ပြည်တွင်းမှာ ဂေါက်သီးအားကစားက လူကြိုက် အများဆုံး မဟုတ်ပေမယ့် လူတိုင်း သိတဲ့ နာမည်ကျော် ဂေါက်သီး ကစားသမား ကတော့ တိုက်ဂါးဝုဒ်ပါ။ သူ့ကို တကမ္ဘာလုံး ကလည်း သိပါတယ်။ ပြီးခဲ့တဲ့ ၂ နှစ် အတွင်း ဂေါက်သီးရိုက် ပြိုင်ပွဲပေါင်း များစွာ ရှိတဲ့ အထဲမှာမှ ၂ ပွဲပဲ ဝင်ပြိုင်တယ်။

အခု နောက်ပိုင်း သူ့ရဲ့ လူမှုရေး အရှုပ်တော်ပုံတွေနဲ့ အတူ ဂေါက်သီး ပြန်မကစားဘဲ နေရင်တောင် ရပေမယ့် သူ ပြန်ကစား လာပါတယ်။ စာရင်းတွေ အရ သူ့ရဲ့ ကြွယ်ဝမှုက အမေရိကန်ဒေါ်လာ သန်း ၇၄၀ လောက်ရှိတာပါ။ ဒီလောက် များတဲ့ ငွေတွေကို သူ ဘယ်လို သုံးနေပါသလဲ။

၁၉၉၆ ခုနှစ်ကနေ စပြီး ကြေးစား ဂေါက်သီးကစားသမား ဖြစ်လာချိန်ကနေ အခုထိ ဆုကြေး စုစုပေါင်း ၁ ဒသမ ၄ ဘီလီယံ လောက် သူ ရခဲ့ပါတယ်။ ဒါကြောင့်လည်း အားကစားသမားတွေထဲမှာ သူဟာ ဝင်ငွေ အကောင်းဆုံး နေရာမှာ ရပ်တည် နေနိုင်သူ တဦးပါ။

စာရင်းတွေ အရ  သူဟာ ၂၀၀၀ ခုနှစ် နောက်ပိုင်း တနှစ်ကို ဒေါ်လာ သန်း ၁၀၀ လောက် ဝင်ငွေ ရလာခဲ့ပါတယ်။ ၂၀၁၆ ခုနှစ် အတွင်း ဂေါက်သီး ကောင်းကောင်း မကစားဖြစ်တာတောင် သဘောတူညီမှုတွေ၊ စပွန်ဆာကြေးတွေနဲ့ ဝင်ငွေ ဒေါ်လာ ၄၅ သန်းလောက် ရနေပါသေးတယ်။

Nike နဲ့ ဆိုရင် ၁၉၉၆ ခုနှစ်ကတည်းက စပွန်ဆာ ရထားတာပါ။ ၂၀၁၃ မှာ ကုမ္ပဏီနဲ့ ဒေါ်လာ သန်း ၂၀၀ တန် စာချုပ် တောင် ချုပ်လိုက်ပါသေးတယ်။ အခုထိ Forbes ကနေ ထုတ်ပြန်တဲ့ ၂၀၁၆ ခုနှစ် စာရင်းတွေ အရ သူဟာ ကမ္ဘာပေါ်မှာ အချမ်းသာဆုံး အားကစားသမား စာရင်းမှာ အဆင့် ၁၂ ချိတ်နေဆဲပါ။

အောင်မြင်မှု ရလာတာနဲ့ အမျှ သူ့ အနားမှာ မိန်းမပျိုတွေ ဝိုင်းလာပါတယ်။ ၂၀၀၉ ခုနှစ် အတွင်း သူ့ရဲ့ အိမ်ထောင်ရေး ဖောက်ပြန်မှုကို သတင်းမီဒီယာတွေက ထောက်ပြလိုက်လို့ ဇနီးသည် Elin Norddgren နဲ့ အဆင်မပြေ ဖြစ်သွားပါတယ်။ နောက်တော့ နယူးယောက်မှာ ရှိတဲ့ နိုက်ကလပ်မန်နေဂျာ Rachel Uchitel က သူမနဲ့ တိုက်ဂါးဝုဒ်နဲ့ မရှင်းမရှင်း ဖြစ်ခဲ့တယ် လို့ ဆိုလာပါတယ်။ တလလောက် အကြာမှာ အခြား မိန်းကလေး တချို့ကလည်း သူတို့နဲ့ တိုက်ဂါးဝုဒ် အကြား ပတ်သက်မှုတွေ ရှိတယ် လို့ ထုတ်ဖော် ဝန်ခံခဲ့ပါသေးတယ်။

ဒီလို လူမှုရေး ပြသနာတွေကြောင့် AT&T, Gatorade, Gillette, Golf Digest, Tah Heuer အပါအဝင် Nike တွေက အစ သူနဲ့ သဘောတူညီမှု စပွန်ဆာတွေ ပြန်ရုပ်သိမ်းသွားခဲ့ပါတယ်။ ၂၀၁၀ မှာ ဇနီးသည်နဲ့ ကွာရှင်းတော့ စရိတ် သန်း ၁၀၀ လောက် ပေးလိုက်ရပါသေးတယ်။ စိတ် မကြည်လင်မှုတွေနဲ့ ဂေါက်သီး ပြိုင်ပွဲတွေမှာလည်း သူ ရလဒ်တွေ မကောင်းတော့ ပါဘူး။ ၂၀၀၈ ကနေ နောက်ပိုင်း ၂၀၁၃ မှာမှ တကြိမ်ပဲ ပြိုင်ပွဲကြီး တခုမှာ ပြန်ပြီး ဗိုလ်စွဲပါတော့တယ်။

ဒါပေမယ့် တိုက်ဂါးဝုဒ်ဆိုတာက အကောင်းကြိုက်သူပါ။ ဇနီးသည်နဲ့ ကွာရှင်းပြီးတော့ ၁၅၅ ပေရှည်တဲ့ Privacyအမည်ရှိ ဇိမ်ခံ သူပိုုင် ရွက်လှေကို ဒေါ်လာ ၂၅ သန်းနဲ့ ပြန်ရောင်းတယ်။ ဖလော်ရီဒါမှာ ရှိတဲ့ မြောက်ပိုင်း ထန်းပင်ကမ်းခြေမှာ ဇိမ်ခံအိမ် ပြန်ဝယ်ပြီး နေလိုက်ပါသေးတယ်။ ဒီလိုပဲ ဂျူပီတာနယ်မှာ ၁၀ ဧက ကျယ်ဝန်းတဲ့ သူ့ စိတ်ကြိုက်အိမ်ကို ဒေါ်လာ ၅၅ သန်း အကုန်ခံပြီး ဆောက်လုပ်နေထိုင်နေပါတယ်။ သိရသလောက် ဒီအိမ်က ဂေါက်သိမ်း လေ့ကျင့်ရေးကွင်းပါ ပါရှိပါတယ်။

သူက အားကစား၊ ဝင်ငွေရမှု အလုပ်အနေနဲ့ ဂေါက်သီး ကစားပေမယ့် ငါးမျှားတာ ဝါသနာပါတယ်။ အားရင် ငါးမျှားနေလေ့ ရှိပါတယ်။ ပြီးတော့ အားကစားပွဲတွေ ကြည့်လေ့ရှိတယ်။ ဘတ်စကတ်ဘောလို ပွဲမျိုးတွေပေါ့။

သူက နေ့စဉ် လေ့ကျင့်မှုတွေ လုပ်နေပါတယ်။ ဒါပေမယ့် ဒဏ်ရာ ပြသနာတွေကြောင့် အကောင်းဆုံး လက်စွမ်းကိုတော့ ပြန် မရသေးဘူးလို့အင်တာဗျူးတခုမှာ ဖြေပါတယ်။ လွန်ခဲ့တဲ့ ၇ နှစ်လောက်က လက်ရည်မျိုုး ပြန်မရသေးဘူး လို့ သူက ဆက်ပြောပါတယ်။

တိုက်ဂါးဝုဒ်ရဲ့ အနီးကပ် လေ့ကျင့်ပေးသူ တဦး ဖြစ်တဲ့ Rory Mcllroy ရဲ့ အဆိုအရတော့ ဝုဒ် အနေနဲ့ အလွန်အကျွံ လေ့ကျင့်မှုတွေကြောင့် ညဘက် အိမ်မပျော်တာတွေတောင် ဖြစ်နေတယ် လို့ ဆိုပါတယ်။ ဝုဒ်က မနက် ၄ နာရီပဲ ရှိသေးတယ်၊ ကျနော့်ဆီ “အိပ်ယာထတော့လေ၊ မင်းဘာလုပ်နေတာလဲ” လို့ Message ပို့လာပြီး လေ့ကျင့်ဖို့ ခေါ်လေ့ရှိတယ် လို့ ဆိုပါတယ်။

အိမ်ပြင် လူမှုရေး ဖောက်ပြန်မှုတွေ ဖြစ်ပြီး ကတည်းက တိုက်ဂါးဝုဒ်တယောက် အိမ်ပြင်ထွက်မှု နည်းသွားတယ် လို့ ဆိုပြီး အိမ်မှာပဲ စားသောက်ဆိုင် ပုံစံလေး ပြင်ဆင်ထားပြီး စားလေ့ရှိတယ် လို့ ဆိုပါတယ်။

ခရီးသွားရင်တော့ သူပိုင် ဂျက်လေယာဉ် Gulfstream G550 နဲ့ သွားတယ ်လို့ ဆိုပါတယ်။ ဒီလေယာဉ်က ဒေါ်လာ ၅၄ သန်း တန်ပါတယ်။

ပရဟိတနဲ့ လှူဒါန်းရေးအပိုင်းမှာ သူက Tiger Woods Foundation ကို တည်ထောင်ထားတယ်။ အားကစားပိုင်းမှာ ကလေးတွေ အတွက် ထောက်ပံ့လှူဒါန်းမှုတွေ လုပ်ပေးတယ်။ ၂၀၁၂ ခုနှစ် အသင်း စတင် တည်ထောင်ချိန်မှာတောင် ဒေါ်လာ ၁၂ သန်း ထည့်ဝင် လှူဒါန်းခဲ့တာ တွေ့ရပါတယ်။

အခုတော့ သူ့ရဲ့ အနေအထိုင်တွေ မှန်လာလို့ Bridgestone နဲ့ Taylor Made တို့နဲ့ သဘောတူစာချုပ်တွေ ပြန်လည် ချုပ်ဆို လာနိုင်ပါပြီ။ လက်ရှိ အမေရိကန် သမ္မတ ဒေါ်နယ်ထရမ့်နဲ့လည်း သူက ခင်တယ်။ ၂၀၁၆ ခုနှစ် အတွင်းက နှစ်ယောက်တည်း ဂေါက်သီး အတူ ကစားဖူးသေးတယ်။ CNN နဲ့ အမေး၊ အဖြေ တခုမှာ ထရန့်နဲ့ ကစားရတာ အတွက် သူ့လက်စွမ်း ဘယ်လောက်ရှိတယ်၊ ဘယ်လောက် ကောင်းတယ် ဆိုုတာထက် အသက် ၇၀ ရှိနေတဲ့ သူ့ အနေနဲ့ ဘောလုံးကို ဘယ်လောက် အားကောင်းကောင်းရိုက်နိုင်သေးသလဲ ဆိုတာ တွေ့ရတာကို သဘောအကျဆုံးပါ လို့ ဖြေသွားဖူးပါတယ်။

၂၀၁၃ ခုနှစ်  နောက်ပိုင်း ဆုဖလားကောင်းကောင်း မရတာ ကြာပြီ ဖြစ်တဲ့ တိုက်ဂါးဝုဒ်က အခုတော့ အရမ်းလေ့ကျင့်နေပြီ။ ကြိုးစားနေပြီ။ ကျန်းမာရေးလည်း ကောင်းနေပါတယ်တဲ့။ မကြာခင် ဂေါက်သီးရိုက် ပြိုင်ပွဲတွေမှာ သူ့ကို ပြန်တွေ့ရတော့မှာ ပါ။          ။

Ref: www.businessinsider.com

The post ဂေါက်သီးသမား တိုက်ဂါးဝုဒ်ရဲ့ အသုံးအဖြုန်း အနေအထိုင်များ appeared first on ဧရာဝတီ.

ပြီးခဲ့တဲ့ ရက်ပိုင်းအတွင်းကပဲ အင်္ဂလန်ကလပ် မန်ယူက ဝါရင့်တိုက်စစ်မှူး အီဗရာမိုဗစ် အနေနဲ့ အသင်းနဲ့ စာချုပ် ပြည့်တာနဲ့ အမေရိကန် အမှတ်ပေး ဘောလုံးပြိုင်ပွဲ မေဂျာလိဂ်က ကလပ်းအသင်း အယ်အေဂလက်ဆီမှာ ကစားဖို့ စာချုပ် ချုပ်လိုက်ပြီ လို့ ဆိုပါတယ်။ ဒီအသင်းက အရင် နာမည်ကျော် ကစားသမား ဒေးဗစ်ဘက်ဟမ်း သွားရောက် ကစားခဲ့တဲ့ ကလပ်ဖြစ်ပြီး လူသိများလာတဲ့ အမေရိကန် ကလပ် အသင်းတသင်းပါ။

ဘယ်လိုပဲ ဖြစ်ဖြစ် မီဒီယာတွေ စာမျက်နှာ ထက်မှာ အောင်မြင်ဖို့၊ ဘောလုံးစွမ်းရည် ပြနိုင်ဖို့ကိုတော့ ဘောလုံးသမား အများစုက ဥရောပ ဘောလုံးပြိုင်ပွဲတွေမှာပဲ ကစားကြပြီး အသက်အရွယ်ရလာတော့ အမေရိကန် မေဂျာလိဂ်ကို ပြောင်းသွားကြတာ တွေ့ရပါတယ်။ အမေရိကန် မေဂျာလိဂ်ရောက် ထင်ရှားတဲ့ ဘောလုံးသမား တချို့အကြောင်း တင်ပြပါမယ်။

(၁) ဒေးဗစ်ဘက်ဟမ်း (David Beckham) ။ ။ မေဂျာလိဂ်ကို လူသိများစေခဲ့တဲ့ ပထမဆုံး အင်္ဂလန် ကစားသမားလို့ ဆိုနိုင်ပါတယ်။ LA Galaxy အသင်းမှာ သွားကစားတယ်။ အသင်းနဲ့ အတူမေဂျာလိဂ်ဖလား ၂ ကြိမ်တောင် ရလိုက်သေး တယ်။ ပြီးတော့ Supporter’s Shield လည်း ၁ ကြိမ်ရတယ်။ ဒါက ပရီးမီးယားလိဂ်မှာဆိုရင် ကွန်မြူနတီဒိုင်းလိုပေါ့။ သူ့ကြောင့် မေဂျာလိဂ်ဟာ တကမ္ဘာလုံးသိခဲ့ရတယ် လို့တောင် ဆိုနိုင်ပါတယ်။

(၂) သီယာရီ ဟင်နရီ (Thierry Henry) ။ ။ ပြင်သစ် အသင်းအတွက်ရော အာဆင်နယ် အသင်းအတွက်ပါ ဂန္ထဝင် ကစားသမားလို့ သတ်မှတ်နိုင်တဲ့ ဟင်နရီက ၂၀၁၀ ခုနှစ် အတွင်း New York Red Bulls အသင်းကို သွားကစားခဲ့ပါတယ်။ အသင်းနဲ့ ဆုဖလားတော့ မရပေမယ့် ဆာပိုတာဒိုင်းကို ၂၀၁၃ ခုနှစ်က ရတယ်၊ မေဂျာလိဂ် တနှစ်တာ အကောင်းဆုံး ကစားသမား စာရင်းမှာလည်း ၃ ကြိမ် ပါဝင်ခဲ့ဖူးပါတယ်။

(၃) ကိန်း (Keane) ။ ။ ၂၀၁၁ ခုနှစ် ဘောလုံးရာသီကနေ စတင်ပြီး ကိန်းတယောက် အယ်အေဂလက်ဆီမှာ ကွင်းလယ် ကစားသမား အဖြစ် ပြောင်းသွားခဲ့တာပါ။ အသင်းအနေနဲ့ ဆုဖလား ၂ ကြိမ်ရအောင် ကူညီပေးသူတွေထဲက တယောက်ပေါ့။ မေဂျာလိဂ်တနှစ်တာ အကောင်းဆုံး ကစားသမား စာရင်းမှာ ၄ ကြိမ်တောင် ပါခဲ့သေးတယ်။ ၂၀၁၄ ခုနှစ်ရဲ့ ပြိုင်ပွဲတလျှောက် MVP (တန်ဖိုးအရှိဆုံး ကစားသမား) တောင် ဖြစ်လိုက်ပါသေးတယ်။

(၄) ဂျာမိန်းဒီဖိုး (Jermain Defoe) ။ ။ ၂၀၁၄ ခုနှစ် အတွင်းကမှ စပါးအသင်းကနေ Toronto FC ကို ရောက်လာခဲ့သူပါ။ အသင်းမှာ တနှစ်ပဲ ကစားခဲ့ပါတယ်။ ၂၀၁၅ အစမှာ ဆန်းဒါးလန်း အသင်းကို ပြန်သွားခဲ့ပါတယ်။ မေဂျာလိဂ်မှာ လစာ ကောင်းပေမယ့် အင်္ဂလန်မှာပဲ ပျော်တဲ့ အင်္ဂလန်သား လို့ ဆိုရမှာပါ။

(၅) ဒေးဗစ် ဗီလာ (David Villa) ။ ။ စပိန်တိုက်စစ်မှူးက နယူးယောက်စီးတီး ဘောလုံးအသင်းမှာ ကစားနေပါတယ်။ ၂၀၁၆ ခုနှစ် အတွက် ပြိုင်ပွဲတလျှောက် အကောင်းဆုံး ကစားသမားဆု ရတယ်၊ အရင်နှစ်တွေ ကတည်းက တနှစ်တာ အကောင်းဆုံး ကစားသမား စာရင်းမှာလည်း ၂ ကြိမ်ပါခဲ့ပါသေးတယ်။

(၆) ကာကာ (Kaka) ။ ။ ဖီဖာကနေ ပေးအပ်တဲ့ ကမ္ဘာ့အကောင်းဆုံး ကစားသမားဆု ရဖူးသူ၊ Ballond’Or ဆုရှင် ကာကာက ၂၀၁၄ ခုနှစ်မှာ Orlando City အသင်းကို ရောက်လာပြီး မေဂျာလိဂ်သမိုင်း တလျှောက် လစာအများဆုံး ရတဲ့ ကစားသမား ဖြစ်လာပါတယ်။ ၂၀၁၅ ခုနှစ်ရောက်တော့ Lions အသင်းမှာ ကစားလိုက်သေးတယ်။ အနားမယူခင်ထိ မေဂျာလိဂ်မှာ ၃ နှစ် ကစားခဲ့သေးသူပါ။

(၇) ဆီဘက်စတိန်ဂျီယိုဗင်ကို (Sebastian Giovinco) ။ ။ အရင်က နာမည်ကျော် ဂျူဗင်တပ် ကစားသမားလည်း မေဂျာလိဂ်မှာ ကစားခဲ့ပါတယ်။ ၂၀၁၅ ခုနှစ်မှာ တိုရန်တို အသင်းအတွက် ကစားပေးရင်း တနှစ်တာ အကောင်းဆုံး ကစားသမားဆု ရသည် အထိခြေစွမ်း ပြနိုင်ခဲ့ပါတယ်။ ၂၀၁၇ အတွင်း ဆာပိုတာဒိုင်းရော အမှတ်ပေးဖလားရော ၂ ခုလုံးရဖို့ အသင်းကို အဓိက ကူညီပေးနိုင်ခဲ့သူလည်း ဖြစ်ပါတယ်။

(၈) အန်ဒရီယာပီယာလို (Andrea Pirlo) ။ ။ မေဂျာလိဂ်ရော ကမ္ဘာ့အကောင်းဆုံး ကစားသမားထဲက တဦးပါ။ နယူးယောက်စီးတီး အသင်းမှာ ကစားသွားပါတယ်။ အသင်းမှာ ကစားနေချိန်အတွင် အီတလီသားက မေဂျာလိဂ်ဟာ ရုပ်ပိုင်း ဆိုင်ရာ ဦးစားပေး ကစားလွန်းတယ်၊ တချိန်လုံး ပြေးနေရတယ်၊ ကစားကွက် ဖန်တီး ကစားချင်တဲ့ သူ့ အတွက် စိတ်ကြိုက်တော့ မဖြစ်ခဲ့ဘူး လို့ ဆိုခဲ့ပါသေးတယ်။

(၉) စတီဗင် ဂျရတ် (Steven Gerrard) ။ ။ လီဗာပူးလ်ရဲ့ အားထားရသူ၊ အင်္ဂလန် အသင်းခေါင်းဆောင်ဟောင်းက ၂၀၁၄-၁၅ ဘောလုံးရာသီကို အယ်အေဂလက်ဆီမှာ ကစားခဲ့ပါတယ်။ ထင်သလောက် အသင်းကို အဆင့်ကောင်းကောင်း ရောက်အောင် မကူညီပေးနိုင်ခဲ့ပေမယ့် မေဂျာလိဂ်ကိုတော့ လူပိုသိစေခဲ့ပါတယ်။ ဂလက်ဆီမှာ ၁ နှစ်ခွဲ ကစားပြီး အသင်းနဲ့ အတူ ကစားသမားဘဝကို အနားယူသွားခဲ့တာပါ။

(၁၀) ဒရော့ဂ်ဘာ (Drogba) ။ ။ ချယ်ဆီးအသင်းရဲ့ အားထားရသူလည်း မေဂျာလိဂ်ရောက်လာပါတယ်။ Montreal Impact အသင်းမှာကစားခဲ့တာပါ။ သူ အသင်းအတွက် ဝင်ကစားတဲ့ ပထမရာသီမှာပဲ Hat-trick (တပွဲတည်း ၃ ဂိုး) သွင်းနိုင်ခဲ့လို့ ပထမဆုံး ကစားသမား အဖြစ် မှတ်တမ်းဝင်သွားပါတယ်။ အသင်းမှာ ၂ နှစ် ကစားပေးခဲ့သူပါ။

(၁၁) ဖရန့်ခ်လမ်းပတ် (Frank Lampard) ။ ။ ချယ်ဆီးအသင်းရဲ့ ဂန္ထဝင်ကစားသမား တဦးပါ။ ၂၀၁၅ ခုနှစ် အတွင်း နယူးယောက်စီးတီး အသင်းကို ပြောင်းလာဖို့ စဉ်ခဲ့ပါတယ်။ ဒါပေမယ့် မန်စီးတီးမှာ ၂၀၁၅ ရာသီကုန်အထိ ကစားခဲ့ရ ပါတယ်။ ဒါကြောင့် မေဂျာလိဂ် ရာသီအစမှာ မပါခဲ့ရဘဲ ရာသီဝက်မှာ နယူးယောက်စီးတီး အတွက် ဝင်ကစားပေးခဲ့ပါတယ်။ ၂၀၁၆ ရာသီအကုန်မှာ ကစားသမား ဘဝက အနားယူသွားပါတယ်။ အသင်း အတွက်တော့ အောင်မြင်မှု ရယူ မပေးနိုင်ခဲ့ပါဘူး။

(၁၂) အက်ရှလေကိုး (Ashley Cole) ။ ။ သူလည်း မေဂျာလိဂ် ရောက်လာသူတွေထဲက တဦးပါ။ သူ့ အသက် ၃၅ နှစ်မှာမှ မေဂျာလိဂ်မှာ ကစားခဲ့တာပါ။ ကစားသမားဘ၀ ကနေ အနားယူပြီ ထင်ခါမှ ပြန် ကစားလာသူ ဖြစ်ပြီး ပွဲများများ စားစား ဝင်ကစားတာတော့ မတွေ့ရတော့ပါဘူး။

(၁၃) ရှဝိန်းစတိန်းဂါး (Schweinsteiger) ။ ။ သူက ဂျာမနီအသင်းနဲ့ အတူ ကမ္ဘာ့ဖလားရဖူးသူ၊ ဘိုင်ယန်မြူးနစ် အသင်းနဲ့ အတူ ဆုဖလားပေါင်းများစွာ ရဖူးသူပါ။ ၂၀၁၇ မှာ မေဂျာလိဂ်ရဲ့ ချီကာဂိုဖိုင်းယားအသင်းကို ပြောင်းလာသူပါ။ မေဂျာလိဂ် အကောင်းဆုံးကစားသမား ၁၁ ဦးစာရင်းမှာလည်း ပါနေသူ၊ အသင်းကိုုလည်း ရှုံးထွက်အဆင့်ထိ ၅ နှစ်အတွင်း ပြန်လည် ရောက်အောင် ကူညီပေးနိုင်ခဲ့သူပါ။

(၁၄) ကားလို့စ် ဗီလာ (Carlos Vela) ။ ။ မက္ကဆီကိုရဲ့ ကြယ်ပွင့်၊ စပိန်ကလပ် အသင်းရီးရဲဆိုဒီဒက်ရဲ့ အားထားရ သူ။ လော့စ်အိန်းဂျလိစ် အသင်းနဲ့ မကြာသေးခင်ကမှ စာချုပ် ချုပ်ဆိုပြီး သူ့ရဲ့ ကစားသမားဘ၀ အနားယူသည် အထိ အသင်းမှာ ဆက်ရှိနေဖို့ များနေတဲ့ ကစားသမားပါ။

Ref: www.businessinsider.com

The post အမေရိကန် မေဂျာလိဂ်ရောက် ဘောလုံးသမားတွေ appeared first on ဧရာဝတီ.

