှစ်ကနေ စခဲ့တယ်၊ ၂၀၀၀ မှာ ရုပ်ရှင် သရုပ်ဆောင်လောကထဲ ဝင်တယ်၊ ၂၀၀၄-၀၅ နဲ့ ၂၀၁၄ တွေမှာ Rapper တယောက် အနေနဲ့ သီချင်းဆိုတာ တွေ့ရတယ်၊ ၂၀၁၆ ခုနှစ်ကနေ စတင်ပြီး ရုပ်သံ တင်ဆက်မှုတွေမှာ ပါဝင်နေ ခဲ့တာလည်း ဖြစ်ပါတယ်။

၂၀၀၉ ခုနှစ် အတွင်းက Elizabeth Huberdeau နဲ့ လက်ထပ်ခဲ့ပေမယ့် ၂၀၁၂ ခုနှစ်မှာ လမ်းခွဲကွာရှင်းခဲ့ကြ ပါတယ်။ သူ့ကို ကြိုးဝိုင်း တွင်းမှာ John Cena အဖြစ်ရော၊ ရှေ့ပိုင်းမှာ Juan Cena နဲ့ The Prototype အဖြစ်ပါ ခေါ်ခဲ့ဖူးပါတယ်။ အရပ် ၆ ပေနဲ့ ၁ လက်မ၊ ကိုယ်အလေးချိန် ၂၅၁ ပေါင်ရှိတယ်၊ UPW အပြင် Ohio Valley Wrestling, Dave Finlay နဲ့ Christopher Daniels တွေနဲ့ပါ လေ့ကျင့်မှုတွေ လုပ်ဆောင်ခဲ့တာ တွေ့ရပါတယ်။

အနုပညာ နယ်ပယ်ထဲမှာ နပန်းလောက ကနေ နာမည်ကျော်သူတွေ ဖြစ်တဲ့ စီနား အပါအဝင် The Rock ၊ Randy Orton ၊ Stone Cold နဲ့ အခြား ကစားသမား အများအပြား ဝင်ရောက် ရိုက်ကူးခဲ့ပါတယ်။ ၂၀၀၀ နဲ့ ၂၀၁၀ခုနှစ် အတွင်း လူသိအများဆုံး နပန်းသမား အဖြစ်လည်း ရပ်တည်နိုင်ခဲ့ပါတယ်။ John Layfield ၊ Paul Heyman နဲ့ Kurt Angle လို နာမည်ကျော် နပန်းသမားတွေက စီနားကို အကောင်းဆုံး နပန်းသမား အဖြစ် မှတ်ချက်ပေးတာ တွေ့ရပါတယ်။

ကစားသမား သက်တမ်းတလျှောက်သူဟာ ချန်ပီယံ အစုံ ၂၅ ကြိမ် ဖြစ်ဖူးပါတယ်။ အဲဒီထဲက ၁၆ ခုက ကမ္ဘာ့ ချန်ပီယံ ခါးပတ်တွေ ဖြစ်ပါတယ်။ ၁၃ ကြိမ်က WWE ချန်ပီယံ ဖြစ်ပြီး ၃ ကြိမ်က ကမ္ဘာ့ဟဲဗီးဝိတ် ချန်ပီယံ ဖြစ်ခဲ့တာပါ။ အမေရိကန်ကန် ချန်ပီယံခါးပတ်ဆုကို ၅ ကြိမ်ရတယ်၊ Tag Team (အတွဲလိုက်) ချန်ပီယံဆုကို ၄ ကြိမ်ရခဲ့ပါတယ်။

Money In the Bank ဆိုတဲ့ အကြမ်းကစားရတဲ့ ပွဲမှာ ၂၀၁၂ က အနိုင်ရတယ်၊ Royal Rumbl လို လူဦးရေ ဆယ်နဲ့ ချီပြီး ဝင်ရောက် ကစားတဲ့ ပွဲတွေမှာ ၂၀၀၈ နဲ့ ၂၀၁၃ တွေမှာ အနိုင်ရတယ်။ Slammy ဆိုတဲ့ လူသိအများဆုံး လူကြိုက်အများဆုံး ဆုကို ၂၀၀၉၊ ၂၀၁၀ နဲ့ ၂၀၁၂ တွေမှာ ရဖူးတယ်။

WWE ခါးပတ်စုံကို အများဆုံး ရယူ နိုင်မှုမှာလည်း Bruno Sammartino ၊ Bob Backlund နဲ့ Hulk Horgan တို့ ပြီးရင် သူက အဆင့် ၄ နေရာမှာ ရပ်တည်နိုင်လောက်အောင် ချန်ပီယံခါးပတ် ကာကွယ် ပိုင်ဆိုင်ထားသူပါ။

အနုပညာ နယ်ပယ်မှာတော့ ပထမဆုံး သူ့ရဲ့ သီချင်းခွေ You Can’t See Me က အမေရိကန် ဘေဘုတ် ၂၀၀ စာရင်းမှာ အဆင့် ၁၅ ထိ အမြင့်ဆုံး ရောက်ရှိခဲ့သလို ၂၀၀၆ ခုနှစ် အတွင်း ပထမဆုံး ဇာတ်ကား The Marine လည်း ထွက်ရှိခဲ့တာ တွေ့ရပါတယ်။ ၂၀၀၉ ခုနှစ်မှာ 12 Rounds ဆက် ထွက်တယ်၊ ၂၀၁၀မှာ Legendary ထွက်လာတယ်၊ ၂၀၁၁ ခုနှစ်မှာ The Reunion၊ ၂၀၁၅ မှာ Trainwreck နဲ့ အဆိုပါ နှစ်ထဲမှာပဲ Sisters တွေ ထွက်ခဲ့တာ တွေ့ရပါတယ်။

ရုပ်သံ အစီအစဉ်တွေမှာ ပါရှိမှု အနေနဲ့ Manhunt ၊ Deal or Not Deal ၊ MADtv ၊ Saturday Night Live ၊ Punk’d ၊ Psych နဲ့ Parks and Recreation လို အစီအစဉ်တွေမှာ ပါဝင်ခဲ့တာလည်း တွေ့ရပါတယ်။

ရုပ်သံ ဇာတ်ကားတွေထဲမှာ သူ့ရဲ့ ပထမ ဇာတ်ကား The Marine ဆိုရင် WWE Studios ကနေ ထုတ်လုပ်တယ်၊ 20th Century Fox ကနေ ဖြန့်ချိတယ်၊ ဝင်ငွေ ၁၈ ဒသမ ၇ သန်းထိ ရခဲ့သလို DVD အနေနဲ့ ဖြန့်ချိချိန်မှာတော့ ပထမ ၁၂ ပတ် အတွင်း သန်း ၃၀ ဖိုးထိ ရောင်းချခဲ့ရတာ တွေ့ရပါတယ်။ ဒီကားက သူ့ အတွက် အအောင်မြင်ဆုံး ဇာတ်ကား ဖြစ်ခဲ့ပြီး နောက်ပိုင်းထွက် ဇာတ်ကားတွေကတော့ လူကြိုက်ရော စီးပွားရေး အရပါ အောင်မြင်မှု နည်းခဲ့ပါတယ်။ အခုနှစ်ထဲမှာတော့ သရုပ်ဖော် Animation ဇာတ်ကား တကားဖြစ်တဲ့ Ferdinand မှာ အသံ သရုပ်ဆောင် အဖြစ် ပါဝင်နေတာလည်း တွေ့ရပါတယ်။

ထူးခြားတဲ့ မှတ်တမ်းတွေ အနေနဲ့ ဆိုရင် သူ့ရဲ့ ကစားသမားဘဝမှာ မကျေပွဲ အဖြစ် ၂၀၀၆ ခုနှစ်က Edge နဲ့ ကစားခဲ့တဲ့ ပွဲစဉ်၊ ၂၀၁၁ ခုနှစ်က CM Punk နဲ့ ကစားခဲ့တဲ့ ပွဲစဉ်၊ ၂၀၀၇ ခုနှစ်က Shawn Michaels နဲ့ ကစားခဲ့တဲ့ Raw ပွဲစဉ်၊ ၂၀၁၁ ခုနှစ်က CM Punk နဲ့ ကစားခဲ့တဲ့ Money In the Bank ပွဲစဉ်၊ ၂၀၁၃ ခုနှစ် Summer Slamမ ှာ Daniel Brayna နဲ့ ကစားခဲ့တဲ့ ပွဲစဉ်၊ ၂၀၀၆ ခုနှစ်က Summer Slam မှာ ကစားခဲ့တဲ့ A J Style နဲ့ ပွဲစဉ်တွေကို အကောင်းဆုံး အဖြစ် လူကြိုက်များတာ တွေ့ရပါတယ်။

နာမည်ကျော် နပန်းသမားကြီး The Rockနဲ့ ၂၀၁၁ ခုနှစ်က ကစားခဲ့တဲ့ ပွဲစဉ် ဆိုရင်လည်း ပွဲကို အကောင်းဆုံး အလှည့် အပြောင်းလုပ် ကစားနိုင်ခဲ့တဲ့ ပွဲကောင်း အဖြစ် အားလုံးက အသိအမှတ်ပြု ခံရတာ တွေ့ရပါတယ်။ AJ Lee နဲ့ အတူ ၂၀၁၂ ခုနှစ်ကလည်း Kiss of the Year လို့ ပေါ်ပြူလာ လုပ်ဆောင်ချက်မျိုး လုပ်ဆောင်ရရှိခဲ့တာလည်း တွေ့ရဖူူးပါတယ်။

၂၀၀၀-၀၉ ခုကာလ ဆယ်စုနှစ် အတွင်း လူကြိုက် အများဆုံ နပန်းသမား အဖြစ် သတ်မှတ်ခံရပါတယ်။ ၂၀၀၇ နဲ့ ၂၀၁၀ တွေမှာလည်း တနှစ်တာ အကောင်းဆုံး နပန်းသမား ဖြစ်ခဲ့ပါတယ်။ ဒီလို ဆုတွေ၊ ချန်ပီယံတွေ အကြိမ်ကြိမ် ရဖူးသူက အမေရိကန် နပန်းသမား လူငယ်ကြိုက် ဂျွန်စီနား ဖြစ်ပါတယ်။

Ref: www.em.m.wikipedia.org

The post Rapper နပန်းသမား ဂျွန်စီနား appeared first on ဧရာဝတီ.

အခုပြောမှာကတော့ ကနေဒါနိုင်ငံသား အားကစားသမားတွေထဲက အားကစားနည်းနယ်ပယ်စုံကနေ ထူးချွန် ကောင်းမွန်တဲ့ အားကစားသမားတွေကို ထုတ်ပြချင်ပါတယ်။ အမေရိကန်ရဲ့ လွှမ်းမိုးမှု ရှိနေပေမယ့် အားကစား ကဏ္ဍမှာ တော့ ကမ္ဘာ့အဆင့်ထိအောင် ထူးချွန်တဲ့ ကစားသမားတွေ ရှိနေမှုကတော့ ကနေဒါ အတွက်လည်း အားရစရာပါ။

(၁၀) Andrew Wiggins – သူကတော့ NBA လို့ ခေါ်တဲ့ အမေရိကန်ရဲ့ အကြီးဆုံး အမှတ်ပေး ဘတ်စကတ်ဘော ပြိုင်ပွဲမှာ ပါဝင် ယှဉ်ပြိုင်နေတဲ့ အသင်း Minnesota Timberwolves က ကစားသမားပါ။ တိုက်စစ်ပိုင်းထက် ထောက်ပံ့ပေးမှုနဲ့ ဆွဲယူ အပေးအယူ ကောင်းကောင်း ကစားနိုင်တာကြောင့် နာမည်ကြီးပါတယ်။ သူ့ရဲ့ ပထမဆုံး ကစားသမား ရာသီမှာပဲ Rookie of the Year ဆု ရခဲ့သူလည်း ဖြစ်ပါတယ်။ ၂၀၁၅ ခုနှစ်က FIBA Americas Championship မှာ ကြေးတံဆိပ်ရရှိခဲ့ပြီး အကောင်းဆုံး ဘတ်စကတ်ဘော ကစားသမား အဖြစ် ရွေးချယ်ခံရတာလည်း ဖြစ်ပါတယ်။

(၉) Connor McDavid – Wiggins နဲ့ အတူတူ Connor ကလည်း သက်ငယ်ပိုင်း ကစားသမားကောင်း တယောက် ဖြစ်သလို အခု အသက် ၂၀ ကတည်းက NHL ပြိုင်ပွဲဝင် Edmonton Oilers အသင်းမှာ အသင်းခေါင်းဆောင် အဖြစ် ကစားနေတာပါ။ ဟော်ကီကစားတာကို အသက် ၁၈ နှစ် ကတည်းက အချိန်ပြည့် လေ့ကျင့် ကစားလာသူ ဖြစ်ပြီး ပါရမီနဲ့ စွမ်းရည်က အခုလို၂ နှစ်အတွင်းမှာတင် အမှတ်ပေးပြိုင်ပွဲဝင် အသင်းမှာ အသင်းခေါင်းဆောင် ဖြစ်လာတာပါ။ ကွင်းလယ် ဗဟိုမှာ အများဆုံး ကစားပါတယ်။ ကမ္ဘာ့ အကောင်းဆုံး ဟော်ကီ ကစားသမား အဖြစ်လည်း လျာထားခံရသူ ဖြစ်နေသလို ၂၀၁၅ မှာ ဂျူနီယာအဆင့်၊ ၂၀၁၆ မှာ ကျွမ်းကျင် စီနီယာ အဆင့်တွေမှာပါ ကနေဒါ အသင်းနဲ့ အတူ ကမ္ဘာ့ ချန်ပီယံ ရထားသူပါ။’

(၈) Christine Sinclair – လက်ရှိမှာ ကမ္ဘာ့ အကောင်းဆုံး အမျိုးသမီး ဘောလုံး သမားတွေထဲက တဦးပါ။ ကနေဒါ အသင်းအတွက်လည်း အချိန်အကြာကြီး ကစားပေးထားခဲ့တယ်၊ လက်ရှိမှာလည်း နိုင်ငံပွဲစဉ်တွေမှာ ဒုတိယမြောက် အများဆုံး ဂိုးသွင်းထားသူ အဖြစ်လည်း စံချိန်ဝင်နေတယ်၊ FIFA အမျိုးသမီး ကမ္ဘာ့ဖလားကို ၄ ကြိမ်၊ နွေရာသီ အိုလံပစ် ၃ ကြိမ်၊ ၂၀၁၂ နဲ့ ၂၀၁၆ တွေမှာ အိုလံပစ် ကြေးတံဆိပ်တွေ ရရှိအောင် ကူညီပေးထားနိုင်သူပါ။ သူမရဲ့ ကစားသမား သက်တမ်း တလျှောက် ကနေဒါ အကောင်းဆုံး ကစားသမားဆုကို ၁၂ ကြိမ် ရဖူးတယ်၊ FIFA ကနေ ထုတ်ပြန်တဲ့ တနှစ်တာ အကောင်းဆုံး ကစားသမားဆုကိုလည်း ၆ ကြိမ် ရထားသူပါ။

(၇) Brooke Henderson – LPGA လို တန်းမြင့် ဂေါက်သီးရိုက်ပြိုင်ပွဲမှာ အသက် ၁၉ နှစ်ပဲ ရှိသေးတဲ့ Herderson လို လူငယ်လေး တောက်ပ အောင်မြင်လာမယ် လို့ ဘယ်သူမှ ထင်ကြမှာ မဟုတ်ပေမယ့် အခုတော့ သူဟာ ကမ္ဘာ့ အကောင်းဆုံး ဂေါက်သီး ကြယ်ပွင့် တပွင့် ဖြစ်နေပါပြီ။ LPGA မှာ ၃ ကြိမ် အနိုင်ရထားပြီး ၁ ကြိမ်က Major အဆင့်မှာ နိုင်ထားတာပါ။ အကြီးမားဆုံး နိုင်ပွဲကတော့ ၂၀၁၆ ခုနှစ် KPMG ကမ္ဘာ့ အမျိုးသမီး LPGA ချန်ပီယံရှစ်မှာ နိုင်ပွဲရရှိခဲ့တာပါ။ လက်ရှိမှာလည်း သူ့ကို ဂေါက်သီး အားကစားမှာ ကမ္ဘာ့ အကောင်းဆုံး အဆင့် ၈ အဖြစ် သတ်မှတ်ခံထားရပါတယ်။ ၂၀၁၆ ခုနှစ် အိုလံပစ်မှာလည်း ကနေဒါ ကိုယ်စားပြု အနေနဲ့ ဝင်ရောက် ယှဉ်ပြိုင်ခဲ့တာ တွေ့ရပါတယ်။

(၆) Derek Drouin – အရပ်အမောင်း ကောင်းကောင်းနဲ့ အမြင့်ခုန်သမား Drouin က အိုလံပစ်နဲ့ ကမ္ဘာ့ အမျိုးသား အမြင့်ခုန်ပွဲတွေမှာ ပါဝင်ယှဉ်ပြိုင်ခဲ့ဖူးတယ်၊ ၂၀၁၅ ကမ္ဘာ့ချန်ပီယံရှစ်မှာ ရွှေရတယ်၊ ၂၀၁၆ အိုလံပစ်မှာလည်း ရွှေတံဆိပ် ရထားသူပါ။ ၂၀၁၂ အိုလံပစ်နဲ့ ၂၀၁၃ ကမ္ဘာ့ချန်ပီယံပွဲ တွေမှာလည်း ကြေးတံဆိပ် ရထားပါတယ်။ ကနေဒါ အမြင့်ခုန် သမားတွေထဲမှာ အမြင့်ဆုံး စံချိန်ကို ရယူထားပြီး ၂၀၁၄ ခုနှစ် အတွင်းက အမြင့် ၂ ဒသမ ၄၀ မီတာထိအောင် ခုန်ပြီး စံချိန် တင်ထားတာပါ။ ၂၀၁၅ ခုနှစ် တိုရန်တိုမှာ ကျင်းပတဲ့ Pan American Games မှာလည်း ဗိုလ်စွဲထားတယ်၊ NCAA ပြိုင်ပွဲ မှာလည်း ၅ ကြိမ်ထိအောင် အနိုင်ရထားပါတယ်။

(၅) Damian Warner – ၂၀၁၆ ခုနှစ် Rio အိုလံပစ်မှာ သူ့ရဲ့ ပထမဆုံး အိုလံပစ်ဆု ငွေတံဆိပ်ကို ရယူခဲ့တယ်၊ ကမ္ဘာ့ ချန်ပီယံရှစ်မှာတော့ ၂၀၁၅ မှာ ငွေရတယ်၊ ၂၀၁၃ မှာ ကြေးတံဆိပ် ရဖူးတယ်၊ သူက ပြေးခုန်ပစ် အားကစားသမား၊ တခြား အားကစား သမားတွေလို တမျိုးတည်း တော်နေရုံနဲ့ မရသူ၊ လက်ရှိ ကနေဒါ ပြေးခုန်ပစ် ကစားသမားတွေထဲမှာ အကောင်းဆုံး အမြင့်ဆုံး စံချိန်ကို တင်ထားသူပါ။ အသက်အရွယ် အရ ကစားသမားဘ၀ ဖြတ်သန်းနိုင်မှု အချိန် ရှိနေသေးတာမို့ မကြာခင် ကမ္ဘာ့ချန်ပီယံရှစ်မှာရော အိုလံပစ်မှာပါ ရွှေတံဆိပ် ရနိုင်ဖို့ အခွင့်အလမ်း များနေတာပါ။

(၄) Milos Raonic – သူကတော့ တင်းနစ် ကစားသမား၊ တကယ်ဆို ယူဂိုဆလားဗီးယားမှား မွေးတယ်၊ ၃ နှစ် အရွယ်မှာ မိသားစုရှိတဲ့ ကနေဒါရောက်လာပြီး ကနေဒါသူ ဖြစ်လာတာပါ။ လက်ရှိမှာ သူက ကမ္ဘာ့ အဆင့် ၄ အကောင်းဆုံး ကစားသမား အဖြစ် သတ်မှတ်ခံထားရသူ၊ ၂၀၁၆ မှာ အဆင့် ၃ ထိ ရောက်ဖူးတယ်၊ ATP ဆု ၈ ကြိမ်ရဖူးတယ်၊ ဆုကြေး ဒေါ်လာ ၁၄ သန်းလောက် ရထားတယ်၊ ၂၀၁၆ ခုနှစ် ဝင်ဘယ်ဒန် ဗိုလ်လုပွဲထိအောင် ရောက်ပေမယ့် Grand Slam ဆုရဖို့ ကြိုးစားနေရသေးသူ တဦးပါ။ ဒီနေ့ ကနေဒါ တင်းနစ် သမားထဲမှာတော့ အကောင်းဆုံး အဖြစ် သတ်မှတ်ခံထားရသူပါ။ အသက် ၂၆ နှစ်ရှိပြီ ဖြစ်တဲ့ Raonic က ATP မှာတော့ စံချိန်ကောင်းကောင်း မှတ်တမ်းတင်ထားနိုင်နေပြီ ဖြစ်ပါတယ်။

(၃) Andre De Grasse – အထက်တန်းကျောင်းသားဘ၀ ထိ အားကစားသမား မဟုတ်ဘဲ တက္ကသိုလ်တက်မှ အားကစား လောကထဲ ဝင်လာသူပါ။ ၂၀၁၅ ခုနှစ် အတွင်းက NCAA ချန်ပီယံရှစ်မှာ မီတာ ၁၀၀ မှာရော ၂၀၀ မှာပါ တာတိုပြေး အနိုင်ရပြီး နာမည်ကြီးလာပါတယ်။ အဲဒီ နှစ်မှာပဲ Pan American Games မှာလည်း မီတာ ၁၀၀၊ ၂၀၀ တွေ ၂ ခုလုံးမှာ ရွှေ ထပ်ရတယ်။ ၂၀၁၅ ကမ္ဘာ့ချန်ပီယံရှစ်မှာ မီတာ ၁၀၀ မှာရော မီတာ ၁၀၀ လက်ဆင့်ကမ်း ၄ ယောက်တွဲမှာပါ ကြေးရတယ်၊ ပထမဆုံး သူ့ရဲ့ အိုလံပစ် ပြိုင်ပွဲ ဝင်မှု မီတာ ၁၀၀ မှာ ငွေ၊ မီတာ ၁၀၀ လေးယောက်တွဲ လက်ဆင့်ကမ်းမှာ ကြေး ထပ်ရပါတယ်။ အသက် ၂၂ နှစ်ပဲ ရှိသေးလို့ အားကစားလောကမှာ နောက်ထပ် အောင်မြင်မှုတွေ ရဦးမယ့် အနာဂါတ် ကြယ်ပွင့် အဖြစ် သတ်မှတ်ခံထားရပါတယ်။

(၂) Penny Oleksiak – နွေရာသီ အိုလံပစ်မှာ အလွတ်ကူးမှာရော လိပ်ပြာကူးမှာပါ ဆု ၄ ဆု ထိအောင် တဦးတည်း ရယူထားနိုင်သူပါ။ Rio အိုလံပစ်မှာ အလွတ်ကူး မီတာ ၁၀၀ မှာ ရွှေ၊ လိပ်ပြာကူး မီတာ ၁၀၀ မှာ ငွေ၊ မီတာ ၁၀၀ လေး ယောက်တွဲမှာ ကြေး၊ မီတာ ၂၀၀ လေးယောက်တွဲ အလွတ်ကူးတွေမှာ ကြေးတွေ ရထားပါတယ်။ ပြီးတော့ ကနေဒါ ရေကူးမယ် တွေထဲမှာ မီတာ ၁၀၀ လိပ်ပြာကူးရော အလွတ်ကူး ၂ မျိုးလုံးမှာ အမြန်ဆုံး စံချိန်တွေ တင်ထားပါတယ်။ Lous Marsh ဆိုတဲ့ ကနေဒါ အားကစားသမားတွေထဲက တနှစ် အတွင်း အကောင်းဆုံး ကစားသမားကို ရွေးချယ်ပေးအပ်တဲ့ ဆု လည်း ရဖူးပါတယ်။ အသက် ၁၆ နှစ်ပဲ ရှိသေးလိ့ု နောက်ထပ် စံချိန်တွေ၊ ဆုတွေ အများကြီး ရဦးမှာ အသေအချာပါ။

(၁) Sidney Crosby – ကနေဒါမှာ လူကြိုက်များတဲ့ ဟော်ကီ အားကစားမှာ အကောင်းဆုံး အဖြစ် ရှိနေပါတယ်။ အခု နောက်ဆုံး ဆယ်စုနှစ် အတွင်းမှာ သူ့ရဲ့ စွမ်းရည်နဲ့ အောင်မြင်မှုတွေက အံ့မခန်းပါပဲ။ NHL လို အမှတ်ပေး ဟော်ကီပွဲစဉ်မှာ Pittsburgh Penguins အသင်းမှာ ကစားနေပါတယ်။ နိုင်ငံတကာ ပွဲတွေမှာလည်း ကနေဒါ အသင်းတွက် ကစားပေးနေ တာပါ။ ၂၀၀၅ ခုနှစ်ကတည်းက NHL မှာ ခြေချခဲ့သူပါ။ Standley ဖလား ၂ ကြိမ်၊ Hart ဆု ၂ ကြိမ်၊ Art Ross မှာ ၂ ကြိမ်၊ Conn Smythee မှာ ၁ ကြိမ်၊ အသင်းနဲ့ အတူ ဗိုလ်စွဲထားပါတယ်။ အိုလံပစ် ရွှေတံဆိပ်လည်း ၂ ဆုရထားတယ်၊ ကမ္ဘာ့ချန်ပီယံရှစ်မှာ ၁ ကြိမ်၊ ကနေဒါနဲ့ အတူ ကမ္ဘာ့ဖလားလည်း ၁ ကြိမ်ရထားသူပါ။

Ref: www.wonderlist.com

The post အကောင်းဆုံး ကနေဒါ အားကစားသမားများ appeared first on ဧရာဝတီ.