အရင်ကလည်း ကမ္ဘာ့ဖလား ရဖူးတယ်။ အခုလည်း ခြေစွမ်းကောင်း ပိုင်ဆိုင်နေတယ်။ ကစားသမား စုဖွဲ့မှု အားကောင်းလို့ လက်ရှိမှာ ကမ္ဘာ့ဖလား အိပ်မက် မက်နေသူတွေထဲက တသင်းပေါ့။ ဥရုဂွေးနိုင်ငံ ကိုယ်စားပြု လက်ရွေးစင် ဘောလုံး အသင်း ဖြစ်ပြီး ဥရုဂွေးဘောလုံုး အဖွဲ့ချုပ်ကနေ ကိုင်တွယ်နေတာပါ။ လက်ရှိ အသင်းကို နည်းပြ အော်စကာတာဘာရက်ဇ် (Oscar Tabarez) က တာဝန်ယူထားပါတယ်။ ကမ္ဘာ့ဖလားကို ၂ ကြိမ်တောင် ရဖူးထားသူ၊ Copa America ဖလားကိုလည်း ၁၅ ကြိမ် ရထားသေးတယ်။ ၁၉၃၀ မှာ ကမ္ဘာ့ဖလားကို အိမ်ရှင် အဖြစ် လက်ခံကစားတော့ ဗိုလ်လုပွဲမှာ အာဂျင်တီးနားကို ၄ ဂိုး ၂ ဂိုးနဲ့ နိုင်ပြီး ပထမဆုံး ကမ္ဘာ့ဖလား ရတယ်။ ၁၉၅၀ ကမ္ဘာ့ဖလားမှာလည်း ဘရာဇီးလို အသင်းကို ၂ ဂိုး ၁ ဂိုးနဲ့ နိုင်ပြီး ဒုတိယ အကြိမ် ဖလားရခဲ့တာပါ။

အသင်းကို အမည်ပြောင် အနေနဲ့ La Celeste (The Sky Blue) (မိုးပြာရောင်တပ်ဖွဲ့)လို့ ခေါ်ပါတယ်။ အသင်းဝတ်စုံကို မိုးပြာရောင် ဝတ်ဆင်တာ များလို့ ခေါ်တာပါ။ တောင်အမေရိက ဘောလုံးအဖွဲ့ချုပ် နယ်ဝယ် အသင်း တသင်းပါ။ လက်ရှိ အသင်းရဲ့ ခေါင်းဆောင်က ဒိုင်ဂိုဂေါ့ဒင် (Diego Godin) ဖြစ်ပါတယ်။ အိမ်ကွင်း အနေနဲ့တော့ Estadio Centenario ကို လက်ခံ ကစားတာ တွေ့ရပါတယ်။

အသင်းက အိမ်ကွင်းဝတ်စုံ အနေနဲ့ မိုးပြာရောင် အင်္ကျီ၊ အနက်ရောင် ဘောင်းဘီနဲ့ ခြေအိတ်ကို ဝတ်ဆင်ပါတယ်။ ဝတ်စုံက ရိုးရှင်းပါတယ်။ အဝေးကွင်း အနေနဲ့တော့ အဖြူရောင် အင်္ကျီ၊ ဘောင်းဘီ၊ ခြေအိတ်တွေကို ဝတ်ဆင်ကစားပါတယ်။

လက်ရှိ ကမ္ဘာ့အဆင့် သတ်မှတ်ချက် ကျဆင်းနေတာ တွေ့ရပြီး ၂၂ ထိ ရောက်နေပါတယ်။ ဒါဟာ မတ်လအတွင်း အဆင့် ဖြစ်ပါတယ်။ ကမ္ဘာ့ဖလား ၂ ကြိမ် ရဖူးပေမယ့် ထူးခြားချက် တခု အနေနဲ့ အသင်းက အခုထိ တကြိမ်မှ ဖီဖာ အဆင့် သတ်မှတ်ချက်မှာ အဆင့် ၁ မရဖူးသေးတာပါ။ အမြင့်ဆုံး အနေနဲ့ ၂၀၁၁ ခုနှစ် ဇူလိုင်လ အတွင်းက အဆင့် ၂ ထိ ရောက်ဖူးတာ တွေ့ရပါတယ်။ အဆင့်ကျဆင်းမှု အဆိုးဆုံး အနေနဲ့တော့ ၁၉၉၈ ခုနှစ် ဒီဇင်ဘာလအတွင်းက အဆင့် ၅၅ ထိအောင် ရောက်သွားခဲ့တာပါ။

အသင်းက နိုင်ငံတကာပွဲစဉ် ကစားမှုမှာ ၁၉၀၁ ခုနှစ် မေ ၁၆ ရက်ကတည်းက စ ကစားခဲ့ပြီး အာဂျင်တီးနားကို ၂ ဂိုး ၃ ဂိုးနဲ့ ရှုံးခဲ့ပါတယ်။ အသင်း အတွက် မှတ်တမ်းဝင် အကြီးဆုံး ဂိုးပြတ်နိုင်ပွဲကိုတော့ ၁၉၂၇ ခုနှစ် နိုဝင်ဘာ ၉ ရက်နေ့က ကစားတဲ့ ဘိုလီဗီးယားနဲ့ ပွဲမှာ ၉ ဂိုးပြတ် အနိုင်ရခဲ့တာ ဖြစ်ပါတယ်။ အကြီးမားဆုံး ရှုံးပွဲကတော့ ၁၉၀၂ ခုနှစ် ဇူလိုင် ၂၀ ရက်က ကစားတဲ့ အာဂျင်တီးနားနဲ့ ပွဲမှာ ၆ ဂိုးပြတ် ရှုံးခဲ့တာပါ။ အဖွင့်ပွဲမှာရော အကြီးမားဆုံး ဂိုးပြတ် ရှုံးပွဲကိုပါ အာဂျင်တီးနားက အသာရယူ ထားပေမယ့် ကမ္ဘာ့ဖလားမှာတော့ အာဂျင်တီးနားကို နိုင်ပြီး ဖလားရလိုက်တာ ဥရုဂွေးအတွက် အားရစရာပါ။

အသင်း အတွက် အဓိက ပြိုင်ဘက် အနေနဲ့ ဆိုရင် ၂ သင်း ရှိပါတယ်။ ပထမ တသင်းက အာဂျင်တီးနားပါ။ အထက်မှာ ပြောခဲ့သလို အာဂျင်တီးနားကလည်း စံချိန်ဆိုးတွေ ပေးထားသလို ဥရုဂွေးကလည်း ကမ္ဘာ့ဖလားမှာ အာဂျင်တီးနားကို အနိုင်ယူပြီး ဖလားရယူထားလို့ ဒီနှစ်သင်းတွေ့ဆုံတိုင်း ပြိုင်ဆိုင်မှု ပြင်းထန်တတ်ကြပါတယ်။

နောက်ထပ် ဥရုဂွေးရဲ့ ပြိုင်ဆိုင်မှု ပြင်းထန်တဲ့ အသင်းက ဘရာဇီးပါ။ အိမ်နီးချင်းနိုင်ငံတွေ ဖြစ်ပြီး ဘရာဇီးက ကမ္ဘာ့ဖလား ၅ ကြိမ် ရထားလို့ ဥရုဂွေးအတွက် မျက်နှာငယ်စရာပါ။ ဒါပေမယ့် ၁၉၅၀ ကမ္ဘာ့ဖလား ဗိုလ်လုပွဲမှာ ဘရာဇီးကို နိုင်ပြီး ဖလား ရလိုက်လို့ နည်းနည်းတော့ ခံသာပါတယ်။ အဆိုပါ ဗိုလ်လုပွဲဟာ ကမ္ဘာ့ဖလား သမိုင်း တလျှောက် ပရိတ်သတ် အများဆုံးပွဲ အဖြစ် မှတ်တမ်းဝင်နေပြီး ပရိတ်သတ် ၂ သိန်းလောက် လာကြည့်ခဲ့တယ် လို့ သိရပါတယ်။

ကမ္ဘာ့ဖလားကိုတော့ အခုထိအောင် ၁၃ ကြိမ်တိုင် ခြေစစ်ပွဲ အောင်ထားဖူးတာ တွေ့ရပါတယ်။ ၁၉၃၀ မှာမှ စတင် ဝင်ရောက် ယှဉ်ပြိုင်တာ ဖြစ်ပြီး ပထမဆုံး ပြိုင်တယ်၊ ပထမဆုံး ဖလားရတဲ့ အသင်းလို့တောင် ဆိုနိုင်ပါတယ်။ ကွန်ဖက်ဒရေးရှင်း ပြိုင်ပွဲကိုလည်း ၁၉၉၇ ခုနှစ်က စပြီး ၂ ကြိမ် ဝင်ပြိုင်ဖူးတယ်၊ ၁၉၉၇ နဲ့ ၂၀၁၃ တွေမှာ ဖြစ်ပြီး ၂ ကြိမ်လုံး စတုတ္ထ ရခဲ့ပါတယ်။ အိုလံပစ် ပြိုင်မှာလည်း ၁၉၂၄ နဲ့ ၁၉၂၈ တွေမှာ ရွှေတံဆိပ် ၂ ဆု ရဖူးထားတာပါ။

အသင်းက နောက်ဆုံး ရလဒ်တွေ အရ ပြီးခဲ့တဲ့ မတ်လ ၂၃ ရက်နေ့က ကစားခဲ့တဲ့ ချက်နဲ့ ပွဲမှာ ၂ ဂိုး ဂိုးမရှိနဲ့ နိုင်တယ်၊ ၂၆ ရက်နေ့က ကစားတဲ့ ဝေလအသင်းနဲ့ ပွဲမှာ ၁ ဂိုး ဂိုး မရှိနဲ့ နိုင်ထားပါတယ်။ လာမယ့် ကမ္ဘာ့ဖလား မတိုင်ခင် ခြေစမ်းပွဲ တပွဲ ကစားဖို့ ရှိနေပြီး ဇွန်လ ၇ ရက်နေ့မှာ ဥဘက္ကစ္စတန်နဲ့ ခြေစမ်းပွဲ ကစားပါလိမ့်မယ်။

ကမ္ဘာ့ဖလားမှာတော့ လာမယ့် ဇွန်လ ၁၅ ရက်နေ့မှာ အဖွင့်ပွဲ အနေနဲ့ အီဂျစ်၊ ၂၀ ရက်နေ့မှာ ဆော်ဒီအာရေဗျ၊ ၂၅ ရက်နေ့မှာ အိမ်ရှင် ရုရှားတို့နဲ့ တအုပ်စုတည်း ကျနေပြီး အိမ်ရှင် ရုရှားနဲ့ ဥရုဂွေးတို့ နောက်တဆင့် တက်နိုင်လိမ့်မယ် လို့ Bet365 လို အွန်လိုင်း လောင်းကစား လုပ်ငန်းတွေနဲ့ ESPN လို အားကစား သုံးသပ်သူတွေက မှတ်ချက်ပေး ခံထားရပါတယ်။

အသင်းက ၂၀၀၀ ခုနှစ် နောက်ပိုင်း ၂၀၀၆ ခုနှစ် ကမ္ဘာဖလားမှာ ခြေစစ်ပွဲ မအောင်ခဲ့တာက လွဲရင် အမြဲတမ်း ခြေစစ်ပွဲ အောင်ပေမယ့် ၂၀၁၀ ခုနှစ် ကမ္ဘာ့ဖလားမှာ စတုတ္ထ ရခဲ့တာကလွဲရင် အဆင့်မြင့်မြင့် မရောက်သေးလို့ အခု ပြိုင်ပွဲမှာ အားထည့် လာဖို့ မျှော်လင့်နေရတာပါ။

လက်ရှိ အသင်းမှာ ကမ္ဘာ့အဆင့် ကစားသမား အင်အား သိပ်မရှိပေမယ့် ဥရုဂွေးရဲ့ ကစားကွက်က ကျစ်လစ်ပြီး ခံစစ်လည်း မာသလို တိုက်စစ်ကလည်း ဂိုးတွေ ရအောင် ယူနိုင်နေလို့ အခု လာမယ့် ရုရှား ကမ္ဘာ့ဖလားကတော့ ဥရုဂွေး အတွက် စိန်ခေါ်မှု ကောင်းကောင်း ပေးလာတော့မှာပါ။ ။

Ref: en.m.wikipedia.org

The post ကမ္ဘာ့ဖလား အိပ်မက်နဲ့ မိုးပြာရောင် ဥရုဂွေး အသင်းရဲ့ ဘောလုံး အစဉ်အလာ appeared first on ဧရာဝတီ.

၁၉၃၀ ကနေ အခု ၂၀၁၈ ခုနှစ် အတွင်း ၄ နှစ် ၁ ကြိမ်ကျင်းပလာတဲ့ ကမ္ဘာ့ဖလား ဘောလုံးပြိုင်ပွဲတွေ ကျင်းပလာတာ ၂၁ ကြိမ်ရှိပါပြီ။ ကြားမှာ ဒုတိယ ကမ္ဘာစစ်ကြောင့် ၁ ကြိမ်သာ ကျင်းပနိုင်ခြင်း မရှိခဲ့တာပါ။ အဲဒီလို ကျင်းပလာတဲ့ ကမ္ဘာ့ဖလား ဘောလုံးပြိုင်ပွ သမိုင်းတလျှောက် စံချိန်တင်ထားတဲ့ အသင်းနဲ့ ကစားသမားတွေ အကြောင်း လေ့လာတင်ပြပါမယ်။ လာမယ့် ဇွန်လ ဆိုရင် ရုရှားနိုင်ငံမှာ ၂၀၁၈ ခုနှစ် ကမ္ဘာ့ဖလားဘောလုံးပြိုင်ပွဲ ကျင်းပတော့မှာလည်း ဖြစ်ပါတယ်။

အရင်ဆုံး ကမ္ဘာ့ဖလားကို အကြိမ်အများဆုံး ဝင်ခွင့်ရထားတဲ့ အသင်းကို ပြောပါတယ်။ သူကတော့ ကမ္ဘာ့ဖလားမှာ အောင်မြင်မှု အများဆုံးအသင်း ဘရာဇီးပါ။ အခုထိအောင် ကမ္ဘာ့ဖလား ၂၁ ကြိမ်ပဲ ကျင်းပရသေးပြီး ၂၁ ကြိမ်လုံး ခြေစစ်ပွဲအောင်ပြီး ဝင်ခွင့်ရထားပါတယ်။

နောက်ဆုံးအဆင့်ထိ ခြေစစ်ပွဲအောင်ပြီး ၄ သင်း အုပ်စုတွေ ခွဲပြီးကစားကြပါတယ်။ ဒီအထဲမှာ အုပ်စုအဆင့်ကနေ အများဆုံး ၁၆ သင်း အဆင့်ထိ တက်ရောက်နိုင်တဲ့ အသင်း ၂ သင်းရှိပါတယ်။ ဂျာမနီနဲ့ ဘရာဇီးပါ။ ၁၇ ကြိမ်ထိ အုပ်စုအဆင့် ကနေ ကျော်ဖြတ်ပြီး ၁၆ သင်း အဆင့် ရောက်ထားပါတယ်။ ဒီလိုပဲအုပ်စုအဆင့် ရောက်ပေမယ့် ၁၆ သင်း အဆင့် မရောက်ဘဲ အုပ်စုကနေပဲ အများဆုံး လှည့်ပြန်ရတဲ့ အသင်း ၁ သင်း ရှိပါတယ်။ သူကတော့ စကော့တလန်ပါ။ ၈ ကြိမ်တိုင် အုပ်စုအဆင့် ရောက်ပေမယ့် နောက်တဆင့် ထပ်မတက်နိုင်ဘဲ လှည့်ပြန်ရပါတယ်။

အုပ်စုအဆင့် ကနေ ၁၆ သင်း အဆင့်ကို ဆက်တိုင် တက်ရောက်နိုင်မှု အများဆုံးအသင်းက ဂျာမနီပါ။ ၁၇ ကြိမ် အုပ်စု အဆင့် ကနေ တက်ရောက်ထားနိုင်ခဲ့တဲ့ အထဲမှာ ၁၆ ကြိမ်က ဆက်တိုက် နောက်တဆင့် တက်နိုင်ခဲ့ပါတယ်။ ဒီလိုပဲ အုပ်စုအဆင့်မှာ ဆက်တိုက် လှည့်ပြန်လာရတဲ့ အသင်းတွေ အဖြစ် မက္ကဆီကိုနဲ့ စကော့တလန်တို့က ၅ ကြိမ်ဆက် လှည့်ပြန် ရပြီး အများဆုံး အုပ်စုအဆင့်ကနေ ဆက်တိုက် လှည့်ပြန်ရတဲ့ အသင်းတွေ အဖြစ် ရှိနေပါတယ်။

အားလုံး သိကြတဲ့ အတိုင်း အိမ်ရှင်အဖြစ် လက်ခံကစားသူဟာ တခြားအသင်းတွေထက် အားသာချက် ရှိပါတယ်။ အများစု ကလည်း အိမ်ကွင်းမှာကမ္ဘာ့ဖလားကို ရယူနိုင်တာတွေ ရှိပါတယ်။ ဒါပေမယ့် အိမ်ရှင် အဖြစ် လက်ခံကစားပေမယ့် အောင်မြင်မှု မရပဲ ပထမအဆင့်မှာတင် ထွက်ထားရတဲ့ ရလဒ် အဆိုးဆုံး အသင်းတသင်း ရှိပါတယ်။ ၂၀၁၀ ခုုနှစ် ကမ္ဘာ့ဖလားအိမ်ရှင် ဖြစ်တဲ့ တောင်အာဖရိကက ပထမအဆင့်မှာပဲ ပြိုင်ပွဲကနေ ထွက်ခဲ့ရတာပါ။

ကစားသမားတွေထဲမှာတော့ ကမ္ဘာ့ဖလားကို အကြိမ်အများဆုံး ကိုင်မြှောက်ထားနိုင်သူကတော့ နာမည်ကျော် ဘရာဇီး ကစားသမားပီလီ (Pele) ပါ။ သူဟာ ၁၉၅၈၊ ၁၉၆၂ နဲ့ ၁၉၇၀ ကမ္ဘာ့ဖလားတွေကို ရယူထားနိုင်ခဲ့ပါတယ်။

၄ နှစ်မှ တကြိမ် ကျင်းပတဲ့ အခုပြိုင်ပွဲမှာ အကြိမ်ရေ အများဆုံး ဝင်ရောက် ကစားခွင့် ရထားသူကတော့ မက္ကဆီကို ကစားသမား အန်တိုနီယို ကာဘာဂျယ်လ် (Antonio Carbajal) နဲ့ ဂျာမနီကစားသမား လိုသာမတ်သောစ် (Lothar Matthaus) တို့ နှစ်ဦးပါ။ သူတို့ဟာ ကမ္ဘာ့ဖလားကို ၅ ကြိမ်ထိ ဝင်ကစားခွင့်ရထားခဲ့ပါတယ်။

ကမ္ဘာ့ဖလားမှာ ပွဲအများဆုံး ကစားခွင့်ရထားသူကတော့ ဂျာမနီသား လိုသာမတ်သောစ် ဖြစ်ပါတယ်။ သူဟာ ၁၉၈၂ ကနေ ၁၉၉၈ အထိအောင် ကမ္ဘာ့ဖလားတွေမှာစုစုပေါင်း ၂၅ ပွဲ ပါဝင် ကစားခွင့် ရထားပါတယ်။ ကမ္ဘာ့ဖလား ပြိုုင်ပွဲ တခုမှာ အသင်း တသင်းအနေနဲ့ ၇ ပွဲပဲ ကစားရတာ ဖြစ်ပြီး အဆိုပါ ၇ ပွဲလုံးကို ကစားသမားတယောက် အနေနဲ့ အမြဲတမ်း ပွဲထွက်ခွင့် မရနိုင်လို့ အခုလို ၂၅ ပွဲ ကစားထားနိုုင်သူက အနည်းဆုံုး ကမ္ဘာ့ဖလား ပြိုင်ပွဲ ၄ ကြိမ်ဝင်ခွင့်ရထားမှလည်း လိုသာမတ်သောစ်ရဲ့ စံချိန်ကို လိုက်မီနိုင်ပါလိမ့်မယ်။

ရှုံးထွက် အဆင့် ပွဲတွေ အများဆုံး ကစားထားသူကတော့ ဂျာမနီသား မားရော့စ်လဗ်ကလိုဆေး (Miroslav Klose) ပါ။ ၂၀၀၂ ကနေ ၂၀၁၄ ခုနှစ် အတွင်း ပြိုင်ပွဲ ၄ ခုမှာ ဂျာမနီက ရှုံးထွက် အဆင့်ထိအောင် ရောက်ပြီး ကလိုဆေးက စုစုပေါင်း ၁၄ ပွဲ ဝင်ကစားပေး ထားတာပါ။

ပွဲချိန် (မိနစ်) အများဆုံး ကစားထားတဲ့ ကစားသမားကတော့ အီတလီအသင်းက ပေါ်လို မာဒင်းနီ (Paolo Maldini) ဖြစ်ပါတယ်။ သူဟာ ၁၉၉၀ ကနေ ၂၀၀၂ ခုုနှစ် ကမ္ဘာ့ဖလားထိ ပွဲချိန် မိနစ် ၂၂၁၇ မိနစ် (၃၇ နာရီ နီးပါး) ကစားထားပါတယ်။

ကစားသမား အနေနဲ့ သူ ပါဝင်ကစားခဲ့တဲ့ ပွဲနဲ့ နိုင်ပွဲရရှိမှု အနေအထားမှာ ဂျာမနီသား ကလိုဆေးက နိုင်ပွဲ အများဆုံး ရထားသူ အဖြစ် မှတ်တမ်းဝင်နေပြီး သူကစားသမား သက်တမ်းတလျှောက် ကမ္ဘာ့ဖလား ပြိုင်ပွဲ ၁၇ ပွဲထိအောင် နိုင်ထား ပါတယ်။

ကမ္ဘာ့ဖလားဖိုင်နယ်ပွဲကို အများဆုံးတက်ရောက် ကစားခွင့် ရထားတဲ့ သူကတော့ ၁၉၉၄၊ ၁၉၉၈ နဲ့ ၂၀၀၂ ခုနှစ် ကမ္ဘာ့ဖလား ဗိုလ်လုပွဲတွေမှာ ပါဝင်ခွင့်ရခဲ့တဲ့ ဘရာဇီးသား ကာဖူ (Cafu) ပဲ ဖြစ်ပါတယ်။

မိမိအသင်း အတွက် အသင်းခေါင်းဆောင် တာဝန်ကို ရယူပြီး ပွဲအများဆုံုး ကစားထားသူကတော့ အာဂျင်တီးနား အသင်း အတွက် ၁၉၈၆ ကနေ ၁၉၉၄ ခုနှစ်ထိ ကစားပေးခဲ့သူ ဒီယေးဂိုမာရာဒိုနာ (Diego Maradona) ဖြစ်ပြီး ၁၆ ပွဲ အသင်းခေါင်းဆောင် အဖြစ် ပါဝင်ကစား ထားပါတယ်။

ကမ္ဘာ့ဖလားသမိုင်းတလျှောက် အသက်အငယ်ဆုံး ကစားထားသူအဖြစ် အသက် ၁၇ နှစ် ၄၁ ရက်နဲ့ ၁၉၈၂ ခုနှစ် ကမ္ဘာ့ဖလားမှာ ယူဂိုဆလားဗီးယားအသင်းနဲ့ ရင်ဆိုင်ခဲ့တဲ့ အင်္ဂလန်သား နော်မန်ဝှိုက်ဆိုဒ် (Norman Whiteside) က စာရင်းဝင်နေပါတယ်။

ဒီလိုပဲ သမိုင်းတလျှောက် အသက်အကြီးဆုံး အနေနဲ့ ပါဝင် ကစားထားသူကတော့ ၂၀၁၄ ခုနှစ် ကမ္ဘာ့ဖလားမှာ ကိုလံဘီယာအသင်း အတွက် ကစားပေးခဲ့သူ ဖရစ်မွန်ဒရာဂွန် (Faryd Mondragon) ဖြစ်ပါတယ်။ အဆိုပါပွဲ ကစားချိန်က သူဟာ အသက် ၄၃ နှစ်နဲ့ ၃ ရက် ရှိနေပါပြီ။

Ref: en.m.wikipedia.org

The post ကမ္ဘာ့ဖလား သမိုင်းမှာ စံချိန်တင် အသင်းနဲ့ ကစားသမားများ appeared first on ဧရာဝတီ.

အသင်းက ဘယ်လ်ဂျီယမ်နိုင်ငံ ကိုယ်စားပြု လက်ရွေးစင် ဘောလုံး အသင်း ဖြစ်ပြီး ၁၉၀၄ ခုနှစ်ကတည်းက တည်ထောင် ဖွဲ့စည်းထားတာပါ။ ဘယ်လ်ဂျီယမ်ဘောလုံး အဖွဲ့ချုပ်ရဲ့ လက်အောက်ခံ အသင်း အဖြစ် ရှိနေတာဖြစ်ပြီး ဖီဖာကနေ အသိ အမှတ်ပြု အသင်း ဖြစ်သလို ဘောလုံးနယ်ပယ် ခွဲခြား အုပ်ချုပ်မှု အနေနဲ့တော့ ဥရောပ ဘောလုံး အဖွဲ့ချုပ် UEFA ရဲ့ နယ်ဝင် အသင်း ဖြစ်ပါတယ်။

အသင်းကို De Rode Duivels (The Red Devils – အနှီရောင် နတ်ဆိုး) လို့ နာမည်ပြောင် ခေါ်ကြပါတယ်။ အထူးသဖြင့် အသင်း ဝတ်စုံ အနေနဲ့ အနီရောင်ကို ဝတ်ဆင်လို့ ခေါ်တာပါ။ လက်ရှိ အသင်းကို နည်းပြ အဖြစ် Roberto Martinez က ကိုင်တွယ် နေပြီး အသင်းခေါင်းဆောင် ရာထူးကိုတော့ Eden Hazard က တာဝန်ယူတာ တွေ့ရပါတယ်။ အသင်းက အိမ်ကွင်း အဖြစ် King Baudouin Stadium ကို အသုံးပြု လက်ခံကစားတာ တွေ့ရပါတယ်။

အိမ်ကွင်းမှာ ဆိုရင် ဝတ်စုံကို အင်္ကျီရာ ဘောင်းဘီးရော ခြေအိတ်ပါ အနီရောင် ဆင်တူ ဝတ်ဆင် ကစားပါတယ်။ အဝေးကွင်းမှာ အင်္ကျီနဲ့ ဘောင်းဘီက အဝါရောင်ပါ၊ ပခုံးသားမှာ အနက်စင်း ပါရှိတာကလွဲရင် ပြောင်ပဲ ဖြစ်ပါတယ်။

ဖီဖာ အဆင့် သတ်မှတ်ချက် အရ အဆင့် ၅ ထိ ရှိနေပြီး ဒါက မတ်လအတွင်း ကတည်းက အဆင့်ကို ထိန်းထားနိုင် တာပါ။ ၂၀၁၅ ခုနှစ် နိုဝင်ဘာကနေ ၂၀၁၆ ခုနှစ် မတ်လ အတွင်းထိ ၅ လ ဆက်တိုက် ကမ္ဘာ့ အဆင့် ၁ နေရာကို သတ်မှတ်ခံထား ရဖူးတဲ့ အသင်းလည်း ဖြစ်ပါတယ်။ ဒါကြောင့်လည်း လက်ရှိ အသင်းရဲ့ စုဖွဲ့မှုနဲ့ အင်အား၊ ခြေစွမ်းပိုင်း အနေအထားတွေက ကမ္ဘာ့ဖလားကို စိန်ခေါ်နိုင်တယ်၊ အနည်းဆုံး ကွာတားဖိုင်နယ်ထိအောင် တက်ရောက်နိုင်မယ့် အသင်းလို့ ESPN ရဲ့ သုံးသပ်ချက် တခုမှာ တွေ့ရပါတယ်။

အသင်းက ပထမဆုံး နိုင်ငံတကာပွဲစဉ် ကစားမှု အနေနဲ့ ၁၉၀၄ ခုနှစ် မေ ၁ ရက်နေ့က ပြင်သစ်နဲ့ ကစားခဲ့ပြီး တဖက် ၃ ဂိုးစီနဲ့ သရေ ကျခဲ့ပါတယ်။ အကြီးမားဆုံး ဂိုးပြတ်နိုင်ပွဲတွေ အဖြစ် ၁၉၉၄ ခုနှစ် ဇွန် ၄ ရက်က ဇမ်ဘီယာနဲ့ပွဲ၊ ၂၀၀၁ ခုနှစ် ဖေဖော်ဝါရီ ၂၈ ရက်က ဆမ်မာရီနိုနဲ့ပွဲ၊ ၂၀၁၇ ခုနှစ် သြဂုတ် ၃၁ ရက်နေ့က ဂျီဘရော်တာနဲ့ ပွဲတွေမှာ ၉ ဂိုးပြတ်တွေနဲ့ နိုင်ပွဲ ရထားတာပါ။

ကမ္ဘာ့ဖလား ပြိုင်ပွဲနဲ့ ပတ်သတ်ပြီး ကြည့်မယ် ဆိုရင်တော့ အသင်းက ၁၉၃၀ မှာ ပထမဆုံး ကမ္ဘာ့ဖလား ခြေစစ်ပွဲ အောင်မြင်ခဲ့ပြီး နောက်ပိုင်း အခု လာမယ့် ၂၀၁၈ ကမ္ဘာ့ဖလား အပါအဝင် စုစုပေါင်း ၁၃ ကြိမ်ထိ ခြေစစ်ပွဲ အောင်မြင် ထားတာ တွေ့ရပါတယ်။ ၁၉၈၆ ခုနှစ် ကမ္ဘာ့ဖလားမှာတော့ စတုတ္ထနေရာထိ အမြင့်ဆုံး စွမ်းဆောင်ထားနိုင်ခဲ့တာ တွေ့ရပြီး ၂၀၁၀ ခုနှစ် နောက်ပိုင်း သိသိသာသာ တိုးတက်လာနေတဲ့ ခြေစွမ်းပိုင်း ရလဒ်တွေ အရတော့ အခုနှစ် ကမ္ဘာ့ဖလားမှာ ဘယ်လ်ဂျီယမ် အနေနဲ့ အောင်မြင်မှု တခုခု ရယူနိုင်လိမ့်မယ် လို့ ယူဆနေရတာလည်း ဖြစ်ပါတယ်။

အခြား ပွဲစဉ်တွေ အနေနဲ့တော့ ဂုဏ်သိက္ခာ ကြီးမားတဲ့ ဥရောပ ဖလား ပွဲစဉ်မှာလည်း ၁၉၇၂ ခုနှစ်ကနေ စတင်ပြီး အခုထိ ၅ ကြိမ် ဝင်ပြိုင်ဖူးတယ်၊ ၁၉၈၀ ခုနှစ်ကပွဲမှာ ဒုတိယ နေရာ ၁ ကြိမ် ရဖူးတာလည်း တွေ့ရပါတယ်။ အိုလံပစ် ပြိုင်ပွဲတွေလည်း ဝင်ဖူးပြီး ၁၉၂၀ ခုနှစ် အိုလံပစ်မှာ ရွှေတံဆိပ်ဆု ရဖူးပါတယ်။

အသင်းက အဓိက ပြိုင်ဘက် အနေနဲ့တော့ ဒေသတွင်း ပြင်သစ်နဲ့ နယ်သာလန် အသင်းတွေနဲ့ ပြိုင်ဆိုင်မှု အားပြင်းတာ တွေ့ရပါတယ်။ အထူးသဖြင့်တော့ ပြင်သစ်နဲ့ ပြိုင်ဆိုင်မှု ပိုမို ပြင်းထန်ပြီး ကမ္ဘာ့ အဆင့် အောင်မြင်မှုမှာသာ ပြင်သစ်က သာပေမယ့် ပြင်သစ်-ဘယ်လ်ဂျီယမ် ထိပ်တိုက်တွေ့ဆုံမှုမှာတော့ အခုထိ ဘယ်လ်ဂျီယမ်က ပွဲ ၃၀ နိုင်ထားတယ်၊ ပြင်သစ်က ၂၄ ပွဲပဲ နိုင်ထားပါတယ်။

နိုင်ငံတကာ ပွဲစဉ် ကစားမှု အနေအထားမှာတော့ အသင်းက ၂၀၁၇ ခုနှစ် နှစ်ကုန်ပိုင်း အထိ ပြိုင်ပွဲပေါင်း ၇၅၇ ပွဲ ကစားခဲ့တယ်၊ ၃၁၅ ပွဲ နိုင်တယ်၊ ၁၆၃ ပွဲ သရေကျပြီး ၂၇၉ ပွဲထိအောင် ရှုံးထားပါတယ်။ ဒီပွဲစဉ်တွေ အတွင်း အသင်းက စုစုပေါင်း သွင်းဂိုး ၁၂၃၉ ဂိုး ရှိခဲ့တာပါ။

လာမယ့် ကမ္ဘာ့ဖလားမှာတော့ ဘယ်လ်ဂျီယမ် အသင်းက အုပ်စု G မှာ ပါဝင်ပြီး ပနားမား၊ တူနီးရှား၊ အင်္ဂလန်တို့နဲ့  တအုပ်စုတည်း ကျရောက်နေပြီး နောက်တဆင့် တက်ရောက်နိုင်ဖို့ အခွင့် အလမ်း အကောင်းဆုံး အသင်း အဖြစ် ဘယ်လ်ဂျီယမ်နဲ့ အင်္ဂလန်တို့ သတ်မှတ်ခံထားရတာလည်း ဖြစ်ပါတယ်။

ပွဲစဉ် အနေနဲ့တော့ ဇွန်လ ၁၈ရက်နေ့မှာ ပနားမား၊ ၂၃ ရက်နေ့မှာ တူနီးရှားနဲ့ ၂၈ ရက်နေ့မှာ အုပ်စု နောက်ဆုံး ပွဲစဉ် အနေနဲ့ အင်္ဂလန်တို့နဲ့ ကစားရမှာ ဖြစ်ပါတယ်။

Ref: en.m.wikipedia.org

The post ကမ္ဘာ့ဖလားကို စိန်ခေါ်လာမယ့် ဘယ်လ်ဂျီယမ်က အနီရောင်နတ်ဆိုးများ appeared first on ဧရာဝတီ.

Golden Boot လို့လည်း ခေါ်တယ်၊ အရင်က Golden Shoe ဆုပေါ့။ ရွှေဖိနပ်ဆု၊ ကမ္ဘာ့ဖလား ဘောလုံး ပြိုင်ပွဲမှာ ဂိုး အများဆုံး သွင်းယူနိုင်တဲ့ ကစားသမားကို ပေးအပ်တဲ့ ဆု။ ခြေစစ်ပွဲတွေမှာ သွင်းယူတဲ့ ဂိုးတွေကို ထည့်မတွက်ဘူး။ အုပ်စုအဆင့် ခွဲခြား ကစားတဲ့ ကမ္ဘာ့ဖလားပြိုင်ပွဲတွင်း ပွဲစဉ်တွေကနေ စတင်ပြီး သွင်းယူတဲ့ ဂိုးတွေကို မှတ်သားပြီး သွင်းဂိုး အများဆုံး ကစားသမားကို ပေးအပ်တာပါ။

၁၉၈၂ ခုနှစ်က စတင် ပေးအပ်ခဲ့တဲ့ ဒီဆုက အဆို Golden Shoe အဖြစ် ပေးခဲ့တာပါ။ ၁၉၉၄ ရောက်တော့ သွင်းဂိုး အများဆုံး နှုန်းချင်း တူနေရင် ဂိုးထောက်ပံ့မှု ပိုပြီး လုပ်ဆောင်ပေးနိုင်သူက ရွှေဖိနပ်ဆု ရမယ် ဆိုတဲ့ စနစ်သစ်ကို ပြောင်းလဲ အသုံးပြု ခဲ့ပါတယ်။ ဒီတော့ ရွှေဖိနပ်ဆု ရဖို့က မိမိ ဂိုးများများ သွင်းနေရုံနဲ့လည်း မပြီးသေးဘူး၊ သွင်းဂိုး တူ နေရင် မိမိအနေနဲ့ ရွှေဖိနပ်ဆု ရနိုင်ဖို့ အသင်းဖော်တွေ ဂိုးသွင်းနိုင်အောင် ထောက်ပံ့ပေးမှု လုပ်နိုင်ဖို့လည်း လိုဦးမှာ ပါ။

၂၀၀၆ ခုနှစ် ရောက်တော့ ပွဲကစားချိန်ကိုပါ ထည့်တွက်လာပါတော့တယ်။ မိနစ် ၉၀ ကစားတယ်၊ ၁ ဂိုး သွင်းသူနဲ့ မိနစ် ၆၀ ပဲ လူစားဝင် ကစားတယ်၊ ၁ ဂိုး သွင်းတယ် ဆိုရင် ခဏပဲ ကစားပေမယ့် ဂိုး သွင်းနိုင်သူက အသာရမယ့် သဘောပါ။

ဆက်ပြီးတော့ ကမ္ဘာ့ဖလား ဘောလုံး ပွဲစဉ် တလျှောက် ဂိုး အများဆုံး သွင်းခဲ့သူတွေကို ပြောပြပါမယ်။ ၁၉၃၀ ခုနှစ် ကမ္ဘာ့ ဖလားကနေ ၁၉၇၈ ခုနှစ် ပြိုင်ပွဲထိ ရွှေဖိနပ်ဆု မပေးခဲ့လို့ အဆိုပါ ပြိုင်ပွဲတွေမှာ ဂိုးအများဆုံး သွင်းသူတွေ ရွှေဖိနပ်ဆု မရခဲ့ပေမယ့် တကယ်တော့ လက်ရှိ ဆုပေးအပ်မှု အရ ရွှေဖိနပ်ဆု ရနိုင်တာကြောင့် ဗဟုသုတ အနေနဲ့ သိထားရအောင် ထည့်သွင်း ပြောပြမှာပါ။

၁၉၃၀ ကမ္ဘာ့ဖလားမှာ ဂိုးအများဆုံး သွင်းသူက ပြိုင်ပွဲတွင်း ၈ ဂိုး သွင်းသူ အာဂျင်တီးနား တိုက်စစ်မှူး ဂူလီယာမို စတေဘယ်လ် (Guillermo Stabile) ဖြစ်ပါတယ်။ ၁၉၃၄ ခုနှစ် ကမ္ဘာ့ဖလားမှာတော့ ချက်အသင်း ကစားသမား Oldrich Nejedly က ၅ ဂိုး သွင်းပြီး အများဆုံး ဂိုးသွင်းသူ ဖြစ်ခဲ့ပါတယ်။ ၁၉၃၈ ခုနှစ်ပြိုင်ပွဲမှာ ဘရာဇီး တိုက်စစ်မှူး လီယိုနီဒါစ် (Leonidas) က ၇ ဂိုး သွင်းပါတယ်။ ၁၉၅၀ ပြိုင်ပွဲမှာလည်း ဘရာဇီးသား အဒီမီယာ (Ademir) က ၈ ဂိုး အများဆုံး သွင်းယူခဲ့ပါတယ်။ ၁၉၅၄ ပြိုင်ပွဲမှာတော့ ဟန်ဂေရီ ကစားသမား စန်ဒိုကိုးဆစ် (Sandor Kocsis) က ပြိုင်ပွဲ တခု အတွင်း ဂိုး အများဆုံး သွင်းယူနိုင်မှု စံချိန်သစ် တင်ပြီး ၁၁ ဂိုး သွင်းခဲ့ပါတယ်။

၁၉၅၈ ခုနှစ် ကမ္ဘာ့ဖလားမှာ ပြင်သစ် ကစားသမား Just Fontaine က စံချိန်သစ် ထပ်တင်ပြီး ၁၃ ဂိုး သွင်းပါတယ်။ ၁၉၆၂ ခုနှစ် ပြိုင်ပွဲမှာ ဂိုးသွင်းယူနိုင်မှု နည်းခဲ့လို့ ၄ ဂိုးစီပွဲ အများဆုံး သွင်းယူနိုင်ခဲ့တဲ့ ကစားသမား ၆ ဦးထိ ရှိခဲ့ပါတယ်။ ၁၉၆၆ ခုနှစ် ပြိုင်ပွဲမှာ ပေါ်တူဂီ ကစားသမား ယူဆေးဘိုင်အို (Eusebio) က ၉ ဂိုးထိ သွင်းယူခဲ့ပါတယ်။ ၁၉၇၀ မှာ ဂျာမနီတိုက်စစ်မှူး ဂီးယဒ်မူလာ (Gerd Muller) က ၁၀ ဂိုး၊ ၁၉၇၄ ခုနှစ်မှာ အနောက်ဂျာမနီ ကစားသမား ဂရာဇီဂေါ့ဇ် လာတို (Grzegorz Lato) က ၇ ဂိုး၊ ၁၉၇၈ ခုနှစ်ပြိုင်ပွဲမှာ အာဂျင်တီးနားသား မာရီယိုကင်ပီစ် (Mario Kempes) က ၆ ဂိုးနဲ့ ပြိုင်ပွဲ အလိုက် ဂိုးအများဆုံး သွင်းခဲ့ပေမယ့် ရွှေဖိနပ်ဆု မပေးသေးလို့ ဆုမရခဲ့သူတွေ ဖြစ်ပါတယ်။

၁၉၈၂ မှာတော့ ရွှေဖိနပ်ဆု စပေးပါပြီ။ Golden Shoe ဆု အနေနဲ့ ပေးအပ်တာပါ။ ပထမဆုံး ရွှေဖိနပ်ဆုကို အီတလီသား ပေါ်လိုရိုဆီ (Paolo Rossi) က ၆ ဂိုး သွင်းပြီး ရပါတယ်။ ရွှေဖိနပ်ဆုနဲ့ အတူ ငွေဖိနပ်ဆုနဲ့ ကြေးဖိနပ်ဆုလည်း ပေးပါတယ်။ ပထမဆုံး ငွေဖိနပ်ဆုကို ဂျာမနီသား ကားလ်ဟိန့်ဇ် ရမ်မာနစ်ဂျီ (Karl-Heinz Rummenigge) က ၅ ဂိုး သွင်းလို့ ရပါတယ်။ ကြေးဖိနပ်ဆုကို ဘရာဇီးသား ဇီကို (Zico) က ၄ ဂိုး သွင်းလို့ ရပါတယ်။

၁၉၈၆ ခုနှစ်မှာ ရွှေဖိနပ်ဆုကို အင်္ဂလန်သား ဂယ်ရီလိုင်းကား (Gary Lineker) က ၆ ဂိုး သွင်းလို့ ရပါတယ်။ ၁၉၉၀ မှာတော့ အီတလီသား ဆယ်လ်ဗာတိုး စချီလိုင်း (Salvatore Schillaic) ကပဲ ၆ ဂိုး သွင်းလို့ ရပါတယ်။ ၁၉၉၄ ခုနှစ် ကမ္ဘာ့ ဖလားမှာ ရွှေဖိနပ်ဆုကို ပူးတွဲ နှစ်ဦးရပါတယ်။ ယူကရိန်းကစားသမား အိုလက်ဆလင်ကို (Oleg Salenko) နဲ့ ဘယ်ဂျီယမ် ကစားသမား ဟရီတိုစတိုအီကော့ဗ် (Hristo Stoichkov) တို့ နှစ်ဦးက ၆ ဂိုးစီ အများဆုံး သွင်းယူနိုင်ခဲ့လို့ပါ။ ၁၉၉၈ မှာတော့ ခရိုအေးရှား ကစားသမား ဒိုဗာဆူကား (Davor Suker) က ၆ ဂိုး သွင်းပြီး ရွှေဖိနပ်ဆု ရပါတယ်။ ၂၀၀၂ ခုနှစ်မှာ ဘရာဇီး တိုက်စစ်မှူး ရော်နယ်လ်ဒို (Ronaldo) က ၈ ဂိုးနဲ့ ရွှေဖိနပ်ဆု ရသလို ၂၀၀၆ ခုနှစ် ပြိုင်ပွဲမှာတော့ ဂျာမနီ နာမည်ကျော် တိုက်စစ်မှူး မာရိုဆလက် ကလို့စ် (Miroslav Klose) က ၅ ဂိုးနဲ့ ရွှေဖိနပ်ဆု ရပါတယ်။

လက်ရှိ ပေးအပ်နေတဲ့ Golden Boot ဆုကိုတော့ ၂၀၁၀ ခုနှစ်ကမှ အမည်ပြောင်းလဲ စတင်ပေးအပ်နေတာဖြစ်ပြီး ပထမဆုံး ရွှေဖိနပ်ဆု (Golden Boot) ဆုကိုတော့ ဂျာမနီသား သောမတ်စ် မူလာ (Thomas Muller) က ၅ ဂိုးတည်း သွင်းပြီး ရပါတယ်။ ငွေဖိနပ်ဆု (Silver Boot) ဆုကိုတော့ စပိန်ကစားသမား ဒေးဗစ်ဗီလာ (David Villa) က သွင်းဂိုး ၅ ဂိုး တူပေမယ့် ပွဲချိန်ကစားမှုနဲ့ ဂိုးထောက်ပံံ့မှု အရ ငွေဖိနပ်ပဲ ရပါတယ်။ ကြေးဖိနပ်ဆု (Bronze Boot) ကိုတော့ နယ်သာလန် ကစားသမား Wesley Sneijder က ၅ဂိုးသွင်းပေမယ့် ဖန်တီးမှု အားနည်းပြီး ပွဲကစားချိန် များလို့ ကြေးဖိနပ်ပဲ ရခဲ့တာပါ။

ပြီးခဲ့တဲ့ ၂၀၁၄ ကမ္ဘာ့ဖလားမှာတော့ ရွှေဖိနပ်ဆုကို ကိုလံဘီယာ တိုက်စစ်မှူး ဂျိမ်းစ် ရိုဒရင်ဂုဇ် (James Rodriguez) က ၆ ဂိုးနဲ့ ရတယ်။ ငွေဖိနပ်ကို ဂျာမနီသား သောမတ်စ်မူလာက ၅ ဂိုးနဲ့ရတယ်၊ ကြေးဖိနပ်ဆုကိုတော့ ဘရာဇီး တိုက်စစ်မှူး နေမာက ၄ ဂိုးနဲ့ ရခဲ့ပါတယ်။ ထူးခြားချက်ကတော့ ဂျာမနီသား Thomas Mullerက ရွှေဖိနပ်ဆုကို ၂ ကြိမ်ဆက် ရတာ ဖြစ်သလို အအောင်မြင်ဆုံး ကစားသမား အဖြစ်လည်း မှတ်တမ်းဝင်သွားပါတယ်။

Ref: en.m.wikipedia.org

The post ကမ္ဘာ့ဖလားရဲ့ ရွှေဖိနပ်ဆုတို့ ရာဇဝင် appeared first on ဧရာဝတီ.

ကမ္ဘာ့ဖလား သမိုင်းတလျှောက် စံချိန်ကောင်းတွေ ပိုင်ဆိုင်ထားတဲ့ ဂိုးသမားတွေနဲ့ အသင်း နည်းပြတွေ အကြောင်း ပြောပြပါမယ်။ အရင်ဆုံး ပေးဂိုး မရှိ အများဆုံး ဖမ်းယူပေးထားနိုင်တဲ့ အကောင်းဆုံး ဂိုးသမားတွေ အကြောင်း ပြောပြမှာပါ။ ပြိုင်ပွဲ တလျှောက် ပေးဂိုး မရှိ ပွဲအများဆုံး ဖမ်းယူထားသူ ၂ ဦး ရှိပါတယ်။ ၁၉၈၂ ခုနှစ် ကမ္ဘာ့ဖလားကနေ ၁၉၉၀ ကမ္ဘာ့ဖလားထိ ၃ ကြိမ် ပါဝင်ကစား ခဲ့တဲ့ အင်္ဂလန် ဂိုးသမား ပီတာရှစ်လ်တန် (Peter Shilton) နဲ့ ၁၉၉၈ ကနေ ၂၀၀၆ ခုနှစ်ထိ ၃ ကြိမ်ဆက်တိုက် ပါဝင်ခဲ့ပြီး ပေးဂိုး မရှိပွဲ ၁၀ ပွဲထိအောင် ဖမ်းယူထားနိုင်တဲ့ ပြင်သစ် ဂိုးသမား ဖာဘီယန်ဘားသက် (Fabien Barthez) တို့ပဲ ဖြစ်ပါတယ်။

ပွဲချိန် တဆက်တည်း ဂိုးမပေးရအောင် အကြာဆုံး ကာကွယ်နိုင်တဲ့ ဂိုးသမား အဖြစ်နဲ့တော့ ၁၉၉၀ ကမ္ဘာ့ဖလားမှာ ၅ ပွဲဆက် ပေးဂိုး မရှိ စံချိန်ကို တင်နိုင်ခဲ့သလို မိနစ်ပေါင်း ၅၁၇ မိနစ်ကြာ ဂိုးမပေးရအောင် ဖမ်းပေးနိုင်ခဲ့တဲ့ အီတလီ ဂိုးသမား ဝေါ်လ်တာဇင်ဂါ (Walter Zenga) ဖြစ်ပါတယ်။

ခြေစစ်ပွဲ ကစားတဲ့ ပွဲစဉ်တွေကိုပါ ထည့်တွက်မယ် ဆိုရင်တော့ တဆက်တည်း ဂိုးမပေးရအောင် အချိန် အကြာဆုံး ကာကွယ်နိုင်သူ အဖြစ် ၉ ပွဲဆက် ပေးဂိုး လုံး၀ မရှိအောင် ကာကွယ်နိုင်ခဲ့သလို ၉၂၁ မိနစ်ကြာ ဂိုး မပေးရအောင် ကစားနိုင်ခဲ့သူက နယူးဇီလန် ဂိုးသမား ရစ်ချဒ်ဝီလ်ဆင် (Richard Wilson) ဖြစ်ပါတယ်။

ပြိုင်ပွဲ တလျှောက် ပေးဂိုး အများဆုံး ဂိုးသမားတွေကတော့ မက္ကဆီကို ဂိုးသမား အန်တိုနီယိုကာဘာဂျယ် (Antonio Carbajal) နဲ့ ဆော်ဒီအာရေဗျ ဂိုးသမား မိုဟာမက်အယ်လ်ဒီယေး (Mohamed Al-Deayea) ဖြစ်ပြီး သူတို့ ပါဝင် ကစားခဲ့တဲ့ ကမ္ဘာ့ ဖလားပြိုင်ပွဲ အတွင်း သွင်း ဂိုး ၂၅ ဂိုးထိ ဂိုးပေးခဲ့ရပါတယ်။

ပြိုင်ပွဲ တခု အတွင်း ပေးဂိုး အများဆုံး ဂိုးသမားက ၁၉၅၄ ခုနှစ် ကမ္ဘာ့ဖလားပြိုင်ပွဲဝင် တောင်ကိုရီးယား ဂိုးသမား ဟွန်ဂျူးယောင် (Hong Duk-Yung) ဖြစ်ပြီး ပြိုင်ပွဲ တခု အတွင်း ပေးဂိုး ၁၆ ဂိုး ပေးခဲ့ရတာပါ။

ပွဲစဉ် တခု အတွင်း ပေးဂိုး အများဆုံး ဂိုးသမားကတော့ ၁၉၈၂ ခုနှစ် ကမ္ဘာ့ဖလားမှာ ဟန်ဂေရီ အသင်းနဲ့ ကစားခဲ့တဲ့ အယ်ဆာဘာဒါ အသင်း ဖြစ်ပြီး အယ်ဆာဘာဒါဂိုးသမား လူးဝစ်ဂူဗားရား မိုရာ(Luis Guevara Mora) က ဟန်ဂေရီ အသင်းရဲ့ တပွဲတည်း သွင်းဂိုး ၁၀ ဂိုးထိပေးလိုက်ရတာ ဖြစ်ပါတယ်။

ကမ္ဘာ့ဖလား ပြိုင်ပွဲ တလျှောက် ပင်နယ်တီ ကာကွယ်နိုင်မှု အများဆုံး ဂိုးသမား အဖြစ်နဲ့ ၁၉၇၄ ခုနှစ် ပြိုင်ပွဲဝင် ပိုလန် ဂိုးသမား ဂျန်တိုမဇ်ဝက်စကီ (Jan Tomaszewski) က ၂ ကြိမ်၊ ၂၀၀၂ ခုနှစ် ပြိုင်ပွဲမှာ အမေရိကန် ဂိုးသမား ဘရက် ဖရီဒယ်လ် (Brad Friedel) က ၂ ကြိမ်စီ ကာကွယ်ထားနိုင်တာ တွေ့ရပါတယ်။ သူတို့အပြင် နာမည်ကျော် စပိန် ဂိုးသမား Iker Casillas ကလည်း ၂၀၀၂ ခုနှစ် ကမ္ဘာ့ဖလားမှာ ၁ကြိမ်၊ ၂၀၁၀ ခုနှစ် ကမ္ဘာ့ဖလားမှာ ၁ ကြိမ် ပင်နယ်တီ ကာကွယ်မှု လုပ်နိုင်ခဲ့တာ ဖြစ်ပါတယ်။

နည်းပြပိုင်းမှာတော့ ကမ္ဘာ့ဖလားပြိုင်ပွဲတွေ အများဆုံး နည်းပြကိုင်တွယ် ထားနိုင်သူက ၁၉၆၆ ကနေ ၁၉၇၈ ခုနှစ် ထိ အနောက်ဂျာမနီ အသင်း နည်းပြဖြစ်ခဲ့သူ ဟဲလ်မတ်စချွန်း (Helmut Schon) က ၂၅ ပွဲထိအာင် နည်းပြဖူးတာ တွေ့ရ ပါတယ်။ နည်းပြ တဦးတည်းကနေ နိုင်ပွဲ အများဆုံး ရယူထားနိုင်သူ အဖြစ်လည်း ဟူးမတ်ကပဲ ရှိနေပြီး ၂၅ ပွဲ နည်းပြရာမှာ ၁၆ ပွဲ အနိုင်ရထားပါတယ်။

နည်းပြဘဝနဲ့ ကမ္ဘာ့ဖလားကို အကြိမ်ရေ အများဆုံး ရယူထားနိုင်သူကတော့ အီတလီနည်းပြ ဗစ်တိုရီယို ပိုဇို (Vittorio Pozzo) ဖြစ်ပြီး ၁၉၃၄ နဲ့ ၁၉၃၈ ပြိုင်ပွဲတွေမှာ ဖလား ၂ လုံး ရခဲ့ပါတယ်။ ပြိုင်ပွဲ အများဆုံး ပါဝင် နည်းပြခွင့် ရခဲ့သူကတော့ ကားလို့စ် အဲလ်ဘတ်တို ပါရေးရား (Carlos Alberto Parreira) ဖြစ်ပြီး ၆ ကြိမ်ထိအောင် နည်းပြ အဖြစ် ပါဝင်ခဲ့ဖူးပါတယ်။

နိုင်ငံ အသင်းတွေကို နည်းပြ တာဝန်ယူပြီး ကမ္ဘာ့ဖလားကို အကြိမ်အများဆုံး ဝင်ပြိုင်ဖူးသူ ၂ ဦး ရှိပါတယ်။ ပထမ တယောက်က ဘိုရာမီလူတီနိုဗစ် (Bora Milutinovic)ပါ။ မက္ကဆီကို၊ ကော်စတာရီကာ၊ အမေရိကန်၊ နိုက်ဂျီရီးယားနဲ့ တရုတ်တွေကို နည်းပြ အဖြစ် ကိုင်တွယ်ပြီး ကမ္ဘာ့ဖလား ဝင်ပြိုင်ဖူးပါတယ်။ နောက်တယောက်ကတော့ Carlos Alberto Parreriaပါ။ သူကလည်း ကူဝိတ်၊ ယူအေအီး၊ ဘရာဇီး၊ ဆော်ဒီအာရေဗျနဲ့ တောင်အာဖရိကတွေကို နည်းပြ အဖြစ် ကိုင်တွယ်ပြီး ကမ္ဘာ့ဖလား ဝင်ဖူးတာ ဖြစ်ပါတယ်။

ပွဲစဉ် တဆက်တည်း နိုင်ပွဲ အများဆုံးရအောင် နည်းပြ နိုင်သူ အဖြစ်နဲ့တော့ ၁၁ ပွဲဆက်တိုက် နိုင်ပွဲ ရစေခဲ့တဲ့ လူးဝစ် ဖီးလစ်ပ်စကိုလာရီ (Luis Felipe Scolari) ဖြစ်ပါတယ်။ ကမ္ဘာ့ဖလားမှာ အသက်အငယ်ဆုံး နည်းပြ အဖြစ် ကိုင်တွယ်ထား သူ ကတော့ ၁၉၃၀ ခုနှစ် ပထမဆုံး ကမ္ဘာ့ဖလားမှာ အာဂျင်တီးနားအသင်းကို နည်းပြတဲ့ နည်းပြ ဂျူအန်းဂျိုဆီ ထရာမူတိုလာ (Juan Jose Tramutola) က အဆိုပါကာလ နည်းပြတာဝန်ယူနေချိန် အတွင်း အသက် ၂၇ နှစ်၊ ၂၆၇ ရက်ပဲ ရှိသေးတာပါ။ ဒီလိုပဲ အသက် အကြီးဆုံး နည်းပြ အဖြစ်နဲ့ ကိုင်တွယ်ဖူးသူက ၂၀၁၀ ခုနှစ် ကမ္ဘာ့ဖလားမှာ ဂရိ အသင်းကို နည်းပြသူ အိုတိုရီဟာဂယ် (Otto Rehhagel) ဖြစ်ပြီး အဆိုပါ အချိန်က သူ့ အသက် ၇၁ နှစ်နဲ့ ၃၁၇ ရက် ရှိနေပါပြီ။

ကစားသမားဘဝမှာရော နည်းပြ အဖြစ်နဲ့ရော ကမ္ဘာ့ဖလားကို ရယူထားနိုင်သူတွေ အများကြီးပါ။ ဒီအထဲကမှာ ဖလား အများဆုံး ရယူထားနိုင်သူကတော့ ကမ္ဘာ့ဖလား ၃ လုံး ရထားတဲ့ ဘရာဇီးသား မာရီယိုဇာဂယ်လို (Mario Zagallo) ရှိပါတယ်။ ၁၉၅၈ နဲ့ ၁၉၆၂ ပြိုင်ပွဲတွေမှာ ကစားသမား အနေနဲ့ ကမ္ဘာ့ဖလား ၂ လုံး၊ ၁၉၇၀ မှာတော့ နည်းပြ အဖြစ်နဲ့ ဆုဖလား ၁ လုံး၊ စုစုုပေါင်း ၃ လုံး ရခဲ့ပါတယ်။

သမိုင်းတလျှောက် ကမ္ဘာ့ဖလားမှာ ကစားသမား အဖြစ်ရော နည်းပြ အဖြစ်ပါ ပါဝင်ခွင့် ရခဲ့သူက ယူဂိုဆလားဗီးယားသား မီလိုရတ် အာဆင်နီဂျဗစ် (Milorad Arsenijevic) ရှိပါတယ်။ ၁၉၃၀ ပြိုင်ပွဲမှာ သူက ယူဂို အတွက် ကစားသမားပါ၊ ၁၉၅၀ မှာတော့ ယူဂိုအတွက် နည်းပြပါ။ နောက်ပိုင်းမှာမှ သူလို့ပဲ ကစားသမားဘဝကနေ နည်းပြ ဖြစ်လာသူတွေ ပေါ်လာခဲ့တာပါ။

Ref: en.m.wikipedia.org

The post ကမ္ဘာ့ဖလား သမိုင်းတလျှောက် စံချိန်တင် ဂိုးသမားနဲ့ နည်းပြများ appeared first on ဧရာဝတီ.