ခေတ်သစ် အီတလီ ဂန္ထဝင်ဘောလုံးသမား အန်ဒရီးယားပီယာလို (Andrea Pirlo) ဟာ အခုနှစ် အားကစား ရာသီအကုန်မှာ ဘောလုံးလောကကနေ အနားယူတော့မှာ ဖြစ်ပါတယ်။ အသက် ၃၈ နှစ် အရွယ် ရှိပြီဖြစ်တဲ့ ပီယာလိုဟာ နယူးယောက် စီးတီးနဲ့ ချုပ်ဆိုထားတဲ့ စာချုပ်တွေရဲ့ နောက်ဆုံးလ ကစားပြီးတာနဲ့ နောက်ထပ် ၂ နှစ် သက်တမ်းတိုး စာချုပ် ထပ်ချုပ်တော့မှာ မဟုတ်ဘူး လို့ သိရပါတယ်။

ကွင်းလယ်လူ ဖန်တီးရှင် အဖြစ် ကျော်ကြားတဲ့ ပီယာလိုဟာ ဘောလုံးသက် ၂၂ နှစ် အတွင်း ကမ္ဘာ့ဖလား၊ ချန်ပီယံလိဂ်နဲ့ စီးရီးအေ ပွဲတွေ အပါအဝင် ပွဲပေါင်းများစွာ အတွက် အသင်း ၂၄ သင်းမှာ အောင်ပွဲခံ ကစားခဲ့သူပါ။

“ကိုယ့်အနေအထားက ဘယ်လို အခြေအနေ ရောက်နေပြီ ဆိုတာ ကိုယ့်ကိုယ်ကို သိရပါမယ်။ နေ့စဉ်နဲ့အမျှ ရုပ်ပိုင်း ဆိုင်ရာနဲ့ ပတ်သက်ပြီး ပြဿနာတွေ ရှိနေပါတယ်။ ဘယ်လောက်ပဲ စိတ်ရှိရှိ ကိုယ့်ကိုယ်ကို လေ့ကျင့်ပေးလို့ မရတော့ ပါဘူး။ ဘာဖြစ်လို့လဲ ဆိုတော့ ခင်ဗျားမှာ အမြဲတမ်း ရလဒ်တခုရှိနေလို့ပါပဲ” လို့ သူက Gazzetta dello Sport ကို ပြောပါတယ်။

“လူငယ် ဘောလုံးသမား ဆိုရင်တော့ ဆက် ကစားသင့်တာပေါ့။ ကျနော်က အသက် ၃၈ နှစ် ရှိလာပြီဆိုတော့ လူငယ်တွေ အတွက် နေရာပေးသင့်ပြီလေ။ ကျနော် ဒေါသ မထွက်ပါဘူး။ ဒေါသထွက်မယ့် အစား နည်းပြနဲ့ တခြားသူတွေကို လက်ဆွဲ နှုတ်ဆက်မှာပါ။ ကျနော့် အသက်အရွယ် ကျနော် တော်သင့်ပြီလို့ ပြောရမှာပဲ။ အသက် ၅၀ ကျန်းမာသန်စွမ်းနေဖို့ ထိန်းဖို့ မလွယ်ဘူး။ ကျနော်လည်း တခုခုတော့ လုပ်ရတော့မယ်” လို့ ပီယာလိုက ဆက်ပြောပါတယ်။

ပီယာလိုဟာ သူ့တိုင်းပြည် အတွက် ပွဲပေါင်း ၁၁၆ ခုကို ခြေစွမ်းပြ ရယူပေးခဲ့ပြီး နောက် MLS (Major League Soccer) ရာသီ ကုန်ဆုံးချိန် ဒီဇင်ဘာလမှာ အမိမြေ အီတလီကို ပြန်လာတော့မှာပါ။ သူဟာ ရှေ့ဆက်လုပ်ဆောင်မှာတွေကို စဉ်းစားနေဆဲပဲ လို့ ဆိုပါတယ်။ ဒါပေမယ့် သူ့ရဲ့ ကစားဖော် ဟောင်းတွေနဲ့ လက်တွဲပြီး နည်းပြ အဖြစ်နဲ့ ဘောလုံးလောကမှာ ဆက်လက်ရပ်တည်နိုင်ဖို့ အခွင့်အလမ်းလည်း လက်တကမ်းမှာ ရှိနေပါတယ်။

“တကယ်လို့ ခင်ဗျားဟာ ဘောလုံးသမားကောင်း မဖြစ်ခဲ့ရတောင် နည်းပြကောင်း တယောက်ဖြစ်နိုင်ပါတယ်။ ခင်ဗျား အနေနဲ့ နယ်ပယ်တခုမှာ နှစ်မြှုပ်ထားဖို့ လိုတယ်။ အနိမ့်အမြင့်ကို နားလည်ရပါလိမ့်မယ်။ မီးတောက်တခုရဖို့ မီးပွားတပွင့်ပဲ လိုပါတယ်။ ကျနော့် အတွက်ကတော့ မီးမမွှေးရသေးဘူး လို့ပဲ ကိုယ့်ကိုယ်ကို ယူဆပါတယ်” က ပီယာလိုက ပြောပါတယ်။

သူ့ကို ၁၉၇၉ ခုနှစ် မေ ၁၉ ရက်၊ အီတလီနိုင်ငံ ဖလီရို (Flero) မှာ မွေးဖွားပါတယ်။ အရပ်အမြင့် ၁ ဒသမ ၇၅ မီတာ (၅ ပေ ၉ လက်မ) ရှိပြီး ကွင်းလယ်လူ အဖြစ် ကစားခဲ့ပါတယ်။ လက်ရှိမှာတော့ New York City FC မှာ ကစားနေပြီး သူ့ရဲ့ ကျောနံပတ်က ၂၁ ပါ။ လူငယ် ကစားသမား ဘဝကို ၁၉၉၂ – ၁၉၉၅ အထိ Brescia အသင်းမှ ကစားခဲ့ပါတယ်။ ပီယာလိုဟာ ၂၀၁၄ ကမ္ဘာ့ဖလား ဘောလုံးပြိုင်ပွဲမှာ အီတလီ အသင်းကိုယ်စားပြု အဖြစ် ပါဝင်ကစားခဲ့ပါတယ်။

The post ဘောလုံးလောကကို နှုတ်ဆက်တော့မယ့် အီတလီ ဘောလုံးသမား ပီယာလို appeared first on ဧရာဝတီ.

အမေရိကန်အိုးပင်း (US Open) တင်းနစ်ပြိုင်ပွဲဟာ အမေရိကန်နိုင်ငံမှာ ကျင်းပတဲ့ တင်းနစ်ပြိုင်ပွဲတွေထဲက အမြင့်ဆုံး ပြိုင်ပွဲ ဖြစ်ပြီး ကမ္ဘာမှာလည်း သက်တမ်းအရှည်ကြာဆုံး ပြိုင်ပွဲတွေထဲက တခုပဲ ဖြစ်ပါတယ်။ အဆိုပါ ပြိုင်ပွဲရဲ့ အမည် အရှည်ကောက်ကတော့ United States Open Tennis Championships လို့ သိကြတာပါ။

အစောပိုင်း ပိုင်းကာလတွေမှာ U.S National Championship အဖြစ် အမျိုးသား တဦးချင်းစီ ပြိုင်ပွဲတွေကို ၁၈၈၁ ခုနှစ်ကတည်းက စတင် ကျင်းပလာခဲ့တာ ဖြစ်ပါတယ်။ ၁၉၈၇ ခုနှစ်မှာ အမေရိကန်အိုးပင်း တင်းနစ် ပြိုင်ပွဲဟာ Grand Slam ပြိုင်ပွဲတွေထဲမှာ လေးခုမြောက်နဲ့ အစဉ်လိုက်ဆိုရင် နောက်ဆုံးကျင်းပတဲ့ တင်းနစ် ပြိုင်ပွဲ ဖြစ်လာပါတယ်။ အခြား Grand Slam ပေးအပ်တဲ့ ပြိုင်ပွဲကြီးတွေကတော့ သြစတြေးလျ အိုးပင်း၊ ပြင်သစ် အိုးပင်းနဲ့ ဝင်ဘယ်လ်ဒန် အိုးပင်း ပြိုင်ပဲွဲတွေပဲ ဖြစ်ပါတယ်။

ပြိုင်ပွဲ သက်တမ်းကို ပြန်ကြည့်မယ် ဆိုရင် နှစ်ပေါင်း ၁၃၆ နှစ်ထိအောင် ရှိနေပြီ ဖြစ်ပြီး ပြိုင်ပွဲများကို အမေရိကန်နိုင်ငံ၊ နယူးယောက်မှာ ကျင်းပတာ ဖြစ်ပါတယ်။ ပြိုင်ပွဲ ကျင်းပရာ နေရာကတော့ USTA Billie Jean King National Tennis Center ဖြစ်ပြီးတော့ ပြိုင်ပွဲ ကွင်းပြင်ကိုတော့ ၁၈၈၁ ခုနှစ်ကနေ ၁၉၇၄ ခုနှစ်ထိ မြက်ခင်းကွင်းအဖြစ်နဲ့ ဖန်တီးကစားကြပြီး ၁၉၇၅ ခုနှစ်ကနေ ၁၉၇၇ ခုနှစ်ထိအောင် မြေသားကွင်း အဖြစ် ကစားကြကာ ၁၉၇၈ ခုနှစ်ကနေ ယခုနောက်ပိုင်းကာလ အချိန်ထိ မြေအမာကွင်း အဖြစ် ဖန်တီး ကစားတာ တွေ့ရပါတယ်။ အခုနှစ်မှာဆိုရင် အမေရိကန်အိုးပင်း (အမေရိကန် ဖိတ်ခေါ်) ပြိုင်ပွဲကနေ ဆုကြေး အဖြစ် စုုစုပေါင်းအမေရိကန် ဒေါ်လာ ၅၀ ဒသမ ၄ သန်းထိ ပေးအပ်မှာလည်း ဖြစ်ပါတယ်။

အမေရိကန်အိုးပင်းရဲ့လက်ရှိ ချန်ပီယံတွေကတော့ အမျိုးသားတဦးချင်းမှာ Rafael Nadal၊ အမျိုးသား နှစ်ယောက်တွဲမှာ Jean-Julien Rojer နဲ့ HoriaTacau တို့ ဗိုလ်စွဲထားတာ တွေ့ရပါတယ်။ သမိုင်းတလျှောက် အမျိုးသားတဦးချင်း ပြိုင်ပွဲမှာ အများဆုံး ဗိုလ်စွဲထားသူတွေကတော့ Richard Sears, Bill Larned နဲ့ Bill Tilden တို့က ၇ ကြိမ်စီ ဗိုလ်စွဲထားတာ ဖြစ်ပါတယ်။

အမျိုးသား အတွဲလိုက်မှာလည်း အများဆုံး ဗိုလ်စွဲထားသူတွေက Richard Sears နဲ့ Holcombe Ward တို့က ၆ ကြိမ်စီ ဗိုလ်စွဲ ထားတာပါ။

အမျိုးသမီး ပြိုင်ပွဲတွေမှာတော့ တဦးချင်း လက်ရှိချန်ပီယံ အဖြစ် Sloane Stephens ဖြစ်ကာ အတွဲလိုက် အမျိုးသမီး ချန်ပီယံတွေ ကတော့ Chan Yung-jan နဲ့ Martina Hingis တို့ ဖြစ်ပါတယ်။ ဒီ ပွဲစဉ်တွေမှာလည်း အမျိုးသမီးတဦးချင်း အများဆုံး ဗိုလ်စွဲထားသူကတော့ Molla Bjurstedt Mallory က ၈ ကြိမ်ထိအောင် အနိုင် ရထားသလို အတွဲလိုက် ပြိုင်ပွဲတွေမှာတော့ Margaret Osborne dy Pont က သူ တဦးတည်းနဲ့ အခြားသူများနဲ့ တွဲဖက်ပြီး ၁၃ ကြိမ်ထိအောင် အနိုင်ရထားတာလည်း တွေ့ရပါတယ်။

အမျိုးသား၊ အမျိုးသမီး စုံတွဲပြိုင်ပွဲမှာတော့ လက်ရှိမှာ Martina Hingis နဲ့ Jamie Murray တို့ အတွဲက အနိုင်ရထားပြီး အဆိုပါ စုံတွဲပြိုင်ပွဲအတွင်း အမျိုးသားအနေနဲ့ အများဆုံးအနိုင်ရထားသူတွေအဖြစ် Bill Tilden၊ Bill Talbert နဲ့ Bob Bryan တို့က ၄ ကြိမ်စီ ဗိုလ်စွဲထားသလို အမျိုးသမီးကစားသမားတွေထဲမှာတော့ Margaret Osborne duPontနဲ့ Margaret Court တို့က ၈ ကြိမ်စီ အနိုင်ရထားတာတွေ့ရပါတယ်။

ပြိုင်ပွဲကို နှစ်စဉ် သြဂုတ်လရဲ့ နောက်ဆုံး တနင်္လာနေ့မှာ စတင်ကျင်းပလေ့ရှိပြီး စက်တင်ဘာလ နောက်ဆုံး ၂ ပတ်ထိ ကြာမြင့်ပါတယ်။ Labor Day အားလပ်ရက်အတွင်း အချိန်ကိုက် ကျင်းပတဲ့ သဘောလည်း ဖြစ်ပါတယ်။

ပြိုင်ပွဲကို ကဏ္ဍ ၅ ခု အဓိက ခွဲခြားယှဉ်ပြိုင်စေတာ တွေ့ရပါတယ်။ အမျိုးသား၊ အမျိုးသမီးတဦးချင်းပြိုင်ပွဲ၊ အမျိုးသား၊ အမျိုးသမီး နှစ်ယောက်တွဲ ပြိုင်ပွဲ၊ အမျိုးသား၊ အမျိုးသမီးကျား၊မ ၂ ယောက်တွဲပြိုင်ပွဲ၊ စီနီယာအဆင့်၊ ဂျူနီယာအဆင့် ပြိုင်ပွဲနဲ့ ဘီးတပ်ကုလားထိုင်သုံး ကစားသမားပြိုင်ပွဲ တွေထိအောင် ထည့်သွင်းယှဉ်ပြိုင်တာ တွေ့ရပါတယ်။ ဒီပြိုင်ပွဲကို အမေရိကန် တင်းနစ်အဖွဲ့ချုပ်ရဲ့လမ်းညွှန်မှုနဲ့ ကျင်းပနေတာလည်း ဖြစ်ပါတယ်။

ပွဲလက်မှတ်ရောင်းချမှု၊ စပွန်ဆာပေးမှုနဲ့ ရုပ်သံတွေကနေ တိုက်ရိုက်ထုတ်လွှင့်ပြသခွင့်တွေကနေ ဝင်ငွေတွေ အများဆုံး ရရှိနေပြီး တင်းနစ်အားကစားကိုလည်း လူသိများလာနေတာတွေ့ရပါတယ်။ ပရိသတ်တွေအနေနဲ့ ပြိုင်ပွဲကိုတက်ရောက် ကြည့်ရှုနှုန်းကို ကြည့်မယ်ဆိုရင်လည်း ၂ဝ၁၂ ခုနှစ်နဲ့ နောက်ပိုင်း နှစ်စဉ် ပရိတ်သတ် ၇ သိန်းကျော် လာရောက် အားပေးတာ တွေ့ရပါတယ်။

ဆုကြေးပေးအပ်မှု အပိုင်းမှာလည်း အခုနှစ် ဆိုရင် ဆုကြေးဒေါ်လာ ၅ဝ ဒသမ ၄ သန်းထိ ပေးအပ်ခဲ့တာ တွေ့ရပြီး တဦးချင်း ပြိုင်ပွဲတွေမှာ ဗိုလ်စွဲသူတွေက အမျိုးသား၊ အမျိုးသမီးမခွဲဘဲ ဆုကြေး တန်းတူနှုန်းနဲ့ ဒေါ်လာ ၃ ဒသမ ၇ သန်း၊ ဒုတိယရသူက ၁ ဒသမ ၈၂၅ သန်း၊ ဆီးမီးဖိုင်နယ် ရောက်မယ် ဆိုရင် ၉၂၀၀၀၀ ရရှိမှာဖြစ်ပြီး အနည်းဆုံး Q1 အဆင့်အထိ တက်လာနိုင်သူအနေနဲ့ပါ ၅၆ဝ၆ ဒေါ်လာ ဆုကြေးရရှိမှာ ဖြစ်ပါတယ်။

နှစ်ယောက်တွဲ ပွဲစဉ်တွေမှာ ဗိုလ်စွဲသူက ဒေါ်လာ ၆ ဒသမ ၇၅ သိန်း၊ ဒုတိယသမားက ၃ ဒသမ ၄ သိန်း၊ ဆီမီးဖိုင်နယ် ရောက်ရင်တော့ ၁ ဒသမ ၆ သိန်းလောက် ဆုကြေးရရှိမှာပါ။ ကျား၊ မ ၂ ယောက်တွဲ ပြိုင်ပွဲမှာ အနိုင်ရရင်တော့ ဒေါ်လာ ၁ သိန်းခွဲ၊ ဒုတိယအတွဲက ၇ သောင်း၊ ဆီမီးဖိုင်နယ် ရောက်မယ ်ဆိုရင် ဒေါ်လာ ၃ သောင်း ဆုကြေး ရရှိတာ ဖြစ်ပါတယ်။

ဒီပြိုင်ပွဲရဲ့သတ်မှတ်ချက်တခုက ၅ နှစ် တကြိမ် ဆုကြေး တိုးမြှင့်သတ်မှတ်ပေးအပ်ခြင်း ဖြစ်ပြီး ယခုနှစ်မှ စတင်ပြီး ၅ဝ ဒသမ ၄ သန်း ပေးအပ်မှာ ဖြစ်ပါတယ်။

Ref: www.en.m.wikipedia.org

The post ကမ္ဘာ့ သက်တမ်း အရှည်ကြာဆုံး အမေရိကန် အိုးပင်းတင်းနစ် ပြိုင်ပွဲ အကြောင်း appeared first on ဧရာဝတီ.