လာမယ့် ကမ္ဘာ့ဖလားမှာတော့ ခရိုအေးမှာ အသင်းအတွက် အုပ်စုအဆင့်ကနေ ကျော်ဖြတ်ပြီး နောက်တဆင့် တက်ဖို့ အခွင့်အရေး ကောင်းတွေ ပိုင်ဆိုင်ထားတာပါ။ ခရိုအေးရှားနိုင်ငံ ကိုယ်စားပြု လက်ရွေးစင် ဘောလုံး အသင်း ဖြစ်ပြီး ဥရောပ ဘောလုံး အဖွဲ့ချုပ် နယ်ဝယ် ဘောလုံး အသင်း တသင်း ဖြစ်ပါတယ်။ အသင်းကို နာမည်ပြောင် အနေနဲ့ Vatreni (The Blazers) (ဘလေဇာဝတ်သူများ)(ခရိုအေးရှားရိုးရာအင်္ကျီအမည်) လို့ ခေါ်ပါတယ်။

အသင်းကို နည်းပြအဖြစ် ဇလက်ကိုဒဲလစ် (Zlatko Dalic) က ကိုင်တွယ်နေပြီး အသင်းခေါင်းဆောင် ရာထူးကိုတော့ Luka Modric (လူကာ မိုဒရစ်)က တာဝန်ယူထားပါတယ်။ အိမ်ကွင်း အနေနဲ့တော့ Stadion Masksimir မှာ လက်ခံကစားတာ တွေ့ရပါတယ်။

အသင်းက အိမ်ကွင်းဝတ်စုံ အနေနဲ့တော့ အကျႌကို အနီရောင်နဲ့ အဖြူရောင် အကွက်ကို ဝတ်ဆင်တယ်၊ ဘောင်းဘီက အဖြူရောင်၊ ခြေအိတ်က အပြာရောင်ကို ဝတ်ဆင်ကစားပါတယ်။ အဝေးကွင်းမှာတော့ အကျႌက အနက်ရောင်နဲ့ အပြာရောင် အကွက်ကို ဝတ်တယ်။ ဘောင်းဘီက အနက်ရောင်နဲ့ ခြေအိတ်က အနီရောင်ကို ဝတ်ဆင်ကစားပါတယ်။

အသင်းက လက်ရှိ ကမ္ဘာ့အဆင့် သတ်မှတ်ချက်မှာ အဆင့် ၁၈ ထိ ရောက်နေပါတယ်။ ဒါဟာ ပြီးခဲ့တဲ့ ဧပြီလ အတွင်းက အဆင့်ထက် ၃ ဆင့် လျော့ကျသွားတာ ဖြစ်ပြီး ၂၀၀၀ ခုနှစ် နောက်ပိုင်း ခြေစွမ်းပိုင်း ကျဆင်းနေတဲ့ ကာလလို့ ဆိုရမှာပါ။ ဒါပေမယ့် ၁၉၉၉ ခုနှစ် ဇန်နဝါရီလ အတွင်းကတော့ ကမ္ဘာ့အဆင့် ၃ ထိ စံချိန်တင် မြင့်တက်ဖူးတာ တွေ့ရပါတယ်။ ၁၉၉၄ ခုနှစ် မတ်လ အတွင်းက အဆင့် ၁၂၅ ထိအောင် ရောက်သွားဖူးတာကတော့ အနိမ့်ဆုံး အဆင့် လျှောကျဖူးခြင်းပါ။

ပထမဆုံး နိုင်ငံတကာ ကစားပွဲကို ၁၉၄၀ မှာမှ စပြီး ကစားနိုင်ခဲ့ပါတယ်။ ဧပြီ ၂ ရက်နေ့က ကစားတဲ့ အဆိုပါ အဖွင့်ပွဲမှာ ဆွစ်ဇာလန်ကို ၄ ဂိုး ဂိုး မရှိနဲ့ နိုင်ခဲ့ပါတယ်။ ဒါတောင် အဆိုပါပွဲက ခရိုအေးရှားအသင်း အနေနဲ့ စစ်စစ် မဟုတ်သေးဘဲ ယူဂိုဆလားဗီးယားပိုင်နယ် လက်အောက်ခံ အဖြစ် ကစားရတာပါ။

ခရိုအေးရှားနိုင်ငံ အသင်း အနေနဲ့ ပထမဆုံး ကစားနိုင်ခဲ့တာ ကတော့ ၁၉၉၀ ခုနှစ် အောက်တိုဘာ ၁၇ ရက်မှာမှ ဖြစ်ပြီး အဆိုပါ ပွဲမှာ အသင်းက အမေရိကန်ကို ၂ ဂိုး ၁ ဂိုးနဲ့ နိုင်ပါတယ်။ အသင်းက စံချိန်တင် နိုင်ပွဲ အနေနဲ့ ၂၀၁၆ ခုနှစ် ဇွန်လ ၄ ရက်က ကစားတဲ့ ဆမ်မာရီနိုနဲ့ ပွဲမှာ ၁၀ ဂိုးပြတ် နိုင်ခဲ့တာပါ။ စံချိန်တင် ရှုံးပွဲကတော့ ၂၀၀၉ ခုနှစ် စက်တင်ဘာ ၉ ရက်က ကစားတဲ့ အင်္ဂလန်နဲ့ပွဲမှာ ၅ ဂိုး ၁ ဂိုးနဲ့ ရှုံးခဲ့တာပါ။

ကမ္ဘာ့ဖလား ပြိုင်ပွဲမှာတော့ ၁၉၉၈ ကနေမှ စတင် ပါဝင်ခဲ့တာ ဖြစ်ပေမယ့် အခု ၂၀၁၈ ပြိုင်ပွဲထိအောင် ၅ကြိမ် ခြေစစ်ပွဲ အောင်ထားတာပါ။ ၁၉၉၈ ခုနှစ် ကမ္ဘာ့ဖလားမှာ ဆိုရင် တတိယ နေရာထိ ရခဲ့ဖူးတာလည်း ဖြစ်ပါတယ်။ ဥရောပ ဖလားပွဲမှာ ဆိုရင်လည်း ၁၉၉၆ ကတည်းကနေ စပြီး ၅ ကြိမ် ဝင်ပြိုင်ထားသလို ၁၉၉၆ နဲ့ ၂၀၀၈ ခုနှစ် ပြိုင်ပွဲတွေမှာ ကွာတားဖိုင်နယ်ထိ ၂ ကြိမ် ရောက်ဖူးတာလည်း ဖြစ်ပါတယ်။

အသင်းက ၁၉၉၁ အတွင်း လွတ်လပ်ရေး မကြေငြာနိုင်သေးခင် ၁၉၉၀ ကတည်းက ခရိုအေးရှားအသင်း အဖြစ် ဖွဲ့စည်းထားတာပါ။ ၁၉၉၃ ခုနှစ်မှာတော့ ဖီဖာရော UEFA လို ဥရောပ ဘောလုံး အဖွဲ့ချုပ်ကပါ နိုင်ငံအသင်း တသင်း အဖြစ် လက်ခံခဲ့ပါတယ်။ ခရိုအေးရှား အသင်းရဲ့ အဓိက ပြိုင်ဘက် အနေနဲ့ အိမ်နီးချင်းလည်း ဖြစ်တဲ့ ဆားဘီးယားနဲ့ ပြိုင်ဆိုင်မှု ပြင်းထန်လေ့ ရှိပါတယ်။ အဓိက အနေနဲ့ ဘောလုံးပြိုင်ဆိုင်မှုထက် နိုင်ငံရေး ပြိုင်ဆိုင်မှုကြောင့် ပိုမို ပြင်းထန်တာပါ။ Goal.com ရဲ့ နိုင်ငံ အသင်း အလိုက် ပြိုင်ဆိုင်မှု အပြင်းထန်ဆုံး ပြိုင်ဘက်စာရင်းမှာ ခရိုအေးရှားနဲ့ ဆားဘီးယားက ထိပ်ဆုံး အဆင့် ၁၀ ဝင်အောင် ပြင်းထန်ပါတယ်။ အသင်း ၂ သင်း အကြား ၄ ကြိမ် တွေ့ဆုံဖူးပြီး ခရိုအေးရှားက ၁ ကြိမ် နိုင်ဖူးပြီး ၃ ကြိမ် သရေကျထားတာပါ။

အသင်းက အခု နောက်ဆုံး ရလဒ်တွေ အရ ပြီးခဲ့တဲ့ မတ် ၂၃ ရက်က ပီရူးနဲ့ ကစားတယ်၊ ၂ ဂိုး ဂိုးမရှိနဲ့ ရှုံးတယ်၊ ၂၇ ရက်နေ့က မက္ကဆီကိုနဲ့ ကစားတယ်။ ၁ ဂိုး ဂိုးမရှိနဲ့ နိုင်တယ်၊ သိပ်တော့ အားရစရာ မကောင်းလှတဲ့ ခြေစွမ်းပါ။ ပြီးတော့ လာမယ့် ဇွန်လ ၃ ရက်မှာ ဘရာဇီးနဲ့ ခြေစမ်းမယ်၊ ၈ ရက်နေ့မှာ ဆီနီဂေါနဲ့ ကစားဖို့ ရှိနေတာပါ။

ကမ္ဘာ့ဖလား ပွဲစဉ် အနေနဲ့တော့ ပထမဆုံး ပွဲ အနေနဲ့ ဇွန်လ ၁၆ ရက်နေ့မှာ နိုက်ဂျီးရီးယား၊ ၂၁ ရက်နေ့မှာ အာဂျင်တီးနား၊ ၂၆ ရက်နေ့မှာ အိုက်စလန်တို့နဲ့ ကစားရဖို့ ရှိနေပြီး အုပ်စု အတွင်းမှာ အာဂျင်တီးနားကို ယှဉ်နိုင်ဖို့ မရှိပေမယ့် အိမ်ဖြည့် အသင်း အဆင့်လောက်ပဲ ရှိတဲ့ အိုက်စလန်ကို ဖယ်လိုက်ရင် နိုက်ဂျီးရီးယားနဲ့ အုပ်စု ဒုတိယနေရာ လုရဖို့ ရှိပြီး Goal.com ကတော့ ခရိုအေးရှားအနေနဲ့ နောက်တဆင့် တက်နိုင်မယ် လို့ ခန့်မှန်းထားတာ တွေ့ရပါတယ်။

အသင်း အတွက် ပထမဆုံး ပွဲ ၁၀၀ ပြည့်အောင် ကစားပေးနိုင်ခဲ့သူက Dario Simic (ဒါရီယို ဆီမစ်) ဖြစ်ပါတယ်။ အသင်း အတွက် ပွဲအများဆုံး ကစားပေးထားသူကတော့ ၂၀၁၆ ခုနှစ် အတွင်း အနားယူသွားတဲ့ Srna (ဆာနာ) ဖြစ်ပြီး ၁၃၄ ပွဲ ကစားပေးခဲ့ပါတယ်။

အသင်း အတွက် အသက်အငယ်ဆုံး ရွေးချယ်ခံခဲ့ရသူကတော့ ဇွန်လ ၂၀၁၃မှာ အသင်း အတွက် ကစားခွင့်ရခဲ့တဲ့ Alen Halilovic (အယ်လန် ဟယ်လီလိုဗစ်) ဖြစ်ပြီး အဆိုပါ ရွေးချယ်ခံရချိန်က သူ့ အသက် ၁၆နှစ်၊ ၁၁ လနဲ့ ၂၂ ရက်ပဲ ရှိပါသေးတယ်။ လက်ရှိ ခရိုအေးရှားအသင်း အတွက် အများဆုံး ဂိုးသွင်းယူပေးထားသူကတော့ Davor Suker (ဒေဘာ ဆူကာ) ဖြစ်ပြီး ပြိုင်ပွဲစုံ ၄၅ ဂိုး သွင်းထားတာ တွေ့ရပါတယ်။

Ref: en.m.wikipedia.org

The post ကမ္ဘာ့ဖလားမှာ အုပ်စုချောင်နေတဲ့ ဘလေဇာဝတ် ခရိုအေးရှားများ appeared first on ဧရာဝတီ.

အင်္ဂလန်နိုင်ငံ၏ ချန်ပီယံရှစ် ကလပ်အသင်းတသင်းဖြစ်သော လိဒ်ယူနိုက်တက် (Leeds United) ဘောလုံး အသင်းသည် မြန်မာနိုင်ငံတွင် မေလအတွင်း ကျင်းပမည့် AYA Bank Tour 2018 ပွဲတွင် Myanmar National League All Star ဘောလုံး အသင်း၊ မြန်မာ လက်ရွေးစင် ဘောလုံး အသင်းတို့နှင့် ရန်ကုန်နှင့် မန္တလေးမြို့များတွင် ချစ်ကြည်ရေး ကစားပွဲများ ကစားသွားမည် ဖြစ်သည်။

လိဒ်ယူနိုက်တက် အသင်းသည် မေလ ၉ ရက်နေ့တွင် MNL All Stars အသင်းနှင့် ရန်ကုန်ရှိ သုဝဏ္ဏဘောလုံးကွင်းတွင် ကစားမည် ဖြစ်ပြီး မေလ ၁၁ ရက်နေ့တွင် မြန်မာလက်ရွေးစင်အသင်းနှင့် မန္တလေးရှိ မန္တလာသီရိ အားကစားကွင်း တွင် ကစားမည် ဟု ဆိုသည်။

မြန်မာ့ လက်ရွေးစင် အသင်း MNL ညွန့်ပေါင်း အသင်းတို့နှင့် ကစားမည့် လိဒ်ယူနိုက်တက် အသင်းသည် တချိန်က အင်္ဂလန် ပရီးမီးယားလိဂ်တွင် အသင်းကြီးများကို ဒုက္ခပေးလေ့ရှိသော အသင်း တသင်းအဖြစ် မြန်မာ ပရိတ်သတ်များအကြား အသိများခဲ့ပြီး AYA Bank Tour 2018 ပွဲတွင်လည်း အင်္ဂလန် ချန်ပီယံရှစ်ပွဲတွင် ပါဝင်ကစားနေသည့် အဓိက ကစားသမား အချို့ ပါဝင်မည်ဖြစ်ကြောင်း မြန်မာ ဘောလုံး အဖွဲ့ချုပ်၏ သတင်းထုတ်ပြန်ချက်အရသိရသည်။

AYA Bank Tour 2018 ပွဲစဉ်များ လာရောက်ကစားမည့် လိဒ်ယူနိုက်တက် အသင်းပွဲစဉ်များအတွက် ကွင်းဝင်ကြေးများမှာ ၄၀၀၀ ကျပ်၊ ၃၀၀၀ ကျပ်၊ ၂၀၀၀ ကျပ်သတ်မှတ်ထားကြောင်း သိရသည်။

လိဒ်ယူနိုက်တက် အသင်းပိုင်ရှင် အင်ဒရီယာ ရာဒရစ်ဇန်နီ (Andrea Radrizzani) သည် အာရှတွင် စီးပွားရေး လုပ်ကိုင်နေသည်မှာ နှစ် အတန်ကြာပြီ ဖြစ်သည်။

MNL

သူ၏ အားကစား ကြော်ငြာလုပ်ငန်းဖြစ်သော MP & Silva ၏ ရှယ်ယာ အများစုကို ၂၀၁၆ ခုနှစ် မေလက တရုတ်လုပ်ငန်း တခုသို့ ရောင်းချခဲ့သည်။ ၂၀၁၆ ခုနှစ် နွေရာသီတွင် တရုတ်လုပ်ငန်း Suning Group က Inter Milan အသင်းကို ဝယ်ယူလိုက် ချိန်က ၎င်းသည် ထိုလုပ်ငန်း အတွက် အကြံပေး အဖြစ် ဆောင်ရွက်ခဲ့သည်။

ထို့အပြင် ဇန်နဝါရီလ နှောင်းပိုင်းက သူ့ကို မြန်မာနိုင်ငံ ဘောလုံးအဖွဲ့ချုပ်ဥက္ကဌနှင့် အတူ တွေ့ရသည်။ သူနှင့် ဦးဇော်ဇော်တို့၏ ဓာတ်ပုံကို Instagram တွင် တင်ပြီး “ ဦးဇော်ဇော်၊ မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ၊ Myanmar National League ဥက္ကဋ္ဌနှင့် အာဆီယံ ဘောလုံးအဖွဲ့ချုပ် ဒုဥက္ကဋ္ဌ နှင့် တွေ့ဆုံခြင်း” ဟု ရေးသားထားသည်ကို တွေ့ရသည်။

လိဒ်ယူနိုက်တက် အသင်း၏ ပုံရိပ် ပြည်ပတွင် တိုးတက်လာပါက ချစ်ကြည်ရေးပွဲများ ကစားခြင်းသည် ကျိုးကြောင်း ဆီလျှော်မှု ရှိသည်။ ထိုအပြင် ကလပ်အတွင်း အသင်း ကူးပြောင်းကြေးများ အတွက် ငွေရရှိမည် ဆိုပါက ပိုမို၍ပင် ကောင်းမွန်ပေသည်။

လိဒ်ယူနိုက်တက် ပါဝင်ကစားနေသည့် အင်္ဂလန် ချန်ပီယံရှစ် ပြိုင်ပွဲသည် အသင်းပေါင်း ၂၄ သင်း ပါဝင်ပြီး လိဒ်ယူနိုက်တက် သည် ၂၀၁၈ ခုနှစ် ရာသီတွင် ပွဲပေါင်း ၄၄ ပွဲကစားထားပြီး ရမှတ် ၅၇ မှတ်ဖြင့် အမှတ်ပေးဇယား၏ အဆင့် ၁၂ တွင် ရပ်တည်လျှက်ရှိသည်။

လိဒ်ယူနိုက်တက်သည် လက်ကျန်ပွဲစဉ်များအဖြစ် ဧပြီ ၂၁ ရက်နေ့တွင် ဘန်စလေ၊ ဧပြီ ၂၈ ရက်နေ့တွင် နောဝစ်ချ် စီးတီး၊ မေလ ၆ ရက်နေ့တွင် QPR အသင်းတို့နှင့် ပွဲစဉ်များ အပြီး မေလ ၇ ရက်နေ့တွင် မန်ချက်စတာမြို့မှ တဆင့် မြန်မာနိုင်ငံသို့ ထွက်ခွာလာမည် ဖြစ်ကြောင်းသိရသည်။

The post မြန်မာနိုင်ငံတွင် ချစ်ကြည်ရေး ဘောလုံးပွဲများ ကစားမည့် လိဒ်ယူနိုက်တက် အသင်း appeared first on ဧရာဝတီ.

မကြာခင် ကျင်းပတော့မယ့် ၂၀၁၈ ကမ္ဘာ့ဖလားမှာရော အရင့် အရင် ပြိုင်ပွဲတွေမှာပါ ကစားသမား တဦးချင်းကို ပေးအပ်တဲ့ ဆုတွေ အကြောင်းပြောပြမှာပါ။

၁။ Golden Ball – ရွှေဘောလုံးဆု လို့ ပြောရမှာပါ။ ဒီဆုကို နာမည်ကျော် အားကစားဝတ်စုံထုတ် ကုမ္ပဏီ Adidas ကနေ စပွန်ဆာ ပေးထားလို့ Adidas Golden Ball လို့လည်း ခေါ်နိုင်ပါတယ်။ ၁၉၈၂ ခုနှစ်ကနေ စတင်ပြီး ပေးအပ်လာတဲ့ ဆု ဖြစ်ပြီး ပြိုင်ပွဲ တလျှောက် အကောင်းဆုံး အဖြစ် သတ်မှတ်ခံရတဲ့ ကစားသမားကို ပေးအပ်တာ ဖြစ်ပါတယ်။

၂။ Golden Boot – ရွှေဖိနပ်ဆု ဖြစ်ပါတယ်။ အရင်က Golden Shoe အဖြစ် ပေးအပ်ဖူးပေမယ့် ၂၀၁၀ နောက်ပိုင်း အမည် ပြောင်းလဲ ပေးအပ်နေတာ ဖြစ်ပါတယ်။ ၁၉၈၂ ခုနှစ်ကနေပဲ စတင် ပေးအပ်ခဲ့တာ ဖြစ်ပြီး အဆိုပါ အချိန်ကနေ ၂၀၀၆ ခုနှစ် ပြိုင်ပွဲထိ Golden Shoe အဖြစ် ပေးအပ်ခဲ့တာပါ။ ၂၀၁၀ ကမ္ဘာ့ဖလားကနေ စတင်ပြီး Golden Boot ဖြစ်လာပါတယ်။ Adidas ကနေပဲ စပွန်ဆာ ပေးထားလို့ Adidas Golden Boot လို့ ခေါ်နိုင်ပါတယ်။ ဒီဆုကတော့ ပြိုင်ပွဲ တလျှောက် ဂိုး အများဆုံး သွင်းယူနိုင်တဲ့ ကစားသမားကို ပေးအပ်တာ ဖြစ်ပါတယ်။

၃။ Golden Glove Award – ရွှေလက်အိတ်ဆု ဖြစ်ပါတယ်။ သူ့ကိုလည်း Adidas ကနေပဲ စပွန်ဆာ ပေးထားလို့ Adidas Golden Glove အဖြစ် ခေါ်နိုင်ပါတယ်။ အခုလို Golden Glove ဆု အဖြစ် မပေးခင်က Lev Yashin Award လို့ ခေါ်ခဲ့ပါတယ်။ ၁၉၉၄ ကနေ ၂၀၀၆ ခုနှစ်ထိ Lev Yashin ဆု အဖြစ် ပေးအပ်ခဲ့တာပါ။ ၂၀၁၀ ခုနှစ် ကမ္ဘာ့ဖလားပြိုင်ပွဲကနေ စတင်ပြီး ရွှေလက်အိတ်ဆု ဖြစ်လာသလို အကောင်းဆုံး ဂိုးသမားကို ပေးအပ်တာ ဖြစ်ပါတယ်။ ဂိုးကာကွယ်နိုင်မှုရော ပရိတ်သတ်တွေရဲ့ အကြိုက်ကိုပါ ထည့်တွက်ပြီး ပေးအပ်တာ ဖြစ်ပါတယ်။

၄။ Best Young Player – တောင်ကိုရီးယား အခြေစိုက် ကားကုမ္ပဏီ Hyundai ကနေ စပွန်ဆာပေးထားလိ့ု Hyundai Best Young Player ဆု အဖြစ်လည်း ခေါ်နိုင်ပါတယ်။ ၂၀၀၆ ခုနှစ်ကနေ စပြီး ပေးအပ်လာတဲ့ ဆု ဖြစ်ပါတယ်။ ပြက္ခဒိန် နှစ် အတိုင်း အသက် ၂၁ နှစ်အောက်ပဲ ရှိသေးတဲ့ ကစားသမားတွေထဲက ပြိုင်ပွဲ တလျှောက် အကောင်းဆုံး ခြေစွမ်းပြ ကစားနိုင်သူကို ပေးအပ်တဲ့ ဆုဖြစ်ပါတယ်။

၅။ FIFA Fair Play Trophy – ၁၉၇၀ ခုနှစ်ကတည်းက စတင် ပေးအပ်လာတာ ဖြစ်ပြီး အသင်းလိုက် ပေးအပ်တဲ့ ဆုလို့ ဆိုနိုင်ပါတယ်။ အကောင်းဆုံး အသန့်ရှင်းဆုံး ကစားတယ်၊ မျှတစွာ ကစားတဲ့ အသင်း အတွက် ပေးအပ်တာ ဖြစ်ပါတယ်။

၆။ Man of the Match Award – အမေရိကန် အခြေစိုက် ဘီယာ ကုမ္ပဏီ Budweiser ကနေ စပွန်ဆာ ပေးထားလို့ အခုဆုကို Budweiser Man of the Match ဆု လို့လည်း ခေါ်နိုင်ပါတယ်။ ၂၀၀၂ ခုနှစ် အတွင်းကနေ စပြီး ပေးအပ်လာ တာပါ။ ပြိုင်ပွဲ တပွဲချင်းစီ အလိုက် အကောင်းဆုံး ကစားသမား တဦးကို ရွေးချယ် ပေးအပ်လာတာ ဖြစ်ပါတယ်။

ဆက်ပြီးတော့ အရင် ပေးအပ်ခဲ့ဖူးတဲ့ ဆု ၂ ဆု အကြောင်း ဗဟုသုတ အနေနဲ့ ထည့်ပြောချင်ပါတယ်။ ၁၉၉၄ ခုနှစ်ကနေ ၂၀၀၆ ခုနှစ် ပြိုင်ပွဲထိအောင်ပဲ ပေးအပ်ခဲ့တာ ဖြစ်ပြီး အခုတော့ ဆက်လက် ပေးအပ်ခြင်း မရှိတော့တဲ့ ဆု နှစ်ခုပါ။ အဲဒါတွေကတော့ –

ပထမ တခုက Most Entertaining Team – ပရိတ်သတ် အကြိုက် ဖြစ်အောင် ခြေစွမ်းလည်းပြ၊ ကစားကွက်လည်း သန့်ရှင်း ကောင်းမွန်တဲ့ အသင်းကို ပေးအပ်တာ ဖြစ်ပါတယ်။ ပရိတ်သတ်တွေရဲ့ မဲအရေအတွက်နဲ့ ခွဲခြား ရွေးချယ် ပေးအပ်ခဲ့တာ ဖြစ်ပါတယ်။

ဒုတိယ တခုက All-Star Team – ဘောလုံးနယ်ပယ်က ကျွမ်းကျင် ပညာရှင်တွေကနေ ပြိုင်ပွဲဝင် အသင်းတွေထဲက အကောင်းဆုံး ကစားသမားတွေကို ဆွဲထုတ်ပြီး ၁၁ ဦး ပြည့်အောင် ရွေးထုတ် ပေးအပ်တဲ့ ဆုဖြစ်ပါတယ်။ လက်ရှိ ဥရောပ ဘောလုံးနယ်ပယ် အတွင်းမှာတော့ ကြေးစား ဘောလုံး သမားတွေကို တနှစ်တာ အကောင်းဆုံး ကစားသမား ၁၁ ဦး ရွေးချယ်နေတာ တွေ့ရသေးပေမယ့် ကမ္ဘာ့ဖလားပြိုင်ပွဲမှာတော့ အခုလို အကောင်းဆုံး ၁၁ ဦးရွေးချယ် ဆုပေးအပ်တာ မတွေ့ရတော့ပါဘူး။

Ref: en.m.wikipedia.org

The post ကမ္ဘာ့ဖလားမှာ ပေးအပ်တဲ့ တဦးချင်း ဆုတွေ အကြောင်း appeared first on ဧရာဝတီ.

အင်္ဂလန် ရော့ခ်ရှိုင်းယား အခြေစိုက် လိဒ်ယူနိုက်တက် ဘောလုံးအသင်း မြန်မာနိုင်ငံသို့ ချစ်ကြည်ရေး လာရောက် ကစားမည့်အပေါ် ဝေဖန်မှုများ ထွက်ပေါ်နေခြင်းနှင့် ပတ်သက်၍ အသင်းပိုင်ရှင် အန်ဒရေ ရာဒရဇ် ဇာနီက အသင်း၏ ဝက်ဘ်ဆိုဒ်တွင် အိတ်ဖွင့်ပေးစာရေး၍ ကာကွယ်ပြောဆိုသွားသည်။

နိုင်ငံတကာ လွတ်ငြိမ်းချမ်းသာခွင့်အဖွဲ့ (AI)အပါအဝင် ဗြိတိန်လေဘာပါတီမှ နိုင်ငံရေးသမား ရိုစီနာ အယ်လင် ခန်းတို့က လိဒ်ယူနိုက်တက်၏ မြန်မာပြည်ခရီးစဉ်သည် အကျင့်စာရိတ္တ ပျက်ယွင်းမှု အဖြစ် ပုံဖော်ပြောဆိုကာ ဖျက်သိမ်းရန် တိုက် တွန်းခဲ့သည်ကို တုံ့ပြန်ခြင်းဖြစ်သည်။

ထိုသို့ အားကစားကဏ္ဍကို လူ့အခွင့်အရေးနှင့် နိုင်ငံရေးသမားတို့၏ ဝင်ရောက်စွက်ဖက်ဝေဖန် မှုများ နှင့် ပတ်သက်၍ လိဒ် ယူနိုက်တက် ပိုင်ရှင် အန်ဒရေ ရာဒရဇ် ဇာနီက အသင်း၏ ပရိတ်သတ်ကို အိတ်ဖွင့်ပေးစာတစောင် ရေး၍ အသိပေးရာတွင် သူ့အနေဖြင့် မြန်မာနိုင်ငံသို့ ကြိမ်ဖန်များစွာ သွားရောက်ခဲ့ဖူးကြောင်း၊ မြန်မာပြည်ဟာ သူ့ရဲ့ နှလုံးသားမှာ ထင်ကျန် နေကြောင်း ဆိုသည်။

ထို့အပြင် သူ့ရဲ့ အသင်းအနေနဲ့ အခကြေးငွေယူပြီး သွားရောက်ကစားတာ မဟုတ်ကြောင်း၊ သူ့အနေနဲ့ ဝေဖန်မှုတွေ ရှိလာမယ်ဆိုကိုလည်း သိပေမယ့် ဘောလုံးဖွံဖြိုးရေးကို လုပ်ဆောင်ဖို့ဖြစ်သလိုလျင်မြန်စွာ တိုးတက်နေတဲ့ အရှေ့တောင် အာရှနိုင်ငံများအကြားမှာ လိဒ်ယူနိုက်တက်ကို ပိုမိုလူသိများစေဖို့ မိတ်ဆက်တာဖြစ်ကြောင်းလည်း ရေးသားထားသည်။

ဒါအပြင် လိဒ်ယူနိုက်တက်ရဲ့ မြန်မာပြည်ခရီးစဉ်ဟာ ဒေသခံတွေအတွက် ကောင်းတဲ့ အကျိုးကျေးဇူး တခု ရလာမယ်လို့ ယုံကြည်ပြီး၊ သွားမယ်ဆိုတဲ့ ဆုံးဖြတ်ချက်ကို ချစဉ်ကတည်းက အငြင်းပွားဖွယ် ဝေဖန်မှုတွေ ထွက်ပေါ်လာမှာကို သိ ကြောင်း၊ ဒါပေမယ့် သူတို့အနေနဲ့ အစိုးရအတွက် မဟုတ်ဘဲ မြန်မာပြည်သူတွေ အတွက်သာဖြစ်ကြောင်း ပြန်လည် ချေပခဲ့သည်။

ပြီးခဲ့သည့်နှစ်က ရခိုင်ပြည်နယ်၌ ဖြစ်ပွားခဲ့သည့် ARSA အကြမ်းဖက်အဖွဲ့၏ အစိုးရတပ်စခန်းများကို တိုက်ခိုက်ပြီးနောက် စစ်တပ်က နယ်မြေရှင်းလင်းရေး လုပ်ရာတွင် ဘင်္ဂါလီ ၅သိန်းကျော် ထွက်ပြေးခဲ့ ရခြင်းနှင့် ချိတ်ဆက်၍ AI အဖွဲ့ကြီးနှင့် ဗြိတိန်နိုင်ငံရေးသမားများက လိဒ်ယူနိုက်တက် အသင်း၏ ခရီးစဉ်ကို ကန့်ကွက်နေခြင်းဖြစ်သည်။

လိဒ်ယူနိုက်တက် အသင်းသည် မေလအတွင်း မြန်မာနိုင်ငံသို့ လာရောက်ကာ ရွှေတိဂုံဘုရား အခြား အထိမ်းအမှတ်များကို စီစဉ်ထားသကဲ့သို့ ရန်ကုန်နှင့် မန္တလေးမြို့များတွင်လည်း Myanmar National League All Star ဘောလုံး အသင်း၊ မြန်မာ လက်ရွေးစင်အသင်းတို့ဖြင့် ခြေစမ်းကစားမည်ဖြစ်သည်။

ယခင်က အင်္ဂလန် ပရီးမီးယားလိဂ်တွင် ကစားသည့် နာမည်ကြီး လိဒ်ယူနိုက်တက်အသင်းသည် ၂၀၀၄ ခုနှစ်ကစ၍ အင်္ဂလန် ဒုတိယတန်းတွင် တန်းဆင်းကစားခဲ့ရပြီး၊ လာမည့်နှစ် ပရီးမီးယား လိဂ်တွင် ပြန်လည်ကစားရန်အတွက် ယခုခရီးစဉ်က အထောက်အကူပြုမည်ဟု ထင်မြင်ကြောင်း သိရသည်။

လိဒ်ယူနိုက်တက်အသင်း၏ မြန်မာပြည် ခရီးစဉ်ရည်ရွယ်ချက်နှင့် ပတ်သက်၍ အသင်းပိုင်ရှင်၏ ပြောဆိုချက်တွင် သူ့အနေနဲ့ အရှေ့တောင် အာရှ နိုင်ငံများ တိုးတက်ရေးအတွက် အလုပ်အကိုင်အခွင့် အလမ်းများထောက်ပံခြင်း၊ ဒေသတွင်း အားကစားဖွံဖြိုးရေးနှင့် အားကစားမီဒီယာကဏ္ဍတွင် တိုးတက်အောင် ကူညီခြင်း များပြုလုပ်ရန် ရည်ရွယ်ကြောင်း၊ အလားတူ ရည်ရွယ်ချက်မျိုး မြန်မာနိုင်ငံ အပေါ်လည်း ထားရှိကြောင်း ပါရှိသည်။

ဆက်စပ်ဖတ်ရှု့ရန် – မြန်မာနိုင်ငံတွင် ချစ်ကြည်ရေး ဘောလုံးပွဲများ ကစားမည့် လိဒ်ယူနိုက်တက် အသင်း

The post မြန်မာခရီးစဉ်အပေါ် ဝေဖန်မှုများ လိဒ်ယူနိုက်တက် အသင်းပိုင်ရှင် ကာကွယ်ပြောဆို appeared first on ဧရာဝတီ.

လက်ရှိ ကမ္ဘာ့ဘောလုံး လောကမှာ အကြီးကျယ်ဆုံး ပြိုင်ပွဲတွေ၊ လူကြိုက်အများဆုံး ပြိုင်ပွဲတွေ ဖြစ်တဲ့ အင်္ဂလန် ပရီးမီးယားလိဂ်၊ စပိန် လာလီဂါ၊ ဂျာမန် ဘွန်ဒက်လီဂါ၊ အီတလီ စီးရီးအေ၊ ပြင်သစ် လီဂူး စတဲ့ ပွဲစဉ်တွေ အားလုံး ဥရောပမှာ ရှိပါတယ်။ ဥရောပ ဘောလုံး အဖွဲ့ချုပ်ကနေ Golden Shoe ဆိုတဲ့ ရွှေဖိနပ်ဆုကိုလည်း နှစ်စဉ် ပေးအပ်နေ တယ်။ နာမည်ကျော် ကစားသမားတွပဲ ဒီဆုကို ရရှိကြတာ များပါတယ်။ ဥရောပဘောလုံး အဖွဲ့ချုပ်ရဲ့ ရွှေဖိနပ်ဆု အခုနှစ် အတွက် ဘယ်သူတွေ ရနိုင်မှာလဲ။ အခု ပြောမှာက ဥရောပ ဘောလုံး လောကမှာ ဂိုးအများဆုံး သွင်းယူထားတဲ့ ဘောလုံး သမားတွေ အကြောင်းပါ။

အခု ပြောခဲ့တဲ့ ပြိုင်ပွဲကြီး ၅ ခုထဲမှာ ကစားသမား တယောက် အနေနဲ့ ၁ ဂိုး သွင်းယူနိုင်ရင် ၂ မှတ်၊ သူတို့ထက် တဆင့်စီ နိမ့်တဲ့ ပြိုင်ပွဲတွေ၊ ဥပမာ ပေါ်တူဂီ ပရီးမီယားလိဂ်ဂါမှာ ၁ ဂိုး သွင်းနိုင်ရင် ၁ ဒသမ ၅ မှတ်၊ သူ့ထက် တဆင့်နိမ့် ပြိုင်ပွဲတွေမှာ ဆိုရင် ၁ ဂိုး သွင်းနိုင်ရင် ၁ မှတ်နှုန်းနဲ့ ကစားသမားတွေရဲ့ လက်ရှိ သူတို့ ကစားနေတဲ့ ပြိုင်ပွဲအဆင့် အပေါ်မှာ မူတည်ပြီး ၁ ဂိုး သွင်းနိုင်တိုင်း ရမှတ် အဆင့် ခွဲပြီး အမှတ်ပေးထားပါတယ်။ ဒီထဲက လက်ရှိ ဂိုးအများဆုံး သွင်းထားသူ၊ အမှတ် အများဆုံး ရထားသူတွေကို ဖော်ပြပေး ပါမယ်။ သတိပြုစေလိုတာက ဧပြီ ၂၂ ရက်နေ့ အထိ ရရှိထားတဲ့ ရမှတ်တွေပါ။ ရာသီပြီးချိန် အထိဆိုရင်တော့ အပြောင်းအလဲ ရှိနေနိုင်ပါတယ်။

(၇) Luis Suarez ။         ။ လူးဝစ် ဆွာရက်ဇ်က လက်ရှိ စပိန် လာလီဂါမှာ ကစားနေပါတယ်။ ဘာစီလိုနာ အသင်းရဲ့ အဓိက တိုက်စစ်မှူးတွေထဲက တဦးပါ။ ၂၃ ဂိုး သွင်းယူထားလို့ သူ့ရဲ့ ရမှတ်က ၄၆ မှတ်ပါ။ ရမှတ် အများဆုံး ကစားသမား ၁၀ ဦးကို ပြောပြမယ့် နေရာမှာ အဆင့် ၇ က နှစ်ဦး တိုက်နေလို့ အဆင့် ၁၀ ထိ မခွဲတော့ပဲ အဆင့် ၇ ကနေ စပြောမှာပါ။

(၇) Cristiano Ronaldo ။ ။ ဒိုလေး လို့လည်း ခေါ်တဲ့ ခရစ်တီယာနို ရော်နယ်ဒို လည်း စပိန်လာလီဂါမှာ ကစားနေ ပါတယ်။ ဘာစီလိုနာရဲ့ အနီးကပ်ဆုံးနဲ့ ပြိုင်ဆိုင်မှု အပြင်းထန်ဆုံး အသင်း ရီးရဲမက်ဒရစ်ရဲ့ အဓိက တိုက်စစ်မှူးပါ။ ဒီနှစ် ဂိုးသွင်းနှုန်း ကျနေတယ် လို့ ဆိုနိုင်ပြီး ရာသီကနေ အခုထိအောင် ဒိုလေးက ၂၃ ဂိုး သွင်းထားလို့ ရမှတ် ၄၆ မှတ် ရထားပါတယ်။

(၆) Mauro Icardi ။       ။ မော်ရို အိုင်ကာဒီက အီတလီရဲ့ ယခင် ထိပ်တန်း ကလပ် အသင်း အင်တာမီလန်လို့ ပြည်တွင်းမှာ အခေါ်များတဲ့ အင်တာနေဇီယွန်နယ်မှာ ကစားနေပါတယ်။ ယခု ရာသီ အတွင်း ၂၄ ဂိုးထိအောင် သွင်းယူထားလို့ ရမှတ် ၄၈ မှတ် ပိုင်ဆိုင်ထားပါတယ်။

(၅) Jonas ။      ။ ဂျိုနက်က ပေါ်တူဂီ ပြည်တွင်းမှာ အမြင့်ဆုံး အမှတ်ပေး ဘောလုံးပြိုင်ပွဲ ဖြစ်တဲ့ ပရီးမီယာ လိဂ်ဂါရဲ့ အသင်း တသင်း ဖြစ်တဲ့ ဘင်ဖီကာမှာ ကစားနေသူပါ။ UEFA (ဥရောပဘောလုံးအဖွဲ့ချုပ်)ရဲ့ အဆင့် သတ်မှတ်ချက် အရ ပရီးမီယားလိဂ်ဂါက အထက်က ပြိုင်ပွဲကြီး ၅ ခုထက် ၁ ဆင့် နိမ့်လို့ ဂျိုနက်ရဲ့ သွင်းဂိုးကို ၂ မှတ် မပေးပဲ ၁ ဒသမ ၅ မှတ်ပဲ ပေးထားပါတယ်။ အခု ရာသီမှာ ဂျိုနက်က ၃၃ ဂိုး သွင်းယူထားပြီး ရမှတ် ၄၉ ဒသမ ၅ မှတ် ပိုင်ဆိုင်ထားပါတယ်။

(၄) Harry Kane ။         ။ အင်္ဂလန် ပရီးမီးယားလိဂ်ရဲ့ အသင်းကြီး စာရင်းဝင်ဖို့ ကြိုးစားနေတဲ့ တော်တင်ဟမ်ဟော့စပါး အတွက် အားအထားရဆုံး တိုက်စစ်မှူးပါ။ အင်္ဂလန်သားတွေထဲမှာ လက်ရှိ အကောင်းဆုံး ကစားသမား အဖြစ် သတ်မှတ်ခံ ထားရပါတယ်။ ဒီရာသီ အတွင်း ၂၅ ဂိုး သွင်းယူထားလိ့ု ရမှတ် ၅၀ ရထားပါတယ်။

(၄) Edinson Cavani ။    ။ အီဒင်ဆန် ကာဗာနီက အီတလီကနေ ပြင်သစ်မြေခံ အသင်း ပဲရစ်စိန့်ဂျာမိန်းမှာ ခြေစွမ်းပြ နေဆဲ ကစားသမားပါ။ PSG ကို နေမာ ရောက်လာပေမယ့် အခုထိအောင် ကာဗာနီရဲ့ ဂိုးသွင်းနှုန်းက အကောင်းဆုံး ပုံစံမှာ ရှိနေဆဲပါ။ အခုနှစ် အတွင်း ၂၅ ဂိုး သွင်းထားလို့ သူလည်း ရမှတ် ၅၀ ရထားပါတယ်။

(၃) Robert Lewandowski ။        ။ ရောဘတ် လီဝန်ဒေါစကီးက ဂျာမနီရဲ့ အအောင်မြင်ဆုံး ကလပ် အသင်း ဘိုင်ယန်မြူးနစ် ရဲ့ ဂိုးသွင်းစက်ပါပဲ။ ပြိုင်ပွဲစုံ ၂၇ ဂိုးထိအောင် သွင်းယူပေးထားနိုင်လို့ ၅၄ မှတ်ထိ ရနေပါတယ်။

(၃) Ciro Immobile ။      ။ စီရို အင်မိုဘေး၊ အီတလီ စီးရီးအေ ဆိုတာ ဥရောပရဲ့ ပြိုင်ပွဲကြီး ၅ ခုထဲမှာ ဂိုးသွင်းယူမှု အနည်းဆုံး အမှတ်ပေး ပြိုင်ပွဲ ဖြစ်ပေမယ့် အင်မိုဘေး အတွက်ကတော့ အသင်းကြီး မဟုတ်တဲ့ အလယ်အလတ် အဆင့်ရှိ လာဇီယိုမှာ ကစားနေပေမယ့် အခု ရာသီမှာ ၂၇ ဂိုး သွင်းထားပြီး ရမှတ် ၅၄ မှတ် ယူထားပါတယ်။

(၂) Lionel Messi ။         ။ စပိန် လာလီဂါပြိုင်ပွဲဝင် လက်ရှိ ကမ္ဘာ့အကောင်းဆုံး ကလပ်လို့ တချို့က သတ်မှတ်ခြင်း ခံထားရတဲ့ ဘာစီလိုနာရဲ့ အဓိက တိုက်စစ်မှူးပါ။ ရီးရဲ အသင်းက ဒိုလေးနဲ့ အပြိုင်ပေါ့။ အခုနှစ် ဒိုလေး ဂိုးသွင်းနှုန်း ကျဆင်းနေပေမယ့် မက်ဆီကတော့ တဦးတည်း ၂၉ ဂိုး သွင်းထားနိုင်လို့ ၅၈ မှတ်ထိ ရထားပါတယ်။

(၁) Mohamed Salah ။   ။ ဒိုလေးနဲ့ မက်ဆီတို့လို ကစားသမားတွေကို ကောင်းကောင်း နောက်ကောက်ချ ထားနိုင်သူကတော့ လက်ရှိ အင်္ဂလန် ကလပ် လီဗာပူးလ်မှာ ခြေစွမ်းပြနေတဲ့ ကစားသမား မိုဟာမက် ဆာလက် ဖြစ်ပါတယ်။ မထင်မှတ်ပဲ လီဗာပူးအတွက် ဂိုးသွင်းစက် ဖြစ်လာပြီး ဒီရာသီထဲမှာ သွင်းဂိုး ၃၁ ရှိနေလို့ ရမှတ် ၆၂ ရရှိထားသူပါ။

Ref: www.businessinsider.com

The post ဥရောပ ဘောလုံးအဖွဲ့ချုပ်ကပေးတဲ့ ရွှေဖိနပ်ဆု ဘယ်သူရနိုင်သလဲ appeared first on ဧရာဝတီ.

ဘဏ္ဍာရေး ဆိုင်ရာ စောင့်ကြည့်ရေး အဖွဲ့ တခု ဖြစ်တဲ့ Deloitte ရဲ့ လေ့လာတွေ့ရှိချက်တွေကို အခြေခံပြီး Football Money League ဆိုတဲ့ ထုတ်ပြန်ချက် တခုကို မကြာသေးခင်က ထုတ်ပြန်လာတာ တွေ့ရပါတယ်။ ဥရောပ အခြေစိုက် ကလပ် အသင်းတွေရဲ့ ဝင်ငွေ ရရှိမှု အပေါ်ကို အခြေခံပြီးတော့ အချမ်းသာဆုံး အသင်းတွေကို ဖော်ပြထားတာပါ။ အခုနှစ် ၂၀၁၈ ခုနှစ် အတွက် ကမ္ဘာပေါ်က ဝင်ငွေအကောင်းဆုံး ဘောလုံး ကလပ် အသင်းတွေ အကြောင်း ပြောပြပါမယ်။

အဲဒီ ထုတ်ပြန်ချက်မှာ ကမ္ဘာ့ အချမ်းသာဆုံး အသင်းပေါင်း ၂၀ ကို ဖော်ပြထားတာ ဖြစ်ပြီး ထူးခြားချက်က အင်္ဂလန် ပရီးမီးယားလိဂ် အသင်းပေါင်း ၁၀ သင်းထိ ပါဝင်နေတာကတော့ ဥရောပ ဘောလုံးလောကကို အင်္ဂလန် အသင်းတွေ လွှမ်းမိုးထားနိုင်ဆဲ ဆိုတာ ပေါ်လွင် နေပါတယ်။

အဆင့် ၂၀ နေရာမှာတော့ ပရီးမီးယားလိဂ်ကလပ် အဲဗာတန် (Everton) ရှိပါတယ်။ အဲဗာတန်ရဲ့ ပျမ်းမျှ အခုနှစ်ဝင်ငွေ ၁၉၉ ဒသမ ၂ သန်းလောက် ရနေပြီး အနည်းဆုံး ၁၇၁ ဒသမ ၂ သန်းကနေ အများဆုံး ၂၄၄ သန်းလောက်ထိ ရနိုင်နေတာပါ။ အရင်နှစ် ကတော့ အသင်းက ၁၃၀ ဒသမ ၃ သန်းလောက် ဝင်ငွေရခဲ့တယ် လို့ ဆိုပါတယ်။

သူ့အထက် အဆင့် ၁၉ မှာတော့ အီတလီ ကလပ် နာပိုလီ (Napoli) ရှိပြီး နာပိုလီက အခုနှစ် ၁၇၂ ဒသမ ၅ သန်းလောက် ဝင်ငွေ ရပါလိမ့်မယ်။ ဒါပေမယ့် ၂၄၅ ဒသမ ၆ သန်းလောက်ထိအောင်လည်း အများဆုံး ရနိုင်နေတာပါ။ အရင်နှစ်က စီးရီးအေမှာ အဆင့် ၃နဲ့ ရာသီသိမ်းသလို ချန်ပီယံလိဂ် ၁၆သင်း အဆင့်ထိရောက်ပါသေးတယ်။ အခုနှစ်လည်း စီးရီးအေ ဖလား ရယူနိုင်ဖို့ ရှိနေတာကြောင့် ဝင်ငွေ ပိုကောင်းလာနိုင်ပါတယ်။

အဆင့် ၁၈ မှာတော့ အင်္ဂလန်ကလပ် ဆောက်သမ်တန် (Southampton) ရှိပါတယ်။ အသင်းကြီး မဟုတ်ပေမယ့် အခုနှစ် စတာလင်ပေါင် ၂၁၂ ဒသမ ၁ သန်းလောက် ရနိုင်ပါတယ်။ ပထမဆုံး ဝင်ငွေ အကောင်းဆုံး စာရင်းမှာ ပါလာခြင်း ပါ။ ဆောက်သမ်တန်က သူ့ရဲ့ ပွဲတွေကို ရုပ်သံလိုင်းတွေကနေ ပြသခွင့် အတွက် ဝင်ငွေ ကောင်းကောင်းရသွားလို့ အခုလို စာရင်းမှာပါလာတပါ။ Virgin Media နဲ့ ဝတ်စုံစပွန်ဆာ ၂ နှစ်ရလို့ ဝင်ငွေလည်း ကောင်းထားပါတယ်။

အဆင့် ၁၇ မှာက အင်္ဂလန်ကလပ် ဝက်စ်ဟမ်း (West Ham) ရှိနေပါတယ်။ ဝက်ဟမ်းအသင်းက အခုနှစ်မှာ ပေါင် ၂၁၃ ဒသမ ၃ သန်းလောက် ဝင်ငွေ ရနိုင်ပါတယ်။ ဒါတောင် အများဆုံး ၂၆၁ ဒသမ ၃ သန်းလောက်ထိ မျှော်လင့်လို့ ရတာပါ။ အိမ်ကွင်းကိုလည်း London Stadium မှာ အသစ် ပြောင်းကစားတယ်။ ရလဒ်ပိုင်း သိပ်မကောင်းပေမယ့် ဝင်ငွေ ကောင်းနေတာက ထူးခြားချက်ပါ။

အဆင့် ၁၆ အဖြစ် ဂျာမနီ ကလပ် ရှော်ကေး (Schalke) ရှိနေပါတယ်။ ရှော်ကေး အသင်းက အခုနှစ် ဝင်ငွေ ၂၃၀ ဒသမ ၂ သန်းလောက် ရမယ် လို့ ခန်းမှန်းပါတယ်။ ရုပ်သံထုတ်လွှင့်မှုကနေ ဝင်ငွေ အများဆုံး ရထားတာပါ။ ဂျာမနီရဲ့ အသင်းကြီး စာရင်းဝင်ဖြစ်နေလို့ ဝင်ငွေကောင်းနေတယ် လို့ ဆိုရမှာပါ။

အဆင့် ၁၅ မှာက အီတလီကလပ် အင်တာမီလန် (Inter Milan) ရှိပါတယ်။ ဒီနှစ် အတွင်း ပေါင် ၂၆၂ ဒသမ ၁ သန်းလောက် ဝင်ငွေ ရပါလိမ့်မယ်။ အရင်နှစ်ကထက် ဝင်ငွေ ရရှိမှု ၁၃၇ ရာခိုင်နှုန်း တက်လာလို့ တနှစ် အတွင်း ဝင်ငွေ စံချိန်တင် မြင့်တက်မှု စံချိန်တောင် တင်ထားပါတယ်။

အဆင့် ၁၄ အဖြစ် အင်္ဂလန် ကလပ် လက်စတာ စီးတီး (Leicester City) ရှိပါတယ်။ လက်စတာ အနေနဲ့ ၂၀၁၅-၁၆ ခုနှစ်က ချန်ပီယံဖြစ်မှုနဲ့ အတူ ဝင်ငွေ ကောင်းနေဆဲပါ။ အခုနှစ် ပေါင် ၂၇၁ ဒသမ ၁ သန်းလောက် ရပါလိမ့်မယ်။ အထူးသဖြင့် အသင်းငယ် ဖြစ်ပေမယ့် ချန်ပီယံလိဂ် ကစားရလို့ ဝင်ငွေကောင်းနေတာပါ။