တရုတ်စူပါလိဂ် (Chinese Super League) လို့ အတိုကောက်ခေါ်ပြီး လူသိများလာတာ ဖြစ်ပြီး သူ့ရဲ့ အရှည်ကောက်က Chinese Football Association Super League ဖြစ်ပါတယ်။ တချို့လည်း CSL လို့ ခေါ်ပါတယ်။

အင်္ဂလန် ပရီးမီးယား လိဂ်ကို ဘာကလေဘဏ်က စပွန်ဆာပေးချိန် ဘာကလေ ပရီးမီးယားလိဂ်လို့ ခေါ်သလို အခုလည်း တရုတ်စူပါလိဂ်ကို Ping An Chinese Football Association Super League အဖြစ် ခေါ် ပါတယ်။ တရုတ် ဘောလုံး အဖွဲ့ချုပ် Chinese Football Association ရဲ့ လက်အောက်ခံ ပြိုင်ပွဲတခု အဖြစ် ကျင်းပနေတာ ဖြစ်ပြီး တရုတ်ပြည်တွင်း အမှတ်ပေး ဘောလုံး ပြိုင်ပွဲတွေထဲမှာ အမြင့်ဆုံး ဖြစ်ပါတယ်။

၂၀၀၄ ခုနှစ်ကမှ စတင် တည်ထောင်ကစားခဲ့တာ ဖြစ်လို့ သက်တမ်းအရတော့ ၁၃ နှစ်ပဲ ရှိသေးပြီး အခြားနာမည်ကျော် ဥရောပ ဘောလုံးပြိုင်ပွဲတွေလို အစဉ်အလာတော့ မကြီးမား မကြာမြင့်သေးဘူးလို့ ဆိုရမှာပါ။ AFC ဆိုတဲ့ အာရှ ဘောလုံးအဖွဲ့ချုပ်ရဲ့ အသိအမှတ်ပြု ထားတဲ့ ပြိုင်ပွဲလည်း ဖြစ်ပါတယ်။

အခု တရုတ်စူပါလိဂ်က အင်္ဂလန်ပရီးမီးယားလိဂ် လိုပဲ ပြည်တွင်းအမှတ်ပေး ပြိုင်ပွဲတွေထဲမှာ အမြင့်ဆုံး ဖြစ်လို့ တန်းတက်ရဖို့ နောက်ထပ် မရှိပေမယ့် တန်းဆင်းစနစ်ကို အသုံးပြုနေတာကြောင့် တကယ်လို့ အခုတရုတ်စူပါလိဂ်ကနေ တန်းဆင်းရမယ် ဆိုရင် China League One ဆီကို တန်းဆင်းရမှာ ဖြစ်သလိုအဆိုပါ League One ကနေ တန်းတက်လာသူကလည်း တရုတ်စူပါလိဂ်မှာ ကစားခွင့်ရမှာ ဖြစ်ပါတယ်။

တရုတ် စူပါလိဂ်က အသင်းတွေ အနေနဲ့ အမှတ်ပေးဖလားကိုသာ ယှဉ်ပြိုင်ရယူနိုင်မှု အပြင် တရုတ် FA ဖလားပြိုင်ပွဲကို လည်း ဝင်ခွင့်ရမယ်၊ FA Super ဖလားပွဲတွေကိုလည်း ဝင်ခွင့်ရမှာ ဖြစ်ပါတယ်။ ဒီအသင်းတွေထဲကမှ အမှတ်ပေးဖလား ရသူတွေ၊ အမှတ်ပေးဇယား ထိပ်ပိုင်းအဆင့်နဲ့ ရာသီသိမ်းနိုင်သူတွေက နိုင်ငံတကာ ပြိုင်ပွဲတွေ အနေနဲ့ ဥရောပ ကလပ် အသင်းတွေက ချန်ပီယံလိဂ်၊ ယူရိုပါလိဂ်တွေ ဝင်ခွင့်ရသလို တရုတ်စူပါလိဂ်က တန်းမြင့် အသင်းတွေ အနေနဲ့လည်း AFC Champions League ကို ဝင်ခွင့်ရရှိမှာလည်း ဖြစ်ပါတယ်။

လက်ရှိမှာတော့ တရုတ်စူပါလိဂ်မှာ ချန်ပီယံအသင်း အဖြစ် ဂေါင်ဇူးအဲဗားဂရန်ဒီတာဘို (Guangzhou Evergrande Taobao) အသင်းက ၂၀၁၆ ခုနှစ်အတွင်းက ၆ ကြိမ်မြောက် အဖြစ် နောက်ဆုံးရယူထားတာ တွေ့ရပါတယ်။ ဥရောပ ဘောလုံး ရာသီတွေလို ဘောလုံးရာသီက ပြက္ခဒိန်နှစ် ၂ နှစ်မှာ ချိတ်ဆက် ကစားနေသလို မဟုတ်ဘဲ တရုတ်စူပါလိဂ်က ရာသီဥတုပူပြင်းမှု သက်သာလာတဲ့ နှစ်စဉ် ဖေဖော်ဝါရီနဲ့ မတ်လတိုင်းမှာ ဘောလုံးရာသီ စတင် ကစားပြီး နိုဝင်ဘာလနဲ့ ဒီဇင်ဘာလအတွင်းမှာ ရာသီကုန်ပါတယ်။

အသင်းပေါင်း ၁၆ သင်း ပါဝင်ယှဉ်ပြိုင် နေတာလည်း ဖြစ်ပါတယ်။ ကနဦး တရုတ်စူပါလိဂ် အစမှာ အသင်း ၁၂ သင်းပဲ ရှိခဲ့ပေမယ့် နောက်နှစ်တွေမှာ အသင်းအရေအတွက် တိုးချဲ့ ပါဝင်ခွင့် ပေးထားတာလည်း ဖြစ်သလို အခုချိန်ထိ တရုတ် စူပါလိဂ် ဖလားကို ပြိုင်ပွဲဝင် အသင်းပေါင်း ၆ သင်းကပဲ ရဖူးသေးတာတွေ့ရပါတယ်။ ဒီအသင်းတွေကတော့ ရှန်ဇန်းဂျီယန်လီဘို၊ ဒါလီယန်ရှိုက်၊ ရှန်ဒေါင်းလူနန်၊ ချန်ချွန်းရာတိုင်၊ ဘေကျင်းဂူရွန်နဲ့ အခုနောက်ဆုံး ဂေါင်ဇူးအဲဗားဂရန်းဒီတာဘို တို့ ဖြစ်ပါတယ်။

အသင်းတွေက အိမ်ကွင်း အဝေးကွင်း လက်ခံ ကစားတယ်၊ တသင်းကို ဘောလုံးတရာသီမှာ ပွဲပေါင်း ၃၀ ကစားရပြီး တရုတ်စူပါလိဂ် အနေနဲ့ တနှစ်ကို ပွဲစဉ်ပေါင်း ၂၄၀ ထိအောင် ရှိနေတာလည်း ဖြစ်ပါတယ်။ အမှတ်ပေးဇယား အောက်ဆုံးမှာ ရပ်တည်နေတဲ့ အသင်း ၂သင်းကတော့ လိဂ် ၁ ကို တန်းဆင်းရပါတယ်။ ဒီလိုပဲ လိဂ် ၁ က ထိပ်ဆုံးအသင်း ၂ သင်းကလည်း တရုတ်စူပါလိဂ်ကို တန်းတက်ခွင့်ရတာပါ။ တရုတ်စူပါလိဂ်ရဲ့ ထိပ်ဆုံး ၃ သင်းရယ်၊ FA ဖလားရသူတွေက AFC ချန်ပီယံလိဂ်ကို ဝင်ခွင့်ရပါတယ်။ တကယ်လို့ FA ဖလားရသူက အထက်မှာ ပြောခဲ့သလို AFC ချန်ပီယံလိဂ်ကို ဝင်ခွင့်ရတဲ့ အမှတ်ပေးဇယား ထိပ်ဆုံး ၃ သင်းထဲက ၁ သင်း ဖြစ်နေမယ် ဆိုရင်တော့ အမှတ်ပေးဇယား အဆင့် ၄ နေရာက အသင်းက အလိုလို ကံကောင်းပြီး AFC ချန်ပီယံလိဂ်ကို ဝင်ခွင့်ရမှာ ဖြစ်ပါတယ်။

တရုတ်စူပါလိဂ်နဲ့ ပတ်သတ်ပြီး ထူးခြားချက်ကတော့ လက်ရှိချန်ပီယံ ဂေါင်ဇူးအဲဗားဂရန်ဒီက ၂၀၁၁ ခုနှစ်ကနေ စတင်ပြီး ၆ သင်းမြောက် ချန်ပီယံဖြစ်လာခဲ့တာ ဖြစ်သလို အခုနောက်ဆုံးေ ဘာလုံးရာသီ ၂၀၁၆ ထိအောင် ၆ ကြိမ်မြောက် တဆက်တည်း ချန်ပီယံဆုကို ရယူထားနိုင်တာပဲ ဖြစ်ပါတယ်။ သူ့နောက်မှာတော့ ရှန်ဒေါင်းလူနန် အသင်းက ချန်ပီယံ ၃ ကြိမ်ဖြစ်ဖူးတယ်၊ အခြားချန်ပီယံ ဖြစ်ဖူးတဲ့ အထက်မှာ ပြောခဲ့တဲ့ အသင်းတွေကတော့ ချန်ပီယံ ၁ ကြိမ်စီပဲ ဖြစ်ဖူးကြ ပါတယ်။

တရုတ်စူပါလိဂ်ကို စပွန်ဆာတွေ အဖြစ် ၂၀၀၄ ခုနှစ် အမှတ်ပေးပြိုင်ပွဲအစမှာ Siemens Mobile က ယူရို ၈ သန်း စပေးတယ်၊ နောက်နှစ် ၂၀၀၅ မှာ စပွန်ဆာ မရတော့ဘူး။ ၂၀၀၆မှာ IPhox က ယူရို ၆ သန်း စပွန်ဆာပေးတယ်၊ ၂၀၀၇-၀၈ နှစ်တွေမှာတော့ Kingway ဘီယာက တရုတ်ယွမ်သန်း ၃၆ သန်း တနှစ်အတွက် ပေးခဲ့တယ်။

၂၀၀၉-၁၀ နှစ်တွေ ရောက်တော့ နာမည်ကျော် ကားပစ္စည်းကုမ္ပဏီ Pirelli ဝင်လာပြီး ၁ နှစ်စာ အတွက် ယူရို ၅ သန်းစီနဲ့ ၂ နှစ် စပွန်ဆာ ပေးတယ်၊ ၂၀၁၁ ကနေ ၂၀၁၃ ထိအောင် ၃ နှစ်ကိုတော့ Wanda Plaza က တနှစ် အတွက် တရုတ်ယွမ် ၆၅ သန်းနှုန်းနဲ့ ၃ နှစ် စပွန်ဆာပေးတယ်၊ ၂၀၁၄ ကနေ အခုနှစ် ၂၀၁၇ ရာသီအထိ Ping An အာမခံကုမဏီက တနှစ်ကို ယွမ် သန်း ၁၆၀ ဝန်းကျင်ကို နှစ်စဉ် တနှစ်စာ စပွန်ဆာဆက်တိုက်ပေးနေတာ တွေ့ရပါတယ်။

Ref: www.en.m.wikipedia.rog

The post ဥရောပ ဘောလုံးလိဂ်တွေကို ယှဉ်ပြိုင်ဖို့ ကြိုးစားလာတဲ့ တရုတ်စူပါလိဂ် appeared first on ဧရာဝတီ.

မီရှဲလ်ဝေရဲ့ နာမည်ရင်းက မီရှယ်လ် ဆန်းေ၀ (Michelle Sung Wie) ပါ။ သူမကို ၁၉၈၉ ခုနှစ် အောက်တိုဘာ ၁၁ ရက်မှာ မွေးဖွားပါတယ်။ အခုတော့ သူမက အမေရိကန် ကြေးစား ဂေါက်သီးသမား တဦး၊ သူမရဲ့ အလှအပ၊ အားစကားမှာ ထူးချွန်မှု အပြင် ပြင်ပလူနေမှု ဘဝပုံစံကိုပါ လူအများရဲ့ အားကျချစ်ခင် ခံနေရသူပါ။

ငယ်စဉ်ကတည်းက ဂေါက်သီး ကစားတာ ဝါသနာပါသူ မီရှယ်လ်ဟာ အသက် ၁၀နှစ် အရွယ်ကတည်းက USGA ဆိုတဲ့ သက်ငယ်တန်း ဂေါက်သီးရိုက်ပြိုင်ပွဲမှာ ဝင်ပါခွင့် ရနေပြီ။ အမေရိကန် နိုင်ငံ Women’s Amateur Public Links ပြိုင်ပွဲမှာ အသက် အငယ်ဆုံး ချန်ယီယံ အဖြစ် ဗိုလ်စွဲထားသလို အသက်အငယ်ဆုံး ချန်ပီယံ အဖြစ်လည်း စံချိန်တင်ထားတယ်၊ ပြီးတော့ ကမ္ဘာမှာ နာမည်အကြီးဆုံးလို့ ဆိုနိုင်မယ့် LPGA Tour ဂေါက်သီးရိုက် ပြိုင်ပွဲမှာ အသက်ငယ်ဆုံး အနေနဲ့ ဝင်ခွင့်ရတဲ့ ကစားသမား ဖြစ်လာခဲ့ပါတယ်။

ဒီလိုနဲ့ ၂၀၀၅ ခုနှစ်၊ သူမ အသက် ၁၆ နှစ် ပြည့်မွေးနေ့မှာ ကြေးစားအဆင့်မြင့် ဂေါက်သီးကစားသူ အဖြစ် ရပ်တည်တော့ မယ်လို့ ကြေငြာပြီး ပြိုင်ပွဲကြီးတွေမှာ ဝင်ပြိုင်ခဲ့ပါတယ်။ အကောင်းဆုံး လက်စွမ်းပြမှုနဲ့ အတူ ၂၀၁၄ ခုနှစ် အမေရိကန် ဖိတ်ခေါ် အမျိုးသမီးဂေါက်သီးရိုက် ပြိုင်ပွဲ (U. S Women’s Open) မှာ ဗိုလ်စွဲ ခဲ့ပါတယ်။

သူမဘ၀ အကြောင်း နည်းနည်း ပြောရရင် အခုဆိုရင် မီရှယ်လ်က အသက် ၂၇ နှစ် ရှိပြီ ဖြစ်ပြီး အရပ် ၆ ပေရှိပါတယ်။ အမေရိကန်နိုင်ငံ၊ ဟာဝိုင်ရီမှာ မွေးတယ်။ အခုတော့ အမေရိကန်နိုင်ငံ၊ ဖလော်ရီဒါက ဂျူမီတာမှာ နေတယ်။ ပညာရေးပိုင်းမှာ စတန်းဖို့ တက္ကသိုလ်ကို တက်ခဲ့တယ်၊ ကြေးစားဂေါက်သီးကစားသမား အဖြစ် ၂၀၀၅ ခုနှစ်မှာ ဝင်ခဲ့တယ် ဆိုပေမယ့် သြဇာကြီးမားတဲ့ LPGA Tour ကိုတော့ ၂၀၀၉ ခုနှစ်အတွင်းမှာမှ ဝင်ရောက် ယှဉ်ပြိုင်ခဲ့တာပါ။ ကစားသမား သက်တမ်းတလျှောက် LPGA Tour ပြိုင်ပွဲကြီး ၄ ခုမှာ ဗိုလ်စွဲထား ပါတယ်။

တကယ်ဆို မီရှယ်လ်က ကိုရီးယားသူ ပါ၊ ကိုရီးယား နာမည်က Wie Sung-Mi ဖြစ်ပါတယ်။ ၁၉၈၀ ပြည့်လွန် နှစ်တွေမှာ ကိုရီးယားကနေ အမေရိကန် ရောက်လာသူ မိသားစုရဲ့ တဦးတည်းသော သမီးပါ။ သူ့ရဲ့ ဖခင် Wie Byung-wook က ဟာဝိုင်ရီ တက္ကသိုလ်က ခရီးသွားပညာရပ် ဆိုင်ရာ ပါမောက္ခ တဦးပါ။

Bo လို့လည်း ခေါ်တဲ့ သူမရဲ့ မိခင်က တောင်ကိုရီးယားမှာ နေစဉ်တုန်းကတော့ အငယ်တန်း ဂေါက်သီးရိုက် ပြိုင်ပွဲ ဝင်ခဲ့ဖူးပြီး ၁၉၈၅ ခုနှစ်မှာ ဗိုလ်စွဲခဲ့ဖူးတယ် လို့ သိရပါတယ်။ ပြီးတော့ Bo က Miss Korea လည်း ဝင်ပြိုင်ဖူးသေးတယ် လို့လည်း ဆိုပါတယ်။ ဒီလိုနဲ့ မီရှယ်လ် မိဘတွေ အမေရိကန်ရောက်၊ သူမကို မွေးတော့ သူမက Dual Citizen ဆိုတဲ့ နှစ်နိုင်ငံသား ပုံစံ၊ ဒါပေမယ့် ၂၀၁၃ ခုနှစ် ဖေဖော်ဝါရီမှာတော့ မီရှယ်လ်က တောင်ကိုရီးယား နိုင်ငံသား အဖြစ် ပြန်လည် ခံယူ ထားသူပါ။

သက်ငယ် ကစားသမားဘဝကိုတော့ သူမ အသက် ၄ နှစ်ကတည်းက ဂေါက်သီး စရိုက်တာ တွေ့ရတယ်၊ ၂၀၀၀ ခုနှစ် သူမ အသက် ၁၀ နှစ်မှာ အမေရိကန် အမျိုးသမီး သက်ငယ်တန်း ပြိုင်ပွဲမှာ အနိုင်ရပြီး ပထမဆုံး သက်ငယ်တန်း အောင်မြင်မှု ရတယ်။ ၂၀၀၂ ခုနှစ်အတွင်း ဟာဝိုင်ရီပြည်နယ်၊ ဖိတ်ခေါ် ဂေါက်သီးရိုက် ပြိုင်ပွဲ (အမျိုးသမီး) ပွဲစဉ်မှာ အနိုင်ထပ်ရပြန်တယ်၊ ၂၀၀၃ ခုနှစ်မှာ အမေရိကန် သက်ငယ်တန်း ဂေါက်သီးပြိုင်ပွဲမှာ အနိုင်ရပြီး USGA ရဲ့ အရွယ်ရောက် သက်ငယ်တန်း ပြိုင်ပွဲစုံမှာ ကျား၊ မ မခွဲပဲ အသက် အငယ်ဆုံးနဲ့ ဗိုလ်စွဲသူ အဖြစ် စံချန်တင်လိုက်နိုင်တာ တွေ့ရပါတယ်။

၂၀၀၅ ခုနှစ်မှာ သူမ အနေနဲ့ ကြေးစား ကစားသမားဘ၀ ခံယူလိုက်ပေမယ့် LPGA လို ပွဲတွေကိုတော့ ဝင်ခွင့် မရသေးပါဘူး။ အကြောင်းကတော့ LPGA တွေမှာ အသက် ၁၈ နှစ် ပြည့်ပြီးသူပဲ ကစားခွင့် ရတာကြောင့် ဖြစ်ပြီး ဒီလို အသက် လိုအပ်ချက် အရ သူမဟာ ၂၀၀၈ ခုနှစ် ထိအောင် LPGA တွေမှာ ဝင်ပြိုင်ခွင့် မရခဲ့ပါဘူး။

၂၀၀၉မှာတော့ အသက်ပြည့်လို့ LPGA တွေမှာ ဝင်ခွင့်ရခဲ့ပြီး အခုထိအောင် LPGA ပြိုင်ပွဲစုံမှာ ဝင်ကစားနေတာ ဖြစ်ပါတယ်။ သူမက ၂၀၀၈ ခုနှစ် ဒီဇင်ဘာမှာ LPGA ဝင်ခွင့်ရခါနီး အချိန်ကတည်းက အမျိုးသား ဂေါက်သီး သမား တွကိုပါ ယှဉ်နိုင်အောင် ကြိုးစားမယ် လို့ ကြေငြာခဲ့သူလည်း ဖြစ်ပါတယ်။

ဒီလို ကြိုးစားမှုတွေနဲ့ အတူ LPGA ပွဲစဉ်တွေထဲက ၂၀၀၉ ခုနှစ်၊ နိုဝင်ဘာ ၁၅ ရက်နေ့မှာ Lorena Ochoa Invitational မှာ ပထမဆုံး ဗိုလ်စွဲပြီး ဆုကြေး ဒေါ်လာ ၂ ဒသမ ၂ သိန်းရခဲ့ သလို ပြိုင်ပွဲကြီးတွေထဲမှာ အနိုင်ရဖူးလာတယ်။ နောက်တော့ ၂၀၁၀ ခုနှစ် သြဂုတ် ၂၉ ရက်နေ့မှာ CN Canadian Women’s Open မှာ ထပ်ပြီး ဗိုလ်စွဲတယ်၊ ဆုကြေး ၃ ဒသမ ၃၇၅ သိန်းရတယ်။

ပထမဆုံး LPGA ချန်ပီယံ အဖြစ် ၂၀၁၄ ခုနှစ် ဧပြီ ၁၄ ရက်နေ့က LPGA Lotte Championship မှာ အနိုင်ရတယ်၊ ဆုကြေး ၂ ဒသမ ၅၅ သိန်းရတယ်၊ ပြီးတော့ ၂၀၁၄ ခုနှစ် ဇွန်လ ၂၂ ရက်မှာပဲ အမေရိကန် ဖိတ်ခေါ် အမျိုးသမီး ဂေါက်သီးရိုက် ပြိုင်ပွဲမှာပါ ထပ်ပြီး အနိုင်ရခဲ့တာ တွေ့ရပါတယ်။ ဒီပွဲမှာတော့ ဆုကြေးက ဒေါ်လာ ၇ ဒသမ ၂ သိန်းထိအောင် ရခဲ့တာပါ။

ဒီလို အောင်မြင်မှုတွေ၊ လှပမှုတွေနဲ့ နာမည်ကျော်တဲ့ မီရှယ်လ်ရဲ့ အမျိုးသမီး ဂေါက်သီးမယ်တွေ ထဲမှာ ကမ္ဘာ့ အဆင့် ရပ်တည်နိုင်မှုကို ပြောပြပါမယ်။

၂၀၀၆ ခုနှစ်ကနေ စပြီး သူမ ကြေးစားဂေါက်သီးမယ် အဖြစ် ရပ်တည်ချိန်မှာ ကမ္ဘာ့ အဆင့် ၁၁၊ ၂၀၀၇ မှာ အဆင့် ၇၁ ထိအောင် ကျသွားတယ်၊ ၂၀၀၈ခုနှစ်မှာ အဆင့် ၂၃၈ ထိ ကစားသမားဘ၀ အနိမ့်ဆုံး ရောက်သွား ခဲ့ပြီး ၂၀၀၉ ခုနှစ်မှာတော့ အဆင့် ၁၀ ပြန် ဖြစ်လာတယ်။

၂၀၁၀ ခုနှစ် မှာလည်း အဆင့် ၁၀ ပဲ၊ ၂၀၁၁ ခုနှစ်ရောက်တော့ အဆင့် ၁၇၊ ၂၀၁၂ ခုနှစ်မှာ အဆင့် ၆၂၊ နောက်နှစ် ၂၀၁၃ မှာ အဆင့် ၆၁၊ ၂၀၁၄ ခုနှစ်မှာ ပြိုင်ပွဲကြီးတွေ အနိုင်ရလာပြီး အဆင့် ၆၊ ၂၀၁၅ ခုနှစ်မှာ အဆင့် ၂၈၊ ပြီးခဲ့တဲ့ ၂၀၁၆ အတွင်းမှာတော့ နိုင်ပွဲကောင်းကောင်း မရလို့ အဆင့် ၁၇၃ ထိအောင် လျော့ကျသွားတာ တွေ့ရပါတယ်။

Ref: www.en.m.wikipedia.org

The post ဂေါက်သီးလောကရဲ့ နတ်သမီးတပါး ဖြစ်တဲ့ မီရှဲလ်ဝေ appeared first on ဧရာဝတီ.