အဆင့် ၁၃ အဖြစ် စပိန်ကလပ် အက်သလက်တီကို မက်ဒရစ် (Atlántico Madrid) ရှိပါတယ်။ အက်သလက်တီကို အနေနဲ့ အခုနှစ်မှာ ဝင်ငွေ ပေါင် ၂၇၂ ဒသမ ၅ သန်းလောက် ရမှာပါ။ အရင်နှစ်က အခုထက် ပိုပြီး ဝင်ငွေကောင်းခဲ့ပါတယ်။ အခုနှစ်မှာ အိမ်ကွင်း အသစ် အနေနဲ့ Wanda Metropolitan ကွင်းမှာ ပြောင်းကစားနေတာပါ။

အဆင့် ၁၂ မှာ ဂျာမနီရဲ့ ထိပ်တန်း ကလပ်အသင်း တသင်း ဖြစ်တဲ့ ဘိုရုရှားဒေါ့မန် (Borussia Dortmund) ရှိပါတယ်။ ဘိုရုရှား ဒေ့ါမန်က ဘိုင်ယန်လို အသင်းကို အနီးကပ် စိန်ခေါ်နိုင်တဲ့ တသင်းတည်းသော ဂျာမနီ အသင်းပါ။ အခုနှစ် ပေါင် ၃၃၂ ဒသမ ၆ သန်းလောက် ဝင်ငွေ ရပါလိမ့်မယ်။ Coca Cola နဲ့ ဂျာမနီလေကြောင်းလိုင်း Eurowings တွေနဲ့ အခုနှစ် စပွန်ဆာရလို့ ဝင်ငွေ ပိုကောင်းလာပါတယ်။ ချန်ပီယံလိဂ်ဝင်ခွင့်ရလို့ ဝင်ငွေ ၄၃ သန်းလောက်လည်း တက်လာပါသေးတယ်။

အဆင့် ၁၁ မှာတော့ အခု နောက်ပိုင်း အင်္ဂလန် ပရီးမီးယားလိဂ်မှာ အသင်းကြီး စာရင်း ဝင်ဖို့ ပြင်ဆင်နေတဲ့ တော့တင်ဟန်ဟော့စပါး (Tottenham Hotspur) ရှိပါတယ်။ စပါးအသင်းက အခုနှစ် ဝင်ငွေ ပေါင် ၃၅၅ ဒသမ ၆ သန်းလောက် ရမှာပါ။ အရင်နှစ်က အဆင့် ၂ နဲ့ ရာသီသိမ်းထားတာပါ။ ချန်ပီယံလိဂ်လည်း ဝင်ခွင့်ရထားသလို ရုပ်သံ ထုတ်လွှင့်ခွင့် ကနေလည်း ပေါင် ၇၇ ဒသမ ၈ သန်းလောက် ရထားပါတယ်။

အဆင့် ၁၀ မှာတော့ အီတလီ ထိပ်တန်း ဂျူဗင်တပ် (Juventus) ရှိပါတယ်။ ဂျူဗင်တပ် အနေနဲ့ အခုနှစ် ပေါင် ၄၀၅ ဒသမ ၇ သန်းလောက် ဝင်မှာပါ။ နောက်ဆုံး ၃ နှစ် အတွင်း ချန်ပီယံလိဂ် ဖိုင်နယ်ကို ၂ ကြိမ် တက်ထားနိုင်သူပါ။ စီးရီးအေ ဖလားလည်း ရထားတယ်၊ အီတလီမှာ လူကြိုက်အများဆုံး အသင်း ဖြစ်နေပါပြီ။

အဆင့် ၉ မှာတော့ အင်္ဂလန်ကလပ် လီဗာပူးလ် (Liverpool) ရှိပါတယ်။ လီဗာပူးလ်က တနှစ်အတွင်း ဝင်ငွေ ၄၂၄ ဒသမ ၂ သန်းလောက် ရမှာပါ။ ရုပ်သံထုတ်လွှင်မှုတွေကနေ ဝင်ငွေတွေ ရရှိမှု မြင့်တက်လာနေပြီး နောင်နှစ်တွေမှာပါ အခုထက် ဝင်ငွေ ပိုကောင်းလာနိုင်နေတာပါ။

အဆင့် ၈ မှာတော့ အင်္ဂလန်ကလပ် ချယ်လ်ဆီး (Chelsea) ရှိပါတယ်။ ချယ်ဆီးက အခုနှစ်မှာ ဝင်ငွေ ၄၂၈ သန်းလောက် ရပါလိမ့်မယ်။ ၂၀၁၆-၁၇ ပရီးမီးယားလိဂ် ဖလားလည်း ရလိုက်ပါသေးတယ်။ Carabao လို အဖျော်ရည် ကုမ္ပဏီနဲ့ စပွန်ဆာရလို့ ပေါင် ၁၃၉ ဒသမ ၈ သန်းလောက် ရလိုက်ပါသေးတယ်။

အဆင့် ၇ မှာက ပြင်သစ် အခြေစိုက် ပါရီဆိန့်ဂျာမိန်း (Paris Saint Germain) ရှိပါတယ်။ ပြည်တွင်းမှာတော့ ပီအက်ဂျီ လို့ပဲ ခေါ်ပါတယ်။ ဒီနှစ်ထဲမှာ ဝင်ငွေ ၄၈၆ ဒသမ ၂ သန်းလောက် ရနိုင်ပါတယ်။ အရင်နှစ်က ပြင်သစ်အမှတ်ပေး ဖလား မရပေမယ့် လူကြိုက်များနေဆဲ၊ ဝင်ငွေ ကောင်းနေဆဲပါ။ နာမည်ကျော် ကစားသမား နေမာကို စံချိန်တင် ပြောင်ရွှေ့ကြေး ပေါင် သန်း ၂၀၀ နဲ့ ခေါ်ထားလို့ လူကြိုက်ပိုများ နေတာပါ။

အဆင့် ၆ မှာတော့ အင်္ဂလန်ကလပ် အာဆင်နယ် (Arsenal) ရှိပါတယ်။ အာဆင်နယ်က အခုနှစ် အတွင်း ဝင်ငွေ ၄၈၇ ဒသမ ၆ သန်းလောက် ရနိုင်ပါတယ်။ ၄ နှစ် အတွင်း FA ဖလား ၃ လုံး ရထားပါတယ်။ ဒါပေမယ့် အရင်နှစ်က ချန်ပီယံလိဂ် ဝင်ခွင့် မရလို့ ဝင်ငွေ နည်းနည်း ကျသွားခဲ့ပါတယ်။

အဆင့် ၅ မှာက အင်္ဂလန်ကလပ် မန်ချက်စတာစီးတီး (Manchester City) ရှိပါတယ်။ မန်စီးတီး လို့လည်း ခေါ်တဲ့ ဒီ အသင်းက အခုနှစ် ပေါင် ၅၂၇ ဒသမ ၇ သန်းလောက် ရမှာပါ။ အခုနှစ် ပရီးမီးယားလိဂ် ဖလား ရဖို့ များနေလို့ ဖလားရခဲ့မယ် ဆိုရင် နောက်နှစ်မှာ ဝင်ငွေ ပိုကောင်းလာပါလိမ့်မယ်။

အဆင့် ၄ မှာတော့ ဂျာမနီရဲ့ ထိပ်တန်း ဘိုင်ယန်မြူးနစ် (Bayern Munich) ရှိပါတယ်။ ဘိုင်ယန်မြူးနစ် အနေနဲ့ ဒီနှစ်မှာ ပေါင် ၅၈၇ ဒသမ ၈ သန်းလောက် ရမှာပါ။ အရင်နှစ်က ပေါင် ၂၉၅ ဒသမ ၁ သန်း ရခဲ့ရာကနေ အခုနှစ်မှာ ဝင်ငွေ စံချိန်တင် မြင့်တက်လာတာပါ။ ဂျာမနီ ဘွန်ဒက်လီဂါဖလားကို ၅ နှစ်ဆက် ရထားပါတယ်။

အဆင့် ၃ မှာတော့ စပိန် ထိပ်တန်း ဘာစီလိုနာ (Barcelona) ရှိပါတယ်။ ဘာစီလိုနာက အခုနှစ်မှာ ဝင်ငွေ ၆၄၈ ဒသမ ၃ သန်းလောက် ရမှာပါ။ အရင်နှစ်က အခုစာရင်းမှာ အဆင့် ၂ ကနေ အခုနှစ် ၃ ဖြစ်သွားတာပါ။ နေမာကို ပီအက်ဂျီဆီ ရောင်းလိုက်လို့ ပေါင် သန်း ၂၀၀ ရလိုက်ပေမယ့် ဝင်ငွေ နည်းနည်း ကျသွားပါတယ်။

အဆင့် ၂ မှာတော့ ဘာစီလိုနာရဲ့ အဓိက ပြိုင်ဘက် ရီးရဲမက်ဒရစ် (Real Madrid) ရှိပါတယ်။ ရီးရဲမက်ဒရစ်က အခုနှစ်မှာ ပေါင် ၆၇၄ ဒသမ ၆ သန်းလောက် ရနိုင်ပါတယ်။ အရင်နှစ်က အဆင့် ၃ ကနေ အခု အဆင့် ၂ ဖြစ်လာပါတယ်။ ချန်ပီယံလိဂ်မှာ ၂ နှစ်ဆက်တိုင် အောင်မြင်မှု ရယူနိုင်မှုနဲ့ အတူ ဝင်ငွေ ကောင်းလာတာပါ။

လက်ရှိ ကမ္ဘာ့ ဝင်ငွေ အကောင်းဆုံး အသင်းကတော့ အင်္ဂလန်ရဲ့ အအောင်မြင်ဆုံး အသင်း မန်ချက်စတာ ယူနိုက်တက် (Manchester United) ဖြစ်ပါတယ်။ မန်ယူက အခုနှစ်ထဲမှာ ပေါင် ၆၇၆ ဒသမ ၃ သန်းလောက် ဝင်ငွေ ရမှာပါ။ ဒါတောင် အများဆုံး ပေါင် ၈၂၇ ဒသမ ၉ သန်း လောက်ထိ မျှော်လင့် ရပါတယ်။ ၂ နှစ်ဆက်တိုက် အခုစာရင်းမှာ အဆင့် ၁ ရပ်တည်နိုင်တာလည်း ဖြစ်ပါတယ်။ ယူရိုပါလိဂ် ဖလား ရယူနိုင်ခဲ့တာနဲ့ အတူ ရုပ်သံထုတ်လွှင့်မှုတွေ ကနေ ဝင်ငွေ ပိုကောင်း လာတယ် လို့ သိရပါတယ်။

Ref: www.businessinsider.com

The post ကမ္ဘာ့ ဝင်ငွေအကောင်ဆုံး ဘောလုံးအသင်းများ appeared first on ဧရာဝတီ.

ဥရောပဒေသတွင်း အင်အားကြီး ဘောလုံးအသင်းပေါင်းစွာ ရှိနေလို့ ဒိန်းမတ် ဆိုတာ နိုင်ငံ အသင်း အလိုက် အနေ အထားမှာ ကြီးမားတဲ့ အောင်မြင်မှု များများစားစား ရမထားပေမယ့် ဒီအသင်းကို နာမည်ကျော် ဂိုးသမား ပီတာ ရှမိုက်ကယ် (Peter Schmeichel) နဲ့ အတူ လူသိများလာတာ လို့ ဆိုနိုင်ပါတယ်။ ပီတာက ကမ္ဘာ့ပရိတ်သတ် အများဆုံး ကလပ် အသင်း မန်ယူမှာလည်း အချိန်ကြာ ဂိုးဖမ်းခဲ့တယ်၊ နိုင်ငံ အသင်း ဒိန်းမတ် အတွက်လည်း ပွဲအများဆုံး ကစားပေး ထားတယ်၊ ပြီးတော့ ရှမိုက်ကယ်သား နှစ်ယောက် ရှိသေးပြီး သူတို့ကလည်း ဖခင်လိုပဲ ဘောလုံး ကစားကြတယ်၊ ဒီလိုနဲ့ ပီတာကိုရော ဒိန်းမတ်ကိုပါ လူသိများနေတာပါ။

ဒိန်းမတ်ဘောလုံး အဖွဲ့ချုပ်ရဲ့ လက်အောက်ခံ နိုင်ငံ့လက်ရွေးစင် အသင်း ဖြစ်ပြီး ဘောလုံးနယ်ခွဲခြားမှု အရ ဥရောပ ဘောလုံး အဖွဲ့ချုပ် UEFA ရဲ့ နယ်ဝင် ဖြစ်ပါတယ်။ အသင်းကို အမည်ပြောင် အနေနဲ့ Danish Dynamite (ဒိန်းမတ် ယမ်းဘီလူးများ) လို့ အမည်ပြောင် ချစ်စနိုး ခေါ်ကြပါတယ်။ အသင်းကို နည်းပြ အဖြစ် Age Hareide (အေ့ဂျ် ဟာရိုက်) က တာဝန်ယူနေပြီး လက်ရှိ အသင်းခေါင်းဆောင်ကတော့ Simon Kjaer (ဆိုင်မွန် ကေဂျာ)ဖြစ်ပါတယ်။ အသင်းက အိမ်ကွင်း အဖြစ် Telia Parken ကွင်းကို လက်ခံကစားတာ တွေ့ရပါတယ်။

အသင်းက အိမ်ကွင်း ဝတ်စုံ အနေနဲ့တော့ အကျႌနဲ့ ခြေအိတ်ကို အနီရောင် ဝတ်ဆင်တယ်၊ ဘောင်းဘီကတော့ အဖြူရောင် ပါ။ အကျႌ ပခုံးနဲ့ ဘောင်းဘီ ဘေးဘက်တွေမှာ မျှားခေါင်းပုံုစံငယ်တွေ ရိုက်နှိပ်ထားပါတယ်။ အဝေးကွင်း ဝတ်စုံ အနေနဲ့ အကျႌနဲ့ ခြေအိတ်က အဖြူရောင် ဖြစ်သွားပြီး ဘောင်းဘီကတော့ အနီရောင်ပါ။ အကျႌ ရင်ဘတ်ပေါ်မှာ အပေါင်းလက္ခဏာ ပုံစံ ဒိန်းမတ် နိုင်ငံတော် အလံ တံဆိပ်ကို အနီရောင်နဲ့ ပုံဖော်ထားပါတယ်။

အသင်းက လက်ရှိမှာ ဖီဖာ အဆင့် သတ်မှတ်ချက် အရ အဆင့် ၁၂ နေရာမှာ ရှိနေပါတယ်။ ဒါဟာ ဧပြီလအတွင်း အဆင့်ကို ထိန်းထားနိုင်တာပါ။ သမိုင်းတလျှောက် အမြင့်ဆုံး အဆင့် သတ်မှတ်ချက် အဖြစ် ၁၉၉၇ ခုနှစ် မေလနဲ့ သြဂုတ်လ တွေမှာ အဆင့် ၃ ထိ ၂ ကြိမ် ရောက်ဖူးတာလည်း ဖြစ်ပါတယ်။ စံချိန်တင် အဆင့် ကျဆင်းမှု အနေနဲ့ ၂၀၁၇ ခုနှစ် ဧပြီ အတွင်းက အဆင့် ၅၁ ထိ ရောက်သွားဖူးပါတယ်။

ဒိန်းမတ် အသင်းရဲ့ နိုင်ငံတကာ ပွဲစဉ် ကစားမှု အနေအထားမှာ ၁၉၀၈ ခုနှစ် အောက်တိုဘာ ၂၂ ရက်က ပထမဆုံး ပွဲကို ကစားခဲ့ပြီး အဆိုပါပွဲမှာ ပြင်သစ်အသင်းကို ၁၇ ဂိုး ၁ ဂိုးနဲ့ အကြီးမားဆုံး နိုင်ပွဲ ရခဲ့ပါတယ်။ ဒီပွဲကပဲ အခုထိအောင် အသင်း အတွက် အကြီးမားဆုံး နိုင်ပွဲ အဖြစ် မှတ်တမ်းဝင်နေတာပါ။ အသင်းရဲ့ အကြီးမားဆုံး ရှုံးပွဲကတော့ ၁၉၃၇ ခုနှစ် မေ ၁၆ ရက်မှာ ကစားခဲ့တဲ့ ဂျာမနီနဲ့ပွဲမှာ တွေ့ခဲ့ရပြီး ၈ ဂိုး ဂိုး မရှိနဲ့ ရှုံးခဲ့တာ ဖြစ်ပါတယ်။

ကမ္ဘာ့ဖလားပွဲကိုတော့ အသင်းက ရှေ့ပိုင်းကာလတွေမှာ ဝင်ရောက် ယှဉ်ပြိုင်မှု နည်းခဲ့ပြီး ၁၉၅၀ နောက်ပိုင်းမှာ ယှဉ်ပြိုင်မှုတွေ တွေ့ရသလို ပထမဆုံး ခြေစစ်ပွဲအောင်မြင်မှုကိုတော့ ၁၉၈၆ မှ ရခဲ့ပါတယ်။ အခုထိအောင် ကမ္ဘာ့ဖလားကို ၅ ကြိမ် ဝင်ပြိုင်ခွင့် ရထားတာပါ။ ၁၉၉၈ ခုနှစ် ပြိုင်ပွဲမှာ ကွာတားဖိုင်နယ်ထိအောင် ၁ ကြိမ် ရောက်ခဲ့ဖူးပါတယ်။ အဆိုပါ ပြိုင်ပွဲမှာ နာမည်ကျော် ဘရာဇီးကို ၃ ဂိုး ၂ ဂိုးနဲ့ ရှုံးလို့ ထွက်ခဲ့ရတာပါ။

အသင်းက ကမ္ဘာ့ဖလားနဲ့ ပတ်သတ်ပြီး စံချိန်တချို့ကို ပြောရမယ် ဆိုရင် ပထမဆုံး ကမ္ဘာ့ဖလား ပွဲစဉ် အဖြစ် စကော့တလန် နဲ့ ၁၉၈၆ ခုနှစ် ဇွန်လ ၄ ရက်က ကစားတယ်၊ ၁ ဂိုး ဂိုး မရှိနဲ့ နိုင်ခဲ့ပါတယ်။ ကမ္ဘာ့ဖလားမှာ ဒိန်းမတ်ရဲ့ အကြီးမားဆုံး နိုင်ပွဲ အဖြစ် ၁၉၈၆ ခုနှစ် ဇွန်လ ၈ ရက်မှာ ကစားတဲ့ ဥရုဂွေးနဲ့ ပွဲမှာ ၆ ဂိုး ၁ ဂိုးနဲ့ နိုင်ခဲ့တာပါ။ ဒီလိုပဲ ဂိုးပြတ် ရှုံးပွဲ အဖြစ် ၁၉၈၆ ခုနှစ် ဇွန်လ ၁၈ ရက်မှာ ကစားတဲ့ စပိန်နဲ့ ပွဲမှာ ၅ ဂိုး ၁ ဂိုးနဲ့ ရှုံးဖူးပါတယ်။ ကမ္ဘာ့ဖလား ဝင်ပြိုင်မှု အတွင်း အဆိုးဆုံး ရလဒ် အဖြစ် ၂၀၁၀ ကမ္ဘာ့ဖလားမှာ အုပ်စု အဆင့်ကနေ ထွက်ခဲ့ရတာ ဖြစ်ပြီး ကျန်တဲ့ ပြိုင်ပွဲတွေမှာတော့ အုပ်စု အဆင့်ကနေ နောက်တဆင့် တက်ရောက်နိုင်ခဲ့တာတွေ့ရပါတယ်။

အသင်းက လာမယ့် ၂၀၁၈ ကမ္ဘာ့ဖလားမှာ အုပ်စုပွဲစဉ် အဖွင့်ပွဲ အဖြစ် ဇွန်လ ၁၆ ရက်နေ့မှာ ပီရူးနဲ့ ကစားရမယ်၊ ဒုတိယ ပွဲစဉ်ကိုတော့ ဇွန်လ ၂၁ ရက်နေ့မှာ သြစတြေးလျနဲ့ ရင်ဆိုင်ရမှာ ဖြစ်ပြီး နောက်ဆုံး ပွဲစဉ် အဖြစ်နဲ့တော့ ဇွန်လ ၂၆ ရက်နေ့မှာ ပြင်သစ်နဲ့ ကစားရမှာပါ။ Goal.com ရဲ့ ခန့်မှန်းချက် အရတော့ ဒိန်းမတ် အနေနဲ့ အခုနှစ် ပြိုင်ပွဲမှာ နောက်တဆင့် တက်ရောက်နိုင်ဖို့ အလေးများနေပြီး ပြင်သစ်က အုပ်စု ပထမ၊ ဒိန်းမတ်နဲ့ သြစတြေးလျက ဒုတိယ နေရာ လုရဖို့ ရှိနေတယ်လို့ ဆိုပါတယ်။

အသင်း အတွက် ပွဲအများဆုံး ကစားပေးထားသူကတော့ အထက်မှာ ပြောခဲ့သလို နာမည်ကျော် ဂိုးသမား ပီတာ ရှမိုက်ကယ် (Peter Schmeichel) ဖြစ်ပြီး သူက ၁၉၈၇ ကနေ ၂၀၀၁ ခုနှစ် ထိ ၁၂၉ ပွဲ ကစားပေးခဲ့သလို ထူးခြားချက် အနေနဲ့ ဂိုးသမား ဖြစ်ပေမယ့် ၁ ဂိုး သွင်းယူပေးဖူး ပါတယ်။ အသင်း အတွက် ဂိုး အများဆုံး သွင်းယူပေးထားသူကတော့ ၁၉၉၇ ခုနှစ်ကနေ ၂၀၁၀ ခုနှစ်ထိ ကစားပေးခဲ့သူ Jon Dahl Tomasson (ဂျွန်ဒါတိုမာဆန်) ဖြစ်ပြီး သူက ပွဲပေါင်း ၁၁၂ ပွဲ ကစားပေးခဲ့ပြီး ပြိုင်ပွဲစုံ ၅၂ ဂိုး သွင်းယူပေးထားလို့ တပွဲ ပျမ်းမျှ  သုည ဒသမ ၄၆ ဂိုးနှုန်းထိေ သွင်းယူပေးထားသူ ဖြစ်ပါတယ်။

Ref: en.m.wikipedia.org

The post ပီတာရှမိုက်ကယ်တို့ ဒိန်းမတ်ယမ်းဘီလူးများ ကမ္ဘာ့ဖလားကို လှမ်းနိုင်မှာလား appeared first on ဧရာဝတီ.

မကြာမီမှာ ကျင့်ပတော့မယ့် ၂၀၁၈ ကမ္ဘာ့ဖလားမှာ ဘယ်အသင်းက ဗိုလ်စွဲဖို့ ရေပန်းအစားဆုံး ဖြစ်နေတယ် ဆိုတာကို သြစတြေးလျ အခြေစိုက် ABC သတင်းဌာနက ဖုန်းတွေကနေ တဆင့် ပရိတ်သတ်တွေရဲ့ အခု ခန့်မှန်းချက် မဲတွေကို မေးမြန်း ရယူ ဖော်ပြထားတာ တွေ့ရပါတယ်။ ကမ္ဘားဖလား ခြေစစ်ပွဲတွေ ကစားပြီး အောင်မြင်တဲ့ အသင်း ၃၂ သင်း ရွေးထုတ်ပြီး ပြိုင်ပွဲဝင်စေမှာ ဖြစ်လို့ ဘယ်အသင်း မဆိုချန်ပီယံ မျှော်လင့်ချက် ရှိနေတာပါ။

အရင်ဆုံး အခုလက်ရှိ ကမ္ဘာတလွှားက ခန့်မှန်းသူတွေရဲ့ မဲပေးမှု အနေအထားအရ ဗိုလ်စွဲနိုင်မှု ရေပန်းအစားဆုံး အသင်း နံပါတ် ၁ နေရာမှာတော့ ကမ္ဘာ့ဖလားမှာ အောင်မြင်မှု အများဆုံး ရယူထားတဲ့ ဘရာဇီး အသင်း ရှိနေပါတယ်။

သူ့နောက်မှာတော့ စပိန်အသင်း ပါ။ ပြီးခဲ့တဲ့ ဧပြီလဆန်းထိအောင် ဘရာဇီးကို အောင်မြင်မှု အမီလိုက်မယ် လို့ ထင်ကြေးပေး ခံနေရတဲ့ ဂျာမနီ အသင်းက ၂ ချိတ်ခဲ့ပေမယ့် ခြေစွမ်း ပွဲရလဒ်နဲ့ ကစားသမားဒဏ်ရာ အခြေအနေတွေ အရ ဂျာမနီက အဆင့် ၃ နေရာ ရောက်သွားပြီး စပိန်အသင်းက အဆင့် ၂ တက်လာတာပါ။

နာမည်ကျော် အီတလီ အသင်း ခြေစစ်ပွဲ မအောင်ခဲ့တာကြောင့် ဥရောပအသင်းတွေ အနေနဲ့ ချန်ပီယံ ဖြစ်ဖို့ ပိုကြိုးစားမယ် လို့ ခန့်မှန်းချက်တွေ ပေးနေပြီး အဆင့် ၄ နေရာမှာ ပြင်သစ် အသင်း ရှိနေပါတယ်။ ပေါလ် ပေါ့ဂ်ဘာ (Paul Pogba)လို ကစားသမားနဲ့ အတူတိုက်စစ်ပိုင်း အားကောင်းမှုက ပြင်သစ်ကို ချန်ပီယံအိပ်မက် မက်စေနိုင်တယ် လို့ ဆိုကြပါတယ်။

အဆင့် ၅ နေရာမှာတော့ ဘယ်ဂျီယန် အသင်း ရှိနေပါတယ်။ တဦးချင်း ကစားသမား ကောင်းမွန်မှုမှာ အင်အားကြီး အဆင့် မရှိ ပေမယ့် အသင်းလိုက် စုဖွဲ့မှုမှာတော့ ဘယ်ဂျီယန် အသင်း ရဲ့ စုဖွဲ့မှုက ကြောက်စရာကောင်းတယ် လို့ အများစုက ခန့်မှန်းချက် ပေးထားပါတယ်။

အဆင့် ၆ ရေပန်းစားမှု အနေနဲ့တော့ မက်ဆီ ပါဝင်မယ့် အာဂျင်တီးနား အသင်း ရှိနေပါတယ်။ မက်ဆီရဲ့ ကစားသမား ဘ၀ အဆုံးသတ် ဖြစ်လာမယ့် အခု ပြိုင်ပွဲမှာ မက်ဆီကိုယ်တိုင်ကလည်း ကမ္ဘာ့ဖလားကို ကိုင်မြှောက်ဖူးချင်တယ် လို့ ဆိုထားတာ ကြောင့် အားထည့်လာနိုင်ပြီး အသင်းလိုက် ခြေစွမ်းအရလည်း ချန်ပီယံဆုကို စိန်ခေါ်နိုင်စွမ်း ရှိလာတာပါ။

အဆင့် ၇ မှာတော့ ဥရုဂွေး အသင်းရှိပါတယ်။ ချန်ပီယံ ၂ ကြိမ် ဖြစ်ဖူးသလို တိုက်စစ်ပိုင်း အားသန်သန် ကစားတတ်တဲ့ အသင်းအနေနဲ့ အုပ်စုလည်း ချောင်နေလို့ ပြိုင်ဘက် အသင်းတွေ ခြေချော်တိုင်း ချန်ပီယံ ဖြစ်ဖို့ ရာခိုင်နှုန်းများလာမယ့် အသင်း အဖြစ် သတ်မှတ်ခံထားရပါတယ်။