Paul Allen က အားကစားနဲ့ ပတ်သက်မှု မရှိသလို လူအများ စိတ်ဝင်စားတဲ့ ဘောလုံး အသင်းတခု၊ အားကစား အသင်း တခုကို ပိုင်ဆိုင်သူလည်း မဟုတ်ပါ။ ဒါပေမယ့် သူ့ အကြောင်းက စိတ်ဝင်စားစရာကောင်းပါတယ်။ ဘာကြောင့်လဲ ဆိုတော့ သူဟာ ယနေ့ခေတ်ကာလမှာ ကမ္ဘာ့ အချမ်းသာဆုံး ပုဂ္ဂိုလ်စာရင်းမှာ အဆင့် ၄၆ ဖြစ်သလို သူဟာ စွယ်စုံရ စီးပွားရေး သမား တဦး ဖြစ်နေလို့ပါ။

သူ့ရဲ့ နာမည် အပြည့်အစုံက Paul Gardner Allen ဖြစ်ပါတယ်။ ၁၉၅၃ ခုနှစ် ဇန်နဝါရီ ၂၁ မှာ မွေးပါတယ်။ အမေရိကန် စီးပွားရေးသမား၊ ရင်းနှီးမြှပ်နှံသူ၊ ပြီးတော့ ပရဟိတသမား၊ အလှူအတန်းကလည်း ရက်ရောတယ်၊ ဒေါ်လာ သန်းကို ရာနဲ့ ချီပြီး လှူဒါန်းထားတဲ့ သူပါ။ သူ့ကို လူသိများတဲ့ အကြောင်းရင်းကတော့ လက်ရှိ ကမ္ဘာမှာ အချမ်းသာဆုံး သူဌေးကြီး ဘီလ်ဂိတ်နဲ့ အတူ နာမည်ကျော် ကွန်ပျူတာ ကုမ္ပဏီ Microsoft ကို ပူးတွဲ တည်ထောင်ခဲ့လို့ ဖြစ်ပါတယ်။ အထက်မှာ ပြောခဲ့သလို လက်ရှိ ကမ္ဘာမှာ သူက ၄၆ ယောက်မြောက် အချမ်းသာဆုံး ဖြစ်နေပြီး ပိုင်ဆိုင်မှု အနေနဲ့ ဒေါ်လာ ၂၀ ဒသမ ၇ ဘီလီယံ လောက်ထိအောင် ပိုင်ဆိုင်နေတာ ဖြစ်ပါတယ်။

အသက် ၆၄ နှစ် အရွယ် အယ်လင်ကို ဝါရှင်တန်က ဆီယက်တယ်မှာ မွေးတယ်၊ အခုတော့ ဝါရှင်တန်က Mercer ကျွန်းမှာ စံအိမ်ဆောက်ပြီး နေတာ တွေ့ရပါတယ်။ သူ့ရဲ့ လက်ရှိ လုပ်ငန်းနဲ့ ပိုင်ဆိုင်မှုတွေကို ကြည့်မယ် ဆိုရင် Vulcan Inc ရဲ့ တည်ထောင်သူ အဖြစ်ရော လက်ရှိ ဥက္ကဌ တာဝန်ကိုပါ ယူထားတယ်၊ Seattle Seahawks လို အမေရိကန် ဘောလုံး အသင်းနဲ့ Portland Trail Blazers လို အမေရိကန် နာမည်ကျော် ဘတ်စကတ်ဘော အသင်းတွေကို ပိုင်ဆိုင်ထားတယ်။ Seattle Sounders လို အမေရိကန် အမှတ်ပေး ဘောလုံးပြိုင်ပွဲ မေဂျာလိဂ်ဝင် ဘောလုံးအသင်းကိုလည်း ရှယ်ယာဝင်ထား ပါသေးတယ်။

ဦးနှောက်ပိုင်းဆိုင်ရာ လေ့လာမှု အတွက် အယ်လင်အဆင့်မြင့် သိပ္ပံကို တည်ထောင်ခဲ့ပြီး လေ့လာမှုနဲ့ အဆိုပါ ကျောင်း အတွက် ဒေါ်လာ သန်းပေါင်းရာချီပြီး အသုံးပြု လှူဒါန်းခဲ့တာလည်း တွေ့ရပါတယ်။ ပြီးတော့ ဆဲလ်လေ့လာရေး ဆိုင်ရာ အယ်လင် အဆင့်မြင့် သိပ္ပံကိုလည်း တည်ထောင်ဖွင့်လှစ်ထားတာ တွေ့ရပါတယ်။

လက်ရှိ မောင်းသူမဲ့ကားနဲ့ အခြား နည်းပညာပိုင်းမှာ အားလုံး အာရုံစိုက်နေရတဲ့ အယ်လင် AI (မှတ်ဉာဏ်တု)နည်းပညာ လေ့လာရေး အဆင့်မြင့် သိပ္ပံကိုလည်း တည်ထောင်ထားတာပါ။ Microsoft ကတော့ အထက်မှာ ပြောသလို ဘီလ်ဂိတ်နဲ့ အတူတူ တွဲဖက် တည်ထောင်သူ အဖြစ်လည်း မှတ်တမ်းဝင်ထားပါတယ်။

၁၉၇၅ ခုနှစ်ကနေ စတင်ပြီး စီးပွားရေး လောကမှာ ကျင်လည်နေတာ ဖြစ်ပြီး အခုချိန်ထိ အနားမယူသေးပါဘူး။ ဖခင် Kenneth Sam Allen နဲ့ မိခင် Enda Faye Allen တို့ကနေ မွေးတယ်။ သူမမှာ အစ်မ ဖြစ်သူ Jody Allen တယောက်ပဲ မွေးချင်း ရှိသလို သူလည်း အခုချိန်ထိ အိမ်ထောင် မပြုဘဲ လူပျိုကြီး အဖြစ် နေထိုင်နေဆဲ ဖြစ်နေပါတယ်။

ငယ်စဉ်က Lakeside ကျောင်းမှာ တက်ရင်း အယ်လင်ထက် ၃ နှစ်ငယ်တဲ့ ဘီလ်ဂိတ်နဲ့ သူငယ်ချင်းတွေ ဖြစ်လာတယ်၊ ပြီးတော့ ကွန်ပျူတာ တီထွင်ဖို့ တိုင်ပင် စိတ်ကူးမိသည်ထိ အတွဲညီလာတာလည်း တွေ့ရပါတယ်။ ဝါရှင်တန် တက္ကသိုလ်က လက်တွေ့ စမ်းသပ်ခန်းကို ကွန်ပျူတာ တီထွင်မှု လေ့လာရေးအတွက် ဝင်သုံးလို့် သူတို့ကို လက်တွေ့ခန်းဝင်ခွင့် အပိတ်လည်း ခံခဲ့ရဖူးပါတယ်။

ဒီလိုနဲ့ တွဲဖက်ညီညီ အယ်လင်နဲ့ ဘီဂိတ်တို့ ကျောင်းမပြီးဘဲ အယ်လင်လည်း ဝါရှင်တန်ပြည်နယ် တက္ကသိုလ်ကနေ ထွက်ခဲ့ရတယ်။ ပြီးတော့ Microsoft ကို ပူးပေါင်း တည်ထောင် လုပ်ကိုင်ခဲ့ကြပါတယ်။ နောက်ပိုင်း Microsoft ရဲ့ အောင်မြင်မှုတွေက ဘီလ်ဂိတ်ကို ကမ္ဘာ့ အချမ်းသာဆုံး သူဌေး ဖြစ်လာစေသလို အယ်လင် ကတော့ နည်းပညာပိုင်းထက် စီးပွားရေး သမားဖြစ်လို့ Microsoft ကို ချုပ်ကိုင်နိုင်မှု အားနည်းပေမယ့် အခုလို အဆင့် ၅၀ အတွင်းမှာ ရပ်တည်နိုင် လောက်အောင် ချမ်းသာနေတာ ဖြစ်ပါတယ်။

အယ်လင်ကို စွယ်စုံရလို့ ဘာကြောင့် ပြောတာလဲ ဆိုတော့ သူဟာ စီးပွားရေး လုပ်တယ်၊ အောင်မြင်တယ်၊ ပရဟိတ လုပ်တယ်၊ အောင်မြင်ထိရောက်အောင် လုပ်နိုင်တယ်၊ ပြီးတော့ အယ်လင် အနုပညာ ဝါသနာပါတော့ အသက် ၁၆ နှစ် ကနေ စတင်ပြီး ကျွမ်းကျင် အဆင့်အနေလောက်နဲ့ လျှပ်စစ်ဂစ်တာ တီးနေပြီ၊ ၂၀၀၀ ခုနှစ်မှာ ထွက်ရှိခဲ့တဲ့ Grown Men ဆိုတဲ့ တေးစီးရီးမှာ အယ်လင်က ရပ်သမ်ဂစ်တာ ဝင်တီးသေးတယ်။

ပြီးတော့ သီချင်းလည်း ဆိုချင်သေးတဲ့ အယ်လင်က ၂၀၁၃ မှာ Sony Legacy တေးသံသွင်းကနေ Everywhere at once စီးရီးကို အယ်လင်နဲ့ အန်ဒါသင့်ခါ (Under thinkers)ပေါင်းပြီး အခွေ ထုတ်လိုက်သေးတယ်၊ PopMatters.com က ဆိုရင် အဆိုပါ တေးစီးရီးက Blue-rock ဂီတထဲမှာ တကယ်ကောင်းတဲ့ အခွေတခွေလို့ ချီးကျုးခံရတာတောင် တွေ့ရပါသေးတယ်။ ပြီးတော့ ဇိမ်ခံဖို့ရော ပင်လယ်ပြင်က မတော်တဆမှုတွေ အတွက် အကူအညီပေး ရှာဖွေကယ်ဆယ်ရေး တွေကိုပါ လုပ်ဆောင်ဖို့ အယ်လင်က အားလပ်ရက်တွေကို ပင်လယ်ပြင်မှာ ရွက်လှေတစင်းနဲ့ အချိန်ကုန်စေတတ်ပါသေးတယ်။ ဒါကတော့ နောက်ထပ် ဝါသနာ တစ်ခုပေါ့။ သူ့ရဲ့ ရွက်လှေ Octopus က ၄၁၄ ပေရှည်တယ်၊ ၂၀၀၃ ခုနှစ်ထိအောင် ကမ္ဘာ့အကြီးဆုံး ရွက်လှေ အဖြစ် မှတ်တမ်းဝင်ထားတဲ့ မော်ဒယ်၊ ၂၀၁၃ နဲ့ နောက်ပိုင်းမှာတော့ ကမ္ဘာမှာ ၁၄ စီးမြောက် အကြီးဆုံး အဆင့်ချိတ်နေဆဲပါ။

ရွက်လှေပေါ်မှာ ရဟတ်ယာဉ် ၂ စင်း၊ မော်တော်ဘုတ် ၁ စင်း၊ ရေကူးကန်၊ သီချင်းဆိုခန်း၊ ဘတ်စကတ်ဘောကစားဖို့ နေရာတွေနဲ့ သေချာ ပြင်ဆင်ပါရှိတာ ဖြစ်ပါတယ်။ အယ်လင်က အခု ရွက်လှေနဲ့ လူပျောက်မှုပေါင်း များစွာ ရှာဖူးတယ်၊ သူ မရှိရင်လည်း အခု ရွက်လှေကို အရေးပေါ် ရှာဖွေရေးနဲ့ အကူအညီပေးရေး အလုပ်တွေမှာ သုံးနိုင်အောင် ထည့်ပေးထား တယ်။ ဒါက ရွက်လွှင့်တတ်သူ၊ ကယ်ဆယ်တတ်သူ။

နောက်ထပ် စွယ်စုံရသမား အဖြစ် မှတ်တမ်းဝင်စေတာက အယ်လင်က စာရေးဆရာ အဖြစ်လည်း စာအုပ်တွေ ရေးသား ထုတ်ဝေတယ်။ ၂၀၁၁ ခုနှစ်မှာ အယ်လင်ရေးတဲ့ Idea Man: A Memoir by the Cofounder of Microsoft ထွက်ခဲ့တယ်။ ဒီစာအုပ်မှာ အယ်လင်ရဲ့ ငယ်ဘ၀ ဖြတ်သန်းမှု၊ Microsoft နဲ့ ပတ်သတ်ပြီး အသေးစိပ် အကြောင်းအရာတွေနဲ့ Micorsoft အနေနဲ့ ဘာကြောင့် ကမ္ဘာ့ အအောင်မြင်ဆုံး နည်းပညာ ကုမ္ပဏီ ဖြစ်လာရတယ် ဆိုတာကိုပဲ ပြောထားတာ တွေ့ရပါတယ်။ ဒါကြောင့် စီးပွားရေး အောင်မြင်တယ်၊ ပရဟိတ လုပ်တယ်။ အလှူအတန်း ရက်ရောတယ်၊ အနုပညာလည်း ကျွမ်းကျင် တယ်၊ စာလည်းရေးတယ်၊ ဒါကြောင့် စွယ်စုံရ သူဌေးကြီး အယ်လင် အကြောင်း ပြောပြချင်တာပါ။ ။

Ref: www.en.m.wikipedia.org

The post သိပ္ပံပညာကို စိတ်ဝင်စားပြီး အနုပညာဖန်တီးတတ်သူ စီးပွားရေးသမားကြီး ပေါလ်အယ်လင် appeared first on ဧရာဝတီ.

အခု ပြောမှာကတော့ အခုနှစ် အတွင်း ကစားနေတဲ့ နပန်းသမားတွေထဲက လစာ အမြင့်ဆုံး ရရှိနေတဲ့ နပန်းသမားတွေ အကြောင်းပဲ ဖြစ်ပါတယ်။ Smack Down, Raw နဲ့ WWE တွေ အဖြစ် ခွဲခြား သတ်မှတ်ထားပေမယ့် လူကြိုက် အများဆုံးနဲ့ နာမည်အကြီးဆုံး WWE ရဲ့ လစာ အမြင့်ဆုံး ရရှိနေတဲ့ နပန်းသမားတွေပဲ ဖြစ်ပါတယ်။

(၁) Brock Lesnar ။ ။ တနှစ် ဝင်ငွေ ၁၂ သန်းထိ ရှိပါတယ်။ ဇူလိုင်လ အတွင်းက UFC ရဲ့ ကစားသမား တဦးဖြစ်တဲ့  Mark Hunt နဲ့ ပွဲစဉ် တပွဲတည်းမှာတင် ဝင်ငွေ ၂ ဒသမ ၅ သန်းထိ ရခဲ့ပါတယ်။ ဒါပေမယ့် အဆိုပါ ပွဲစဉ်နောက်ပိုင်း ဆေးစစ်ချက် ကျခဲ့လို့ ဆုကြေးကို ၁၀ ရာခိုင်နှုန်းလောက် ပြန်ပေးခဲ့ရတာလည်း တွေ့ရပါတယ်။ ပြီးခဲ့တဲ့ နှစ် အတွင်းကနေ စတင်ပြီး ပွဲစဉ်တွေ အများအပြား ပြန်လည် ထိုးသတ်လာသလို လူကြိုက်များမှုနဲ့ ဝင်ငွေကောင်းလာတာ ဖြစ်ပါတယ်။

(၂) John Cena ။ ။ ဒေါ်လာ ၈ သန်းလောက် ဝင်ငွေ ရှိပါတယ်။ အခုချိန်ထိ WWE မှာ စီနားကို အကောင်းဆုံး ထိုးသတ်နိုင်သူ အနီးဆုံး ပြိုင်ဘက်ကောင်း မရှိသေးဘူး လို့တောင် ဆိုနိုင်ပေမယ့် ဝင်ငွေတော့ နည်းနည်း ကျသွားပါတယ်။ ၂၀၁၆ ခုနှစ် အတွင်းမှာလည်း ပခုံး ဒဏ်ရာကြောင့် ၅ လ လောက် အနားယူခဲ့ရသူပါ။ ဒါပေမယ့် နှစ်ကုန်ပိုင်း နောက်ဆုံး ၃ လမှာတော့ လက်စွမ်းပြ ကစားပွဲတွေနဲ့ ပရိသတ် ပြန်လည် လက်ခံလာခဲ့ပါတယ်။

(၃) Triple H ။ ။ လက်ရှိ WWE ပွဲစဉ်တွေမှာ ထိုးသတ်မှု သိပ်မတွေ့ရတော့ဘူး ဆိုပေမယ့် သူက WWE ရဲ့ လူငယ် အားကစား မွေးထုတ်ရေး အပိုင်းမှာလည်း လက်ထောက်အုပ်ချုပ်သူ ဖြစ်နေတယ်၊ Live လွှင့်တဲ့ အစီအစဉ်တွေမှာလည်း ပါတယ်၊ ပွဲစီစဉ်သူ အဖြစ်လည်း တာဝန်ယူထားလို့ တနှစ်ကို ဝင်ငွေ ၃ ဒသမ ၈ သန်းထိ ရနေဆဲပါ။ အရင်နှစ်က ဆိုရင် ထိုးသတ်ကြေးတွေ မပါပဲ လစာ၊ ငွေသားဆုကြေးနဲ့ ကုမ္ပဏီရှယ်ယာထဲမှာ ပါဝင်ထားမှုတွေကတင် ဝင်ငွေ ၁ ဒသမ ၃ သန်း ရခဲ့သူလည်း ဖြစ်ပါတယ်။

(၄) Roman Reigns ။ ။ နောက်ပိုင်းမျက်နှာသစ် နပန်းသမားတွေ ထဲမှာတော့ ရိုမန်ကို နှစ်သက်သူ အများဆုံး ရှိနေတယ် လို့ ဆိုရလောက်အောင် လူကြိုက်များပါတယ်။ အချိန်တို အတွင်းမှာ WWE ရဲ့ ထိပ်တန်း ကစားသမား တဦး ဖြစ်လာပါတယ်။ အသက် ၃၁ နှစ်ပဲ ရှိသေးတဲ့ ရိုမန်ဟာ ၂၀၁၆ ခုနှစ်အတွင်း ကစားခဲ့တဲ့ အထူးပွဲစဉ် ၇ ခု ပါဝင်ထိုးသတ်ခွင့် လည်း ရခဲ့ပါတယ်။ ပြီးတော့ အရင်နှစ်ထဲမှာ စီနားထက်ကိုပဲ ပရိသတ် ပိုများခဲ့ပြီး ဝင်ငွေ ၃ ဒသမ ၅ သန်းထိ ရှိနေတာ တွေ့ရပါတယ်။

(၅) Dean Ambrose ။ ။ အရင်နှစ်က တနှစ်တာလုံး ကစားခဲ့တဲ့ WWE ပွဲစဉ်တွေထဲမှာ အမ်းဘရို့စ်လောက် ပွဲချိန် အများဆုံး၊ ပွဲတိုင်းနီးပါး ပါဝင်ကစားခဲ့သူ မရှိခဲ့ပါဘူး။ ဒါကြောင့်လည်း ဝင်ငွေ ၂ ဒသမ ၇ သန်းထိ ရှိခဲ့သလို စာရင်းတွေ အရ ဆိုရင် သူဟာ အရင်နှစ်ထဲမှာ ၁၉၄ ပွဲထိအောင် စင်မြင့်ထက် ထိုးသတ်မှုရော ပြောဆို ဖျော်ဖြေမှုပါပေးခဲ့ပါတယ်။ ဒါဟာ အခြား သူတွေထက် ၉ ရာခိုင်နှုန်းလောက်ထိ အခမ်းအနားတိုင်းမှာ ပါဝင်ခဲ့တာ ဖြစ်ပါတယ်။ အကောင်းဆုံး နပန်းသမား အဖြစ် စာရင်းဝင်ဖို့ ကြိုးစားနေပေမယ့် ပရိသတ်ကတော့ အမ်းဘရို့စ်ကို မျက်နှာသိ ဖြစ်လာစေခဲ့ပါတယ်။

(၆) AJ Styles ။ ။ ၂၀၁၆ ခုနှစ် နှစ်ဆန်းပိုင်းကနေ စတင်ပြီး ဂျပန်နပန်းလောက ကနေ WWE မှာ အမြဲတမ်း ရှိနေဖို့ ခြေချလာခဲ့သူ ဖြစ်ပြီး သူရောက်စမှာတင် ကျင်းပတဲ့ Royal Rumble ပွဲစဉ်မှာ သူ့ကို ပရိသတ်က စတင် သတိထားမိပြီး လူကြိုက်များ လာသလို ဝင်ငွေလည်း ၂ ဒသမ ၄ သန်းထိ ရှိလာပါတယ်။ လက်ရှိ ရိုမန် (Roman Reigns)၊ အမ်းဘရိုစ် (Ambrose)၊ ကီဗင် (Kevin Ownens) တို့နဲ့ တွဲဘက် လူကြိုက်များနေပါတယ်။ အရင်နှစ်က သူတို့တွေ အဓိက ပါဝင်မှုနဲ့ အတူ အထူးပွဲစဉ်ပေါင်း တဒါဇင်လောက်ထိ ကျင်းပကစားနိုင်ခဲ့တာလည်း တွေ့ရပါတယ်။

(၇) Shane McMahon ။ ။ သူလည်း မထင်မှတ်လောက်အောင် တခြား နပန်းသမားတွေထက် ဝင်ငွေကောင်းပြီး တစ်နှစ်ကို ၂ ဒသမ ၂ သန်းထိ ရှိပါတယ်။ ပြီးခဲ့တဲ့ ဖေဖော်ဝါရီလကမှ ၆ နှစ်ကြာ WWE နဲ့ ကင်းကွာနေပြီးမှ ပြန်ကစားလာ တာပါ။ Wrestle Mania 32 မှာ Untertaker လို့ နာမည်ကျော် ကစားသမားနဲ့ ထိုးသတ်ခဲ့ပြီး လူကြိုက်များလာသလို ၂၀၁၆ ခုနှစ် အတွင်းကလည်း ဝင်ငွေ ၂ ဒသမ ၁၅ သန်းလောက်ထိ ရခဲ့တယ်လို့ WWE က ဆိုသလို အခုနှစ်လည်း လူကြိုက် ဆက်များနေတာ ဖြစ်ပါတယ်။

(၈) The Undertaker ။ ။ ၃၃ နှစ်ကြာ နပန်းလောကမှာ အကောင်းဆုံး ကစားသမား တဦး အနေနဲ့ ရပ်တည်ထားနိုင် သူပါ။ အရင်နှစ်က အထူးပွဲစဉ် ၅ ပွဲ ထိုးသတ်ခဲ့ပြီး ဝင်ငွေ ၂ သန်းလောက်ထိ ရခဲ့ပါတယ်။ အသက် ၅၂ နှစ် ရှိနေပြီ ဖြစ်သလို အခုလို အရွယ်ထိအောင် ထိပ်တန်း ကစားသမား အဖြစ် ရပ်တည်နိုင်သူ အရေအတွက် အနည်းငယ်ထဲက တဦးပါ။ TV ကနေ ထုတ်လွှင့်ပြသမှုတွေပါ လူကြိုက်များနေဆဲ ဖြစ်ပါတယ်။

(၉) Seth Rollins ။ ။ သူလည်း အထက်က သေမင်း (Undertaker)လိုပဲ ဝင်ငွေ ၂ သန်းထိ ရှိနေပါတယ်။ တကယ် ဆိုရင် သူက ထိပ်တန်းဝင်ငွေ အကောင်းဆုံး ၅ ဦးစာရင်း အတွင်းထိ ရပ်တည်နိုင်မယ့်သူ ဖြစ်ပေမယ့် အရင် ၂၀၁၆ ခုနှစ် ပထမ ၅ လ အတွင်းမှာ ဒူးဒဏ်ရာကြောင့် အနားယူခဲ့ရတာကြောင့် အဆိုပါ လတွေ အတွက် ဝင်ငွေ မကောင်းခဲ့လို့ အခုလို ၂ သန်းပဲ ရှိနေခဲ့တာပါ။ ဒါပေမယ့် နပန်းလောကရဲ့ လစာအနေအထား အရတော့ သူဟာ မကြာခင် အခုထက် ဝင်ငွေ ပိုကောင်းလာတော့မယ့် သူ တယောက်ပါ။

(၁၀) Randy Orton ။ ။ ရိုလင် (Seth Rollins) လိုပဲ အရင်နှစ်က အော်တွန်လည်း ဇူလိုင်လကုန်ထိ ဒဏ်ရာကြောင့် နားနေခဲ့ရပါတယ်။ ဒီလို ကာလတိုလေးပဲ ကစားရသည့်တိုင်အောင် အော်တွန်က WWE ရဲ့ လစာနဲ့ ဝင်ငွေ အကောင်းဆုံး ကစားသမား အဖြစ် ပရိသတ် အခိုင်အမာ ရထားလို့ ရပ်တည်နေနိုင်ပါသေးတယ်။ Summer Slam လို အထူးပွဲစဉ်တွေမှာ Brock Lesnar နဲ့ ယှဉ်ပြိုင်ထိုးသတ်ခဲ့မှုတွေနဲ့ အတူ သူကို့ လူကြိုက်များနေဆဲ ဖြစ်ပါတယ်။

Ref: www.forbes.com 

The post ၂၀၁၇ ခုနှစ်ရဲ့ လစာ အမြင့်ဆုံး နပန်းသမားများ appeared first on ဧရာဝတီ.

အာရှတိုက် ဆိုတာကလည်း အားကစားနယ်ပယ်ပိုင်းမှာ ကမ္ဘာ့အဆင့် ထိပ်တန်းကို မရောက်သေးဘူး ဆိုပေမယ့် တရုတ်နဲ့ အိန္ဒိယလို အင်အားကြီး နိုင်ငံတွေ တည်ရှိတာရယ်၊ အခု ၂၁ ရာစုမှာ ဥရောပနဲ့ အနောက်နိုင်ငံတွေထက် စီးပွားရေးရော အားကစားမှာပါ အာရှအနေနဲ့ ရှေ့တန်းကနေ ရပ်တည်လာနိုင်ဖို့ ရှိနေပါပြီ။ ဒီအနေအထားမှာ နိုင်ငံအလိုက် အားကစား အားပေးမှုနဲ့ တည်ဆောက်ထားတဲ့ အာရှတိုက် အတွင်းက အကြီးဆုံး အားကစားကွင်းတွေ အကြောင်းကို ပြောချင်ပါတယ်။

စာရင်းတွေ အရတော့ အာရှတိုက် တလွှားမှာ အားကစားကွင်းလို့ သတ်နိုင်တဲ့ ကွင်းပေါင်း ၂၂၀ လောက်ထိ ရှိပါတယ်။ ပျမ်းမျှ အနေနဲ့တော့ အားကစားကွင်း တကွင်းစီဟာ ပရိတ်သတ် ၃ သောင်းနဲ့ အထက် ဆံ့ဝင်တာ လည်း ဖြစ်ပါတယ်။ အဓိကအနေနဲ့တော့ အဆိုပါ အားကစားကွင်းတွေမှာဘောလုံး၊ ခရစ်ကက်၊ ဘေ့ဘောနဲ့ အခြား အားကစား နည်းစုံလက်ခံကျင်းပတာတွေ လုပ်ဆောင်နေတာပါ။

လက်ရှိမှာတော့ ပရိတ်သတ် ၁ သိန်းခွဲ ထိ ဆံ့တဲ့ မြောက်ကိုရီးယားနိုင်ငံက Rungrado 1stMay အားကစားကွင်းက အကြီးဆုံး ဖြစ်ပါတယ်။ Rungrado 1st May အားကစားကွင်းက မြောက်ကိုရီးယားနိုင်ငံ၊ ပြုံယမ်းမှာ ရှိပါတယ်။ လက်ရှိ ကမ္ဘာမှာလည်း အကြီးဆုံး အားကစားကွင်းအဖြစ် သတ်မှတ်ခံထားရပါတယ်။ အားကစား အခမ်းအနားတွေနဲ့ ဘောလုံးပွဲတွေ အများဆုံး လက်ခံ ကျင်းပ ပါတယ်။ Arirang Festival လို့ လူသိများတဲ့ ကစားပွဲတွေလည်း မကြာခဏ လက်ခံကျင်းပတာ တွေ့ရပါတယ်။

၁၉၈၉ ခုနှစ် မေလ ၁ ရက်နေ့မှာ အပြီးသတ် တည်ဆောက်နိုင်ခဲ့တာဖြစ် သလို Rungrado မှာ ရှိလို့ အဆိုပါ တည်နေရာနဲ့ ပြီးစီးတဲ့ နေ့ရက်ကိုတွဲဖက် အမည်ပေးထားတာ ဖြစ်ပါတယ်။ ပင်မကွင်းရဲ့ အကျယ်က စတရန်းပေ ၂ ဒသမ ၄၂ သိန်း ကျယ်ဝန်းပြီး အားကစား အဝန်းအဝိုင်း တခုလုံးကတော့ ၂ ဒသမ ၂ စတုရန်းပေသန်း ကျယ်ဝန်းပါတယ်။

မလေးရှားနိုင်ငံရဲ့ အားကစားကွင်း National Stadium ကလည်း ပရိတ်သတ် ၁ သိန်း ၁ သောင်းထိ ဆံ့လို့ သူလည်း အကြီးဆုံးကွင်းတွေထဲက တခုပါပဲ။ ကွာလာလမ်ပူမှာ ရှိပါတယ်။ ၁၉၉၈ ခုနှစ် ဇန်နဝါရီလ ၁ ရက်နေ့မှာ ဖွင့်လှစ်ပါတယ်။ ၁၉၉၈ ခုနှစ် ဓနသဟာယနိုင်ငံများ အားကစားပွဲကို လက်ခံကျင်းပခဲ့ပါတယ်။ မလေးရှားနိုင်ငံ ကိုယ်စားပြု ဘောလုံးအသင်း ရဲ့ အိမ်ကွင်းဆိုလည်း မမှားပါဘူး။ ကမ္ဘာမှာတော့ ၂၄ ဆင့်မြောက် အကြီးဆုံး အားကစားကွင်း အဖြစ် မှတ်တမ်းဝင်နေ ပါတယ်။ ဂီတဖျော်ဖြေပွဲတွေလည်း တခါတရံ လက်ခံကျင်းပလေ့ ရှိပါတယ်။

ဘင်္ဂလားဒေ့ရှ် ခရစ်ကက် အဖွဲ့ချုပ်ရဲ့ ဦးဆောင်မှုနဲ့ အသစ် တည်ဆောက်အသုံးပြုနေတဲ့ Sheikh Kamal International Stadium အမည်ရှိ ခရစ်ကက်ကွင်း ကလည်းအာရှမှာ တတိယအကြီးဆုံး အဖြစ် စာရင်း ဝင်နေပါတယ်။ Cox Bazar မှာ တည်ရှိပါတယ်။ ပရိတ်သတ် ၁ သိန်းထိ ဆံ့ပါတယ်။ ခရစ်ကက်ပွဲတွေ လက်ခံကျင်းပတယ်၊ ၂၀၁၄ ခုနှစ်က ဆိုရင် ICC Twenty 20 ပွဲကို လက်ခံကစားဖိ့ု သဘောတူညီချက်ထိ ရခဲ့ပေမယ့် ကွင်းကို အပြီးသတ် တည်ဆောက်မှု နောက်ကျနေလို့ မကစားဖြစ်ခဲ့တာတွေ့ရပါတယ်။ ၂၀၁၄ ခုနှစ် မတ်လ ၅ ရက်မှာမှ Women’s One Day International ပွဲစဉ်ကို ပထမဆုံး လက်ခံကစားနိုင်ခဲ့ပြီး ဘင်္ဂလားဒေရှ်နဲ့ ပါကစ္စတန်တို့ ကစားခဲ့ကြပါတယ်။

Shah Alam Stadium ဆိုတာကလည်း မလေးရှားမှာပဲ တည်ရှိတာပါ။ ပရိတ်သတ် ၈၁၁၄၄ ထိအောင် ဆံ့ပါတယ်။ ဘောလုံးပွဲတွေ၊ အားကစား အခမ်းအနားတွေနဲ့ ပတ်လမ်း အပြေးပြိုင်ပွဲတွေ လက်ခံကျင်းပပါတယ်။ ၁၉၉၀ ပြည့်နှစ်မှာ ကွင်းကို စတင်တည်ဆောက်ပြီး ၁၉၉၄ ခုနှစ်မှာ အပြီးသတ်ခဲ့ပါတယ်။ ကမ္ဘာ့အဆင့် အားကစားပွဲတွေကို လက်ခံကစားနိုင် သည်ထိ တည်ဆောက်ထားတဲ့ ကွင်းပါ။ မလေးရှား အမှတ်ပေးဖလားပြိုင်ပွဲဝင် PKNS FC ရဲ့ အိမ်ကွင်းလည်း ဖြစ်ပါတယ်။ အာရှမှ ၄ ခုမြောက် အကြီးဆုံးကွင်းပါ။

သူ့နောက်မှာတော့ တရုတ်နိုင်ငံ၊ ဂေါင်ဒွန်းရှိတဲ့ Guangdong Olympic Stadium က ပရိတ်သတ် ၈၀၀၁၂ ဦး ဆံ့လို့ အဆင့် ၅၊ တရုတ်နိုင်ငံဘေကျင်းမှာ ရှိတဲ့ Beijing National Stadium ကပရိတ်သတ် ၈၀၀၀၀ ဆံ့လို့ အဆင့် ၆၊ အီရန်နိုင်ငံ တီဟီရန်မှာ ရှိတဲ့ Azadi Stadium က ပရိတ်သတ် ၇၈၁၁၆ ဦး ဆံ့လို့ အဆင့် ၇၊ ဆီးရီးယားနိုင်ငံ၊ အလက်ပိုမှာ ရှိတဲ့ Aleppo International Stadium က ပရိတ်သတ် ၇၅၀၀၀ ဆံ့လို့ အဆင့် ၈၊ ဆော်ဒီအာရေဗျ နိုင်ငံ၊ ရီဒက်မှာ ရှိတဲ့ King Fahd International Stadium က ပရိတ်သတ် ၇၅၀၀၀ ဆံ့ပြီးအဆင့် ၉၊ အီရန်နိုင်ငံ၊ အစ်ဖာဟန်မှာ ရှိတဲ့ Naghsh-e-JahanStadium ကလည်းပရိတ်သတ် ၇၅၀၀၀ ဆံ့ပြီးအဆင့် ၁၀ တွေမှာ အသီးသီး ရပ်တည်ပြီး အကြီးဆုံး အားကစား ကွင်းတွေ အဖြစ် တည်ရှိနေတာ ဖြစ်ပါတယ်။

Ref: www.worlddatlas.com

The post အာရှတိုက်ရဲ့ အကြီးဆုံးအားကစားကွင်းများ appeared first on ဧရာဝတီ.

အမေရိကန်ဟာ ဥရောပနဲ့ အာရှမှာ လူကြိုက် အများဆုံးလို့ သတ်မှတ်နိုင်တဲ့ ဘတ်စကက်ဘော၊ American Football နဲ့ ဟော်ကီ၊ ဂေါက်သီး၊ တင်းနစ်တွေ ပြီးမှ ဘောလုံးပြိုင်ပွဲကို လူစိတ်ဝင်စားမှု ရှိတယ် လို့ ဆိုရမှာပါ။ ဘောလုံးအားကစား ဖွံ့ဖြိုးဖို့ အမေရိကန်လည်း ၂၀၀၀ ပြည့်နှစ် ဝန်းကျင်မှာ စတင် ကြိုးပမ်းလာတာ တွေ့ရပြီး ပြည်တွင်း အမှတ်ပေး ဘောလုံး ပြိုင်ပွဲတခုကို စတင် ကျင်းပလာတာ တွေ့ရပါတယ်။ အဲဒါကတော့ အခုပြောမယ့် မေဂျာလိဂ် ဘောလုံး ပြိုင်ပွဲပါ။ အင်္ဂလန်အခေါ် Football နဲ့ အမေရိကန် အခေါ် Soccer တို့ ကွဲပြားမှုကြောင့် အခု အမှတ်ပေးပြိုင်ပွဲရဲ့ အမည်ကလည်း Major League Soccer လို့ အမည်ရနေတာ ဖြစ်ပါတယ်။

အမျိုးသား အမှတ်ပေး ဘောလုံးပြိုင်ပွဲ အဖြစ် သတ်မှတ်ကျင်းပနေတဲ့ အခုပွဲစဉ်တွေက မြောက်အမေရိကတိုက် အတွင်း အမေရိကန်နဲ့ ကနေဒါ ဒေသမှာတော့ အဆင့်အမြင့်ဆုံး ဘောလုံး ပြိုင်ပွဲတွေပဲ ဖြစ်ပါတယ်။ စုစုပေါင်းအသင်း ၂၂ သင်းထိ ပါဝင် ယှဉ်ပြိုင် နေတာ တွေ့ရပြီး အမေရိကန်က ၁၉ သင်းနဲ့ ကနေဒါက ၃ သင်း ဝင်ပြိုင်ပါတယ်။ ကနေဒါ အနေနဲ့လည်း သီးသန့် အမှတ်ပေး ပြိုင်ပွဲကျင်းပစရာ မလိုတော့ဘဲ အခုမေဂျာလိဂ် တခုတည်းမှာ ပူးပေါင်း ယှဉ်ပြိုင်နေတဲ့ သဘော ဖြစ်ပါတယ်။

အသင်း တသင်းအနေနဲ့ ပွဲစဉ်ပေါင်း ၃၄ ပွဲထိ တရာသီအတွင်း ကစားရပါတယ်။ ဘောလုံးရာသီက ပုံမှန် အနေနဲ့ မတ်လ ကနေ အောက်တိုဘာလထိ ကြာမြင့်ပါတယ်။ ထူးခြားချက်က ဘောလုံးရာသီအတွင်း အကောင်းဆုံး မှတ်တမ်းကောင်းတွေ တင်နိုင်တဲ့ အသင်းကို Supporter’s Shield ပေးအပ်တာတွေ့ရပါတယ်။ နောက်ပြီး ရာသီကြို ပွဲစဉ်တွေ ကျင်းပ ကစားသေးတာ တွေ့ရပြီး MLS Cup Playoffs အဖြစ် အမည် သတ်မှတ်ကစားပြီး အသင်း ၁၂ သင်း ဝင်ကစားကြပါတယ်။

ဒီလိုရာသီကြို ပွဲစဉ်တွေကိုတော့ နိုဝင်ဘာနဲ့ ဒီဇင်ဘာလ အတွင်းမှာ ကစားကြတာ ဖြစ်ပါတယ်။ နောက်ပြီး အမှတ်ပေးပြိုင်ပွဲ အပြင် အခြား ပြည်တွင်း ကလပ် အသင်းဖလားတွေ အနေနဲ့ U.S Open Cup လည်း ကစားကြတယ်၊ Canadian Championship လို ဖလားပွဲတွေကိုလည်း အခု မေဂျာလိဂ် တန်းဝင် ကလပ် အသင်းတွေက ဝင်ခွင့်ရတာ ဖြစ်ပါတယ်။ ဥရောပမှာ ချန်ပီယံလိဂ်နဲ့ ယူရိုပါလိဂ်တွေကို နိုင်ငံတကာပွဲတွေ အဖြစ် ကစားသလို အခုမေဂျာလိဂ်တွေထဲက ထိပ်တန်း ကလပ် အသင်းတွေ အနေနဲ့လည်း CONCACAF Champions League ကို ဝင်ကစားကြတာ တွေ့ရပါတယ်။

မေဂျာလိဂ်ကို ၁၉၉၃ ခုနှစ် ဒီဇင်ဘာလ ၁၇ ရက်မှာ စတင် ဖွဲ့စည်း သတ်မှတ်ကျင်းပမှုတွေ လုပ်ဆောင်ဖို့ အတည်ပြုခဲ့ပါတယ်။ အမေရိကန် အခြေစိုက် ဖြစ်ပေမယ့် ဒေသတွင်း ကနေဒါကို ဝင်ကစားခွင့် ပေးထားတယ်၊ ဒါပေမယ့် အမေရိကန် ပြည်တွင်း အနေနဲ့ ကိုပဲ Eastern Conference နဲ့ Western Conference ဆိုပြီး အုပ်စု ၂ ခု ထပ်ခွဲပြီး အဖွဲ့ချုပ် တခုစီရဲ့ လက်အောက်ခံ အသင်းတွေ ခွဲခြားကိုယ်စားပြု ဝင်ရောက် ကစားကြတာတွေ့ရပါတယ်။

လက်ရှိ မေဂျာလိဂ်ရဲ့ ချန်ပီယံအဖြစ်နဲ့ ပထမဆုံး အကြိမ် ဖလားရယူထားနိုင်တဲ့ Seattle Sounders FC က အကောင်းဆုံး စံချိန်တွေ တင်ထားနိုင်ပြီး Supporter’s Shield ကိုတော့ Toronto FC က ရယူထားတာ တွေ့ရပါတယ်။ မေဂျာလိဂ်ကို အများဆုံး ရယူထားနိုင်တဲ့ အသင်းကတော့ ယခင် အင်္ဂလန် နာမည်ကျော် ကစားသမား ဒေးဗစ် ဘက်ခမ်းကစားခဲ့တဲ့ LA Galaxy အသင်း ဖြစ်ပြီး သူက မေဂျာလိဂ်ဖလားကို အခုချိန်ထိ ၅ ကြိမ် ရယူထားနိုင်တာ တွေ့ရပါတယ်။ Supporter’s Shield ဆိုရင်လည်း အများဆုံး ရယူထားနိုင်တဲ့ အသင်းက LA Galaxy နဲ့ D.C. United အသင်းတွေ ဖြစ်ပြီး ၄ ကြိမ်စီ ရယူထားနိုင်တာ ဖြစ်ပါတယ်။

အခု မေဂျာလိဂ် ပွဲစဉ်တွေကို ၁၉၉၄ ခုနှစ် အတွင်း အမေရိကန်က ကမ္ဘာ့ဖလား ဘောလုံးပွဲစဉ်တွေ လက်ခံကျင်းပခွင့် ရရှိမှုနဲ့ အတူ အထိမ်းအမှတ် အဖြစ် ၁၉၉၃ ခုနှစ် နှစ်ကုန်ပိုင်းမှာ ဖွဲ့စည်း တည်ထောင်ခဲ့တာ ဖြစ်ပါတယ်။ ပွဲစဉ်နဲ့ အမည်တွေ သတ်မှတ် ခဲ့ခြင်းကို ၁၉၉၃ ခုနှစ်မှာ စတင်ခဲ့ပေမယ့် ပထမဆုံး ဘောလုံးရာသီ ကတော့ ၁၉၉၆ ခုနှစ်မှာမှ အသင်း ၁၀ သင်းနဲ့ စတင် ကစားခဲ့တာ ဖြစ်ပါတယ်။

ပထမဆုံး ရာသီ အတွင်း အသင်းတွေ အနေနဲ့ ဘဏ္ဍာရေး အခက်အခဲများစွာကို ရင်ဆိုင်ခဲ့ရပြီး အခြား အားကစားနည်းတွေ လောက် ပရိတ်သတ် မရှိလို့ ငွေကြေး ဆုံးရှုံးမှုတွေ ရှိခဲ့တယ် လို့လည်း သိရပါတယ်။ စာရင်းတွေ အရတော့ ပွဲစဉ် အများစုကို ပရိတ်သတ် လုံး၀ မရှိဘဲ ကစားခဲ့ရသလို ဒေါ်လာသန်းပေါင်း များစွာ ဆုံးရှုံးမှုတွေ ရှိခဲ့ပြီး ၂၀၀၂ ခုနှစ်မှာ အသင်း ၂ သင်း ရပ်နား ပိတ်သိမ်းသွားသည်ထိ ဖြစ်ခဲ့ပါတယ်။

ဒါပေမယ့် အခုတော့ မေဂျာလိဂ်မှာ အသင်းပေါင်း ၂၂ သင်း ပါဝင် ယှဉ်ပြိုင်နေကြပါပြီ၊ အသင်းပိုင်ရှင်တွေ ကလည်း အိမ်ကွင်းတွေ သီးသန့်ဆောင်လုပ် ကစားနေကြပြီ၊ လက်ရှိ ဘောလုံးပရိတ်သတ်ကလည်း ဟော်ကီနဲ့ ဘတ်စကက်ဘော ပရိတ်သတ်တွေထက် ကျော်လွန် များပြားနေပြီ ဖြစ်သလို မေဂျာလိဂ်ကလည်း နိုင်ငံပိုင် ရုပ်သံ အစီအစဉ်တွေနဲ့ ထုတ်လွှင့်မှုနဲ့ ပတ်သတ်ပြီး သဘောတူချက် ရရှိထားပြီ ဖြစ်လို့ အသင်းတွေက အမြတ်အစွန်းတွေ ရနေပြီ ဖြစ်ပါတယ်။

အထက်မှာ ပြောခဲ့သလို အသင်း ၂၂ သင်း ရှိတယ်၊ ဒီအတွက် တရာသီမှာ ပွဲစဉ် ၃၄ ပွဲထိ ကစားရတယ်၊ အမေရိကန်မှာတင် Eastern (အရှေ့ပိုင်း) နဲ့ Western (အနောက်ပိုင်း) အဖွဲ့ ၂ ဖွဲ့ ထပ်ကွဲသေးတယ်။ ဥရောပမှာက အသင်းတသင်းက အခြား အသင်း တသင်းကို အိမ်ကွင်း၊ အဝေးကွင်းပဲ လက်ခံကစားရရုံ ဖြစ်ပေမယ့် မေဂျာလိဂ်မှာတော့ ထူးခြားချက်က တရာသီမှာ ၃၄ ပွဲ ကစားရာမှာ အသင်း တသင်းက သူ့ရဲ့ အဖွဲ့အတွင်း အဖွဲ့တူ အသင်းကို ၂၃ ပွဲ လက်ခံ ကစားရတယ်၊ အခြား အဖွဲ့တွင်းက အသင်းကိုတော့ ၁၁ ပွဲ လက်ခံကစားရတာ ဖြစ်ပါတယ်။

ဆိုလိုရင်းကတော့ အရှေ့ပိုင်းအဖွဲ့ အတွင်းက အသင်း တသင်းအနေနဲ့ မိမိနဲ့ အဖွဲ့တူ အရှေ့ပိုင်း အဖွဲ့ဝင် အသင်းတွေနဲ့ ၂၃ ပွဲ ကစားရပြီး အနောက်ပိုင်း အဖွဲ့ဝင်ထဲက အသင်းတွေနဲ့တော့ ၁၁ ပွဲပဲ ကစားရပါတယ်။ ဥရောပပြိုင်ပွဲတွေရဲ့ သဘောတရား အရ ဆိုရင်တော့ အရှေ့ပိုင်း အဖွဲ့ဝင် အသင်းအနေနဲ့ မိမိအဖွဲ့နဲ့ ၁၇ ပွဲ၊ အနောက်ပိုင်းအဖွ့ဲဝင် အသင်းတွေနဲ့ ၁၇ ပွဲ၊ စုစုပေါင်း ၃၄ ပွဲ ကစားရမှာ ဖြစ်ပေမယ့် မေဂျာလိဂ်ကတော့ နည်းနည်း ထူးခြားနေတာပါ။

မေဂျာလိဂ်ရဲ့ ပွဲစဉ်တွေက FIFA ကနေ အသိအမှတ်ပြုထားတာကြောင့် ကမ္ဘာ့ဖလားနဲ့ Gold Cup လို နိုင်ငံတကာ ပွဲစဉ်တွေ ရှိနေတဲ့ သတင်းပတ်တွေမှာ မေဂျာလိဂ်ပွဲတွေကို ရပ်နားထားတာတွေလည်း ရှိပါတယ်။

၂၀၀၂ ခုနှစ် အတွင်း အသင်း ၂ သင်း ပိတ်သိမ်းသွား ပေမယ့် ၂၀၀၅ ခုနှစ်မှာ အသင်းတွေ ထပ်တိုးလာတယ်၊ ကနေဒါ အသင်းတွေကို ဝင်ကစားခွင့်ကိုတော့ ၂၀၀၇ ခုနှစ်မှာ စတင် လက်ခံခဲ့ပြီး ၂၀၁၆ ခုနှစ်ထိ အသင်း ၂၀ ပဲ ကစားနေတာ ဖြစ်ပေမယ့် အခုနှစ် ၂၀၁၇ မှာတော့ ၂၂ သင်းထိ ရှိလာတာ ဖြစ်ပါတယ်။ လာမယ့် ၂၀၁၈ ခုနှစ်မှာ Los Angeles FC အသစ် ဝင်လာဖို့ ရှိနေပြီး အသင်းပေါင်း ၂၃ သင်း ရှိလာပါလိမ့်မယ်။ ဒါပေမယ့် အဖွဲ့ချုပ်ကတော့ လာမယ့်နှစ်မှာ ၂၄ သင်း ကစားနိုင်ဖို့ ခန့်မှန်းထားတာပါ။ ၂၀၂၀ မှာ ၂၆ သင်းနဲ့ နောက်ပိုင်းနှစ်တွေ မှာ ၂၈ သင်းထိ ဝင်ကစားစေချင်တယ် လို့လည်း ခန့်မှန်းထားကြ ပါတယ်။

အခုချိန်ထိ မေဂျာလိဂ်မှာ ဝင်ကစားဖူးတဲ့ အသင်းပေါင်း ၂၃ သင်း ရှိတယ်၊ အသင်း ၁၁ သင်းက မေဂျာလိဂ် ဖလားရဖူးတယ်၊ ၁၁ သင်းက Supporter’s Shield ရဖူးတယ်၊ အဲဒီ ၁၁ သင်းထဲက ၆ သင်းက တနှစ်တည်းမှာ အမှတ်ပေး ဖလားရော Supporter’s Shield ပါ ရဖူးတာ တွေ့ရပါတယ်။ ဆုဖလား အများဆုံးရထားတဲ့ အသင်းတွေကတော့ LA Galaxy က ၅ ကြိမ်၊ D.C. United က ၄ ကြိမ်၊ San Jose Earthquakes, Sporting Kansas City နဲ့ Houston Dynamo တွေက ၂ ကြိမ်စီ၊ Columbus Crew SC, Chicago Fire, Seattle Sounders FC, Real Salt Lake, Colorado Rapids နဲ့ Portland Timbers တွေက ၁ ကြိမ်စီ ရယူထားနိုင်တာ ဖြစ်ပါတယ်။

မေဂျာလိဂ်မှာ ဂိုးအများဆုံး သွင်းထားသူက အမေရိကန်နိုင်ငံသား Landon Donovan ဖြစ်ပြီးသူက ၂၀၀၁ ကနေ ၂၀၁၄ ထိ ကစားတယ်၊ ၂၀၁၅ မှာ နားနေတယ်၊ ၂၀၁၆ မှာ ပြန်ကစားပြီး အခုနှစ်မှာ အနားယူသွားသူ ဖြစ်ပါတယ်။ သူဟာ ဂိုးပေါင်း ၁၄၅ ဂိုး သွင်းယူထားနိုင်တာ တွေ့ရပါတယ်။ ပွဲ အများဆုံး ကစားထားသူကလည်း အမေရိကန်နိုင်ငံသား Nick Rimando ဖြစ်ပြီး ၂၀၀၀ ခုနှစ်ကနေ လက်ရှိ အချိန်ထိ ကစားနေပြီး ပွဲပေါင်း ၄၅၀ ထိအောင် ကစားထားတာ တွေ့ရပါတယ်။

Ref: www.en.m.wikipedia.org

The post အမေရိကန် Major League Soccer ပြည်တွင်းအမှတ်ပေး ဘောလုံးပြိုင်ပွဲ appeared first on ဧရာဝတီ.