အဆင့် ၈ မှာ နာမည်ကြီး အင်္ဂလန်လို အသင်းကိုတောင် နောက်ကောက်ချထားနိုင်တဲ့ ခရိုအေးရှား အသင်းရှိနေပါတယ်။ လက်ရှိခြေစွမ်းပိုင်းတည်ငြိမ်တယ်၊ ခံစစ်ကောင်းတယ်၊ အထူးသဖြင့် ပေးဂိုးနည်းနည်းနဲ့ ကစားနိုင်တယ်၊ တိုက်စစ်က ဂိုးသိပ် မမြူးတတ် ပေမယ့် အနိုင်ရလဒ် ရအောင် ဖန်တီးနိုင်တတ်လို့ ပရိသတ် အများစုကထင်ကြေးပေးထားကြပါတယ်။

အဆင့် ၉ မှာတော့ ဒိုလေးဦးဆောင်မယ့် ပေါ်တူဂီအသင်း ရှိနေပါတယ်။ ကလပ်အသင်း ပွဲစဉ်တွေမှာတော့ ဒိုလေး တယောက်တည်းနဲ့တင် ဦးဆောင်မှုက ရီးရဲမက်ဒရစ်ကို အောင်မြင်မှုတွေ အများအပြား ရယူပေးထားနိုင်ပေမယ့် နိုင်ငံ အသင်း ပေါ်တူဂီမှာတော့ အသင်းလိုက် စုဖွဲ့မှု အားနည်းချင်လို့ ချန်ပီယံ ခန့်မှန်းချက်မှာ အဆင့် ၉ ရောက်နေတာပါ။ ဒိုလေး ကလည်း မက်ဆီလိုပဲ ကမ္ဘာ့ဖလားကို ကိုင်မြှောက်ချင်တယ် လို့ ဆိုထားတာကြောင့် ဒီပွဲမှာ သူလည်း အထူးအားစိုက်လာဖို့ ရှိနေတာပါ။

ဒါပေမယ့် ABC ရဲ့ အာဘော်မှာတော့ သူတို့က ဘရာဇီးနဲ့ စပိန်ကို ကျော်ဖြတ်ပြီးဂျာမနီကို ချန်ပီယံ ဖြစ်မယ် လို့ ခန့်မှန်းထား ပါတယ်။ အထူးသဖြင့် ပြီးခဲ့တဲ့ ကမ္ဘာ့ဖလားမှာလည်း အင်အားပြနိုင်ခဲ့တယ်၊ အခုလည်း ခြေစွမ်း အရမ်းကောင်းနေတယ်၊ ဘရာဇီးကို အမီလိုက်ဖို့ ဖလား ၁ လုံးလည်း ထပ်လိုနေတယ်၊ ဒီအခြေအနေမှာ ABC က ဂျာမနီကို ချန်ပီယံ ဖြစ်နိုင်တယ်လို့ အကြိုက်ဆုံး အဖြစ် ရွေးချယ်ထားတာပါ။

ဒါဆိုရင်တော့ ခန့်မှန်းပွဲ လုပ်တဲ့ ABC ကိုယ်တိုင်က ဂျာမနီကို ကြိုက်တယ်၊ ပါဝင် ခန့်မှန်းသူတွေရဲ့ မဲပေးမှုကတော့ အထက်မှာ ပြောသလို အစဉ်လိုက်ရှိတယ်။ အများဆုံး မဲပေးခံရတဲ့ အသင်းကတော့ အဆင့် ၁၁ ထိအောင် ရှိတယ် လို့ ဆိုပါတယ်။

ဒီအသင်းတွေက ဘရာဇီး၊ စပိန်၊ ဂျာမနီ၊ ပြင်သစ်၊ ဘယ်ဂျီယမ်၊ အာဂျင်တီးနား၊ ဥရုဂွေး၊ ခရိုအေးရှား၊ ပေါ်တူုဂီ၊ ပြီးတော့ အင်္ဂလန်နဲ့ ကိုလံဘီယာတို့ ရှိနေပါတယ်။ ဘယ်အသင်း အမှန်တကယ် ချန်ပီယံ ဖြစ်လာမလဲ ဆိုတာကတော့ မကြာခင် စတင် ကျင်းပတော့မယ့် ကမ္ဘာ့ဖလားဘောလုံးပြိုင်ပွဲတွေကို စောင့်စားကြည့်ရှုကြရမှာပါ။ ။

Ref: mobile.cbc.net.au

The post ကမ္ဘာ့ဖလားမှာ ဗိုလ်စွဲဖို့ ဘယ်အသင်းတွေ ရေပန်းအစားဆုံးလဲ appeared first on ဧရာဝတီ.

ဘရူနိုင်းမှာ ကျင်းပနေတဲ့ ၆ကြိမ်မြောက် အာဆီယံ လူငယ်ဘောလုံးပြိုင်ပွဲ အကြိုဗိုလ်လုပွဲ(ဆီမီး ဖိုင်နယ်) ပွဲစဉ်တွေမှာ ကမ္ဘောဒီးယားနဲ့ တီမော- လက်စတီတို့က ချန်ပီယံဟောင်း မြန်မာနဲ့ စင်ကာပူ တို့ကို အနိုင်ရကာ မနေ့ ဗိုလ်လုပွဲကို တက်သွားပါတယ်။

ကမ္ဘောဒီးယားအသင်းဟာ ပထမပိုင်းမှာ ကတည်းက မြန်မာအသင်းဘက်ကို နှစ်ဂိုးဆက်တိုက်သွင်းပြီး ဦးဆောင် ကစားခဲ့ ရာ မြန်မာဘက်မှ တဂိုးပြန်သွင်းနိုင်ခဲ့သော်လည်း ပွဲပြီးသည်အထိ ၂ဂိုး-၁ဂိုးဖြင့် ကမ္ဘောဒီးယား အောင်ပွဲခံနိုင်ခဲ့ပါတယ်။

အလားတူ နောက်ထပ်ဆီမီးဖိုင်နယ်ပွဲစဉ်ဖြစ်တဲ့ တီမော-လက်စတီအသင်းနဲ့ စင်ကာပူတို့ ပွဲစဉ်မှာလည်း တီမောအသင်းက ၂ဂိုး ၁ဂိုးနဲ့ အနိုင်ရခဲ့ပါတယ်။

ဗိုလ်လုပွဲတက်သွားတဲ့ ကမ္ဘောဒီးယားနဲ့ တီမော-လက်စတီတို့ဟာ လာမည့်စနေနေ့မှာ ဗိုလ်လုပွဲ ယှဉ်ပြိုင်ကစားမှာဖြစ်ပါတယ်။

အာဆီယံလူငယ်ဘောလုံးပြိုင်ပွဲကို ဘရူးနိုင်းဘုရင် စူလတန်ဟာဆာနယ်ဘော့ကိုင်းက ၁၉၉၇ ခုနှစ်က အစပျိုးကျင်းပပေးခဲ့ခြင်းဖြစ်ပြီး၊ ပထမဆုံးပြိုင်ပွဲကို ၂၀၀၂ ခုနှစ်က ကျင်းပရာ အင်ဒိုနီးရှားအသင်း က ဗိုလ်စွဲခဲ့သည်။ မြန်မာအသင်းကလည်း ၂၀၁၄ ခုနှစ်က အောင်မြင်မှုသရဖူဆောင်းနိုင်ခဲ့သည်။

The post ကမ္ဘောဒီးယား နဲ့ တီမော၊ မြန်မာနဲ့ စင်ကာပူကို ခြေစွမ်းပြကာ ဗိုလ်လုပွဲတက် appeared first on ဧရာဝတီ.

အင်္ဂလန်နိုင်ငံ၏ ချန်ပီယံရှစ် အသင်းတသင်းဖြစ်သော လိဒ်ယူနိုက်တက် (Leeds United) ဘောလုံးအသင်းသည် ၎င်းတို့၏ မြန်မာနိုင်ငံ ခရီးစဉ်အပေါ် ဟန့်တားလိုသည့် ဝေဖန်မှုများရှိနေသော်လည်း မူလကစီစဉ်ထားသည့် အတိုင်း အရောက်လာ၍ ကစားရန် ဆုံးဖြတ်လိုက်သည်။

လိဒ်ယူနိုက်တက် အသင်းသည် မြန်မာနိုင်ငံ၌ မေလ ဒုတိယအပတ်တွင် ဧရာဝတီဘဏ်မှ စီစဉ်ပံ့ပိုးမှုဖြင့် ကျင်းပမည့် AYA Bank Tour 2018 ပွဲတွင် Myanmar National League All Star ဘောလုံး အသင်း၊ မြန်မာ လက်ရွေးစင် ဘောလုံး အသင်းတို့နှင့် ရန်ကုန်နှင့် မန္တလေးမြို့များတွင် ချစ်ကြည်ရေးပွဲများ ကစားသွားရန် ပြင်ဆင်ထားခြင်းဖြစ်သည်။

အစီအစဉ်အရ ရန်ကုန်မြို့ရှိ သုဝဏ္ဏ ဘောလုံးကွင်းတွင် Myanmar National League All Stars အသင်းနှင့် မေလ ၉ ရက် နေ့ ညနေ ၆ နာရီတွင် ကစားမည် ဖြစ်ပြီး မန္တလေးမြို့ရှိ မန္တလာသီရိ အားကစားကွင်းတွင် မြန်မာ့ လက်ရွေးစင်အသင်းနှင့် မေလ ၁၁ ရက် နေ့ညနေ ၆ နာရီတွင် ကစားမည် ဖြစ်သည်။

သို့သော်လည်း ရခိုင်ပြည်နယ်မြောက်ပိုင်း ဖြစ်စဉ်များနှင့်ပတ်သက်၍ လူ့အခွင့်အရေး ချိုးဖောက်မှုများ ရှိနေသည့် မြန်မာနိုင်ငံကို သွားရောက် မကစားသင့်ဟုဆိုကာ ဗြိတိန် လွှတ်တော်အမတ်များ၊ အသင်းပရိတ်သတ်များနှင့် နိုင်ငံတကာ လွတ်ငြိမ်းချမ်းသာခွင့် အဖွဲ့ (AI) အဖွဲ့တို့က လိဒ်ယူနိုက်တက်၏ ခရီးစဉ်အပေါ် ဝေဖန်ခဲ့ကြပြီး ခရီးစဉ်ကို ဖျက်ပစ်ရန်အထိ တောင်းဆိုမှုများ ရှိခဲ့သည်။

ထိုသို့ တောင်းဆိုသူများအနေဖြင့် ဖွံ့ဖြိုးတိုးတက်မှုနှောင့်နှေးနေသည့် မြန်မာနိုင်ငံ၏ နိုင်ငံရေး အခြေအနေနှင့် မြန်မာ့ဘောလုံး လောက တိုးတက်ဖွံ့ဖြိုးမှု အားနည်းနေသည့် အခြေအနေအပေါ်တွင် အခြေအနေအမှန်ကို နားလည်ရန်လိုအပ်သလို နိုင်ငံရေး အတွက်ဘောလုံး အားကစားကို ခွဲခြားနားလည်ရန် မြန်မာ့လက်ရွေးစင်ဟောင်းများက တိုက်တွန်းသည်။

မြန်မာ့လက်ရွေးစင် အားကစားသမားဟောင်းကြီး တဦးဖြစ်သည့် ဦးတင်အောင် (ဂိုး) က “နိုင်ငံရေးနဲ့ အားကစားနဲ့ ဆက်စပ် နေရင်တော့ ရှုတ်ထွေးနေမှာပဲ။ အားကစားရှုဒေါင့်က ကြည့်ရင်တော့ ဒါဟာ နိုင်ငံရေးနဲ့ လုံးဝ မပတ်သက်ပါဘူး။ ကျနော်တို့က အားကစားသမားတွေလေ။ ဒီဖြစ်စဉ်တွေပေါ်မှာ မူတည်ပြီးတော့ နိုင်ငံရေးထဲကို ဆွဲဆွဲထည့်သွားရင်တော့ ဘယ်တော့မှ ပြတ်တောက်မှာမဟုတ်ဘူး။ အားကစားလည်း လုပ်လို့ရတော့မှာ မဟုတ်ပါဘူးဗျာ” ဟု ပြောသည်။

မြန်မာ့လက်ရွေးစင်ဟောင်းလည်းဖြစ် လက်ရှိ မြန်မာ့လက်ရွေးစင် ယူ ၁၉ နည်းပြချုပ် ဦးမျိုးလှိုင်ဝင်းကလည်း ဘောလုံး အားကစားကို နိုင်ငံရေးနဲ့ ဆက်နွယ် အသုံးမချရန်နှင့် မြန်မာ့ဘောလုံး အားကစားလောက တိုးတက်ဖွံ့ဖြိုးရေး အတွက် စိတ်ရင်း စေတနာမှန်ဖြင့် ကူညီကြရန်လိုအပ်ကြောင်း ထောက်ပြသည်။

ဦးမျိုးလှိုင်ဝင်း က “ဘောလုံးအားကစားဟာ နိုင်ငံရေးနဲ့ မပတ်သက်ဘူး။ အခုကျနော်တို့တိုင်းပြည်က အကုန်လုံး Open ဖြစ်လာတဲ့ အချိန်ပါ။ အရင်က အင်္ဂလန် အသင်းကြီးတွေ ဒီလိုမျိုးလာကစားဖို့ဆိုတာ မလွယ်ဘူး” ဟု ဆိုသည်။

လိဒ်ယူနိုက်တက်၏ မြန်မာပြည် ခရီးစဉ်ကို ရခိုင်ပြည်နယ် မြောက်ပိုင်း ပဋိပက္ခနှင့် ဆက်စပ်ပြီး ဟန့်တားရန် ကြိုးပမ်းနေကြသည့် အဖွဲ့များ၏ လုပ်ရပ် အပေါ်မြန်မာ အားကစားပရိသတ်များက လူမှုဆက်သွယ်ရေးကွန်ရက် Facebook စာမျက်နှာပေါ်တွင် တန်ပြန် ဝေဖန်မှုများရှိနေသည်။

ထိုကဲ့သို့ ဟန့်တားလိုသော အဖွဲ့အစည်းများအနေဖြင့် အခက်အခဲများကြားမှ ရုန်းထနေရသည့် မြန်မာနိုင်ငံ၏ ပကတိ အခြေအနေ အပေါ်တွင် ကူညီရာ မရောက်ဘဲ ၎င်းတို့၏ လှုပ်ရှားမှုများ အောင်မြင်ရန်သာ လုပ်ဆောင်နေကြခြင်း ဖြစ်ကြောင်း မြန်မာ ဘောလုံး ပရိသတ်များက ပြောဆိုနေကြသည်ကိုတွေ့ရသည်။

မြန်မာနိုင်ငံဘောလုံးအဖွဲ့ချုပ် (MFF) ၏ ဥက္ကဋ္ဌ ဦးဇော်ဇော် ကတော့ လိဒ်ယူနိုက်တက်၏ မြန်မာပြည်ခရီးစဉ်သည် မြန်မာ့ ဘောလုံး ဖွံ့ဖြိုးတိုးတက်ရေး အတွက် အထောက် အကူတခု ဖြစ်စေနိုင်သလို မြန်မာအသင်းအနေဖြင့် ကိုယ့်ထက်ကောင်းသော အသင်းများနှင့် ခြေစမ်းရာမှာ အတွေ့အကြုံပိုင်းရော၊ ခြေစွမ်းပိုင်းပါ တိုးတက် လာနိုင်ကြောင်း မကြာသေးခင်က ပြုလုပ်သော အပျော်တမ်း ဘောလုံးပြိုင်ပွဲ မဲခွဲပွဲ အခမ်းအနားတခုတွင် သတင်းမီဒီယာများကို ရှင်းပြသည်။

မြန်မာနိုင်ငံသားများသည် ဘောလုံးအားကစားကို ချစ်မြတ်နိုးစွာအားပေးခဲ့ကြသလို ၎င်းအားကစားနည်း ဖွံ့ဖြိုးတိုးတက်ရန် လိုအပ်ကြောင်း ဘောလုံးအားကစားကို အရောင်မဆိုးဘဲ အားကစားဟုသာ မြင်ပေးကြရန် ဦးဇော်ဇော် က ထပ်လောင်း တိုက်တွန်း သွားသည်။

ဦးဇော်ဇော် က “ဘောလုံးကို ဘောလုံးလို့ပဲ ကျနော်တို့က မြင်ပါတယ်။ အဓိကကတော့ ဘောလုံးအားကစားနည်းက ကမ္ဘာမှာ ပိုပြီးတော့ ရင်းနှီးမှု၊ နွေးထွေးမှု၊ ချစ်ခင်မှု နောက်ပြီးတော့ ဘောလုံး အပေါ်မှာ နိုင်ငံရေး၊ ဘာသာရေး၊ လူမျိုးရေး စွက်ဖက်မှု မရှိဘဲနဲ့ ပိုပြီးတော့ စည်းရုံးသွားတဲ့ ဟာမျိုးကိုဘဲ ကျနော်တို့က မြင်ချင်တာပါ။ ဒါကြောင့်မို့ ကျနော်တို့က ဘောလုံး အားကစား ပေါ်မှာ အခြေခံပြီးတော့ ပိုပြီးတော့ စုစည်းမှု၊ ညီညွှတ်မှု၊ စည်းရုံးမှုကို ကျနော်တို့က ရစေချင်တယ်။ ဒါကိုပဲ အဓိက ထားတယ်” ဟု ပြောသည်။

လိဒ်ယူနိုက်တက်အသင်း ပါဝင်မယ့် AYA Bank Tour 2018 ပွဲစဉ် စီစဉ်ဆောင်ရွက်ရခြင်းနှင့် ပတ်သက်ပြီး မြန်မာနိုင်ငံ ဘောလုံး အဖွဲ့ချုပ် (MFF)၊ လိဒ်ယူနိုက်တက်မှ တာဝန်ရှိသူများ၊ ဧရာဝတီဘဏ်မှ တာဝန်ရှိသူများက ဧပြီလ ၂၄ ရက်နေ့တွင် ရန်ကုန်မြို့ တွင် ရှင်းလင်းခဲ့ကြသည်။

ယင်းရှင်းလင်းချက်တွင် မြန်မာဘောလုံး အသင်းအနေဖြင့် “နိုင်ငံတကာ အသင်းများ၊ ဥရောပ ကလပ်အသင်းများနှင့် ထိတွေ့ ကျွမ်းဝင်းခြင်းဖြင့် နိုင်ငံတကာ အတွေ့အကြုံများ ရရှိစေရန်၊ တစ်ဦးချင်း ယုံကြည်မှုနှင့် စွမ်းရည် မြင့်မားလာစေရန် ရည်ရွယ်” ကြောင်း ထောက်ပြသွားသည်။

MFF ၏ ထုတ်ပြန်ချက်အရ လိဒ်ယူနိုက်တက်အသင်းနှင့် ကစားမည့် MNL ညွှန်ပေါင်း အသင်းတွင် လက်ရွေးစင်ဖြစ်ရန် အလား အလာရှိသော ကစားသမားများ ပါဝင်လည်မည်ဖြစ်သလို လက်ရွေးစင်ဟောင်းများလည်း ပါဝင်လာမည်ဖြစ်ကြောင်းနှင့် နိုင်ငံခြားသား ကစားသမား အချို့လည်း ပါဝင်လည်မည်ဖြစ်သည်။

ဦးမျိုးလှိုင်ဝင်း က “လိဒ်ယူနိုက်တက်အသင်းက လာကန်တဲ့ ဥစ္စာကိုလည်း ကျနော်တို့က ဟိုးအရင်ကတည်းက စောင့်မျှော်တယ်။ မဖွံ့ဖြိုးသေးတဲ့ နိုင်ငံ၊ သူတို့လည်း ဒါမျိုး တခါမှ မပံ့ပိုးရသေးတဲ့ နိုင်ငံကို လာပံ့ပိုးတယ်။ ကျနော်တို့ကလည်း သူတို့ရဲ့ တိုးတက်နေတဲ့ နည်းစနစ်ပိုင်းတွေကို ရမယ်ဆိုတော့ နှစ်ဦး နှစ်ဘက်
အကျိုးရှိတယ်” ဟု ဆိုသည်။

အားကစားကဏ္ဍကို လူ့အခွင့်အရေးနှင့် နိုင်ငံရေးသမားတို့၏ ဝင်ရောက်စွက်ဖက်ဝေဖန် မှုများနှင့် ပတ်သက်၍ လိဒ် ယူနိုက်တက် ပိုင်ရှင် အန်ဒရေ ရာဒရဇ် ဇာနီက အသင်း၏ ပရိတ်သတ်ကို အိတ်ဖွင့်ပေးစာတစောင် ရေး၍ အသိပေးရာတွင် သူ့အနေဖြင့် မြန်မာနိုင်ငံသို့ ကြိမ်ဖန်များစွာ သွားရောက်ခဲ့ဖူးကြောင်း၊ မြန်မာပြည်ဟာ သူ့ရဲ့ နှလုံးသားမှာ ထင်ကျန် နေကြောင်း ဆိုသည်။

ထို့အပြင် ၎င်း၏ အသင်းအနေဖြင့် မြန်မာနိုင်ငံကို အခကြေးငွေယူပြီး သွားရောက်ကစားခြင်း မဟုတ်ကြောင်း၊ ဝေဖန်မှုများ ရှိလာမည်ကို ကြိုသိသော်လည်း ဘောလုံး ဖွံ့ဖြိုးတိုးတက်ရေးကို လုပ်ဆောင်ရန်ဖြစ်သလို လျင်မြန်စွာတိုးတက်နေသော အရှေ့တောင်အာရှ နိုင်ငံများ အကြားတွင် လိဒ်ယူနိုက်တက်ကို ပိုမို၍ လူသိများစေရန် မိတ်ဆက်ခြင်းလည်း ဖြစ်ကြောင်း ရေးသားဖော်ပြထားသည်။

လိဒ်ယူနိုက်တက် အသင်း အနေဖြင့် မြန်မာပြည်ခရီးစဉ်ကို လာရောက်ရန် ဆုံးဖြတ်ပြီးဖြစ်သလို မြန်မာနိုင်ငံတွင်လည်း လိဒ်ယူနိုက်တက် အသင်းနှင့် ကစားမည့် ပွဲစဉ် ၂ ခုလုံး အတွက် မေလ ၃ ရက်နေ့နှင့် ၅ ရက်နေ့မှ စတင်ကာ ရန်ကုန်နှင့် မန္တလေး မြို့ကြီးများတွင် စတင်ရောင်းချပေးနေပြီဖြစ်သည်။

Myanmar National League All Stars အသင်းနှင့် ကစားမည့်ပွဲစဉ်အတွက် ဝင်ကြေး ရိုးရိုးတန်း ကျပ် ၂၀၀၀၊ ၃၀၀၀ ကျပ်နှင့် အထူးတန်း ကျပ် ၄၀၀၀ နှုန်းဖြင့် ရန်ကုန်မြို့ရှိ ဧရာဝတီဘဏ် ခွဲများ၊ သုဝဏ္ဏကွင်း၊ အောင်ဆန်းကွင်းနှင့် ပဒုမ္မာကွင်းတို့တွင် ရောင်းချပေးနေလျှက် ရှိသည်။

ထို့အတူ မန္တလေးမြို့ မန္တလာသီရိ ကွင်းကြီးတွင် မြန်မာ့လက်ရွေးစင်အသင်းနှင့် ကစားမည့် ပွဲစဉ်အတွက် ကြိုတင် လက်မှတ်များကို မေလ ၅ ရက်နေ့မှ စတင်ကာ မန္တလေးမြို့ပေါ်ရှိ ဧရာဝတီဘဏ်ခွဲများနှင့် မြန်မာဘောလုံး အကယ်ဒမီတို့တွင် ရိုးရိုးတန်းအတွက် ကျပ် ၂၀၀၀၊ အထူးတန်းအတွက် ကျပ် ၃၀၀၀ နှုန်းဖြင့် ရောင်းချပေးသွားမည်ဖြစ်ကြောင်း MFF က သတင်း ထုတ်ပြန် ထားသည်။

လိဒ်ယူနိုက်တက် အသင်းသည် တချိန်က အင်္ဂလန် ပရီးမီးယားလိဂ်တွင် မန်ချက်စတာယူနိုက်တက်၊ အာစင်နယ်နှင့် လီဗာပူး ကဲ့သို့သော အသင်းကြီးများကို ဒုက္ခပေးလေ့ရှိသော အသင်း တသင်းအဖြစ် မြန်မာ ပရိတ်သတ်များအကြား ရင်းနှီးခဲ့ပြီး MFF ၏ သတင်းထုတ်ပြန်ချက်အရ AYA Bank Tour 2018 ပွဲတွင်လည်း အင်္ဂလန် ချန်ပီယံရှစ်ပွဲတွင် ပါဝင်ကစားနေသည့် အဓိက ကစားသမား အချို့ ပါဝင်မည် ဖြစ်ကြောင်း သိရသည်။

လိဒ်ယူနိုက်တက် အသင်းသည် အသင်းပေါင်း ၂၄ သင်းနှင့် ယှဉ်ပြိုင်နေသည့် အင်္ဂလန် ချန်ပီယံရှစ်တွင် ယှဉ်ပြိုင်ကစား နေလျှက် ရှိပြီး လက်ရှိအချိန်အထိ ၄၅ ပွဲကစားထားပြီး ၅၇ မှတ်ဖြင့် အဆင့် ၁၄ တွင် ရပ်တည်နေလျှက်ရှိသည်။ လက်ကျန် ပွဲစဉ်အဖြစ် မေလ ၆ ရက်နေ့တွင် QPR အသင်းနှင့် ကစားအပြီး မေလ ၇ ရက်နေ့တွင် မန်ချက်စတာမြို့မှ တဆင့် မြန်မာနိုင်ငံသို့ ထွက်ခွာလာမည် ဖြစ်ကြောင်းသိရသည်။

The post ဝေဖန်မှုများကို ကျော်ဖြတ်၍ Leeds United မြန်မာနိုင်ငံကို ရောက်လာမည် appeared first on ဧရာဝတီ.