ကမ္ဘာ့ ကိုယ်ခံပညာ ဘက်စုံသုံး ပြိုင်ပွဲ (Mixed Martial Art – MMA) ၏ ပူပူနွေးနွေး မစ်ဒယ်ဝိတ် ကမ္ဘာ့ ချန်ပီယံ အောင်လအန်ဆန်း အတွက် အခက်အခဲများစွာ ပြည့်နှက်နေသည့် စိန်ခေါ်ပွဲစဉ်တပွဲ ပေါ်ပေါက်လာပြီ ဖြစ်သည်။

ယင်းမှာ ပူးမားခေါ် အမေရိကန် တောင်ခြေင်္သ့ တကောင်လို ပြိုင်ဘက်များအား လျင်မြန်ကြမ်းတမ်းစွာ တိုက်ခိုက် အနိုင်ယူလေ့ရှိသည့် ဟဲဗီးဝိတ် ကစားသမား အလိန်း နာ့ဂလာနီ (Alain Ngalani) နှင့် အလွတ်တန်း စိန်ခေါ်ပွဲအဖြစ် မြန်မာနိုင်ငံတွင် ယှဉ်ပြိုင်ထိုးသတ်ရန် အောင်လအန်ဆန်းက လက်ခံခဲ့သောကြောင့် ဖြစ်သည်။

အောင်လအန်ဆန်းသည် ရှုံးပွဲမရှိဘဲ ချန်ပီယံဖြစ်လာသည့် One Championship ၏ မစ်ဒယ်ဝိတ် ချန်ပီယံ ရုရှား နိုင်ငံ သား ဘစ်တာလီ ဘစ်ဒက်ရှ်ကို ပြီးခဲ့သည့် ဇွန်လ ၃၀ ရက်နေ့က မြန်မာ့မြေပေါ်တွင် အနိုင်ယူ ထိုးသတ်ကာ MMA ပြိုင်ပွဲ တွင် ပထမဆုံးသော မြန်မာပြည်ဖွား ကမ္ဘာ့ချန်ပီယံအဖြစ် မှတ်တမ်းသစ် ရေးထိုးနိုင်ခဲ့သည်။

ထို့နောက်ပိုင်း ယှဉ်ပြိုင်ထိုး သတ်မှုများကို ရပ်နားထားခဲ့ပြီးနောက် လာမည့် နိုဝင်ဘာလ ၃ ရက်နေ့တွင် ရန်ကုန်မြို့ သုဝဏ္ဏ အားကစားကွင်း၌ နာ့ဂလာနီနှင့် အထူး စိန်ခေါ်ပွဲအဖြစ် ယှဉ်ပြိုင်ထိုးသတ်မည် ဖြစ်သည်။

နာ့ဂလာနီဆိုသူက ကင်မရွန်း နွယ်ဖွားဖြစ်ပြီး ဟောင်ကောင် နိုင်ငံသား ခံယူထားသူ ဖိုက်တာ တယောက် ဖြစ်သည်။ အသက် ၄၂ နှစ်အရွယ် အရပ် ၅ ပေ ၁၁ လက္မရှိပြီး ကိုယ်အလေးချိန် ၂၂၉ ပေါင် ရှိသည့် ဟဲဗီးဝိတ် ဖိုက်တာတဦး ဖြစ် သည်။

ကိုယ်ခံပညာတွင် ဘရာဇီး ဂျူဂျစ်ဆုကို ခါးပတ်ပြာအဆင့်၊ ကရာတေးနှင့် ဂျူဒို ခါးပတ်နက်အဆင့်အထိ ကျွမ်းကျင် တတ်မြောက် ထားသူဖြစ်ပြီး အာဖရိက ကစ်ဘောက်ဆင် ချန်ပီယံ ၃ ကြိမ်၊ ကမ္ဘာ့မွေ့ထိုင်း ချန်ပီယံဆုကို ၄ ကြိမ်တိုင် ရရှိထားသူ ဖြစ်သည်။

ကရာတေး၊ ဂျူဒို၊ ကစ်ဘောက်ဆင်နှင့် မွေ့ထိုင်း ပြိုင်ပွဲလောကတွင် ဆယ်စုနှစ်တခုကြာ ကျင်လည်ခဲ့ပြီး ချန်ပီယံဆု များစွာ ရရှိထားသူ နာ့ဂလာနီသည် ၂၀၁၃ ခုနှစ် စက်တင်ဘာလမှ စတင်၍ One Championship ၏ ကိုယ်ခံပညာ ဘက်စုံသုံး MMA ပြိုင်ပွဲကို ဝင်ရောက်ယှဉ်ပြိုင်ခဲ့သူ ဖြစ်သည်။

၄ နှစ်တာ ကာလအတွင်း MMA ပြိုင်ပွဲ ၇ ပွဲ ထိုးသတ်ခဲ့ရာ ၃ ပွဲနိုင် ၃ ပွဲရှုံးရလဒ် ပိုင်ဆိုင်ထားပြီး ပွဲစဉ်တပွဲမှာတော့ မတော်တဆ ထိခိုက်မှု တခုကြောင့် သရေဖြစ်ခဲ့သည်။

နာ့ဂလာနီမှာ ပြီးခဲ့သည့် စက်တင်ဘာလက ယှဉ်ပြိုင်ခဲ့သည့် MMA ဟဲဗီးဝိတ်တန်း ပွဲစဉ်တွင် ပြိုင်ဘက်ဖြစ်သူ ဂျပန် နိုင်ငံ သား ဟီဒီကီ ဆာကိုင်းအား ပထမအချီ ၁၁ စက္ကန့်မှာပင် လက်သီး တချက်တည်းဖြင့် ပွဲသိမ်းခဲ့သည့် အတွက် One Championship ၏ ဟဲဗီးဝိတ်ပြိုင်ပွဲ သက်တမ်းတလျှောက် အမြန်ဆုံး အနိုင်ရသည့်စံချိန်ကို ရေးထိုးထားသူ ဖြစ် သည်။

ကြီးမားတုတ်ခိုင်သည့် ခန္ဓာကိုယ်၊ ကာယဗလမောင် ကဲ့သို့ အဖုဖု အထစ်ထစ် ဖြစ်နေသည့် ကြွက်သားစိုင်ကြီးများကို ပိုင်ဆိုင် ထားသည့် နာ့ဂလာနီ၏ ဟန်ပန်သွင်ပြင်သည် သာမန်လူတို့အတွက် မြင်သည်နှင့် ထိတ်လန့်ဖွယ်ရာ ဖြစ် သည်။

တိုက်ခိုက်ရာတွင်လည်း ပြင်းထန်သည့် လက်သီးထိုးချက်၊ ဒူးတိုက်ချက်နှင့် နောက်ပြန် ကန်ချက်များဖြင့် လျင်မြန် ကြမ်းတမ်းစွာ တိုက်ခိုက်လေ့ရှိသည့် အတွက် ပူးမားဟုခေါ်သည့် အမေရိကန် တောင်ခြေင်္သ့ အမည် ခံယူထားသူ ဖြစ် သည်။

အနက်ရောင် တောင်ခြေင်္သ့ ပူးမား အမည်ဖြင့် လိုက်ဖက်စွာပင် ၎င်းအနိုင်ရခဲ့သည့် ပွဲစဉ် ၃ ခုစလုံး၌ ပထမ အချီမှာပင် ပြိုင်ဘက်ကို အလဲထိုး အနိုင်ယူခဲ့သည်ချည်း ဖြစ်သည်။

အောင်လအန်ဆန်း ကိုယ်တိုင်ပင် နာ့ဂလာနီသည် တိုက်ခိုက်ရာတွင် ကြမ်းတမ်းသည့် ဖိုက်တာတဦး ဖြစ်ကြောင်း ထုတ်ဖော် ပြောဆိုထားသည်။

“ဒီတခေါက် ကျနော်နဲ့ ယှဉ်ပြိုင် ထိုးသတ်မယ့် အလိန်း နာ့ဂလာနီက နည်းနည်းတော့ ကြမ်းတယ်ဗျို့။ သူက လျင် လည်း လျင်မြန်တယ်။ ပြီးတော့ သူရဲ့ခြေကန်ချက်ကလည်း တော်တော်ပြင်းထန်တယ်။ ခြေကန်ချက် တချက်လောက် မိသွားတာ နဲ့ လောကကြီးနဲ့ပါ အဆက်အသွယ် ပြတ်သွားလောက်တဲ့ အထိပဲ။ နောက်တချက်က သူက ပြိုင်ဘက်တွေ ကို အချိန်မဆွဲဘဲ ခပ်မြန်မြန်ပဲ အနိုင်ယူတတ်တယ်”ဟု အောင်လအန်ဆန်းက ၎င်း၏ လူမှုကွန်ရက် စာမျက်နှာတွင် ပြိုင်ဘက် နာ့ဂလာနီနှင့် ပတ်သက်၍ မှတ်ချက်ပြု ရေးသားထားသည်။

အမေရိကန် တောင်ခြေင်္သ့လို သန်မာဖြတ်လတ်သည့် နာ့ဂလာနီလို ဖိုက်တာတယောက်ကို မြန်မာပြည်သားတို့၏ အသည်းစွဲ အောင်လအန်ဆန်းအနေဖြင့် လက်သီးချင်းယှဉ်ထိုးပြီး တိုက်ခိုက်သွားမလား၊ ဂျူဂျစ်ဆုနည်းဖြင့် ချုပ်ကိုင်ပြီး တိုက်ခိုက် သွားမလားဆိုတာ အလွန် စိတ်ဝင်စားဖို့ ကောင်းသလို၊ ရင်ခုန် စိတ်လှုပ်ရှားဖို့လည်း ကောင်းနေသည်။

အောင်လအန်ဆန်း အနေဖြင့် လက်သီးချင်း ယှဉ်ထိုးမည်ဆိုလျှင်လည်း နာ့ဂလာနီက အာဖရိကတိုက်၏ ကစ်ဘောက် ဆင် ချန်ပီယံဆု ၃ ကြိမ် ရထားဖူးသူ၊ ကမ္ဘာ့မွေ့ထိုင်း ချန်ပီယံဆု ၄ ကြိမ် ရရှိထားသူဆိုတော့ အကြိတ်အနယ် ထိုးကြိတ် တိုက်ခိုက် ရမည်ဖြစ်ပြီး ဂျူဂျစ်ဆုနည်းဖြင့် ချုပ်မည်ဆိုလျှင်လည်း ဂျပန်နိုင်ငံသား ဟီဒီကီ ဆာကိုင်းလို လိုက်ချုပ်ဖို့ ကြိုးစားရင်း ချက်ကောင်းအထိုးခံရပြီး အချိန်တိုအတွင်း ပွဲသိမ်းသွားမှာလည်း စိုးရိမ်စရာ ရှိနေသည်။

သို့သော် အားသာချက် တခုအနေဖြင့် ကချင်ပြည်နယ် မြစ်ကြီးနားမြို့သား အောင်လအန်ဆန်းက နာ့ဂလာနီထက် MMA အတွေ့အကြုံပိုင်းမှာ ပိုမိုကြွယ်၀ သာလွန်နေသည်။
၂၀၀၅ ခုနှစ် မေလကတည်းက One Championship ၏ MMA ပြိုင်ပွဲကို ဝင်ရောက်ခဲ့သူ အောင်လအန်ဆန်း အတွက် ယခုဆိုလျှင် MMA လောကတွင် ကျင်လည်ဖြတ်သန်းခဲ့သည်မှာ သက်တမ်း ၁၂ နှစ် ကျော်လွန်ခဲ့ပြီ ဖြစ်သည်။

အဆိုပါ ကာလအတွင်း ပွဲပေါင်း ၃၀ ယှဉ်ပြိုင် ထိုးသတ်ထားပြီး ပွဲ ၂၀ နိုင် ၁၀ ပွဲရှုံး ရလဒ်ဖြင့် ကမ္ဘာ့ မစ်ဒယ်ဝိတ် ချန်ပီယံဆုကို သိမ်းပိုက်ခဲ့သူ ဖြစ်သည်။

အသက် ၃၂ နှစ်အရွယ်ရှိပြီး ကိုယ်အလေးချိန် ၁၈၅ ပေါင် အရပ် ၆ ပေ ၁ လက္မအမြင့် ပိုင်ဆိုင်ထားသည့် အောင်လ အန်ဆန်းမှာ မွေ့ထိုင်းပညာ၊ ပြိုင်ဘက်ကို မလှုပ်နိုင်အောင် ချုပ်ကိုင်သည့် ဘရာဇီး ဂျူဂျစ်ဆုပညာကို ပညာရှင်အဆင့် ကျွမ်းကျင် တတ်မြောက်ထားသူ တဦးဖြစ်ပြီး ပြိုင်ဘက်ကို ချုပ်ကိုင်ရာတွင် ကျစ်လျစ်မြဲမြံ လွန်း သည့် အတွက် MMA လောကတွင် မြန်မာ့စပါးအုံးမြွေ – Burmese Python ဟူသော အမည်ဖြင့် လူသိများ ထင်ရှားလာခဲ့သူ ဖြစ်သည်။

MMA ပြိုင်ပွဲ အတွေ့အကြုံအရ အောင်လအန်ဆန်းက သာလွန်နေသော်လည်း နာ့ဂလာနီဆိုသည့် ဟဲဗီးဝိတ်ဖိုက်တာ ကင်မရွန်းနွယ်ဖွား လူသန်ကြီးက ကိုယ်ခန္ဓာ ထွားကျိုင်းမှုအပိုင်းမှာ မစ်ဒယ်ဝိတ်တန်း ချန်ပီယံ အောင်လအန်ဆန်း ထက် ပိုမိုကြီးမားနေသည့်အချက်က အောင်လအတွက် ကြီးမားသည့် အခက်အခဲ တရပ် ဖြစ်နေသည်။

“သူက ကျနော့်ထက် လူကောင်လည်း ပိုကြီးတော့ သူ့ကို အနိုင်ထိုးသတ်ဖို့ဆို တော်တော်လေးကို ကြိုးစား ယှဉ်ပြိုင် ထိုးသတ်ရမှာပါ။ ဒါပေမယ့် အင်အားဘယ်လောက် များများ၊ လူကောင် ဘယ်လောက်ကြီးကြီး လောကကြီးမှာ ကြိုးစားရင် မဖြစ်နိုင်ဘူး ဆိုတဲ့အရာ မရှိပါဘူး။ ဒါကြောင့် ကျနော့်ကို ချစ်ခင်ပြီး အားပေးတဲ့ ပရိသတ်ကြီးရဲ့ အားပေး ဆုတောင်းမှုတွေ အောက်မှာ အကောင်းဆုံး ကြိုးစားပြီး ယှဉ်ပြိုင်သွားပါ့မယ်”ဟု အောင်လအန်ဆန်းက ၎င်း၏ လူမှုကွန်ရက် စာမျက်နှာမှ တဆင့် ပရိသတ်များကို ပြောဆိုထားသည်။

နာ့ဂလာနီ၏ ပြိုင်ပွဲမှတ်တမ်းများက ပြသနေသည့် အထူးခြားဆုံး အချက်မှာ ၎င်းယှဉ်ပြိုင် ထိုးသတ်ခဲ့သည့် ပွဲစဉ် ၇ ပွဲ စလုံး တွင် တတိယအချီအထိ ထိုးသတ်ခဲ့ရခြင်း မရှိဘဲ ပထမအချီနှင့် ဒုတိယအချီများတွင် အနိုင်အရှုံး အဖြေများ ထွက်ပေါ်ခဲ့ခြင်း ဖြစ်သည်။

၎င်းအနိုင်ရသည့် ပွဲစဉ် ၃ ပွဲစလုံးသည် ပထမအချီမှာပင် ပြိုင်ဘက်များကို အနိုင်ယူခဲ့ခြင်းဖြစ်ပြီး ရှုံးနိမ့်ခဲ့သည့် ပွဲစဉ် ၃ ပွဲသည်လည်း ပထမအချီတွင် ၂ ပွဲ၊ ဒုတိယအချီတွင် ၁ ပွဲ ရှုံးနိမ့်ခဲ့ခြင်း ဖြစ်သည်။

ထို့ကြောင့် နာ့ဂလာနီဆိုသူက နိုင်လျှင်လည်း မြန်မြန်နိုင်လေ့ရှိပြီး ရှုံးလျှင်လည်း မြန်မြန်ဆန်ဆန် ရှုံးနိမ့်လေ့ ရှိသူ ဖြစ် ကြောင်း ပြိုင်ပွဲ မှတ်တမ်းများက ဖော်ပြနေသည်။

အောင်လအန်ဆန်းနှင့် နာ့ဂလာနီတို့ ထိုးသတ်မည့် Hero’s Dream အမည်ရှိ ပြိုင်ပွဲကို ရန်ကုန်မြို့ သုဝဏ္ဏ မိုးလုံ လေ လုံ အားကစားရုံ၌ နိုဝင်ဘာလ ၃ ရက်နေ့ ည ၆ နာရီ ၃၀ မိနစ်တွင် ကျင်းပမည်ဖြစ်ပြီး အလွတ် စိန်ခေါ်ပွဲဖြစ်သည်။

အနိုင်အရှုံး မည်သည့်ရလဒ် ထွက်ပေါ်သည်ဖြစ်စေ အောင်လအန်ဆန်း ရရှိထားသည့် ကမ္ဘာ့ မစ်ဒယ်ဝိတ် ချန်ပီယံ ရွှေခါးပတ် နှင့် ပတ်သက်မှု မရှိကြောင်း သိရသည်။
အောင်လအန်ဆန်း အနေဖြင့် မြန်မာ့မြေပေါ်တွင် ၂၀၁၆ ခုနှစ်က ၂ ပွဲ၊ ယခုနှစ် ဇွန်လတွင် ၁ ပွဲ၊ စုစုပေါင်း ၃ ပွဲ ယှဉ်ပြိုင် ထိုးသတ်ထားရာ ၃ ပွဲစလုံး အနိုင်ရရှိထားသည့် အတွက် မြန်မာ့မြေက အောင်လအန်ဆန်း အတွက် ရာနှုန်း ပြည့် အောင်ပွဲ ဆင်နေသည့် အောင်မြေအဖြစ် တည်ရှိနေသည်။

၎င်း၏ အောင်မြေဖြစ်သည့် မြန်မာ့မြေ၊ မြန်မာ ပရိသတ်ရှေ့တွင် အောင်လအန်ဆန်း အနေဖြင့် ကမ္ဘာ့မွေ့ထိုင်း ချန်ပီယံ ဆု ၄ ကြိမ်ရရှိထားသူ အလိန်း နာ့ဂလာနီကို အနိုင်ယူကာ နိုင်ပွဲမှတ်တမ်းသစ် ဆက်လက်ရေးထိုး သွားမလား၊ ဧည့်သည် နာ့ဂလာနီ ကပဲ အောင်လအန်ဆန်းကို အနိုင်ယူပြီး မြန်မာပြည်သား မစ်ဒယ်ဝိတ် ချန်ပီယံကို မြန်မာ့မြေပေါ် တွင် ပထမဆုံး အနိုင်ရသူ အဖြစ် မှတ်တမ်းသစ် ရေးထိုးသွားမလား ဆိုတာကိုတော့ နိုဝင်ဘာလ ၃ ရက်နေ့၌ ကျင်းပ မည့် Hero’s Dream ပြိုင်ပွဲတွင် ဆက်လက် စောင့်ကြည့်သွားရမည် ဖြစ်ပါသည်။ ။

The post အောင်လ နဲ့ နာ့ဂလာနီ ဘယ်သူ ဟီးရိုး ဖြစ်မလဲ appeared first on ဧရာဝတီ.