ကမ္ဘာပေါ်မှာ လူကြိုက်အများဆုံး အမှတ်ပေး ဘောလုံးပြိုင်ပွဲ ရှိရာ နိုင်ငံ၊ အာရှရဲ့ လူကြိုက်အများဆုံး အသင်းတွေ ရှိရာနိုင်ငံ၊ ပြည်တွင်းမှာလည်း နိုင်ငံ အသင်း အလိုက် လူကြိုက်များတာ ဆိုရင် အင်္ဂလန်က ထိပ်ဆုံး စာရင်းဝင်မယ် ထင်ပါတယ်။ ကမ္ဘာ့ဖလားကို ၁ ကြိမ် ကိုင်မြှောက်ဖူးတယ်၊ ဒါပေမယ့် ၁ ကြိမ်ပါပဲ။ ရာစုနှစ်ဝက်နီးပါး ကမ္ဘာ့ဖလားနဲ့ အလှမ်းဝေနေပါတယ်။ ပြောရရင် ကမ္ဘာ့ဖလား ပြိုင်ပွဲလို့ ဆိုလိုက်တာနဲ့ အင်္ဂလန်က ဟော့နေပြီ၊ ဒါပေမယ့် တကယ်တမ်း အောင်မြင်မှုတော့ ကောင်းကောင်း မရလှပါ။ သို့မယ့် ၂၀၁၈ ကမ္ဘာ့ဖလားမှာတော့ အခွင့်အလမ်း တချို့ရှိနေတယ် လို့ သုံးသပ်ကြပါတယ်။

The Football Association လို့ ဆိုတဲ့ အင်္ဂလန် ဘောလုံးအဖွဲ့ချုပ် FA ရဲ့ လက်အောက်ခံ အသင်းပါ။ အသင်းကို အမည်ပြောင် အနေနဲ့ The Three Lions (ခြင်္သေ့သုံးကောင်) လို့ ခေါ်ကြပါတယ်။ ဒါကလည်း ဘောလုံး အသင်း အမှတ် တံဆိပ်မှာ ခြင်္သေ့သုံးကောင်ကို သုံးထားလို့ပါ။ ဥရောပ ဘောလုံး အဖွဲ့ချုပ် UEFAနယ်ဝင် အသင်းပါ။

လက်ရှိ အင်္ဂလန် အသင်းကို နည်းပြ အဖြစ် Gareth Southgate (ဂါရက် ဆောက်ဂိတ်) က ကိုင်တွယ်နေပြီး အသင်းခေါင်းဆောင် နေရာကိုတော့ နာမည်ကျော် ကစားသမား ဝိန်းရွန်းနီ အနားယူပြီးနောက်ပိုင်း တိတိကျကျ သတ်မှတ် တာဝန်ယူစေခြင်း မတွေ့ရသေးပဲ အဆင်ပြေသလို ထားရှိ ကစားနေစေတာ တွေ့ရပါတယ်။ အသင်းက အိမ်ကွင်း အနေနဲ့တော့ Wimble Stadium ကို အသုံးပြုတာ တွေ့ရပါတယ်။

အသင်းက အိမ်ကွင်းမှာ အဖြူရောင် အင်္ကျီနဲ့ ခြေအိတ်ကို ဝတ်ဆင်တယ်၊ ရိုးရှင်းတယ် လို့ ဆိုရမှာပါ။ အခြား အနားကွပ်၊ အလှကွက်တွေ ဘာမှ မပါပါဘူး။ ဘောင်းဘီက အပြာရောင် ပြောင်ပဲ ဖြစ်ပါတယ်။ အဝေးကွင်းမှာတော့ အင်္ကျီနဲ့ ခြေအိတ် က အနီရောင် ဖြစ်ပါတယ်။ အင်္ကျီမှာ ရင်ဘတ်နေရာအတွင်း အပေါင်း လက္ခဏာ အမှတ်တံဆိပ်ကို အနီဖျော့ အသားခံပေါ်မှာ အနီရောင်ရင့်ရင့်နဲ့ ရိုက်နှိပ်ထားပါတယ်။ ဘောင်းဘီကတော့ အဖြူရောင်ပဲ ဖြစ်ပါတယ်။

လက်ရှိ ဖီဖာ အဆင့် သတ်မှတ်ချက် အရ အဆင့် ၁၃ မှာ ရှိနေပါတယ်။ ဒါဟာ ဧပြီလ အတွင်း အဆင့် ၁၈ ကနေ ၅ ဆင့် တက်လာတာပါ။ အသင်းက ကမ္ဘာ့ဖလား ၁ ကြိမ် ရဖူးသည့်တိုင်အောင် ထူးခြားချက်က ဖီဖာ အဆင့် သတ်မှတ်ချက် အဆင့် ၁ မရဖူးတာပဲ ဖြစ်ပြီး သမိုင်းတလျှောက် အမြင့်ဆုံး အဆင့် အဖြစ် ၂၀၁၂ ခုနှစ် သြဂုတ်လ အတွင်းက အဆင့် ၃ ထိ ၁ ကြိမ်ပဲ ရောက်ဖူးတာပါ။ စံချိန်တင် အဆင့် နိမ့်ကျမှု အဖြစ်နဲ့တော့ ၁၉၉၆ ခုနှစ် ဖေဖော်ဝါရီ အတွင်းက အဆင့် ၂၇ ထိအောင် ရောက်သွားဖူးပါတယ်။

အသင်းက နိုင်ငံတကာပွဲစဉ် ကစားမှု အနေနဲ့ နိုင်ငံ အသင်းတွေထဲမှာ အစောဆုံး ကစားတဲ့ အသင်း စာရင်းမှာ ပါရှိနေပြီး ပထမဆုံး ပွဲစဉ်ကို ၁၈၇၂ ခုနှစ် နိုဝင်ဘာ ၃၀ ရက်ကတည်းက စကော့တလန် နိုင်ငံမှာ စကော့တလန်နဲ့ ကစားခဲ့ပြီး အဆိုပါ ပွဲမှာ ဂိုး မရှိ သရေ ကျခဲ့ပါတယ်။ အကြီးမားဆုံး နိုင်ပွဲ အဖြစ်နဲ့တော့ ၁၈၈၂ ခုနှစ် ဇူလိုင် ၃၁ ရက်က အိုင်ယာလန်မှာ ကစားတဲ့ အိုင်ယာလန်နဲ့ ပွဲမှာ ၁၃ ဂိုးပြတ် အနိုင်ရခဲ့တာပါ။ အသင်းက အကြီးမားဆုံး ရှုံးပွဲ အဖြစ် မထင်မှတ်ပဲ အသင်းငယ် တသင်းကို ဂိုးပြတ် ရှုံးထားပါတယ်။ ၁၉၅၄ ခုနှစ် မေ ၂၃ ရက်က ဟန်ဂေရီမှာ ကစားတဲ့ ဟန်ဂေရီနဲ့ ပွဲမှာ မထင်မှတ်ပဲ ၇ ဂိုး ၁ ဂိုးနဲ့ ရှုံးထားတာ ဖြစ်ပါတယ်။

ကမ္ဘာ့ဖလားနဲ့ ပတ်သတ်ရင်တော့ အစဉ်အလာ ကြီးမားတဲ့ အသင်းလို့ ဆိုနိုင်ပြီး ၁၉၅၀ ကတည်းက ပထမဆုံး ကမ္ဘာ့ဖလား ခြေစစ်ပွဲ အောင်ခဲ့တာ ဖြစ်ပြီး အခုထိအောင် ၁၅ ကြိမ်ထိ ဝင်ခွင့်ရထားပါတယ်။ ကမ္ဘာ့ဖလား ၁ ကြိမ် ရဖူးပြီး ၁၉၆၆ ခုနှစ်က ဖြစ်ပါတယ်။ ဥရောပချန်ပီယံဖလား (ပြည်တွင်းမှာ ယူရိုပြိုင်ပွဲ) လို့ လူသိများတဲ့ ပြိုင်ပွဲမှာလည်း ၁၉၆၈ ခုနှစ်ကနေ အခုထိ ၉ ကြိမ် ဝင်ပြိုင်ထားပြီး ၁၉၆၈ ခုနှစ်နဲ့ ၁၉၉၆ တွေမှာ တတိယ ၂ ကြိမ် ရဖူးထားပါတယ်။

အင်္ဂလန်ဆိုတာ ကမ္ဘာပေါ်က သက်တမ်းအရင့်ဆုံး ဘောလုံး ၂ သင်းထဲက တသင်းလည်း ဖြစ်ပါတယ်။ နောက်တသင်းက စကော့တလန်ပါ။ ၁၈၇၂ က ကစားတဲ့ အင်္ဂလန်နဲ့ စကော့တလန် ပွဲဟာ ကမ္ဘာ့ပထမဆုံး နိုင်ငံတကာ ဘောလုံးပွဲစဉ်လည်း ဖြစ်ခဲ့ပါတယ်။

အသင်းက လာမယ့် ကမ္ဘာ့ဖလားမှာ အုပ်စုချောင်တယ် လို့ ဆိုနိုင်ပြီး ပနားမား၊ တူနီးရှား၊ ဘယ်ဂျီယန်တို့နဲ့ တအုပ်စုတည်း ကျနေပါတယ်။ အင်္ဂလန် အနေနဲ့ သတိထားစရာ ဘယ်ဂျီန် တသင်းပဲ ရှိပြီး အခြား အသင်းတွေကတော့ အနိုင်ကစားနိုင်ဖို့ ရှိနေတာပါ။

အုပ်စုပွဲစဉ် အနေနဲ့တော့ ဖွင့်ပွဲ အဖြစ် ဇွန်လ ၁၈ ရက်နေ့မှာ တူနီးရှား၊ ၂၄ ရက်နေ့မှာ ပနားမားနဲ့ ၂၈ ရက်နေ့မှာ ဘယ်ဂျီယန်တို့နဲ့ ကစားရမှာပါ။ ပထမ ပွဲစဉ် ၂ ပွဲမှာ ရမှတ် အပြည့် ယူထားနိုင်မယ် ဆိုရင် ဘယ်ဂျီယန်နဲ့ ဘယ်လို ရလဒ်ပဲ ထွက်ထွက် အုပ်စု ဒုတိယတော့ ရနိုင်ဖို့ များပြီး နောက်တဆင့် အလွယ်တကူ တက်ရောက်နိုင်လိမ့်မယ် လို့ ESPN က သုံးသပ်ထားတာ တွေ့ရပါတယ်။

အသင်းရဲ့ စံချိန်ရှင်တွေကို ကြည့်မယ် ဆိုရင် ပွဲအများဆုံး ကစားထားပေးသူက ၁၉၇၀ ကနေ ၁၉၉၀ ထိအောင် နှစ် ၂၀ ကြာ အသင်း အတွက် ကစားပေးခဲ့သူ ဂိုးသမား Peter Shilton (ပီတာ ရှယ်တန်) ရှိပြီး သူက ၁၂၅ ပွဲ ဝင်ဖမ်းထားပါတယ်။

အသင်း အတွက် ဂိုးအများဆုံး သွင်းယူပေးထားသူကတော့ ၂၀၁၆ ခုနှစ်ကမှ နိုင်ငံ လက်ရွေးစင်ကစားသမား ဘဝကနေ အနားယူလိုက်တဲ့ နာမည်ကျော် တိုက်စစ်မှူး Wayne Rooney (ဝိန်းရူနီ)  ရှိပြီး သူက ပွဲပေါင်း ၁၁၉ ပွဲမှာ ၅၃ ဂိုး သွင်းယူ ပေးထားခဲ့တာ ဖြစ်ပါတယ်။

ဂန္ထဝင် တိုက်စစ်မှူး Bobby Charlton (ဘော်ဘီ ချာလ်တန်) ရဲ့ စုစုပေါင်း သွင်းဂိုး ၄၉ ဂိုးကိုတောင် နှစ်ပေါင်း ၅၀ လောက် ကျော်ဖြတ်နိုင်ဖို့ ခက်ခဲ့တဲ့ စံချိန်ကို ရူနီက ကျော်ဖြတ်ထားတာ ဖြစ်ပြီး လက်ရှိ သွင်းဂိုးနှုန်းတွေ အရတော့ ရူနီရဲ့ သွင်းဂိုး စံချိန်ကို ကျော်ဖြတ်နိုင်မယ့် တိုက်စစ်မှူးသစ် ထွက်ပေါ်လာဖို့ အချိန်ပေး စောင့်ရပါလိမ့်ဦးမယ်။ ဒါပေမယ့် လက်ရှိ အင်္ဂလန်မှာ ကြယ်ပွင့်သစ် ဟာရီကိန်းတော့ ရှိနေပါတယ်။ စပါး အသင်း အတွက် ဂိုးသွင်းစက် ဖြစ်နေသလို အသင်းကို လည်း ပရီးမီးယားလိဂ်မှာ ထိပ်ပိုင်း အဆင့်မှာ ရပ်တည် ရာသီ သိမ်းနိုင်အောင် ကူညီပေးနေသူပါ။

အခု ကမ္ဘာ့ဖလားမှာလည်း အင်္ဂလန်အတွက် အားကိုးရာဟာ ဟာရီကိန်းလို့ ယုံကြည်နေသူတွေ ရှိပါတယ်။ တကယ်ရော အခုနှစ် အင်္ဂလန်ကို ဟာရီကိန်းက အမြင့်ပျံစေနိုင်မှာလား။ အောင်မြင်မှုနဲ့ အလှမ်းဝေးနေတဲ့ အင်္ဂလန် အတွက် အခုနှစ် ကမ္ဘာ့ဖလားဟာ နောက်တဆင့် တက်ဖို့ လွယ်ပေမယ့် အဆင့် တခု ရဖို့တော့ အသင်းကောင်းတွေ အများကြီးကို ရင်ဆိုင်ရမှာပါ။ ခြေင်္သိ့သုံးကောင် ဘယ်လောက် အောင်မြင်နိုင်မှာလဲ ဆိုတာကတော့ မကြာခင် တွေ့မြင့်ရတော့မှာပါ။

Ref: en.m.wikipedia.org

The post အုပ်စုချောင်တဲ့ ဟာရီကိန်းတို့ အင်္ဂလန်အသင်း ကမ္ဘာ့ဖလားမှာ အမြင့်ပျံနိုင်မလား appeared first on ဧရာဝတီ.

အားကစားဖိနပ်တွေကို ကြိုက်နှစ်သက်သူ တယောက်အတွက် ထွက်သမျှ အရောင်စုံ၊ ဒီဇိုင်းစုံဖိနပ်တွေက လိုချင်စရာပါ။ အခုနောက်ပိုင်း ထရိန်နာလို့ခေါ်တဲ့ အားကစားဖိနပ်တွေကို အားကစားလုပ်ဖို့ အတွက်တင် မဟုတ်ဘဲ ပုံမှန် ထသွားထလာ စတိုင်၊ နောက်ဆုံး တန်ဖိုးကြီးဖိနပ်တွေဆို ကုတ်အင်္ကျီနဲ့တောင် တွဲဖက် ဝတ်ဆင်ပြီး ဒီဇိုင်းထွင်လာကြပါပြီ။

တန်ဖိုးကြီး ထရိန်နာ ဖိနပ်တစုံ ဝယ်ထားပြီး စီးလိုက်ကာမှ ညစ်ပတ် ပေရေသွားတဲ့အခါ အရင်အတိုင်း ဖြစ်အောင် ဘယ်လို ပြန်သန့်စင်မလဲ။ စနစ်တကျ သေချာမလုပ်ရင် ဖိနပ်ပျက်စီး သွားနိုင်လို့ သူ့အချက်နဲ့သူ အစဉ်လိုက်တိုင်း ပြန်သန့်စင် ပေးမယ်ဆိုရင် အသစ်အတိုင်း ပြန်ဖြစ်မှာပါ။ ဆိုင်ကို ပို့လိုက်ရင် အချိန်ပိုင်းအတိုင်း ပြန်သန့်စင်သွားတယ်ဆိုပေမယ့် ငွေအကုန်အကျ ပိုများစေပါတယ်။ ဒါဆိုရင် ထရိန်နာဖိနပ် တရံကို အိမ်မှာပဲ ဘယ်လို သန့်ရှင်းရေး ပြန်လုပ်မလဲ။

အရင်ဆုံး ညစ်ပတ်နေတဲ့ ဖိနပ်တရံလုံးကို Brush နဲ့ လိုက်တိုက်ပါ။ တိုက်မယ့် brush က ကြမ်းတာမျိုး မဟုတ်ဘဲ နူးညံ့တာမျိုး ရွေးပါ။ ကိုယ့်ဖိနပ် အရွယ်အစား၊ ပုံစံဒီဇိုင်းပေါ် မူတည်ပြီး တိုက်မယ့် brush ကို သင့်တော်ရာ ရွေးချယ်ပါ။

မျက်နှာသုတ်ပါဝါလို အမွေးပွပြီး စုပ်ယူနိုင်တဲ့ အဝတ်ကို ဆပ်ပြာရည်ဆွတ်ပြီး ဖိနပ်ကို ဖြည်းဖြည်းချင်းစီ တိုက်ပေးပါ။ အစွန်းများနေတဲ့ နေရာဆို စိတ်ရှည်ရှည်နဲ့ တိုက်ပေးဖို့ လိုပါတယ်။ တကယ်လို့ အဝတ်နဲ့ တိုက်လို့ မရနိုင်လောက်တဲ့ အစွန်းမျိုးဆိုရင် သွားတိုက်တံအဟောင်း သုံးပြီး သွားတိုက်ဆေး အနည်းငယ်နဲ့ တိုက်ပေးကြည့်ပါ။

နည်းနည်း ညစ်ပတ်သွားတာနဲ့ ပြန်သန့်စင်ပေးပါ။ အပျင်းကြီးပြီး နောက်မှ တိုက်မယ် မလုပ်ပါနဲ့။ စွန်းသွားတဲ့ အညစ်ကြေးတွေက အချိန်ကြာလေ သင့်ထရိန်နာ ဖိနပ်မှာ စွဲကျန်လေဖြစ်ပြီး ဖျက်ရခက်လို့ ခပ်မြန်မြန်လေး ပြန်သန့်စင်ပေးဖို့ လိုပါတယ်။

ထရိန်နာဖိနပ်တွေကို ထားတဲ့အခါ စနစ်တကျဖြစ်ဖို့ လိုပါတယ်။ ဝယ်လာတဲ့ ဘူးကနေ ဖောက်လိုက်တာနဲ့ သူ့ရဲ့ သက်တမ်းက တဖြည်းဖြည်း ကျဆင်းသွားတာပါ။ ဒါကို မြန်မြန် မပျက်စီးအောင် အက်ဆစ် မပါတဲ့ တစ်ရှူးစက္ကူနဲ့ တရက်ခြား တခါ တိုက်တိုက်ပေးပါ။ လေဝင်လေထွက် ကောင်းပြီး ခြောက်သွေ့တဲ့နေရာမှာထားဖို့ လည်းလိုပါတယ်။ ဖိနပ်ကြိုးတွေကိုလည်း သေချာသန့်စင်ထားသင့်ပြီး ဖိနပ်ကနေ အနံ့ဆိုးတွေ မထွက်အောင် အနံ့ပျောက်ဆေးရည် မကြာခဏ ဖြန်းပေးပါ။

အထက်မှာ ပြောခဲ့သလို စနစ်တကျ တိုက်ချွတ် သန့်စင်ပြီးသွားပြီဆိုရင် လေဝင်လေထွက်ရှိတဲ့ နေရာမှာ အခြောက်ခံထားပါ။ နေရောင် တိုက်ရိုက်ကျတဲ့နေရာမျိုးမှာ မထားပါနဲ့။ သန့်စင်ပြီးတဲ့ ဖိနပ်တွေကို အနံ့အသက်ပါ ပျောက်သွားအောင် အနံ့ပျောက်ဆေးရည် ဖြန်းပြီး သိမ်းပါ။ ဒီလိုစနစ်တကျ သန့်စင်ပေးမယ်ဆိုရင် ဈေးကြီး ပေးဝယ်ထားရတဲ့ ထရိန်နာ ဖိနပ်တရံ သက်တမ်း ကြာရှည်ခံစေမှာပဲ ဖြစ်ပါတယ်။

Ref: Vogue

The post အားကစား ဖိနပ်တရံကို စနစ်တကျ ဘယ်လို သန့်ရှင်းရေးလုပ်မလဲ appeared first on ဧရာဝတီ.

ကိုယ်ခံပညာ ဘက်စုံသုံး MMA ကမ္ဘာ့မစ်ဒယ်ဝိတ် ချန်ပီယံခါးပတ် ကာကွယ်ပွဲအဖြစ် ဘရာဇီးဖိုက်တာ လီရန်ဒရို အက်တိုင်းဒီးစ် (Leandro Ataides) နှင့် ထိုးသတ်ရန် စိတ်လှုပ်ရှားနေကြောင်း MMA မစ်ဒယ်ဝိတ်နှင့် လိုက်ဟဲဗီးဝိတ် ချန်ပီယံ အောင်လအန်ဆန်း က မေလ ၁၃ ရက်နေ့က ထုတ်ဖော်ပြောကြားခဲ့သည်။

လီရန်ဒရိုအက်တိုင်းဒီးစ်မှာ အင်ဒိုနီးရှားနိုင်ငံ ဂျကာတာမြို့တွင် မေလ ၁၂ ရက်နေ့ကကျင်းပခဲ့သည့်
Grit and Glory ပွဲစဉ်တွင် အောင်လအန်ဆန်း၏ ပြိုင်ဘက်ဟောင်းဖြစ်ပြီး ကမ္ဘာ့မစ်ဒယ်ဝိတ် ချန်ပီယံဟောင်းဖြစ်သူ ဗစ်တာလီဘစ်ဒက်ရှ်အား အလဲထိုးအနိုင်ယူခဲ့သည့် အတွက် ဇွန်လ ၂၉ ရက် နေ့တွင် လက်ရှိချန်ပီယံ အောင်လအန်ဆန်းနှင့် မစ်ဒယ်ဝိတ် ချန်ပီယံခါးပတ်လုပွဲ ယှဉ်ပြိုင် ထိုးသတ်ခွင့် ရရှိခဲ့ကြောင်းသိရသည်။

အောင်လအန်ဆန်း က “လီရန်ဒရိုအက်တိုင်းဒီးစ် ဆိုတဲ့ ပြိုင်ဖက်နဲ့ ယှဉ်ပြိုင်ရမယ့်ပွဲအတွက် ကျနော် အရမ်းပဲ စိတ်လှူပ်ရှား နေပါတယ်။ ကျနော်တို့နှစ်ယောက်လုံးမှာ လက်သီးတွေ၊ ခြေကန်ချက်တွေ၊ ဒူးတိုက်ချက်တွေနဲ့ ပွဲသိမ်းနိုင်မယ့် အခြေအနေ ရှိကြတယ်။ ဒါဟာတကယ့် စိတ်လှူပ်ရှားစရာ ဖြစ်ပါတယ်” ဟု ၎င်း၏ လူမှုဆက်သွယ်ရေး ကွန်ရက် Facebook စာမျက်နှာမှ တဆင့် ထုတ်ဖော်ပြောကြားခဲ့သည်။

ထိုပွဲနှင့်ပတ်သက်ပြီး အောင်လအန်ဆန်း က “ဒီပွဲကို ဘယ်သူတွေ ကြည့်ကြမလဲ။ ကျနော့်အနေနဲ့ ပရိသတ်အားလုံးအတွက် ကိုယ်စားပြုပြီးအကောင်းဆုံး ယှဉ်ပြိုင်မှာဖြစ်ပါတယ်” ဟု ဆိုသည်။

အောင်လအန်ဆန်းနှင့် အက်တိုင်းဒီးစ်တို့ ချန်ပီယံခါးပတ်လု ထိုးသတ်မည့် ပွဲစဉ်ကို One Championship အဖွဲ့က ဇွန်လ ၂၉ ရက်နေ့တွင် ကျင်းပမည်ဟုထုတ်ပြန်ထားသော်လည်းပွဲကျင်းပမည့်နိုင်ငံကိုထုတ်ဖော် ကြေညာခြင်းမရှိသေးကြောင်းသိရသည်။

အောင်လအန်ဆန်းကတော့ ချန်ပီယံခါးပတ် ကာကွယ်သည့် ပွဲစဉ်မှာ မြန်မာနိုင်ငံတွင် မဟုတ်ဘဲ ပြည်ပနိုင်ငံတစ်ခုတွင် ထိုးသတ်ရမည်ဟု ယခုနှစ် ဖေဖော်ဝါရီလအတွင်းက ပြုလုပ်ခဲ့သည့် ဘီဘီစီ မြန်မာပိုင်းနှင့် အင်တာဗျူးတွင် ထုတ်ဖော် ပြောဆိုထားသည်။

ထို့ကြောင့် မွေးရပ်မြေ မြန်မာနိုင်ငံတွင် မစ်ဒယ်ဝိတ်နှင့် လိုက်ဟဲဗီးဝိတ်ချန်ပီယံခါးပတ်များ ထိုးသတ်ရယူခဲ့သည့် အောင်လအန်ဆန်း အနေဖြင့် ဇွန်လ ၂၉ ရက်နေ့တွင် ယှဉ်ပြိုင်မည့် မစ်ဒယ်ဝိတ်ချန်ပီယံခါးပတ် ကာကွယ်ပွဲကို
ပြည်ပနိုင်ငံတစ်ခုတွင် ပထမဆုံး ထိုးသတ်ကာကွယ်သွားရဖွယ်ရှိသည်။

One Championship အဖွဲ့၏ တဦးတည်းသော နှစ်ထပ်ကွမ်းချန်ပီယံ အောင်လအန်ဆန်းမှာ အက်တိုင်းဒီးစ်နှင့် ပွဲစဉ်တွင် အနိုင်ရခဲ့ပါက နှစ်ထပ်ကွမ်းချန်ပီယံအဖြစ် ဆက်လက်ရပ်တည်နိုင်မည်ဖြစ်ပြီး ရှုံးနိမ့်ခဲ့ပါက မစ်ဒယ်ဝိတ်ချန်ပီယံဘွဲ့ စွန့်လွှတ်ရမည် ဖြစ်ကာ လိုက်ဟဲဗီးဝိတ်ချန်ပီယံအဖြစ်သာ ဆက်လက်ရပ်တည်နိုင်မည်ဖြစ်သည်။

ဘရာဇီးနိုင်ငံသား အက်တိုင်းဒီးစ်မှာ ပြိုင်ဘက်ကို ချုပ်ကိုင်သည့် ဘရာဇီးဂျူဂျစ်ဆုပညာ ခါးပတ်နက် အဆင့်ရှိသူဖြစ်ပြီး ၂၀၀၅ ခုနှစ်က ဘရာဇီးနိုင်ငံတွင် ကျင်းပသည့်ဂျူဂျစ်ဆုပြိုင်ပွဲတွင် ရွှေတံဆိပ်ရရှိခဲ့သူ ဖြစ်သည်။ ကိုယ်ခံပညာ ဘက်စုံသုံး တိုက်ခိုက်သည့် MMA လောကသို့ ၂၀၀၈ ခုနှစ်က စတင်ဝင်ရောက် ခဲ့သူဖြစ်ပြီးကစားသမား ဘဝတလျှောက် ၁၄ ပွဲ ထိုးသတ်ခဲ့ရာ ၁၁ ပွဲနိုင် ၃ ပွဲရှုံးရလာဒ် ပိုင်ဆိုင်ထားသူ ဖြစ်သည်။

မြန်မာပရိတ်သတ်တို့၏ အချစ်တော် အောင်လအန်ဆန်းမှာ၂၀၀၅ ခုနှစ်ကစတင်ကာ MMA လောကသို့ ဝင်ရောက်ခဲ့သူဖြစ်ပြီး ကစားသမားဘ၀ သက်တမ်း တလျှေက် ၃၂ ပွဲထိုး၊ ၂၂ ပွဲနိုင်၊ ၁၀ ပွဲရှုံးရလာဒ်ကို ပိုင်ဆိုင်ထားသူ ဖြစ်သည်။

ရန်ကုန်မြို့တွင် ၂၀၁၇ ခုနှစ် ဇွန်လက ကျင်းပသည့် Light of a Nation ပြိုင်ပွဲတွင်ကမ္ဘာ့မစ်ဒယ်ဝိတ် ချန်ပီယံ ဘစ်တာလီ ဘစ်ဒက်ရှ်ကို အနိုင်ရပြီး မြန်မာပြည် ကိုယ်စားပြု ပထမဆုံးသော မစ်ဒယ် ဝိတ်ချန်ပီယံ ဖြစ်လာခဲ့ပြီး ယခုနှစ် ဖေဖော်ဝါရီလက ကျင်းပခဲ့သည့် Quest For Gold ပြိုင်ပွဲတွင် ပြိုင်ဘက် မာချာဒိုကို အနိုင်ယူကာ မစ်ဒယ်ဝိတ်နှင့် လိုက်ဟဲဗီးဝိတ် နှစ်ထပ်ကွမ်း ချန်ပီယံ အောင်လအန်ဆန်းအဖြစ် မှတ်တမ်းသစ် ရေးထိုးနိုင်ခဲ့သူ ဖြစ်သည်။

ဆက်စပ် ဖတ်ရှုရန် – အောင်လအန်ဆန် နှစ်ထပ်ကွမ်းချန်ပီယံ သမိုင်းသစ် ရေးထိုးခဲ့ပြီ

The post ဘရာဇီးဖိုက်တာနှင့် ထိုးသတ်ရန် စိတ်လှုပ်ရှားနေသည့် အောင်လအန်ဆန်း appeared first on ဧရာဝတီ.