၂၀၁၆ ခုနှစ်ကနဲ့စာရင် အမေရိကန် ဘတ်စ်ကက်ဘောပြိုင်ပွဲ NBA ရဲ့ ပြိုင်ပွဲဝင် ဘတ်စ်ကက်ဘော အသင်း တသင်းရဲ့ တန်ဖိုးဟာ ၂၅ ရာခိုင်နှုန်းလောက်ထိ မြင့်တက်လာခဲ့ပြီး ပျမ်းမျှ အသင်း တသင်းရဲ့ တန်ဖိုးဟာ ဒေါ်လာ ၆၃၄ သန်းထိ ရှိလာပါတယ်။ ဒါကြောင့် NBA အသင်းတသင်းကို ပိုင်ဆိုင်သူဟာ ဘီလီယံနာ တယောက်ဖြစ်ဖို့ သေချာပါတယ်။ NBA အသင်းရဲ့ ပိုင်ရှင်ပေါင်း ၁၄ ဦးဟာ ဘီလီယံနာတွေ ဖြစ်ပြီး သူတို့ အားလုံးရဲ့ ချမ်းသာမှုက စုစုပေါင်း ၇၆ ဘီလီယံလောက် ထိ ရှိနေတာပါ။ သူတို့ဟာ ဘယ်သူတွေလဲ၊ ဘယ်လောက် ချမ်းသာလဲ ဆိုတာ လေ့လာတင်ပြပါမယ်။

(၁) Paul Allen ။ ။ သူတဦးတည်းရဲ့ ပိုင်ဆိုင်မှုတင် ဒေါ်လာ ၁၅ ဒသမ ၈ ဘီလီယံလောက် ချမ်းသာပါတယ်။ Portland Trail Blazers အသင်းကို ပိုင်ဆိုင်ပါတယ်။ Microsoft ကို ပူးပေါင်း တည်ထောင်သူ ဖြစ်ပြီး NFL ဆိုတဲ့ American Football အသင်း တသင်း ဖြစ်တဲ့ Seattle Seahawks အသင်းကိုလည်း ပိုင်ဆိုင်သလို မေဂျာလိဂ်ဘောလုံး ပြိုင်ပွဲဝင် အသင်းတွေထဲက တန်ဖိုး အမြင့်ဆုံး အသင်းဖြစ်တဲ့ Seattle Sounders မှာလည်း ရှယ်ယာတွေ ဝင်ထားပါသေးတယ်။

(၂) Mikhail Prokhorov ။ ။ သူကလည်း ဒေါ်လာ ၁၃ ဘီလီယံ ချမ်းသာသူပါ။ Brooklyn Nets အသင်းကို ပိုင်ဆိုင်ပါတယ်။ ၂၀၁၂-၁၃ ခုနှစ် ဘတ်စ်ကက်ဘော ရာသီမှာ အသင်းကို New Jersey ကနေ Brooklyn အဖြစ် ပြောင်းလဲပြီး အောင်မြင်မှုတွေ ရအောင် ကြိုးစားနေတာ ဖြစ်ပါတယ်။ ရုရှသူဌေးတဦး ဖြစ်ပြီး နိုင်ငံရေးသမား တဦးလို့ ဆိုရင်လည်း ရနိုင်သလို ၂၀၁၂ ခုနှစ် ရွေးကောက်ပွဲမှာ မဲ ၈ ရာခိုင်နှုန်းထိ ရခဲ့တဲ့ သူလို့ သိရပါတယ်။

(၃) Philip Anschutz ။ ။ သူရဲ့ ပိုင်ဆိုင်မှုက ဒေါ်လာ ၁၀ ဒသမ ၃ ဘီလီယံ ရှိပါတယ်။ ၂၀၁၃ ခုနှစ်ကတည်းက Los Angeles Lakers အသင်းကို ပိုင်ဆိုင်ထားပါတယ်။ American Football, NHL ရဲ့ အသင်းတသင်း ဖြစ်တဲ့ Los Angeles King ကိုလည်း ပိုင်ဆိုင်ထားပါတယ်။ အမေရိကန် အမှတ်ပေး ဘောလုံးပြိုင်ပွဲ မေဂျာလိဂ်ရဲ့ အသင်း ၆ သင်းမှာလည်း ရှယ်ယာတွေ ပိုင်ဆိုင်မှု တွေ့ရပါတယ်။ နာမည်ကြီး LA Galaxy အသင်းကိုလည်း ပိုင်ဆိုင်ထားသလို Houston Dynamo အသင်းကိုလည်း တဝက်လောက် ပိုင်ဆိုင်ထားတာပါ။

(၄) Rich DeVos ။ ။ သူက ဒေါ်လာ ၆ ဒသမ ၈ ဘီလီယံလောက် ချမ်းသာတဲ့ သူဌေးတဦးပါ။ Orlando Magic အသင်းကို ပိုင်ဆိုင်ထားပါတယ်။ အသင်းကို ၁၉၉၁ ခုနှစ် ကတည်းက ဝယ်ယူထားတာ ဖြစ်ပြီး Rich ကို The Amway ပူးပေါင်း တည်ထောင်သူ အဖြစ် လူသိများ ပါတယ်။ ၁၉၉၁ ခုနှစ် အတွင်း သူ အသင်းကို ဝယ်စဉ်က ဒေါ်လာ ၈၅ သန်းနဲ့ ဖြစ်ပြီး ဒီနေ့ မှာတော့ အသင်းက ဒေါ်လာ သန်း ၅၆၀ ထိ တန်ဖိုးရှိနေသလို သူ့ရဲ့ ဝယ်ရင်းဈေးနှုန်းက လက်ရှိ အသင်းရဲ့ တန်ဖိုးရဲ့ ၁၅ ရာခိုင်နှုန်းပဲ ရှိပါတော့တယ်။

(၅) Micky Arison ။ ။ သူက ဒေါ်လာ ၅ ဒသမ ၉ ဘီလီယံ ချမ်းသာသူ ဖြစ်ပြီး Miami Heat အသင်းကို ပိုင်ဆိုင်ထား ပါတယ်။ Carnival Cruises ရဲ့ ဥက္ကဌ လည်း ဖြစ်သလို အဓိက ပိုင်ဆိုင်သူလည်း ဖြစ်ပါတယ်။ ၂၀၁၁ ခုနှစ် နောက်ပိုင်း အသင်းရဲ့ တန်ဖိုး မြင့်တက်လာခဲ့ သလို အရင်နှစ်က ချန်ပီယံဆု ပြန်လည် ရရှိမှုနဲ့ အတူ အခုဆိုရင် Miami Heat က ဒေါ်လာ ဘီလီယံလောက် တန်ဖိုးရှိနိုင်မယ့် အသင်း တသင်း ဖြစ်နေပါပြီ။

(၆) Stan Kroenke ။ ။ သူ့ရဲ့ ပိုင်ဆိုင်မှုက ဒေါ်လာ ၅ ဒသမ ၃ ဘီလီယံ ရှိပါတယ်။ Denver Nuggets လို အသင်းကို ပိုင်ဆိုင်ထားသူပါ။ သူက အခြေခံ ဘဝကနေ ဘီလီယံနာ ဖြစ်လာသူ အဖြစ် နာမည်ကျော်ပါတယ်။ ဟော်ကီပြိုင်ပွဲ NHL အသင်း တသင်း ဖြစ်တဲ့ Colorado Avalanche အသင်းကိုလည်း ပိုင်ဆိုင်သေးတယ်၊ American Football, NFL အသင်း တသင်း ဖြစ်တဲ့ Louis Rams ကိုလည်း ဝယ်ထားတယ်၊ အင်္ဂလန် ဘောလုံး အသင်း အာဆင်နယ်နဲ့ မေဂျာလိဂ် ဘောလုံး အသင်း Colorado Rapid တွေကို ဝယ်ထားသေးတာ တွေ့ရပါတယ်။

(၇) Dan Gilbert ။ ။ သူက ဒေါ်လာ ၃ ဒသမ ၉ ဘီလီယံ ချမ်းသာပါတယ်။ Cleveland Cavaliers အသင်းကို ပိုင်ဆိုင် ပါတယ်။ သူက ၂၀၁၀ ခုနှစ် အတွင်း နာမည်ကျော် ဘတ်စ်ကက်ဘော ကစားသမား LeBron James ရဲ့ အသင်းပြောင်းရွှေ့မှုနဲ့ အတူ နာမည်ကြီးလာသူပါ။ အသင်း အောင်မြင်မှု ရဖို့ အတွက် နာမည်ကျော် ကစားသမားကို ခေါ်ယူ အားဖြည့်ခဲ့ပြီး ချန်ပီယံဆု ရအောင် ကြိုးစားမယ် လို့ ဆိုခဲ့တာလည်း ဖြစ်ပါတယ်။

(၈) Tom Gores ။ ။ ဒေါ်လာ ၂ ဒသမ ၇ ဘီလီယံ ချမ်းသာသူပါ။ Detroit Pistons အသင်းကို ပိုင်ဆိုင်ပါတယ်။ ၂၀၁၁ ခုနှစ်က အသင်းကို ဒေါ်လာ ၃၂၅ သန်းနဲ့ ဝယ်ထားတာ ဖြစ်ပါတယ်။ သူ ဝယ်ချိန်က အသင်း အနေနဲ့ အောင်မြင်မှုလည်း နည်းနေသလို ဈေးလည်း နိမ့်ခဲ့ပေမယ့် အခုတော့ ဈေးနှုန်း ၃၈ ရာခိုင်နှုန်းလောက်ထိ တက်လာပြီး တန်ဖိုး သန်း ၄၅၀ လောက်ထိ ရှိနေပြီ ဖြစ်ပါတယ်။

(၉) Mark Cuban ။ ။ ဒေါ်လာ ၂ ဒသမ ၅ ဘီလီယံ ပိုင်ဆိုင်ပါတယ်။ Dallas Mavericks အသင်းကို ဝယ်ယူထားသူ ဖြစ်ပြီး ၂၀၀၀ ခုနှစ်ကတည်းက အသင်းကို ပိုင်ဆိုင်ဖို့ ကြိုးစားခဲ့တာ ဖြစ်ပေမယ့် ၂၀၀၁ ခုနှစ် ဒီဇင်ဘာ အတွင်းမှာမှ အပြီးသတ် ဝယ်နိုင်ခဲ့တာ ဖြစ်ပါတယ်။ သူက အသင်းပိုင်ရှင်တွေထဲမှာ ဒေါသတကြီး စကားပြောတတ်သူ အဖြစ် နာမည်ကြီး ပါတယ်။

(၁၀) Joshua Harris ။ ။ ဒေါ်လာ ၂ ဒသမ ၅ ဘီလီယံ ချမ်းသာသူ ဖြစ်ပြီး Philadelphia 76 ers အသင်းပိုင်ရှင်လည်း ဖြစ်ပါတယ်။ ၂၀၁၁ ခုနှစ် ကတည်းက သူပိုင်ဆိုင်တဲ့ စီးပွားရေး လုပ်ငန်းစုအောက်မှာ အသင်းကို ဝယ်ယူထားတာ ဖြစ်ပါတယ်။ ၂၀၀၃ ခုနှစ် နောက်ပိုင်း ရှုံးထွက်အဆင့်ထိ မကြာခဏ တက်ရောက်အောင်မြင်မှု ရနေတဲ့ အသင်း ဖြစ်ပြီး Harris က အခု နောက်ပိုင်း ဟော်ကီ အသင်း တသင်းဖြစ်တဲ့ New Jersey Devils ကိုလည်း ဝယ်ထားတာ တွေ့ရပါတယ်။

(၁၁) Herb Simon ။ ။ ဒေါ်လာ ၁ ဒသမ ၉၅ ဘီလီယံ ချမ်းသာသူ ဖြစ်ပြီး Indiana Pacers ကို ပိုင်ဆိုင်ထားပါတယ်။ ၂၀၁၄ ခုနှစ်က စတင်ပြီး အသင်းက အောင်မြင်မှု ရဖို့ အထူးကြိုးစားလာတာ တွေ့ရပြီး ပွဲစဉ် ၄၀ အတွင်း ၃၃ ပွဲထိ အနိုင်ရလာ တာလည်း တွေ့ရပါတယ်။ Simon ဟာ Reno Aces ရဲ့ ပိုင်ဆိုင်မှု တချို့ကိုလည်း ရရှိထားသလို Arizona Diamondbacks ရဲ့ ၃ ဦးစပ် ပိုင်ဆိုင်သူ တဦးလည်း ဖြစ်ပါတယ်။

(၁၂) Donald Sterling ။ ။ ဒေါ်လာ ၁ ဒသမ ၉ ဘီလီယံ ချမ်းသာပြီး Los Angeles Clippers အသင်းကို ပိုင်ဆိုင်ထားသူ ဖြစ်ပါတယ်။ ၁၉၈၁ ခုနှစ် ကတည်းက အသင်းကို ဒေါ်လာ ၁၂ သန်းနဲ့ ဝယ်ယူထားသူ ဖြစ်ပြီး အခုတော့ အသင်းက ဒေါ်လာ ၅၇၅ သန်းထိ တန်ဖိုးရှိနေပါပြီ။ အသင်းက ရှေ့ပိုင်း နှစ်တွေမှာ အောင်မြင်မှု ကောင်းကောင်း မရခဲ့ပေမယ့် အခု နောက်ပိုင်း နှစ်တွေမှာ အားထည့်လာသလို အိမ်ကွင်းမှာ ဆိုရင် အဓိက ပြိုင်ဘက် Lakers ထက်တောင် ပရိတ်သတ် ပိုများတာ တွေ့လာရပါတယ်။

(၁၃) Glen Taylor ။ ။ ဒေါ်လာ ၁ ဒသမ ၇ ဘီလီယံ ချမ်းသာသူ ဖြစ်ပြီး Minnesota Timberwolves အသင်းကို ပိုင်ဆိုင်သူ ဖြစ်ပါတယ်။ ကိုယ်ပိုင်လုပ်ငန်းနဲ့ အောင်မြင် ချမ်းသာလာသူ ဖြစ်သလို အရင်က မင်နီဆိုးတားပြည်နယ် လွှတ်တော် အမတ်လည်း လုပ်ခဲ့ပါသေးတယ်။ အသင်းကို ၁၉၉၅ ခုနှစ်က ဒေါ်လာ ၈၈ သန်းနဲ့ ဝယ်ထားတာ ဖြစ်ပြီး အခုဆိုရင် သန်း ၄၃၀ ထိအောင် တန်ဖိုးရှိနေပါပြီၤ။

(၁၄) Tom Benson ။ ။ ဒေါ်လာ ၁ ဒသမ ၃ဘီလီယံ ချမ်းသာတယ်၊ New Orleans Pelicans အသင်းကို ပိုင်ဆိုင်ထား တယ်၊ ၂၀၁၂ ခုနှစ် ဧပြီလ အတွင်းက ဒေါ်လာ သန်း ၃၄၀ နဲ့ အပြီးသတ် ဝယ်ထားခဲ့တာ ဖြစ်ပြီး အဆိုပါ အချိန်က အသင်း နာမည် New Orleans Hornets ဖြစ်ပြီး သူ့လက်ထဲမှာ နာမည်အသစ် ပြောင်းထားတာ ဖြစ်ပါတယ်။ American Football အသင်း New Orleans Saints အသင်းကိုလည်း ၁၉၈၅ ခုနှစ်ကတည်းက ဒေါ်လာ သန်း ၇၀ နဲ့ ဝယ်ထားသူ ဖြစ်ပါတယ်။

The post ဘတ်စ်ကက်ဘော အသင်းပိုင်ရှင် ဘီလီယံနာများ appeared first on ဧရာဝတီ.

ကမ္ဘာ့ ကိုယ်ခံပညာ ဘက်စုံသုံး (MMA) ပြိုင်ပွဲရဲ့ မစ်ဒယ်ဝိတ် ကမ္ဘာ့ချန်ပီယံ ကချင် တိုင်းရင်းသား အောင်လအန်ဆန်း အနေနဲ့ မနေ့က ဒေါ်အောင်ဆန်းစုကြည်နဲ့ တွေ့ဆုံရာမှာ ညီညွတ်ငြိမ်းချမ်းမှုနဲ့ အနာဂတ်ကို ဦးဆောင်သွားနိုင်ဖို့ ဆုတောင်း စကား ဆိုလိုက်ပါတယ်။

အောင်လအန်ဆန်းက “ကျနော်တို.တွေအားလုံး ချစ်ချစ်ခင်ခင် ငြိမ်းငြိမ်းချမ်းချမ်းနဲ.စည်းလုံး ညီညွတ်မှု ရှိပြီး အောင်မြင်စွာ နေထိုင်နိုင်ဖို့ အတွက် ဒီနေ့ ခေါင်းဆောင်များနဲ့ အနာဂတ် လူငယ်များ အတွက် အန်တီစုက အမြဲတမ်း မားမား မတ်မတ်နဲ့ ဦးဆောင်သွားနိုင်ပါစေလို့ ကျနော် ဆုတောင်း ပေးလိုက်ပါတယ်ဗျာ” လို့ ဆုတောင်းစကားကို လူမှုကွန်ရက် စာမျက်နှာ ကနေ ဖော်ပြခဲ့ပါတယ်။

မနေ့က တွေ့ဆုံမှုမှာတော့ ဒေါ်အောင်ဆန်းစုကြည်ကလည်း နိုဝင်ဘာ ၃ ရက်နေ့ ထိုးသတ်မယ့်ပွဲစဉ်မှာ အောင်လအန်ဆန်း အနေနဲ့ အနိုင်ရရှိဖို့ ဆုတောင်းပေးခဲ့ပြီး အနိုင်ရရှိမည်ကိုလည်း ယုံကြည်ကြောင်း ပြောဆိုခဲ့မှုကို နိုင်ငံတော် အတိုင်ပင်ခံရုံး က ထုတ်ပြန်ထားပါတယ်။

အမေရိကန် နိုင်ငံသား ခံယူထားခဲ့ပေမယ့် မြန်မာနိုင်ငံ ကိုယ်စားပြုကာ ပြိုင်ပွဲဝင်နေတဲ့ အောင်လအန်ဆန်းဟာ ကချင် ပြည်နယ် အတွင်း စစ်ပွဲတွေနဲ့ ပတ်သက်လို့ ငြိမ်းချမ်း ညီညွတ်စေချင်တဲ့ သူ့ရဲ့ သဘောထားကို မကြာခဏ ထုတ်ပြောလေ့ ရှိပြီး ကချင်ဒေသက စစ်ဘေးရှောင်တွေကို လှူဒါန်း ကူညီမှုပေးဖို့ သူ့ရဲ့ အကျီၤတွေ၊ လက်အိတ်တွေနဲ့ အသုံးအဆောင် တွေ ကို လေလံတင် ရောင်းချမှုတွေလည်း ပြုလုပ်ခဲ့သူပါ။

မြန်မာနိုင်ငံတွင် ၂၀၁၆ ခုနှစ် အတွင်း ပထမဆုံး ထိုးသတ်ကာ နိုင်ပွဲရရှိခဲ့တဲ့ ပွဲစဉ်အပြီးမှာပင် အောင်လအန်ဆန်းက “ကချင်ပြည်နယ်မှာ အခု စစ် ဖြစ်နေတယ် အားလုံးကျေးဇူပြု၍ ကူညီနိုင်သလောက် ကူညီကြပါ။ မြန်မာလူမျိုးက အားလုံး စုပေါင်းပြီးလုပ်ရင် ဘာမဆို ဖြစ်နိုင်ပါတယ်” လို့ ကချင်ပြည်နယ်က စစ်ပွဲတွေနဲ့ ပတ်သက်လို့ ထုတ်ပြောခဲ့ပါတယ်။

အောင်လအန်ဆန်း အနေနဲ့ ဒေါ်အောင်ဆန်းစုကြည်နဲ့ မတွေ့ဆုံခင်ကလည်း တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံခဲ့ဖူးပါတယ်။

၂၀၁၇ ခုုနှစ် ဇွန်လ ၃၀ ရက်နေ့က ရန်ကုန်မြို့ရှိ သုဝဏ္ဏမိုးလုံလေလုံ အားကစားရုံမှာ ကျင်းပတဲ့ Light of a Nation MMA ပြိုင်ပွဲမှာ ကမ္ဘာ့ချန်ပီယံဘွဲ့ကို ဆွတ်ခူးရယူနိုင်ခဲ့တဲ့ အောင်လအန်ဆန်းကို ဗိုလ်ချုပ်မှူးကြီး မင်းအောင်လှိုင် ဂုဏ်ပြု စာလွှာ ပေးအပ်ခဲ့ပြီး တပ်မတော် ကြည်း၊ ရေ၊ လေ မိသားစုများကလည်း ဂုဏ်ပြုငွေ ကျပ် သိန်း ၁၀၀ ချီးမြှင့်ခဲ့ပါတယ်။

Aung La Nsang facebook

လတ်တလော အခြေအနေအရ တပ်မတော်နှင့် ကချင်လွတ်လပ်ရေး တပ်မတော် (KIA) တို့ကြား ရံဖန်ရံခါ တိုက်ပွဲများ လည်း ဖြစ်ပွားနေတဲ့အတွက် ကချင် တိုင်းရင်းသား တဦးဖြစ်တဲ့ အောင်လအန်ဆန်း အနေနဲ့ အခုလို အစိုရ၊ တပ်မတော် ခေါင်းဆောင်များနှင့် ရင်းနှီးစွာ တွေ့ဆုံနိုင်ခဲ့တဲ့အပေါ် ငြိမ်းချမ်းရေး အထောက်အကူပြုဖို့ မေးခွန်းတွေလည်း ရှိနေပါတယ်။

ဒေါ်အောင်ဆန်းစုကြည် ဦးဆောင်တဲ့ အစိုးရအဖွဲ့ တာဝန်ယူပြီး နောက်ပိုင်း ပြည်တွင်းငြိမ်းချမ်းရေး အတွက် ၂၁ ပင်လုံ ညီလာခံတွေ ကျင်းပနေပေမယ့် တိုင်းရင်းသား လက်နက်ကိုင် အဖွဲ့အစည်းတချို့နဲ့ အစိုးရ၊ တပ်မတော် တို့ကြား အပစ်အခတ် ရပ်စဲရေး စာချုပ် (NCA) ကို လက်မှတ်ရေးထိုးနိုင်ခြင်း မရှိသေးပါဘူး။

Aung La Nsang facebook

အမျိုးသား ပြန်လည် သင့်မြတ်ရေး အတွက် ဖွဲ့စည်းပုံ အခြေခံဥပဒေ အကြပ်အတည်းကြားက လှုပ်ရှားနေရတဲ့ ဒေါ်အောင်ဆန်းစုကြည်ဟာ သူတွေ့ဖူးသမျှ လူပုဂ္ဂိုလ်တွေထဲမှာ ရိုးသားဖြောင့်မတ်မှု အရှိဆုံး ပုဂ္ဂိုလ်တဦး ဖြစ်တယ်လို့ လည်း အောင်လအန်ဆန်းက ဆိုထားပါတယ်။

အောင်လအန်ဆန်း အနေနဲ့ ရာနှုန်းပြည့် နိုင်ပွဲ ရယူထားနိုင်တဲ့ မြန်မာ့မြေပေါ်မှာ လေးပွဲမြောက် ပွဲစဉ်အဖြစ် ကိုယ့်ထက် ဝိတ်တန်း မြင့်တဲ့ စိန်ခေါ်သူ ဟောင်ကောင်နိုင်ငံသား ကင်မရွန်းနွယ်ဖွား Alain Ngalani နဲ့ နိုဝင်ဘာ ၃ ရက်နေ့မှာ ထိုးသတ်တော့မှာ ဖြစ်ပါတယ်။

ပြိုင်ပွဲမှာ အောင်လအန်ဆန်း အနေနဲ့ နိုင်ငံဂုဏ်၊ အမျိုးဂုဏ် ဆောင်နိုင်ဖို့အတွက် အောင်မြင်မှုရရှိစေဖို့ မေတ္တာပို့ ဆုတောင်း ပေးကြောင်း ကချင် အမျိုးသား အတိုင်ပင်ခံအဖွဲ့မှ လူငယ်တာဝန်ခံ ဆရာတန်ဂွန်းက ပြောဆိုပါတယ်။

ကချင်ပြည်နယ် မြစ်ကြီးနားမြို့ဇာတိဖြစ်တဲ့ အောင်လအန်ဆန်းကို ၁၉၈၅ ခုနှစ် မေလ ၂၁ ရက်နေ့မှာ မွေးဖွားခဲ့ပြီး သူ့ရဲ့ ခိုင်မြဲသန်မာတဲ့ ချုပ်ကိုင် ကစားဟန်တွေကြောင့် MMA ပြိုင်ပွဲတွေမှာ မြန်မာ့ စပါးအုံးမြွေ (Burmese Python)လို့ လူသိ များသူလည်း ဖြစ်ပါတယ်။ ။

The post ဒေါ်အောင်ဆန်းစုကြည် အတွက် ငြိမ်းချမ်းရေးဆု တောင်းပေးလိုက်တဲ့ အောင်လအန်ဆန်း appeared first on ဧရာဝတီ.

Los Angeles Galaxy လို့လည်း လူသိများတဲ့ LA Galaxy အသင်းက အမေရိကန် ပြည်တွင်း အမှတ်ပေး ဘောလုံးပြိုင်ပွဲ မေဂျာလိဂ်မှာတော့ အောင်မြင်မှု အမြင့်ဆုံးနဲ့ ဆုဖလား အများဆုံး ရယူထားနိုင်တဲ့ အသင်း အဖြစ် ရပ်တည်နေတာပါ။ အဆိုပါ မေဂျာလိဂ်ရဲ့ အဓိက အုပ်စုကြီး နှစ်ခု ဖြစ်တဲ့ အရှေ့ပိုင်း အဖွဲ့ချုပ်နဲ့ အနောက်ပိုင်း အဖွဲ့ချုပ် ဆိုပြီး နှစ်ဖွဲ့ ရှိတဲ့ အထဲက ဂလက်ဆီ အသင်းကတော့ အနောက်ပိုင်း အဖွဲ့ချုပ်ရဲ့ အသင်းဖွဲ့ဝင် တသင်း ဖြစ်ပါတယ်။ ၁၉၉၆ ခုနှစ် မေဂျာလိဂ် စတင် တည်ထောင်ချိန်ကတည်းက ပါဝင်ကစားနေတဲ့ အသင်းဖြစ်ပါတယ်။

အသင်း စတင်ခဲ့တာက ၁၉၉၄ ခုနှစ် ဇွန်လ ၁၅ ရက်နေ့ ဖြစ်ပြီး သက်တမ်း ၂၃ နှစ် ရှိနေပြီ ဖြစ်ပါတယ်။ ကယ်လီဖိုးနီးယား အခြေစိုက် ဂလက်ဆီအသင်းက အိမ်ကွင်း အဖြစ်နဲ့ StubHub Center Carson ကွင်းကို အိမ်ကွင်း အဖြစ် လက်ခံ ကစားတယ်၊ ဒီကွင်းက ဥရောပလို ဘောလုံး ပရိတ်သတ် များများစားစား မရှိတဲ့ အမေရိကန်မှာ ဖြစ်လို့ ဥရောပ ကွင်းတွေလောက် မကြီးဘဲ ပရိတ်သတ် ၂၇၀၀၀ ပဲ ဆံ့တယ်၊ အခု ကွင်းကို အိမ်ကွင်း အဖြစ် မသုံးခင်က Rose Bowl ကွင်းကို ၂၀၀၃ ခုနှစ်ထိ အိမ်ကွင်း အဖြစ် သုံးခဲ့တာလည်း တွေ့ခဲ့ရပါတယ်။

လက်ရှိ အသင်းကို နည်းပြ Sigi Schmid က တာဝန်ယူ ကိုင်တွယ် နေပြီး ထူးခြားတဲ့ ပုံစံနဲ့ ပြိုင်ဆိုင်ရတဲ့ မေဂျာလိဂ် ပွဲစဉ်တွေမှာ အရင်နှစ်က နောက်ဆုံး အဆင့် ရပ်တည်မှု အနေနဲ့ အနောက်ပိုင်း အဖွဲ့ချုပ်ရဲ့ အသင်းဝင်တွေထဲမှာ အဆင့် ၃၊ အမှတ်ပေးပြိုင်ပွဲ တခုလုံးရဲ့ အမှတ်ပေး ဇယားမှာ အဆင့် ၆ နဲ့ ရှုံးထွက် ပွဲစဉ်တွေမှာ ဆီမီးဖိုင်နယ်ထိ ရောက်ရှိထားပြီး ဟိုအရင်နှစ်တွေကလို အမှတ်ပေး ဖလား ရယူနိုင်တာ မရှိဘဲ အလှမ်းကွာခဲ့တာ တွေ့ရပါတယ်။

အသင်းက အိမ်ကွင်းမှာ အဖြူရောင်အက ပေါ်မှာ အပြာနဲ့ အဝါ ကန့်လန့်ဖြတ် အစင်း တစင်းပါ အင်္ကျီနဲ့ ဘောင်းဘီ၊ အဖြူရောင် ခြေအိတ်တွေကို ဝတ်ဆင်ကစားတာ ဖြစ်ပြီး အဝေးကွင်းမှာတော့ နက်ပြာရောင် အအင်္ကျီ၊ ဘောင်းဘီနဲ့ ခြေအိတ်တွေကို ဝတ်ဆင်ကစားတာ တွေ့ရပါတယ်။ ဒါဟာ အသင်းရဲ့ သက်တမ်း ၂၃ နှစ် အတွင်း အိမ်ကွင်း ဝတ်စုံ ပုံစံ ၁၃ ကြိမ်မြောက် ပြောင်းလဲ ပြင်ဆင် ဝတ်ဆင် ကစားနေတာ ဖြစ်ပါတယ်။

လက်ရှိ အသင်းကို ပိုင်ဆိုင်ထားတာကတော့ AEG အဖြစ် လူသိများတဲ့ စီးပွားရေး လုပ်ငန်းစု တခု ဖြစ်တဲ့ Anschutz Entertainment Group ကနေ ပိုင်ဆိုင်တာ ဖြစ်ပါတယ်။ အသင်းရဲ့ အဓိက ပြိုင်ဘက်ကတော့ တပြည်နယ်တည်း အခြေစိုက် ဖြစ်တဲ့ San Jose Earthquake ဖြစ်ပြီး SuperClascio ပွဲ အဖြစ် အမည်သတ်မှတ် ကစားတာ တွေ့ရပြီး ဒီပွဲစဉ်တိုင်းက အကြိတ်အနယ်နဲ့ ပြိုင်ဆိုင်မှု အထူးပြင်းထန်တာ တွေ့ရပါတယ်။

ဂလက်ဆီကို မေဂျာလိဂ်ရဲ့ အအောင်မြင်ဆုံး အသင်းလို့ ဆိုရတာကလည်း ဒီအသင်းက အခုချိန်ထိအောင် အမှတ်ပေး ဖလားကို စုစုပေါင်း ၅ ကြိမ် ရယူထားတယ်၊ ပြီးတော့ Supporters’ Shield ကိုလည်း ၄ ကြိမ်ရထားတယ်၊ Lamar Hunt အမေရိကန် ဖိတ်ခေါ် ဖလားကိုလည်း ၂ ကြိမ်ရယူထားတယ်၊ နိုင်ငံ တကာ ပြိုင်ပွဲတွေမှာ ဆိုရင်လည်း ထိပ်တန်း အမေရိက တိုက်က ကလပ် အသင်းတွေ ဝင်ရောက်ကစားတဲ့ CONCACAF ချန်ပီယံ ဖလားကို ၂၀၀၀ ခုနှစ်က ရဖူးတယ်၊ အမေရိကန် ကလပ်တွေထဲက ဒီဖလားကို ရယူထားနိုင်တာ အခု ဂလက်ဆီအသင်းနဲ့ D.C. United တသင်းပဲ ရှိသေးတာလည်း ဖြစ်ပါတယ်။

ဒီတော့ အခုလို ဆုဖလား အရေ အတွက်တွေက အမေရိကန် အခြေစိုက် ဘယ်ကလပ်မှာမှ မရဖူးသေးတဲ့ အရေအတွက် ဖြစ်နေလို့ အခုချိန်မှာ ဂလက်ဆီဟာ မေဂျာလိဂ်ရဲ့ အအောင်မြင်ဆုံး ကလပ်အသင်း အဖြစ် မှတ်တမ်းဝင်နေတာလည်း ဖြစ်ပါတယ်။

ဒီအသင်းက အောင်မြင်မှုလည်း များတယ်၊ လူသိလည်း များတယ်၊ ပရိတ်သတ်လည်း ခိုင်မာတယ်လို့ ဆိုရမှာပါ၊ ဒါကလည်း ၂၀၀၇ ခုနှစ် အတွင်း နာမည်ကျော် အင်္ဂလန် ဘောလုံးသမား ဒေးဗစ်ဘက်ခမ်းကို ရီးရဲမက်ဒရစ်ကနေ ခေါ်ယူနိုင်ခဲ့တာကနေ နာမည်ရလာပြီး အသင်းရဲ့ ပရိတ်သတ်လည်း များလာသလို အမြတ်အစွန်းလည်း ပိုလာခဲ့တာ ဖြစ်ပါတယ်။

အခြား နာမည်ကျော် ကစားသမားတွေဖြစ်တဲ့ ရော်ဘီကိန်း၊ လူးရစ် ဟာနန်ဒက်၊ ဂျီရိုဗန်ဒီ ဒေါ့ ဆန်းတို့၊ ဂျိုနသန် ဒေါ့ ဆန်းတို့၊ ဂျော့ ကမ်ပို၊ စတီဗင် ဂျရတ်နဲ့ လန်ဒန် ဒိုနိုဗန်လို ကစားသမားတွေကိုလည်း ခေါ်ယူ အားဖြည့်တာတွေ ရှိခဲ့ပါတယ်။

၂၀၁၅ ခုနှစ် အတွင်း Forbes မဂ္ဂဇင်းရဲ့ ဖော်ပြချက် အရ ဂလက်ဆီ အသင်း အနေနဲ့ မေဂျာလိဂ် အသင်းတွေထဲမှာ နှစ်စဉ် ဝင်ငွေ ဒုတိယ အများဆုံး ရရှိနေတဲ့ အသင်း ဖြစ်ပြီး တနှစ် ဝင်ငွေ ဒေါ်လာ ၄၄ သန်းလောက် ရနေသလို အသင်းရဲ့ တန်ဖိုးကတော့ ၂၀၁၅ ခုနှစ် အတွင်းက ဒေါ်လာ သန်း ၂၄၀ လောက် ရှိတယ်လို့ ဖော်ပြတာ တွေ့ရပါတယ်။ စပွန်ဆာတွေ ကနေ တနှစ်ကို ဒေါ်လာ ၁၄ သန်း၊ ရုပ်သံ ပြသခွင့်တွေကနေ ဒေါ်လာ ၅ သန်း ပုံမှန် ရနေပြီး ဒီအပိုင်းတွေမှာ အသင်းရဲ့ ဝင်ငွေက အခြား မေဂျာလိဂ် အသင်းတွေထက် ဝင်ငွေ ပိုကောင်းနေတာ ဖြစ်ပါတယ်။

အသင်းမှာ အနားပေးထားတဲ့ ကျောနံပါတ် တခု ရှိပါတယ်။ သူကတော့ ၁၃ ဖြစ်ပါတယ်။ ၁၉၉၆ ခုနှစ်ကနေ ၂၀၀၇ ခုနှစ် အတွင်း အသင်းရဲ့ ကွင်းလယ် ကစားသမား အဖြစ် ကစားခဲ့သူ Cobi Jones ကို ဂုဏ်ပြုပြီး ဒီနံပါတ်ကို အနားပေးထားတာ ဖြစ်ပါတယ်။ သူက အသင်း အတွက် ပွဲအများဆုံး ကစားပေးထားသူ ဖြစ်ပြီး ပြိုင်ပွဲစုံ ၃၀၆ ပွဲထိ ကစားပေးထားတာလည်း ဖြစ်ပါတယ်။

အသင်း အတွက် ဂိုး အများဆုံး သွင်းထားသူကတော့ လန်ဒန် ဒိုနိုဗန် ဖြစ်ပြီး သူက ၁၁၂ ဂိုး သွင်းယူပေးထားတယ်၊ ဟက်ထရစ် အများဆုံး သွင်းယူထားနိုင်သူတွေက ကိုဘီဂျုံး၊ အက်ဆန် ဘက်ဒယ်၊ ရော်ဘီကိန်းတို့က ၄ ကြိမ်စီ သွင်းယူ ထားတယ်၊ ဂိုးရရှိဖို့ ထောက်ပံ့မှု အများဆုံး လုပ်ထားသူက လန်ဒန် ဒိုနိုဗန် ဖြစ်ပြီး ၁၀၇ ကြိမ်ထိ လုပ်ထားတယ်၊ ပေးဂိုးမရှိ ဂိုးသမား အဖြစ်ကတော့ ကီဗင်ဟာ့မန်းက ၆၂ ပွဲ ဖမ်းထားတာ တွေ့ရပါတယ်။ ဒါက မေဂျာလိဂ်ရဲ့ အောင်မြင်မှု အမြင့်ဆုံး အသင်း ဂလက်ဆီရဲ့ သိကောင်းစရာလေးတွေပါ၊ နောက်နှစ်တွေမှာလည်း အောင်မြင်မှု အများဆုံး ဆိုတဲ့ ဂုဏ်ပုဒ်ကို ဆက်လက် ထိန်းထားနိုင်မလား ဆိုတာ စောင့်ကြည့်ရဦးမှာပါ။ ။

Ref: www.en.m.wikipedia.org

The post အမေရိကန်ရဲ့ အအောင်မြင်ဆုံး ဘောလုံး အသင်း အယ်လ်အေ ဂလက်ဆီ appeared first on ဧရာဝတီ.

အဒမ်လာလန်နာ (Adam Lallana) ရဲ့ နာမည် အပြည့်အစုံက Adam David Lallana ဖြစ်ပြီး ၁၉၈၈ ခုနှစ် မေလ ၁၀ ရက်နေ့မှာ မွေးတာကြောင့် အခု အသက် ၂၉နှစ်ပါ။ လီဗာပူးလ် အသင်းရဲ့ ကွင်းလယ် ကစားသမား ဖြစ်တာကြောင့် ကစားမယ် ဆိုရင် ၃၅နှစ် ဝန်းကျင်လောက်ထိ ကစားနိုင်မယ့် အခွင့်အလမ်း ရှိနေပါတယ်။ အီတလီက ပီယာလို၊ ပြင်သစ်က ရီဘာရီတို့ဆိုရင် ၃၅ နှစ် ဝန်းကျင်ထိ ခြေစွမ်းပြ ကစားနိုင်ကြတာ တွေ့ရပါတယ်။

အဒမ်လာလန်နာ ကို အင်္ဂလန်က စိန့်အယ်ဘန်းမှာ မွေးတယ်၊ အရပ် ၅ ပေ ၈ လက်မ၊ ကွင်းလယ် တိုက်စစ်မှူး အဖြစ်ရော တောင်ပံ ကစားသမား အဖြစ်ပါ ကစားကွက် လိုအပ်ချက် အတိုင်း ဝင်ကစားနိုင်တာ တွေ့ရပါတယ်။

ကျောနံပါတ် ၂၀ ကို ဝတ်တယ်၊ လူငယ်ကစားသမား ဘဝကိုတော့ ဘုန်းမောက်မှာ စခဲ့တယ်၊ ၂၀၀၀ ခုနှစ် ဝန်းကျင်မှာ ဘောလုံးလောကကို ခြေချလာတဲ့ အဒမ်လာလန်နာ။ သိပ်မကြာလိုက်ဘဲ အဲဒီနှစ်မှာပဲ ဆောက်သမ်တန်ကို ရောက်လာ ပါတယ်၊ ၂၀၀၆ ခုနှစ်ထိ ဆောက်သမ်တန် အသင်းမှာ ဘောလုံး ပညာ သင်နေခဲ့တယ်၊ ၂၀၀၆ခုနှစ်မှာ လူငယ်အသင်း ကနေ ဆောက်သမ်တန် လူကြီး အသင်းကို ရောက်လာတယ်။၂၀၁၄ ခုနှစ်ထိ ဆောက်သမ်တန်ရဲ့ သစ္စာတော်ခံ အဖြစ် ရှိနေခဲ့တာပါ။

ဆောက်သမ်တန်မှာ ကစားနေတဲ့ ၈ နှစ်တာ ကာလအတွင်း ၂၀၀၇ ခုနှစ် တနှစ်ပဲ ဘုန်းမောက်ကို အငှားချခံရဖူးပြီး ကျန်တဲ့ နှစ်တွေမှာတော့ ဆောက်သမ်တန်မှာ ရှိနေခဲ့ပါတယ်။ ၂၀၁၄ အရောက်မှာတော့ ကွင်းလယ် ကစားသမားကောင်း ရှာနေတဲ့ လီဗာပူးလ် အသင်းရဲ့ ခေါ်ယူခြင်း ခံရပြီး အခုတော့ အခု အင်္ဂလန်ရဲ့ ဒုတိယမြောက် အအောင်မြင်ဆုံး ကလပ်အသင်းမှာ ၃ နှစ်တာ ခရီးဆက်နိုင်နေပြီ ဖြစ်ပါတယ်။

အင်္ဂလန် အသင်းအတွက် ၂၀၀၆ ခုနှစ် အတွင်း U18 အသင်းမှာ ကတည်းက ပါဝင်ကစားနေခဲ့တာ ဖြစ်ပြီး နှစ်အလိုက် U19, U21 အသင်းတွေ အတွက်ပါ ကစားပေးနိုင်ခဲ့ပါတယ်။ အင်္ဂလန် လက်ရွေးဝင် အသင်း အတွက်ကတော့ ၂၀၁၃ ခုနှစ်က စပြီး ပါဝင်ကစားနေခဲ့တာပါ။

ဂိုးသွင်းယူနိုင်မှု အနေအထားတွေကို ကြည့်မယ် ဆိုရင် ကလပ်အသင်း အတွက် ဆောက်သမ်တန်မှာ ၈ နှစ် အတွင်း ၂၃၅ ပွဲ ကစားတယ်၊ ဂိုးပေါင်း ၄၈ ဂိုး သွင်းတယ်၊ ဘုန်းမောက်ကို အငှားသွား ရချိန် အတွင်း ၃ ပွဲကစားတယ်၊ လီဗာပူးလ် အတွက်ကတော့ ၃ နှစ် အတွင်း ၈၈ ပွဲ ကစားပြီး ၁၇ ဂိုး ရအောင် ကစားပေးထားတာ တွေ့ရပါတယ်။

လာလန်နာနဲ့ ပတ်သက်ပြီး ထူးခြားချက် အနေနဲ့ ဆိုရင် ဆောက်သမ်တန်မှာ ကစားနေချိန် ၂၀၁၂ ခုနှစ် အတွင်းက စပြီး အသင်းခေါင်းဆောင် အဖြစ် တာဝန်ယူ ကစားခွင့် ရခဲ့တယ်၊ ၂၀၁၄ ခုနှစ် ဇူလိုင်လ အတွင်း လီဗာပူးလ်ကို ရောက်လာ တော့ အသင်း စံချိန်တင် ပြောင်းရွှေ့ကြေး ပေါင် ၂၅ သန်းနဲ့ ပြောင်းလာခဲ့တယ်၊ ၂၀၁၃ ခုနှစ်ကနေ စတင်ပြီး အင်္ဂလန် လက်ရွေးစင် အသင်းမှာ ကစားချိန် ကစားသမားကောင်း များစွာ ရှိနေပေမယ့် ၂၀၁၄ ခုနှစ် ကမ္ဘာ့ဖလားနဲ့ ၂၀၁၆ ခုနှစ် ယူရိုဖလား ပွဲစဉ်တွေမှာ အင်္ဂလန် အသင်းအတွက် ရွေးချယ်ခံရလို့ ပါဝင်ခွင့် ရထားတာတွေပဲ ဖြစ်ပါတယ်။

ကလပ်အသင်းနဲ့ အတူ အောင်မြင်မှုတွေ ကြည့်မယ် ဆိုရင် ဆောက်သမ်တန်မှာ ကစားချိန် ၂၀၁၁ ခုနှစ် အတွင်း Football League One မှာ ဒုတိယ ၁ ကြိမ်၊ ၂၀၁၂ ခုနှစ် Football League Championship မှာ ဒုတိယ ၁ ကြိမ်၊ Football League Trophy ကို ၂၀၁၀ ခုနှစ်က ၁ ကြိမ်ဗိုလ်စွဲထားနိုင်ခဲ့တာ တွေ့ရပါတယ်။ အသင်းကြီး ဖြစ်တဲ့ လီဗာပူးလ်မှာတော့ သိသာတဲ့ အောင်မြင်မှု မရသေးပေမယ့် အရင်ဂျာမနီကလပ် ဒေါ့မန်ရဲ့ နည်းပြ ကလော့ ရောက်လာပြီး အသင်းကို အောင်မြင်မှု လမ်းကြောင်းပေါ် ဆွဲတင်နေတာကြောင့် မကြာခင် ဆုတံဆိပ်တွေ ရယူလာနိုင်ဖို့ အလားအလာကောင်းတွေ ရှိနေတာပါ။

တဦးချင်း ဆုတံဆိပ် ရရှိမှုမှာတော့ ၂၀၁၃-၁၄ ရာသီ အားကစား ကလောင်ရှင်များ အဖွဲ့ကနေ ရွေးချယ်တဲ့ တနှစ်တာ အကောင်းဆုံး အသင်း လူစာရင်းမှာ ပါခဲ့တယ်၊ ၂၀၁၁-၁၂ ရာသီ အင်္ဂလန် ချန်ပီယံရှစ် တနှစ်တာ အကောင်းဆုံး အသင်း လူစာရင်းမှာလည်း ပါဖူးတယ်၊ ၂၀၁၀-၁၁ ခုနှစ် လိဂ် ၁ ကို တန်းဆင်းရချိန် တနှစ်တာ အကောင်းဆုံး လိဂ် ၁ အသင်း လူစာရင်းမှာလည်း ပါခဲ့တယ်၊ ၂၀၁၅ ခုနှစ် အတွင်း The Football Manager Team of the Year မှာလည်း ပါဝင်ခဲ့ပြီး အရင်နှစ်က ဆိုရင် ခြေစွမ်းပြ ကစားနိုင်မှုနဲ့ အတူ ၂၀၁၆ ခုနှစ်ရဲ့ တနှစ်တာ အကောင်းဆုံး အင်္ဂလန်ကစားသမား အဖြစ် ရွေးချယ်ခံထားရတာလည်းေ တွ့ရပါတယ်။

Ref: www.en.m.wikipedia.org

The post လီဗာပူးလ်ကွင်းလယ်ရဲ့ ပဲ့ကိုင်ရှင် အဒမ်လာလန်နာ appeared first on ဧရာဝတီ.